Përmbajtja:

• Presidenti Rugova: Me nënsekretarin amerikan Grosman kemi biseduar për çështjen e operacionalizimit të standardeve

• Presidenti Rugova priti shefin e porsaemëruar të Zyrës bullgare në Prishtinë

• H. Holkeri në takimin me z. Grosman ka thënë se në Kosovë është bërë përparim dhe se duhet ruajtur ky hap

• Në Kastriot policia sot ka ndërmarrë një aksion për kapjen e personave të dyshuar për vrasjen e familjes Stoliq

• Novicki i shkruan Kristian Kadisë për problemet lidhur me sjelljen e policisë gjatë konrollimit

• Në Zyrën amerikane mbrëmë u mbajt një darkë pune e nënsekretarit Grosman me zyrtarët më të lartë vendor dhe ndërkombëtarë

• Për dhjetë muaj në komunën e Podujevës janë investuar mbi 8.5 milionë euro

• M. Grosman thotë se janë të hapura opcionet për zgjidhjen e statusit të Kosovës, duke mos përjashtuar edhe pavarësinë

• Një gjykatëse ndërkombëtare mori në pyetj dëshmitarin e parë në rastin e arrestimit të pesë ish-luftëtarëve të UÇK-së

• Policia e UNMIK-ut dhe zyrtarët e doganave kanë kapur katër kamionë me 5000 litra naftë të fshehur

• Oliver Ivanoviq thotë se Serbia pa Kosovën nuk do të jetë e njejtë

• Komisioni për Gatishmëri Emergjente i Kuvendit të Kosovës shpreh përkrahje për zhvillimin e TMK-së

• F. Hartman: Sa i përket krimeve ndaj shqiptarëve Tribunali ka përfunduar me ngritjen e aktakuzave kundër katër gjeneralëve serbë

• Grosman në Shkup: Dëshirojmë që Ballkanin ta fusim në Evropë

• Gazetarët padisin kryeministrin Nano

• Deputetët e Parlamentit të Maqedonisë me shumicë votash shkarkuan katër ministrat në kabinetin të Cërvenkovskit

• Kapen gjeneralët e Sadamit

• Putin në samitin e BE-së

• "Vrasësi i Lumit të Gjelbër" ka pranuar me gjakftohtësi se ai është vrasësi i 48 grave

• Katër ish-ministra ruandezë kanë dalë para gjykatës me akuzën për gjenocidin e vitit 1994

• Ushtarët izraelitë kanë vrarë një grua palestineze

• Policia saudite ka vrarë një militant musliman

• BE-ja shpreh shqetësime për vendet që do të anëtarësohen së shpejti

• Kritikët sfidojnë ligjin e abortit

• Në Mekë dy militantë kanë hedhur veten në erë me bombë

• Pentagoni dërgon 100 mijë trupa të freskëta për zëvendësimin e ushtarëve amerikanë në Irak

• Në dy raste të veçanta në Irak, janë vrarë dy ushtarë amerikanë

• Të paktën 21 punëtorë kanë humbur jetën nga zjarri në një plantazh të çajit në Indi

Presidenti Rugova: Me nënsekretarin amerikan Grosman kemi biseduar për çështjen e operacionalizimit të standardeve

 

Prishtinë, 6 nëntor 2003 - Presidenti i Kosovës Ibrahim Rugova priti dje pasdite nënsekretarin amerikan çështje politike Mark Grosman me të cilin bisedoi rreth operacionalizimit të standardeve dhe për çështje të tjera. "Njohja e pavarësisë së Kosovës do t'i përshpejtonte proceset e brendshme në Kosovë dhe arritjen e standardeve", u shpreh Presidenti Rugova pas takimit me nënsekretarin amerikan të SHBA-ve, z.Mark Grosman, në rezidencën e tij në Velani.

 

Presidenti Rugova, tha se e ka njoftuar zotin Grosman me zhvillimin dhe progresin që ka pasur në Kosovë, në siguri dhe në të gjitha fushat e jetës, për objektivat e institucioneve të Kosovës, si zhvillimin ekonomik, privatizimin që ka filluar, si dhe integrimin e minoriteteve në shqërinë e Kosovës.

Temë qëndrore e takimit të presidentit Rugova me z.Grosman ishte, siç edhe ishte paralajmëruar, operacionalizimi i standardeve.

 

"Ne biseduam gjithashtu edhe për çështjen e operacionalizimit të standardeve në të cilën duhet të fokusohemi, për të cilën do të na ndihmojë SHBA-ja dhe bashkësia ndërkombëtare, t'i realizojmë dhe atë që insistojë unë që të realizohet sa më shpejtë njohja e pavarësisë së Kosovës, e cila do t'i shpejtonte proceset e brendshme dhe arritjen e standardeve dhe do ta qetësonte edhe rajonin edhe këtë pjesë të Evropës dhe të botës", tha Presidenti Rugova.

"Unë i mora në konsiderim propozimet e z.Grosman për operacionalizimin e standardeve në të cilat do të punojnë të gjitha institucionet e Kosovës dhe populli i Kosovës, sepse është për të mirën e Kosovës", tha ai.

Presidenti Rugova me këtë rast falenderoi SHBA-të për gjithë atë që kanë bërë për Kosovën, përkrahje të fuqishme të cilën tha se e pret edhe në të ardhmen, si dhe përshëndeti presidentin Bush dhe Stejt Departamentin e SHBA-ve.

Nënsekretari Grosman falenderoi Presidentin Rugova për pritjen, ndërsa ai tha se dëshiron të theksojë rolin e rëndësishëm të cilin e ka SHBA-ja për një sukses në Ballkan.

 

"Duke patur parasysh investimet e mëdha që janë bërë nga bashkësia ndërkombëtare në 10 vitet e kaluara. Ky sukses bazohet në zhvillimin ekonomik dhe demokratik për të gjithë popujt e Ballkanit që dëshirojnë t=i bashkohen integrimeve", tha Grosman.

 

 

Presidenti Rugova priti shefin e porsaemëruar të Zyrës bullgare në Prishtinë

 

Prishtinë, 6 nëntor 2003 - Presidenti i Kosovës Ibrahim Rugova priti sot shefin e porsaemëruar të Zyrës së bullgare në Prishtinë, z.Nikolaj Kolev. Presidenti Rugova pasi përshëndeti hapjen e Zyrës bullgare në Kosovë, tha se është një lajm i mirë për Kosovën, për marrëdhëniet ndërmjet Kosovës e Bullgarisë dhe për zhvillimet pozitive rajonale. Presidenti i Kosovës vlerësoi se aspiratat e të gjitha vendeve të Evropës Juglindore kanë si synim integrimin në strukturat veriatlantike.

 

Poashtu Presidenti Rugova theksoi se ambasadorin bullgar e ka njohur me zhvllimet pozitive, me progresin që ka pasur në Kosovë, me objektivat për zhvillim ekonomik, për privatizimin dhe për integrimin e shoqërisë kosovare.

 

Ndërkaq, si objektiv kryesor të Kosovës, Presidenti theksoi integrimin në BE, në NAT0, në miqësi me SHBA-të dhe pavarësinë e Kosovës, që është një çështje e rëndësishme e cila, siç tha, do ta qetësonte rajonin.

Poashtu në këtë takim është biseduar edhe për bashkëpunimin ekonomik mes Kosovës dhe Bullgarisë dhe në këtë drejtim Zyra bullgare në Prishtinë do të ndihmojë që Kosova të ketë marrëdhënie shumë të mira me Bullgarinë dhe me rajonin, tha Presidenti Rugova, duke falenderuar Bullgarinë dhe popullin bullgar për ndihmat që i kanë dhënë dhe po i japin Kosovës.

Pasi e falenderoi Presidentin Rugova për pritjen, shefi i Zyrës bullgare tha se ka ardhur në Prishtinë për të pasur marrëdhënie të mira me Kosovën, bashkëpunim ekonomik dhe që të ketë stabilizim në tërë rajonin.
"Këtu jam prej dy javësh, por e kam vërejtur që ka mjaft gjëra pozitive.

 

Uroj që të gjithë njerëzit këtu të kenë mjaft sukses dhe gjithë së bashku duhet të bëjmë gjëra pozitive", tha diplomati bullgar, duke u shprehur optimist për zhvllimet e ardhshme në rajon, ku, siç tha, jetojnë njerëz të mrekullueshëm.

Në pyetjen e një gazetari nëse kosovarët do të udhëtojnë lirshëm në Bullgari, meqë ajo nuk i njeh dokumentet e udhëtimit, shefi i Zyrës bullagre tha se shpejti ky problem do të zgjidhet.

 

Për këtë çështja ai tha se ka biseduar me zyrtarët e vendit të tij, dhe ata i kanë premtuar se ky problem do të zgjidhet së shpejti. Ai tha se Bullgaria do t'i njohë të gjitha dokumentet e UNMIK-ut.

 

 

H. Holkeri në takimin me z. Grosman ka thënë se në Kosovë është bërë përparim dhe se duhet ruajtur ky hap

 

Prishtinë, 6 nëntor 2003 - Kryeadministratori i Kosovës Hari Holkeri pas takimit me diplomatin amerikan Grosman theksoi se në Kosovë është bërë përparim dhe se duhet ruajtur ky hap i përparimit.

 

Ai vlerësoi se përparimi do të bëhet në bazë të plotësimit të standardeve dhe se vlerësimi do të bëhet në bazë të raporteve të arritura ndërkombëtare në Këshillin e Sigurimit. Z. Holkeri po ashtu ka bërë të qartë se do të ketë një plan pune veprues në bashkëpunim të ngushtë me institucionet vendore për plotësimin e standardeve.

 

Ai theksoi gjithashtu se procesi i shqyrtimit të statusit përfundimtar të Kosovës nuk mund të fillojë pa realizimin e tetë standardeve të parashikuara, duke përmendur sidomos standardin: dialog me Beogradin.

Për operacionalizimin e standardeve do të themelohen grupet punuese që do të vlerësonin përparimet e bëra. Këto grupe punuese tha ai do të jenë shumë të ndershme në punët e tyre dhe shumë transparente.

 

 

Në Kastriot policia sot ka ndërmarrë një aksion për kapjen e personave të dyshuar për vrasjen e familjes Stoliq

 

Prishtinë, 6 nëntor 2003 - Pjesëtarët policisë sot në orën 4.00 të mëngjesit kanë ndërmarrë një aksion të gjerë në Kastriot (Obiliq) për kapjen e personave të dyshimtë për vrasjen që ka ndodhur ndaj tre anëtarëve të familjes serbe Stoliq në këtë qytet muaj më parë, bëri të ditur sot zëdhënësi i SHPK-së Refki Morina.

 

Sipas Morinës, ky aksion ka për qëllim kapjen dhe identifikimin e autorëve të mundshëm të kësaj vrasjeje të trefishtë, e cila ka ndodhur gjatë natës së 3 e 4 qershorit të këtij viti. Aksion është duke vazhduar ende, tha Morina.

 

 

Novicki i shkruan Kristian Kadisë për problemet lidhur me sjelljen e policisë gjatë konrollimit

 

Prishtinë, 6 nëntor 2003 - "Gjatë vizitës së institucioneve gjyqësore në Kosovë si dhe nga një numër i aplikacioneve të cilat Ombudspersoni i ka pranuar nga qytetarët, jam informuar për problemet lidhur me sjelljen e policisë gjatë konrollimit të personave, shtëpive dhe lokaleve si dhe për konfiskimin e përkohshëm të gjërave personale si dëshmi në procedurat gjyqësore", i shkruan në një letër Ombudspersoni i Kosovës Marek Antoni Novciki, zëvendësit të PSSP-së për Drejtësi dhe Polici të UNMIK-ut, Zhan Kristian Kadi.

"Një situatë e tillë, kur policia kontrollon personat, shtëpitë dhe lokalet dhe përkohësisht konfiskon gjërat personale si dëshmi e procedurave gjyqësore pa përgaditur raport kontrollimi dhe /ose pa lëshuar vërtetim lidhur me gjërat e konfiskuara është në kundërshtim me dispozitat përkatëse të Aktit të aplikueshëm të procedurës penale dhe të Kodit të përkohshëm të procedurës penale, i cili do të hyjë në fuqi në prill të vitit 2004", thotë Novciki.

Ombudspersoni i Kosovës thekson se kjo situatë kërkon të ndryshohet urgjentisht, dhe se në të ardhmen të gjithë veprimet duhet të ndërmirren në pajtim me dispoziatat përkatëse të Aktit të aplikueshëm të procedurës penale dhe të Kodit të përkohshëm të procedurës penale.

 

 

Në Zyrën amerikane mbrëmë u mbajt një darkë pune e nënsekretarit Grosman me zyrtarët më të lartë vendor dhe ndërkombëtarë

 

Prishtinë, 6 nëntor 2003 - Mbrëmë në Zyrën amerikane u mbajt një darkë pune e nësekretarit amerikan për çështje Politike me zyrtarët më të lartë vendor: presidentin Rugova, kryepalamentarin Daci, kryeministrin Rexhepi dhe me kryetarët e PDK-së dhe AAK Thaçi e Haradinaj, me përfaqësuesit e Kuintit dhe me shefin e UNMIK-ut.

 

Temë qendrore e këtij takimi ishte çështja e operacionalizimit të standardeve, përpjekjet e bashkësisë ndërkombëtare për t'i ndihmuar UNMIK-ut dhe institucioneve vendore në operacionalizimin e standardeve të caktuara për Kosovën ishin në qendër të vëmendjes të nënsekretarit Grosman.

 

 

Për dhjetë muaj në komunën e Podujevës janë investuar mbi 8.5 milionë euro

 

Podujevë, 6 nëntor 2003 - "Dhjetëmujori i këtij viti për komunën e Podujevës ishte vazhdimësi e punës dhe realizimit të projekteve në infrastrukturë përgjithësisht", deklaroi kryetari i komunës Agim Veliu. Ai bashkë me përfaqësuesin e UNMIK-ut z. Bangash përparimin në këtë komunë e ilustruan me disa prej projekteve: asfaltimin e rrugëve në qytet, rruga Podujevë-Shajkofc, ajo e Bradashit, kanalizimi në rrugën ASkënderbeu@, AAlbaniku@, ndërtimi i ambulancave në fshatrat Sfeçël dhe Dyz dhe riparimi i shumë shkollave ndërtimi i deponisë për mbeturina, instalimi i linjës elektrike 220 Kv që është kah fundi dhe projekte tjera në qytet dhe fshatra, janë investime kapitale që bashkë me disa projekte tjera arrijnë vlerën e mbi 8.5 milion euro të investuara nga komuna, donatorët dhe komuniteti.

Ndër progreset përfaqësuesi i UNMIK-ut numëroi edhe procesin e tatimit në pronë që ka shënuar një progres të qëndrueshëm meqë është kryer shqyrtimi dhe shpërndarja e faturave në më shumë se 9 mijë pronarë në të katër zonat e komunës, përparimin në procesin e kthimit dhe integrimit që kanë demonstruar autoritetet lokale.

 

"Në këto projekte komuna ka investuar mbi një milion euro, komuniteti ka me mbi 233 mijë euro dhe donatorët mbi 7 milion euro", deklaroi Veliu dhe theksoi se në realizmin e këtyre projekteve pos komunitetit duhet falënderuar edhe donatorët e ndryshëm.

Megjithate përfaqësuesi i UNMIK-ut deklaroi se pavarësisht disa vështirësive në institucionet e komunës, puna dhe shërbimet për qytetarët kanë vazhduar dhe pse jo në standardet e kërkuara.

 

 

M. Grosman thotë se janë të hapura opcionet për zgjidhjen e statusit të Kosovës, duke mos përjashtuar edhe pavarësinë

 

Prishtinë, 6 nëntor 2003 - Shtetet e Bashkuara të Amerikës mbështesin planin që bisedimet mbi statusin final të Kosovës të fillojnë në mes të vitit 2005, nëse deri atëherë Kosova plotëson standardet demokratike dhe ato që lidhen me të drejtat e njeriut.

 

Kështu është shprehur nënsekretari amerikan i Shtetit për Çështje politike, Mark Grosman. Në një konferencë shtypi në Prishtinë Rosman u shpreh se janë të hapura të gjitha opsionet për zgjidhjen e statusit të Kosovës, duke mos përjashtuar edhe pavarësinë e saj.

Ai nënvizoi se gjysma e vitit 2005 do të jetë koha kur do të bëhet një vlerësim se a i ka përmbushur Kosova standardet e kërkuara nga komuniteti ndërkombëtar.

 

Sipas tij, ndër standardet prioritare të kërkuara për Kosovën janë funksionimi i institucioneve demokratike, respektimi i ligjit, liria e lëvizjes për të gjithë, kthimi i të zhvendosurve dhe integrimi i tyre, ekonomia, e drejta e pronës, dialogu me Beogradin dhe zhvillimi i TMK-së në përbërje shumetnike.

 

"Nëse Kosova do të arrijë të përmbushë këto standarde të kërkuara atëherë ne mund të kalojmë në një proces tjetër të përcaktimit të statusit final të saj, mirëpo fillimisht duhet përmbushur këto standarde", tha z. Grosman.

 

Ai theksoi se kur të flitet për statusin e Kosovës të gjitha opsionet do të jenë në tavolinën e bisedimeve dhe në këtë linjë do të përfshihet edhe pavarësia e Kosovës.

 

 

Një gjykatëse ndërkombëtare mori në pyetj dëshmitarin e parë në rastin e arrestimit të pesë ish-luftëtarëve të UÇK-së

 

Prishtinë, 6 tetor - Një gjykatëse hetuese ndërkombëtare dje e mori në pyetje dëshmitarin e parë Agim Idrizin nga Prizreni që është paraqitur me rastin e arrestimit të pesë ish-luftëtarëve të UÇK-së të Komunës së Kaçanikut, të akuzuar nga Gjykata e Qarkut në Prishtinë për krime të luftës.

 

Avokati Tomë Gashi tha se dëshmitari i djeshëm është dëshmitari kryesor në rastin e arrestimit të pesë ish-pjesëtarëve të UÇK-së.

 

Sipas Gashit, pesë ish-luftëtarët e UÇK-së të arrestuar më 27 tetor të këtij viti Ejup Runjeva, i njohur si "Komandant Era", Bujar Tafili, Rrustem Dema, Enver Axhami dhe Nuhi Provoliu akuzohen nga Gjykata e Qarkut në Prishtinë për krimet e luftës të kryera gjatë periudhës 1998/1999 në Komunën e Kaçanikut.

 

Procesin hetues, siç thuhet, është duke drejtuar gjykatësja ndërkombëtare Kristin Lindeman Protel nga Gjermania. Pritet që sot dëshmitari Agim Idrizi të vazhdojë dëshminë e tij.

 

 

Policia e UNMIK-ut dhe zyrtarët e doganave kanë kapur katër kamionë me 5000 litra naftë të fshehur

 

Prishtinë, 6 nëntor 2003 - Policia e UNMIK-ut dhe pjesëtarët e doganave kanë kapur katër kamiona të cilët mbanin të fshehur në rezeravar të veçant mbi 5000 litra naftë që kishin futur ilegalisht në Kosovë nga Maqedonia.

Në të vërtet dy kamionët e parë me rezervuare ilegale pasi që kishin kaluar në vendkalimin kufitar në Han të Elezit kishin vazhduar rrugën drejt një pompe të benzinës në kryqin rrugor për në Viti dhe mu në këtë pompë policia i ka vërejtur kamionët duke zbrazur naftën nga rezervarët ilegale.

 

Pas kësaj policia i ka këthyer këta kamiona prapa në terminalin doganor në Han të Elezit dhe në bashkëpunim me doganat ka gjetur edhe dy kamionë të tjerë me rezervuare të maskuara.

 

 

Oliver Ivanoviq thotë se Serbia pa Kosovën nuk do të jetë e njejtë

 

Nish, 6 nëntor 2003 - "Shpallja eventuale e pavarësisë së Kosovës do të shfrytëzohej nga shumë lëvizje separatiste në Evropë", ka thënë përfaqësuesi i pakicës serbe në Parlamentin e Kosovës, Oliver Ivanoviq.

 

Sipas tij Serbia pa Kosovën nuk do të ishte e njejtë dhe kjo do të shkaktonte erozion dhe shkatërrim të mëtejmë të saj, që do të ishte rrezik jo vetëm për Ballkanin, por për tërë Evropën. Ivanoviq ka thënë se as serbët nuk mund të kenë kërkesa maksimaliste. "Duhet ta pranojmë autonominë e Kosovës, por autonominë e cila e përjashton pavarësinë", u ka thënë Ivanoviq gazetarëve në Nish.

 

 

Komisioni për Gatishmëri Emergjente i Kuvendit të Kosovës shpreh përkrahje për zhvillimin e TMK-së

 

Prishtinë, 5 nëntor - Komisioni për Gatishmëri Emergjente i Kuvendit të Kosovës pati një takim pune me drejtues të Shtabit të Përgjithshëm të Trupave Mbrojtëse të Kosovës. Në takim u bisedua për zhvillimin, profesionalizimin dhe transformimin e këtyre trupave, si edhe për objektivat e këtij institucioni për të ardhmen.

 

Kryetari i këtij komisioni, Agim Krasniqi, tha se takimi u zhvillua në kuadrin e bashkëpunimit të mirë të Trupave Mbrojtëse me institucionet e Kosovës. Ai theksoi se ky komision është i gatshëm të ofrojë ndihmë për realizimin e synimit të Trupave Mbrojtëse të Kosovës që në të ardhmen të transformohen në forcë mbrojtëse të Kosovës.

 

Komandanti i Shtabit të Përgjithshëm të Trupave Mbrojtëse të Kosovës, gjeneral-lejtnant Agim Çeku, tha se vizioni i Trupave Mbrojtëse të Kosovës është ndërtimi i një force mbrojtëse dhe shtoi se nga Komisioni Parlamentar për Gadishmëri emergjente ka marrë mbështetje të fuqishme për realizimin e këtij synimi. Z. Krasniqi dhe gjeneral Çeku theksuan nevojen e thellimit të bashkëpunimit midis këtyre dy institucioneve.

 

 

F. Hartman: Sa i përket krimeve ndaj shqiptarëve Tribunali ka përfunduar me ngritjen e aktakuzave kundër katër gjeneralëve serbë

 

Hagë, 6 nëntor 2003 - Zëdhënësja e Prokurorisë së Tribunalit të Hagës Lorens Hartman ka thënë se Tribunali sa i përket krimeve të bëra kundër shqiptarëve të Kosovës, ka përfunduar me ngritjen e aktakuzave të fundit kundër katër gjeneralëve serbë. Kështu ka deklaruar Florans Hartman në një konferencë me gazetarë në Hagë.

 

Por, ajo ka nënvizuar se kjo nuk do të thotë se ky tribunal nuk mendon se ka mjaft persona serbë që kanë përgjegjësi për krime ndaj shqiptarëve, por për shkak të strategjisë përmbyllëse të punës së Tribunalit, hetuesit e prokurorisë nuk do të bëjnë më hetime kundër serbëve në Kosovë.

 

Ajo tha se Tribunali megjithatë pret që gjykatat vendore do të marrin përsipër një numër të konsiderueshëm të hetimeve kundër serbëve për krime në Kosovës dhe posaçërisht përmendi rastin e varrezës masive në Batajnicë, ku janë gjetur eshtrat e më shumë se 800 viktimave shqiptarë nga Kosova e për të cilin rast autoritetet në Serbi nuk kanë filluar kurrfarë hetimesh.

 

Hartman pastaj ka theksuar se Tribunali i Hagës në Kosovë është duke punuar në përfundimin e hetimeve në vetëm edhe dy raste, por të dyshuar për krime janë me kombësi shqiptare, ish-pjesëtarë të UÇK-së. Sipas strategjisë së Tribunalit edhe këto hetime kundër ish-pjesëtarëve të UÇK-së do të duhej të përfundonin më së largu deri në fund të vitit 2004.

 

 

Grosman në Shkup: Dëshirojmë që Ballkanin ta fusim në Evropë

 

Shkup, 6 nëntor 2003 - "Dëshirojmë që Ballkanin ta fusim në Evropë, jo vetëm për ju por edhe që të arrihet dita kur njerëzit e këtij rajoni do ta kalojnë jetën e tyre në një demokraci stabile, të qetë dhe shumetnike. Vij nga Brukseli ku mora pjesë në Këshillin Veriatlantik dhe ku u angazhova për një integrim më të shpejtë të Ballkanit dhe futjen e këtij rajoni në vizionin që e ndajmë".

Kështu deklaroi nënsekretari i Çështjeve Politike të Departamentit të SHBA-së Mark Grosman, i cili qëndron sot për vizitë në Maqedoni, si pjesë e turnesë katërditore të tij nëpër vendet e Ballkanit.

"SHBA-ja dhe Maqedonia kanë një partneritet të ngushtë për ruajtjen e paqes dhe të sigurisë në Evropën Juglindore, në luftën kundër terrorizmit në të cilën ushtarët e Maqedonisë, krah për krah, me ushtarët amerikanë ndodhen në Afganistan dhe në Irak, ndërsa kemi edhe marrëdhënie të mira dypalëshe", vlerësoi Grosman.

Ai tha se SHBA-ja kërkon nga Maqedonia që të përqendrohet në reformat në vend, në zbatimin e Marrëveshjes së Ohrit dhe t'i mbështesë përpjekjet që Kosova t'i arrijë standartet.

Grosmani u ndal në çështjen e Kosovës për të cilën ka biseduar në Prishtinë dhe në Beograd, e për këtë, siç tha, ka diskutuar edhe me kreun shtetëror të Maqedonisë.

"Më vjen mirë që Qeveria e Republikës së Maqedonisë i mbështet standardet e qarta dhe konkrete që duhet të realizohen në Kosovë para se të fillojë dialogu për statusin e Kosovës", tha Grosman.

Ai shtoi se fokusi është vënë në strategjinë e Grupit të kontaktit për ta mbështetur atë që duhet ta zbatojë administratori civil i Kosovës, Hari Holkeri.

 

Si standarde speciale konkrete dhe të qarta që duhet të plotësohen në Kosovë, Grosmani i theksoi: funksionimin e institucioneve demokratike, mbizotërimin e së drejtës, lëvizjen e lirë, kthimin dhe integrimin e personave të shpërngulur, dialogun me Beogradin, të drejtën e pronësisë, mbrojten e sistemit gjyqësor dhe respektimin e të drejtave të pakicave.

"Deri në vitin 2005 Kosova duhe t'i vendosë standardet. Atëherë do të pasojë evaluimi i procesit dhe nëse ato plotësohen do të mund të fillojnë bisedimet për statusin e ardhshëm të Kosovës. Përndryshe rreth çështjes së statusit të Kosovës do të duhet të caktojmë një datë të re", tha Grosman.

Ai shtoi se nuk ka ardhur në rajon që të bisedojë për pavarësinë e Kosovës ose për mundësitë e statusit të ardhshëm të saj.

Nënsekretari amerikan për Çështje Politike paradite pati takim edhe me kryetarin e Republiës së Maqedonisë Boris Trajkovskin si dhe me liderin e BDI-së Ali Ahmeti, njofton MIA.

 

 

Gazetarët padisin kryeministrin Nano

 

Tiranë, 6 nëntor 2003 - Pesë shoqata të gazetarëve dhe organizata për të drejtat e njeriut kanë paditur kryeministrin shqiptar Fatos Nano për shkak se u ka ndaluar ministrave të komunikojnë me gazetarët.

 

Në padi thuhet se kjo është shkelje e Kushtetutës dhe e lirisë së fjalës dhe në këtë mënyrë pengohet opinioni që të kontrollojë punën e qeverisë. Urdhëri i Nanos ishte lëshuar pasi që ministri i rendit Luan Rama ishte xhiruar për shkak të sulmit ndaj një gazetari.

 

 

Deputetët e Parlamentit të Maqedonisë me shumicë votash shkarkuan katër ministrat në kabinetin të Cërvenkovskit

 

Shkup, 6 nëntor 2003 - Parlamenti i Maqedonisë ka shtyrë për sot debatin për miratimin e ndryshimeve në kabinetin e kryeministrit Cërvenkovski. Para ndërprerjes së punimeve Parlamenit maqedonas miratoi shkarkimin e katër ministrave, duke i hapur kështu rrugën emërimeve të reja.

Partitë e koalicionit qeveritar në Maqedoni së bashku me rreth 70 vota shkarkuan ministrat Ismail Dardhishta të Drejtësisë, Milaim Hajdinit të Transportit dhe Ndërlidhjeve, Petar Goshev të Financave dhe Ilija Filipovski të ekonomisë. Kryeministri Cërvenkovski i falënderoi ata për punën e deritashme dhe nuk e përjashtoi mundësinë e emërimit të tyre nëpër institucione dhe drejtori të tjera shtetërore.

Duke paraqitur raportin për punën njëvjeçare të kabinetit të tij, kryeministri Cërvenkovski tha se Maqedonia është sot një vend më i qëndrueshëm dhe më i sigurt se një vit më parë. Ai foli edhe për kriminalitetin e organizuar, grupet e mbetura të armatosura, korrupsionin, bashkëpunimin me misionet ndërkombëtare në vend.

"Marrëveshja e Ohrit është e tashmja jonë, ndërkaq Evropa është e ardhmja e jonë", ka thënë kryeministri Cërvenkovski para deputetëve që padyshim hasi në mbështetjen e shumicës së anëtarëve të Parlamentit. Por, deputetët e VMRO-DPMN-së dhe Partisë Demokratike Shqiptare e kritikuan raportin e tij.

Parlamenti ndërpreu debatin për ta vazhduar sot kur pritet emrimi i katër ministrave të rinj: Agron Buxhaku dhe Hixhet Memeti të BDI-së të drejtojnë ministrinë e Transportit Ndërlidhjeve dhe Drejtësinë, ndërkaq Nikolla Popovski i LSDM-së deri dje kryetar i Parlamentit do të jetë në krye të Ministrisë së Financave dhe Stevske Jakimovski ministër i Ekonomisë.

 

 

Kapen gjeneralët e Sadamit

 

Falluxha, 6 nëntor 2003 - Forcat amerikane në Irak kanë kapur dy ish-gjeneralë të ushtrisë irakiane në qytetin e Faluxhës.

Burimet ushtarake thonë se dy gjeneralët besohet se kanë organizuar dhe financuar sulmet kundër forcave të koalicionit në rajonin në perëndim të Bagdadit.

Burimet shtuan se ish- gjeneralët u kapën nga marinësat gjatë një bastisje në qytet në orët e para të mëngjesit.

Ata nuk janë identifikuar ende publikisht, por zyrtarët thonë se dyshohet që ata kanë luajtur një rol kyç në sulmet kundër forcave të koalicioniz në dhe përreth qytetit, që është bastion i mbështetësve të Sadam Huseinit.

 

 

Putin në samitin e BE-së

 

Romë, 6 nëntor 2003 - Presidenti rus, Vladimir Putin, pritet të marrë pjesë të enjten në një samit të udhëheqësve të Bashkimit Evropian që do të mbahet në Romë.

Pritet që udhëheqësit evropianë t'i kërkojnë z. Putin që trupat ruse të sigurisë, të ndërmarrin veprime më të moderuara në Çeçeni.

Po ashtu mendohet se ata do t'i bëjnë thirrje presidentit rus që në rastin e Mikhail Khodorkovsky, oligarkut të naftës dhe rivalit të tij potencial që është arrestuar, të zbatohet ligji.

Nga ana e vet, z. Putin pritet të kërkojë trajtim më të mirë për pakicat ruse në Letoni, Lituani dhe Estoni vitin e ardhshëm, kur këtu vende të anëtarësohen në BE.

 

 

"Vrasësi i Lumit të Gjelbër" ka pranuar me gjakftohtësi se ai është vrasësi i 48 grave

 

Sitëll, SHBA, 6 nëntor 2003 - Duke shqiptuar fjalën "fajtor" 48 herë me gjakftohtësi, Gari Leon Rixhuei (Ridgway), ka pranuar dje para gjykatës se ai është "Vrasësi i Lumit të Gjelbër" (Green River Killer), siç është quajtur me një pseudonim, i cili gjatë dy dekadave ka vrarë 48 gra, kryesisht prostituta, njofton Rojter.

 

Rixhuei, 54- vjeçar i thinjur, trupvogël me syza, ka qenë i punësuar si shofer kamionësh, ka pranuar fajin për më shumë vrasje se asnjë vrasës serik tjetër në historinë amerikane. Ai e ka pranuar fajin me marrëveshje që të mos ekzekutohet për këto vrasje, por të dënohet me burgim të përjetshëm.

 

 

Katër ish-ministra ruandezë kanë dalë para gjykatës me akuzën për gjenocidin e vitit 1994

 

Dar es Salam, 6 nëntor 2003 - Katër ish-ministra ruandezë kanë dalë sot (e enjte) para gjykatës me akuzën së kanë luajtur rol kryesor në gjenocidin e vitit 1994, përfshirë edhe blerjen e armëve dhe nxitjen e masakrimit të rreth 800 mijë njerëzve, ka bërë të ditur zëdhënësi i gjykatës, njofton Rojter.

 

Tribunali i Kombeve të Bashkuara në qytetin verior tanzanian Arusha, i kritikuar se po e zvarit sjelljen e kryesve të masakrave para drejtësisë, ka përshpejtuar punën dhe ka shënuar progres në këtë drejtim.

 

 

Ushtarët izraelitë kanë vrarë një grua palestineze

 

Nablus, 6 nëntor 2003 - Ushtarët izraelitë kanë vrarë një grua palestineze gjatë një sulmi të sotëm (e enjte) kundër militantëve, kanë thënë dëshmitarët, njofton Rojter. Ky incident ka ndodhur vetëm një ditë pasi Izraraeli ka deklaruar se do të lehtësojë bllokmin e Bregut Perendimor për të lehtësuar punën e kryeministrit palestinez, Ahmed Kurei.

 

Emtiaz Abu Ras, 38 vjeçare, është qëlluar me armë zjarri duke shikuar nga dritarja e shtëpisë së saj. Një burim ushtarak izraelit ka thënë se në këtë zonë ka pasur shkrehje të shumta armësh nga shumë drejtime e lokacione dhe shkëmbim zjarri, por nuk nuk është parë se është qëlluar kush.

 

 

Policia saudite ka vrarë një militant musliman

 

Riad, 6 nëntor 2003 - Policia saudite ka vrarë një militant musliman gjatë një sulmi në agimin e sotëm (e enjte) në periferi të Riadit, njofton Rojter. Ky është sulmi i dytë në vendstrehimet e militantëve gjatë kësaj jave, ka thënë një zyrtar saudit. Në këto përleshje janë plagosur lehtë gjithashtu edhe tetë policë. Ai gjithashtu ka thënë se një numër i papërcaktuar militantësh ka ikur. Detaje të tjera nuk ka dhënë.

 

 

BE-ja shpreh shqetësime për vendet që do të anëtarësohen së shpejti

 

Bruksel, 6 nëntor 2003 - Komisioni Evropian paralajmëroi 10 vendet që do të anëtarësohen së shpejti në Bashkimin Evropian që të veprojnë më shpejt për t'i përshtatur ligjet e vendeve të tyre me legjislacionin e këtij organizmi.

Komisioni miratoi të mërkurën raportet për të 10 vendet, duke i hapur kështu rrugën anëtarësimit të tyre në muajin maj.

Por, një zyrtar i Bashkimit Evropian thotë se në raporte paralajmërohet për "shqetësime serioze" në fusha si lufta kundër korrupsionit dhe siguria e prodhimeve ushqimore që këto vende duhet t=i kapërcejnë para majit.

Sipas raporteve, Polonia ka numrin më të madh të çështjeve për të zgjidhur, 9, ndërsa Sllovenia është më e përgatitura për anëtarësim, vetëm me 1 çështje pa zgjidhur.

 

 

Kritikët sfidojnë ligjin e abortit

 

Uashington, 6 nëntor 2003 - Organizatat pro-abortit dhe grupet për të drejtat e njeriut në Shtetet e Bashkuara kanë sulmuar presidentin Bush pasi ai nënshkroi një ligj me të cilën ndalohen abortet e vona. Aktivistët thonë se presidenti kanë vendosur kapitalin e vet politik para të drejtës së femrës për të zgjedhur.

Ata argumentojnë se me këtë ligj të ri, presidenti do që të sigurojë votat e mbështetësve të vet të krishterë dhe konservatorë para zgjedhjeve presidenciale të vitit të ardhshëm.

Kandidati presidencial nga rradhët e demokratëve, Hauard Din, që është mjek me profesion, ka deklaruar se kjo është një ditë e zezë për gratë.

 

 

Në Mekë dy militantë kanë hedhur veten në erë me bombë

 

Riad, 6 nëntor 2003 - Dy militantë kanë hedhur vetveten në erë me shpërthim bombe gjatë një operacioni të forcave të sigurimit saudit në qytetin e shenjtë Mekë, kanë bërë të ditur zyrtarët sauditë, njofton BBCnews. Ata kanë kryer aktin vetëvrasës derisa po ndiqeshin në rrethinën e qytetit al-Sharaeh, kanë shtuar zyrtarët.

Më herët, mediat saudite kanë informuar se forcat e sigurimit kishin vrarë një militant në kryeqytetin Riad. Arabia Saudite po i ndjek militantët vazhdimisht që nga sulmet vetëvrasëse me bombë të majit në kompleksin e ndërtesave perendimore në Riad.

 

 

Pentagoni dërgon 100 mijë trupa të freskëta për zëvendësimin e ushtarëve amerikanë në Irak

 

Ushington, 6 nëntor 2003 - Sekretari amerikan i Mbrojtjes, Donald Ramsfeld, ka miratuar planin e qarkullimit të trupave, sipas të cilit që nga fillimi i vitit të ardhshëm do të dërgoheshin në Irak mbi 100 mijë trupa të freskëta, kanë bërë të ditur burimet e Pentagonit, njofton CNN. Kumtesa formale pritet sot, kanë saktësuar këto burime.

Sipas këtij plani përfshihen edhe 40 mijë trupa të Gardës Nacionale dhe të rezervës për shërbim njëvjeçar në Irak. Zyrtarët e Pentagonit kanë thënë se plani aktual do të ulë numrin e përgjithshëm ta trupave amerikane në Irak, nga 130 mijë sa janë tash, në 100 mijë sish.

 

 

Në dy raste të veçanta në Irak, janë vrarë dy ushtarë amerikanë

 

Bagdad, 6 nëntor 2003 - Guerilët kanë shkrepur sot (e enjte) një granatë raketore në një pritë të djeshme dhe kështu kanë vrarë një ushtar amerikan dhe kanë plagosur edhe dy te tjerë, ka bërë të ditur sot (e enjte) ushtria amerikane, njofton Rojter. Sulmi ka ndodhur afër qytetit Mahmudija, ka thënë Komanda qendrore ushtarake amerikane në kumtesën e saj.

Armata amerikane ka thënë gjithashtu se edhe një ushtar tjetër amerikan është vrarë sot (e enjte) kur një kamion ushtarak ka shkelur një një minë tokësore në rrugë afër kufirit me Sirinë. Në deklaratë nuk është bërë e qartë nëse mina ishte vënë nga guerilët apo ajo ishte pjesë e masave të sigurimit të kufirit.

 

 

Të paktën 21 punëtorë kanë humbur jetën nga zjarri në një plantazh të çajit në Ind

 

Nju Delhi, 6 nëntor 2003 - Të paktën 21 punëtorë kanë humbur jetën në një plantazh të çajit në Indinë lindore nga zjarri që e kishte e shkaktuar turma e pakënaqur me ndarjen e punëve në plantazh, ka bërë të ditur polica.
Mbi 100 veta ia kishin vënë flakën shtëpisë së një lideri rival sindikal në plantazhin e çajit në Dalgaon, në shtetin Bengali Perëndimor, për shkak të një konflikti rreth punësimit të punëtorëve.

Nga shtëpia deri më tash janë nxjerrë të paktën 21 trupa njerëzish. Pas ndërhyrjes së policisë janë arrestuar 106 veta, në mesin e tyre dhe 26 gra.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |