Përmbajtja:

• Qeveria e Kosovës formon pesë grupe punuese për zbatimin e standardeve në Kosovë

• Hari Holkeri në OKB ka biseduar edhe çështjen e pezullimit të privatizimit në Kosovë

• Daci priti ambasadorin e Austrisë në Beograd

• Ministri Morina premton ndihmë për disa projekte të infrastrukturës rrugore në Ferizaj

• Ka vazhduar edhe sot greva e ish-policëve të Kosovës

• Në Prishtinë u protestua për shkak të rrjedhave politike

• Më 15 nëntor organizohet një tribunë me temën: "Vetëvrasjet - si të parandalohen"

• Podujevë: Grupi punues diskutoi për kthimin e të zhvendosurve

• Gjilan: Hapësira për parkun "Kemajl Ataturk" do të caktohet në një shesh tjetër

• Policia e UNMIK-ut ka arrestuar Sami Azemin, ish-komanadant i UÇPMB-së

• Hapen Qendrat për Mirëqenie të Grave në Prizren dhe Gjilan

• Zyrtarët e UNMIK-ut thonë se Beogradi nuk është kurrëfarë faktori në procesin e privatizimit në Kosovë

• Vazhdon procesi ndaj 12 të akuzuarve nga Drenasi për vrasjen e Hamzë Hajres dhe katër anëtarëve të familjes së tij

• Hulumtimet e "Riinvestit" tregojnë se rreth 50 për qind e qytetarëve të Kosovës jetojnë në varfëri

• Vlerësohet e suksesshëm faza e parë e aksionit për grumbullimin e armëve ilegale në Maqedoni

• Buçkovski thotë se Maqedonia, Shqipëria dhe Kroacia, duhet të dëshmojnë përparim maksimal për t'u pranuar në NATO

• Përfaqësuesit e Shqipërisë, Kroacisë dhe Maqedonisë takohen në Uashington për të shqyrtuar progresin në Kartën e Adriatikut

• Në Rripin e Gazës është vrarë një militant i Hamasit

• Soros jep 15 milionë dollarë që ta largojë Bushin nga Shtëpia e Bardhë

• Arrin në 20 numri i të vrarëve nga një shpërthim bombe në qytetin irakian Nasirija

• Vritet një ushtar amerikan në Irak

• Të paktën 6 vetë janë vrarë në një shpërthim afër karabinierisë italiane në qytetin irakian Nasiria

• Nga shpërthimi i një zjarri në Jorkshir, humbin jetën tri motra të vogla

• Në Vietnam arrestohet një aktivist demokrat dhe ish- truproje e Ho Shi Minit

• Në Brazil janë arrestuar rreth 160 vetë që kremtonin sulmet në policinë

• Në Mekë nga pasojat e shirave të fuqishme kanë gjetur vdekjen 12 njerëz

• Japonia kërcënon SHBA-në me sanksione

• Amerikanët vrasin një drejtues lokal irakian

• Historia e ushtares Lynch

• Tri raketa u qëlluan kundër selisë së koalicionit në Bagdad, por nuk pati viktima

• SHBA dhe Koreja e Veriut kanë rënë dakord të marrin pjesë në një raund tjetër bisedimesh

• Senati amerikan miratoi me shumicë dërmuese votash sanksione të reja kundër

Qeveria e Kosovës formon pesë grupe punuese për zbatimin e standardeve në Kosovë

 

Prishtinë, 12 nëntor 2003 - Qeveria e Kosovës në takimin e sotëm vendosi të formojë pesë grupe punuese për zbatimin e standardeve ndërkombëtare në Kosovë: grupi për demokratizim, sundimin e ligjit, për të drejtat pronësore, për privitazim si dhe ai për kthimin e të zhvendosurve.

Kryeministri Rexhepi tha se tetë standardet e caktuara nga bashkësia ndërkombëtare janë sublimuar në pesë grupet punuese, ndërkohë që strukturat e UNMIK-ut dhe ato të qeverisë do të jenë partnerë në implementimin e këtyre standardeve.

 

Ai tha se shumica e këtyre grupeve punuese do të udhëhiqen nga ministrat e qeverisë së Kosovës. Rexhepi u shperh optimist se qeevria që ai drejton do t'i arrijë standardet e caktuara nga bashkësia ndërkombëtare.

Poashtu në këtë mbledhje të qeverisë është diskutuar edhe çështja e privatizimit, por për këtë çështje do të diskutohet javën tjetër pasi të jetë kthyer nga Nju Jorku Holkeri me bashkëpunëtorët.

Qeveria sto ka diskutuar edhe për çështjen e operimit ilegal të telefonisë mobile të Mobtel të Serbisë në Kosovë. Rexhepi kërkoi që të definohet statusi i Mobtelit në Kosovë në një tender që pritet të shpallet në nëntor, në të cilin edhe Mobteli ka të drejtë të konkurrojë.

 

 

Hari Holkeri në OKB ka biseduar edhe çështjen e pezullimit të privatizimit në Kosovë

 

Nju-Jork, 12 nëntor 2003 - Kryeadministratori i Kosovës, Hari Holkeri gjatë vizitës së tij në KS të OKB-së në Nju-Jork ka vazhduar takimet me zyrtarët e atjeshëm. Sipas një zëdhënësi të OKB-së, Holkeri dje pasdite është takuar me përfaqësuesin e Zyrës ligjore në OKB z. Hanc Korel.

 

Ky zëdhënës tha se një ndër temat që është biseduar në këtë takim, ishte edhe çështja e pezullimit të privatizimit të ndërmarrjeve shoqërore në Kosovë, duke shtuar se njëri nga aspektet e vizitës dhe mandatit të z. Holkeri, është edhe zgjidhja e kësaj çështjeje. Aspekte të tjera të bisedave dhe takimeve të Holkerit me zyrtarët e OKB-së, do të jenë mbështetja dhe vazhdimi i dialogut të filluar në takimin e Vjenës ndërmjet Prishtinës dhe Beogradit.

 

 

Daci priti ambasadorin e Austrisë në Beograd

 

Prishtinë, 12 nëntor 2003 - Kryetari i Kuvendit të Kosovës Nexhat Daci priti sot ambasadorin e Austrisë në Beograd, Hones Horias. Në këtë takim është theksuar qëndrimi për vazhdimin e dialogut Prishtinë B Beograd, të filluar një muaj më parë në Vjenë, ku Austria ishte mikpritëse.

Ambasadori austriak tha se vendi i tij mbështet vazhdimin e dialogut dhe çështja më e rëndësishme tash për tash është krijimi i grupeve punuese, siç është kërkuar në takimin e Vjenës, u shpreh ai.

 

"Ne shpresojmë se së shpejti do të kemi edhe rezultatet e para në këtë proces, pra zgjidhjen e çështjeve të cilat do të lehtësojnë jetën e përditshme të qytetarëve", tha Horias. Ai theksoi se gjatë qëndrimit të sotëm në Prishtinë ka diskutuar edhe për procese të tjera politike në Kosovë, por edhe bashkëpunimin mes Kosovës dhe Austrisë.

 

 

Ministri Morina premton ndihmë për disa projekte të infrastrukturës rrugore në Ferizaj

 

Prishtinë, 12 nëntor 2003 - Ministri i Transportit dhe Postë Telekomunikacionit të Kosovës, Zef Morina, vizitoi sot Ferizajn, ku zhvilloi takime me drejtues. Tema kryesore të bisedimeve ishin infrastruktura rrugore dhe post telekomunikacioni.

 

Pas takimit Morina tha se Ministria që ai e drejton do të ndihmojë, sipas mundësive, realizimin e projekteve jo vetëm në Ferizaj, por edhe në komunat tjera. Ai tha se kjo ministri do të mbulojë pjesën më të madhe të projektit për rregullimin e rrugës Ferizaj-Gërlicë, i cili do të kushtojë rreth 700 mijë euro.

Kryetari i Kuvendit Komunal të Ferizajt, Adem Salihaj, theksoi se ministri Morina ka premtuar ndihmë për disa projekte që kanë të bëjnë më përmirësimin e infrastrukturës rrugore në këtë komunë. Të dy palët u shprehën për vazhdimin e bashkëpunimit të mirë midis komunës së Ferizajt dhe Ministrisë së Transportit e Telekomunikacionit.

 

 

Ka vazhduar edhe sot greva e ish-policëve të Kosovës

 

Prishtinë, 12 nëntor 2003 - Ka vazdhuar edhe sot greva e ish-policëve të Kosovës. Mirëpo, përkundër protestës dhe bisedave me përfaqësuesin e Shtyllës së katërt të UNMIK-ut ende nuk është gjetur ndonjë zgjidhje për ta.

 

Ndërkohë një delegacion i Këshillit grevist kërkoi sot të drejtat e tyre edhe tek Ombudspersoni i Kosovës, ku i dorëzuan dokmentacionin lidhur me aplikimin dhe mospranimin e tyre në SHPK. Poashtu ky delegacion vizitoi edhe KMDLNJ-në dhe biseduan me kryetarin e tij Pajazit Nushi, i cili premtoi ndihmën e Këshillit për zgjidhjen e statusit të ish-policëve.

 

 

Në Prishtinë u protestua për shkak të rrjedhave politike

 

Prishtinë, 12 nëntor 2003 - Dy parti - LPK dhe LKÇK - që kanë nga një deputet në parlamentin e Kosovës si dhe disa shoqata, kanë protestuar sot në Prishtinë. Në këtë protestë, ku merrnin pjesë disa qindra qytetarë, pjesëmarrësit kanë shprehur pakënaqësitë e tyre, siç thuhet, me zhvillimet politike, të cilat Kosovën e kanë futur në një krizë politike.

Folësit në këtë protestë thanë se deputetët nuk mund të zgjidhin asgjë, sepse ata janë të censuruar mu sikur edhe shoqëria kosovare. Ata kërkuan vetëvendosje për Kosovën dhe të njihen vlerat e luftës.

Poashtu u lexua edhe një letër drejtuar institucioneve vendore ndërkombëtare me të cilën shprehen qëndrimet politike të kësaj proteste. Mes tjerash kërkohet që të hidhet poshtë rezoluta 1244 e KS, ndërkaq kundërshtohen edhe bisedimet me Serbinë.

 

 

Më 15 nëntor organizohet një tribunë me temën: "Vetëvrasjet - si të parandalohen"

 

Prishtinë, 12 nëntor 2003 - Duke u nisur nga fakti se pas luftës dhe sidomos muajt e fundit në Kosovë ka lëshuar rrënjë një dukuri shumë negative dhe brengosëse, siç është - vetëvrasja, kryesitë e 4 degëve të qytetit të Prishtinës të Forumit të Rinisë të LDK-së, do të organizojnë një tribunë të hapur me temën: "Vetëvrasjet - si të parandalohen". Në këtë tribunë do të ligjërojnë dr. Skender Boshnjaku (neuropsikiater) dhe dr.Shefqet Krasniqi (teolog).

Tribuna do të mbahet më 15 nëntor ( e shtunë ), në amfiteatrin e Bibliotekës Kombëtare dhe Universitare të Kosovës, dhe fillon në ora 13:30. Ftohen të gjithë të interesuarit që të marrin pjesë në këtë tribunë të hapur, thuhet në një njofitm të FR të LDK-së.

 

 

Podujevë: Grupi punues diskutoi për kthimin e të zhvendosurve

 

Podujevë, 12 nëntor 2003 (QIK) - Në takimin e sotëm të Grupit punues komunal për kthimin e të zhvendosurve u diskutua për për projektet për integrim dhe kthim. Në këtë takim që e udhëhoqi përfaqësuesi i UNMIK-ut Shahzad Khan Bangash dhe zv. kryetari Agim Kikaj, pos anëtarëve të GPK morën pjesë edhe përfaqësues të UNHCR-it, UMCOR-it, policisë së UNMIK-ut, KFOR-it, NKMDLNJ-së, SHHB ANëna Tereze@, ICRC-së, etj.

Përfaqësuesi i policisë së UNMIK-ut dhe ata të KFOR-it raportuan për gjendjen e qetë të sigurisë, ndërkaq zv. kryetari i komunës Agim Kikaj prezantoi projektin e rregullimit të ujësjellësit në kuadër të programit për kthim për të cilin Qeveria e Kosovës ka ndarë 7 milion euro. "Nga kjo shumë 2 milion euro u janë ndarë komunave që të konkurrojnë me projekte të cilat mundësojnë kushte për kthimi të të zhvendosurve", tha z. Kikaj.

Përfaqësuesi i PDK-së, Naim Fetahu pasi përkrahu procesin e kthimit bëri vërejtje në përbërjen e anëtarëve të grupit nga pala serbe, përkatësisht kryetarin Millomir Jovanoviq.

Me këtë rast Naim Fetahu lëshoi mbledhjen, kurse Millomir Jovanoviq tha se është i gatshëm që për gjithë punën e tij të japë çfarëdo lloj përgjegjësie sepse është lindur dhe ka punuar në Podujevë, por ku nuk ka pasur influencë në shumë gjëra të këqija që kanë ndodhur këtu.

 

 

Gjilan: Hapësira për parkun "Kemajl Ataturk" do të caktohet në një shesh tjetër

 

Gjilan, 12 nëntor 2003 - Lutfi Haziri, kryetar i komunës së Gjilanit u tha të martën gazetarëve se, pas konsultimeve të bëra me subjektet politike si dhe me KFOR-in turk, është vendosur për ndërprerjen e punimeve në ndërtimin e parkut "Kemal Ataturk". Por këtij projekti do t`i ofrohet një vend tjetër i përshtatshëm në qytet, pasi të jenë zyrtarizuar emërtimet e shesheve, rrugëve dhe të vendbanimeve.

Duke njoftuar për këtë vendim të udhëheqjes komunale, z. Haziri ka falënderuar batalionin turk të KFOR-it në Kosovë, për ndihmën e ofruar, ndërsa nga komuniteti turk që jeton në Gjilan ka kërkuar mirëkuptim, pasi ekziston propozimi për emërtimin e një sheshi me emrin e refermatorit Kemal Ataturk dhe aty do të jetë ambienti më adekuat edhe për parkun, i cili do të simbolizojë miqësinë ndërmjet popullit shqiptar dhe atij turk.

Haziri nuk ka hezituar që të pranojë përgjegjësinë e udhëheqjes komunale dhe të tij personalisht për lejimin e punimeve në sheshin përpara hotelit "Kristal", i cili është propozuar të emërtohet "Rexhep Mala e Nuhi Berisha", por ka sqaruar se prapa këtij vendimi ka qëndruar vetëm dëshira e mirë për të krijuar përmes këtij donacioni edhe një ambient të përshtatshëm në qytetin e Gjilanit.

Ndërkaq, reagimet e opozitës ai i ka cilësuar të motivuara politikisht e të nxitura nga qarqe jashtë Gjilanit dhe ka sqaruar se Kuvendi Komunal i Gjilanit nuk ka qenë i njoftuar paraparkisht se në këtë shesh është planifikuar vendosja e shtatoreve të Rexhep Malës e Nuhi Berishës.

"Ne nuk dëshirojmë t`i bëjmë ndaras gjerat e mëdha dhe të rëndësishme për komunën e Gjilanit, por nuk është e sinqertë që të na shtrëngohet laku rreth qafes, duke e fshehur motivin", tha Lutfi Haziri.

 

 

Policia e UNMIK-ut ka arrestuar Sami Azemin, ish-komanadant i UÇPMB-së

 

Gjilan, 12 nëntor 2003 - Dje në Gjilan nga policia e UNMIK-ut është arrestuar Sami Azemi, ish-komanadant i UÇPMB-së, me pretekst se gjatë vitit 2001 ka kërcënuar dhe ka tentuar të kidnapojë dhe ka mbajtur armë pa leje. Ndaj Sami Azemit, i njohur me si komanadnt Haxhia, është caktuar masa e paraburgimit prej 72 orësh.

 

 

Hapen Qendrat për Mirëqenie të Grave në Prizren dhe Gjilan

 

Prishtinë, 12 nëntor 2003 - Zyra e Shteteve të Bashkuara në Prishtinë do të bëjë hapjen e Qendrave për Mirëqenie të Grave në komunat e Prizrenit dhe Gjilanit. Hapjen solemne të tyre do t'i bëjë shefja e Zyrës amerikane Marsi Ris sot pasdite në Prizren, kurse nesër në Gjilan.

Sipas një njoftimi të Zyrës amerikane, këto qendra të reja do të ofrojnë kujdes shëndetësor për gratë dhe familjet e tyre. Nëpërmjet këtyre qendrave, ofruesit lokalë të kujdesit shëndetësor, në veçanti mjekët dhe mamitë janë aftësuar dhe kanë marrë përkrahje në ofrimin e një qasjeje gjithpërfshirëse në nivelin primar të kujdesit shëndetësor të përqëndruar tek gratë, si dhe janë siguruar pajisje, orendi dhe materiale arsimore në vlerë të përafërt prej 120,000 dollarësh që avancojnë shërbimet e kujdesit shëndetësor në mënyrë që të ofrojnë ambient të favorshëm si për punë poashtu edhe për gratë që do të shërbehen aty.

Qendrat për Mirëqenien e Grave janë rezultat i partneritetit mes departamenteve komunale të shëndetësisë, Qendrës Kryesore të Shëndetit Familjar në Prizren, Spitalit Rajonal të Gjilanit, Mjekët e Botës nga ShBA-ja, Qendrës për Mirëqenien e Grave në Tiranë dhe USAID-it. Këto partneritete menaxhohen nga Aleanca Amerikane për Shëndetin Ndërkombëtar (American International Health Alliance).

 

 

Zyrtarët e UNMIK-ut thonë se Beogradi nuk është kurrëfarë faktori në procesin e privatizimit në Kosovë

 

Prishtinë, 12 nëntor 2003 - Beogradi nuk është kurrëfarë faktori në procesin e privatizimit, thonë zyrtarët e Shtyllës së katërt të UNMIK-ut e cila mbikëqyr procesin e privatizimit në Kosovë. Këto deklarata u bënë si përgjigje ndaj presioneve të njëpasnjëshme të Beogradit zyrtar ndaj UNMIK-ut që të ndërpresë privatizimin e ndërmarrjeve shoqërore në Kosovë, apo të ndërrojë formën e deritashme.

Zëdhënësja e Shtyllës së katërt të UNMIK-ut Monik dë Grot thotë se nëse Beogradi ka ankesa mund t'i bëjë ato në Gjykatën Supreme në Prishtinë, ku është formuar një dhomë e veçantë që do të pranojë ankesat eventuale gjatë procesit të privatizimit.

 

Kjo njëherësh është përgjigje edhe ndaj deklaratës së zëvendëskryeministrit të Serbisë Nebojsha Çoviq, i cili ka kërcënuar edhe njëherë administratën ndërkombëtare në Kosovë se nëse vazhdon me privatizimin e ndërmarrjeve shoqërore në formën e deritanishme, Beogradi do të ngrejë aktpadi ndërkombëtare ndaj saj.

 

 

Vazhdon procesi ndaj 12 të akuzuarve nga Drenasi për vrasjen e Hamzë Hajres dhe katër anëtarëve të familjes së tij

 

Gjilan, 12 nëntor 2003 - Në Gjykatën e Gjilanit po vazhdon marrja në pyetje e dëshmitarit kyç, Blerim Kiçina, në procesin gjyqësor ndaj 12 të akuzuarve nga Komuna e Drenasit për vrasjen e Hamzë Hajres dhe katër anëtarëve tjerë të familjes së tij në verën e vitit 2001.

 

Si në seancën paraprake, po ashtu edhe dje, dëshmitari vazhdojë të mohojë deklaratën, që ka dhënë në polici me të cilën ka akuzuar të pandehurit. Gjykimi vazhdon sot.

 

 

Hulumtimet e "Riinvestit" tregojnë se rreth 50 për qind e qytetarëve të Kosovës jetojnë në varfëri

 

Prishtinë, 12 nëntor 2003 - Studimet e fundit të Institutit për Hulumtime Zhvillimore - Riinvest tregojnë se rreth 50 për qind e qytetarëve të Kosovës jetojnë në varfëri, ndërkaq 12 për qind jetojnë në varfëri të skajshme.

 

Në një takim të përbashkët pune të përfaqësuesve të këtij Instituti me përfaqësues të Programit për Zhvillim të OKB-së dhe të Agjencisë Amerikane për Zhvillim u theksua nevoja për hartimin e strategjive zhvillimore, që do të çonin në fillimin e proceseve ekonomike dhe në uljen e shkallës së varfërisë në Kosovë.

 

 

Vlerësohet e suksesshëm faza e parë e aksionit për grumbullimin e armëve ilegale në Maqedoni

 

Shkup, 12 nëntor 2003 - Në Maqedoni Qendra operative e aksionit për grumbullimin e armëve të jashtëligjshme e ka vlerësuar si të suksesshme fazën e parë të tij. Zëdhënësi i Këshillit Koordinues të këtij operacioni Muhamet Hoxha thotë se gjatë këtij aksioni për dorëzimin vullnetar të armëve janë grumbulluar 7668 copë armësh të ndryshme. Ai shtoi se në 46 prej 123 komunave nuk është mbledhur asnjë armë.

Ndërkohë zëdhënësi i Qendrës Operative Bllagoja Markovski thotë se është zvogëluar numri i incidenteve në Maqedoni, që janë shkaktuar nga armët. Ai ka shtuar se dukshëm janë zvogëluar incidentet dhe provokimet nga përdorimi i armëve të zjarrit në rajonin e Likovës dhe Kumanovës, por kjo sipas tij nuk ndodh në rajonin e Tetovës dhe Gostivarit.

 

Markovski tha se në aksionin për dorëzimin vullnetar të armëve ilegale kontribut të madh kanë dhënë organizatat joqeveritare, mediat dhe subjektet politike me përjashtim të Partisë Demokratike Shqiptare të opozitës, mospjesëmarrja e së cilës në ktë aksion ka shkaktuar disa probleme.

 

 

Buçkovski thotë se Maqedonia, Shqipëria dhe Kroacia, duhet të dëshmojnë përparim maksimal për t'u pranuar në NATO

 

Shkup, 12 nëntor 2003 - Ministri i Mbrojtjes i Maqedonisë, Vllado Buçkovski ka deklaruar se Maqedonia, Shqipëria dhe Kroacia, vende që i përkasin grupit Karta e Adriatikut duhet të dëshmojnë përparim maksimal në gjashtë muajt e ardhshëm me qëllim që në samitin e NATO-s në Stamboll të marrin sinjale të qarta për hyrje në Aleancën Veriatlantike në vitin 2006.

 

Sipas Buçkovskit, parimi i paketës do të ishte mënyra më e mirë për hyrjen e këtyre shteteve në NATO, parim ky, që sipas tij, do të duhej të vlente edhe për inkuadrimin në Bashkimin Evropian.

 

 

Përfaqësuesit e Shqipërisë, Kroacisë dhe Maqedonisë takohen në Uashington për të shqyrtuar progresin në Kartën e Adriatikut

 

Uashington, 12 nëntor 2003 - Përfaqësuesit e Shteteve të Bashkuara, Shqipërisë, Kroacisë dhe Maqedonisë do të takohen në Uashington me 13 dhe 14 nëntor për të shqyrtuar progresin e bërë në zbatimin e Kartës së Adriatikut në rrugën drejt integrimit të tyre në institucionet evro-atlantike.

 

Ky takim do të kryesohet nga nënsekretari amerikan i Shtetit Riçard Armitiç, ka bërë të ditur Ambasada kroate në Uashington. Me Karten e Adriatiku tri vendet janë zotuar të bëjnë reforma dhe të miratojnë standarde të domosdoshme për anëtarësim në NATO dhe në Bashkimin Evropian.

 

 

Në Rripin e Gazës është vrarë një militant i Hamasit

 

Gaza, 12 nëntor 2003-B Një militant i vijës së fortë të grupit islamik të Hamasit është vrarë sot (e merkurë) në një shkëmbim zjarri me trupat izraelite në pjesën qendrore të Rripit të Gazës, kanë bërë të ditur burimet spitalore palestineze, njofton AFP. I vrari është Nahed Kutkot, 27-vjeçar dhe është vrarë gjatë luftimeve në kampin e refugjatëve Bureixh.

Ndërkaq, burimet e informacionit palestinez (IPC) bëjnë të ditur se po sot kanë vdekur dy tinejxherë palestinezë nga plagët e marra të shtunën e kaluar nga trupat izraelite, kur qenë plagosur edhe tre të tjerë. I njëjti burim thotë se në disa qytete palestineze në Bregun Perendimor dhe në Rripin e Gazës, trupat iztraelite kanë arrestuar një numër të konsiderueshëm palestinezësh.

 

 

Soros jep 15 milionë dollarë që ta largojë Bushin nga Shtëpia e Bardhë

 

Londër, 12 nëntor 2003 - Disa gazeta britanike shkruajnë sot se financieri amerikan Xhorxh Soros ka bërë të ditur se "gjëja më e rëndësishme në jetën e tij" është që Xhorxh Bushin ta largojë nga Shtëpia e Bardhë në zgjedhjet e vitit të ardhshëm.

Kështu gazeta "Gardian" shkruan se për synimet e tilla Soros ka ndarë 15 mlionë dollarë në mënyrë që nëntorin e vitit të ardhshëm t'i ndihmojë kundërkandidatit të Bushit në zgjedhjet presidenciale.

 

 

Arrin në 20 numri i të vrarëve nga një shpërthim bombe në qytetin irakian Nasirija

 

Nasirija, 12 nëntor 2003 - Nga një shpërthim bombe, që ka ndodhur sot (e merkurë) në qytetin irakian Nasirija, janë vrarë të paktën 20 njerëz, nga të cilët 12 ushtarë italianë dhe 8 irakianë, kanë bërë të ditur burimet spitalore, njofton Rojter.

 

Në këtë sulm të dyshimtë vetëvrasës janë plagosur gjithashtu edhe 12 persona të tjerë. Në shenjestër të sulmit ka qenë selia e policisë ushtarake italiane. Në Irakun jugor aktualisht ndodhen rreth 2.300 treupa italiane, shumica syresh të vendosur në Nasirija, në bregjet e lumit Eufrat.

 

 

Vritet një ushtar amerikan në Irak

 

Tikrit, 12 nëntor 2003 - Një ushtar amerikan është vrarë mbrëmë kur automjeti i tij ka rënë në një minë tokësore në një rrugë në veri të Bagdadit, në Tikrit, ka bërë të ditur sot (e merkurë) zëdhënësi i ushtrisë amerikane, majori Xhoslin Aberli, njofton Rojter. Ky sulm e ngre në 154 numrin e ushtarëve të vrarë amerikanë në aksione armiqësore që kur Uashingtoni e ka deklaruar të përfunduar luftën në Irak më 1 maj, ka thënë ai.

 

 

Të paktën 6 vetë janë vrarë në një shpërthim afër karabinierisë italiane në qytetin irakian Nasiria

 

Romë, 12 nëntor 2003 - Të paktën 6 vetë janë vrarë në shpërthimin që ndodhi sot në selinë afër karabinierisë italiane në qytetin irakian Nasiria, ka thënë komandanti i përgjithshëm ushtarak italian.

Komandanti i karabinierisë në Romë Guido Belini i ka deklaruar agjencisë italiane ANSA se dëshmitarët portugezë e kanë parë të ketë shpërthyer një kamion afër selisë.

 

 

Nga shpërthimi i një zjarri në Jorkshir, humbin jetën tri motra të vogla

 

Jorkshir, 12 nëntor 2003 - Tri motra të vogla kanë humbur jetën kur flaka ka kapluar shtëpinë e tyre në Gulë të Jorkshirit lindor, njofton BBCnews. Kur kanë arritur zjarrfikësit zjarri zjarri ishte shuar, kurse e ëma kishte dalë e trallisur në kopsht. Motrat e vogla kishin mbetur brenda në shtëpi në katin e parë, nën rrënoja.

 

Viktimat janë të moshës 17 muajshe, trivjeçare dhe gjashtë vjeçare. Nëna e tyre, e ngulfatur nga tymi, po shërohet në spital. Familjet e njëzet shtëpive për rreth janë evakuar. Zjarri ka shpërthyer nga pajisjet e gasit.

 

 

Në Vietnam arrestohet një aktivist demokrat dhe ish- truproje e Ho Shi Minit

 

Ho Shi Min, 12 nëntor 2003 - Një aktivist demokrat vietnamez dhe ish-truproje e ish-liderit komunist, Ho Shi Min, është arrestuar nën akuzën e "abuzimit të lirisë demokratike", njofton BBCWorld.

 

Tran Dung Tien, 78-vjeçar është arrestuar pas kërkesës që i ka bërë në janar qeverisë për të liruar disidentët Pham Que Duong dhe Tran Khue, të cilët kanë qenë arrestuar nga fuindi i vitit 2002 pasi kishin kënduar një këngë për demokracinë. Gjatë vitit të kaluar në Vietnam ka pasur arrestime aktivistësh, madje edhe ata që përdorin internetin për të shprehur dhe shpërndarë pikëpamjet e tyre.

 

 

Në Brazil janë arrestuar rreth 160 vetë që kremtonin sulmet në policinë

 

San Paolo, Brazil, 12 nëntor 2003 - Rreth 160 vetë janë arrestuar sot heret në mëngjes (e merkurë) në qytetin brazilian, San Paolo, pasi kishin kremtuar në një aheng, sulmet në policinë braziliane, njofton BBCWorld. Shumica e të arrestuarve mendohen të jenë të lidhur me krimin e organizuar.

 

Gjatë javës së kaluar janë vrarë tre oficerë policie në sulmet e stacioneve policore dhe të njësiteve mobile policore. Mendohet se ata janë përgjegjës për më se 50 sulme në stacionet policore vetëm brenda nëntë ditëve të kaluara.

 

 

Në Mekë nga pasojat e shirave të fuqishme kanë gjetur vdekjen 12 njerëz

 

Mekë, 12 nëntor 2003 - Në qytetin e shenjtë saudit Meka, nga pasojat e shirave të fuqishme kanë gjetur vdekjen 12 njerëz dhe 50 të tjerë janë lënduar.

Për shkak të përmbytjeve trafiku është ndalur në disa kuarte të qytetit, ndërkohë që nëpër shtëpi janë bllokuar shumë njerëz të cilët presin ndhmën e helikopterit.

Vetëm disa ditë më herët, familja mbretërore saudite i bëri thirrje popullsisë që të lutet për shi, meqenëse toka kishte pësuar pasoja për shkak të thatësirave të gjata.

 

 

Japonia kërcënon SHBA-në me sanksione

 

Tokio, 12 nëntor 2003 - Japonia është bashkuar me Bashkimin Evropian duke kërcënuar Shtetet e Bashkuara me sanksione tragetare nëse ato nuk heq tarifat mbi importe të çelikut.

Japonia, Evropa dhe vende të tjera kanë mirëpritur një vendim të Organizatës Botërore të tregtisë (OBT) të hënën se tarifat amerikane janë të paligjshme.

Ministri japonez i Tregtisë, Shoiçi Nakagava, tha se sanksionet mund të vendosen brenda një muaji nëse tarifat amerikane nuk hiqen.

BE-ja ka thënë pothuajse të njëtën gjë. BE ka arritur të llogarisë dëmin që i shkaktohet prodhuesve evropianë të çelikut që arrin deri në mbi dy miliardë dollarë.

 

 

Amerikanët vrasin një drejtues lokal irakian

 

Bagdad, 12 nëntor 2003 - Autoritetet ushtarake amerikane në Irak kanë pranuar se kanë vrarë kryebashkiakun e njërit prej rajoneve më të paqëndrueshëm të kryeqytetit Bagdad, qytezës Sadr, që banohet kryesisht nga myslimanë shiitë.

Komanda amerikane në Irak thotë se ushtarakët amerikanë thanë se po hetojnë rrethanat në të cilat ndodhi incidenti.

Amerikanët thonë se kryebashkiaku i qytezës Sadr, Mohammed Gazi al-Kaabi, nuk kishte pranuar të zbatonte urdhërat e rojeve që ruanin zyrat e bashkisë.

Njoftimet thonë se zoti Al-Kaabi u përfshi në përleshje me rojet dhe u qëllua me armë në këmbë. Ai u dërgua më pas në spital, por me të arritur atje vdiq.

 

 

Historia e ushtares Lynch

 

Uashington, 12 nëntor 2003 - Xhesika Linç thotë se është prekur nga mënyra se si Pentagoni e ka përshkruar historinë e saj që pushtoi mediat gjatë luftës në Irak. Rënia në duart e irakianëve i ushtares 20-vjeçare amerikane dhe pastaj shpëtimi i saj nga ushtarët amerikanë, u bë subjekt i analizave të hollësishme.

Ushtarja Linç i bërë këto komente në një intervistë 90 minutëshe në një stacion televiziv amerikan në kohën pik të transmetimit.

Ushtarja më e famshme e luftës në Irak e kujton shumë ndryshe kapjen e saj nga njoftimet që atëkohë dha Pentagoni.

Zyrtarët thanë se ajo kishte gjuajtur mbi irakianët, por znj. Linç thotë se ajo nuk shtiu as dhe njëherë të vetme sepse iu bllokua arma.

 

 

Tri raketa u qëlluan kundër selisë së koalicionit në Bagdad, por nuk pati viktima

 

Bagdad, 12 nëntor 2003 - Zyrtarë ushtarakë amerikanë thanë se të paktën 3 raketa u qëlluan kundër selisë së koalicionit të udhëhequr nga Shtetet e Bashkuara në Bagdad pa shkaktuar viktima.

Dëshmitarët thanë se dëgjuan një seri shpërthimesh dje vonë dhe panë shtëllunga tymi që ngriheshin nga zona, ku ndodhet kompleksi i madh amerikan, i quajtur Zona e Gjelbër.

Po dje më parë në kryeqytet, policia irakiane tha se 6 veta ishin plagosur nga shpërthimi i një bombe përjashta një gjykate apeli.

Në pjesën jugore të vendit, një shpërthim shkaktoi të paktën 4 viktima irakiane në Basra. Zyrtarët thanë se viktimat po udhëtonin me një mikrobuz në një rrugë që përdoret shpesh nga trupat britanike, të cilat janë pjesë e koalicionit të udhëhequr nga Shtetet e Bashkuara në Irak.

 

 

SHBA dhe Koreja e Veriut kanë rënë dakord të marrin pjesë në një raund tjetër bisedimesh

 

Uashington, 12 nëntor 2003 - E përditshmja japoneze Asahi Shimbun shkruan se një raund tjetër bisedimesh shumë palëshe mbi programin bërthamor të Koresë së Veriut po planifikohet për muajin e ardhshëm në Pekin.

Asahi Shimbun shkruante në numrin e saj të sotëm se bisedimet 6-palëshe mbi çështjen bërthamore do të zhvillohen nga 10 deri më 13 dhjetori. Sipas gazetës, Shtetet e Bashkuara dhe Koreja e Veriut kanë rënë dakord në parim që të marrin pjesë në raundin e ri të bisedimeve.

Nuk ka pasur konfirmim zyrtar nga vendet pjesëmarrëse në bisedimet e gushtit.

 

 

Senati amerikan miratoi me shumicë dërmuese votash sanksione të reja kundër

 

Uashington, 12 nëntor 2003 - Senati amerikan miratoi me shumicë dërmuese votash sanksione të reja kundër Sirisë në përpjekje për t'i bërë trysni Damaskut që t'i japë fund mbështetjes së terrorizmit dhe përpjekjeve të tij për të zotëruar armë të shkatërrimit në masë.

Senati votoi dje me 89 vota pro dhe 4 kundër për të miratuar projekt-ligjin, i cili u miratua nga Dhoma e Përfaqësusve muajin e kaluar.

Presidenti Bush e ka kundërshtuar një projekt-ligj të tillë për një kohë të gjatë, por kohët e fundit Shtëpia e Bardhë ka lënë të kuptohet se presidenti mund ta nënshkruajë ligjin.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |