Përmbajtja:

• Hollbruk tha se shqiptarët nuk do të ndalen derisa të fitojnë atë që synojnë - pavarësinë e plotë

• Grosman: Nëse Kosova i plotëson standardet atëherë do të fillojë procesi për statusin e ardhshëm të saj

• Kryeparlamentari Daci nënshkroi një mmorandum mirëkuptimi me Aleancën Kosovare të Biznesit

• Të ngriten kallëzime penale për krimime ndaj personave të rrëmbyer dhe të pagjetur

• Tribunali i Hagës nuk do të financojë më avokatin e Fatmir Limajt

• Trupi gjykues i Tribunalit të Hagës refuzoi kërkesën e tre pjesëtarëve të UÇK-së për lirimin e përkohshëm

• Kuvendit i dorëzohet peticioni i LPK-së për Unionin Kosovë-Shqipëri

• Tre vetë mbahen në arrest si të dyshuar për vrasjen e familjes Stoliq në Kastriot, thotë policia

• Të hënën organizohet një protestë e sih- policëve para selisë së UNMIK-ut në Prishtinë

• Gjatë një operacioni në Kastriot janë arrestuar Fazile dhe Sadije Çerkezi në ndërlidhje me vrasjen e tre serbëve

• Asambleja komunale e Prizrenit hodhi poshtë mocionin e opozitës për shkarkimin e kryetarit të saj

• Në rrugën Pejë - Klinë në një aksident trafiku humbi jetën një person dhe u lënduan tre të tjerë

• Komuna e Gjilanit merr përsipër mirëmbajtjen e banesave kolektive

• Në Kosovë ka rreth 150 mijë persona me aftësi të kufizuar u tha në një seminar në Prishtinë

• Podujevë: KFOR-i çeko-sllovak vlerëson të qetë gjendjen e sigurisë

• Bruksel: Një delegacion i LDK-së mori pjesë në një konferencë të organizuar në Parlamentin Evropian dhe pati shumë takime

• Mbi 2000 familje me gjendje të rëndë sociale, janë raportuar në komunën e Podujevës

• Të hënën në Gjilan hapet ekspozita "Monumentet historike-kulturore të Lidhjes Shqiptare të Prizrenit"

• Shqipëria ka arritur marrëveshje me BE për pranimin e kthimit të emigrantëve

• Kandidati për kryetar i PS, Rexhep Meidani kritikoi ashpër ndryshimet në Statutin dhe Rregullorën e kandidimit

• Tri shpërthime kanë tronditur mbrëmë Athinën

• Uashington: 11 objekte mbyllen - testet preliminare kanë treguar për praninë e mundshme të antraksit

• Katër vetë të vdekur nga rrëzimi i një helikopteri ushtarak amerikan i tipit "Black Hawk"

• Në Mosul vritet një ushtar amerikan dhe plagosen 6 të tjerë

• Numri i konfirmuar i viktimave të vershimeve në Sumatra është 113 të vdekur

• Politikanë dhe analistë fjallimin e Bushit e kanë pritur në mënyrë jo shumë entuziaste

• Presidenti Bush thekson vendosmërinë dhe angazhimin e amerikan për rindërtimin e Irakut

• Robertson: OSBE-ja duhet të luajë një rol kritik në kushtet e reja të sigurimit

• Ushtarët izraelitë kanë vrarë një djalosh 10-vjeçar dhe 3 militantë palestinezë

• Vriten gjashtë anëtarët e bordit të helikopterit të rrëzuar amerikan "Black Hawk"

• Kreu i FBI-së në Athinë për të parë përgatitjet në fushën e sigurisë për Lojërat Olimpike

Hollbruk tha se shqiptarët nuk do të ndalen derisa të fitojnë atë që synojnë - pavarësinë e plotë

 

Uashington, 7 nëntor 2003 - Bashkësia ndërkombëtare ka shënuar sukses në Bosnjë e Hercegovinë, e cila është në rrugë të mirë të ndërtojë një shtet stabil, ndërkaq në Kosovë, për shkak të statusit të pazgjidhur, është shënuar një përparim i dobët, ka thënë të enjtën në Uashington ish-ambasadori amerikan në OKB Riçard Hollbruk. Hollbruk bashkë me shefin e parë të UNMIK-ut Bernar Kushner vizitoi muajin e kaluar Kosovën dhe Bosnjën e Hercegovinën. Hollbruk ka thënë se në B e H tetë vjet pas luftës janë realizuar synimet strategjike amerikane. Është ndërprerë lufta, janë vënë bazat e një shteti paqësor multietnik, po forcohet tregtia dhe martesat ndëretnike. Sa i përket Kosovës, Hollbruk mendon se është shënuar një përparim i vogël në zgjidhjen e dy problemeve kryesore: në përcaktimin e statusit përfundimtar të Kosovës dhe transferin e kompetencave te popullata e saj. "Për B e H e dimë se është shtet, por për Kosovën nuk e dimë çka është", ka thënë Hollbruk, duke theksuar se KB dhe BE janë tepër të ngadalshme në trajtimin e kësaj çështjeje.

 

Sa i takon statusit, Hollbruk ka thënë sesi Beogradit i ka thënë se serbët duhet të zgjedhin midis Kosovës dhe Evropës. "Kosova ka ikur", ka thënë Hollbruk në Këshillin për Marrëdhënie të Jashtme, duke shtuar se Kosova "kurrë më nuk do të jetë pjesë e Serbisë".

Hollbruk ka konfirmuar se shqiptarët nuk do të ndalen derisa të fitojnë atë që dëshirojnë, sepse pas shekujve të represionit serb, në Kosovë synojnë pavarësinë e plotë.

Hollbruk, duke u përgjegjur në pyetjen e lidhmërisë së ndërsjellë të çështjes së statusit të Kosovës dhe gjendjes në shtetet e tjera të ish-Jugosllavisë, ka thënë se ndarja e Kosovës nga Serbia nuk do të rrezikonte ekzistencën e B e H.

 

 

Grosman: Nëse Kosova i plotëson standardet atëherë do të fillojë procesi për statusin e ardhshëm të saj

 

Tiranë, 7 nëntor 2003 - Nënsekretari amerikan i Shtetit për Çështje Politike Mark Grosman, gjatë vizitës së djeshme në Tiranë, ka thënë se Kosova duhet të përmbushë fillimisht standardet e një jete demokratike, para se bashkësia ndërkombëtare t'i fillojë diskutimet për statusin e saj përfundimtar.

 

Z. Grosman dha detaje të një strategjie për të arritur këto standarde. Ai i bëri këto komente gjatë një konference të përbashkët shtypi me zëvendësministrin e jashtëm shqiptar Luan Hajdaraga.

 

Ai tha se rishikimi i përparimeve që ka bërë Kosova në arritjen e standardeve dp të kryej në mesin e vitit 2005. Por, ai theksoi se nëse Kosova i plotëson standardet atëherë do të fillojë një proces për të përcaktuar statusin e ardhshëm të saj.

Grosman tha se të gjitha vendet perëndimore do ta ndihmojnë Kosovën që të arrijnë standardet, por nëse ato nuk do të plotësohen diskutimi për statusin përfundimtar të Kosovës nuk do të fillojë.

Nënsekretari amerikan Mark Grosman u takua në Tiranë edhe me presidentin Alfred Moisiu dhe me kryeministrin Fatos Nano, të cilët i falënderoi për ndihmesën që ka dhënë Shqipëria në luftën globale kundër terrorizmit për trupat që ajo ka nisur në Irak, Afganistan dhe në Bosnjë.

 

 

Kryeparlamentari Daci nënshkroi një mmorandum mirëkuptimi me Aleancën Kosovare të Biznesit

 

Prishtinë, 7 nëntor 2003 - Në funksion të mbështetjes së prodhimit vendor dhe konsumimit të prodhimeve vendore në Kuvendin e Kosovës, sot kryeparlamentari Nexhat Daci priti një delegacion të Aleancës Kosovare të Biznesit, të kryesuar nga Agim Shahini dhe ka nënshkruar me të një memorandum mirëkuptimi.

Profesor Daci edhe një herë ka shprehur mbështetjen e tij për rritjen e sasisë dhe sidomos të cilësisë së prodhimeve të vendit, dhe në këtë vështrim është shprehur se institucionet tona do të ndihmojnë prodhimin dhe nxisin konsumimin e prodhimit të vendit, si parakusht për zhvillim të përshpejtuar të Kosovës, thuhet në një njoftim të Zyrës së Kuvendit të Kosovës.

 

 

Të ngriten kallëzime penale për krimime ndaj personave të rrëmbyer dhe të pagjetur

 

Prishtinë, 7 nëntor 2003 - Komisioni parlamentar për persona të rrëmbyer dhe të pagjetur, në mbledhjen e udhëhequr nga Flora Brovina, kryetare, në të cilën merrnin pjesë edhe ekspertë juridikë edhe nga institucionet tjera të Kosovës, ka shqyrtuar mundësitë e ngritjes së kallëzimev epenale për krimet ndaj personave të rrëmbyer dhe të pagjerur, të kryera gjatë luftës në Kosovë.

Komisioni ka përgatitur strategjinë dhe mënën e ngritjes së kallëzimeve penale për kriminelët. Për këtë qëllim, është thënë në mbledhje, ka nevojë të madhe për përfëshirjen e sa më shumë ekspertëve juridikë, vendës dhe ndërkombëtarë, që në bashkëpunim të ngushtë me të gjithë ata që dinë dhe kanë fakte për këto raste, të nxirren para gjyqit kryerësit e krimeve.

 

 

Tribunali i Hagës nuk do të financojë më avokatin e Fatmir Limajt

 

Hagë, 7 nëntor 2003 - Tribunali i Hagës nuk do të financojë më avokatin e Fatmir Limajt, sepse siç thonë, ekziston fondi i cili mbledh para për këtë qëllim.

 

Në vendimin e Tribunalit të Hagës thuhes se meqë është bërë publike se fondi ka tubuar mbi 292 mijë dollarë, nuk ka nevojë për financim nga Haga sepse shuma e mbledhur e parave është më shumë se e mjaftueshme për të paguar mbrojtësin deri në fillim të gjykimit.

 

Sipas llogaritjeve të Tribunalit deri në fillim të gjykimit nuk do të shpenzoheshin më shumë se rreth 162 mijë dollarë, shumë kjo e cila sipas Tribunalit të Hagës mund të mbulohet nga Fondi për Mbrojtjen e Fatmir Limajt.

 

 

Trupi gjykues i Tribunalit të Hagës refuzoi kërkesën e tre pjesëtarëve të UÇK-së për lirimin e përkohshëm

 

Hagë, 7 nëntor 2003 - Trupi gjykues i Tribunalit të Hagës refuzoi kërkesën e tre pjesëtarëve të UÇK-së për lirimin e përkohshëm, deri sa të fillojë gjykimi, njoftoi zëdhënësi i Tribunalit. Aktakuza e Prokurorisë së Tribunalit të Hagës i ngarkon këta tre persona për krime lufte ndaj civilëve shqiptarë dhe serbë në kampin e të burgosurëve të ish-UÇK-së në Llapushnik.

 

 

Kuvendit i dorëzohet peticioni i LPK-së për Unionin Kosovë-Shqipëri

 

Prishtinë, 7 nëntor 2003 - Një delegacion i Lëvizjes Popullore të Kosovës, i udhëhequr nga zv.kryetari, Gafurr Elshani, e ka dorëzuar sot në Zyrën e pranimit të Kuvendit të Kosovës një petecion, të organizuar nga LPK, për krijimin e Unionit Kosovë-Shqipëri.

Peticioni është nënshkruar nga 45980 qytetarë, në 22571 fletë, i cili pritet futet në procedurë të rregullt të shqyrtimit.

Deputeti i LPK-së, Hasan Meta, ka pasur pastaj një konferencë me gazetarë, në të cilën ka sqaruar objektivat që synon të arrijë kjo lëvizje, nëpërmjet futjes në procedurë të rregullt në Kuvendin e Kosovës, të petecionit të qytetarëve, për Uionin Kosovë-Shqipëri.

 

 

Tre vetë mbahen në arrest si të dyshuar për vrasjen e familjes Stoliq në Kastriot, thotë policia

 

Prishtinë, 7 nëntor 2003 - Përfaqësuesi i policisë së UNMIK-ut tha sot se në aksonin e djeshëm në Kastriot për arrestimin e të dyshuarve për vrasjen e familjes Stoliq, kanë marrë pjesë 120 policë ndërkombëtarë e vendorë. Ai bëri të ditur se janë arrestuar gjashtë persona, dy prej të cilëve janë liruar, ndërkaq tre të tjerë ende mbahen në arrest për hetime të mëtejshme.

 

Policia kishte ndërmarrë këtë operacion në shkallë të gjerë për kapjen e të dyshuarve për vrasjen e tre anëtarëve Stoliq, që ka ndodhur në qershor të këtij viti.

Gjatë kontrollit të disa shtëpive janë zbuluar disa gjësende të cilat janë konfiskuar dhe ato kanë ndihmuar edhe për arrestimet e bëra, përfaqësuesi i policisë.

 

 

Të hënën organizohet një protestë e sih- policëve para selisë së UNMIK-ut në Prishtinë

 

Prishtinë, 7 nëntor 2003 - Greva e ish-policëve të Kosovës vazhdon ende, ndërkohë që Sindikata e policëve ka paralajmëruar sot se greva mund të marrë forma më radikale. Prandaj, të hënën do të organziohet një protestë para selisë së UNMIK-ut në Prishtinë, thonë sindikalistët e policisë.

 

Ata thanë se deri më tash asnjë konkat me zyrtarët nuk ka dhënë rezultate për ish-policët, megjithë protestat e herëpashershme dhe tani me grevën e përgjithshme.

Po ashtu grevistët nuk u pajtuan të ndërprejnë grevën, duke paralajmëruar format më të ashora të protestës së tyre. Ata kërkuan ndihmë dhe solidaritet nga kolegët e tyre kudo që ata ndodhen, si dhe nga populli i Kosovës.

Bashkimi i Sindikatave të Pavarura të Kosovës thotë se grevën nuk e sheh si formë të zgjidhjes së problemeve në përgjithësi, por ajo plotësisht mbështet ish-policët për sendërtimin e kërkesës së tyre, tha Ukë Bashota, nënkryetar i BSPK. Bashota tha se kjo grevë është shumë serizoe dhe se kërkesat e grevistëve janë thellësisht të drejta dhe të ligjshme.

 

 

Gjatë një operacioni në Kastriot janë arrestuar Fazile dhe Sadije Çerkezi në ndërlidhje me vrasjen e tre serbëve

 

Kastriot, 7 nëntor 2003 - Policia ndërkombëtare e ndihmuar edhe nga forcat paqeruajtëse dhe pjesëtarë të Shërbimit Policor të Kosovës kanë ndërmarrë dje një operacion në shkallë të gjerë në Kastriot, ish-Obiliqit për kapjen e personave të dyshuar për vrasjen e tre pjesëtarëve të pakicës serbe në muajin qershor të këtij viti. Ka njoftime për të paktën dy arrestime, por zyrtarët nuk pranuan t'i konfirmojnë ato.

 

Megjithatë, njoftohet se gjatë këtij operacioni është bastisur shtëpia e familjes Çerkezi në Kastriot. Familjarët thonë se janë arrestuar Fazile dhe Sadije Çerkezi, ndërkaq Beqir Çerkezi është arrestuar dhe më vonë është liruar. Ai thotë se nuk e di arsyen e arrestimit. Në Obiliq gjatë operacionit të djeshëm janë arrestuar edhe Venera Ahmeti dhe Sejdi Maloku të cilët pas tetë orësh janë liruar.

Mirëpo, zëdhënësi i policisë së UNMIK-ut, Derek Çapell, tha se nuk mund të konfirmojë dhe as të mohojë një informacion të tillë.

 

 

Asambleja komunale e Prizrenit hodhi poshtë mocionin e opozitës për shkarkimin e kryetarit të saj

 

Prizren, 7 nëntor 2003 - Asambleja komunale e Prizrenit në mbledhjen e djeshme të jashtëzakonshme hodhi poshtë rendin e ditës për shkarkimin e kryetarit të saj Eqrem Kryezit, që kishin kërkuar me një mocion këshilltarët e PDK-së.

 

Ndërkaq, këshilltarët e PDK-së dhe ata të AAK-së, të cilët kërkuan shkarkimin e z. Kryeziu theksuan se kinse me këtë akt, Asambleja komunale nuk funksionon, ose çështja duhet t'i përcillet për shqyrtim kryeadministratorit ndërkombëtar.

Mbledhja e radhës të Asamblesë komunale të Prizrenit nga kryetari i saj është paralajmëruar për javën e ardhshme,ndërkaq përfaqësuesit e dy partive opozitare: PDK-së dhe AAK-së, kanë thënë se do ta shqyrtojnë vendimin për të marrë pjesë në këtë mbledhje.

 

 

Në rrugën Pejë - Klinë në një aksident trafiku humbi jetën një person dhe u lënduan tre të tjerë

 

Pejë, 7 nëntor 2003 - Në udhëkryqin Prishtinë - Pejë - Klinë, dje ka ndodhur një aksident i rëndë trafiku, ku humbi jetën një, ndërkaq u lënduan tre të tjerë.

 

Në këtë fatkeqësi që ka ndodhur tek ura e Drinit që gjendet në këtë udhëkryq, ishin të përfshirë një kamion dhe një veturë, e cila nga përplasja ka përfunduar në ujërat e Drinit të Bardhë. Sipas SHPK-së, shkaktari i këtij aksidenti tash për tash ende nuk është i njohur, por policia po punon në ndriçimin e kësaj fatkeqësie të rëndë.

 

 

Komuna e Gjilanit merr përsipër mirëmbajtjen e banesave kolektive

 

Gjilan, 7 nëntor 2003 - Qyteti i Gjilanit ka mbi njëmijë banesa, në të cilat, qytetarë të shumtë nga kjo komunë e bëjnë jetën e tyre. Ato kanë qenë në një gjendje shumë të keqe deri tani sa i përket mirëmbajtjes së hapësirës së përbashkët, për të cilën nuk është përkujdesur thuaj se askush.

Alban Qerimi, shef i sektorit të banimit thotë se tash e tutje mirëmbajtja e banesave do të bëhet nga komuna, e cila ka zgjedhur përmes ofertës publike edhe ndërmarrjen përkatëse që ka për obligim pastrimin e shkallëve, korridoreve dhe të bodrumeve, në të gjitha ndërtesat e banimit kolektiv, dy herë brenda javës.

Drejtoria për gjeodezi, kadastër, pronë dhe banim do të marrë përsipër edhe renovimin e çative, fasadimin e jashtëm të banesave dhe të koridoreve, menjanimin e prishjeve në rrjetin e ujësjellësit dhe të kanalizimit dhe të tjera, nëse banorët i përmbushin obligimet për mirëmabjtje, që me rregullore të Kuvendit të Komunës, është paraparë të jetë 0.09 centë në muaj për një metër katrorë të banesës, ose mesatarisht 60 ?uro gjatë një viti, thotë Alban Qerimi.

Gjilani është komuna e parë në Kosovë, e cila ka aprovuar rregulloren për mirëmbajtjen e ndërtesave kolektive.

 

 

Në Kosovë ka rreth 150 mijë persona me aftësi të kufizuar u tha në një seminar në Prishtinë

 

Prishtinë, 7 nëntor 2003 - Zyra për qeverisje të mirë pranë kryeministrisë së Kosovës në bashkëpunim me KMDLNJ-në organizoi dje në Prishtinë një seminar për persona me afëtësi të kufizuara me temën: "Puna me partneritet për të drejtat e njerëzve me aftësi të kufizuara".

 

Në këtë seminar u tha se në Kosovë ka rreth 150 mijë persona me aftësi të kufizuar, të cilët duhet ndihmuar. Këtë shifër e kishin dhënë kohë më parë edhe organizatat joqeveritare, por në këtë seminar e konfirmoi edhe përfaqësuesi i kryeministrisë së Kosovës për qeverisje të mirë.

 

 

Podujevë: KFOR-i çeko-sllovak vlerëson të qetë gjendjen e sigurisë

 

Podujevë, 7 nëntor 2003 - Batalioni i katërt çeko-sllovak ka tre javë që ka marrë detyrat dhe situata në rajonin e përgjegjsisë në komunën e Podujevës është e qetë, tha sot në konferencën për media komandanti Zdenek Havala.

Ai njoftoi se KFOR-i çeko-sllovak do të fillojë së shpejti distribuimin e ndihmave që kanë mbledhur nga Çekia për nxënës dhe për familje të varfëra. "Materialin shkollor e kemi mbledhur nga shkollat dhe fëmijët e Republikës çeke, kurse pjesën tjetër edhe nga ADRA çeke dhe Qindkëmbëshja e zonjës Bella Jensen, por një pjesë e këtyre ndihmave do të shpërndahet gjatë Kërshëndellave", theksoi nënkoloneli Havalla.

Duke pohuar se ka raste të rralla të kalimit ilegal të kufirit dhe Atregtisë së zezë@, komandanti Havala tha se ndiehet i lumtur që edhe pas 3 javëve që janë në komunën e Podujevës situata e sigurisë është e qetë dhe se shpreson se do të përmirësohet përditë e më shumë.

 

 

Bruksel: Një delegacion i LDK-së mori pjesë në një konferencë të organizuar në Parlamentin Evropian dhe pati shumë takime

 

Bruksel, 7 nëntor 2003 - Një delegacion i i LDK-së, në përbërje Dr. Alush Gashi, sekretar per Marrëdhënie me Jashtë dhe deputet i Parlamentitë të Kosoves, Dr. Naim Jerliu, nenkryetar i LDK-së, deputet në Parlamentin e Kosovës dhe Gani Azemi, koordinator i SME-Unionit të LDK-së, anëtar i KP të LDK-së, morën pjesë në konferencën e titulluar "Angazhimi i Evropës për ndërmarrësi", të organizuar nga Partitë Popullore të Evropës, që u mbajtt më 6 dhe 7 nëntor 2003 në Parlamentin Evropian.

Në këtë konferencë morën pjesë deputetë dhe personalitete të njohura të afërta me familjen politike të EPP-së nga pesëmbëdhjetëshja e Bashkimit Evropian, si dhe përfaqësues nga dhjetë shtete, kandidate për BE. Hapjen dhe fjalën kryesore në këtë Konferencë e mbajti zoti Wilfried Martens, kryetar i Partive Popullore të Evropës (EPP) dhe ish-kryeminister i Belgjikës për dhjetë vjet.

Partite Popullore Evropiane janë grupi i parë politik në Parlamentin Evropian, me të cilin grup LDK-ja ka marrëdhënie bashkëpunimi që nga vitet e nëntëdhjeta. Delegacioni i LDK-së pati takime me shumicën e delegacioneve të vendeve pjesëmarrëse, veçanërisht me deputetë e përfaqësues nga Gjermania, Austria, Belgjika, Suedia, Holanda, Polonia, Çekia, etj.

Ndryshe, gjatë qëndrimit në Bruksel, delegacioni i LDK-së u prit në takim të veçantë në selinë e Partive Popullore Evropiane, nga kryetari Wilfried Martens. Delegacioni i përcolli përshendetjet e Presidentit Rugova dhe e falenderoi zotin Martens për mbështetjen që ka dhënë për çështjen e Kosovës si ish-kryeministër i Belgjikes dhe tani si kryetar i Prtive Popullore të Evropes (EPP).

 

Delegacioni e njoftoi zotin Martens për situatën aktuale në Kosovë, për progresin e arritur në të gjitha fushat, si dhe theksoi domosdoshmërinë e njohjes sa më të shpejtë të pavarësisë së Kosovës që do të ishte faktor stabiliteti për rajonin dhe më gjerë. Presidenti i EPP-se Martens vlerësoi lart kontributin e Presidentit Rugova dhe të LDK-së për ndërtimin e demokracisë dhe të paqes në rajon.

Delegacioni u prit në një takim edhe nga zoti Antonio Lopez Isturiz, sekretar i përgjithshem i EPP-se dhe i Internacionales Demokristiane, ku LDK-ja është anëtare që nga viti 1997.Delegacioni i LDK-se pati takime të veçanta edhe me deputetë të grupeve të ndryshme politike në Parlamentin Evropian, ndërsa nesër do te takohen me senatoren e njohur belge, An Marie Lizin.
 

Gjatë kësaj vizite delegacioni i LDK-së pati një takim edhe me zëdhënësin e Paktit të Stabilitetit për Evropen Juglindore, zotin Roland Bless.

 

 

Mbi 2000 familje me gjendje të rëndë sociale, janë raportuar në komunën e Podujevës

 

Podujevë, 7 nëntor 2003 - Në bazë të shënimeve të grumbulluara nga kryetarët e komiteteve të të gjitha fshatrave të komunës së Podujevës 2000 B 2500 familje raportohen që paraqesin raste sociale, deklaroi sot kordinatori për programin e dimërimit në Drejtorinë për shëndetësi dhe politikë sociale (DSHPS) Zenel Zeneli.

 

Ai tha se gjatë këtij viti janë vizituar nga kjo drejtori 461 familje me mbi 2876 anëtarë për t'u identifikuar rastet më të rënda. Te këto raste është intervenuar menjëherë me miell dhe pako higjienike.

Sektori për politikë sociale pranë DSHPS për familjet me gjendje të rëndë sociale ka planifikuar që në këto familje të intervenohet me miell, vaj, lëndë djegëse vlera e të cilave kap shumën 72 mijë euro.

 

Ndërkaq për intervenime urgjente janë planifikuar 48 mijë euro. Vlerësohet se rreth 120 mijë euro nevojiten për rastet e rënda sociale, mjete këto që do të sigurohen nga buxheti i komunës. Është vlerësim i zyrtarëve komunalë të DSHPS-së së Podujevës se krahasuar me vitin e kaluar rastet sociale janë shtuar rreth 15%.

 

 

Të hënën në Gjilan hapet ekspozita "Monumentet historike-kulturore të Lidhjes Shqiptare të Prizrenit"

 

Gjilan, 7 nëntor 2003 - Ekspozita tematike kushtuar 125-vjetorit të Lidhjes Shqiptare të Prizrenit, do t`i sjellë të hënën, më 10 nëntor 2003, para gjilanasve monumentet historike dhe kulturore të asaj periudhe, e cila dëshmon se kush jemi dhe cila është ardhmëria jonë.

Gjatë historisë mijavjeçare, populli shqiptar ka krijuar dhe ndërtuar shumë më tepër nga ajo që sot trashëgon. Si kudo, luftrat, fatkeqësitë dhe në përgjithësi shekujt kanë bërë punën e tyre shkatërruese të këtyre vlerave.

Rishikimi i gjendjes së identifikuar nxjerr në pah faktet dhe detyrat madhore për ruajtjen, mbrojtjen dhe prezentimin e këtij thesari me vlera mbarëkombëtare. Shembujt e kësaj krijimtarie, të cilët i kanë qëndruar kohës deri më sot, përbëjnë zbulimin e bazamentit dokumentar dhe material mbi të cilin do të vazhdojnë studimet e mëtejshme.

Koleksioni i kësaj ekspozite është kontribut i veçantë dhe parakupton identifikimin e vlerave dhe këndshikimeve për trajtimin dhe prezentimin e këtij thesari në nivel meritor.

 

 

Shqipëria ka arritur marrëveshje me BE për pranimin e kthimit të emigrantëve

 

Tiranë, 7 nëntor 2003 - Shqipëria ka arritur një marrëveshje me Bashkimin Evropian, sipas së cilës do të pranojë kthimin pas të emigrantëve të paligjshëm që kanë hyrë në territorin e BE-së nëpërmjet Shqipërisë.

 

Marrëveshja parasheh kthimin e shtetasve shqiptarë, por edhe të huajve që kanë hyrë në territorin e BE-së. Sipas komesionerit evropian për çështje të drejtësisë Antonio Vitorino marrëveshja do të hyjë në fuqi në fillim të muajit dhjetor.

Bashkimi Evropian përshëndeti nënshkrimin nga ana e Shqipërisë të Marrëveshjes së ripranimit të gjithë atyre emigrantëve të gjithë atyre emigrantëve të paligjshëm, apo kandidatëve për azil që u është refuzuar kërkesa.

 

BE gjithashtu përgëzon Qeverinë shqiptare për masat e marra lidhur me ndalimin e trafiqeve të qenieve njerëzore nga brigjet e Shqipërisë drejt Italisë. Këto vlerësime u bënë gjatë takimit të ministrave të Brendshëm dhe të Drejtësisë të vendeve anëtare të BE-së dje në Bruksel.

 

 

Kandidati për kryetar i PS, Rexhep Meidani kritikoi ashpër ndryshimet në Statutin dhe Rregullorën e kandidimit

 

Tiranë, 7 nëntor 2003 - Kandidati për kryetar i Partisë Socialiste ish-presidenti Rexhep Meidani kritikoi ashpër ndryshimet e miratuara parëmbrëmë në Statutin dhe Rregullorën e kandidimit.

 

Ai theksoi së këto vendime janë kundërvënie e hapur ndaj frymës së demokracisë dhe përbëjnë kërcënim të së drejtës së kandidimit e të kushteve të barabarta gjatë konkurrimit.

Por, drejtuesit e PS kundërshtuan komentet e z. Meidani duke u shprehur se asgjë nuk e pengon atë të kontaktojë me bazën e Partisë Socialiste.

 

 

Tri shpërthime kanë tronditur mbrëmë Athinën

 

Athinë, 7 nëntor 2003 - Tri shpërthime kanë tronditur mbrëmë Athinën. Policia ka njoftuar se ndaj tri bankave janë hedhur koktej mollotovi, duke shkaktuar dëme të vogla në ndërtesa.

Sulmet kanë pasuar disa orë pas protestave të 700 njerëzve në qendër të qytetit, të cilët kanë kërkuar lirimin nga burgu të shtatë antiglobalistëve që mbahen në arrest që nga muaji qershor.

 

 

Uashington: 11 objekte mbyllen - testet preliminare kanë treguar për praninë e mundshme të antraksit

 

Uashington, 7 nëntor 2003 - Shërbimi postar amerikan ka mbyllur mbrëmë 11 objekte sepse testet preliminare kanë treguar për praninë e mundshme të antraksit në ndërtesën në të cilën gjendet qendra e marinës për pranimin e postës, është njoftuar sot.

 

Marina ka mbyllur sistemin e saj të automatizuar operativ për postën në bazën ajrore në Uashington, sepse sensorët kanë dedektuar praninë e substancës, e cila mund të jetë antraks.

 

 

Katër vetë të vdekur nga rrëzimi i një helikopteri ushtarak amerikan i tipit "Black Hawk"

 

Bagdad, 7 nëntor 2003 - Të paktën katër veta kanë vdekur dhe dy janë plagosur, pasi një helikopter amerikan ushtarak i tipit "Black Hawk" (Fajkoi i Zi) është rrëzuar sot në mëngjes (e premte) afër qytetit, Tikrit, ka bërë të ditur Armata amerikane, njofton Rojter.

 

Zëdhënësja ushtarake amerikane në Tikrit ka thënë gjithashtu se tash për tash nuk dihet nëse shkaku i rrëzimit të aeroplanit është ndonjë defekt mekanik apo ndonjë shkak tjetër. Ajo shtoi gjithashtu se ende nuk dihet sa vetë kanë qenë në bordin e helikopterit dhe se a ka pasur viktima.

 

 

Në Mosul vritet një ushtar amerikan dhe plagosen 6 të tjerë

 

Mosul, 7 nëntor 2003 - Guerilë të atrmatosur me pushkë automatike dhe dhe granata raketore kanë sulmuar sot (e premte) në pritë një autokolonë ushtarake amerikane në qytetin Mosul në Irakun verior dhe kështu kanë vrarë një ushtar amerikan dhe kanë plagosur 6 të tjerë, ka thënë Armata amerikane, njofton Rojter.

 

Ky sulm ka ngritur numrin e ushtarëve të vrarë amerikanë në të pakten 140 sish që kur presidenti Bush ka shpallur më një maj përfundimin e luftës në Irak.

 

 

Numri i konfirmuar i viktimave të vershimeve në Sumatra është 113 të vdekur

 

Xhakartë, 7 nëntor 2003 - Numri i konfirmuar i viktimave të vershimeve në provincën Sumatra të Indonezisë është 113 të vdekur, kurse kërkimet po vazhdojnë edhe për 147 njerëz, që konsiderohen të zhdukur dhe për të cilët ekziston droja së janë të vdekur, ka bërë të ditrur Zyra e kërkim-shpëtimit në kryeqytetin provincial, Medan, njofton AFP.

 

Shpresat për gjetjen e të zhdukurve të gjallë janë të pakta, por kerkimet po vazhdojnë. Ekziston frika se të pakten 200 njerëz kanë humbur jetën pas vershimeve që përfshin bregdetin e qytetit Bahorok në distriktin Langkat, ka thënë zëdhënësi i zyrës së lartpërmendur.

 

 

Politikanë dhe analistë fjallimin e Bushit e kanë pritur në mënyrë jo shumë entuziaste

 

Uashington, 7 nëntor 2003 - Politikanë dhe analistë arabë në Lindjen e Mesme dhe Shtetet e Bashkuara, e kanë pritur përgjithësisht në mënyrë jo shumë entuziaste një fjalim të presidentit Bush, ku ai deklaroi se promovimi i demokracisë në Lindjen e Mesme, do të jetë tani prioritet i Amerikës.

Shumë thonë se komentet e z. Bush kanë peshë të vogël për shkak të veprimeve të tij në Irak dhe mbështetjes së vazhdeshme që Uashingtoni i jep Izraelit.

Ministri në kabinetin palestinez, Saeb Erekat, tha se presidenti duhet t'i theksojë fjalët e tij duke ndihmuar palestinezët të zhvillojnë zgjedhje të lira dhe të ndershme.

Në fjalim, z. Bush tha se edhe pse demokracia nuk është perfekte, ajo është e vetmja rrugë për sukses dhe dinjitet kombëtar në vendet e Lindjes së Mesme.

 

 

Presidenti Bush thekson vendosmërinë dhe angazhimin e amerikan për rindërtimin e Irakut

 

Uashington, 7 nëntor 2003 - Presidenti amerikan Xhorxh Bush dërgoi një mesazh të fuqishëm lidhur me vendosmërinë dhe angazhimin e Shteteve të Bashkuara për rindërtimin e Irakut dhe vendosjen e demokracisë në Lindjen e Mesme, duke deklaruar se liria dhe demokracia janë aspirata për të cilat ia vlen të luftosh dhe të vdesësh.

 

Komentet e forta të Presidentit Bush u bënë një ditë pasi dy ushtarë amerikanë u vranë në Irak dhe kur po shtohen kritikat në Uashington nga anëtarë të partisë së tij republikane lidhur me misionin amerikan në Irak.

Në një fjalim që ishte shumë më i thellë, se sa vetëm ripohim i qëllimeve amerikane në Irak, Presidenti Bush, i krahasoi përpjekjet për vendosjen e demokracisë në Lindjen e Mesme me Luftën e Ftohtë kundër komunizmit.

 

Në të njëjtën kohë ai ishte gati të deklaronte se mbështetja që Shtetet e Bashkuara dhe vendet e tjera i kanë dhënë diktaturave në Lindjen e Mesme gjatë disa dhjetëvjeçarëve, përbën një rrezik tepër të madh.

 

 

Robertson: OSBE-ja duhet të luajë një rol kritik në kushtet e reja të sigurimit

 

Bruksel, 7 nëntor 2003 - Sekretari i Përgjithshëm i NATO-s, Xhorxh Robertson, i cili së shpejti largohet nga ky post, tha se OSBE-ja duhet të luajë një rol kritik në kushtet e reja të sigurimit.

Zoti Robertson i tha Këshillit të Përhershëm të OSBE-së në Vjenë se terrorizmi vazhdon të jetë një përparësi për të dy këta organizma.

Ai u tha përfaqësuesve të 55 vendeve anëtare se parashikon një bashkëpunim më të madh midis NATO-s dhe OSBE-së në një numër rajonesh, përfshirë Kaukazin dhe Azinë Qendrore.

Ai tha se këto dy organizata duhet të studiojnë mundësinë se si të bashkëpunojnë në Afganistan për të garantuar atje një siguri dhe qendrueshmëri më të madhe.

Zoti Robertson largohet nga posti i tij si Sekretar i Përgjithshëm i NATO-s muajin e ardhshëm.

 

 

Ushtarët izraelitë kanë vrarë një djalosh 10-vjeçar dhe 3 militantë palestinezë

 

Gaza, 7 nëntor 2003 - Ushtarët izraelitë kanë vrarë sot (e premte) një djalosh 10-vjeçar dhe tre militantë palestinezë në Rripin e Gazës, njofton Rojter. Ky incident ka ndodhur në një kohë kur Izraeli ndërmori hapat e parë për të zbatuar lehtësimin e bllokadës së premtuar në Bregun Perendimor.

 

Djaloshi Mahmud al Kejed është vrarë nga një predhë e shkrehur nga një tank izrelit në Rripin e Gazës afër bashkësisë bujqësore izraelite Nahal Oz, i cili po gjuante zogj me rrjet dhe spango, kanë thënë dëshmitarët dhe mjekët.

 

Një burim ushtark izraelit ka thënë se ushtarët kanë hapur zjarr kundër një personi, që kishte në dorë një kabëll elektrike në një zonë ku shpesh janë vënë mjete shpërthyese kundër trupave dhe atë palestinez e kanë qëlluar, kurse dy të tjerë kanë ikur.

I njëjti burim ka thënë se tre palestinezë të tjerë janë vrarë sot heret në mengjes (e premte) në përleshjet me militantët. Njëri palestinez i armatosur është vrarë afër kampit të refugjatëve Maghazi, kurse trupat e pajetë të dy palestinezëve të tjerë janë zbuluar sot heret në mengjes afër qytetit Kan Junis.

 

Ata janë vrarë derisa po vendosnin mjete shpërthyese afër gardhit kufitar izraelit, kanë thënë burimet ushtarake dhe mjekësore. Kata të vrarë kanë qenë pjesëtarë të Brigadës së Martirëve Al Aksa, ka thënë zëdhënësi i kësaj Brigade.

 

 

Vriten gjashtë anëtarët e bordit të helikopterit të rrëzuar amerikan "Black Hawk"

 

Bagdad, 7 nëntor 2003 - Të gjashtë anëtarët e bordit të helikopterit amerikan ushtarak të tipit "Black Hawk" (Fajkoi i zi) kanë humbur jetën pas rrëzimit të tij sot në mëngjes (e premte) afër qytetit Tikrit, ka bërë të ditur Armata amerikane, njofton Rojter. Në këtë njoftim thuhet se sipas të gjitha gjasave helikopteri është rrëzuar pasi është goditur me granatë raketore.

 

Aktualisht helikopterët sulmues po fluturojnë mbi zonën e vendit të rrëzimit të helikopterit, Tikrit, 110 mila në veri të Bagdadit, në kërkim të guerilëve, që mund ta kenë rrëzuar helikoperin "Black Hawk". Nëse konfirmohet shkatërrimi i tij nga zjarri armiqësor, ky do të jetë helikopteri i tretë amerikan i rrëzuar nga guerilët brenda dy javëve.

 

 

Kreu i FBI-së në Athinë për të parë përgatitjet në fushën e sigurisë për Lojërat Olimpike

 

Athinë, 7 nëntor 2003 - Kreu i Byrosë federale të Hetimeve në Amerikë, FBI, ka mbërritur në Athinë për të parë se si po shkojnë përgatitjet në fushën e sigurisë për Lojërat Olimpike të vitit të ardhshëm.

Vizita e Robert Mueller bëhet pas shqetësimeve amerikane rreth sulmeve të mundshme terroriste gjatë Lojërave, ku do të marrin pjesë qindra atletë amerikanë, do të mbrohen nga një numrë rojesh të armatosur.
 

Vizita e drejtorit të FBI-së pason bashkëpunimin intensiv të komunitetit dnërkombëtar në fushën e sigurisë në fazën përgatitore të Lojërave.

Autoritetet greke thonë se do të shpenzojnë një shumë të paprecendentë prej 775 milionë për sigurinë e Lojërave Olimpike.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |