Kuvendi i VI-të i LASH-it, Suedi

Kuvendi i VI-të i LASH-it në Suedi

SUEDI, 16 nëntor 2003 / TN / Nga Osman AHMETGJEKAJ

DEGA E LIDHJES SË ARSIMTARËVE SHQIPTARË NË SUEDI, MBAJTI KUVENDIN E SAJ TË VI-të.

SHKOLLA SHQIPE VATËR KOMBËTARE

Më datën 15.11.2003, në lokalin e Shkollës Fillore "Lagaholmsskolan" në Laholm të Suedisë, u mbajt Kuvendi i VI-të Zgjedhor i Lidhjes së Arsimtarëve Shqiptarë (LASH) Dega në Suedi, të cilën e udhëhoqi kryetari i deritashëm i degës Prof. dr. Bedri Paci. Në këtë Kuvend, ishte i pranishëm edhe Ministri për Kulturë, Sport dhe Çështje Jorezidenciale, z. Behxhet Brajshori. Gjithashtu të pranishëm ishin edhe shumë rektorë të shkollave fillore suedeze, të cilët me kënaqësi përcollën zhvillimin e punimit të Kuvendit, i cili ishte i organizuar në mënyrë të shkëlqyeshme dhe i begatuar edhe me një program kulturo-artistik të interpretuar nga nxënësit shqiptarë të Laholmit ku veçanërisht duhet dalluar pjesën teatrale "Romeo dhe Gjulieta" të interpretuar nga vëllezërit Ahmet dhe Ruzhdi Ahmeti, Gentiana Gjergjeku dhe Afërdita Rrahmani.

Në Kuvend ishin të pranishëm edhe disa anëtarë të Kryesisë së LDK-së Dega në Suedi, ku në emër të kësajë Dege, Kuvendin e përshëndeti kryetari i Degës së LDK-së në Suedi, z. Hysen Ibrahimi.

Në fillim, Prof. dr. Bedri Paci lexoi raportin e veprimtarisë së LASH-it mes dy kuvendeve, raport i cili edhe pse kishte disa vërejtje, u aprovua nga Kuvendi.

Në vazhdim, fjalën e mori Ministri për Kulturë, Sport dhe Çështje Jorezidente, z. Behxhet Brajshori, i cili në mes tjerash tha: Jam shumë i lumtur që sot gjendem këtu në Suedi për herë të parë dhe jam mjaft i kënaqur me arritjen e rezultateve të Lidhjes së Arsimtarëve Shqiptarë në Suedi. Sipas informatës që mora këtu, pothuajse 90 përqind të fëmijëve shqiptarë janë të përfshirë në mësimin e gjuhës amtare shqipe. Më vjen mirë që edhe drejtoreshat e shkollave fillore suedeze shprehën fjalë miradie sa i përket mësuesve dhe fëmijëve shqiptarë këtu në Suedi.

Veçanërisht, dua të potencoi finansimin e punëtorëve arsimor shqiptarë që bënë shteti suedez, ku arsimtarët shqiptarë këtu kishin të gjitha të drejtat dhe obligimet e barabarta si dhe vetë arsimtarët suedez, ku të gjitha këto, ishin të rregulluara me ligje suedeze dhe ndoshta këtu qëndron arsyja e përfshirjes aq të madhe të fëmijëve shqiptarë në mësimin gjuhës amtare. Më çuditi në aspektin pozitiv edhe ajo se nota e gjuhës amtare shqipe është e barabartë me notat tjera ashtu siq ishin të barabartë të gjithë nxënësit dhe arsimtarët shqiptarë me ata suedez. Unë po ju premtoi se angazhimi i ynë për diasporën shqiptare do të jetë më i madhë dhe se po u përcjelli përshëndetjet më të sinqerta të drejtorit të Departamentit për çështje jorezidente të Kosovës, z. Neriman Braha, i cili ka vendosur që rradhën t´ua lë 35 nxënësve nga Suedia, të cilët nën patronatin e këtijë Departamenti do të ftohen për një vizitë dhjetëditore në Kosovë – përfundoi fjalën e vet Ministri Brajshori.

Kuvendi zgjodhi kryesinë e re të LASH-it Dega në Suedi në këtë përbërje: z. Beqir Sadiku kryetar, zj. Fatmire Bunjaku nënkryetare, z. Osman Ahmetgjekaj sekretar, ndërsa z. Rizah Sheqiri, z. Muhamet Muriqi, zj. Burbuqe Berisha, z. Sinan Kastrati, zj. Fatime Kuçi dhe

z. Shaban Gashi, anëtarë të Kryesisë.

Kryetari i ri i LASH-it, z. Beqir Sadiku, pasi që përshëndeti të pranishmit dhe falënderoi për besimin e dhënë, tha: Lidhja e Arsimtarëve Shqiptarë në Suedi do të jetë Organ konsultativ i bashkëpunimit ndërmjet gjithë arsimtarëve shqiptarë në Suedi si dhe në bashkëpunim me organet përkatëse suedeze, në kontinuitet të përhershëm me Ministrinë e Arsimit të Republikës së Kosovës dhe Shqipërisë. Punimet e këtijë Kuvendi i përcolli edhe RTK-ja dhe disa mediume suedeze.

Kryesia e re e posazgjedhur e Lidhjes së Arsimtarëve Shqiptarë Dega në Suedi doli para Kuvendit duke falënderuar për besimin e dhënë dhe duke premtuar se do të punojmë me përkushtimin më të madhë në të mirë të shkollës shqipe, e cila është Vatër Kombëtare.

Në fund, Kryesia e LASH-it dhe Kryesia e LDK-së dega në Suedi, për nder të Ministrit Brajshori, shtruan një darkë solemne në Hotelin "Riviera" në qytetin e Båstadit.

Për LASH-in Dega në Suedi:
Osman Ahmetgjekaj, sektretar dhe kryetar i Komisionit për Informim