Mitrovicë: Anëtarët e Komitetit për Politikë dhe Financa shprehin përkrahje të plotë për organet e rendit dhe këkojnë nga ato që të angazhohen më tepër

Mitrovicë: Anëtarët e Komitetit për Politikë dhe Financa shprehin përkrahje të plotë për organet e rendit dhe këkojnë nga ato që të angazhohen më tepër

Mitrovicë,15 nëntor 2003 / Hysni SYLA - Zyrtar për informim i KK - Komiteti për Politikë dhe Financa i Kuvendit të Komunës ka dënuar ashpër incidentin e shkaktuar nga ekstremistët serbë të premtën, më 14.11.2003, në afrësi të urës kryesore mbi lumin Ibër.

Pikërisht në kohën kur incidenti ndodhi, anëtarët e KPF po debatonin për krijimin e kushteve për kthim të të gjithë të zhvendosurve nga komuna në pronat e tyre dhe për eleminimin e strukturave paralele, që janë pengesa më e madhe për realizimin e këtij qëllimi dhe të integrimit të qytetit.

Anëtarët e KPF vlerësuan se incidenti i shkaktuar nga ekstremistët serbë, është bërë me qëllim që të zhvlerësohen rezultatet e arritura në drejtim të krijimit të kushteve për qarkullim të lirë të të gjithë qytetarëve të komunës, në të gjitha drejtimet, të cilat kohëve të fundit ishin të dukshme e që është konfirmuar edhe nga BSHVL-ja, për ç’arësye ajo ia dorëzoi përgjegjësitë për kontrollimin e urës kryesore policisë dhe SHPK-së.

Komiteti për Politikë dhe Financa vlerësoi pozitivisht reagimin e polcisë dhe të SHPK-së për të ndërprer incidentin, por jo edhe aktivitetin pas, për shkak se nuk ka raportuar për asnjë ekstremist serb të arrestuar, të cilët tashmë një kohë të gjatë janë të njohur nga qytetarët.

Anëtarët e Komitetit për Politikë dhe Financa shprehin përkrahje të plotë për organet e rendit dhe këkojnë nga ato që të angazhohen më tepër e më seriozisht për arrestimin e shkaktarëve të incidenteve të shumta në veri të qytetit dhe për dorëzimin e tyre para organeve të gjyqësisë, sepse kjo do të ndikonte shumë në relaksimin e raporteve midis qytetarëve dhe në proceset e integrimit të qytetit.

Komiteti për Politikë dhe Financa, duke shprehur edhe njëherë përkrahjen për qytetarët e lagjeve veriore të qytetit për të pasur lëvizje të lirë e të pakufizuar në çdo kohë, kërkon nga ata që të mos dekurajohen nga sulmet e këtilla provokative të ekstremistëve serbë, por që të vazhdojnë me vendosmëri qarkullimin për në qytet nëpër rugën e tyre shekulore.