Kronikë nga Podujeva

Podujevë: Tre javë pas marrjes së përgjegjësive, KFOR-i çeko-sllovak vlerëson të qetë gjendjen e sigurisë

Podujevë, 7 nëntor 2003 (TN) - Batalioni i Katërt çeko-sllovak ka tre javë që ka marrë detyrat dhe situata në rajonin e përgjegjsisë në komunën e Podujevës është e qetë, tha sot në konferencën për media komandanti i Batalionit të katërt çeko-sllovak nënkoloneli Zdenek Havala.

Komandanti i KFOR-it çeko-sllovak më tej u ndal në disa informacione që karakterizuan komunën e Podujevës gjatë javës së kaluar. “Afër bazës tonë në Shajkofc gjuetarët duke gjuajtur egërsira kanë shqetësuar ushtarët tonë, mirëpo pasi janë ndaluar ata janë liruar sepse edhe për gjuetinë ka rregulla”, tha Havalla.

Ai njoftoi se një autobus me serbë është ndaluar nga organet e UNMIK-ut në pikën G-3 derisa po dëshironin ti vizitonin varrezat e tyre në Podujevë, por nuk komentoi pse, meqë sipas tij përgjegjës për sigurinë në atë pikë është policia kufitare.

“Megjithëse nuk është detyrë e jona, ne kemi pastruar varrezat serbe por mund të konstatoj se ato nuk ishin në gjendje të mirë”, deklaroi komandanti i KFOR-it çeko-sllovak duke shtuar se për këtë do të bisedojë edhe me kryetarin e komunës dhe përfaqësuesin e UNMIK-ut sepse “të vdekurit duhet ti lëmë të qetë”, ka pohuar Havalla.

Komandanti i Batalionit të IV-t njoftoi se KFOR-i çeko-sllovak do të fillojë së shpejti distribuimin e ndihmave që kan mbledhur nga Çekia për nxënës si dhe për familje të varfëra. “Materialin shkollor e kemi mbledhur nga shkollat dhe fëmijët e Republikës çeke, kurse pjesën tjetër edhe nga ADRA çeke dhe Qindkëmbëshja e zonjës Bella Jensen, por një pjesë e këtyre ndihmave do të shpërndahet gjatë Kërshëndellave”, theksoi nënkoloneli Havalla.

Duke pohuar se ka raste të rrallla të kalimit ilegal të kufirit dhe “tregtisë së zezë” , komandanti Zdenek Havalla tha se ndihet i lumtur që edhe pas 3 javëve që janë në komunën e Podujevës situata e sigurisë është e qetë dhe se shpreson se do të përmirësohet përditë e më shumë.

Mbi 2000 familje me gjendje të rëndë sociale janë raportuar në komunën e Podujevës

Podujevë, 7 nëntor 2003 (TN) – Në bazë të shënimeve të grumbulluara nga kryetarët e Komiteteve të të gjitha fshatrave të komunës së Podujevës 2000 – 2500 familje raportohen që paraqesin raste sociale, deklaroi sot kordinatori për programin e dimërimit në Drejtorinë për shëndetësi dhe politikë sociale (DSHPS) z. Zenel Zeneli.

Ai deklaroi se gjatë këtij viti janë vizituar nga kjo drejtori 461 familje me mbi 2876 anëtarë për t’u identifikuar rastet më të rënda. Te këto raste është intervenuar menjëherë me miell dhe pako higjienike dhe nga buxheti i komunës janë shenzuar deri më tani 7 mijë euro.

“Në këtë fazë është duke u intervenuar në 60 familje me 3 mijë kg miell, përkatësisht me nga 50 kg miell për familje e në disa raste me numër më të madh të anëtarëve edhe me nga 100 kg”, tha Zeneli.

Lidhur me intervenimin me lëndë djegëse z. Zeneli tha se është planifikuar që në 600 familje të intervenohet me nga 3m³ dru për ngrohje, por ky projekt nuk ka filluar ende dhe se procesi është në fazën e tenderimit. Mirëpo sipas tij rajonet malore do të trajtohen vetëm me miell dhe me vaj.

Sektori për politikë sociale pranë DSHPS për familjet me gjendje të rëndë sociale ka planifikuar që në këto familje të intervenohet me miell, vaj, lëndë djegëse vlera e të cilave kap shumën 72 mijë euro. Ndërkaq për intervenime urgjente janë planifikuar 48 mijë euro.

Vlerësohet se rreth 120 mijë euro nevojiten për rastet e rënda sociale, mjete këto që do të sigurohen nga buxheti i komunës. Është vlerësim i zyrtarëve komunalë të DSHPS-së së Podujevës se krahasuar me vitin e kaluar rastet sociale janë shtuar rreth 15%.

Trafoja e re TS 220 Kv në Podujevë ende ka punë shtesë, reduktimet vazhdojnë

Podujevë, 7 nëntor 2003 (TN) – Trafoja e re TS 220/35/20 Kv (hyrje –dalje) dhe largpërçuesit 220 Kv në komunën e Podujevës ku punimet janë kah përfundimi ende nuk është lëshuar në funksion si pasojë e punieve shtesë, deklaroi sot drejtori i njësisë së KEK-ut për Podujevën, ingjinieri Sali Fejzullahu.

z. Fejzullahu tha punët teknike janë kryer me kohë në objektin kryesor, derisa në pjesën ndërtimore të themeleve është lajmëruar fjetje e dheut i përcjellë me shtrembërime të disa pikave ku janë të vendosura stabilimentet. “Janë marrë masa të menjëhershme dhe është duke u punuar baza plotësuese” pohoi Fejzullahu duke shtuar: Llogarisim që këto masa shtesë të kryhen brenda dhjetë ditëve.

Drejtori i KEK-ut në Podujevë mendon se pas këtyre punëve trafoja e re do të kyqet për konsum të energjisë elektrike, por jo edhe ti ndërpres reduktimet. Sipas Fejzullahut reduktimet janë të njëjta me qendrat tjera në Kosovë dhe ato paraqiten si pasojë e defekteve e avarive në pjesë të ndryshme të sistemit në trafostacion dhe linja, kurse kyqja në trafon e re do ti minimizojë ato.

Projekti i ndërtimit të kësaj trafoje është donacion i Agjensionit Evropian për Rindërtim dhe sipas burimeve të DMPD-së investimet për pjesën e Podujevës kapin shifrën mbi 5 milion euro. Punëkryes i trafos TS 220/35/20 (10) është firma e njohur Siemens nga Austria kurse projektin e ka bërë ndërmarrja “Umel” nga Tuzlla e Bosnjës.