Ç’farë e karakterizon qëndrimin gjerman kur është fjala për statusin e ardhshëm të Kosovës?

OPINIONE

Aktualitete nga diaspora

8 nëntor 2003 / Shkruan: R. ELEZAJ

Sipas të gjitha gjasave deklarata publike e zëdhënsës së UNMIK-ut e dhënë para disa ditësh në Prishtinë se “pasaportat e Serbisë të lëshura në Graçanicë nga zyra serbe janë valide për qytetarët e Kosovës, ngase ajo (Kosova) sipas Rezolutës 1244 të KS është pjesë e Serbisë” nuk ishte e rastësishme, madje sikur sinjalizon faktin se disa vende anëtare të BE-së, kur është fjala për statusin final të saj ngadal po “ripozicionojnë” qëndrimet e tyre të deritanishme “neutrale” në dëm të interesave të shqiptarëve.

Kjo mund të vërehët më së miri në Gjermani, sepse nuk ka si të shpjegohet ndryshe vendimi i disa komunave të këtushme të cilat mërgimtarëve tanë që bartin pasaporta të UNMIK-ut ditë më parë u kanë dërguar shkresa zyrtare në banesat e tyre përmes të cilave në mënyrë decidive u rikujtojnë se me mbarimin e mandatit të administratës së UNMIK-ut në Kosovë do të marrë fund edhe validiteti i pasaportave të lëshuara nga organet e përkohshme të OKB-së në Kosovë.

Pra, zyrat komunale për të haujt (“Ausländerbehörde“) këtu po vazhdojnë me avazin e tyre të vjetër, tani më shumë nevrikosës për shqiptarët: “se Kosova është pjesë e unionit SMZ”. Në të njëjtën kohë nga bashkëatdhetarët tanë poashtu kërkohet që organeve në fjalë t’u sjellin pasaporta të Serbisë, përndryshe, siç cekët në këto shkresa ata të cilët nuk i plotësojnë këto kushte rrezikojnë ta humbin të drejtën e qëndrimin e tyre të mëtejm në këtë shtet?! Nuk janë të pakëta komunat të cilat ndaj bashkëatdhetarëve tanë janë duke ushtruar presion që ata të paraqiten pranë konzullatave serbe për t’u paisur me pasaporta të Serbisë!?

Pse po sillën kështu organet komunale në Gjermani ndaj mërgimtarëve nga Kosova, ose, se ç’ka ka ndodhur në ndërkohë që mos t’i njohin dokumentet e UNMIK-ut, mbetet një çështje mjaftë e dyshmitë, ngase siç dihet deri më tani në tërë Gjermaninë këto dokumente ishin të pranuara dhe se në bazë të tyre mërgimtarëve tanë u vazhdohej leja e punës si dhe ajo qëndrimit pa ndonjë problem. Pra, se për çfarë qëndrimesh të reja bëhët fjalë lidhur me pasaportat e UNMIK-ut, është vështirë të thuhet diç më saktësisht, ngase siç mendojnë disa bashkatdhetarë tanë kjo mund të jetë e lidhur edhe me vizitën e para pakë ditëve të kancelarit gjerman z. G. Schröder në Beograd, por jo edhe në Kosovë, që sipas protokolit diplomatik jep të kuptohet se zyrtarët e këtushëm në mënyrë të qartë manifestuan qëndrimin e tyre ndaj statusit të ardhshëm të Kosovës?!

Se qëndrimet e qeverisë gjermane kundrejt statusit të ardhshëm të Kosovës gjatë periudhës së fundit katërvjeçare ishin mjaftë të padefinuara, ndoshta dhe konfuze, këtë e vertetojnë shumë fakte, e para ndër të cilat është mungesa e vizitave reciproke në nivel zyrtar midis dy vendeve tona, por edhe qëndrimi gjerman mjaftë ngurrues ndaj proceseve politike në Kosovë, hiq këtu ndihmat e mëdha financiare dedikuar Kosovës gjatë periudhës së kaluar katërvjeçare.

Mirëpo, kur është fjala për statusin final të Kosovës zyrtarët e këtij shteti lirishtë mund të thuhet se gjatë periudhe nuk kanë treguar ndonjë angazhim të madh për përshpejtimin e zgjidhjes së statusit final të Kosovës, se qëndrimi zyrtar gjerman ndaj këtij procesi ishte më shumë nga pozitat e vrojtuesit pasiv se sa të ndonjë aktori aktiv, madje këtë mosinteresim e ka shprehur në mënyrë mjaftë të ashpër shefi i Zyrës gjermane në Prishtinë z. P. Rondorf, i cili në intervistat e tij të shpeshta dhënë mjeteve informative shqiptare në Prishtinë në mënyrë të prerë ka folur në disfavor të pavarësisë së Kosovës.

Ku qëndrojnë shkaqet dhe arsyet për një qëndrim të këtillë të palës gjermane, është vështirë të thuhet diç më shumë, porse një gjë është më se e sigurtë; se zgjidhja e statusit final të Kosovës nuk zë vend të lartë në agjendën e prioriteteve të politikës së jashtme gjermane, e cila, thënë pa ekuivoke, gjatë periudhës së shkuar katërvjeçare nuk ka bërë shumë në këtë drejtim.

Pra, mospranimi si duhet i dokumenteve të udhtimit të lëshuara nga UNMIK-u, presionet që komunat po bëjnë ndaj mërgimtarëve tanë për t’i detyruar që të shkojnë pranë konsullatave serbe për t’u paisur me pasaporta të Serbisë, heshtja e tyre në mënyrë të vazhdueshme ndaj deklaratave “se Kosova është pjesë e Serbisë”, sikurse edhe qëndrimet e shumë zyrtarëve të këtushëm “se Kosova nuk është shtet i pavarur”, pastaj kërcnimet e përditshme për largim të detyrueshëm nga Gjermania të mërgimtarëve tanë, trajtimi i tyre si shtetas të Serbisë, dhe kështu me rradhë, flasin qartë se për çfarë statusi të ardhshëm të Kosovës angazhohet ky vend. Po të ishte ndryshe, jemi të sigurtë se zyrtarët gjermanë do të ishin më tolerantë kur është fjala për statusin e emigrantëve tanë të paisur me dokumente të udhtimit të lëshuara nga UNMIK-u, siç veprohet p.sh. në disa vende tjera perëndimore.

Në letrën e organeve komunale dërguar njërit nga mërgimatarit tanë (z. Bashkim Beluli), ndër të tjera thuhet: “me skadimin e validitetit të dokumenteve të udhtimit të lëshuara nga UNMIK-u, luteni që me kohë të na e sjellni pasportën nacionale të lëshuar nga konsullatat gjenerale të Serbisë-Mali i Zi, ose dëshminë se nuk e kanë pranuar kërkesën tuaj”?!

Çdo koment rreth këtij formulimi mendojmë se është i panevojshëm!