Përmbajtja:

• Presidenti Rugova tha se Dita e Falënderimit është një festë tradicionale popullore dhe familjare e Kosovës

• Gjenerali Agim Çeku u kthye sot në Prishtinë

• TMK arrestimin e Çekut e konsideron provokacion të rëndë që nuk i shërben stabilitetit dhe paqes

• Gjeneral Agim Çeku u lirua mbrëmë nga arresti dhe sot kthehet në Kosovë

• Deklaratë e Kuvendit të Kosovës

• Edhe Kuvendi i Kosovës reagon ashpër ndaj arrestimit të Agim Çekut, pritet të miratohet një Senatorët e të dy partive në Kongresin amerikan kërkojnë vazhdimin e privatizimit në Kosovë

• Mbrëmë në Prishtinë u zhvillua një protestë në shenjë revolte për shkak të arrestimit të Agim Çekut

• Zyra e Presidentit të Kosovës ka dënuar ashpër ndalimin nga autoritetet sllovene të gjeneral Agim Çekut

• Kuvendi i Shqipërsië hodhi poshtë dekretet e presidentit për emërimin e dy ministrave të rinj

• Shpresa nga konferenca e donatorëve për Irakun

• Bush falenderon aleatët

• Përfaqësuesit e vendeve të Ballkanit diskutojnë për gjendjen e trafikut njerëzor në rajon

• Në një aksident hekurudhor në Indi kanë humbur jetën 7 vetë dhe janë lënduar 35 të tjerë

• Koreja e Veriut është akuzuar për vrasjen e foshnjeve të grave të riatdhesuara dhunshëm nga Kina

• Kombet e Bashkuara janë laureatë të çmimit Saharov

• Ramsfeld thotë se lufta kundër terrorizmit ndërkombëtar është shumë më e vështirë se sa mendohet

• Në Nikaragua përleshje të ashpra mes policisë dhe studentëve

Presidenti Rugova tha se Dita e Falënderimit është një festë tradicionale popullore dhe familjare e Kosovës

 

Prishtinë, 23 tetor 2003 - Sot në mjediset e hotelit "Grand" në Prishtinë u organizua ceremonia e festës tradicionale kosovare, e Ditës së Falenderimti - Darka e Lamës, e cila është organizuar nën patronatin e Presidentit të Kosovës Ibrahim Rugova.   Në këtë manifestim ishin të pranishëm edhe kryeparlamentari Nexhat Daci, ZV.kryeadministratori Çarlls Brajshou, përfaqësues të KFOR-it, përfaqësues të zyrave diplomatike në Prishtinë, deputetë dhe ministra si dhe mysafirë nga komunat e Kosovës. Presidenti Rugova, duke folur në këtë manifestim, tha se Festa e Ditës së Falënderimit - Darka e Lamës është një festë tradicionale popullore dhe familjare e Kosovës dhe në viset e tjera shqiptare.

 

Duke folur për traditën e festës së Darkës së Lamës, Presidenti tha se ajo është shumë e vjetër. Madje edhe autorët antikë e kanë shënuar që nga shekulli V para Krishtit si festë e vitit tek ilirët, të parët e shqiptarëve që është festuar rreth 23 tetor 2003it. Autorëve antikë ia ka tërhequr vëmendjen kjo fesët e rëndësishme e kulturës shqiptare, tha ai.

Presidenti Rugova tha se kjo festë nëpër shekuj është ruajtur deri në ditë tona. "Populli ynë ka shumë festa të vitit, që lidhen me solsticin, si shumë popuj të tjerë, që përmbyllen, me Darkën e Lamës, që është më e njohura në Kosovë", theksoi ai, duke shtuar se vitin e kaluar e ka shpallur festë tradicionale shtetërore të Kosovës, e cila do të festohet në çdo familje në Kosovë.

"Në këtë ditë kemi menduar si të parët tanë, t'i bëjmë falenderim Zotit për të mirat që na i ka falur brenda një viti dhe t'i lutemi Atij që në vitin tjetër, në motin tjetër të na falë, të na dhurojë më shumë të mira" vlerësoi Presidenti Rugova deh shtoi se "kjo Ditë Falënderimi na obligon dhe na përkujton se duhet t'i shtojmë prodhimet tona të tokës".

 

"Po ashtu na obligon që prodhimet e tokës së Kosovës t'i përpunojmë, t'i bëjmë më cilësore për të gjithë qytetarët tanë dhe për eksport për kombet e tjera. Dhe në këtë ditë ne i lutemi Zotit për këtë". Njëherit paralajmëroi se që nga viti i ardhshëm për ditën e kësaj feste nuk do të punohet dhe do të jetë ditë që i kushtohet falenderimit.

"Shpresoj se kjo festë do të pasurohet me forma të ndryshme të manifestimit në të ardhmen", tha Presidenti Rugova, duke i ftuar të pranishmit që të kënaqen me tryezën e shtruar e me prodhime kosovare tradicionale.
"Zoti e bekoftë e Kosovën dhe të mirat e saj", tha në fund të fjalës së tij Presidenti i Kosovës Ibrahim Rugova, duke folur në këtë Ditë Falenderimi, në Darkën e Lamës.

 

 

Gjenerali Agim Çeku u kthye sot në Prishtinë

 

Prishtinë, 23 tetor 2003 - Pikërisht në orën 15.00 në aeroportin e Prishtinës mbërriti komandanti i TMK-së gjenerali Agim Çeku, i cili dje është ndaluar për 12 orë nga policia sllovene për shkak të një fletarresti nga Beogradi. Gjeneral Çekun në aeroportin e pritën shumë eprorë të lartë të TMK-së dhe qytetarë të Kosovës.

Në një deklaratë para mediave gjenerali Çeku tha se nuk është brengosëse se Serbia ka ngritur akuza ndaj tij dhe ndaj shumë qyetarëve të tjerë të Kosovës, por brengosëse është sesi se si Interpoli i përfill ato fletarreste, dhe sesi bashkësia ndërkombëtare e njeh legjitimetin e Serbisë mbi qytetarët e Kosovës.

 

Çeku shprehu revoltën e tij edhe për shkak se policia dhe administrata e e UNMIK-ut nuk i kanë njoftuar personalitet e Kosovës se mund të kenë probleme gjatë udhëtimeve jashtë Kosovës dhe nuk kanë bërë përpjekje që ato akuza të bëhen të pavlefshme për qytetërt e Kosovës.

Interpoli duhet ta dijë, tha ai, se kompetente për ndonjë akuzë janë institucionet ndërkombëtare dhe jo Serbia. Çeku paoshtu shprehu revoltën sesi Sllovenia i përfill akuzat e Serbisë ndaj shqiptarëve, kur dihet se edhe ajo ka qenë e goditur nga një regjim si i Millosheviqit.

Çeku tha se arrestimi i tij është i paarsyeshëm, sepse nuk ka bërë kurrfarë shkelje të ligjit të Sllovenisë, as ndonjë shkelje të ligjit ndërkomëbtar. Sllovenia duhet ta dijë, tha Çeku, se Serbia nuk ka kurrfarë kompetenca në Kosovë.

Gjithashtu Çeku tha se në Kosovë është zhvilluar luftë çlirimtare dhe nuk ka asnjë arsye që ndonjë psejëtar i UÇK-së të përgjigjet për veprat e veta. Tërë bota e di, tha ai, se UÇK-ja nuk ka bërë asnjë krim lufte dhe dihet se kush ka bërë krime lufte, nënvizoi Çeku.

Çeku tha se qytetarët e Kosovës jashtë nuk janë të mbrojtur, madje as përfaqësuesit e institucineve nuk gëzojnë asnjë imunitet jashtë Kosovës.

 

 

TMK arrestimin e Çekut e konsideron provokacion të rëndë që nuk i shërben stabilitetit dhe paqes

 

Prishtinë, 23 tetor 2003 - Shtabi i Përgjithshëm i Trupave Mbrojtëse të Kosovës në një komunikate të lëshuar sot pas lirimit nga arresti të komandantit të TMK-së gjeneral Agim Cekut thotë se arrestimi i gjeneral Çekut ishte një provokacion i rëndë për TMK-në, gjë të cilën autoritetet shtetërore sllovene nuk është dashur ta bëjnë, sepse si të tilla ato nuk i shërbejnë stabilitetit dhe paqes në rajon.

Njëherit TMK falenderon të gjitha institucionet vendore dhe ndërkombëtare për angazhimin serioz të tyre për lirimin e gjeneral Çekut. Në veçanti falenderon kryeadministratorin Hari Holkeri si dhe gjithë qytetarët e Kosovës të cilët në forma të ndryshme shprehën revolten dhe reagimin e vet për këtë provokim skandaloz.

 

 

Gjeneral Agim Çeku u lirua mbrëmë nga arresti dhe sot kthehet në Kosovë

 

Lubjanë/Prishtinë, 23 tetor 2003 - Mbrëmë diçka rreth orës 1.15 pas mesnatës është liruar nga arresti komandanti i Trupave Mbrojtëse të Kosovës (TMK), gjenerali Agim Çeku, vetëm 12 orë pasi autoritetet sllovene e ndaluan në bazë të një fletarresti ndërkombëtar të lëshuar nga Serbia.

Gjenerali Çeku menjëherë pas lirimit deklaroi se UNMIK-u dhe institucionet e Kosovës duhet të nxjerrin ligje për të mbrojtur ish-luftëtarët e UÇK-së nga aktakuzat e gjykatave serbe. Agim Çeku sot do të kthehet në Kosovë.

Gjenerali Çeku është liruar pas shumë përpjekjesh të autoriteteve më të larta ndërkombëtare dhe pas ndërhyrjes së tyre tek autoritetet sllovene.

Shefi UNMIK-ut Hari Holkeri përmes një letre dërguar të mërkurën në mbrëmje ministrit të Jashtëm slloven Rupel ka kërkuar lirimin urgjent të gjeneralit Çeku.

Holkeri u ka thënë autoriteteve sllovene se çështja e gjeneralit kosovar ishte nën juridiksionin e tij dhe se urdhërarresti i lëshuar nga autoritetet e Beogradit ishte i pavlefshëm.

Policia sllovene thotë se ka vepruar mbi bazën e një urdhërarresti të Serbisë, e cila e akuzon Çekun për "gjenocid" ndaj serbëve gjatë konfliktit në Kosovë.

 

 

Deklaratë e Kuvendit të Kosovës

 

Prishtinë, 23 tetor 2003 - Kuvendi i Kosovës miratoi sot një Deklaratë, në të cilën thuhet:

Kuvendi i Kosovës i shqetësuar për arrestimin e Komandantit të TMK-së, gjenerallejtnant, Agim Çekut, si dhe për arrestimet e mëparshme të përfaqësuesve të institucioneve të Kosovës e të qytetarëve të saj,

Duke kundërshtuar funksionimin e organeve paralele serbe në Kosovë e në Serbi, të emërtuara si gjykata të Kosovës,

Miraton këtë: Deklaratë

1. Kuvendi i Kosovës i konsideron të pavlefshme të gjitha fletarrestet, vendimet gjyqësore dhe ekzekutimet e këtyre vendimeve që bëhen nga institucionet e Serbisë dhe nga organet gjyqësore paralele serbe të cilat funksionojnë në territorin e Kosovës e të Serbisë dhe kanë të bëjnë me qytetarët e Kosovës.

2. Kuvendi kërkon nga institucionet ndërkombëtare në Kosovë dhe jashtë saj, duke përfshirë Interpolin dhe Europlin, që të mos i njohin këto vendime dhe fletarreste serbe kundër qytetarëve të Kosovës, sepse Kosova është nën jurisdiksionin e OKB-së dhe i ka institucionet e veta demokratike.

3. Kuvendi kërkon nga PSSP, Hari Holkeri, që të ndërmarrë veprime urgjente për zhbërjen e institucioneve paralele në Kosovë.

4. Kuvendi proteston ndaj veprimit të organeve shtetërore të Sllovenisë, lidhur me arrestimin e djeshëm të komandantit të TMK-së, gjeneral-lejtnant, Agim Çeku.

 

 

Edhe Kuvendi i Kosovës reagon ashpër ndaj arrestimit të Agim Çekut, pritet të miratohet një deklaratë

 

Prishtinë, 23 tetor 2003 - Në fillim të seancës së sotme të rregullt të Kuvendit të Kosovës, kryeparlamentari Nexhat Daci dha një deklaratë lidhur me arrestimin e djeshëm të komandangin të TMK-së agim Çeku në Lubjanë.

Daci në fillim tha se rasti arrestimit të Agim Çekut ishte "pikë e ujit në gotën e mbushur dhe e cila jo vetëm që është derdhur e tërë sasia e ujit, por tashmë është thyer edhe gota", u shpreh ai.

Daci theksoi se në vazhdimësi po krijohet një destabilitet i shtuar politik në Kosovë, pa dëshirën dhe pa pjesëmarrjen e kosovarëve.

 

"Me fletarrest të një gjykate inekzistente, të një pushteti inekzistent në Kosovë u ndal dhe u arrestua një pris i një prej institucioneve më vitale në Kosovë dhe kjo ishte hera e dytë që udhëheqësit e Kosovës të poshtërohen", por edhe "Kosova, e kaluara a saj, e tashmja dhe e ardhmja e Kosovës".

Daci u shpreh se "është mirë që brenda bashkësisë ndërkombëtare ka njerëz shumë të përgjegjshëm dhe mirënjohjet tona i shkojë të gjithë atyre që u munduan të ndikojnë pizitivisht". Ai në veçanti lavdëroi i shkon shefin e UNMIK-ut Hari Holkerin për qëndrimin e të vendosur dhe frytdhënës në rastin Çeku.

Daci pyeti se çkatë bëbet më tutje, ai tha se përgjegjësitë e marra para elektoratit janë shumëfishuar dhe kërkoi sjellje konform atyre përgjegjësive.

Daci tha se shpesh ka kërkuar nga bashkësia ndërkombstare që udhehëqësit e Kosovës të kenë dokumente udhëtimi, me të cilin mbrohet dinjiteti i tyre dhe i institucioneve të Kosovës, por nuk ishte gjetur zgjidhje.

 

Andaj, tha ai, tani arsyet janë shumë të fuqishme të kërkohen dikumente udhëtimi diplomatike për të gjitha ata që i prijnë proceseve demokratike, u shpreh kryeparlamentari Daci.

Deputeti i LDK-së Sabri Hamiti tha se sot është hapur një temë e dhembsshme që ka të bëjë me raportet e Kosovës me jashtë, me sjelljet ndaj njerëzve tanë, në këtë rast ndaj përfaqësuesve. Ai tha se duhet ditur se sesa është e egër kjo sjellje, kur merr karakterin e personave përfaqësues.

 

Andaj, tha ai duhet të reagojë Kuvendi si një organ përgjegjës, edhe para zgjedhësve të vet, edhe para përfaqësimit politik të Kosovës.

Sabri Hamiti tha se Kuvendi duhet të kërkojë shfuqizimin e të gjitha akteve që i ndërmerr Serbia ndaj qytetarëve të Kosovës dhe ky shfuqizim në formë të artikolohet me shkrim dhe t'u dërgohet qeverive evropiane, Interpolit dhe Europolit. Ai tha se ky do të ishte verpimi më i fortë institucional se të bisedohet për rastet që ndodhin dhe për komentimin e tyre.

Bujar Dugolli nga AAK-ja kërkoi që Kuvend të reagojë në mënyrë institucionale, dhe Qeveria e Kosoëvs t'i dërgojë një notë proteste qeverisë së Sllovenisë dhe dhe asaj të Beogradit që t'i shuajë institucionet paralele, të cilat, si u shpreh, janë institucione kriminale, të trashëguara që nga periudha e Millosheviqit.

 

Kuvendi i Kosovës të reagojë zyrtarisht me një deklaratë dhe qeveria të reagojë me nota proteste, tha Dugolli.

Deputeti Berat Luzha nga radhët e PDK_së, rastin me Agim Çekun i quajti provokime të vazhdueshme të Serbisë dhe tani të Sllovenisë.

 

Ai propozoi të bëhet një deklaratë zyrtare drejtuar organeve të Sllovenisë dhe të kërkohet nga Holkeri të ndërmarrë masa të ashpra kundër institucioneve paralele të shtetit të Serbisë në Kosovë.

Rangjel Nojkiq nga koalcioni serb "Kthimi" tha se distanohet nga fjalimi i kryeparlamentarit Daci, sepse siç tha ai, nuk flet në emër të të të gjithë deputetëve por vetëm në emër të një shumice, mu sikur në takmin e Vjenës. Ai tha që bashkësia ndërkombëtare të japë gjykime e jo Daci.

Daci, duke replikuar me Nojkiqin, tha se ai (Nojkiqi)nuk i kupton proceset demokratike dhe Çeku nuk është ndaluar nga gjykata ndërkombëtare.

Kuvendi vendosi që të të dalë me një dukumentar zyrtar, i cili do të hartohet ndërkohë gjatë një pushimi.

 

 

Senatorët e të dy partive në Kongresin amerikan kërkojnë vazhdimin e privatizimit në Kosovë

 

Uashington, 23 tetor 2003 – Senatorët Eliot L. Engël, bashkëkryetar i Komisionit të Kongresit amerikan për çështje shqiptare ka njoftuar sot se dhjetë senatorë amerikanë iu kanë drejtuar me një letër Nikolas Lambsdorfit, ndihmës i Përfaqësuesit special të Sekretarit të përgjithshëm, Kofi Anan, për Kosovën, me qëllim të nxitjes për të anuluar ngrirjen e privatizimit në Kosovë.

Në këtë letër dërguar z. Lambsdorf, dhjetë ligjvënësit amerikanë kanë thënë se janë të shqetësuar nga vendimi juaj për të ngrirë përpjekjet për privatizimin e mëtejshëm në Kosovë për shkak të kërcënimeve të aksioneve ligjore të Serbisë e Malit të Zi dhe kanë kërkuar që ky vendim të anulohet menjëherë.

 

Ligjvënësit amerikanë i kanë shprehur gjithashtu shqetësimin z. Lambsdorf se “aksioni serb dhe përgjigjja juaj e shpëjtë kanë ndodhur pak para fillimit të bisedimeve në Vienë ndërmjet Kosovës dhe Serbisë e Malit të Zi.

Këtë letër, të hartuar nga Eliot Engël, e kanë nënshkruar edhe anëtarët e Kongresit të dy patrtive: Sju Kelli, Mark Kirk, Xhosef Krouli, Edolfus Tauns, Kristofer Smith, Antoni Uejner, Xhose Serano, Piter King dhe Erl Pomeroj.

 

 

Mbrëmë në Prishtinë u zhvillua një protestë në shenjë revolte për shkak të arrestimit të Agim Çekut

 

Prishtinë, 23 tetor 2003 - Në shenjë revolte për shkak të arrestimit të gjeneral Agim Çekut në Slloveni, mbrëmë gjatë natës disa mijëra qytetarë të Prishtinës u grumbulluan në sheshin kryesor të qytetit, para Teatrit Kombëtar, për të kërkuar lirimin e gjeneralit Çeku.

Protestuesit, shumica e të cilëve ishin të rinj, dogjën flamurin slloven dhe shkatërruan disa prodhime sllovene, të cilat shiten shumë në Kosovë.

Masa e tubuar u shpërnda pas njoftimit se Agim Çeku është liruar.

Ndryshe gjatë ditës së djeshme kanë pasur reagime të ashpra ndaj arrestimit të komandantit të TMK-së nga policia sllovene - nga Presidenca e Kosovës, Qeveria, UNMIK-u, TMK-ja partitë politike dhe qytetarët e Kosovës.

 

Të gjithë kanë vlerësuar se arrestimet e qytetarëve të Kosovës në bazë të fletarresteve serbe janë të papranueshme.¨

 

 

Zyra e Presidentit të Kosovës ka dënuar ashpër ndalimin nga autoritetet sllovene të gjeneral Agim Çekut

 

Prishtinë, 23 tetor 2003 - Muhamet Hamiti, zëdhënës i Presidentit të Kosovës Ibrahim Rugova, e ka dënuar sot ashpër ndalimin nga autoritetet sllovene të gjeneral Agim Çekut, komandant i përgjithshëm i Trupave Mbrojtëse të Kosovës (TMK). Në deklaratë thuhet:

Ndalimi i gjeneral Çekut është akt i papranueshëm për institucionet dhe popullin e Kosovës. Autoritetet sllovene nuk kanë të drejtë që mbi baza të akuzave të konstruktuara të një shtetit fqi të Kosovës të ndalojnë personalitete të shquara apo qytetarë të Kosovës.

Për popullin e Kosovës fletarrestet e Beogradit janë të papranueshme. Prandaj, kërkojmë nga autoritetet sllovene që të lirojnë menjëherë gjeneral Agim Çekun dhe ta trajtojnë atë në pajtim me personalitetin e tij dhe postin që ai mban në Trupat e Mbrojtjes së Kosovës, thuhej në një deklaratë të lëshuar dje pasdite fill pas marrjes së lajmit të ndalimit të komanadantit të TMK-së në Slloveni.

 

 

Kuvendi i Shqipërsië hodhi poshtë dekretet e presidentit për emërimin e dy ministrave të rinj

 

Tiranë, 23 tetor 2003 - Kuvendi i Shqipërsië hodhi poshtë sot dekretet e presidentit Alfred Moisiu për emërimin e dy ministrave të rinj të kabinetit qeveritar, Namik Dokle e Fatmir Xhafa. Kështu, Kuvendi nuk ka miratuar kandidaturën e Namik Dokles për ministër të Jashtëm dhe atë të Fatmir Xhafës për ministër të Rendit.

Gjatë një votimi në Kuvend, Dole mori vetëm 64 vota nga 66 sa i duheshin për t'u emëruar ministër i jashtëm.

 

Ndërkaq, për Xhafën vetëm 65 deputetë votuan pro.

Gjitha Kuvendi miratoi dekretin për shkarkimin e ministrit të gjertanishëm të Rendit, Luan Rama.
Përkrahësit i Ilir Metës nuk votuan kundër, por abstenuan nga votimi. Në këtë mënyrë qeveria e Fatos Nanos pësoi edhe një debakël brenda tre muajve.

Ndërkohë, lideri i opozitës Sali Berisha kërkoi nga Nano të japë dorëheqje.

 

 

Shpresa nga konferenca e donatorëve për Irakun

 

Madrid, 23 tetor 2003 - Në Madrid të Spanjës është mbledhur një konferencë donatorësh për Irakun, përpjekja më e fundit për të mbledhur fonde për rindërtimin e infrastrukturës së shkatërruar të vendit.

Shtetet e Bashkuara janë përpjekur të bindin vendet donatore për të premtuar fonde të konsiderueshme ndihme, përveç 20 miliardë dollarëve që ka ndarë mënjëanë vetë Uashingtoni.

Vendet e pasura me naftë të Gjirit ende nuk kanë bërë ndonjë premtim për ndihma, kurse vendet që kundërshtuan luftën në Irak, si Franca dhe Gjermania, kanë hezituar të ofrojnë fonde të tjera.

Vendet e Bashkimit Evropian kanë premtuar deri tani rreth një miliard dollarë, dhe pjesa kryesore e fondit vjen nga Britania, rreth gjysmë miliardi dollarë, e Spanja, rreth 200 milion dollarë.

 

 

Bush falenderon aleatët

 

Melburn, 23 tetor 2003 - Presidenti amerikan, Xhorxh Bush tha se Amerika dhe Australia ndajnë një "përgjegjësi të veçantë" për ruajtjen e paqes në rajonin e Paqësorit.

Në një fjalim të mbajtur para parlamentit australian në Kanberra të enjten, Presidenti Bush ka përsëritur qëndrimin se Amerika, Australia dhe vende të tjera nuk munden ta lënë në mes luftën e tyre kundër terrorizmit.

Ai tha se Shtetet e Bashkuara dhe aleatët e saj, ndërhynë në Irak për të larguar rrezikun në rritje që vjen prej akteve terroriste.

Z. Bush falenderoi forcat australiane që morrën pjesë në luftë në Afganistan dhe Irak përkrah trupave amerikane.

 

 

Përfaqësuesit e vendeve të Ballkanit diskutojnë për gjendjen e trafikut njerëzor në rajon

 

Uashington, 23 tetor 2003 - Përfaqësues nga vendet e Evropës Juglindore thonë se zbatimi i i kuadrit ligjor, bashkëpunimi mes tyre, dhe trysnia ndërkombëtare mund të ndihmojnë për ta bërë më efektive luftën ndaj trafikut njerëzor.

 

Ata morën pjesë në një takim të organizatës "Protection Project në Washington", e cila merret me studime lidhur me trafikun njerëzor në botë.

Organizatori i takimit, drejtori i organizatës Protection Project, Mohamed Mattar, ashtu edhe zyrtarët e ambasadave të vendeve të Ballkanit, vlerësoi ligjet e miratuara në këto vende për të luftuar trafikun njerëzor.

 

Ai përmendi si shembuj ligjet e Rumanisë, Maqedonisë, Kroacinë, si dhe rregulloren e OKB-së për Kosovën, të cilën ai e mori si shembull: “Seksioni 8 i rregullores së Kosovës flet për një parim shumë të rëndësishëm në lidhje me trafikun dhe ky është moskriminalizimi i personit të trafikuar.

 

Domethënë nëse dikush që ushtron prostitucionin, është viktimë e trafikut, nuk duhet ndëshkuar ajo, por ai që e ka trafikuar”, tha ai.

 

 

Në një aksident hekurudhor në Indi kanë humbur jetën 7 vetë dhe janë lënduar 35 të tjerë

 

Bangalore, Indi, 23 tetor 2003 – Shtatë vetë kanë vdekur dhe 35 të tjerë janë lënduar kur një tren udhëtarësh ka dalë sot (e enjte) nga binarët në Indinë jugore, ka bërë të ditur zëdhënësi i hekurudhave indiane, njofton rrrjeti televiziv i CNN-it.

 

Aksidenti ka ndodhur në orët e hershme të mengjesit në fshatin Naganahalli, afër kryeqytetit Bangalore të shtetit Karnataka të Indisë. Katër vagona janë rrotulluar sapo kanë dalë nga binarët. Të lënduarit janë dërguar në spitalet vendore.

 

 

Koreja e Veriut është akuzuar për vrasjen e foshnjeve të grave të riatdhesuara dhunshëm nga Kina

 

Phenian, 23 tetor 2003 – Koreja e Veriut është akuzuar për vrasjen e foshnjeve të grave, që janë riatdhesuar dhunshëm nga Kina, njofton BBCnews. Komiteti për të drejta të njeriut (CHRNK) në Korenë e Veriut ka thënë se këto gra janë mbajtur në kampet e ndalimit, ku kanë abortuar ose foshnjet e tyre janë vrarë gjatë lindjes.

 

Ndërmjet 200 mijë dhe 300 mijë verikoreanë besohet të kenë kaluar në Kinë në vitet 1990-ta kur ishte një krizë e madhe në vend. Regjimi stalinist rregullisht mohon asbuzimin e të drejtave të të burgosurve dhe natyrisht se mohon njoftimet të ekzistojë edhe burg-kampi i përshkruar.

 

Kina ka një marrëveshje me aleatën e vet për të kthyer prapa të arratisurit. Kjo nuk është hera e parë që kjo organizatë humanitare akuzon Korenë për keqtrajtim të të burgosurve, por kësaj herë ka shumë dëshmi të gjalla nga ish të bugosurit e këtyre kampeve.

 

 

Kombet e Bashkuara janë laureatë të çmimit Saharov

 

Strasburg, 23 tetor 2003 - Kombet e Bashkuara janë këtë vit laureatë të çmimit Saharov të Parlamentit Evropian për të drejtat e njeriut. Krahas Sekretarit të përgjithshëm të Kombeve të Bashkuara Kofi Anan nderohet me këtë çmim edhe i ngarkuari i Kombeve të Bashkuara, Serzho Viera de Mello i cili humbi jetën, pas një shpërthimi në Bagdad.

 

Këtë e bëri të ditur Parlamenti Evropian në Strasburg. Ky lloj nderimi është edhe një përkujtim ndaj gjithë atyre punonjësve të OKB-së që humbën jetën në Irak, në emër të paqes.

 

 

Ramsfeld thotë se lufta kundër terrorizmit ndërkombëtar është shumë më e vështirë se sa mendohet

 

Uashington, 23 tetor 2003 - Ministri amerikan i Mbrojtjes Donald Ramsfeld është shprehur se lufta kundër terrorizmit ndërkombëtar është shumë më e vështirë se sa mendohet. ShBA-të kanë një rrugë të gjatë dhe të veshtirë përpara, thuhet në një qarkore dërguar autoriteteve të larta të Pentagonit.

 

Edhe në Irak si në Afganistan kërkohet një presencë ushtarake shumë e gjatë dhe lufta kundër terrorit është lojë ekstreme me financat.

 

 

Në Nikaragua përleshje të ashpra mes policisë dhe studentëve

 

Managua, 23 tetor 2003 - Në Nikaragua janë zhvilluar përleshje të ashpra mes policisë dhe studentëve demonstrues. Sipas korrespondetëve studentët dolën në rrugë me kërkesën për më shumë mbështetje shtetërore universiteteve. Pas bllokimit nga ana e tyre të një aksi të rëndësishëm rrugor policia vuri në përdorim gazin lotsjellës. Flitet për disa të plagosur.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |