Podujevë: Drejtoria e Arsimit konkuron me projekte në donacionet e Bankës Botërore që ka financuar MASHT-in

Podujevë: Drejtoria e Arsimit konkuron me projekte në donacionet e Bankës Botërore që ka financuar MASHT-in


“Në 8 shkolla fillore drejtorët janë rizgjedhur, kurse në 2 tjera u zgjodhën drejtorët e rinj”, njoftoi drejtori Mr. Shpejtim Bulliqi duke shtuar: konteste rreth emërimit të drejtorëve ka në shkollat fillore në Bradash, Dobratin dhe në Lagjen Kuvajtiane në Ballofc, kurse në Gjimnazin “Aleksandër Xhuvani” MASHT-i për herë të dytë ka anuluar konkursin pa sqarime adekuate. Shqipe Abazi, bashkëpunëtore profesionale për terren në Qendrën për Arsim të Kosovës prezantoi para drejtorëve Projektin për përmirësimin e pjesëmarrjes në arsim duke njoftuar se në kuadër të këtij projekti shkollat fillore do të kenë mundësi të konkurojnë me projekte në vlerën deri në 10 mijë euro, kurse shkollat e mesme me projekte deri në 15 mijë euro nga grantet e Bankës Botërore.

Znj. Abazi njoftoi se Banka Botërore i ka ndarë MASHT-it 4.5 milion euro për 3 vitete e ardhshme. “Shpresojmë që nga 6-7 projekte komuna jonë të përfitojë katër”, pohoi z. Bulliqi.

Mbarëvatja e procesit edukativo-arsimor, me theks të veçantë disiplina e personelit arsimor dhe e nxënësve, përgatitjet për furnizim me lëndë djegëse për të gjitha shkollat, detyrat dhe përgjegjësitë e drejtorëve ishin disa nga temat që u diskutuan në takimin e DA-së me drejtorët e 30 shkollave fillore dhe 3 të mesme të Podujevës.

Sipas drejtorit Bulliqi në shkollat fillore të Podujevës mësimin e vijojnë 15.478 nxënës, në të mesmet 3484 dhe në klasët e nënta 1729 nxënës.

Drejtoria e arsimit e Podujevës me këtë rast njoftoi shfrytëzuesit e bursave studentore nga mjetet e buxhetit të komunës se deri më 1 dhjetor duhet të sjellin dëshminë për regjistrimin e semestrit dhe certifikatën e notave sepse në të kundërtën do t’u shkëputen kontratat për bursat.