11 të vdekur, mbi 120 të plagosur nga shpërthimi në Arabinë Saudite

11 të vdekur, mbi 120 të plagosur nga shpërthimi në Arabinë Saudite

9 nëntor 2003 / James Martone / "Zëri i Amerikës"

Ministri saudit i punëve të brendshme, Princi Najef, premtoi se do të gjenden personat përgjegjës për një shpërthim vetëvrasës me makinë në një kompleks banimi në Riad, ku u vranë 11 veta dhe u plagosën më shumë se 120 të tjerë.

Princi Najef bëri një deklaratë, në të cilën thoshte se persona që dyshohen të jenë terroristë të al-Kaidës ishin autorët e sulmit në perëndim të kryeqytetit të shtunën vonë.

Një zëdhënës i Lidhjes Arabe prej 22 vendesh e dënoi shpërthimin, duke thënë se kishte për qëllim të destabilizonte, të terrorizonte dhe të vriste civilë.

Mes të vdekurve ishin shtetas sauditë, egjiptianë, libanezë dhe sudanezë.

Zyrtarët sauditë thonë se numri i të vdekurve nga shpërthimi mund të ngrihet, sapo ekipet e shpëtimit të kërkojnë nëpër gërmadhat e kompeksit Muhaja në Rijad, ku zjarri nuk pushoi për disa orë pas shpërthimit.

Televizioni saudit vazhdoi të dielën të intervistonte të plagosurit nga shpërthimi, i cili kishte në shënjestër një kompleks ku banojnë arabë të huaj dhe disa shtetas perëndimorë.

Një grua, e cila nuk u indetifikua, u intervistua ndërsa ndodhej në atë që televizioni tha se ishte një spital i Rijadit. Ajo kishte vënë një perçe dhe ishte ulur në një karrike invalidi. Ajo tha se ishte në apartamentin e saj me të shoqin kur dëgjuan të shtëna armësh.

“Ne dëgjuam të shtënat e një pistolete dhe më vonë nuk dinim se ç’po bëhej. Në kohën e shpërthimit unë isha në apartament.”

Një person tjetër, që u intervistua mbante të birin të mbështjellë me batanije. Ai tha se djali i tij ishte në shtëpi në kohën e shpërthimit dhe ishte plagosur.

Të gjithë të intervisuarit ishin arab-folës dhe që të gjithë banonin në kompleksin Muhaja, i cili ishte në shënjestër të shpërthimit. Televizioni zyrtar saudit njoftoi se në atë kompleks banojnë kryesisht punëtorë të mërguar arabë.

Një burrë i treguar nga televizioni saudit në spital duke qarë, tha se nuk mendonte që shpërthimi të ishte kryer nga myslimanë.

“Ky shpërthim nuk ka asnjë lidhje me islamin, thotë ai. Unë bashkë me gruan time dhe fëmijët dëgjuam së pari shpërthimet dhe pastaj të shtëna armësh. Ne u përpoqëm të mbroheshim nga shpërthimi dhe shkuam në një kat më sipër. Shpërthimi shkaktoi thyerjen e xhamave të dritare, të cilat goditën fëmijën tim.”

Shpërthimi i madh dhe dy shpërthime më të vogla tronditën rreth mesnatës, sipas orës lokale, kompleksin Muhaja afër lagjes ku banojnë punonjësit e misioneve diplomatike. Rreth 200 shtëpi ndodhen në atë kompleks.

Autoritetet saudite kanë konfirmuar vdekjen e zyrtarëve të sigurimit nga Sudani dhe të një tjetri nga India. Një diplomat amerikan tha se një amerikan u plagos dhe një tjetri nuk i dihet fati.

Asnjeri nuk ka marrë përgjegjësinë për shpërthimin, por zyrtarët sauditë thonë se dyshojnë që shpërthimi me makinë bombë është vepër e rrjetit terrorist Al-Kaida. Autoritetet fajësuan anëtarët e këtij rrjeti për shpërthimet vetëvrasëse 6 muaj më parë, të cilat kishin në shënjestër komplekse ku banojnë shtetasit perëndimorë në kryeqytetin Rijad.

Sulmet e 12 majit u pasuan nga një fushatë e intensifikuar e forcave saudite për të gjetur dhe kapur ekstremistë të dyshuar myslimanë. Qindra janë arrestuar që prej atëhere.

Shpërthimi i sotëm kryhet vetëm një ditë pas mbylljes së ambasadës dhe të konsullatave amerikane në Arabinë Saudite. Për këtë veprim zyrtarët amerikanë cituan njoftime të besueshme se terroristët po planifikonin të kryenin sulme.