Përmbajtja:

• Deputetët miratuan Projektligjin për shëndetësinë

• Caktohet masa e paraburgimit për Valon Miftarin, pjesëtar i SHPK-së, për vrasje të dyfishtë

• Reagim i përfaqësuesve të 23 ndërmarrjeve të privatizuara ndaj AKM-së

• "Kosova kurrë më nuk do të jetë në përbërje të Serbisë", u tha në një debat në Beograd

• Prefekti i Nju Jorkut Blumberg dhe përfaqësues të komunitetit shqiptaro-amerikan do të vizitojnë Kosovën

• Sekretari i Përgjithshëm i NATO-s, Xhorxh Robertson të hënën viziton Kosovën

• Para drejtorëve të shkollave të komunës së Podujevës u prezentua projekti për përmirësimin e arsimit

• Gjilan: Kuvendi vendos për shpalljen e konkursit për projektin e zhvillimit të qendrës së qytetit

• Në Prizren u përurua solemnisht Qendra për Mirëqenien e Gruas

• Robertson thotë se Kosova duhet t'i përqëndrojë energjitë e saja tek plotësimi i standardeve

• Nuk do të ketë reduktime të punëtorëve shëndetësorë, por pastrim të listave të atyre që gjenden në mërgim

• UNMIK-ut nuk do t'i pengojë votimet në veri të Kosovës për zgjedhjet presidenciale të Serbisë

• Ali Sadriu bisedoi me menaxherët e KEK-ut

• Kryetarët dhe shefat e ekzekutivit të pesë komunave të Kosovës u njohën me programin elektronik të qeverisjes

• Në Prishtinë u themelua Akademia e Mjekësisë së Kosovës

• Në Muçibabë të Gjilanit hapet vendkalimi kufitar Kosovë – Serbi

• Rama kryeson ndaj Ngjelës në Tiranë

• Ferhat Dinosha thotë se UDSH angazhohet që Kuvendi i Malit të Zi të ketë edhe dhomën e pakicave

• Një ushtar amerikan është vrarë sot në Bagdad

• Trupat amerikane kanë vrarë 6 militantë irakianë

• Ministri italian i Mbrojtjes viziton ushtarët italianë të plagosur në sulmin e djeshëm në Irak

• Nga shpërthimi në Irak vriten 25 vetë

• Amerika kritikon raportin e Agjencisë Ndërkombëtare të Energjisë Atomike

• Gjykata e Londrës ka refuzuar kërkesën e Rusisë për ekstradimin e emisarit çeçen, Ahmed Sakajev

• Britania ka refuzuar kërkesën e Argjentinës për ekstradimin e ish-diplomatit iranian

• Të pakten 4 afganë janë vrarë nga një bombë e teledirigjuar

• Trupat amerikane kanë shkatërruar një fabrikë të zbrazët të ngjyrërave në Bagdad

• Japonia do të shtyjë dërgimin e trupave të veta në Irak

Deputetët miratuan Projektligjin për shëndetësinë

 

Prishtinë, 13 nëntor 2003 - Deputetët e parlamentit të Kosovës me disa vërejtje miratuan në parim Projektligjin për shëndetësinë. Duke folur në seancën e sotme të Kuvendit të Kosovës për projektligjin për shëndetësinë, ministrja e dikasterit respektiv Resmie Mumxhi tha se projektligji që gjendet para deputetëve do të hapë rrugën për rregullimin ligjor edhe në aspektet e veçanta të sektorit shendetësor.

Zonja Mumxhi propozoi që në mënyrë insitucionale kujdesi shëndetësor të zbatohet në nivel parësor, dytësor dhe tretësor.

Sipas fjalëve të saj, Ministria e Shëndetësisë së shpejti do të përgatisë edhe politikat zhvillimore për vitin 2004-2009, por edhe tetë ligjet sistemore deri në vjeshtën e ardhshme.

 

Zonja Mumxhi tha se objektivat kryesore janë qëndrueshmëria dhe efikasiteti që do të sigurohen nëpëmjet ndryshimeve që propozohen, si në shtimin e racionalitetit efektiv nëpërmjet ndërtimti të konceptit të organizimit dhe të shfrytëzimit të resurseve njerëzore, të infrakstrukturës dhe të produkteve farmaceutike.

Përfaqësuesit e grupeve parlamentar përkrahën në parim projektligjin, por thanë se vërejtjet konkrete do t'i bëjnë në komisionin përkatës parlamentar.

Kuvendi miratoi edhe rekomandimet e Këshillit gjyqësor dhe prokurial për emërimin e gjykatësve dhe prokurorëve.

 

 

Caktohet masa e paraburgimit për Valon Miftarin, pjesëtar i SHPK-së, për vrasje të dyfishtë

 

Pejë, 13 nëntor 2003 - Një gjykatës hetues ndërkombëtar në Pejë ka caktuar masën e paraburgimit për Valon Miftarin, pjesëtar i SHPK-së në Gjakovë, i cili ditë më parë vrau dy vetë. Kështu bëri të ditur përfaqësuesi i policisë rajoanle të UNMIK-ut në Pejë, duke mos dhënë detaje të reja rreth kësaj vrasjeje të dyfishtë. Ai tha se çështja tani ka kaluar tek organet gjyqësore, të cilat do ta thonë fjalën e fundit për këtë rast.

 

 

Reagim i përfaqësuesve të 23 ndërmarrjeve të privatizuara ndaj AKM-së

 

Prishtinë, 13 nëntor 2003 - Për shkak të mospërmbushjeve të obligimeve nga Agjencioni Kosovar i Mirëbesimit, përfaqësuesit e 23 ndërmarrjeve tashmë të privatizuara kanë reaguar publikisht. Teksti i këtij reagimi do t'u dërgohet institucioneve më të larta vendore e ndërkombëtare.

Në takimin e sotëm në Odën Ekonomike të Kosovës, anëtari i bordit në AKM-së Bahri Shabani, tha se me gjithë problemet shpreson që procesi nuk do të bllokohet. Sipas tij, më tepër ka qenë kjo një taktikë e disa njerëzve në kuadër të UNMIK-ut, që e kanë luajtur lojën e tyre për t'i frikësuar të gjithë ata që kanë pasur interesim dhe dëshirë të investojnë në Kosovë.

Fituesit e tenderëve u ankuan se duke humbur kohë po humbin para duke i paguar kamatat bankare.

  

 

"Kosova kurrë më nuk do të jetë në përbërje të Serbisë", u tha në një debat në Beograd

 

Beograd, 13 nëntor 2003 - Gjatë një debati të zhvilluar në Beograd me temën "Kosova: standardet dhe statusi", kryetarja e Komitetit Serb të Helsinkit, Sonja Biserko, ka vlerësuar se Serbia "po bën rezistencë" lidhur me orientimin evropian dhe "nuk ka koncensus" për asociim në Bashkimin Evropian. Insistimi se Kosova është pjesë e Serbisë krejtësisht është i papranueshëm, duke e pasur parasysh se Serbia me qëndrimin e saj dhjetëvjeçare ka humbur çdo legjitimitet, ka thënë Biserko. Ndërkaq, avokati Sërgja Popoviq është pajtuar se "Kosova kurrë më nuk do të jetë në përbërje të Serbisë, përveç në rast të ndonjë lufte të tretë botërore".

  
Profesoresha e Fakultetit Juridik të Beogradit Olga Popoviq-Obradoviq është shprehur për Kosovën si "mjet i programit kombëtaro-politik, në funksion të pretendimeve më të gjera territoriale dhe aspiratave të Serbisë në hapësirën e Ballkanit".

 

Sipas fjalëve të saj, kjo është "konstantë e politikës kombëtare serbe, në fakt, ide shtetërore e serbëve, që nga momentet e para të krijimit të shtetit kombëtar modern në shek. 19, e gjithnjë deri në ditët e sotme", dhe sipas saj, kjo gjithnjë "ka përmbajtje të njëjtë B bashkimin e të gjitha territoreve në rajonet të cilat në çfarëdo baze ... konsiderohen të serbëve".

 

 

Prefekti i Nju Jorkut Blumberg dhe përfaqësues të komunitetit shqiptaro-amerikan do të vizitojnë Kosovën

 

Uashington 13 nëntor 2003 - Këshilli Kombëtar Shqiptaro Amerikan (KKSHA) lëshoi këtë dëklaratë për shtyp në lidhje me vizitën që Kryetari i Bashkisë së Nju Jorkut planifikon për në Kosovë më datën 26 Nëntor.

Kryetari i bashkisë së qytetit të Nju Jork-ut Majkëll Blumberg (Michael R. Bloomberg) së bashku me disa përfaqësues të komunitetit shqiptaro-amerikan do të bëjnë një vizitë në Kosovë me rastin e Ditës së Pavarsisë shqiptare.

Prefekti Blumberg, i cili do të mbërrijë në Prishtinë më 24 nëntor, i shoqëruar nga udhëheqës së komunitetit shqiptaro-amerikan duke përfshirë figura të shquara të artit e fesë, e bëri të ditur se do të shkojë në Kosovë para mijëra shqiptaro-amerikanëve të cilët morën pjesë në Festivalin XIII Shqiptar të organizuar nga Kisha Katolike Shqiptare "Zoja e Shkodrës" më 9 nëntor.

Disa prej aktiviteteve që z. Blumberg do të angazhohet gjatë vizitës së tij në Prishtinë do të përshijnë takime me trupat e KFOR-it në kampin ushtarak "Bondstill", një ceremoni të shkëmbimit të flamujve me udhëheqës lokalë, një ngjarje kulturore në nder të Ditës së Flamurit shqiptar ku kryetari i bashkisë së Nju Jorkut pritet të mbajë një fjalim për të shprehur ndjenjat e tij për popullin shqiptar, dhe së fundmi por sigurisht që jo në fund të prioriteteve të tij, ai do të marrë pjesë në një ceremoni para monumentit të Nënës Tereze në nder të punës së saj të shquar, thuhet në një njoftim të KKSHA.

 

 

Sekretari i Përgjithshëm i NATO-s, Xhorxh Robertson të hënën viziton Kosovën

 

Bruksel, 13 nëntor 2003 - Pavarësisht nga angazhimet e tjera në botë Aleanca Veriatlantike do të tregojë interesim për Kosovën. Kështu është thënë në selinë e Aleancës në Bruksel. Po kështu është theksuar se NATO-ja aktualisht është duke vazhduar përpunimin e planit operativ për racionalizimin e forcave të NATO-s në rajon.

 

Me këtë rast njëherësh është konfirmuar se Sekretari i Përgjithshëm i NATO-s, lordi Xhorxh Robertson të hënën viziton Kosovën. Kjo është vizita e fundit në mandatin e tij, sepse lordi Robertson në muajin dhjetor përfundon detyrën e tij në Aleancën Veriatlantike.

¨

 

Gjilan: Kuvendi vendos për shpalljen e konkursit për projektin e zhvillimit të qendrës së qytetit

 

Gjilan, 13 nëntor 2003 - Kuvendi Komunal i Gjilanit, në seancën e jashtëzakonshme, e cila është konvokuar nga kryetari Lutfi Haziri, pas kërkesës së 15 këshilltarëve të opozitës (PDK, AAK), për të diskutuar rreth fillimit të punimeve në ndërtimin e parkut "Kemal Ataturk", në sheshin përballë hotelit, ka vendosur për shpalljen e konkursit për projektin e zhvillimit të qendrës së qytetit.

Seanca është karakterizuar nga një debat kryesisht akuzues në drejtim të udhëheqjes komunale, me motivacion se ka lejuar të fillojë realizimi i këtij projekti jashtë procedurave ligjore.

Izmi Zeka, i cili e paraqiti para Kuvendit kërkesën e grupit të këshilltarëve të opozitës për këtë seancë të jashtëzakonshme, propozoi edhe marrjen e masave ndaj atyre që kanë lejuar punimet në sheshin para hotelit "Kristal".

Xhemajl Hyseni, zëvendëskryetar i komunës u kërkoi këshilltarëve komunalë të mos e politizojnë rastin, duke u munduar të nxjerrin nga ai përfitime politike, tash kur është arritur pajtimi për të korrektuar projektin.
Kuvendi i Komunës nuk ka qenë i njoftuar paraprakisht se në këtë shesh është planifikuar vendosja e shtatoreve të dëshmorëve "Rexhep Mala e Nuhi Berisha".

Duke e kërkuar miratimin e Kuvendit për shpallljen e konkursit publik për zhvillimin e qendrës së qytetit, Lutfi Haziri, kryetar i komunës sqaroi se deri atëherë, në sheshin përballë hotelit "Kristal" nuk do ndërtohet më asgjë, ndërsa KFOR-it turk do t`i ofrohet një vend tjetër i përshtatshëm për parkun, pasi të jenë zyrtarizuar emërtimet.

 

 

Në Prizren u përurua solemnisht Qendra për Mirëqenien e Gruas

 

Prizren, 13 nëntor 2003 - Në Prizren u përurua dje në mënyrë solemne Qendra e parë në Kosovë për mirëqenien e gruas në të cilën do të ofrohet ndihmë shëndetësore për gratë dhe familjet e tyre. Përurimin e kësaj qendre e bëri shefja e Zyrës amerikane në Prishtinë Marsi Ris.

Drejtoresha e Drejtoratit për Shëndetësi në Prizren Mybera Mustafa, falënderoi USAID-in si donator dhe "Mjekëtë e Botës" si projektues të këtij projekti dhe vlerësoi se hapja e kësaj qendre është themel për jetën e njerëzve, sidomos për nënën dhe fëmijën.

Ndërkaq shefja e Zyrës amerikane në Prishtinë, zonja Marsi Ris tha se kjo qendër e pajisur mirë, do të trajtojë nevojat kritike të gruas kosovare dhe fëmijëve të tyre.

 

Zonja Ris po ashtu ka theksuar se Qendra kryesore e shëndetit familjar në Prizren, mban reputacionin e qendrës udhëheqëse të shëndetit primar në Kosovë. "Për këtë arsye ne jemi krenarë që kemi mundur të zgjerojmë këtë qendër, duke siguruar mbështetje për qendrën e parë në Kosovë për mirëqenien e gruas", ka thënë zonja Ris.

Qendra për Mirëqenie të Gruas në Prizren është financuar nga Agjencia e Shteteve të Bashkuara për Zhvillim Ndërkombëtar (USAID), e cila ka investuar 200 mijë euro. Një qendër e tillë do të përurohet sot edhe në Gjilan.

 

 

Robertson thotë se Kosova duhet t'i përqëndrojë energjitë e saja tek plotësimi i standardeve

 

Uashington, 13 nëntor 2003 - Sekretari i Përgjithshëm i NATO-s, lordi Xhorxh Robertson, gjatë takimit në Uashington me presidentin amerikan Xhorxh Bush, tha se rajoni i Ballkanit ka ende nevojë për praninë e forcave të NATO-s.

 

Duke shfaqur me këtë rast qëndrimin e tij rreth statusit përfundimtar të Kosovës, lordi Robertson tha se Kosova duhet t'i përqëndrojë tash energjitë tek plotësimi i standardeve, para se të flitet për statusin e saj.

"Ende nuk jemi në fazën e të ardhmes së saj kushtetuese. Ajo që duhet të bëjë Beogradi dhe Prishtina, është të bisedojnë dhe të arrijnë marrëveshje për çështjen e jetës së përditshme, si elektriciteti, transporti, kthimi i refugjatëve.

 

Kjo është ajo që banorët presin nga udhëheqësit e tyre, të zgjidhin problemet e jetës së tyre të,mi përditshme dhe në kohën e duhur do të arrihet tek statusi përfundimtar", i deklaroi "Zërit të Amerikës", lordi Robertson.

 

Nuk do të ketë reduktime të punëtorëve shëndetësorë, por pastrim të listave të atyre që gjenden në mërgim

 

Prishtinë, 13 nëntor 2003 - Zyrtarë të lartë të Ministrisë së Shëndetësisë së Kosovës kanë sqaruar se nuk është fjala për reduktimin e punëtorëve shëndetësorë, por për pastrimin e listave nga punëtorët, të cilët sipas tyre gjenden në mërgim, ndërkaq emrat e tyre figurojnë në listën e pagave sikur të punonin me orar të plotë.

 

Ky është një akt kriminel që bëhet në shëndetësinë e Koosvës, thanë zyrtarët e Ministrisë së Shëndetësisë. Ata thanë se janë ndërmarrë hapa që të parandalohen këto dukuri dhe njerëzit të cilët kanë nënshkruar në vend të tyre për marrjen e pagës sigurisht se do të ndëshkohen.

 

 

UNMIK-ut nuk do t'i pengojë votimet në veri të Kosovës për zgjedhjet presidenciale të Serbisë

 

Mitrovicë, 13 nëntor 2003 - Disa ditë para mbajtjes së zgjedhjeve presidenciale të Serbisë, zyrtarët ndërkombëtarë në Mitrovicë thanë se nuk do t'i ndihmojnë, por as nuk do t'i pengojnë këto zgjedhje për të cilat pritet se do të hapen vendvotimet edhe në pjesën veriore të Kosovës.

 

Zëdhënësi i UNMIK-ut në Mitrovicë, Xhorxh Kakuk tha se këto zgjedhje UNMIK-u do t'i vështrojë nga pozita sikur sikur që ka vepruar edhe gjatë zgjedhjeve vitin e kaluar.

 

 

Ali Sadriu bisedoi me menaxherët e KEK-ut

 

Prishtinë, 13 nëntor 2003 - "Duhet të merremi edhe me përgjegjësitë e atyre që e kanë sjellë në këtë situatë Koorporatën Energjetike të Kosovës", ka deklaruar ministri i Ekonomisë dhe Financave Ali Sadriu, pas takimi që pati mbrëmë zyrtarët ndërkombëtarë dhe ata vendorë të KEK-ut.

 

Nga ana tjetër menaxheri ndërkombëtar në KEK Çarls Braun ka deklaruar se problemi i KEK-ut duhet të shtrohet në nivelin më të lartë në UNMIK dhe në Qeverinë e Kosovë.

Menaxheri ndërkombëtar Braun dhe kryetari i Bordit të këtij institucioni Ali Hamiti i kanë shpjeguar situatën aktuale në KEK ministrit të Ekonomisë dhe Financave. Ndërkohë që ministri Sadriu ka theksuar se në KEK ekziston një situatë e rëndë.

 

 

Kryetarët dhe shefat e ekzekutivit të pesë komunave të Kosovës u njohën me programin elektronik të qeverisjes

 

Prishtinë, 13 nëntor 2003 - Kryetarët dhe shefat e ekzekutivit të pesë komunave të Kosovës: Ferizajt, Podujevës, Mitrovicës, Shtimes dhe Lipjanit u njohën dje me programin elektronik të qeverisjes, i cili do të aplikohet së shpejti në këto komuna.

 

Ky projekt, i cili organizohet nga Fondacioni i Kosovës për Shoqëri të Hapur, fillimisht është realizuar si projekt - pilot në Komunën e Gjakovës, ku ka dhënë rezultate të konsiderueshme.

 

Projekti synon përmirësimin e qeverisjes në komuna dhe rrit ndikimin e qytetarëve në procesin e vendimarrjes në komuna. Koordinatori i Fondacionit të Kosovës për Shoqëri të Hapur tha se ky program ka për qëllim të ngris nivelin e shfrytëzimit të teknologjisë informative në administratat komunale.

 

 

Në Prishtinë u themelua Akademia e Mjekësisë së Kosovës

 

Prishtinë, 13 nëntor 2003 - Në Prishtinë dje u themelua Akademia e Mjekësisë së Kosovës e përbërë nga shoqatat më të mëdha profesioniste të mjekësisë. Sipas ideatorëve të themelimit, qëllim kryesor i këtij asociacioni do të jetë riorganizimi i shoqatave shëndetësore dhe ngritja e efikasitetit të punës së tyre.

"Themelimi i Akademisë së Mjekësisë së Kosovës është iniciativë e të gjitha asociacioneve dhe shoqatave profesioniste të mjekësisë kosovare", bëri të ditur kryetari i kësaj akademie Prof. dr. Naser Ramadani.

Në kuadër të Akademisë do të krijohet një organizëm i përbashkët i përfaqësimit të të gjithë profesionistëve mjekësorë, të cilët me një zë do të shprehin mendimet për zhvillimin e politikës shëndetësore në Kosovë.

 

 

Në Muçibabë të Gjilanit hapet vendkalimi kufitar Kosovë – Serbi

 

Gjilan, 13 nëntor 2003 - Të mërkurën është hapur në Myçibabë të komunës së Gjilanit vendkalimi kufitar ndërmjet Kosovës dhe Serbisë, i njohur si pika e gjashtë, nëpër të cilën do të mund të qarkullojnë më lirshëm njerëzit e kësaj zone dhe të rajonit, por nuk do të mund të bëhet tani për tani edhe zhdoganimi i mallrave.

Sipas zoti Khan Akbar, zëvendëskomandant i policisë kufitare të UNMIK-ut në këtë pikë kalimi do të shërbejnë njëzet pjesëtarë të Shërbimit Policor të Kosovës, ndërsa Val Stjuart, drejtor i operacioneve të UNMIK-ut, hapjen e saj e sheh në funksion të normalizimit të kufijve administrativë dhe krijimit të mundësive për banorët lokalë që të ndihem më të sigurtë.

Hapjen e kësaj porte, koloneli Alen Ponsini, komandant i kampit "Montith" në Gjilan e ka vlerësuar një hap pozitiv drejt një ardhmërie më të mire Kosovës dhe të rajonit. Siç dihet, ushtarët e kësaj nënbaze amerikane në Kosovës e kanë kontrolluar deri tani këtë pjesë të kufirit. Koloneli Ponsini ka theksuar poashtu se hapja e pikës kufitare në Muçibabë ofron mundësi edhe për shkëmbim tregtar, ndërsa pengon qarkullimin ilegal të njerëzve dhe të mallrave si dhe veprimtaritë tjera ekstremiste.

Pikën kufitare me Serbinë, në Myçibabë e kanë vlerësuar të rendësishme edhe Frank Ranieli, drejtor i doganave të Kosovës si dhe koloneli i SHPK-së, Sheremet Ahmeti, sepse ajo do të jetë një pengesë për kontrabanduesit dhe trafikimet e paligjshme, ndërsa prania e përhershme e policisë do t`i bëjë të ndjehem më të sigurtë banorët e zones.

Në ceremoninë e hapjesë së pikes së gjashtë kufitare kanë marrë pjesë përfaqësuesit e UNMIK-ut, të KFOR-it, të SHPK-së, komunës së Gjilanit si dhe zyrtarë të xhandarmërisë serbe.

 

 

Rama kryeson ndaj Ngjelës në Tiranë

 

Tiranë, 13 nëntor 2003 - Komisioni Qendror i Zgjedhjeve në Shqipëri pritet të shpallë përfaqësuesin socialist Edi Rama si kryetar të ri të Bashkisë së Tiranës, me gjithë kundërshtimet e rivalit të tij të opozitës Spartak Ngjela, i cili këmbëngul për shkelje të ligjit.

Mbrëmë KQZ-ja ka shpallur rezultatet e 293 qendrave të votimit nga 346 qendra që ka gjithsej në Tiranë.
Sipas tyre, zoti Rama ka fituar 57,64 përqind të votave kundrejt 38 përqind që ka fituar zoti Ngjela i Partisë Demokratike.

KQZ-ja pritet të shqyrtojë të enjten edhe qendrat e mbetura, por diferenca e deritanishme prej rreth 24 mijë votash në favor të zotit Rama, duket se i garanton atij fitoren përfundimtare.

Gjithnjë sipas rezultateve paraprake, Partia Socialiste është fituese edhe në vendet për këshillin bashkiak të Tiranës.
Socialistët kanë marrë 49 përqind të votave kundrejt 38 për qind të opozitës.

 

 

Ferhat Dinosha thotë se UDSH angazhohet që Kuvendi i Malit të Zi të ketë edhe dhomën e pakicave

 

Podgoricë, 13 nëntor 2003 - Kryetari i Unionit Demokratik të Shqiptarëve në Mal të Zi, Ferhat Dinosha tha dje se partia e tij angazhohet që Kuvendi i Malit të Zi të ketë edhe dhomën e pakicave kombëtare.

 

Sipas tij nëse shteti bën projekte të cilat cënojnë fundamentet nacionale të palicave, atëherë përfaqësuesit e pakicave kombëtare këtë dhomë do të kishin të drejtë të përdornin institutin e vetos, i cili është i pranishëm në standardet demokratike evropiane.

 

 

Një ushtar amerikan është vrarë sot në Bagdad

 

Bagdad, 13 nëntor 2003 – Një ushtar amerikan është vrarë sot (e enjte) në një sulm me bombë anash rrugës në kryeqytetin irakian Bagdad, ka bërë të ditur zëdhënësi i Divizionit të parë të blinduar, njofton Rojter.

 

Ai tha gjithashtu se edhe dje një automjet i tipit Hamvi ka rënë në një minë dhe kështu qenë plagosur dy ushtarë, njëri syresh pastaj ka vdekur. Me këtë rast vdekjeje, numri i ushtarëve amerikanë të vrarë në aksione armiqësore në Irak ka arritur në 156 që kur presidenti Bush e ka shpallur përfundimin e luftës më 1 maj.

 

 

Trupat amerikane kanë vrarë 6 militantë irakianë

 

Uashington, 13 nëntor 2003 - Trupat amerikane kanë vrarë gjashtë militantë irakianë dhe kanë plagosur katër të tjerë gjatë një shkëmbimi zjarri në një sulm në bazën e tyre dhe në spitalin jordanian në qytetin Falluxha, që gjendet në pjesën qendrore të Irakut, kanë bërë të ditur burimet ushtarake, njofton AFP.

 

 

Ministri italian i Mbrojtjes viziton ushtarët italianë të plagosur në sulmin e djeshëm në Irak

 

Bagdad, 13 nëntor 2003 - Ministri italian i Mbrojtjes ka vizituar sot (e enjte) ushtarët italianë të plagosur në sulmin shkatërrimtar vetëvrasës në Irakun jugor, në të cilin u vranë 27 njerëz, që sipas vlerësimeve është humbja më e madhe italiane në ushtarë që nga Lufta e Dytë Botërore, njofton Rojter.

 

 

Nga shpërthimi në Irak vriten 25 vetë

 

Bagdad, 13 nëntor 2003 - Të paktën njëzet e pesë vetë kanë humbur jetën në një shpërthim të fuqishëm në selinë e policisë ushtarake italiane në Irakun jugor.

Një zëdhënës i policisë tha se katrëmbëdhjetë ushtarë italianë vdiqën në atë që duket se ka qenë sulm vetvrasës me bombë para hyrjes në bazën në Nasiriya. Janë vrarë edhe tetë irakianë.

Nga fuqia e shpërthimit janë hedhë në erë dritaret ndërsa automjetet në afërsi i ka kapluar flaka.

Në Romë, Presidenti italian dhe Kryeministri theksuan se Italia vazhdonte të ishte e përkushtuar për të ndihmuar në rindërtimin e Irakut.

Por disa parti opozitare tashmë po bëjnë thirrje për tërheqjen e trupave italiane.

Parlamenti italian shtyu seancën në shenjë të zisë kombëtare.

 

 

Amerika kritikon raportin e Agjencisë Ndërkombëtare të Energjisë Atomike

 

Uashington, 13 nëntor 2003 - Uashingtoni ka sfiduar një raport të Kombeve të Bashkuara, sipas të cilit, Irani nuk është përpjekur të prodhojë armë atomike. Nënsekretari amerikan, Xhon Bolton, tha se raporti i Agjencisë Ndërkombëtare të Energjisë Atomike, injoron faktet.

Sipas tij, përfundimi kryesor që ka arritur Agjencia e Energjisë Etomike, se nuk ka prova që Irani po përpiqet të zhvillojë armë bërthamore, është pothuajse i pamundur që të besohet.

Z. Bolton, ndihmësseskretari i Departamentit të Shtetit për kontrollin e armëve, tha se gënjeshtra dhe shkeljet e rregullave nga ana e Iranit për një periudhë 18 vjeçare, çojnë në një përfundim krejt tjetër.

 

 

Gjykata e Londrës ka refuzuar kërkesën e Rusisë për ekstradimin e emisarit çeçen, Ahmed Sakajev

 

Londër, 13 nëntor 2003 - Gjykata e Londrës ka refuzuar kërkesën e Rusisë për ekstradimin e emisarit çeçen, Ahmed Sakajev, njofton BBCWorld. Rusia e ka akuzuar z. Zakajev për një sërë krimesh, ndër të cilat edhe për kidnapime dhe pjesëmarrje në vrasjen e ushtarëve rusë.

 

Akuzat kanë të bëjnë me incidentet ndërmjet tetorit 1995 dhe dhjetorit 2000, gjatë luftës së Çeçenisë për pavarësi. Mbrojtësit kanë thënë se akuzat janë të motivuara politikisht dhe nëse do të kthehej në Rusi, z. Zakajev do të përballej me tortura.

 

 

Britania ka refuzuar kërkesën e Argjentinës për ekstradimin e ish-diplomatit iranian

 

Londër, 13 nëntor 2003 - Britania ka refuzuar kërkesën e Argjentinës për ekstradimin e ish-diplomatit iranian të akuzuar për bombëvënie në qendrën ebraite, njofton BBCWorld. Ministria e brendshme britanike ka thënë s'ka dëshmi të mjaftueshme për ekstradimin e Hejd Sulejmanpurit (Hade Soleimanpour).

Ky rast ka tendosur marrëdhëniet ndërmjet Iranit dhe dhe Britanisë, e cila pohon se rasti është i motivuar politikisht. Në sulmin me bombë më 1994 në qendrën ebraite në Buenos Ajres qenë vrarë 85 njerëz.

Z. Sulejmanpur, 47-vjeçar, është arrestuar në Britani, në qytetin verior Durham, derisa po studjonte në universitetin e atjeshëm. Ai ishte ambasador iranian në Argjentinë. Z. Sulejmanpur ka mohuar akuzat, duke thënë se ai ishte jashtë vendit në kohën e shpërthimit të bombave në sulmin e lartpërmendur. Ai është liruar me kaucion prej 1.2 milionë dollarë, të paguar pjesërisht nga autoritet iraniane.

 

 

Të pakten 4 afganë janë vrarë nga një bombë e teledirigjuar

 

Asadabad, Afganistan, 13 nëntor 2003 - Të pakten katër afganë janë vrarë dhe tre të tjerë janë plagosur kur automjeti i tyre është hedhur në erë nga një bombë e teledirigjuar, e cila, duket qartë, se ishte dedikuar për automjetet amerikane afër bazës ushtarake amerikane, kanë thënë dëshmitarët sot (e enjte), njofton Rojter.

 

 Ky sulm në provincën verilindore, Kunar, ka ndodhur në përvjetorin e rëniës së regjimit taliban dhe duket të jetë vepër e vijës së fortë të islamistëve dhe të aleatëve të tyre, kanë thënë banorët. Ushtria amerikane ka mohuar të jetë përgjegjëse për këtë sulm, ndonëse vendësit dyshojnë të ketë pasur në zonë militantë islamistë.

 

 

Trupat amerikane kanë shkatërruar një fabrikë të zbrazët të ngjyrërave në Bagdad

 

Nasirija, Irak, 13 nëntor 2003 - Trupat amerikane kanë shkatërruar një fabrikë të zbrazët të ngjyrërave në Bagdad dhe kanë ndjekur sulmuesit, që janë parë të kenë shtënë me mortaja që andej, në një kohë që numri i viktimave nga bombëvënia vetëvrasëse në bazën ushtarake italiane ka arritur në 32 të vrarë, që ishte sulmi më i përgjakshëm dhe vdekjesjellës kundër aleatëve amerikanë që nga nga ndërhyrja në Irak, njofton AP.

 

 

Japonia do të shtyjë dërgimin e trupave të veta në Irak

 

Tokio, 13 nëntor 2003 - Japonia ka njoftuar se do të shtyjë dërgimin e trupave të veta në Irak deri vitin e ardhshëm për shkak të situatës së përkeqësuar atje.

Tokio mendonte të dislokonte ushtarët e parë para fundit të këtij viti.

Njoftimi i Japonisë pasoi vrasjen e më shumë se 25 personave, shumica ushtarakë italianë atje, në një sulm në qytetin e Nasirijas.

Shqetësimet rreth situatës së sigurisë kanë bërë që dhe një kontigjent ushtarësh portugezë, i pari nga ky vend, të dërgohen jo në Nasirija, por në Basra.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |