Veprimtari për nënë Terezën

21 tetor 2993 / TN / Çerçiz LOLOÇI

Budapest

Ambasada shqiptare në Budapest, në mbyllje të veprimtarive kushtuar Lumturimit të Nënë Terezës, të cilat konsistuan në çeljen e dy ekspozitave fotografike dhe celebrimin e dy meshave mbajtur në Bazilikën kryesore dhe më të madhe të Budapestit, organizoi një mbledhje përkujtimore.

Ambasadori shqiptar në Budapest, Eduard Sulo, duke folur për Nënë Terezën vuri në dukje se ajo ishte një luftëtare botërore e paqes, një humaniste universale, qytetare e botës mbarë, nje shqiptare e kulluar, gjë që e theksonte kudo ku ndodhej. Për jetën dhe veprën e Nënë Terezës, parë nga këndvështrimi hungarez foli albanologu, Prof. Ishtvan Shyts, njëkohësisht dhe Kryetar i Shoqatës së Miqësisë Hungari-Shqipëri.

Ai u përqëndrua në veprën e kësaj gruaje të pashembullt për mbarë njerëzimin. “Gjithë jeta e Nënë Terezës është një shembull i jashtëzakonshëm për mbarë njerëzimin. Ata që kanë dëgjuar fjalët e Saj dhe që kanë ndjerë të prekurën e Saj qetësuese, e kanë quajtur Atë, Nënë të Dashurisë”.

Në emër të komunitetit shqiptar me banim në Hungari, foli z. Harillaq Kekezi i cili theksoi ndër të tjera se Nënë Tereza ngriti në nivel universal kulturën e dashurisë, kulturën e mirësisë, kulturën e kujdesit për njeriun, kulturën e solidaritetit dhe ndihmës për njeriun.

Në fund fjalën e mori Kryepeshkopi Janush, Nun Apostolik dhe Dekan i Trupit Diplomatik të akredituar në Hungari i cili bëri një paralelizëm të Nënë Terezës me një figurë tjetër po aq të shquar, Papa Gjon Pal i II. Gjithashtu nën kujdesin e Ambasadës shqiptare, u shfaq filmi “Nënë Tereza” si dhe u përurua ekspozita fotografike kushtuar jetës dhe veprës së Saj.

Kanada

Nën kujdesin e Ambasadorit shqiptar në Kanada, Adhurim Resuli, u hap, me rastin e Lumturimit të Nënë Terezës, ekspozita e artistit Ilir Fico me mbi 40 punime, piktura dhe skulptura me temë për Nënë Terezën.

Ambasadori, gjatë pritjes që u dha me këtë rast, përshëndeti të gjithë të pranishmit përfaqësuës të Trupit Diplomatik, të ftuar nga Ministria e Jashtme Kanadeze, Parlamentarë dhe Senatorë, njerëz nga fusha e artit, shkencës dhe biznesit.

Gjithashtu merrnin pjesë dhe përfaqësues të shoqatave të Diasporës nga Toronto, Montreali dhe Otava si dhe të rinj shqiptarë, studentë të cilët ndjekin studimet në Kanada.Aktiviteti u ndoq me interes të jashtëzakonshëm dhe pritja kaloi në atmosferë tepër të ngrohtë. Gjithashtu, televizioni "Pasqyra Shqiptare", i cili transmeton çdo të shtunë në gjuhën shqipe në kanalet kanadeze, bëri të mundur xhirimin e të gjithë aktivitetit.