Përmbajtja:

• Holkeri sot niset për në KS të OKB-së për çështjen e privatizimit në Kosovë

• Daci tha se në Kosovë nuk do të ketë decentralizim para se të shpërbëhen strukturat paralele

• Rexhepi bisedoi me shefin e Zyrës bullgare në Prishtinë

• Ish-policët e Kosovës protestuan sot para selisë së UNMIK-ut`

• Ndaj policit që ka vrarë dy persona është marrë masa e suspendimit administrativ dhe ai po mbahet në arrest

• Një polic i SHPK-së ka vrarë dy persona në një fshat të Gjakovës

• F. Sejdiu: Ndryshimet në Kornizën Kushtetuese janë në funksion të përgatitjes së terrenit për ushtrim të përgjegjësive

• Podujevë: Administraa e përgjithshme ka realizuar qindpërqind të hyra nga shërbimet për qytetarët`

• Në komunën e Istogut gjatë periudhës dyvjeçare janë realizuar rreth 136 projekte zhvillimore

• Franca pret nga qeveria e Kosovës të vazhdojë dialogu Beograd-Prishtinë

• Bosnjë: Rrëfimet për të kaluarën dhe motivi për të ardhmen

• Vdiq Hava Rexha 123-vjeçare, gruaja më e vjetër në Shqipëri

• Në Tiranë sot zhvillohet mbledhja e Këshillit të Përgjithshëm Drejtues të Partisë Socialiste

• Pushtetin vendor në Preshevë e ka përfshirë një krizë e thellë politike si pasojë e mospajtimeve të partive politike shqiptare

• Policia malazeze prej sot merr sigurimin e kufijve në trekëndëshin: Mali i Zi - Kosovë – Shqipëri

• Në një rrëmujë në Sudan, humbën jetën 31 persona dhe u plagosën 48 të tjerë

• Në një sulm me granatë raketore afër Bagdadit është vrarë një ushtar amerikan

• Të paktën 60 vetë janë masakruar në Uganda nga anëtarë të forcave rebele të vendit.

• 17 të vdekur, mbi 120 të plagosur nga shpërthimi në Arabinë Saudite

• Fajësohet Al-Kaida për sulmin

• Irak: Hartimi i kushtetutës mund të shtyhet

• Në Gjeorgji opozita largohet nga bisedimet

• Të pakten 5 civilë janë vrarë në një sulm kryengritësve në kryeqytetin e Burundit

• Një shpërthim ka dëmtuar monumentin e viktimave të komunizmit në qendër të Pragës

Holkeri sot niset për në KS të OKB-së për çështjen e privatizimit në Kosovë

 

Nju-Jork, 10 nëntor 2003 - Kryeadministratori i OKB-së për Kosovën, Hari Holkeri niset sot për në Këshillin e Sigurimit të OKB-së në Nju-Jork për të diskutuar lidhur me çështjen e privatizimit në Kosovë. Procesi i privatizimit në Kosovë ka filluar në qershor me privatizimin e pesë ndërmarrieve të para, por u bllokua muajin e kaluar.

 

 

Daci tha se në Kosovë nuk do të ketë decentralizim para se të shpërbëhen strukturat paralele

 

Prishtinë, 10 nëntor 2003 - Shefi i misionit të veçantë të Këshillit të Evropës, Karlo Çivileti, ia ka dorëzuar sot rekomandimet kryetarit të Parlamentit të Kosovës Nexhat Daci.

Sipas Çiviletit, reformimi i pushtetit lokal në Kosovë do të bëhet sipas kriterit demografik dhe territorial. "Ne jemi të bindur se këto reforam do të ndihmojnë në shpërbëhjen e strukturave paralele", tha Çivileti. Por, sipas tij, shumëçka varet nga numri i anëtarëve të komunitetit në një territor të caktuar, duke paralajmëruar publikimin e raportit javën e ardhshme.

Kryeparlamentari Daci vlerësoi se propozimet bazohen në kriterin gjeografiko-territorial e jo etnik, dhe ofrojnë mundësi për zhvillim të komunave. Ai shtoi se implementimi i rekomandimeve do të fillojë në vitin 2006, atëherë kur edhe statusi i Kosovës do të jetë i zgjidhur.

Por, Daci tha se në Kosovë nuk do të ketë decentralizim para se të shpërbëhen strukturat paralele dhe se parlamenti nuk do të miratojë ndonjë ligj për legalizimin e sistemeve paralele.

"Nëse ngelin institucionet paralele ne nuk do të nxjerrim ligj përkundrazi, do të nxjerrim ligj i cili do të ndihmojë në funksionimin normal të qytetarëve dhe institucioneve", tha Daci.

Ai shtoi se përfaqësuesit e minoriteteve duhet t'i zgjedhin njerëzit e vet në njësinë nënkomunale dhe të mënjanohen institucionet paralele, por kurrsesi nuk do të nxirret ligji për legalizimin e strukturave paralele, tha Daci.

Kryeparlamentari Daci theksoi se Kosova, duke synuar një ardhmëri evropiane, është e obliguar që të marrë përsipër edhe përgjegjësitë që kanë këto vende.

 

 

Rexhepi bisedoi me shefin e Zyrës bullgare në Prishtinë

 

Prishtinë, 1 nëntor - Shefi i Zyrës bullgare në Prishtinë, Nikolaj Kolev, përsëriti edhe sot se Bullgaria së shpejti do t'i njohë dokumentet e udhëtimit të lëshuara nga UNMIK-u. Diplomati bullgar këtë e bëri të ditur edhe sot pas takimit me kryeministrin e Kosovës Bajram Rexhepi, sikur edhe ditë më parë në takimet e mëhershme.

Kolev tha se vendimi për njohjen e dokumenteve të UNMIK-ut do të merret pasi të zgjidhen disa probleme teknike mes Ministrisë së jashtme dhe asaj të Brendshme bullgare. Kështu kosovarët mund të shkojnë në Bullgari për turizëm ose për udhëtime të ndryshme, tha ai.

Bajram Rexhepi, pasi përshëndeti hapjen e Zyrës bullgare në Prishtinë, e vlerësoi të rëndësishme njohjen e dikumenteve të udhëtimit dhe targat e automjeteve të Kosovës nga ana e Bullgarisë.

Gjithashtu Rexhepi tha se në këtë takim është biseduar edhe për disa çështje të tjera që kanë të bëjnë me ekonominë dhe energjetikën. Rexhepi tha se ka kërkuar që importi i energjisë elektrike nga Bullgaria të bëhet drejtpërdrejt e jo nëpërmjet ndërmjetësuesve. Por, ai tha se ka edhe mundësi të tjera bashkëpunimi mes Kosovës e Bullgarisë.

 

 

Ish-policët e Kosovës protestuan sot para selisë së UNMIK-ut`

 

Prishtinë, 10 nëntor 2003 - Sot para selisë së UNMIK-ut në qendër të Prishtinës protestuan disa qindra ish-policë të Kosovës dhe familjarët e tyre me kërkesë që të kthehen në vendin e tyre të punës.

 

Protestuesit mbanin në duar edhe shumë pankarta në të cilat shprehnin kërkesën e tyre të vetme për t'u kthyer në vendet e punës. Nijazi Alidemaj, anëtar i Këshillit grevist tha se ish-policët kërkojnë nga zyrtarët e UNMIK-ut dhe të policisë së UNMIK-ut dhe instuticionet vendore që më seriozisht të merren me problemin e ish-policëve.

 

Ai tha se nëse brenda dy tri ditëve nuk përmbushet kërkesa e tyre ata do të hynë në grevë urie.
Ukë Bashota, nënkryetar i BSPK, tha se greva e ish-policëve ka mbështetjen e plotë të Sindikatave të pavarura të Kosovës.

 

 

Ndaj policit që ka vrarë dy persona është marrë masa e suspendimit administrativ dhe ai po mbahet në arrest

 

Pejë, 10 nëntor 2003 - Policia e Pejës ka lëshuar një komunikatë lidhur me vrasjen e parëmbrëmshme në Gjakovë. Një polic i SHPK-së i njësitit patrullues i Stacionit të Gjakovës është marrë në pyetje në Shtabin rajonal në Pejë në lidhje me hetimet mbi vdekjen e dy burrvae nga të shtënat në fshatin Dushnje.

 

Zyra e prokurorit ndërkombëtar është duke vlerësuar rastin dhe është duke drejtuar hetimet.

 

Sikurse në të gjitha rastet e shtënave nga ana e policëve edhe ky incudent është duke u hetuar tërësisht në bashkëveprim me Rregulloren e UNMIK-ut dhe në përputhje me procedurën penale të Kosovës, si dhe me Rregullorën e SHPK-së.

 

Ndaj policit është marra masa e suspendimit administrativ në pritje të rezultatit të hetimeve, thuhet në këtë komunikatë të lëshuar nga Policia rajonale e Pejës.

 

 

Një polic i SHPK-së ka vrarë dy persona në një fshat të Gjakovës

 

Prishtinë, 10 nëntor 2003 - Një polic i Shërbimit Policor të Kosovës i identifikuar si Valon Miftari, në rrethana të pasqaruara ka vrarë në fshatin Dushnje të Gjakovës Sadik Zenelin, (1949) dhe Sefedin Zenelin, (1974).

 

Sipas familjarëve të viktimave dorasi është Valon Miftari, kushëri i tyre, pjesëtar i SHPK-së. Sipas dëshmitarëve që kanë qenë afër vendit të ngjarjes dorasi ka ardhur me veturë të policisë dhe ka qenë i veshur me rroba civile. Më pas ai është takuar me dy viktimat, ku më vonë kanë dëgjuar të shtënat dhe kanë parë dorasin, duke ikur në shtëpinë e tij.

Nipi i Sadikut, tashmë i vrarë, thotë se gjyshi i tij i ka treguar se një javë më parë ai ka pasur një mosmarrëveshje për mospajtime politike me dorasin.

Ndërkaq zyrtarët e policisë ndërkombëtare thanë se polici nuk ishte në orarin e punës në kohën kur ndodhi incidenti, mirëpo vrasja është kryer me armë zyrtare. Tash për tash zyrtarët e policisë nuk kanë dhënë ndonjë hollësi rreth motiveve të mundshme.

Kjo është hera e parë që një pjesëtar i SHPK-së përfshihet në një incident jashtë detyrës zyrtare.

 

 

F. Sejdiu: Ndryshimet në Kornizën Kushtetuese janë në funksion të përgatitjes së terrenit për ushtrim të përgjegjësive

 

Prishtinë, 10 nëntor 2003 - Polemikat e krijuar ndërmjet UNMIK-ut dhe institucioneve të Kosovës nuk janë sinjal që Grrupi punues për ndryshimet në Kornizën Kushtetuese të ndërpresë punën, ka thënë anëtari i Kryesisë së Kuvendit të Kosovës, Fatmir Sejdiu.

 

Ai ka theksuar se institucionet e vendit nuk mund të përmbushin standardet në fushën ku kompetencat mungojnë.

 

Z. Sejdiu ka thënë se ndryshimet në Kornizën Kushtetuese janë në funksion të përgatitjes së terrenit për ushtrim të mirëfilltë të përgjegjësive nga ana e institucioneve të Kosovës me çka kosovarët do të përmbushin standardet e përcaktuara nga bashkësia ndërkombëtare.

 

Sipas tij, deri më tash institucionet e Kosovës nuk janë duke ushtruar përgjegjësitë as në fushat ku është thënë se mund ta bëjnë një gjë të tillë.

Sipas z. Sejdiu institucionet e Kosovës mund t'i përmbushin standardet e kërkuara nga bashkësia ndërkombëtare para mesit të vitit 2005, datë kjo kur pritet të fillojnë bisedimet për zgjidhjen e statusit final të Kosovës.

 

 

Podujevë: Administraa e përgjithshme ka realizuar qindpërqind të hyra nga shërbimet për qytetarët`

 

Podujevë, 10 nëntor 2003 - Gjatë periudhës dhjetëmujore për punët e kryera janë realizuar 41.959, që do të thotë se është realizuar plani 100% për mbledhjen e të hyrave të parapara për këtë organ, pohon drejtori i Drejtorisë për Adminisratë të Përgjithshme Ahmet Shala.

Në Shërbimin e Arkivit komunal gjithsej janë pranuar 2283 lëndë të ndryshme për udhëheqjen komunale dhe 12 drejtoritë e KK të Podujevës, njoftoi sot Drejtori Shala në një raport të publikuar në dhjetëmujroin e punës së shërbimit civil.

 

Ndërkaq në Shërbimin e regjistrimit civil brenda këtij dhjetëmujori numri i personave të regjistruar është 2854, numri i kërkesave per dokumente të udhëtimit është 4335, numri i dokumenteve të udhëtimit të marra 4616, numri i dokumenteve të shpërndara 5454, numri i dokumenteve të udhëtimit të korrektuara 546, numri i letërnjoftimeve të marura 3169, numri i letërnjoftimeve të shpërndara 3776, letërnjoftime të humbura 540, dokumente të vazhduara 1519, çertifikata vendbanimi 452, tha drejtori Shala. Ai thotë se krahasur punën e këtij shërbimi me vitin e kaluar këtu ka një zvogëlim të punëve të kryera për 40% sepse po bie numri i personave të regjistruar.

Në shërbimin e ofiqarisë gjatë periudhës raportuese janë kryer këto punë: janë pranuar gjithësejt 30.457 kërkesa, nga këto: ekstrakte të lindjes 16.239, ektrakte të martesës 3.499, ekstrakte të vdekjes 743, Çertifikata të bashkësisë familjare 1713, vërtetime se personat janë të lirë për martesë 2231. Në shërbimin e ofiqarisë nëse bëjme një krahasim me vitin e kaluar kemi një rritje prej 10% të kryerjes dhe rritjes së kërkesave të ndryshme, ka pohuar z. Shala.

Në kuadër të DAP tashmë funksionojnë edhe Zyra e Prokurimit dhe Zyra e Habitatit të cilat do të japin raporte shtesë, gjegjsisht kjo e dyta është në fazën përgatitore dhe trajnuese të stafit, njoftoi Hamit Shala.

 

 

Në komunën e Istogut gjatë periudhës dyvjeçare janë realizuar rreth 136 projekte zhvillimore

 

Istog, 10 nëntor 2003 - Në ekzekutivin e Komunës së Istogut theksojnë se gjatë periudhës së kaluar dyvjeçare të qeverisjes lokale janë realizuar rreth 136 projekte zhvillimore. Falë ndihmës së organizatave joqeveritare, por edhe të ndihmës financiare të Kuvendit komunal janë ndërtuar rrugë të shumta nëpër fshatrat e kësaj komune.

 

Është instaluar ujësjellësi i ri, si dhe janë ndërtuar dhe riparuar shumë objekte shkollore. Edhepse deri më tash janë shënuar rezultate të mira mbetet për t'u realizuar edhe shumë projekte të tjera, thotë Qazim Loxha drejtor i Drejtoratit për Planifikim dhe Zhvillim të Komunës së Istogut.

 

 

Franca pret nga qeveria e Kosovës të vazhdojë dialogu Beograd-Prishtinë

 

Beograd, 10 nëntor 2003 - Franca pret nga qeveria e Kosovës që pa shtyrje konkretisht t'i qaset "dialogut direkt" ndërmjet Beogradit dhe Prishtinës. Kështu thuhet në një komunikatë të Ministrisë franceze të Punëve të Jashtme të cilën sot e ka publikuar Ambasada franceze në Beograd.

 

 

Bosnjë: Rrëfimet për të kaluarën dhe motivi për të ardhmen

 

Sarajevë, 10 nëntor 2003 - Shpërbërja e ish-Jugosllavisë, ndonëse u përcollë me luftëra të gjata dhe gjakderdhje, për shumicën e popujve të saj hapi shtigje për një perspektivë më të mirë në Evropën e bashkuar, ku kufijtë nuk do të jenë më "mure" që ndajnë, por "porta" që bashkojnë me botën demokratike.

Për të përshpejtuar këtë proces, dekompozimi i Jugosllavisë duhet të përfundohet sa më shpejt që është e mundur dhe kjo nënkupton zgjidhjen e statusit të Kosovës dhe pavarësimin e Malit të Zi.

Në Bosnjë, e cila ishte njëra nga pjesët e këtij shteti, por që u përball me luftën më të tmerrshme, kanë filluar të funksionojnë përsëri urat dhe kjo mund të vlerësohet si një hap i mirë drejt të ardhmes së këtij vendi, sepse urat, këtu kanë edhe një simbolikë të veçantë, derisa tri etnitet e saj kryesore jetojnë në zona e kuarte të veçanta.

Ky shtet, që tash ndodhet më tepër në një fazë eksperimenti për të parë nëse mund të ekzistojë si e këtillë, e "ndarë" dhe e "bashkuar" njëkohësisht, do të mund të bashkëjetojë vetëm me ura shumë të qëndrueshme dhe brenda një Evrope të bashkuar. Rikompozimi i një Bosnje të ngjashme me ish-Jugosllavinë, në rrethanat e reja dhe pas gjithë asaj që ka ndodhur atje, zor se do të jetë i mundshëm.

Në shikim të parë, duket se në Bosnjë funksionon çdo gjë mirë. Në Sarajevë e Mostar gjithçka duket normale, ndonëse banorët e tyre nuk e fshehin nevojën për t'iu rrëfyer dikujt për të gjitha ato që kanë përjetuar gjatë disa vite më herët.

Shkatërrimet e luftës janë konzervuar për të kujtuar çdo ditë të kaluarën dhe gjithë atë që ka ndodhur aty, ndërsa vërehet më shumë se kurrë tendenca për t'i sforcuar dallimet fetare.

Përkundër të gjitha divergjencave, në Bosnjë nuk mungon dëshira për të ndërtuar jetën e re, por mungon ende motivi për të ndërtuar rrëfime të reja për Bosnjën pas luftës. (I.M.)

 

 

Vdiq Hava Rexha 123-vjeçare, gruaja më e vjetër në Shqipëri

 

Elbasan, 10 nëntor 2003 - Të shtunën ka vdekur Hava Rexha, 123-vjeçare, gruaja më e vjetër në Shqipëri dhe një ndër gratë më të vjetra në botë. Hava u varros të dielën pranë varrit të bashkëshortit të saj, të cilin e ka urrejtur sepse ka qenë e detyruar të martohet me të në moshën 14-vjeçare, njoftojnë agjencitë e huaja të lajmeve.

Hava Ruda Rexha lindi në fshatin Shushicë, rreth 10 kilometra larg Elbasanit, më 14 gusht 1880 dhe u martua në të njëjtin fshat në moshën 14-vjeçare. Hava kishte mbi 120 nipër e mbesa dhe jetonte në fshatin Shushicë të rrethit të Elbasanit, në kushte jo shumë të mira jetese dhe prej disa muajsh ajo përfitoi një pension prej 100 dollarë në muaj, dhuratë nga Banka Kombëtare Tregtare (BKT).

 

 

Në Tiranë sot zhvillohet mbledhja e Këshillit të Përgjithshëm Drejtues të Partisë Socialiste

 

Tiranë, 10 nëntor 2003 - Në Tiranë sot zhvillohet mbledhja e Këshillit të Përgjithshëm Drejtues të Partisë Socialiste, ku do të diskutohen disa ndryshime kryesore në statutin e partisë si dhe rregullat për kandidimin për postin e kryetarit të PS-së.

 

Diskutimi do të bëhet në dy variante: njëri është propozimi i Kryesisë së Partisë, ndërkaq tjetri është propozimi i ish-presidentit Rexhep Meidani, i cili pritet që të kandidohet për postin e kryetarit të Partisë në Kongresin e socialistëve me 12 dhjetor.

 

Mbledhja shihet si një lloj barometri për të matur shanset dhe forcën reale që ka ish-presidenti Meidani për sfidën që kërkon t'i bëjë kryetarit aktual të partisë Fatos Nano, i cili e mban këtë post prej 12 vjetësh.

 

 

Pushtetin vendor në Preshevë e ka përfshirë një krizë e thellë politike si pasojë e mospajtimeve të partive politike shqiptare

 

Preshevë, 10 nëntor 2003 - Pushtetin vendor në Komunën e Preshevës e ka përfshirë një krizë e thellë politike disa mujore si pasojë e mospajtimeve të partive politike shqiptare të cilat për gjendjen e krijuar fajësojnë njëra-tjetrën.

 

Për këtë shka pushteti vendor është bllokuar. Kuvendi komunal i Preshëvës nuk është mbledhur që nga fundi i korrikut, duke përmbushur kështu kushtet ligjore për shpërndarjen e tij. Për këtë gjendje është fajtore Partia Demokratike e Shqiptarëve, ngase ajo që nga shtatori po i bojkoton punime e Asamblesë komunale. Ngjashëm po vepron edhe Lëvizja për Prgores Demokratik.

Ndërkaq, Partia për Veprim Demokratik e cila e ka pushtetin në këtë komunë e drejtuar nga Rizah Halimi, që është edhe përfekt i Preshevës, e ka përjashtuar nga radhët e veta kryetarin aktual të Komunës Skënder Destanin, të cili edhe i është marrë edhe mandati i këshilltarit, për siç thuhet për mosrespektimin e vendimeve partiake dhe veprim në favor të dy partive tjera rivale.

 

 

Policia malazeze prej sot merr sigurimin e kufijve në trekëndëshin: Mali i Zi - Kosovë – Shqipëri

 

Podgoricë, 10 nëntor 2003 - Policia malazeze prej sot edhe zyrtarisht merr punët për sigurimin e kufijve shtetërorë në territorin e Malit të Zi. Shefi i Zyrës për siguri shtetërore të kufirit Millan Paunoviq ka deklaruar se policia është e gatshme të marrë kufirin nga ushtria dhe ka vënë në dukje se sistemi i vendosur i sigurisë kufitare nuk do të kërcënojë sigurinë në bashkësinë shtetërore Serbi - Mali i Zi.

 

Marrja e kufirit nis nga trekëndëshi: Mali i Zi - Kosovë - Shqipëri nëpërmjet Liqenit të Shkodrës, lumit Buna e deri në detin Adriatik. Pauniviq tha se bashkëpunimi me policitë e shteteve fqinje është në nivel, gjë që sipas tij nuk paraqet asnjë problem në mbikëqyrjen e këtij kufiri.

 

 

Në një rrëmujë në Sudan, humbën jetën 31 persona dhe u plagosën 48 të tjerë

 

Kartum, 10 nëntor 2003 – Policia e Sudanit ka filluar një hetim lidhur me një aksident, në të cilin humbën jetën 31 persona dhe u plagosën 48 të tjerë, njofton BBCWorld. Viktimat kanë humbur jetën në një rrëmujë derisa po shtyheshin të marrin ndihma, që u shpërndaheshin për të kremtuar muajin e shenjtë musliman, Ramazanin.

 

Incidenti ka ndodhur dje pasdite në qytetin Port Sudan, rreth 1200 km në verilindje të Kartumit. Ndër viktimat janë 15 gra dhe 12 fëmijë dhe 4 burra.

 

 

Në një sulm me granatë raketore afër Bagdadit është vrarë një ushtar amerikan

 

Bagdad, 10 nëntor 2003 – Një ushtar amerikan është vrarë të dielën mbrëma në një sulm me granatë raketore në jug të kryeqytetit irakian, Bagdad, ka bërë të ditur ushtria amerikane në një njoftim të sotëm (e hënë), njofton Rojter.

 

Zëdhënësi ushtarak ka thënë se ushtari i Brigadës së 18-të të Policisë ushtarake është vrarë mbrëmë në perëndim të qytetit Iskandaria, rreth 30 mila në jug të Bagdadit. Detaje të tjera nuk janë dhënë. Vdekja e këtij ushtari ngre në 151 numrin e ushtarëve të vrarë amerikanë në aksione armiqësore që kur Uashingtoni ka shpallur të përfunduar luftën në Irak më 1 maj.

 

 

Të paktën 60 vetë janë masakruar në Uganda nga anëtarë të forcave rebele të vendit.

 

Akra, 10 nëntor 2003 - Persona të armatosur nga Ushtria e Lordëve të Luftës (LRA) kanë vrarë dhjetra civilë gjatë sulmeve të dhunshme të kryera nëpër fshatra, njoftoi agjencia Reuters.

Lejtnant Kris Magezi tha se sulmet dukeshin se qenë një hakmarrje për vrasjen e një komandanti të rebelëve.

Rebelët, janë përgjegjës për rrëmbimin e mijra fëmijëve gjatë luftës civile 17 vjeçare të vendit.

 

 

17 të vdekur, mbi 120 të plagosur nga shpërthimi në Arabinë Saudite

 

Riad, 10 nëntor 2003 - Televizioni shtetëror saudit bëri të ditur se numri i përgjithshëm i të vrarëve nga shpërthimi i të shtunës në një kompleks rezidencial më Rijad është ngritur në 17 vetë, duke përfshirë pesë fëmijë. Më shumë se 120 perona të tjerë janë plagosur.

Ministri i Brendshëm i Arabisë Saudite, princi Najef, premtoi se do të gjehen personat përgjegjës për shpërthimin vetëvrasës të së shtunës në perëndim të Rijadit, kryeqytetit të vendit. Princi Najef lëshoi një deklaratë në të cilën thotë se anëtarë të grupit terrorist, al-Kaida dyshohen si autorë të sulmit.

Në Uashignton, Shtëpia e Bardhë thotë se Presidenti Bush e siguroi Trashëgimtarin e kurorës, Princin Abdullah gjatë një bisede telefonike dje se Shtetet e Bashkuara qendrojnë përkrah Arabisë Saudite në luftën kundër terrorizmit.

 

 

Fajësohet Al-Kaida për sulmin

 

Riad, 10 nëwntor - Zëvendëssekretari amerikan i Shtetit, Riçard Armitixh, ka zhvilluar bisedime në Arabinë Saudite me Princin trashëgimtar Abdullah lidhur me luftën kundër terrorizmit, pas sulmeve vetvrasëse në kryeqytetin Riad që shkatuan 17 të vrarë.

Punonjësit e shpëtimit po vazhdojnë ende të kërkojnë nëpër gërmadha për ndonjë të mbijetuar. Nga shpërthimi janë plagosur më shumë se 120 vetë, shumica punëtorë josauditë dhe familjet e tyre.

Zoti Armitixh paralajmëroi se ky nuk do të jetë sulmi i fundit dhe fajësoi për bombën Al-Kaidan duke u bërë gjithashtu jehonë komenteve të diplomatëve të lartë sauditë.

 

 

Irak: Hartimi i kushtetutës mund të shtyhet

 

Bagdad, 10 nëntor 2003 - Një anëtar i lartë i Këshillit Qeverisës Irakian tha se këshilli do të përmbushë afatin e 15 dhjetorit për hartimin e një plani për strukturën politike në vend, që do të përdorej për hartimin e kushtetutës së re.

Megjithatë, ministri i përkohshëm i punëve të jashtme, Hoshijar Zebari, tha se keqësimi i gjendjes së sigurisë mund të shkaktojë shtyrjen e hartimit të kushtetutës, e cila ka për qëllim krijimin e kushteve për mbajtjen e zgjedhjeve të përgjithshme.

 

 

Në Gjeorgji opozita largohet nga bisedimet

 

Tbilisi, 10 nëntor 2003 - Partitë opozitare në Gjeorgji thanë se do të vazhdojnë fushatën e tyre të protestave kundër mashtrimeve të dyshuara në zgjedhjet parlamentare të javës së kaluar.

Tre udhëheqësit e partive kryesore opozitare u larguan pas dy orë bisedimesh me presidentin Eduard Shevardnaxe, duke thënë se ai nuk dëshironte të diskutonte rreth kërkesave të tyre për të shpallur zgjedhjet të pavlefshme.

Një nga udhëheqësit e opozitës, Mikhail Saakashvili, tha se bisedimet ishin të pafrytshme dhe u ka bërë thirrje përkrahësve që të vazhdojnë protestën e tyre jashtë ndërtesës së parlamentit në Tbilisi.

 

 

Të pakten 5 civilë janë vrarë në një sulm kryengritësve në kryeqytetin e Burundit

 

Buxhumbura, 10 nëntor 2003 - Të pakten pesë civilë janë vrarë dhe një tjetër është plagosur në një sulm me mortaja gjatë natës të kryengritësve të grupit etnik të fisit Hutu në kryeqytetin e Burundit, Buxhumbura, ka bërë të ditur zëdhënësi i armatës, njofton AFP.

 

Përgjegjësinë për sulmin e ka marrë grupi kryengtritës i Forcave Nacionale Çlirimtare (FNL), i cili ka refuzuar të marrë pjesë në bisedimet paqësore, që kanë për qëllim t'i dhënë fund luftës civile 10-vjeçare, e cila deri tash mori jetët e mbi 300 mijë njerëzve në këtë shtet të vogël afrikan.

 

 

Një shpërthim ka dëmtuar monumentin e viktimave të komunizmit në qendër të Pragës

 

Pragë, 10 nëntor 2003 - Të dielën një shpërthim ka dëmtuar monumentin e ngritur në shenjë të viktimave të komunizmit në qendër të Pragës, ka deklaruar zëdhënësja e policisë çeke.

Në këtë shpërthim nuk ka pasur viktima, kurse autorët janë të panjohur. Monumenti i viktimave të komunizmit ëshë zbuluar në maj të vitit 2002.

Gjatë regjimit komunist në Çeki, prej vitit 1948 e deri më 1989, janë vrarë 4.500 persona, prej të cilëve 248 janë ekzekutuar, ndërkaq 327 janë vrarë gjatë përpjekjeve për t'u arratisur nga vendi.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |