Njoftim - Për shkak të përkeqësimit të furnizimit me energji elektrike në Kosovë, është vështirësuar shumë edhe puna e QIK-ut, andaj kërkojmë mirëkuptim nga lexuesit tanë.

   Përmbajtja:

• Përfaqësuesit e Kosovës ditën e lumturimit të Nënës Tereze e quajtën hostorike

• Kryeministri i Kosovës udhëtoi në Londër

• Ministrat Morina e Sadriu marrin pjesë në një takim ministror të REBIS-it në Paris

• Kryesia e Kuvendit përkrah nismën për ndryshimet në Kornizën Kushtetuese

• Podujevë: U përurua ordinanca stomatologjike në Lagjen Kuvajtiane

• Në zyrën amerikane në Prishtinë u krye trajnimi i zyrtarëve për marrëdhënie me mediat

• U përurua Instituti i Kosovës për administratë publike

• Reduktimet e energjisë elektrike vazhdojnë edhe gjatë disa ditëve të ardhshme

• Hartman: Autoritetet e Beogradit duhet t'i përmbushin obligimet ndaj Tribunalit të Hagës

• Kryeministri dhe ministri serb i policisë refuzojnë t'i dorëzojnë në Hagë katër gjeneralët e akuzuar

• Gjykata e Hagës ngre aktpadi për krime lufte në Kosovë kundër katër gjeneralëve serbë

• Del Ponte paralajëmron edhe 13 aktakuza për krime lufte

• Qytetarët e Maqedonisë posedojnë mbi 100 mijë armë ilegale

• Partia Socialiste në prag të krizës

• Arafat kërkon aksion të menjëhershëm ndërkombëtar për të ndalë sulmet ajrore izraelite

• Në Somali janë vrarë me armë zjarri dy britanikë

• Ushtarët amerikanë kanë shtënë në ajër për të shpërndarë një turmë protestuesish në Bagdad

• Kryengritës seperatistë në Kashmirin Indian kanë liruar 12 pengje

• Në Falluxha janë vrarë një ushtar amerikan dhe dy civilë

• Treshja evropiane në Teheran

• HRW akuzon trupat amerikane

• Izraeli godet Gazën me forcë

Përfaqësuesit e Kosovës ditën e lumturimit të Nënës Tereze e quajtën hostorike

 

Prishtinë, 21 tetor 2003 - Pas kthimit të anëtarëve të delegacionit të Kosovës nga Roma ku mori jesë në lumturimin e Nënës Tereze tha në se ajo që ndodhi të dielen mund të ndodhë njëherë në njëmijë vjet.

 

Kolë Berisha, nënkryetar i LDK-së deklaroi se "është evidente që jo vetëm popujt e mëdhenj, por edhe popujt e vegjël mund të japin njerëz të mëdhenj dhe kjo është diçka e jashtëzakonshme për shqiptarin siç është për gjithë popujt". "Është me rëndësi që kemi patur një përfaqësi shumë të madhe, është treguar një respekt i madh ndaj nesh nga ana e Selisë së Shenjtë.

 

Kjo do të thotë se e kemi dëshmuar dhe ne që dimë të regjistrojmë vlerat", tha Berisha. Ndërkaq, Ismet Beqiri, kryetar i Komunës së Prishtinës, Lumturimin e Nënë Terezës vlerësoi si akt historik për popullin shqiptar. Zef Morina, Ministër i Transportit dhe Komunikacionit e quajti historike ditën e lumturimit të Nënës Tereze, pasi siç tha ai kjo dëshmon se populli shqiptar është i barabartë me gjithë popujt e botës.

 

 

Kryeministri i Kosovës udhëtoi në Londër

 

Prishtinë, 21 tetor 2003 - Do të kërkojmë përkrahje nga qeveria britanike për ta bërë më efikase qeverinë e Kosovës, tha dje kryeministri i Kosovës Bajram Rexhepi, para nisjes për në Britaninë e Madhe, ku do të qëndrojë në një vizitë dyditore me ftesë të Ministrisë së jashtme britanike.

Ditën e parë të vizitës zyrtare, kryeministri Bajram Rexhepi, do të ketë një takim të veçantë me sekretarin e jashtëm Xhek Stro dhe sekretarin e shtetit për Evropën Denis Mekshejn.

 

 

Ministrat Morina e Sadriu marrin pjesë në një takim ministror të REBIS-it në Paris

 

Prishtinë, 21 tetor 2003 - Nga data 22 deri më 25 tetor në Paris do të mbahet takimi ministror i radhës së REBIS-it. Kosova në këtë takim është ftuar të marrë pjesë sikundër edhe të gjitha vendet e rajonit. Ky takim është vazhdimësi e takimit të ngjashëm të mbajtur në qershor të këtij viti në Luksemburg.

 

Nga Kosova në këtë takim është ftuar të marrë pjesë edhe ministri i Transportit dhe Telekomunikacionit Zef Morina me stafin e tij dhe ministri i Ekonomisë dhe Financave Ali Sadriu.

Delegacioni i MTPT në këtë takim do të prezentojë projektet me interes për Kosovën vlera e të cilëve arrinë në disa miliona euro.

Projektet që do të prezentohen kanë të bëjnë me zhvillimin e infrastrukturën rrugore, hekurudhat dhe avioacionin. Gjatë takimit është paraparë të nënshkruhet marrëveshja për realizimin e disa projekteve në Kosovë në kohëzgjatje prej 5 vjetësh.

Pas këtij takimi delegacioni i Ministrisë së Transportit dhe Telekomunikacionit të Kosovës, më 26 - 28 tetor 2003 në Bruksel do të ketë takime me përfaqësuesit e Ministrisë së Transportit të Flandrisë.

 

Temë e takimiot do të jenë bashkëpunimi i dy vendeve dhe këmbimi i përvojave në sferën e Transportit rrugor, hekurudhor dhe atij ajror.

 

 

Kryesia e Kuvendit përkrah nismën për ndryshimet në Kornizën Kushtetuese

 

Prishtinë, 21 tetor 2003 - Kryesia e Kuvendit të Kosovës, nën drejtimin e Nexhat Dacit, kryetar, ka vendosur sot që në seancën parlamentare të 23 tetorit ta nxjerrë për shqyrtim të dytë Projektligjin për ndryshimin dhe plotësimin e Ligjit për menaxhimin e financave publike, kurse për shqyrtim të parë Prtojektligjin për kadastër dhe atë për Barazinë gjinore.

 

Për seancën vijuese, ndërkaq janë paraparë: shqyrtimi i dytë i Projektligjit për inspektoratin e Punës dhe i atij për Pensionet e aftësisë së kufizuar, kurse në shqyrtim të parë do të jetë Projektligji kundër diskriminimit.

Kryesia e ka shqyrtuar sot edhe përgjigjen e Qeverisë së Kosovës lidhur me kundërshtimin e Koalicionit “Kthimi” në Ligjin për prokurimin publik, si dhe kërkesën e grupit parlamentar të komuniteteve të tjera për rishqyrtimin e vendimit për ndarjen e mjeteve për financimin e partive politike.

Vëmendje të veçantë kryesia i ka kushtuar nismave për ndryshimin e Kornizës Kushtetuese, duke konstatur se çështja është në kompetencë të Kuvendit të Kosovës.

 

Kryesia e ka përkrahur vendimin e Komisionit legjislativ për krijimin e grupit punues pesanëtarësh për përgatitjen e ndyshimeve, konform kërkesave të proceseve të reja në Kosovë. Është vlerësuar ndërkaq që paraprakisht duhet mbështetja e PSSP-së dhe e KS të OKB-së për të pasur sukses projekti.

 

 

Podujevë: U përurua ordinanca stomatologjike në Lagjen Kuvajtiane

 

Podujevë, 21 tetor 2003 – Zv.Kryetari i komunës së Podujevës Agim Kikaj dhe përfaqësuesi i UNMIK-ut Shahzad Khan Bangash sot pritën një delegacion të Komitetit Kuvajtian të Bashkuar të Bamirësisë (KJRC) të udhëhequr nga sekretari i Zyrës qendrore në Kuvajt z. Faisal Almoghawi dhe drejtori i zyrës në Kosovë z. Ibrahim Mekki.

"Qëllimi i vizitës së sotme është që të njihemi me nevojat e qytetarëve të komunës suaj, por edhe përurimi i Ordinancës stomatilogjike në Lagjen Kuvajtiane, projekt i cili ka kushtuar 9500 euro", tha drejtori i zyrës për Kosovën i KJRC z. Mekki.

 

Ai pohoi se përkujdeja për 200 fëmijë jetimë është një projekt tjetër i cili po vazhdon edhe këtë vit për çka KJRC shpenzon nga 6 mijë euro në muaj. Sipas z. Mekki Komiteti i Bashkuar Kuvajtian i Bamirësisë ka ndërtuar edhe dy xhami në Sfeçël dhenë Gërdofc, vlera e të cilave arrinë shifrën 120 mijë euro.

 

Mirëpo Ibrahim Mekki njoftoi se për vitin 2004 ky komitet ka hartuar edhe disa projekte për zhvillimin e infrastrukturës dhe bujqësisë në komunën e Podujevës, duke përfshirë këtu edhe fondin për ambulancën e Lagjs Kuvajtiane që kap shifrën prej 45 mijë euro.

Delegacioni i kësaj organizate përuroi ordinancën stomatologjike në Lagjen Kuvajtiane në Ballofc, për të cilën drejtori i Shtëpisë së shëndetit z. Bahri Thaçi tha se kjo paraqet një ndihmë për popullatën e kësaj Legjeje por edhe të rrethinës, kurse “materialin për këtë ordinancë do ta sigurojë Shtëpia e shëndetit”, tha z. Thaçi.

 

 

Në zyrën amerikane në Prishtinë u krye trajnimi i zyrtarëve për marrëdhënie me mediat

 

Podujevë, 21 tetor 2003 – Drejtoria për Marrëdhënie me Publikun dhe Demokratizim (DMPD) e komunës së Podujevës njoftoi se ka përfunduar trajnimi i zyrtarëve të disa komunave dhe zyrtarëve të SHPK-së për marrëdhënie me mediat.

 

Në këtë trajnim intensiv pos zyrtarëve të SHPK-së për informim morën pjesë edhe disa zyrtarë për marrëdhënie me publikun nga 5 komuna të Kosovës, ndër të cilat edhe komuna e Podujevës.

 

“Ishte një trajnim i suksesshëm dhe mjaft aktiv në të cilën ligjëroi zonja Tammy Van Dame, zyrtare për marrëdhënie me publikun në Komandën e përbashkët të forcave luftarake në Shtetet e Bashkuara të Amerikës”, pohoi zyrtari për marrëdhënie me publikun i komunës së Podujevës.

 

Organizimi i zyrave për informimin në kuadër të drejtorive të komunës, teknikat e marrëdhënieve me mediat dhe bashkëpunimi si dhe trajnimi në situata emergjente ishin tema interesante për të cilat edhe komuna e Podujevës dha provimin me sukses.

Këtë trajnim e përshëndeti edhe ambasadorja në USIS në Kosovë zonja Marsi Ris si dhe z. Majkëll Mekllellen i cili në fund u ndau diplomat zyrtarëve për marrëdhënie me publikun në 2 komuna dhe zyrtarëve të SHPK-së nga disa rajone të Kosovës.

 

 

U përurua Instituti i Kosovës për administratë publike

 

Prishtinë, 21 tetor 2003 - Në Prishtinë u përurua Instituti i Kosovës për administratë publike, i cili është themeluar në kuadër të Ministrisë së shërbimeve publike. Instituti do të realizojë programe trajnuese për personelin e ri të administratës publike që qytetarët e Kosovës të përfitojnë shërbime sa më cilësore.

Duke marrë pjesë në këtë përurim, shefi i UNMIK-ut Hari Holkerin tha se instituti do të jetë instrument për zhvillimin e kapaciteteve të shërbimeve civile, në funksion të krijimit të një ambienti të shëndoshë të zhvillimit ekonomik dhe gjithashtu një urë drejt Evropës.

 

 

Reduktimet e energjisë elektrike vazhdojnë edhe gjatë disa ditëve të ardhshme

 

Prishtinë, 21 tetor 2003 - Edhe sot vazhdojnë reduktimet drastike të energjisë elektrike në Kosovë, me orarin 2 me drita katër në terr. Kjo ka ndodhur si pasojë e rënies nga sistemi të bllokut të dytë të termocentralit Kosova B, në të cilin ka ndodhur një prishje në kaldajë. Riparimi mund të zgjasë 2-3 ditë, por edhe më shumë, thotë zëdhënësja e KEK-ut Beti Dauson.

Në funksion për momentin janë vetëm dy blloqet e termocetralit Kosova A, të cilët prodhojnë 230 megavatë energji, ndërkohë që importohen edhe 100 megavatë të tjerë.

Remonti në Bllokun e dytë të termocentralit B është kryer muajin e kaluar, por si duket është bërë shkelo e shko kur aq shpejti doli nga funksioni.

   

 

Hartman: Autoritetet e Beogradit duhet t'i përmbushin obligimet ndaj Tribunalit të Hagës

 

Hagë, 21 tetor 2003 - Zëdhënësja e Tribunalit të Hagës Florans Hartman ka deklaruar se nga autoritetet e Beogradit pritet që t'i përmbushin obligimet kur është fjala për gjeneralin e policisë Sreten Llukiq, i cili akuzohet për krime kundër njerëzimit në vitin 1998 e 1999 në Kosovë.

 

Ndërkaq, Hartman për gjeneralin e arratisur Vlastimir Gjorgjeviq, i cili akuzohet për të njëjtat vepra penale në Kosovë, tha se do të kërkohet ndihma e Interpolit.

 

 

Kryeministri dhe ministri serb i policisë refuzojnë t'i dorëzojnë në Hagë katër gjeneralët e akuzuar

 

Beograd, 21 tetor 2003 - Ministri serb i policisë Dushan Mihajloviq ka deklaruar se nuk do t'i dorëzojë katër gjeneralët e akuzuar për krime lufte nga Tribunali i Hagës. Mihajloviq ka thënë se gjenerali i policisë Sreten Llukiq ka qenë "dora e tij e djathtë" në operacionin për arrestimin e grupit kriminal në operacioni "Sabla".

 

Megjithatë, Mihajloviq thotë se do ta respektojë vendimin e qeverisë, por nuk do të jetë ai që do t'ia dorëzojë Tribunalit të Hagës dy gjeneralët e policisë, Llukiq e Gjorgjeviq.

Poashtu edhe kryeministri serb Zoran Zhivkoviq ka deklaruar se nuk duhet pritur reagime të shpejta të shtetit në aspektin e arrestimit dhe të dorëzimit të Llukiqit, Gjorgjeviqit, Pavkoviqit dhe Llazareviqit në gjykatën e Hagës. Madje Zhivkoviq thotë se ka refuzuar të pranojë aktakuzat kundër këtyre gjeneralëve nga Karla del Ponte kur ajo vizitoi para do kohe Beogradin.

 

 

Gjykata e Hagës ngre aktpadi për krime lufte në Kosovë kundër katër gjeneralëve serbë

 

Hagë, 21 tetor 2003 - Gjykata e Kombeve të Bashkuara për Krime Lufte ngriti aktpadi për krime lufte në Kosovë në fund të viteve '90 kundër 4 gjeneralëve serbë, përfshirë shefin aktual të sigurimit të Serbisë.

Në padi përmenden emrat e shefit të sigurisë publike të Serbisë e Malit të Zi, Gjenerali Sreten Llukiq; ish-shefi i shtabit i forcave jugosllave të armatosura, Gjenerali Nebojsha Pavkoviq; ish-komandanti i forcave jugosllave në Kosovë, Gjenerali Vladimir Llazareviq; dhe ish-shefi i policisë serbe, Vlastimir Gjorgjeviq.

Ata u akuzuan zyrtarisht muajin e kaluar për krime kundër njerëzimit dhe për shkelje të ligjeve të luftës. Gjykata e Hagës njoftoi dje ngritjen e aktpadive.

Ata janë akuzuar për planifikimin dhe urdhërimin e dëbimit me forcë, persekutimin dhe vrasjen e rreth 800 mijë civilëve shqiptarë nga Kosova në vitin 1998-99.

Prokurorët thonë se, ndërsa gjeneralët mund të mos kenë vrarë personalisht apo dëbuar me forcë civilët, ata janë përgjegjës për krimet e kryera nga ushtarët që kishin nën komandën e tyre.

Thuhet se tër të gjithë të akuzuarit vazhdojnë të jetojnë në Serbi e Mal të Zi, me përjashtim të Gjeneralit Gjeorgjeviq, i cili besohet se ka shkuar në Rusi para më shumë se dy vjetësh.

 

 

Del Ponte paralajëmron edhe 13 aktakuza për krime lufte

 

Shkup, 21 tetor 2003 - Kryeprokurorja e Tribunalit të Hagës Karla del Ponte njoftoi se është duke përgatitur edhe 13 aktakuza për krime lufte në hapësirën e ish-Jugosllavisë, duke përfshirë edhe Maqedoninë. Del Ponte ka thënë se Tribunali i Hagës me siguri do të ngrisë aktakuzë për një ose dy raste për krime lufte në konfliktin e armatosur në Maqedoni në vitin 2001.

 

Del Ponte thotë se për hir të interesit të hetimeve nuk mund të japë hollësi për ato raste, por ka shtuar se për njërin nga rastet ka probleme në mungesë të provave dhe se nevojitet ende kohë për hetime. Del Ponte poashtu ka thënë se është duke përgatitur edhe 13 aktakuza në territorin e Serbisë e Malit të Zi, Kroacisë, Bosnjës e Hercegiviën dhe nga Kosova.

 

 

Qytetarët e Maqedonisë posedojnë mbi 100 mijë armë ilegale

 

Shkup, 21 tetor 2003 - Qytetarët e Maqedonisë posedojnë mbi 100 mijë armë ilegale, tha ministri i mbrojtjes Vllado Buçkovski. Këto armë janë paralajmërim për të gjithë ne, ka thënë Buçkovski, në prag të aksionit për dorëzimin vullnetar të armëve, që do të zgjatë prej 1 nëntorit deri 15 dhjetor.

 

 

Partia Socialiste në prag të krizës

 

Tiranë, 21 tetor 2003 - Në Shqipëria partia socialiste është në prag të krizës. Kundërvënia e hapur e një grupi deputetësh të drejtuar nga zoti Ilir Meta, ndaj kandidaturave të reja për kabinetin qeveritar, mund të vërë seriozisht në pikëpyetje pushtetin e së majtës.

 

Kundërshtarët e kryeministrit Nano, kanë vënë kusht rikompozimin e qeverisë, duke refuzuar të votojnë në parlament ministrat e jashtëm dhe të Rendit.

Parlamenti mbetet pra skena ku do të zhvillohet edhe një herë dueli i forcës. Në rast të një rrëzimi të dytë të kandidaturave, qeveria e kryeministrit Nano do të futej realisht në krizën më të thellë.

Ndonëse ligjërisht ai mund të bëjë edhe një përpjekje të tretë, moralisht socialistët do të dëshmonin se nuk zotërojnë më shumicën dhe se vendi është shumë afër zgjedhjeve të parakohshme.

 

 

Arafat kërkon aksion të menjëhershëm ndërkombëtar për të ndalë sulmet ajrore izraelite

 

Ramallah, 21 tetor 2003 – Presidenti Jaser Atrafat ka kërkuar sot (e martë) aksion të menjëhershëm ndërkombëtar, “për të ndalë këtë çmenduri ushtarake”, siç quhen sulmet e fundit ajrore izraelite në Rripin e Gazës, ku u vranë 10 palestinezë, kryesisht civilë, njofton Rojter.

Në anën tjetër kryeministri izraelit, Ariel Sharon, si kundërpërgjigje ka thënë se nuk do të ndalet gjurmimi i militantëve islamikë, përkundër viktimave civile, të cilat shkaktuan kritika të fuqishme në Izrael dhe opozita madje kërkoi edhe hetime.

 

 

Në Somali janë vrarë me armë zjarri dy britanikë

 

Londër, 21 tetor 2003 – Dy britanikë janë vrarë me armë zjarri në Somali, ka bërë të ditur Ministria e Jashtme e Britanisë së Madhe në një njoftim të sotëm (e martë), njofton BBCWorld. Çifti britanik është vrarë të hënën nga persona të paidentifikuar, siç thuhet, në republikën e vetëshpallur Somalilend në Somali, ka thënë policia vendëse.

 

Detaje më të hollësishme për çiftin ende nuk janë dhënë, ngase ende s'ka kontakte me ndonjë të afërm të tyre, ka thënë zëdhënësi i Forin Ofisit. Policia ka thënë se ata janë vrarë në banesën e tyre duke e shikuar televizorin.

 

 

Ushtarët amerikanë kanë shtënë në ajër për të shpërndarë një turmë protestuesish në Bagdad

 

Bagdad, 21 tetor 2003 - Ushtarët amerikanë kanë shtënë në ajër disa herë për të shpërndarë një turmë të mijëra punëtorëve të ministrive të qeverisë irakiane në Bagdad, që protestonin kundër arrestimit të një gruaje narkomane, e cila ishte zbuluar me anën e një qeni të dresuar, njofton Rojter.

 

Meqenëse qeni sipas fesë islame është I ndotur, përdorimi I qenit për zbulim ka shkaktuar revoltat e irakianëve. S’ka njoftime për viktima. Ushtria amerikane ende s’I ka komentuar këto ngjarje.

 

 

Kryengritës seperatistë në Kashmirin Indian kanë liruar 12 pengje

 

Srinagar, 21 tetor 2003 - Kryengritës të dyshimtë seperatistë, të rrethuar në një shtëpi në Kashmirin Indian, kanë liruar sot (e martë) 12 pengje, të cilët I kishin kapur një ditë më iu dorëzuar atyre, ka thënë=parë, derisa ata po kërkonin të bisedonin për t zëdhënësi I policisë, njofton Rojter.

 

Tre nga katër militantët ende janë në shtëpinë e barrikaduar në një fshat të largët afër Srinagarit, kurse ushtria ende po e mban në rrethim shtëpinë në fjalë.

 

 

Në Falluxha janë vrarë një ushtar amerikan dhe dy civilë

 

Falluxha, 21 tetor 2003 - Një ushtar amerikanë dhe dy civilë janë vrarë kur një patrullë ushtarake amerikane është sulmuar në qytetin e trazuar Falluxha, kanë bërë të ditur dëshmitarët dhe ushtria amerikane, njofton Rojer. Zëdhënësi I ushtrisë amerikane ka thënë se një bombë ka shpërthyer anës rrugës derisa patrulla po kalonte andej pari me një automjet.

 

Sulmuesit pastaj kanë hapur zjarr me pushkë automatike kundër patrullës amerikane, të cilët pastaj ua kanë kthyer zhjarrin. Dëshmitarët kanë thënë se gjatë shkëmbimit të zjarrit janë vrarë dy civilë , kurse pesë të tjerë janë plagosur, ndër të cilët një grua dhe një fëmijë.

 

 

Treshja evropiane në Teheran

 

Teheran, 21 tetor 2003 - Një delegacion i lartë i BE-së ndodhet në Teheran, në një mision për të bindur Iranin të bëjë të ditur shtrirjen e programit të tij bërthamor.

Kombet e Bashkuara i kanë dhënë afat deri në fund të këtij muaji, Iranit, për të provuar se nuk po zhvillon armë bërthamore.

Ministrat e jashtëm të Gjermanisë, Britanisë dhe Francës nuk do ta ndërmerrnin një udhëtim të një profili kaq të lartë dhe dramatik, nëse nuk do të kishte asnjë shenjë nga Irani për bashkëpunim.

Rrugës për në Teheran, sekretari i jashtëm britanik, Xhek Stro tha se qëllimi ishte të inkurajonin Iranin të tregonte se nuk kishte asgjë për të fshehur në programet bërthamore të së tashmes apo të së shkuarës.

 

 

HRW akuzon trupat amerikane

 

Nju Jork, 21 tetor 2003 - Një grup për të drejtat e njeriut me seli në Nju-Jork thotë se ka konfirmuar se njëzet civilë janë vrarë në Bagdad në rrethana të diskutueshme nga trupat amerikane që nga një maji, dita kur presidenti Bush shpalli përfundimin e operacioneve luftarake.

Human Rights Watch akuzon forcat amerikane në Bagdad për veprime të cilat në të vërtetë mbeten të pandëshkuara. Grupi thotë se nuk e kupton se si ushtarakët nuk i numërojnë vdekjet civile ose nuk kanë kryer hetime të hollësishme.

Grupi thotë se problemi pjesërisht qëndron në atë se shumë nga trupat e njëjta që i hapën rrugën vetes për në Bagdad nuk ishin të trajnuara, të pajisura ose të përgatitura psiqikisht për të drejtuar vendin.
Human Rights Watch e pranon se ushtarakët nuk i vunë qëllimisht në shënjestër civilët, por akuzoi disa ushtarë të kenë qenë shumë të rrëmbyer.

Një zëdhënës i Pentagonit tha se pasojat e paqëllimshme janë të paevitueshme në çfarëdo lloj konflikti.

 

 

Izraeli godet Gazën me forcë

 

Gazë, 21 tetor 2003 - Një seri sulmesh ajrore të djeshme izraelite mbi Rripin e Gazës janë vrarë së paku 10 persona dhe ka plagosur shumë të tjerë.

Në një nga sulmet më të ashpra, helikopterët gjuajtën dy raketa mbi një makinë pranë një kampi refugjatësh në Gazën Qëndrore duke vrarë 6 persona.

Veprimi izraelit erdhi vetëm një ditë pasi tre ushtarë izraelitë u vranë në një pritë pranë Bregut perëndimor.

Ndërsa dhuna ka vazhduar, shtetet arabe kanë prezantuar rezolta në KB në përpjekje për të ndaluar ndërtimin e barrierës aq kontraverse.

Një rezolutë bën thirrje për transferim të çështjes në Gjykatën Ndërkombëtare të Drejtësisë.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |