Lajmet e ditës: 11 nëntor 2003

E marte, 11 nëntor 2003

Përmbajtja:

Prefekti i Nju Jorkut Majkëll Blumberg viziton Prishtinën për festën e Ditës së Flamurit
Agnesa Vuthaj u zgjodh Miss Kosova 2003
UNMIK: Beogradi të mos financojë dhe të mos mbështesë strukturat paralele në Kosovë
Agjencioni Evropian për Rindërtim ka paraparë për Kosovën 50 milionë euro
Princi Frederik i Danimarkës ka arritur në Kosovë për vizitë treditore trupave daneze
Teatri i Gjilanit kërkon status profesionist
Policia ka arrestuar për drogë dy persona në Gjilan dhe dy të tjerë në Ferizaj
U suspendua sekretari i përhershëm i Ministrisë së Ambientit dhe Planifikimit Hapësinor, Ruzhdi Sefa
Greqia përgënjeshtron se kisne militantë shqiptarë në Greqinë e Veriut po përgatisin një revoltë
Kosova, Shqipëria dhe Bosnja e Hercegovina janë vendet më të rrezikshme në Evropë, vlerësojnë ekspertët britanikë
Podujevë: Tentim vjedhjeje në fshatin Penuhë, SHPK arreston të dyshuarin
Projektligji për shëndetësinë nxirret para deputetëve në seancën e 13 nëntorit
Komiteti i Përgjithshëm i PS unifikon postin e kryetarit të partisë me atë të kryeministrit
Në Kostur të Greqisë u takuan ministrat e Mbrojtjes të të Maqedonisë, Shqipërisë dhe të Greqisë
Admirali Xhonson vizitoi Shkupin për të parë se sa është bërë në fushën e reformave brenda ushtrisë maqedonase
Edi Rama pritet të shpallë kandidaturën për kreun e Partisë Socialiste
Një grup prej 26 senatorësh demokratë kanë paraqitur një rezolutë për shkarkimin e Ramsfeldit
Në Malajzi janë arrestuar 13 studentë për lidhje me grupet militante islamike
Të pakten 3 irakianë janë vrarë nga një minë tokësore në Basra
Forcat e sigurimit saudit kanë arrestuar militantët e dyshimtë
Shqipëria, Maqedonia dhe Kroacia zyrtarisht kandidate për në NATO
Bleri kërkon shërimin e plagëve
Në Basra vriten 6 civilë irakianë, në Bagdad arrestohen 20 militantë të dyshimtë
Forcat amerikane kanë vrarë sot një militant në Afganistan
Dhjetë vetë kanë humbur jetën dhe 55 janë lënduar në përplasjen e dy autobusëve në Egjipt
Presidenti Bush dekoron lordin Robertson
Qeveria saudite në bisedë me opozitën
Diplomatët thonë se nuk janë gjetur prova se Irani po zhvillon armë bërthamore
Një bombë ka shpërthyer afër Zyrës së OKB-së në Kandahar

Prefekti i Nju Jorkut Majkëll Blumberg viziton Prishtinën për festën e Ditës së Flamurit


Agnesa Vuthaj u zgjodh Miss Kosova 2003



UNMIK: Beogradi të mos financojë dhe të mos mbështesë strukturat paralele në Kosovë

Prishtinë, 11 nëntor 2003 - Zëdhënësi i UNMIK-ut Nural Sing tha se UNMIK-u ka një qëndrim të qartë në lidhje me strukturat paralele në veri të Kosovës për mosfunksionim të tyre.

Ai shtoi se UNMIK-u vazhdon me trysni ndaj Beogradit që të mos financojë dhe të mos mbështesë këto struktura paralele, sepse administrata e UNMIK-u ka përgatitur strukturat e saja edhe në atë pjesë të Kosovës. Sing nënvizoi se UNMIK-u është i vetmi institucion i cili ka juridiksion të plotë në të tërë territorin e Kosovës.
Ndërkaq duke bërë fjalë për transferin e kompetencave nga ndërkombëtarët tek vendorët, Sing tha se ky plan është i fare i q qartë: disa tashme janë transferuar e disa janë në proces.
Në lidhje me kompetencat e rezervuara, Sing tha se transferi i tyre do të bëhet kur të vijë koha e përshtatshme.
Në lidhje me rrethojat e përforcuara rreth selisë së UNMIK-ut në Prishtinë, zëdhënësi tha se këto masa sigurie janë marrë me urdhër të selisë së OKB-së në Nju Jork. Kjo nuk po bëhet vetëm në Kosovë, por kudo në botë rreth selive të OKB-së, si pasojë e sulmeve ndaj OKB-së në Bagdad.
Zëdhënësja e BE-së Monik dë Grot në lidhje me presionin e autoriteteve serbe për ndërprerjen e procesit të privatizimit në Kosovë, tha se Beogradi nuk është faktor që mund të bllokojë këtë proces.


Agjencioni Evropian për Rindërtim ka paraparë për Kosovën 50 milionë euro

Prishtinë, 11 nëntor 2003 - Agjencioni Evropian për Rindërtim (AER) për vitin e ardhshëm ka paraparë për Kosovën një donacion prej 50 milionë eurosh. Kjo u bë e ditur sot pas takimit të kryeministrit Bajram Rexhepi me përfaqësuesit e AER-it.

Poashtu në këtë takim është prezentuar drafti i Agjencionit Evropian për Rindërtim, cili ka të bëjë me projektet e ardhshme për Kosovën. Ky është draft-program që pritet të implementohet nga mesi i vitit të ardhshëm.
Drejtori i AER-it, Bernard Guele, tha se agjencioni është duke implementuar programin e përgjithshëm, por vlerësoi se 50 milionë euro për Kosovën do të thotë shumë.

Sipas tij, projekti kryesisht do të përqëndrohet në ndërtimin e qeverisjes efikase dhe të institucioneve. Mirëpo, ai tha se ky është vetëm për propozim, ndërkohë që programi duhet të aprovohet në janar të vitit të ardhshëm, për të hyrë në fuqi gjatë qershorit apo gushtit të vitit 2004.


Princi Frederik i Danimarkës ka arritur në Kosovë për vizitë treditore trupave daneze

Mitrovicë, 11 nëntor 2003 - Princi Frederik i Danimarkës, trashëgimtar i njëres nga monarkive më të vjetra të Evropës, ka arritur dje në Kosovë për vizitë treditore trupave daneze, që janë pjesë e KFOR-it. Ushtarët e nderuan Princin 35-vjeçar të veshur me uniformë ushtarake, i cili i përshëndeti dhe u takua me ta në kampin ushtarak danez jashtë Mitrovicës.

Kontigjenti i Danimarkës prej 450 ushtarësh, që shërbejnë në kuadër të forcave të NATO-s në KFOR përfshin edhe rreth 100 ushtarë nga Lituania, Estonia dhe Letonia.


Teatri i Gjilanit kërkon status profesionist

Gjilan, 11 nëntor 2003 - Teatri i qytetit në Gjilan, i cili vepron që nga viti 1945 dhe posedon një galeri të tërë aktorësh, sikundër që ka edhe një fond të madh të shfaqjeve të realizuara, i plotëson të gjitha kushtet për të qenë profesionist.
Duke pasur parasysh pozitën gjeografike të qytetit të Gjilanit, produktet e artit skenik të këtij Teatri, u dedikohen edhe komunave Bujanoc, Preshevë e Kumanovë, të Luginës së Preshevës, përkatësisht Maqedonisë, të cilat janë të banuara kryesisht me popullatë shqiptare.
Teatri i Gjilanit tashmë posedon me një galeri të tërë aktorësh, të cilët e bartin repertorin që prej 35 vitesh e këtej, si dhe me një galeri tjeter të aktorëve të rinj, të diplomuar viteve të fundit, sikundër edhe me dhjetëra studentë që gjenden para diplomimit në Akademinë e arteve dramaturgjike në Prishtinë, Tiranë e Tetovë.
Gjatë kësaj periudhe 57-vjeçare, ky Teatër, në një stinor ka përgatitur dhe shfaqur 3-5 premiera dhe dhjetëra repriza të tyre, para një auditoriumi shumë të madh spektatorësh.

Vetëm gjatë vitit 2003, realizoi pesë projekte të reja, me dhjetëra repriza, si dhe mori pjesë në 8 festivale e manifestime të karakterit mbarëkombëtar, në të cilat, si nga njohësit më emimentë të kësaj sfere, ashtu edhe nga spektatorët u vlerësuan dhe u çmuan lartë Teatri i Qytetit posedon me një objekt ndër më të mirët në qytet, me një sallë sipas standardeve të fundit, një skenë përmasash standarde, një skenë të vogël kamertale, katër grimore, punëtoritë e garderobierit, parukierit, skenografit, si dhe hapësirë tjetër për nevoja të tjera për një institucion të mirëfilltë profesionist.
Duke e përvijuar një traditë të gjatë dhe një përvojë shumë të madhe, teatri i Gjilanit edhe në këto katër vitet e pasluftës, realizoi 21 premiera dhe qindra repriza të tyre, si në Gjilan, ashtu edhe në qendrat tjera të Kosovës, Maqedonisë e Shqipërisë.
Nisur nga këto argumente, premisa, parime e arsyeshmëri, Drejtoria për Kulturë, Rini e Sport e Gjilanit i ka kërkuar Ministrisë për Kulturë, Rini, Sport dhe Çështje Jorezidente të Kosovës që t`ia njohë statusin profesionist teatrit të qytetit në Gjilan. (I.M.)


Policia ka arrestuar për drogë dy persona në Gjilan dhe dy të tjerë në Ferizaj

Gjilan/Ferizaj, 11 nëntor 2003 - Gjatë fundjavës që shkoi në Gjilan janë arrestuar dy persona, pasi policia te ta ka gjetur 1.5 kilogram drogë heroinë, bëri të ditur zëdhënësi rajonal i SHPK-së në Gjilan, rreshteri Ismet Hashani. Ai thotë se policia dyshon se në këtë rast janë të involvuar më shumë persona dhe për këtë janë duke u zhvilluar hetimet nga njësiti i posaçëm rajonal i policisë për këtë çështje.

Zëdhënësi Hashani shtoi se policia është shumë e interesuar që të gjejë rrugën se nga droga po vjen në Gjilan, përkatësisht në rajon. Po gjatë kësaj periudhe policia ka kapur edhe dy persona në Ferizaj te të cilët është gjetur një sasi e vogël e drogës.


U suspendua sekretari i përhershëm i Ministrisë së Ambientit dhe Planifikimit Hapësinor, Ruzhdi Sefa

Prishtinë, 11 nëntor 2003 - Komisioni për Emërime të Larta pranë Qeverisë së Kosovës ka suspenduar dje nga posti sekretarin e përhershëm të Ministrisë së Ambientit dhe Planifikimit Hapësinor Ruzhdi Sefën. Disa burime brenda këtij Komisioni kanë bërë të ditur se suspendimi është i përkohshëm, fillimisht për dy muaj.

Sefa u suspendua nga ky post me kërkesën e ministrit Ethem Çeku, i cili e ka akuzuar atë për menaxhim të dobët për krijimin e raporteve jo të mira ndërmjet punonjësve të kësaj Ministrie, si dhe për keqadministrim.


Kosova, Shqipëria dhe Bosnja e Hercegovina janë vendet më të rrezikshme në Evropë, vlerësojnë ekspertët britanikë

Londër, 11 nëntor 2003 - Kërkimet e një grupi ekspertësh britanikë që merren me vlerësimin e rrezikut, tregojnë se Kosova, Shqipëria dhe Bosnja e Hercegovina janë vendet më të rrezikshme në Evropë.

Rezultatet e studimit të publikuar sot tregojnë gjithashtu se Londra është më e ekspozuara me sulmet terroriste të ekstrmistëve nga Nju Jorku apo Uashingtoni.

Angazhimet e kryeministrit Toni Bler në luftën amerikane në Irak si dhe një popullatë e konsiderueshme muslimane e cila jeton në Britaninë e Madhe, paraqesin "kërcënim serioz" për sigurinë e Londrës, theksohet në këtë studim të ekspertëve britanikë.

Autorët e studimit konsiderojnë se sulmi ndaj Londrës mund të të bëhet në formë të sulmeve vetëvrasëse.


Podujevë: Tentim vjedhjeje në fshatin Penuhë, SHPK arreston të dyshuarin

Podujevë, 11 nëntor 2003 - Policia e UNMIK-ut raportoi se sot rreth orës 2.40 të mëngjesit ka ndodhur një tentim vjedhjeje afër pompës së benzinës "Deda Petrol".
"Policia ka marrë një thirrje për dy persona të dyshuar, njëri nga të cilët i armatosur, që tentuan të vjedhin karburante nga një kamion, por u konfrontuan me pronarin", ka njoftuar policia e UNMIK-ut.
Sipas këtij burimi, të dyshuarit në përpjekje për t'u arratisur janë përmbysur me veturën e tyre në hendek.

Policia ka njoftuar se të dyshuarit lanë veturën e tyre dhe ikën me vrap në drejtim të panjohur dhe se nuk ka të arrestuar.

Mirëpo burime të QIK-ut në SHPK-në e Podujevës pohojnë se rasti ka ndodhur në fshatin Penuhë. "SHPK ka identifikuar të dyshuarin të cilin e ka arrestuar dhe ai po mbahet në paraburgim", ka njoftuar i njëjti burim nga SHPK-ja.
Policia rajonale e UNMIK-ut ka njoftuar edhe për arrestimin e një personi i cili ka lënduar dy persona tjerë me pistoletë gazi. Viktimat janë trajtuar në shtëpinë lokale të shëndetit, kurse policia ka konfiskuar pistoletën 9 mm me gaz, ka njoftuar policia e UNMIK-ut e rajonit të Prishtinës. (B.T.)


Projektligji për shëndetësinë nxirret para deputetëve në seancën e 13 nëntorit

Prishtinë, 11 nëntor 2003 - Kryesia e Kuvendit të Kosovës, në mbledhjen e rregullt të drejtuar nga Nexhat Daci, kryetar, ka vendosur që në seancën e 13 nëntorit ta nxjerrë për shqyrtim të parë Projektligjin për shëndetësinë.

Në po këtë seancë do të shqyrtohet rekomandimi i Komisionit për gjyqësi, legjislacion dhe Kornizë Kushtetuese për emërimin e gjykatësve dhe prokurorëve. Në seancë do të ketë edhe përgjigje nga ministrat e resorëve përkatës në pyetjet e deputetëve.
Për seancën vijuese, të 20 nëntorit, do të shqyrtohen për herë të dytë Projektligji për sportin dhe ai për Kadastrin, kurse për shqyrtim të parë do të nxirret Projektligji për transportin rrugor.
Kryesia sot ka shqyrtuar edhe rekomandimet e Komisionit për shërbime publike, lidhur me pengesat e qytetarëve për pajisjet me dokumente personale dhe ka konstatuar se çështja është dashur t=i drejtohet qeverisë dhe ministrisë përkatëse, por Kryesia është pajtuar se çështja meriton vëmendje dhe trajtim për t=u zgjidhur në interes të qytetarëve.


Komiteti i Përgjithshëm i PS unifikon postin e kryetarit të partisë me atë të kryeministrit

Tiranë, 11 nëntor 2003 - Komiteti i Përgjithshëm Drejtues i Partisë Socialiste vendosi unifikimin e postit të Kryetarit të partisë me atë të kryeministrit. Por, KPD nuk miratoi disa propozime të Kryesisë së kësaj partie në lidhje me disa kriterie që duhet t'i plotësojnë ata që do të konkurrojnë për postin e kryetarit të partisë në Kongresin e socialistëve në dhjetor të këtij viti.
Mbledhja e KPD e PS-së i ka shërbyer Fatos Nanos për të kundërshtuar ashpër kundërshtarët e tij në parti dhe për t'i treguar njëherësh haptazi edhe opozitës se socialistët synojnë të qeverisin Shqipërinë edhe një mandat tjetër.
KPD megjithatë pranoi edhe disa nga propozimet e ish-presidentit Rexhep Meidani për të pasur hapësirë të frymës demokratike në Partinë Socialiste.


Në Kostur të Greqisë u takuan ministrat e Mbrojtjes të të Maqedonisë, Shqipërisë dhe të Greqisë

Kostur, 11 nëntor 2003 - Në qytetin Kostur të Greqisë u takuan dje ministrat e Mbrojtjes të trive vendeve fqinj: Maqedonisë, Shqipërisë dhe të Greqisë, Vllado Buçkovski, Pandeli Majko dhe Janos Papantoniu.

Në fokus të bisedimeve ishin perspektivat dhe reformat për integrimin e Maqedonisë dhe të Shqipërisë në Aleancën Veriatlantike. Në takimin tripalësh iu kushtua vëmendje bashkëpunimit ushtarak të interesit të përbashkët, si dhe u shqyrtuan arritjet më të reja të bashkëpunimit në fushën e mbrotjes të vendeve të Evropës Juglindore.
Me këtë rast tre ministrat inspektuan dhe inauguruan një trekëndësh lundrues që i përcakton kufijtë ujor të tri vendeve të Prespës së Madhe, problem ky që kishte mbetur pezull që në vitet 1920 të shekullit të kaluar. Protokolli i nënshkruar ndërmjet këtyre tri vendeve fqinje përmbanë gjithë gamën e aktiviteteve të ministrive të mbrojtjes si trajnime ushtarake etj.


Admirali Xhonson vizitoi Shkupin për të parë se sa është bërë në fushën e reformave brenda ushtrisë maqedonase

Shkup, 11 nëntor 2003 - Komandanti i forcave aleate të NATO-s për Evropën Juglindore, admirali Gregori Xhonson ka vizituar dje Shkupin për të parë se sa është bërë në fushën e reformave brenda ushtrisë së Maqedonisë. Admirali Xhonson u taku me ministrin e Mbrotjes së Maqedonisë.

Ai tha se është shënuar përparim, porse ka ende shumë punë për t'u bërë. Admirali Xhonson bëri të ditur se Maqedonia po merret me zhvillimin e një studimi strategjik të reformave nën drejtimin e ministrit të Mbrojtjes Vllado Buçkovski, duke e cilësuar atë si një dokument që do të shërbejë për reforma të mëtutjeshme në fushën e sigurisë.

Ai theksoi me forcat e NATO-s në Maqedoni kanë një qëllim të vetëm që të sigurojnë ndihmë dhe mbështetje në rrugën e vështirë që ka Maqedonia para vetës drejt realizimit të reformave të mbrojtjes.

Admirali tha se pret që brenda gjashtë muajve të ardhshëm zyrtarët e Maqedonisë do të tregojnë rezultate të mira dhe se Qeveria dhe Ministria e Mbrojtes së Maqedonisë do t'i marrin ato vendime të vështira që duhet ndërmarrë.

Autoritetet maqedonase duhet të heqin dorë nga një pjesë e armatimit para konfliktit të armatosur të vitit 2001 dhe këtu bëjnë pjesë aeroplanët të prodhimit rus "Suhoj" ndërkohë që si pjesë e reformave që duhet bërë vendi në bazë të standardeve të NATO-s ku synon anëtarësimin është po ashtu edhe shtimi i numrit të pjesëtarëve të komuniteteve të ndryshme në armatë.


Edi Rama pritet të shpallë kandidaturën për kreun e Partisë Socialiste

Tiranë, 11 nëntor 2003 - Në Shqipëri, kryetari i bashkisë së Tiranës, Edi Rama, pritet të jetë kandidat për kreun e Partisë Socialiste. Burime të afërta me të i thanë "Zërit të Amerikës" se zoti Rama do ta shpallë sot kandidaturën e tij. Në këtë mënyrë ai bëhet emri i tretë që synon drejtimin e ardhshëm të Partisë Socialiste, krahas atij të kryeministrit Fatos Nano dhe ish presidentit Rexhep Meidani.


Një grup prej 26 senatorësh demokratë kanë paraqitur një rezolutë për shkarkimin e Ramsfeldit

Uashington, 11 nëntor 2003 - Një grup prej 26 senatorësh demokratë të Dhomës së Përfaqësuesve kanë thënë dje se kanë paraqitur një rezolutë, me të cilën kërkojnë nga presidenti Bush të largojë nga posti sekretarin amerikan të Mbrojtjes, Donald Ramsfeld, njofton Rojter.
"Kjo rezolutë do ta bëjë zyrtare atë që shumë anëtarë të Kongresit tashmë e kanë besuar, se ushtarët në Irak dhe politika e jashtme amerikane do të ndihmoheshin shumë nëse Donald Ramsfeld do të shkonte", ka thënë senatori Çarls Rangel nga Nju Jorku. Deri tash, kjo rezolutë e tij, ka siguruar edhe 25 bashkësponsorë, ka shtuar ai.


Në Malajzi janë arrestuar 13 studentë për lidhje me grupet militante islamike

Kuala Lampur, 11 nëntor 2003 - Trembëdhjetë studentë malajzianë të dyshimtë për lidhje me grupet militante islamike janë arrestuar sapo kanë arritur në vendin e tyre pasi ishin deportuar nga Pakistani, njofton BBCWorld. Ata ishin arrestuar në shtator në Karaçi së bashku me vëllain më të ri të Hambalit, që është një indonezian, i cili ishte kryeorganizator i bombëvënieve në Bali. Studentët e arrestuar kanë studiuar në kolegjet islamike në Pakistan.


Të pakten 3 irakianë janë vrarë nga një minë tokësore në Basra

Basra, 11 nëntor 2003- Të pakten tre irakianë janë vrarë kur një minibus ka rënë në një minë tokësore, të vënë në rrugë në qytetin jugor irakian Basra, njofton Rojter. Minibusi është shkatërruar krejtësisht, kurse pjesë të trupave të viktimave janë shpërndarë nëpër rrugë. Policia irakiane ka thënë se asnjë ushtar britanik, të cilët janë me shërbim në sigurimin e Basrës, nuk kanë qenë në atë zonë në kohën e shpërthimit afër një pike kontrolli policor në këtë kryeqytet shit.
Iraku kugor ka pasur më pak sulme kundër forcave të koalicionit sesa në Bagdad. Të pakten 153 ushtarë amerikanë dhe 12 ushtarë britanikë kanë humbur jetën në aksione armiqësore që kur zyrtarisht është shpallur përfundimi i luftës në Irak më një maj.


Forcat e sigurimit saudit kanë arrestuar militantët e dyshimtë

Riad, 11 nëntor 2003 - Forcat e sigurimit saudit kanë arrestuar militantët e dyshimtë të involvuar në bombëvënien vetëvrasëse të fundjavës kur u vranë të pakten 18 vetë në kompleksin e ndërtesave në kryeqytetin saudit Rijad, ka bërë të ditur sot (e martë) një diplomat i afërm me organet e hetuesisë, njofton Rojter.

Fushata për ndjekjen e fajtorëve në këto sulme me bombë ka filluar menjëherë. Disa të ndaluar janë liruar pasi janë marrë në pyetje, ka shtuar ai.


Shqipëria, Maqedonia dhe Kroacia zyrtarisht kandidate për në NATO

Orlando, 11 nëntor 2003 - Shqipëria, Maqedonia dhe Kroacia janë tre vendet që mbetën jashtë NATO-s në raundin e kaluar të pranimeve në Aleancë. Nikolas Bërns, përfaqësues i përhershëm i Shteteve të Bashkuara në NATO, tha se ai nuk parashikon që tre vendet të ftohen në vitin 2004 për t'u pranuar.
"Tre vende janë tani zyrtarisht kandidate: Shqipëria, Maqedonia dhe Kroacia. Mendoj se që të tre po ecin mirë, po bëjnë përpjekje serioze por ende kërkohet punë. Prandaj nuk do të parashikoja që këto vende mund të ftohen për pranim në vitin 2004 dhe mendoj se edhe ato vetë nuk do të shpresonin të ftoheshin më 2004", tha Bërns.


Bleri kërkon shërimin e plagëve

Londër, 11 nëntor 2003 - Kryeministri britanik, Toni Bler, i ka bërë thirrje Evropës dhe Shteteve të Bashkuara që të lënë mënjanë dallimet e tyre rreth luftës në Irak dhe të punojnë së bashku për të arritur një siguri më të madhe ndërkombëtare.
Në një fjalim në Londër, zoti Bler, e ka mbrojtur marrëdhënien e ngushtë të Britanisë me SHBA-në.
Ai ka nënvizuar rëndësinë e mirëmbajtjes të, siç i quajti, dy shtyllave të politikës së jashtme britanike: aleancën e saj me Amerikën dhe anëtarësimin në BE.
Zoti Bler e pranoi se vizita treditore e presidentit Bush në Britani, javën e ardhshme, do të jetë shumë kundërthënëse.


Në Basra vriten 6 civilë irakianë, në Bagdad arrestohen 20 militantë të dyshimtë

Basra, 11 nëntor 2003 - Të pakten gjashtë civilë irakianë janë vrarë kur një minibus ka rënë në një minë tokësore, të vënë në rrugë në qytetin jugor irakian Basra, ku më së shpeshti patrullojnë ushtarët britanikë, kanë bërë të ditur burimet spitalore, njofton Rojter. Në edicionet e mëhershme është njoftuar për tre të vrarë në këtë incident.
Po kështu, një komandant i lartë ushtarak amerikan ka thënë në një konferencë të sotme shtypi se prej hyrjes në Irak, ushtria amerikane ka arrestuar rreth 20 vetë të dyshimtë në lidhje me rrjetin e Al Kaisdës, por s'kanë gjetur prova për një gjë të tillë.


Forcat amerikane kanë vrarë sot një militant në Afganistan

Bagram, Afganistan, 11 nëntor 2003 - Forcat amerikane kanë vrarë sot (e martë) një militant në verilindje të Afganistanit gjatë një operacioni kundër guerilëve islamikë, që, siç është përshkruar, është një nga operacionet më të mëdha, që është ndërmarrë deri tash në këtë vend, njofton Rojter.

Ky operacion i koduar "Mauntin Rezoulv" (Zgjidhja malore) ka filluar të premten e kaluar dhe ende po vazhdon. Qëllimi i tij është çrrënjosja e grupeve guerile të ish-regjimit të përmbysur para dy vjetëve.


Dhjetë vetë kanë humbur jetën dhe 55 janë lënduar në përplasjen e dy autobusëve në Egjipt

Kajro, 11 nëntor 2003 - Të paktën dhjetë vetë kanë humbur jetën, ndërkaq 55 janë lënduar në përplasjen e dy autobusëve të martën në Kajro, ka bërë të ditur policia.
Egjipti radhitet në mesin e vendeve më numrin më të madh të aksidenteve në trafikun rrugor, të shkaktuara të shumtën për shkak të shpejtësisë së madhe, pakujdesisë gjatë vozitjes dhe për shkak të rrugëve të këqija.


Presidenti Bush dekoron lordin Robertson

Uashington, 11 nëntor 2003 - Presidenti amerikan Xhorxh Bush do ta dekorojë të mërkurën me Medalen Presidenciale të Lirisë, lordin Xhorxh Robertson, i cili po përfundon mandatin e tij në postin e sekretarit të përgjithshëm të NATO-s, dhe e drejtoi Aleancën gjatë periudhës së transformimit të saj më të madh.

Robertson, i cili do të largohet nga ky post në dhjetor, do të marrë titullin më të lartë të nderit që e japin Shtetet e Bashkuara të Amerikës për civilë në Shtëpinë e Bardhë në kuadrin e vizitës së tij të fundit si Sekretar i Përgjithshëm i NATO-s.
Sipas Shtëpisë së Bardhë, lordi Robertson dhe presidenti Bush në takimin e tyre do të bisedojnë për Irakun, Afganistanin, për operacionet paqeruajtëse në Bosnje dhe në Kosovë, si dhe një plan për samitin e NATO-s, që do të mbahet në Stamboll të Turqisë më 2004.


Qeveria saudite në bisedë me opozitën

Riad, 11 nëntor 2003 - Mbreti Fahd i Arabisë Saudite ka thënë se vendi i tij do të godasë me dorë të çeliktë kundër secilit që kërcënon sigurinë e tij.
Në një deklaratë të kabinetit saudit, thuhet se mbreti ka premtuar që të ndjekë militantët e dyshuar për sulmin vetëvrasës në Riad me ç'rast u vranë të paktën shtatëmbëdhjetë veta.
Mbreti Fahd i bëri këto komente pak kohë pasi njoftimet bënë me dije se qeveria saudite ka filluar bisedimet me udhëheqësit e opozitës me qëllim të hapjes së bisedimeve me militantët.
Një anëtar me ndikim në familjen mbretërore saudite, princi Awaleed bin Talal, i ka bërë thirrje vendit që të reformohet dhe të përballet me esktremizmin në rritje, para se të ndodhin sulme të tjera vetëvrasëse.


Diplomatët thonë se nuk janë gjetur prova se Irani po zhvillon armë bërthamore

Teheran, 11 nëntor 2003 - Diplomatët thonë se agjencia e Kombeve të Bashkuara për Armët Bërthamore nuk ka gjetur prova se Irani po zhvillon armë të tilla, megjithatë hetimet rreth programit iranian të armëve atomike nuk kanë përfunduar ende.
Kryetari i Agjencisë Ndërkombëtare për Energjinë Atomike, Mohamed El Baradei, i dërgoi dje një raport bordit të agjencisë në Vjenë lidhur me programin bërthamor të Iranit.
Raporti nuk u bë i ditur publikisht, por diplomatët që e shikuan atë thanë se ndërkohë që raporti tregon se Irani u përpoq të anullonte disa veprimtari bërthamore, deri tani nuk ka prova që tregojnë se ato veprimtari kishin lidhje me armë bërthamore.