E premte, 24 tetor 2003

E premte, 24 tetor 2003

Përmbajtja:

Rugova: "Do të ndërtojmë marrëdhënie të mira miqësore e korrekte me të gjithë fqinjët tanë"
Mbrëmë në parkun e Prishtinës ndodhi një shpërthim
Del Ponte: Akuza të reja vitin e ardhshëm
Havier Solana sot arrin në Prishtinë
Kosova të integrohet në Evropë
Tash një javë nuk dihet asgjë për Mihrije Demirin nga Komogllava e Ferizajt
Limaj, Balaj e Musliu në konferencë statusore
Meta e akuzoi Nanon se është i lidhur me krimin
Fatos Nano akuzon rëndë ish-kryeministrin Meta
Përfundimisht falimenton shtëpia botuese- gazetare "Nova Makedonija" e Shkupit
Nga burgu i Kandaharit kanë ikur reth 30 të burgosur talibanë
Guerilët irakianë kanë vrarë një ushtar amerikan në qytetin Mosul
Iraku pret donacione nga komuniteti ndërkombëtar
Në një sulm me bomba në Bagdad, është vrarë një civil irakian dhe dy të tjerë janë plagosur
Presidenti Bush në Havai
Palestinezë të armatosur kanë vrarë tre izraelitë në në Gaza
Ka vdekur e veja e gjeneralisimusit Çang Kajshi, zonja Çang Kajshi, në moshën 106-vjeçare
Në një shkëmbim zjarri në Kashmir, janë vrarë 2 ushtarë indianë dhe 3 militantë të dyshimtë

Rugova: "Do të ndërtojmë marrëdhënie të mira miqësore e korrekte me të gjithë fqinjët tanë"


Zoti Rugova nënvizoi se politikë nacionale e Kosovës është bashkëpunimi me të gjithë fqinjët dhe natyrisht, ndonëse do të ketë probleme, por "do të ndërtojmë marrëdhënie të mira miqësore e korrekte me të gjithë fqinjët tanë", tha ai.
"Po ashtu do të ndërtojmë një Kosovë demokratike, paqësore, të integruar në BE në NATO, një vend i pavarur në të cilën ne punojmë përditë që të realizohen kërkesat e bashkësisë ndërkombëtare këtu në Kosovë".
Presidenti Rugova falenderoi zotin Solana që, siç tha, gjithmonë gjen kohë të ndihmojë dhe të shohë progresin e Kosovës, për të cilin ka punuar shumë edhe në të kaluarën edhe tash.
Solana, pasi shprehu kënaqësinë që po sërish po takonte Presidentin Rugova, tha se në takim është biseduar për shumë gjëra dhe është analizuar situata pas takimit të Vjenës dhe kanë rënë dakord se duhet vazhduar për përpjekjet për vazhdimin e dialogut të filluar në Vjenë.


Mbrëmë në parkun e Prishtinës ndodhi një shpërthim

Prishtinë, 24 tetor 2003 - Mbrëmë në parkun e Prishtinës ka ndodhur një shpërthim, i cili nuk ka pasur pasoja në njerëz. Motivet e këtij shpërthimi si dhe autorët e tij, policia thotë se nuk i di, ndërkohë që po i zhvillon hetimet.


Del Ponte: Akuza të reja vitin e ardhshëm

Prishtinë, 24 tetor 2003 - Gjatë qëndrimit të djeshëm në Prishtinë, kryeprokuroja e Tribunalit të Hagës, Karla Del Ponte, ka thënë se aktakuza të reja kundër shqiptarëve te Kosovës për krime të luftës mund të ketë vitin e ardhshëm.

Del Ponte është shprehur e kënaqur me bashkëpunimin e deritashëm me Prishtinën, por theksoi vështirësitë me të cilat po përballen hetuesit me deshmitarët që ndjehen të kercënuar.


Havier Solana sot arrin në Prishtinë

Prishtinë, 24 tetor 2003 - Përfaqësuesi i Lartë i Bashkimit Evropian për Politikë të Jashtme dhe Siguri, Havier Solana, do të qendrojë sot në Prishtinë.
Solana paradite takohet me Presidentin Ibrahim Rugova dhe me kreun e UNMIK-ut Hari Holkeri dhe atë të KFOR-it Holger Kamerof, si dhe udhëheqësit vendorë të Kosovës.
Vizita e Solanës ka për qëllim inkurajimin e udhëheqjes shqiptarë në Prishtinë për të vazhduar bisedimet me Beogradit, të filluara me takimin e Vjenës, para dhjetë ditësh.
Dje Solana ka qëndruar edhe në Beograd ku ka vlerësuar se dialogu është shumë i rëndësishëm për të ardhmen evropiane të Kosovës dhe Unionit Serbi-Mali i Zi.


Kosova të integrohet në Evropë

Vjenë, 24 tetor 2003 - Shefi i misionit të OSBE–së në Kosovë Paskal Fieski, ka deklaruar se Kosova duhet të funksionojë si shoqëri ku do të sundojë rendi e ligji, respektimi i të drejtave të njeriut dhe ku nuk diskriminohet asnjë grup etnik.

Ambasadori Fieski në takimin e Këshillit të Përhershëm të OSBE-së në Vjenë tha se dialogu produktiv është hap i nevojshëm në ndërtimin e një roli përgjegjës rajonal përderisa problemet e Kosovës nuk zgjidhen.
Ai tha se objektivat për Kosovën janë të njejta - krijimi i një shoqërie demokratike ku njerëzit me përkatësi të ndryshme etnike mund të jetojnë së bashku, një qeverisje e përgjegjshme, dhe integrimi në rajon dhe Evropë..

"Detyrë jona është të sigurojmë se Kosova do të bëhet një shoqëri e cila do të integrohet së shpejti në familjen evropiane", tha Paskal Fieski.


Tash një javë nuk dihet asgjë për Mihrije Demirin nga Komogllava e Ferizajt

Prishtinë, 24 tetor 2003 - Gani Demiri (1953) nga fshati Komogllavë, komuna e Ferizajt, i ka deklaruar sot KMDLNJ-së se nga 16 tetori i këtij viti nuk dihet asgjë për bashkëshorten e tij, Mihrije Demiri (1965).
Ajo ka dalë nga shtëpia e tyre në Komogllavë më 16 tetor, rreth orës 11.00.
Mihrija është psikikisht e sëmurë. Ganiu lut të gjithë ata që dinë diçka për gruan e tij Mihrijen, të lajmërojnë në stacionin më të afërt të policisë ose në tel. Mobil 044 285 805 te Ferat Latifi (vëllau i Mihrijes) apo në tel. e KMDLNJ-së 038/ 249 006.


Limaj, Balaj e Musliu në konferencë statusore

Hagë, 24 tetor 2003 - Fatmir Limaj, ish-komandant i Ushtrisë Çlirimtare të Kosovës dhe deputet i Kuvendit të Kosovës, Haradin Balaj dhe Isak Musliu,u paraqitën në konferencën statutore në Tribunalin e Hagës.

Mospajtimi mes prokurorisë dhe mbrojtësve, ofrimi i përmasave mbrojtëse për dëshmitarët shtesë dhe marrëveshja për fakte të caktuara mes palëve ishin çështje shqyrtimi. Mohimi i mbrojtjes në liri vazhdon të jetë njëra nga ankesat.
Mbrojtjen në liri të Fatmir Limajt, e ka dëmtuar qëndrimi indiferent i UNMIK-ut dhe vetë heshtja e ish- kryeadministratorit të Kosovës, Mihael Shtajner, ky është pohimi i mbrojtësit të Limajt, Karim Khan,i cili pas katër muajve konfirmon takimin me Shtajnerin dhe drejtorin e drejtësisë në UNMIK.
Vendimi se kur mund të filloj gjykimi pritet pas gjashtë javëve pas prezantimit të ndryshimeve në aktakuzë.


Meta e akuzoi Nanon se është i lidhur me krimin

Tiranë, 24 tetor 2003 - Ish-zv.kryeministri i Shqipërisë Ilir Meta hodhi poshtë akuzat e kryeministrit Fatos Nano se ai ka lidhje me krimin dhe se gjoja ka bashkuar votat me opozitën kundër qeverisë socialiste.
Sipas Ilir Metës, njeriu i vetëm që kishte punuar dhe ishte inkriminuar është kryeministri Fatos Nano.
Duke folur për ngjarjet e 14 shtatorit 1998, Ilir Meta tha se ishte kryeministri Nano atëherë që iku në Maqedoni për t'u strehuar dhe asnjë politikan tjetër shqiptar nuk e bëri këtë.
Poashtu Meta kërkoi që Nano të pushojë të sillet si perandor apo mbret. Meta tha se Nano duhet të sqarojë se kush e ndaloi të japë dorëheqje një ditë më parë para kryesisë së PS, pasi më parë ai (Nano) e kishte përgatitur dorëheqjen me shkrim, por më vonë e kishte grisur.
Meta e akuzoi Nanon se është i lidhur me krimin dhe nuk mund të flasë me një kryeministër i cili nuk është i denjë për një vend demokratik.


Fatos Nano akuzon rëndë ish-kryeministrin Meta

Tiranë, 24 tetor 2003 - Kryeministri shqiptar, Fatos Nano, ka paralajmëruar një luftë të ashpër brenda Partisë Socialiste, duke bërë edhe një varg akuzash ndaj kundërshtarëve të tij, sidomos ish-zëvendskryeministrit Ilir Meta.
Nano mbrëmë, në një intervistë në TV Klan, me emra konkretë përmendi si organizatorë të ngjarjeve të 14 shtatorit të vitit 1998 në Tiranë, të cilat pasuan vrasjen e deputetit demokrat Azem Hajdari.
"Në 14 shtator ka ndodhur rrëzimi i një qeverie të socialistëve të drejtuar nga unë, ka ndodhur në mënyrë të dhunshme me një bashkëpunim kulisash midis drejtuesve të Kuvendit dhe të Presidencës së atëhershme, të shërbimeve sekrete dhe të opozitës," tha Fatos Nano.
Ndërkaq, emrin e kundërshtarit të tij kryesor, Ilir Meta, Nano e theksoi pa hezitim si një ndër figurat e inkriminuara brenda PS-së, duke e akuzuar në biznesin që i është shmangur taksave, në abuzimin e madh me fondet publike - kriminal, me trojet publike - kriminal, dhe në abuzimin e madh me forumet e Partisë Socialiste.


Përfundimisht falimenton shtëpia botuese- gazetare "Nova Makedonija" e Shkupit

Shkup, 24 tetor 2003 - Shtëpia më e vjetër botuese-gazetare "Nova Makedonija" në Shkup, që nga dita e sotme edhe zyrtarisht ka falimentuar. Tani të gjithë 1400 të punësuarit do të shkojnë në byron e punësimit dhe atje do të jenë në asistencë sociale.
Në kuadër të kësaj shtëpie shtëpie botuese-gazetare ka funksionuare dhe e përditshmja në gjuhën shqipe "Flaka e vëllazërimit".


Nga burgu i Kandaharit kanë ikur reth 30 të burgosur talibanë

Kandahar, Afganistan, 11 tetor – Rreth 30 të burgosur talibanë kanë ikur nga burgu në qytetin e trazuar Kandahar, që tregon për sigurinë e brishtë persaonale në pjesën e trazuar të Afganistanit jugor, njofton Rojter. Ndërkaq, shefi i sigurimit të Kandaharit, ndonëse ka konfirmuar ikjen e të burgosurve, ka thënë se nuk e dinte numrin e saktë të të ikurve.


Guerilët irakianë kanë vrarë një ushtar amerikan në qytetin Mosul

Bagdad, 24 tetor 2003 – Guerilët irakianë kanë vrarë sot (e premte) një ushtar amerikan në një sulm me armë të vogla në qytetin verior irakian Mosul, ka bërë të ditur ushtria amerikane në një njoftim të sotëm, njofton Rojter.

Kështu, që nga një maji, kur Uashingtoni ka shpallur të përfunduar luftën në Irak, guerilët irakianë kanë vrarë deri tash 106 ushtarë amerikanë. Gjatë këtyre sulmeve kundër amerikanëve, janë vrarë gjithashtu edhe shumë civilë, që janë ndodhur në zonat ndërluftuese.


Iraku pret donacione nga komuniteti ndërkombëtar

Madrid, 24 tetor 2003 - Komuniteti ndërkombëtar do të bëjë të premten të ditur se sa para do t'ë japë për rindërtimin e Irakut. Kontributet financiare nga vende dhe nga organizata të ndryhsme, priten që të bëhen publike në ditën e dytë dhe të fundit të konferencës së donatorëve për Irakun që po mbahet në Madrid.
Kombet e Bashkuara, Banka Botërore dhe autoritetet e përkohshme të Irakut llogarisin se gjatë katër viteve të ardhshme vendit do t'i duhen 56 miliardë dollarë.
Amerika ka ofruar 20 miliardë, por disa vende ngurrojnë që të kontribuojnë financiarisht, mes tyre Franac dhe Gjermania.


Në një sulm me bomba në Bagdad, është vrarë një civil irakian dhe dy të tjerë janë plagosur

Bagdad, 24 tetor 2003 – Një civil irakian është vrarë dhe dy të tjerë janë plagosur, siç kanë thënë vendësit, në një sulm të mbrëmshëm me bomba mortaje në pjesën jugore të Bagdadit, kanë pohuar sot (e premte) dëshmitarët, njofton Rojter.

Ata kanë thënë se të pakten tri mortaja kanë goditur një zonë të banueshme të qytetit. Vrasjen e një civili dhe plagosjen e dy të tjerëve e kanë konfirmuar edhe burimet spitalore. Ushtria amerikane ende s’ka komente për incidentin.


Presidenti Bush në Havai

Uashington, 24 tetor 2003 - Presidenti Bush po bën një ndalesë në shtetin amerikan të Havait, pas turneut të tij në 6 vende të Azi-Paqësorit.
Synimi i ndalesës është të grumbullojë fonde për zgjedhjet presidenciale të vitit të ardhshëm. Presidenti dhe bashkëshortja e tij, Laura, do të vizitojnë gjithashtu përmendoren e ngritur në Pearl Harbor dhe do të takohen me njerëz që arritën të mbeten gjallë pas sulmit ajror japonez mbi këtë port gjatë Luftës së Dytë Botërore.
Ai do të informohet më pas nga komandantët ushtarakë amerikanë para se të drejtohet për në Uashington.


Palestinezë të armatosur kanë vrarë tre izraelitë në në Gaza

Jerusalem, 24 tetor 2003 – Palestinezë të armatosur janë infiltruar sot (e premte) në vendbanimin ebrait në Gaza dhe kanë vrarë tre izraelitë, kurse kanë plagosur edhe dy të tjerë, njofton AP. Zyrtarët izraelitë kanë thënë se edhe një nga sulmuesit është qëlluar për vdekje në këtë incident.
Sulmi ka ndodhur pasi Izraeli ka thënë se muri mbrojtës që po ndërtohet përgjatë Bregut Perendimor mund të imponohet njëanshëm si kufi, duke aneksuar kështu luginën strategjike për Izraelin të lumit Jordan, zhvillim ky që vetëm e vështirëson edhe mëtej procesin e paqes.
Burimet ushtarake kanë thënë se sulmi është kryer në orët e hershme të mengjesit në vendbanimin Netzarim, ku janë vrarë dy gra dhe një burrë izraelit, kurse është plagosur rëndë edhe një tjetër grua izraelite. Xhihadi islamik ka konfirmuar se sulmin e kanë kryer një pjesëtar i tj së bashku me një pjesëtar të Hamasit dhe ka identifikuar sulmuesin e vrarë të jetë Samir Fouda, 21-vjeçar, militant i Hamasit.


Ka vdekur e veja e gjeneralisimusit Çang Kajshi, zonja Çang Kajshi, në moshën 106-vjeçare

Taipeh, 24 tetor 2003 – E veja e gjeneralisimusit nacionalist kinez, Çang Kajshi, zonja Çang Kajshi, e lindur Sung Mejling, një nga gratë më të fuqishme në Kinë, ka vdekur në moshën 106-vjeçare, në shtëpinë e saj në Nju Jork, kanë bërë të ditur sot (e premte) zyrtarë të Tajvanit, njofton Rojter.

Gjatë Luftës së Dytë Botërore, znj. Çang ishte zë i Kinës në botën e jashtme, duke magjepsur publikun amerikan dhe duke bërë për vete kongresin amerikan me apelet e saja pasionante kundër japonezëve. Ajo iku në Tajvan nga Kina së bashku me burrin e saj dhe qeverinë nacionaliste pasi humbën luftën nga komunistët më 1949.


Në një shkëmbim zjarri në Kashmir, janë vrarë 2 ushtarë indianë dhe 3 militantë të dyshimtë

Xhamu, Indi, 24 tetor 2003 – Ushtarët indianë kanë rrethuar sot (e premte) një shtëpi në Kashmir, ku ishin strehuar tre militantë të dyshimtë, ka bërë të ditur policia, njofton Rojter. Katër orë rresht ka pasur shkëmbim zjarri ndërmjet policisë dhe militantëve.

Seperatistë muslimanë kanë hedhur nga shtëpia edhe granata dhe kështu kanë vrarë dy uashtarë. Të tre kryengritësit janë vrarë pastaj pasi ishin barrikaduar në një shitore të afërme.