Kryetari Nano ringjallet prej hirit të kryeministrit Nano

OPINIONE

Koment

Kryetari Nano ringjallet prej hirit të kryeministrit Nano

24 tetor 2003 / TN

Çerçiz LOLOÇI

Fatos Nano po përpiqet të përdorë humbjen në parlament të një shumice të nevojshme për të qeverisur, si një arsyetim për të radikalizuar situatën brenda Partisë Socialiste dhe për të përjashtuar prej saj të gjithë opozitarët e mundshëm që ai mendon se do t'i ketë konkurrentë në Kongres.

Pas mbledhjes së djeshme të Kryesisë dhe intervistës së tij në emisionin "Opinion" të Blendi Fevziut, Nano lëshoi akuza të qarta kundër rivalëve të tij në parti, duke i shtrirë akuzat në kohë deri tek 14 shtatori i vitit 1998.

Së pari, ai po bën përpjekje për të kërcënuar me përjashtim deputetët që votuan kundër tij, jo aq për t'i përjashtuar vërtet, por për të ndalur rrjedhjen e fluksit të deputetëve të tjerë në krah të rivalëve të tij në parti.

Por përtej arsyes së parë të zotit Nano, ka shumë shanse që ai ta ndalë këtë hov në Kongres. Ajo që kërkon të bëjë Fatos Nano, është të përdorë rezultatin negativ në parlament si arsyetim për spastrime dhe revansh para Kongresit, por jo në Kongres dhe pas tij.

Praktikisht, ai nuk arriti të përfitonte dot nga rezultati i zgjedhjeve parlamentare, pra nuk mund t'i përjashtonte ose të merrte revansh ndaj rivalëve të vet, pasi rezultati i zgjedhjeve u konfigurua në mënyrë të tillë që ai nuk e përdorte dot kundër tyre.

Këtë po e bën me votimin në parlament. Deri në Kongres Fatos Nano ka nevojë për këtë gjuhë. Ai do të rifillojë akuzat, do të ngrejë një lum me akuza ndaj Meidanit dhe Klosit, Metës dhe Angjelit, për 14 Shtatorin, për të qenë i sigurt se do të arrijë të fitojë një KPD të re dhe një mandat të ri për kreun e PS-së në Kongres.

Pasi ta fitojë këtë, Nano nuk është e vërtetë që do t'i përjashtojë as "metistët", as "meidanistët". Biles mund t'i vlerësojë, duke i zhgënjyer luftëtarët që do të mobilizojë kundër tyre, se pas Kongresit i duhen vota në parlament dhe jo në KPD. Kështu që egërsia e djeshme e Fatos Nanos nuk është asgjë tjetër, veçse një përpjekje që kryetari i ri i Partisë Socialiste të ringjallet nga hiri i kryeministrit të djegur Fatos Nano.

Vendimi i tij i djeshëm për të qeverisur me zëvendësministra, përveçse është tërësisht antikushtetues, ka brenda mes të tjerash përpjekjen për t'ua hedhur të gjithëve: opozitës, rivalëve, Presidentit dhe shqiptarëve. Natyrisht nëse mund.