Dy lajme nga Podujeva

Dy lajme nga Podujeva

Qeveria komunale diskutoi draft raportin e Njësisë së revizionit të brendshëm të MEF-it

Podujevë, 17 nëntor 2003 (TN) – Në takimin e sotëm të Këshillit të Drejtorëve – KD të udhëhequr nga Kryeshefi i Ekzekutivit (KE) Ejup Visoka mori pjesë edhe Kryetari i komunës Agim Veliu, zv. kryetari Agim Kikaj dhe përfaqësuesja e UNMIK-ut An Sofi.

Në këtë mbledhje drejtori i Drejtorisë për administratë të përgjithshme Hamit Shala prezantoi raportin dhjetë mujor të punës së DAP për periudhën janar-tetor 2003 si dhe bëri disa propozime për rritjen e efikasitetit të punës në administratën civile, si: formimin e zyrave pritëse, funksionalizimin dhe ndërtimin e zyrave të vendit në bashkësi të fshatrave, shërbimi avokaturës publike, ngritjen e komisionit disiplinor dhe komisionit për ankesa.

Në mbledhjen e sotme u diskutua edhe Draft raporti i Njësisë së revizionit të brendshëm të Ministrisë për Ekonomi dhe Financa për të cilën referoi z. Mehmet Gashi, drejtor për buxhet dhe financa. z. Gashi raportoi edhe për projektet që do të financohen nga suficiti i buxhetit të Kosovës për investime kapitale në komunën e Podujevës.

Kryetari Agim Veliu kërkoi hartimin e strukturës së qartë të stafit komunal si dhe përshkrimin e vendeve të punës të secilës drejtori.


Podujevë: OSBE i prezantoi Qeverisë komunale menaxhimi e Zgjedhjeve 2004

Podujevë, 17 nëntor 2003 (TN) – Sot në sallën e Kuvendit komunal, organizuar nga OSBE u mbajt trajnimi me temën “Prezantimi i menaxhimit të zgjedhjeve për vitin 2004” ku morën pjesë Kryeshefi i Ekzekutivit dhe 12 drejtorët e drejtorive komunale.

“Qëllimi i këtij trajnimi është informimi i krijimit të Sekretariatit të KQZ (Komisionit Qendror Zgjedhor), rregullat e zgjedhjeve dhe plani tranzicional”, tha zyrtarja profesionale e zgjedhjeve për komunën e Podujevës zonja Sadie Mehmeti.

Ndërkaq zyrtari i lartë i OSBE-së Ioan Cristian Crampita deklaroi se ky ishte një prezantim për zgjedhjet 2004, i përqëndruar në transferin e përgjegjësive në organet komunale si dhe efikasitetin e zgjedhjeve, përkrahjen që administrata komunale duhet ti japë KKZ (Komisionit Komunal të zgjedhjeve).

Kryetari i KKZ-së i komunës së Podujevës Islam Demolli i cili me planin tranzicional do të quhet Zyrtar Ekzekutiv i KKZ-së prezantoi rolin e administratës komunale si dhe detyrat e administratës së përgjithshme, drejtorisë për buxhet dhe financa, asaj për arsim dhe drejtorisë së shërbimeve publike në kuadër të KKZ-së për ndihmën që duhet dhënë për zgjedhjet 2004.