E shtune, 8 nëntor 2003

E shtune, 8 nëntor 2003

Përmbajtja:

Në një qytet në Gjermani, nga zjarri pësoi një familje pesanëtarëshe shqiptare nga Kosova
Rexhepi shprehet optimist për përmbushjen e standardeve deri në vitin 2005
Përfaqësuesit e koalicionit serb "Kthimi" nga Holkeri kërkuan që përmbushja e standardeve të jetë e plotë
Zëvendëskryeministri serb takohet sot në Prishtinë me shefin e UNMIK-ut
Ndërtimi i një parku me emrin e Ataturku në qendër të Gjilanit ka nxitur fërkime ndërmjet pozitës dhe opozitës
Në Gjykatën e Prishtinës u ndërpre seanca hetimore ndaj pesë pjesëtarëve të ish-UÇK-së nga Kaçaniku
Në Prishtinë filloi punimet seminari trajnues mbi ndërmarrjet që do të zhvilohet në katër etapa
Në Prishtinë filluan studimet posdiplomike në lëmin e menaxhimit dhe inxhinieringut ndërkombëtar
Komisioni për hetimin e ngjarjes tragjike në burgun e Dubravës zbardh shkaqet e tragjedisë
SHBA-ja mbështet strategjinë për t'i dhënë fund punës së Tribunalit të Hagës
Shefi i diplomacisë malazeze thotë se ardhmëninë e Malit të Zi e sheh si shtet të pavarur
Kriza e brendshme e lidershipit socialist ka zbritur tani edhe në bazën e saj
BE e kritikon Shqipërinë për ngecjen e reformave
Aeroplanët dhe automjetet e blinduara amerikane kanë sulmuar sot vendstrehimet e guerilëve afër Tikritit
Policia në Manila ka vrarë një zyrtar të aviacionit dhe një ish-oficer të marinës
SHBA mbyll misionet në Riad
Turqia heq dorë nga planet për të dërguar trupa në Irak
SHBA-ve shpërblim për Taylor
Gjatë ditës së djeshme u vranë 8 ushtarë amerikanë në Irak
Vriten 18 maoistë në Nepal
Dy ushtarë amerikanë janë vrarë dhe një tjetër është plagosur në Falluxha

Në një qytet në Gjermani, nga zjarri pësoi një familje pesanëtarëshe shqiptare nga Kosova

Jylih, Gjermani, 8 nëntor 2003 - Më 6 nëntor, në qytetin Jylih të Gjermanisë, rreth orëve të mëngjesit, nga shkaqe ende të pasqaruara, nga një zjarr ka gjetur vdekjen kryefamiljari Daut Bunjaku (32), bashkëshortja e tij Nerxhivane Bunjaku (30), si dhe fëmijët Donjeta (5) dhe Driloni(3), ndërsa Altini dyvjeçar gjendet në Klinikën e Këlnit në gjendje shumë kritike.

Çdo ndihmë e ofruar nga zjarrfikësit dhe mjekët e ndihmës së shpejtë ishte e vonuar për familjen e Daut Bunjakut nga fshati Shkabaj (ish-Gllanasellë) të Gllogocit, shkruan "Bota sot".


Rexhepi shprehet optimist për përmbushjen e standardeve deri në vitin 2005

Prishtinë, 8 nëntor 2003 - Kryeministri i Kosovës Bajram Rexhepi pas takimit me shefin e UNMIK-ut, Hari Holkeri, është optimist se Kosova do t'i përmbushë standardet e përcaktuara nga bashkësia ndërkombëtare deri në mesin e vitit 2005.

Rexhepi tha se me kryeadministratorin Holkeri ka biseduar lidhur me përgatitjet për përmbushjen e standardeve dhe për bartjen e kompentencave. Ai tha se procesi i formimit të grupeve punuese për përmbushjen e afatizuar të standardeve po vazhdon dhe pritet të përfundojnë gjatë disa javësh, duke shtuar se aktulisht prej tetë standardeve janë pesë grupe punuese.

Kryeministri tha se çdo shtet i "Kuintit" do të ndihmojë me logjistikë që sa më shpejt të arrihet përparimi i këtyre standardeve. Rexhepi tha se bartja e kompetencave është një temë e pashmangshme për përmbushjen e standardeve.


Në Gjykatën e Prishtinës u ndërpre seanca hetimore ndaj pesë pjesëtarëve të ish-UÇK-së nga Kaçaniku

Prishtinë, 8 nëntor 2003 - Në Gjykatën e Qarkut në Prishtinë është ndërprerë seanca hetimore ndaj pesë pjesëtarëve të ish-UÇK-së nga komuna e Kaçanikut.

Seanca është ndërpre pasi që prokurori ndërkombëtar ka kërkuar që të vërtetohet një artikull i botuar në një gazetë të përditshme në të cilin thuhet se pala mbrojtëse, përkatësisht avokati Tomë Gashi ka deklaruar se dëshmitari Agim Idrizi ishte mik i ngushtë i Zhelko Razhnjatoviq - Arkanit.

Një gjë të tillë e ka demantuar avokati mbrojtës Tomë Gashi, i cili thotë se e ka respektuar në tërësi urdhëresën e gjyqtares hetuese që të mos japë asnjë informatë lidhur me deklaratat e dëshmitarit, të cilat ia ka dhënë policisë.
Pesë të arrestuarit aktakuza i ngarkon me disa vepra penale si krime kundër popullsisë civle, për rrëmbime, shkaktime të lëndimeve të rënda, për vrasje dhe tentim-vrasje. Ata akuzohen për vrasjen e katër personave.


Përfaqësuesit e koalicionit serb "Kthimi" nga Holkeri kërkuan që përmbushja e standardeve të jetë e plotë

Prishtinë, 8 nëntor 2003 - Përfaqësuesit e koalicionit serb "Kthimi" në Parlamentin e Kosovës që janë takuar dje pasdite me kryeadministratorin Hari Holkeri, thanë se si politikanë duhet të jenë optimistë, por kërkuan që përmbushja e standardeve të jetë e plotë siç kërkohe e jo gjysmake.
"Nëse do të përmbushen këto standarde deri kah mesi i vitit 2005 do të shohim, por do të ishte mirë që ato të përmbushen si duhet", tha shefi i Grupit Parlamentar të këtij koalicioni Dragisha Kërstoviq. Ai e quajti të panevojshme dhënien e më shumë kompetencave me qëllim të përmbushjes së standardeve.


Zëvendëskryeministri serb takohet sot në Prishtinë me shefin e UNMIK-ut

Prishtinë, 8 nëntor 2003 - Zëvendëskryeministri i Serbisë, Nebojsha Çoviq arrin sot në Prishtinë për t'u takuar me shefin e UNMIK-ut Hari Holkerin. Çoviq tha para kësaj vizite në Prishtinë se bisedimet do të përqëndrohen rreth standardeve që duhet të përmbushë Kosova.

Ai ka thënë se në këtë takim do të kërkojë sqarime për rolin e Serbisë gjatë procesit të vlerësimit të përmbushjes së standardeve nga ana e Kosovës.


Ndërtimi i një parku me emrin e Ataturku në qendër të Gjilanit ka nxitur fërkime ndërmjet pozitës dhe opozitës

Gjilan, 8 nëntor 2003 - Ndërtimi i një parku të vogël me emrin e ish-reformatorit turk Kemal Ataturk në qendër të Gjilanit ka shkaktuar fërkime ndërmjet pozitës dhe opozitës.

Pushtetarët lokalë pohojnë se kjo çështje është politizuar nga opozita dhe se nuk bëhet fjalë për një shesh, që do të pagëzohet me emrin e Kemal Ataturkut, por për një pllakë me emrin e tij. Ndërkaq, opozita këmbëngul se ky projekt është filluar pa aprovimin e Kuvendit komunal të Gjilanit.

Në të vërtetë një investim i Batalioni turk të KFOR-it prej 28.500 dollarësh për ndërtimin e një parku të vogël në qendër të Gjilanit ka bërë që të përplasen edhe njëherë pozita dhe opozita e kësaj komune.

Arsyetimi i opozitës është se ky park nuk mund të emërtohet me emrin e ish-liderit turk Kemal Ataturk, ngase tash ky shesh ka emrin e dy dëshmorëve të kombit Rexhep Mala dhe Nuhi Berisha.


Në Prishtinë filloi punimet seminari trajnues mbi ndërmarrjet që do të zhvilohet në katër etapa

Prishtinë, 8 nëntor 2003 - Në Prishtinë filloi dje punimet seminari trajnues mbi ndërmarrjet që do të zhvilohet në katër etapa, i organizuar nga Instituti për Menaxhim dhe Inxhiniering të Ndërmarrjes.

Tri seminaret do të mbahen në Prishtinë, ku pjesëmarrësit do të fitojnë njohuri lidhur me planin e biznesit, themelimin e ndërmarrjes dhe menaxhimin strategjik. Ndërkaq më pas pjesëmarrësit do të zhvillojnë një vizitë në Austri, ku do të takohen me afaristë të atjeshëm me qëllim të bashkëpunimit në të ardhmen.
Për t'u përshtatur me kushtet e reja të tregut, ndërmarrësit kosovarë duhet të pajisen me njohuri të reja për zbatimin e metodave moderne, duke filluar nga plani i biznesit që është themelor për të udhëhequr një ndërmarrje, pastaj themelimit të ndërmarrjeve dhe menaxhimit strategjik të tyre.
Ky edhe është edhe qëllimi i ciklit të seminareve trajnuese, të organizuara në IEME, ku trajnues janë ekspertët ndërkombëtarë, tha drejtori i Institutit Edmond Hajrizi.


Në Prishtinë filluan studimet posdiplomike në lëmin e menaxhimit dhe inxhinieringut ndërkombëtar

Prishtinë, 8 nëntor 2003 - Me inciativën e Universitetit Teknologjik të Vjenës dhe në mbështetje të Universitetidt të Okllandit të Shteteve të Bashkuara të Kosovës, filluan studimet posdiplomike në lëmin e menaxhimit dhe inxhinieringut ndërkombëtar. Këto studime që zgjasin 13 muaj do t'i ndjekin 30 studentë.

Mësimi është i kombinuar, teori dhe praktikë, ndërkaq mësimdhënësit janë amerikanë dhe evropianë, si dhe përfaqësues të firmave të ndryshme ndërkombëtare për të realizuar anën praktike të studimeve.


Komisioni për hetimin e ngjarjes tragjike në burgun e Dubravës zbardh shkaqet e tragjedisë

Prishtinë, 8 nëntor 2003 - Komisioni për hetimin e ngjarjes tragjike në burgun e Dubravës, ka kryer raportin e tij për tragjedinë më 4 shtator të këtij viti në të cilën pesë të burgosur humbën jetën e 17 të tjerë morën lëndime.
Komisioni arriti në përfundim se shkaktar i trazirave ishte "mungesa e aktiviteteve edukative dhe relaksuese", e cila rezultoi me frustrim dhe energji negative te të burgosurit. Shkak tjetër sipas komisionit ishte trajnimi i pamjaftueshëm i stafit vendor dhe kushtet e papërshtatshme higjienike.
Drejtori i drejtësisë në kuadër të UNMIK-ut, Pol Kofi, ka mirëpritur raportin dhe ka thënë se Njësia Penale është duke implementuar rekomandimet të cilat hyjnë në kuadër të kompetencave të tyre.
Ndryshe, Komisioni kryesohej nga gjykatësi Timoti Klajson nga SHBA-të, dhe nga anëtarët" Andreas Ueren, drejtor i Njësisë Penal për kantonin e Cyrihut - Zvicër, dhe gjykatësi Zait Xhemajli nga Gjykata Supreme e Kosovës.


SHBA-ja mbështet strategjinë për t'i dhënë fund punës së Tribunalit të Hagës

Uashington, 8 nëntor 2003 - SHBA-ja mbështet fuqimisht strategjinë për t'i dhënë fund punës së Tribunalit të Hagës për ish-Jugosllavinë. Kështu të gjitha hetimet e krimeve të luftës do të përfundonin deri në fund të vitit 2004, të gjitha proceset e procedurës së shkallës së parë gjatë vitit 2008, ndërkaq tërë puna e gjakatës deri në fund të vitit 2010, ka deklaruar ambasadori amerikan pranë OSBE-së në Vjenë, Stiven Majnikis.


Shefi i diplomacisë malazeze thotë se ardhmëninë e Malit të Zi e sheh si shtet të pavarur

Vjenë, 8 nëntor 2003 - Ministri i jashtëm i Malit të Zi Dragisha Burzan tha se ardhmëninë e Malit të Zi e sheh si shtet të pavarur, të përfshirë në proceset integruese evropiane. Në një fjalim në Akademinë Diplomatike në Vjenë Burzan ka shfaqur shpresën se i tërë Ballkani do të integrohet në Bashkimin Evropian dhe me këtë edhe Mali i Zi.
Shefi i diplomacisë malazeze tha se çështja e pazgjidhur e Kosovës paraqet problem për tërë rajonin.


Kriza e brendshme e lidershipit socialist ka zbritur tani edhe në bazën e saj

Tiranë, 8 nëntor 2003 - Kriza e brendshme e lidershipit socialist ka zbritur tani edhe në bazën e saj. Kështu përkrahësit e ish-kryeministrit Ilir Meta që mbështesin tani kandidaturën e ish-presidentit Meidani për kryetar të Partisë Socialiste, kundërshtojnë ndryshimet statutore që sipas tyre e bëjnë më despotik dhe të plotfuqishëm kryetarin dhe njëherësh kryeministrin Fatos Nano në garën për kreun e kësaj partie, që do të bëhet në Kongresin e dhjetorit.
Ndërkaq, mbështetësit i ish-kryeministrit Meta që njëherësh janë tash edhe mbështetës të kandidaturës alternative ndaj Nanos, pra në favor të z. Meidani, i cilësojnë si absurde ndryshimet që propozohen në statutin e PS-së. Këto ndryshime, thonë përkrahësit e Metës dhe Meidanit, e bëjnë kryetarin aktual Nano ende më tepër autoritar dhe despotik në garën për kreun e Partisë Socialste jo të barabartë.
Madje dje, kandidati për bashkinë e Tiranës Edi Rama ka kërkuar dorëheqjen e kryeministrit Nano nga ky post.


BE e kritikon Shqipërinë për ngecjen e reformave

Tiranë, 8 nëntor 2003 - Çështjet e brendshme politike mbeten ndër shkaqet kryesore të ngadalësimit të reformave në Shqipëri. Ky është konkluzioni i djeshëm i ekspertëve evropianë në përfundim të raundit të tretë të negociatave Shqipëri - Bashkimi Ëvropian.

Shefi i delegacionit të BE-së Rajnhard Pribe u shpreh në fund të takimeve se politikanët shqiptarë harxhojnë shumë energji për problemet e brendshme ndërmjet partive të tyre, duke mos treguar kujdes për plotësimin e kushteve dhe kërkesave të procesit të asociim - stabilizimit.
Sipas zyrtarëve evropianë, prioritet mbetet përmirësimi i gjendjes së funksionimit të institucioneve, stabiliteti në administratën publike, transparenca në sistemin e doganave etj.


Aeroplanët dhe automjetet e blinduara amerikane kanë sulmuar sot vendstrehimet e guerilëve afër Tikritit

Tikrit, 8 nëntor 2003 - Aeroplanët luftarakë dhe automjetet e blinduara amerikane kanë sulmuar sot para agimit (e shtunë) vendstrehimet e guerilëve të dyshimtë në qytetin e lindjes së Sadamit, Tikrit, ku dje patën humbur jetën 6 ushtarë kur u rrëzua nga guerilët helikopteri i tyre Black Hawk, njofton Rojter.


Aeroplanët luftarëkë F-16 kanë hedhur bomba në caqet afër Tikritit, 175 km në veri të Bagadadit, kurse tanket Abrams dhe Bradley kanë shkatërruar disa shtëpi, për të cilat ushtria amerikane besonte se janë përdorur nga kryengritësit.


Policia në Manila ka vrarë një zyrtar të aviacionit dhe një ish-oficer të marinës

Manila, 8 nëntor 2003 - Policia ka hyrë furishëm dhe e ka marrë sot (e shtunë) pirgun e kontrollit në aeroportin e Manilas dhe gjatë këtij aksioni kanë vrarë me armë zjarri zyrtarin e lartë në pension të aviacionit dhe një ish-oficer të marinës dhe kështu i kanë dhënë fund para agimit të sotëm një barrikadimi të çuditshëm të këtij pirgu në shenjë të protestës për korrupcionin e përfolur të qeverisë, njofton AFP.

Panfilo Villaruel, shef i Zyrës së transportit ajror të Filipineve në vitet 1990-ta është vrarë në këtë operacion së bashku me ish-lejtnantin e marinës, Gatçelian, sapo policia e aviacionit e ka rimarrë kontrollin në pirg, kanë thënë zyrtarët.

Ata ishin të pajisur me mjete shpërthyese, me pushkë dhe granata, kanë shtuar ata. Ka ekzistuar frika se mund të jetë organizuar një puç ushtarak kundër presidentes Gloria Arrojo, por presidentja është paraqitur në televizion dhe i ka mohuar këto dyshime.


SHBA mbyll misionet në Riad

Riad, 8 nëntor 2003 - Misionet e SHBA-së në Arabinë Saudite janë mbyllur pasi amerikanët thonë se kanë informacione që flasin për mundësinë e sulmeve terroriste.
Zyrat e ambasadës amerikane në kryeqytetin saudit Riad dhe të konsullatave në Xheda dhe Dahran do të vazhdojnë të qëndrojnë të mbyllura derisa të verifikohet siguria e tyre.
Zëdhënësi i Departamentit të Shtetit tha se situata në Arabinë Saudite s'ka qenë e mirë për amerikanët që prej majit të këtij viti kur sulme vetevrasëse vranë 35 persona në një lagje rezidenciale të Rijadit.


Turqia heq dorë nga planet për të dërguar trupa në Irak

Uashington, 8 nëntor 2003 - Uashingtoni ka konfirmuar se Turqia nuk do të dërgojë për momentin trupa në Irak megjithë një vendim të parlamentit turk.
Zëdhënësi i Departamentit amerikan Riçard Bauçer tha se ky vendim i Turqisë ishte marrë duke u bazuar në situatën aktuale në Irak.
Parlamenti turk autorizoi në fillim të tetorit dërgimin e trupave, në përgjigje të thirrjes për ndihmë në Irak që Amerika u bëri të gjitha vendeve.
Ky vendim i Turqisë hasi shumë kundërshtime sidomos nga ana e kurdëve në veri të Irakut, marrëdhëniet e të cilëve me Turqinë kanë qënë të tensionuara.
Zëdhënësi Bauçer, tha se sekretari i Shtetit kishte biseduar me zotin Abdullah Gul, me të cilin kishte diskutuar për situatën aktuale dhe për dislokimin e trupave turke në Irak.
"Ministri i jashtëm Gul i tha sekretarit të shtetit se qeveria e tij do ta rishikonte çështjen e dërgimit të trupave të saj në Irak," tha zoti Bauçer.


SHBA-ve shpërblim për Taylor

Uashington, 8 nëntor 2003 - Në Nigeri janë përforcuar masat e sigurisë në vendin ku strehohet ish udhëheqësi i Liberisë, Çarls Tejlor, pas njoftimit se SHBA-ja ka premtuar një shpërblim prej 2 milionë dollarësh për kapjen e tij.
Administrata e Bushit e ka bërë të qartë se dëshiron që zoti Telor të dalë përpara gjykatës për krime lufte në Sierra Leone, akuzat e të cilës rëndojnë mbi zotin Taylor që prej kohës kur ai ishte president.
Shpërblimi për dorëzimin e ish udhëheqësit liberian është i parashikuar në ligjin për opreacionet ushtarake amerikane në Irak dhe Afghanistan, nën paragrafin "shpenzime për qëllime të tjera".


Gjatë ditës së djeshme u vranë 8 ushtarë amerikanë në Irak

Bagdad, 8 nëntor 2003 - Ushtria amerikane bën të ditur se gjashtë ushtarë amerikanë humbën jetën në Irak kur helikopteri i tyre u rrëzua në afërsi të Tikritit dhe ushtarët në vendin e ngjarjes thanë se ai mund të jetë qelluar me granata-hedhës.
Helikopteri i tipit "Black Hawk" u rrëzua dje buzë një lumi në afërsi të qytetin të lindjes se Sadam Huseinit. Zyrtarët ushtarakë amerikanë thonë se nuk e kanë përcaktuar ende shkakun e rrëzimit të tij.
Ushtria amerikane po ashtu njofton se dy ushtarë të tjerë amerikanë u vranë në sulme të veçanta në qytetin Mosul. Njeri prej tyre humbi jetën kur sulmuesit hapën zjarr me granada dhe armë të lehta kundër një autokolone në qytet dje. Tjetri humbi jetën nga një bombardim në qytet të enjten.


Vriten 18 maoistë në Nepal

Katmandu, 8 nëntor 2003 - Të paktën 18 rebelë maoistë janë vrarë në përleshjet me forcat nepaleze të sigurimit në pjesët e ndryshme të vendit gjatë dy ditëve të fundit, ka bërë të ditur Ministria nepalaze e Punëve të Jashtme.
Në një deklaratë të saj thuhet se forcat e sigurimit të enjtën kanë vrarë nëntë moistë në përleshjet në dy distrikte. Maoistët e tjerë janë vrarë në viset e tjera të vendit.
Maoitët para tetë vjetëve kanë filluar një kryengritje dhe synojnë krijimin e një republike komuniste. Që nga ajo kohë në konfliktet e armatosura mes rebelëve dhe forcave qeveritare janë vrarë mbi 9000 njerëz.


Dy ushtarë amerikanë janë vrarë dhe një tjetër është plagosur në Falluxha