Përmbajtja:

• Kryeparlamentari Daci priti shefin e Shtyllës IV të UNMIK-ut, Lambsdorff

• Në Prishtinë po i zhvillon punimet Konferenca lidhur me trafikimin e qenive njerëzore

• Sot bëhet ndërrimi i komandës së KFOR-it në Podujevë

• Më 26 tetor merr fund llogaritja verore e kohës, akrepat kthehen prapa për një orë

• Suedi: Manifestime për Nënën Tereze

• Përkeqësohet situata me energji elektrike - 2 orë me drita e katër pa të

• Në fshatin Pogragjë të Gjilanit është vrarë në pritë një person dhe një tjetër është plagosur

• Për vrasjen e civilëve shqiptarë janë dënuar tre ish-pjesëtarë të ushtrisë jugosllave`

• Në Tetovë përfundoi manifestimi letrar ndërkombëtar "Ditët e Naimit 2003"

• As një javë pas organizimit të zgjedhjeve lokale në Shqipëri, nuk janë publikuar rezultatet përfundintare

• Në bazë të një vendimi, Këshilli Suprem i Mbrojtjes së USMZ ka lënë mundësinë e intervenimit ushtarak në Kosovë

• Preshevë: Pengohet trafkimi i 30 kurdëve

• Ekstremi i djathtë fiton zgjedhjet në Zvicër

• Helikopterët izraelitë kanë vrarë 2 palestinezë dhe kanë plagosur 5 të tjerë

• Tre të vrarë dhe 23 të plagosur në tri sulme të sotme ajrore izraelite në GazaTre të vrarë dhe 23 të plagosur në tri sulme të sotme ajrore izraelite në Gaza

• Një aeroplan izraelit ka bombarduar ndërtesën afër shtëpisë së liderit të Xhihadit islamik në Gaza

• Janë gjetur trupat e pajetë të 13 emigrantëve afrikanë në një barkë në ujëdhesën italiane Lampedusa

• Afër Nairobit është gjetur i vdekur një delegat në bisedimet paqësore somaleze në Keni

• Bler merr veten

• Bush diskuton sigurinë në Bangkok

• Takim i jashtëzakonshëm i NATO-s

Kryeparlamentari Daci priti shefin e Shtyllës IV të UNMIK-ut, Lambsdorff

 

Prishtinë, 20 tetor 2003 - Privatizimi është në të mirë të Kosovës dhe të zhvillimit të saj, u tha në takimin e kryetarit të Kuvendit të Kosovës, Nexhat Daci me shefin e Shtyllës IV të UNMIK-ut, Nikolaus Graf Lambsdorff.
 

Kryeparlamentari Daci, pasi i dha mbështetje të plotë vazhdimit të privatizimit në Kosovë, theksoi se duhet përgatitur një rregullativë më të mirë dhe të plotë për gjithë hallkat e procesit të transformimit të pronës, për të siguruar blerës seriozë, programe atraktive, si dhe siguri për punëtorët dhe kapitalin.

 

 

Në Prishtinë po i zhvillon punimet Konferenca lidhur me trafikimin e qenive njerëzore

 

Prishtinë, 20 tetor 2003 - Në Prishtinë sot i filloi punimet Konferenca lidhur me trafikimin e qenive njerëzore, të cilën e ka organizuar IOM-i, Departamenti i Drejtësisë, UNICEF-i, UMCOR-i dhe Save the Children (Sejv Çilldrën). Në këtë konferencë po marrin pjesë ekspertë të ndryshëm vendorë e ndërkombëtarë.

Në fillim të punës së konferencës u tha se trafikimi me qenie njerëzore paraqet kërcënim serioz për zhvillimin e qëndrueshëm të demokracisë dhe sundimit të ligjit në Kosovë.

Përfaqësuesi i UNMIK-ut Zhan Kristian Kadi, tha se duhet zhvilluar një aktivitet të dendur në të gjitha frontet për ta luftuar trafikimin me qenie njerëzore. Njeherit ai kërkoi aktivitete të ndryshme për ngritjen e vetëdijës në opinion, polici dhe drejtësi.

Konferenca i vazhdon punimet edhe gjatë dy ditëve të ardhshme.

 

 

Sot bëhet ndërrimi i komandës së KFOR-it në Podujevë

 

Podujevë, 20 tetor 2003 - Në konferenecën e fundit për gazetarë të Batalionit të tretë çeko-sllovak, nënkoloneli Jozef Kopecki njoftoi se sot do të bëhet ndërrimi i Batalionit të KFOR-it me Batalionin e katërt të cilit i prin nënkoloneli Zdenek Havala.

 

Zëdhënësi i ri i Batalionit IV, kapiteni Jindrih Plesher deklaroi se ceremonia e ndërrimit të batalioneve do të bëhet sot në ora 16.00 në bazën e KFOR-it çeko-sllovak në Shajkofc.

Në këtë ceremoni pritet të marrë pjesë edhe ambasadorja e Republikës Çeke, zonja Judita Shtouraçova dhe kryetari i komunës së Podujevës, Agim Veliu.

Sipas tij Batalioni i katërt do të vazhdojë me kryerjen e detyrave që i ka kryer edhe nënkoloneli Josef Kopecki me ushtarët e tij, përkatësisht do të kujdeset për sigurinë, paqen dhe lirinë e të gjithë qytetarëve të komunës së Podujevës.

Komandanti i gjertanishmë i KFOR-it deklaroi se po shkon nga Podujeva me përshtypjen se ky rajon është një vend me një popullatë të mrekullueshme, paqedashëse dhe me kushte të mira për jetë dhe me shpresën se do të vazhdojë ndërtimin e paqes dhe të sigurisë, së cilës do t'i kontriubojë edhe kontigjenti që na zëvendëson.

 

 

Më 26 tetor merr fund llogaritja verore e kohës, akrepat kthehen prapa për një orë

 

Prishtinë, 20 tetor 2003 - Të dielën, më 26 tetor, merr fund llogaritja verore e kohës. Në orët 3 të mëngjesit akrepat e orës do të kthehen prapa për një orë.

 

 

Suedi: Manifestime për Nënën Tereze

 

Malmë, 20 tetor 2003 - Lumturimin e Nënës Tereze dje në Vatikan, me një vrag aktivitetesh kulturore e shënuan edhe bashkatdhetarët që jetojnë e veprojnë në Suedi. Një mbrëmje kulturore me këtë rast organizoi edhe Rrethi i shoqatave shqiptare të rajonit të Skones.

 

Për jetën, veprimtarinë dhe humanizmin e Nënës Tereze folën Ragip Recica, kryetar i Rrethit, Shaban Murati, ambasador i Republikës së Shqipërisë për Skandinavi dhe Hajrije Bilalli, veprimtare e Shoqatës ”Kosovarja”.

 

Avni Peci e Fatos Reshitaj recituan vargje nga soneti poetik ”Nëna Tereze e Shqipërisë” të autorit Kadri Mani, kurse kompozitori Ahmet Bella interpetoi një arie të cilën e kishte komponuar për Nënë Terezen.

Një manifestim i ngjashëm u mbajt edhe në qytetin e Vekshjes organizuar nga shoqata shqiptare ”Nëna Tereze”.

 

 

Përkeqësohet situata me energji elektrike - 2 orë me drita e katër pa të

 

Prishtinë, 20 tetor 2003 - Që nga dita e djeshme, furnizimi me energji elektrike në Kosovë është përkeqësuar shumë. Kjo ka ardhur si pasojë e rënies nga sistemi të bllokut 2 të termocentralit Kosova B. Sipas përgjegjësve të KEK-ut orari i reduktimeve është katër me dy për terrin.

 

 

Në fshatin Pogragjë të Gjilanit është vrarë në pritë një person dhe një tjetër është plagosur

 

Gjilan, 20 tetor 2003 - Në fshatin Pogragjë të Gjilanit është vrarë një person dhe një tjetër është plagosur nga të shtënat me armë zjarri në një pritë.

 

Policisë tha se i vrari është Rexhep Xhemajli 34-vjeçar nga Pogragja, ndërkaq i plagosuri është babai i tij Hevzi Xhemaili reth të 60-tave, i cili ka marrë plagë të lehta në njërin krah.

Ngjarja ka ndodhur në të dalë të këtij fshati në drejtim të Gjilanit dhe tash për tash nuk dihen rrethanat, kryesit e krimit dhe as motivi i ngjarjes. Ndërkaq, njësiti rajonal i policisë po vazhdon hetimet.

 

 

Për vrasjen e civilëve shqiptarë janë dënuar tre ish-pjesëtarë të ushtrisë jugosllave`

 

Beograd, 2 tetor - Gjykata supreme ushtarake në Beograd ka dënuar tre ish-pjesëtarë të ushtrisë jugosllave me dënime shumëvjeçare me burg për shkak të vrasjes së dy civilëve shqiptarë në Kosovë, në vitin 1999.

 

Majori Dragisha Petkoviq është dënuar me 9 vjet burgim, ndërkaq reshteri Nenad Stamenkoviq dhe ushtari rezevist Tomica Joviq janë dënuar me nga 7 vjet burgim.

Këta të tre, siç ka konfirmuar gjykata, në vitin 1999 kanë vrarë në fshatin Sushicë e Epërme çiftin bashkëshortor Feriz dhe Rukije Krasniqnin.

Më herët, në qershor të këtij viti nënkoloneli Zllatan Mançiq është dënuar me 14 vjet burgim për krime lufte në Kosovë, në vitin 1999.

 

 

Në Tetovë përfundoi manifestimi letrar ndërkombëtar "Ditët e Naimit 2003"

 

Tetovë, 20 tetor 2003 - Në Tetovë ka përfunduar manifestimi letrar ndërkombëtar "Ditët e Naimit 2003" me orën e madhe letrare të titulluar "Rruzulli poetik", ku poetët pjesëmarrës nga vende të ndryshme dhe hapësira shqiptare i lexuan vargjet e tyre poetike.

 

Pas kësaj ore letrare drejtoria e manifestimit shpalli anëtarët e nderit të manifestimit letrar ndërkombëtar "Ditët e Naimit", poetin e njohur shqiptar Din Mehmetin nga Kosova dhe petin Murat Isaku nga Maqedonia. Në fund të këtij festivali u shpallën edhe fituesit e shpërblimeve të këtij manifestimi.

 

 

As një javë pas organizimit të zgjedhjeve lokale në Shqipëri, nuk janë publikuar rezultatet përfundintare

 

Tiranë, 20 tetor 2003 - As një javë pas organizimit të zgjedhjeve lokale në Shqipëri, Komisioni Qendrore i Zgjedhjeve (KQZ) nuk i ka publikuar rezultatet përfundimtare për të gjitha njësitë zgjedhore.

Dy partitë kryesore - PS dhe PD - kanë akuzuar njëra tjetrën për vonesën në publikimin e rezultateve në dy qytetet më të mëdha të Shqipërisë, në Tiranë dhe Durrës.

Në bazë të rezultateve të publikuara deri më tash, në 350 njësi zgjedhore Partia Socialiste ka fituar në 178, ndërkaq partia e opozitës, Partia Demokratike në 131 njësi zgjedhore.

 

 

Në bazë të një vendimi, Këshilli Suprem i Mbrojtjes së USMZ ka lënë mundësinë e intervenimit ushtarak në Kosovë

 

Podgoricë, 20 tetor 2003 - Në një vendim të miratuar nga Këshilli Suprem i Mbrojtjes së Unionit Serbi-Mali i Zi për përdorimin e forcave ushtarake e policore në jugun e Serbisë, është lënë mundësia e intervenimit ushtarak në Kosovë.
Për pasojat e këtij vendimi ka paralajmëruar nëpërmjet një letre gjenerali Bllagoje Grahovac, këshilltar i presidentit të Unionit Serbi-Mali i Zi, Svetozar Maroviq, shkruan gazeta e Podgoricës "Vijesti". Grahovac në letër shtron pyetjen se përse janë bërë formulime të tilla në hijen e dialogut të sapofilluar Beograd-Prishtinë.
Poashtu gjenerali Grahovac i konsideron problematike edhe pjesët e tjera të vendimit të cilat mundësojnë intetpretim të gjerë të përdorimit të forcës ushtarake dhe të autorizimeve të kreut ushtarak të Beogradit pa një kontroll civil.

 

 

Preshevë: Pengohet trafkimi i 30 kurdëve

 

Preshevë, 20 tetor 2003 - Policia serbe ka penguar trafikimin e një grupi prej 30 kurdëve në relacionin Turqi-Kosovë-Serbi-shtetet evroperëndimore. Një grup prej dhjetë kurdësh është ndaluar në rrugën Depcë – Preshevë përderisa dy taksistë janë përpjekur t'i kalojnë më tutje.

 

Me atë rast janë arrestuar taksistët Faik Kadriu nga fshati Zhunicë dhe Bajram Fejzuli nga fshati Miratovc të Preshevës. Poashtu për shkak të mitos janë arresuar policët Abdulnaser Salihu nga Rahovica dhe Nebojsha Stojilkoviq nga Vranjska Banja, të dy pjesëtarë të repartit policor të Preshevës.

 

 

Ekstremi i djathtë fiton zgjedhjet në Zvicër

 

Bernë, 20 tetor 2003 - Partia e krahut të djathtë, ajo Popullore e Zvicrës, po kremton pasi u bë forca kryesore në parlament pas zgjedhjeve të përgjithshme në vend, të dielën.

Partia Popullore, që bëri fushatë me platformën kundër të huajve dhe kundër Bashkimit Evropian, ngriti përqindjen e votës për afro njëzet e tetë përqind.

Kjo ngritje erdhi në llogari të partive të tjera konservatore.

Partia Popullore tashti po kërkon një vend shtesë në koalicionin shtatë anëtarësh, që ka qeverisur me Zvicrën me një përbërje të njëjtë që nga viti 1959.

Ajo është kërcënuar se do të dalë nga koalicioni në rast se parlamenti i ri nuk miraton kandidatët e saj për qeveri në votimin që duhet të bëhet nga mesi i dhjetorit.

 

 

Helikopterët izraelitë kanë vrarë 2 palestinezë dhe kanë plagosur 5 të tjerë

 

Gaza, 20 tetor 2003 – Helikopterët izraelitë kanë kanë goditur sot (e hënë) me dy raketa një kamion në qytetin Gaza dhe kështu kanë vrarë dy palestinezë dhe kanë plagosur pesë të tjerë, njofton AP.

 

Ky është sulmi i dytë ajror izraelit i sotëm brenda më pak se tri orë. Identeti i të vrarëve ende nuk është dhënë. Kamioni i goditur ka qenë afër një stacioni të gasit, një kopshti të fëmijëve dhe një shkolle fillore. Njoftohet se qindra njerëz janë mbledhur rreth mbeturinave të automjetit të ndezur.

 

 

Tre të vrarë dhe 23 të plagosur në tri sulme të sotme ajrore izraelite në GazaTre të vrarë dhe 23 të plagosur në tri sulme të sotme ajrore izraelite në Gaza

 

Gaza, 20 tetor 2003 - Helikopterë dhe aeroplanët luftarakë izraelitë kanë kryer sot (e hënë) tri sulme ajrore në afërsi të qytetit Gaza brenda katër orëve, duke vrarë kështu dy pjesëtarë të Hamasit dhe një kalimtar të rastit, njofton AP.

 

Në dy sulmet e para janë plagosur gjithsej 23 vetë, ndër të cilët 4 fëmijë dhe një plakë 70-vjeçare, kurse për sulmin e tretë s'ka njoftime të ketë pasur të plagosur.

 

 

Një aeroplan izraelit ka bombarduar ndërtesën afër shtëpisë së liderit të Xhihadit islamik në Gaza

 

Gaza, 20 tetor 2003 – Një aeroplan luftarak ka bombarduar sot (e hënë) ndërtesën dykatëshe afër shtëpisë së liderit të Xhihadit islamik në Rripin e Gazës, njofton Rojter. Në këtë incident janë plagosur 12 persona, por lideri i lartpërmendur islamik ka shpëtuar i palënduar.

 

Armata izraelite ka thënë se s’ka qenë cak i sulmit shtëpia e militantit Abdullah al-Shami, por shkatërrimi i një fabrike të armëve të grupit militant të Hamasit në një shtëpi fqinje të pabanuar.

 

Izraeli ka kryer këtë sulm në qytetin Gaza vetëm disa orë pasi personat e armatosur kishin vrarë tre ushtarë në një pritë të mbrëmshme në Bregun Perendimor. Përgjegjësinë për vrasjen e tyre në pritë e kishte marrë një grup i armatosur, që ka lidhje me fraksionin Al Fatah të presidentit Arafat.

 

 

Janë gjetur trupat e pajetë të 13 emigrantëve afrikanë në një barkë në ujëdhesën italiane Lampedusa

 

Palermo, 20 tetor 2003 – Trupat e pa jetë të 13 emigrantëve afrikanë janë gjetur në bordin e barkës në ujëdhesën jugore italiane Lampedusa dhe dhjetëra trupa të tjerë mund të jenë hedhur nga barka në det, bëjnë të ditur sot (e hënë) zyrtarët, njofton Rojter.

 

Zyrtari italian i rojës bregdetare ka thënë se 15 emigrantë besohet të kenë ardhur nga Somalia. Ata kanë shpëtuar nga odiseja e natës së skëterrshme në detin mediteran, kurse një nga të shpëtuarit, një grua, është në gjendje të rëndë.

 

Të shpëtuarit kanë thënë se barka e tyre është nisur nga bregdeti i Libisë para 20 ditësh me rreth 100 emigrantë në bord. Ata kanë thënë se shumica e tyre kanë vdekur gjatë udhëtimit dhe shumë trupa të pajetë janë hedhur në det .

 

 

Afër Nairobit është gjetur i vdekur një delegat në bisedimet paqësore somaleze në Keni

 

Nairobi, 20 tetor 2003 – Një delegat në bisedimet paqësore somaleze në Keni është gjetur i vdekur në një mal në periferi të kryeqytetit Nairobi, njofton BBCWorld. Sheiku Ibrahim Ali ishte një nga tre personat e zbuluar të vdekur nga plagët e marra me armë zjarri.

 

Dy të vdekurit e tjerë ishin një shok i tij afarist dhe shoferi i tij lokal. Biznesmeni i pasur nga kryeqyteti somalez Mogadishu, sheiku Ibrahim ka qenë gjithashtu anëtar i asamblesë nacionale të përkohshme të vendit. Policia ka tnënë se aktualisht po bëjnë hetime nëse sheiku është vrarë për motive politike.

 

 

Bler merr veten

 

Londër, 20 tetor 2003 - Kryeministri britanik Toni Bler, është trajtuar në një spital të Londrës për shkak të problemeve me zemrën. Bleri, pesëdhjetëvjeçar, u pranua në spital pasi u ndie keq dhe u diagnostifikua me të rrahura të çrregullta të zemrës që shkaktojnë mungesë të ajrit dhe dridhje. Ai u mbajt në spital për rreth pesë orë.

Një zëdhënës tha se zoti Bler tashti është kthyer në Dauning Strit, dhe është në gjendje të mirë.

Mjekët e kanë këshilluar që të pushojë të paktën njëzet e katër orë.

 

 

Bush diskuton sigurinë në Bangkok

 

Bankog, 20 tetor 2003 - Pas afro një javë bisedimesh paraprake, takimi i forumit për Bashkëpunim Ekonomik të Azisë-Paqësore, ka hyrë në ditën e parë në kryeqytetin tajlandez, Bangkok.

Megjithëse disa anëtarë, nga njëzet e një vende që marrin pjesë në forum, duan që takimi të përqëndrohet në qëllimin kryesor të APEC-ut, në ekonomi, presidenti Bush po promovon përpjekjet e tij që të përmirësojë sigurinë rajonale duke luftuar kërcënimin nga terrorizmi.

Presidenti Bush gjithashtu aludoi për një kompromis të mundshëm rreth një çështjeje tjetër rajonale, atë të programeve të armëve bërthamore të Koresë Veriore.

Pas takimit me presidentin e Koresë Jugore, Roh Moo-hyun, zoti Bush tha se mbetet me shpresë për ta bërë gadishullin korean të lirë nga armët bërthamore.

 

 

Takim i jashtëzakonshëm i NATO-s

 

Bruksel, 20 tetor 2003 - Ambasadorët e NATO-s, do të takohen sot në Bruksel për të diskutuar planet e Bashkimit Evropian për të krijuar fuqinë e tij ushtarake.

Takimi i jashtëzakonshëm, para mbledhjes së rregullt ditën e marte, u thirr që të shuaj frikën amerikane se projekti i BE-së do të mund të dobësonte aleancën.

Zyrtarët amerikanë janë cituar ta kenë përshkruar këtë si një kërcënim serioz për të ardhmen e NATO-s dhe në veçanti ishin kritik ndaj planeve për krijimine e një selie të pavarur nga aleanca.

Udhëheqësit e BE-së, megjithatë, kanë pohuar se projekti, i hartuar nga Gjermania, Franca dhe Belgjika, nuk ka për qëllim të sfidojë rolin e NATO-s.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |