Përmbajtja:

• Presidenti Rugova ngushëlloi Kryesinë e B e H dhe familjen Izetbegoviq

• Presidenti Rugova lumturimin e Nënës Tereze e vlerësoi si ditë historike për shqiptarët dhe botën

• Agim Çeku është ndaluar sot në Lubjanë nga policia sllovene, por shpreson të lirohet së shpejti

• Ministri britanik Mekshejn ka shprehur zhgënjimin për mosprezencën e kryeminsitrit Rexhepi në takimin e Vjenës

• Solana 24 tetor viziton Prishtinën

• Në Kosovë nuk ka vend për kurrfarë forcash të Serbisë dhe Malit të Zi, thotë zyrtari i KFOR-it

• Trupi i pajetë i Hevzi Nexhib Kryeziut ndodhet në morgun e Osiekut në Kroaci

• Hartman thotë se nuk ekziston kurrfarë "marrëveshje xhentëlmene" nuk ekziston ndërmjet Tribunalit dhe Beogradit

• Kreu i ushtrisë sebo-malazeze mohon se është diskutuar për dërgimin e forcave në Kosovë

• OKB: Autoritetet e Serbisë të formojnë një komision i cili do të bënte hetime penale të varrezave masive në Serbi

• PVD thërret një takim për t'i dhënë fund moratoriumit të PSSH-së dhe LPD-së në Preshevë

• Deputetët "rebelë" kundër ministrave

• Forcat izraelite kanë vrarë dje në incidente të ndara katër palestinezë, dhe kanë keqtrajtuar disa gazetarë

• Shtatë vetë janë vrarë dhe dhjetëra të tjerë janë plagosur me armë zjarri në një dasmë në Kashmir

• Një bombë tokësore ka shpërthyuer në Bagdad dhe ka plagosur lehtë 2 ushtarë amerikanë

• Së shpejti do të anulohet detyrimi për vizë të Shengenit për shtetasit e vendeve të treta në Zvicër

• Në Abixhan të Bregut të Fildishtë, është vrarë gazetari francez i RFI-së, Zhan Helen

• Presidenti Bush bën sot një vizitë simbolike në ishullin Bali

• Irani dakort për inspektime të befasishme në objektet e tij bërthamore

• Pengesa drejt paqes në Irlandën e Veriut

• Asambleja e OKB-së voton kundër barriers

Presidenti Rugova ngushëlloi Kryesinë e B e H dhe familjen Izetbegoviq

 

Prishtinë, 22 tetor 2003 - Presidenti i Kosovës Ibrahim Rugova u ka dërguar sot një telegram ngushëllimi Kryesisë së Bosnjës e Hercegovinës dhe Familjes Izetbegoviq me rastin e vdekjes së Alija Izetbegoviqit, ish-President i B e H-së. Në ngushëllimet e Presidentit Rugova thuhet:

"Me rastin e vdekjes së Alija Izetbegoviqit, ish-President i Bosnjës dhe Hercegovinës, Ju shpreh ngushëllimet e mia të thella dhe të popullit të Kosovës.

Izetbegoviqi do të mbetet në kujtimin tonë si udhëheqës i denjë i popullit të vet, që punoi për pavarësinë e B e H dhe për mirëkuptimin e njerëzve.

Ne i jemi mirënjohës për qëndrimin pozitiv për lirinë dhe pavarësinë e Kosovës në momentet më të vështira", thuhet në fund të telegramit të ngushëllimit të Presidentit Rugova.

 

 

Presidenti Rugova lumturimin e Nënës Tereze e vlerësoi si ditë historike për shqiptarët dhe botën

 

Prishtinë, 22 tetor 2003 - Presidenti i Kosovës Ibrahim Rugova, pas kthimit nga Italia, ku mori pjesë në ceremonitë e lumturimit të Nënës Tereze, e vlerësoi këtë akt si ditë historike për Kosovën dhe popullin shqiptar.

 

"Po kthehem nga Roma, ku ishim në ditën e beatifikimit të Nënës Tereze, që është një ditë e madhe për Kosovën, për popullin shqiptar.

 

Mund të themi se është një ditë historike dhe një ditë e madhe për gjithë botën, sepse ajo është Nënë shqiptare dhe poashtu Nënë e gjithë botës", theksoi Presidenti Rugova në një deklaratë të shkurtër para mediave në aeroportin e Prishtinës.

Gjithashtu Presidentti Rugova shprehu kënaqësinë që në ceremoninë e lumturimit të Nënës Tereze morën pjesë me mijëra shqiptarë nga Kosova, viset shqiptare dhe nga bota.

 

Me këtë rast, ai falenderoi Papa Gjon Pali II për lumturimin e Nënës Tereze dhe organizimin e kësaj ceremonie madhështore që hapi rrugën për shenjtërimin e Nënës Tereze.

 

 

Agim Çeku është ndaluar sot në Lubjanë nga policia sllovene, por shpreson të lirohet së shpejti

 

Lubjanë, 22 tetor 2003 - Policia sllovene sot ka ndaluar në aeroportin Bërnik të Lubjanës në Slloveni komandantin e TMK-së Agim Çeku, kanë konfirmuar burimet policore sllovene. Ndërkohë në Prishtinë ndalimin e komandantit të TMK-së e ka konfirmuar edhe koordiantori i KFOR-i me TMK-në Endrju Kaming, siç thuhet për shkak të një fletarrestimi të Interpolit. Këtë fletarrestim e kanë lëshuar autoritetet e Beogradit.

Këtë e ka konfirmuar edhe vetë gjeneral Agim Çeku në një bisedë telefonike për mediat e Kosovës, i cili tha se shpreson të lirohet shpejt.

Çeku ka thënë se ishte duke kaluar transit nëpër Slloveni për t'u kthyer në Kosova nga një vizitë familjes së tij në Kroaci. Edhe Çeku pohoi se është ndaluar për shkak të një fletarrestimi të Beogradit.

 

 

Ministri britanik Mekshejn ka shprehur zhgënjimin për mosprezencën e kryeminsitrit Rexhepi në takimin e Vjenës

 

Londër, 22 tetor 2003 - Kryeministri i Kosovës Bajram Rexhepi, i cili po qëndron në vizitë zyrtare në Londër, është takuat me udhëheqësit e lartë të DFID-it, institucion ky britanik që ka ndihmuar në realizimin e projekteve zhvillimore pas luftës në Kosovë. Takimi i paralajmëruar me ministrin e Punëve të Jashtme, z. Xhek Strou është anuluar për shkak të vizitës së tij në Teheran.

Kryeministri Rexhepi është takuar edhe me ministrin e Shtetit për Evropë, Denis Mekshejn. Në një njoftim të Zyrës britanike në Prishtinë për këtë takim thuhet se ministri britanik për çështje evropiane ka vlerësuar takimin si konstruktiv, dhe se është inkurajuar nga përkushtimi i Kryeminsitrit për një Kosovë demokratike dhe multietnike.

 

Mirëpo, Ministri britanik ka shprehur zhgënjimin për mosprezencën e Kryeminsitrit në takimin e Vjenës. Por, ai ka ikurajuar kryeministrin Rexhepi që të çojë përpara grupet punuese, si pjesë vitale për suksesin e këtij dialogu.

 

Njëherit, ministri britanik për çështjen evropiane Mekshejn ka kuptuar seriozisht mëdyshjet rreth korrupsionit në kuadër të UNMIK-ut, duke thënë se është e rëndësishme që komuniteti ndërkombëtar të hulumtojë këtë dhe, nëse dëshmohen si akuza të vërteta, të sjell para gjykatës ata që janë përgjegjës.

 

 

Solana 24 tetor viziton Prishtinën

 

Bruksel, 22 tetor 2003 - Shefi i diplomacisë së Bashkimit Evropian, Havier Solana do të vizitojë më 23 e 24 tetor Beogradin dhe Prishtinëb, njoftoi sot Zyra e përfaqësuesit të lartë për politikë të jashtme dhe siguri në Bruksel.

Vizita synon zhvillimin e marrëdhënieve të BE-së dhe vendeve të Ballkanit në të gjitha fushat, zhvillimin e politikës së brendshme të vendeve të rajonit dhe fillimin e paradokohshëm të dialogut ndërmjet Beogradit dhe Prishtinës.

Solana në Beograd do të takohet me presidentin serbo-malazez Svetozar Maroviq dhe me zv.kryeministrin serb Nebojsha Çoviq, por edhe me kryeministrin serb Zhivkoviq dhe atë malazez Gjukanoviq.

Një ditë më vonë, më 24 tetor, Solana do të qëndrojë në Prishtinë ku do të bisedojë me presidfntin e Kosovës Ibrahim Rugova, me kryeministrin Bajram Rexhepi dhe me kryeparlamentarin Nexhat Daci.

Gjithashtu janë paraparë edhe bisedime me shefin e UNMIK-ut Hari Holkeri, me komandantin e KFOR-it, gjeneralin Holger Kamerof, si dhe me përfaqësuesist politikë shqiptarë dhe serbë, thuhet në një njoftim të Zyrës së Havier Solanës në Bruksel.

 

 

Në Turqi shkojnë 15 pacientë nga Kosova

 

Prishtinë, 22 tetor 2003 - Sot nga Aeroporti i Prishtinës do të nisën për shërim në Turqi 15 pacientë nga Kosova. Pjesa dërmuese e këtyre pacientëve lëngojnë nga sëmundjet e zemrës. Kjo nismë është vazhdim i marrëveshjes me Ministrinë e Shëndetësisë së Turqisë që të trajtojë pacientët tanë.

 

 

Në Kosovë nuk ka vend për kurrfarë forcash të Serbisë dhe Malit të Zi, thotë zyrtari i KFOR-it

 

Prishtinë, 22 tetor 2003 - Siguria ushtarake e Kosovës garantohet nga forcat paqëruajtëse të NATO-s dhe këtu nuk ka vend për kurrfarë forcash të Serbisë dhe Malit të Zi, ka thënë zyrtari i KFOR-it, duke komentuar paralajmërimet nga Beogradi që lënë të hapur mundësinë e ndërhyrjes ushtarake në Kosovë.

 

"Siguria ushtarake në Kosovë bëhet nga KFOR-i dhe vetëm nga KFOR-i, ndërsa Këshilli i NATO-s e ka përsëritur disa herë se kthimi i forcave ushtarake të Serbisë dhe Malit të Zi nuk është as opcion", ka thënë zëdhënësi i KFOR-it, Kris Tomson.

 

Ai tha se KFOR-i nuk ndihet i rrezikuar nga deklarata të tilla që vijnë nga Beogradi, duke cituar Komandanti i KFOR-it gjenerali Kamerhoff se forcat ushtarake serbe nuk kanë qasje në Kosovë.

Zëdhënësi Thomson ka theksuar se fakti që nuk ka asnjë ndryshim në politikën e KFOR-it lidhur me këtë çështje edhe shqetësimet e qytetarëve të Kosovës i bën të panevojshme.

 

 

Trupi i pajetë i Hevzi Nexhib Kryeziut ndodhet në morgun e Osiekut në Kroaci

 

Prishtinë, 22 tetor 2003 - Për Hevzi Nexhib Kryeziun (1961) nga Rogana (Rogaçica), komuna e Dardanës nuk është ditur asgjë nga fillimi i vitit 1999. Sipas deklaratës së një të afërmi të Hevziut dhënë në KMDLNJ, Hevziu, në bazë të disa dëshmive, për një kohë ka qëndruar në Gjermani e pastaj në Angli.

Më 20 tetor 2003, në familjen e Hevziut, policët e SHPK-së kanë sjellë telegramin nga Zyra e Interpolit të Kroacisë në Zagreb, ku thuhet se Hevzi Kryeziu më 17 maj 2003 është deportuar nga Britania e Madhe për në Kroaci. Trupi i tij i pajetë gjendet në morgun e Spitalit të Osjekut në Kroaci që nga 2 korriku i këtij viti.

 

 

Hartman thotë se nuk ekziston kurrfarë "marrëveshje xhentëlmene" nuk ekziston ndërmjet Tribunalit dhe Beogradit

 

Uashington/Pragë, 22 tetor 2003 - Shtetet e Bashkuara u kanë bërë thirrje autoriteteve të Beogradit që të arrestojnë dhe të dorëzojnë në Hagë Ratko Mlladiqin, ish-komandantin e forcave serbe të B e H, ndërkaq Tribunali i Hagës të fillojë që disa procese gjyqësore t'ua lërë shteteve postjugosllave, ka thënë një zëdhënës i Departamentit të Shtetit, Adam Erell.

Zëdhënësi i Departamentit të Shtetit nuk konfirmoi, por as që përgënjeshtroi pohimet se zyrtarëve të Serbisë se ka ekzistuar "një marrëveshje xhentëlmene" që pas dorëzimit të Mlladiqit dhe Karaxhiqit rastet e tjera t'u lihen gjykatave të Serbisë.

Mirëpo, zëdhënësja e Tribunalit të Hagës Florans Hartman ka thënë se kurrfarë "marrëveshjeje xhentëlmene" nuk ekziston ndërmjet Tribunalit dhe autoriteteve të Beogradit në lidhje me personat e akuzuar për krim elufte.

 

Hartman i ka thënë radios "Evropa e lirë" se autoritetet e Beogradit kanë ditur për aktakuzat kundër gjeneralit të policisë Sreten Llukiq, meqenëse, siç tha, qeveria e Serbisë ka qenë e informuar qysh në muajin maj për aktakuzat të cilat u bënë publike pardje.

Atkakuzat janë bërë publike tani nga fakti se akuzat për katër gjeneralët ishin dekonspiruar nga shtypi, tha Hartman.

 

 

Kreu i ushtrisë sebo-malazeze mohon se është diskutuar për dërgimin e forcave në Kosovë

 

Beograd, 22 tetor 2003 - Shtatmadhoria e ushtrisë serbo-malazeze mohon të ketë diskutuar për dërgimin e forcave të veta në Kosovë, ka thënë të mërkurën shefi i shtatmadhorisë së këaj ushtrisë, gjenerali Branko Kërga në një bisedë telefonike me komandantin e KFOR-it, gjeneralin Holger Kameroh.

 

Kërga ka thënë se është diskutuar vetëm për funksionet e Ushtrisë së Serbisë e Malit të Zi në kuadër të zonës tokësore së sigurisë. Kërkga ka ritheksuar obligimet e Shtatmadhorisë që ia drejton në zbatimin e rezolutës 1244 të Këshillit të Sigurimit si dhe obligimin që ka të bëjë me respektimin e marrëveshjes teknike të Kumanovës.

 

 

OKB: Autoritetet e Serbisë të formojnë një komision i cili do të bënte hetime penale të varrezave masive në Serbi

 

Beograd, 22 tetor 2003 - Zyra e komesionerit të Kombeve të Bashkuara për drejtat e njeriut u ka bërë thirrje autoriteteve të Serbisë të formojnë një komision i cili do të bënte hetime penale të varrezave masive në Serbi.

 

"Zyra e komesionerit për të drejtat e njeriut bën thirrje për formimin e një komisioni të veçantë hetimor, i cili do të përbëhej nga ekspertë të pavarur dhe neutralë që t'i kryente hetimet", ka thënë Lori Vajzberg, ushtruese e detyrës së shefit të misionit të kësaj zyre.

 

Sipas mediave serbe, ajo ka vlerësuar se nga progresi i hetimeve të atyre rasteve do të kontribuonte që procedura në bazë të aktakuzave të Tribunalit të Hagës kundër gjeneraëve të ushrtrisë dhe policisë të zhvillohet para gjykatave vendore.

 

Vajzaberg ka thënë se më shumë dy vjet nga zbulimi i varrezave masive ekipi hetimor ka kryer punën në më pak se 50 % të varrezave të ekshumuara gjë që paraqet pengesë serioze në zbatimin e reformave në Serbi e Mal të Zi.

 

 

PVD thërret një takim për t'i dhënë fund moratoriumit të PSSH-së dhe LPD-së në Preshevë

 

Preshevë, 22 tetor 2003 - Kryesia e Partisë për Veprim Demokratik (PVD) me seli në Preshevë, vlerëson se vendimi i Kuvendit Komunal të Medvegjës do t'u mundësojë shqiptarëve edhe në këtë komunë të ta përdorin gjuhën e tyre në komunikimin publik por edhe në punën e organeve të vetadministrimit lokal, të ndërmarrjeve dhe enteve publike dhe të organeve shtetërore.

Zyrtarizimi i gjuhës shqipe me Statutin e Medvegjës i mundëson këshilltarëve shqiptarë nga kjo komunë të marrin pjesë në Kuvendin e elektorëve për konstituimin e Këshillit Nacional të Shqiptarëve në Luginën e Preshevës, thuhet në një komunikatë të PVD-së.

Meqë është eliminuar kjo pengesë serioze, Kryesia e PVD-së vlerëson se janë krijuar kushtet që menjëherë të fillojnë përgatitjet për formulimin e iniciativës së këshilltarëve të Kuvendit Komunal që duhet t’i drejtohet Ministrisë përkatëse për caktimin e datës dhe vendit të mabjtjes së Kuvendit të elektorëve.

Për këtë qëllim, Kryesia e PVD-së propozon që brenda javës të mbahet takimi i kryetarëve të PVD-së, PDSH-së dhe LPD-së ku do të ishin shqyrtuar përgaditjet e nevojshme që do të mundësonin realizimin e kësaj iniciative.

Në këtë takim të udhëheqësve të PVD-së, Partisë Demokratike Shqiptare (PDSH) dhe Lëvizjes së Progresit Demoktratik (LPD) do të shqyrtoheshin të gjitha mundësitë për ndërprerjen e moratoriumeve të PDSH-së dhe LPD-së dhe krijimin e kushteve të domosdoshme për vazhdimin e punës së Kuvendit Komunal të Preshevës, thuhet në këtë komunikatë të PVD-së të nënshkruar nga kryetari i saj, Riza Halimi.

 

 

Deputetët "rebelë" kundër ministrave

 

Tiranë, 22 tetor 2003 - Një grup deputetësh kundërshtarë të kryeministrit socialist Fatos Nano thonë se do të votojnë kundër dy kandidaturave të propozuara për postin e ministrit të jashtëm dhe të brendshëm.

Një grup prej 12 deputetësh, të grumbulluar rreth ish-ministrit të jashtëm Ilir Meta, thanë në mbledhjen e grupit parlamentar socialist se kërkojnë rikompozim të qeverisë dhe jo "arnime të pjesshme" të saj.

Pritet që këto ditë presidenti Alfred Moisiu të konfirmojë dy kandidaturat e propozuara, Namik Dokle pritet të zëvendësojë Ilir Metën në postin e ministrit të jashtëm, dhe Fatmir Xhafa do të zëvendësojë Luan Ramën në postin e ministrit të brendshëm.

Grupi parlamentar socialist votoi me shumicë votash në favor të ndryshimeve në kabinetin qeveritar, të propozuara nga kryeministri Fatos Nano.

Kryetari i grupi parlamentar socialist Gramoz Ruçi tha se deputetët e shumicës "ranë dakord të mbështesin dhe votojnë ndryshimet e propozuara nga Kryeministri Nano në qeveri".

 

 

Forcat izraelite kanë vrarë dje në incidente të ndara katër palestinezë, dhe kanë keqtrajtuar disa gazetarë

 

Hebron, 22 tetor 2003 - Forcat izraelite kanë vrarë dje në incidente të ndara katër palestinezë, kurse palestinezi i pestë ka vdekur nga plagët e marra kur është qëlluar me armë zjarri pasi ishte hedhur në erë shtëpia e tij në Hebron, njoftojnë burimet e informimit palestinez.

Në të njëjtin njoftim thuhet se Ahmed Khameis Ateia, 29 vjeçar, është vrarë sot në mëngjes (e merkurë) nga forcat izraelite në qytetin Kelkilia të Bregut Perendimor.

I njëjti burim bën të ditur se forcat izraelite kanë sulmuar mbrëmë një numër gazetarësh dhe kanë bugosur për disa orë disa të tjerë në dy incidente të ndara në Bregun Perendimor.

Ndërkaq, një kameraman i AP-së ka pësuar lëndime në fytyrë pas ishte rrahur brutalisht nga ushtarët izraelitë në fshatin Salem në afërsi të Nablusit. Kameramani në fjalë quhet Mejdi Muhamed, 23-vjeçar dhe ishte hospitalizuar në një klinikë lokale pasi trupat izraelite ia kishin mohuar hyrjen në ambulancë, kanë thënë dëshmitarët.

 

 

Shtatë vetë janë vrarë dhe dhjetëra të tjerë janë plagosur me armë zjarri në një dasmë në Kashmir

 

Srinagar, 22 tetor 2003 – Shtatë vetë janë vrarë dhe dhjetëra të tjerë janë plagosur gjatë të shtënave me armë zjarri në një dasmë në Kashmirin e administruar nga India, njofton BBCnews. Një grup njerëzish, ndër të cilët tre policë, kanë shtënë në dasmorët e një dasme, siç është thënë, gjatë një grindjeje familjare.

 

Një oficer i lartë policie ka thënë se njëri nga policët, që ka sulmuar dasmorët ka dashur të martohet me nusen e dasmës. Nusja dhe dhëndrri i kanë shpëtuar vrasjes, por 7 nga të afërmit e nuses kanë vdekur në këtë sulm, që ndodhi në distriktrin malor Doda të Kashmirit.

 

 

Një bombë tokësore ka shpërthyuer në Bagdad dhe ka plagosur lehtë 2 ushtarë amerikanë

 

Bagdad, 22 tetor 2003 – Një bombë tokësore ka shpërthyer në qendër të Bagdadit në orët e hershme të mëngjesit të sotëm (e merkurë) dhe ka plagosur lehtë dy ushtarë amerikanë, që po patrullonin, ka bërë të ditur zëdhënësi i policisë amerikane, njofton Rojter.

 

Shpërthimi ka ndodhur në një tunel të autostradës derisa po kalonte andejpari automjeti “Hamvi” me ushtarët amerikanë. Meqë “çifti” i ushtarëve është lënduar lehtë, ata janë kthyer sërish në detyrë.

 

 

Së shpejti do të anulohet detyrimi për vizë të Shengenit për shtetasit e vendeve të treta në Zvicër

 

Bernë, 22 tetor 2003 - Falë angazhimit shumëvjeçar të Sindikatës SNI dhe Forumit FIM për anulimin e vizave të Shengenit, Komisioni i Bashkimit Evropian momentalisht po verifikon një zgjidhje juridike - anulimin e detyrimit për vizë për shtetasit e huaj që jetojnë në Zvicër e që nuk janë nga shtetet e Bashkimit Evropian.

Kjo dosje ishte vënë në rend të ditës në instancat përgjegjëse të BE-së për këtë çështje. Tanimë Komisioni i Bashkimit Evropian ka verifikuar anulimin e vizave të Shengenit për shtetasit e huaj që jetojnë në Zvicër.

Në mbledhjen e mbajtur më 15 tetor kërkesa për anulimin e detyrimit për vizë ishte pranuar mirë dhe diskutimi për këtë çështje nuk hasi në një kundërshtim përpos një shteti që paraqet brengat e saj.

 

Megjithatë, e tërë çështja është bartë te një shërbim juridik i këshillit të Bashkimit Evropian dhe Komisionit Evropian. Ky komision do të përgatisë një zgjidhje të qartë juridike që do të hyjë në fuqi në pjesën e parë të vitit 2004.

Tani mbi pesëqindëmijë shtetas të vendeve të treta me vendbanim në Zvicër janë të detyruar për marrjen e një vize gjatë udhëtimit të tyre për në vendlindje.

 

 

Në Abixhan të Bregut të Fildishtë, është vrarë gazetari francez i RFI-së, Zhan Helen

 

Abixhan, 22 tetor 2003 – Një oficer policie ka vrarë një gazetar francez në kryeqytetin e Bregut të Fildishtë, Abixhan, bën të ditur BBCworld në një njoftim të sotëm (e merkurë).

 

Diplomatët dhe dëshmitarët kanë thënë se Zhan Helen (Jean Helene), gazetar i RFI-së është vrarë jashtë stacionit policor derisa po priste të intervistojë një numër liderësh të opozitës, të arrestuar në Bregun e Fildishtë. Polici që e ka qëlluar gazetarin me plumb në kokë është arrestuar dhe po merret në pyetje, ka thënë policia e Abixhanit.

Presidenti Zhak Shirak ka thënë se është i pikëlluar nga lajmi për incidentin e së martës dhe ka kërkuar nga autoritetet e Bregut të Fildishtë “të ndriçojnë të gjitha rrethanat e vrasjes”, ka thënë zëdhënësja e presidentit Shirak.

Z. Helen, 48-vjeçar, ka qenë gazetar me përvojë, i cli ka raportuar nga Afrika për shumë vjet. “Shërbimi i sigurimit të Ambasadës franceze ka konfirmuar vdekjen e gazetarit Zhan Helen pas një grindjeje me policin, i cli ishte zemruar”, ka thënë zëdhënësja e Ambasadës franceze në Abixhan.

 

 

Presidenti Bush bën sot një vizitë simbolike në ishullin Bali

 

Xhakartë/Bali, 22 tetor 2003 - Presidenti amerikan Xhorxh Bush ka në program të zhvillojë sot një vizitë simbolike në ishullin Bali për të treguar përkrahje për luftën e Indonezisë kundër terrorizmit. Vizita e zotit Bush në këtë ishull do të kufizohet në vetëm tri orë në aeroport për shkak të shqetësimeve për sigurinë.

Më parë gjatë kësaj jave, autoritete indoneziane paralajmëruan se sulme terroriste mund të jenë të pashmangshëm. Zoti Bush ka në program të takohet me udhëheqës të moderuar myslimanë dhe me Presidenten Megavati Sukarnoputri për ta lavdëruar për përpjekjet e saj kundër terrorizmit.

Vizita e presidentit zhvillohet një vit pasi autorë vetëvrasës shpërthimi vranë 202 vetë në dy klube nate në Bali. Vizita e sotme përbën ndalesën e pestë të zotit Bush në kuadër të turneut të tij në 6 vende aziatike, i cili përfundon të nesër në Australi.

 

 

Irani dakort për inspektime të befasishme në objektet e tij bërthamore

 

Teheran, 22 tetor 2003 - Irani ka pranuar të lejojë inspektime ndërkombëtare pa paralajmërim në objektet e tij bërthamore dhe të pezullojë programin për pasurimin e uraniumit. Marrëveshja u bë e njohur sot pas takimeve në Teheran midis zyrtarëve të lartë iranianë dhe ministrave të jashtëm nga Britania, Franca dhe Gjermania.

Ndërkohë, Shtëpia e Bardhë mirëpriti vendimin e Iranit për të rënë dakord për inspektime nga punonjësit e agjencisë ndërkombëtare të energjisë bërthamore pa paralajmërim dhe për pezullimin e programit të tij të pasurimit të uraniumit.

 

 

Pengesa drejt paqes në Irlandën e Veriut

 

Belfast, 22 tetor 2003 - Në Irlandën e veriut vazhdojnë përpjekjet urgjente për të vënë në binarë procesin e paqes. Këto përpjekje bëhen pasi partia kryesore protestante, Unionistët e Ulsterit, u tërhoq në minutën e fundit nga një marrëveshje me krahun politik të IRA-s, Shin Fein.

Udhëheqësi unionist Dejvid Trimbël tha si ai donte më shumë hollësi lidhur me deklaratën më të fundit për çarmatim të IRA-s para se partia e tij të kthehej në ndarjen e pushtetit me Shin Feinin.

Dështimi i marrëveshjes së organizuar me kujdes ishte një goditje e fortë për qeveritë britanike dhe irlandeze, që thonë megjithatë se zgjedhjet për kuvendin rajonal duhen mbajtur muajin e ardhshëm, gjë që do të çonte në rifillimin e punës të qeverisë së Irlandës së Veriut.

 

 

Asambleja e OKB-së voton kundër barriers

 

Kombet e Bashkuara, 22 tetor 2003 - Asambleja e Përgjithshme e OKB-së ka aprovuar me shumicë dërrmuese një rezolutë që i kërkon Izraelit të ndalojë ndërtimin e një barriere të sigurisë që futet në tokën palestineze në Bregun Perëndimor.

 

Rezoluta thotë se barriera është në kundërshtim me ligjin ndërkombëtar, por nuk shkon deri aty sa të përmbushë kërkesat arabe që çështja t'i kalojë Gjykatës Ndërkombëtare të Drejtësisë në Hagë që të marrë një vendim ligjor - një hap që Shtetet e Bashkuara dhe disa vende të BE-së thonë se do ta politizonte gjykatën.

Rezoluta i kërkon Sekretarit të Përgjithshëm të OKB-së, Kofi Annan të raportojë pas një muaji nëse Izraeli e ka plotësuar këtë kërkesë.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |