Veprimtari per nene Terezen

Veprimtari per nene Terezen

22 tetor 2003 / TN

Agim NEZA

Studentët shqiptarë të Shoqatës “Zgjim studentor” në Londër organizuan të mërkurën në Universitetin Brooks të Oksfordit një aktivitet në përkujtim të Lumturimit të Nënë Terezës. Ambasadori shqiptar në Londër, Kastriot Robo, gjatë këtij aktiviteti, foli për jetën dhe veprimtarinë e Nënë Terezës duke e cilësuar Atë si një krenari kombëtare për çdo shqiptar.

Gjithashtu ai vlerësoi përpjekjet e studentëve shqiptare për organizimin e kësaj veprimtarie si dhe për emrin e mirë që kishin krijuar në këtë Universitet.

Të pranishmit i përshëndeti edhe profesori shqiptar i këtij Universiteti, Shpend Gerguri i cili shprehu vlerësimin për vetëorganizimin e studentëve shqiptarë të cilët ecin në rrugën e Nënë Terezës dhe përfaqësojnë vlerat më të mira të shqiptarëve.

Në fund të aktivitetit u recituan vargje e poezi të shkruara nga Nënë Tereza si dhe vargje nga autorë të ndryshëm, kushtuar Shenjtores Shqiptare.

Gjithashtu Ambasada Shqiptare në Londër, në kuadrin e Lumturimit të Nënë Terezës, do të organizojë më datë 23 tetor një veprimtari ku marrin pjesë personalitete britanike, Trupi Diplomatik i akredituar në Londër si dhe shqiptarë që jetojnë e punojnë në Londër.

Ndërsa më datën 26 tetor në Kishën Katolike të Pimlikos do të mbahet një meshë në gjuhën shqipe për komunitetin katolik shqiptar, në përkujtim të Nënë Terezës.