E shtune, 18 tetor 2003

E shtune, 18 tetor 2003

Përmbajtja:

Nëna Tereze: "Me gjak jam shqiptare, me shtetësi jam indiane dhe me zemër i përkas Jezu Krishtit"`
H. Holkeri thotë se statusi i Kosovës mund të trajtohet vetëm pasi të jenë bërë përparime në çështjet praktike
Liderët e shteteve të BE-së kanë shprehur mbështetje për dialogun Prishtinë – Beograd
Për UNMIK-un është e papranushme veprimtaria e gjykatave paralele
Rreth 40 të rinj në Ferizaj kanë kërkuar ndihmë mjekësore në spitalin e qytetit pas helmimit me gaz lotësjellës
Nesër në Prishtinë mbahet një mbledhje përkujtimor kushtuar Bekim Kastratit dhe Besim Dajakut
As dje nuk është mbajtur mbledhja e Bordit të Agjencisë Kosovare të Mirëbesimit
Në Mitrovicë nesër hapet një ekspozitë kushtuar Nënës Tereze
Kryeministri Nano ka shkarkuar nga detyra ministrin e rendit, Luan Rama
"Tajms": Italia mund të rekrutojë ushtarë shqiptarë në armatën e saj
Forcat izraelite kanë vrarë tre palestinezë
Në një zjarr që shpërtheu në Çikago kanë humbur jetën 6 persona dhe janë lënduar edhe 10 të tjerë
Bush viziton Filipinet

Nëna Tereze: "Me gjak jam shqiptare, me shtetësi jam indiane dhe me zemër i përkas Jezu Krishtit"`

Vatikan, 18 tetor 2003 - Vatikani publikoi dje një biografi të shkurtër të Nënës Tereze. Teksti fillon pikërisht me një koment të Nënë Tërezes në vitin 1995, ku ajo theksonte prejardhjen dhe besimin e saj me këto fjalë: "Me gjak jam shqiptare, me shtetësi jam indiane dhe me zemër i përkas Jezu Krishtit".
Ky njoftim i Vatikanit përkon me zërat e kohëve të fundit, kryesisht në Maqedoni, ku zyrtarët e quajnë Nënën Tereze bijë maqedonase, gjë që ka nxitur reagime të ashpra nga shqiptarët.


H. Holkeri thotë se statusi i Kosovës mund të trajtohet vetëm pasi të jenë bërë përparime në çështjet praktike

Helsinki, 18 tetor 2003 - Në një konferencë për gazetarë në Helsinki, kryeadministratori i Kosovës Hari Holkeri tha se bisedimet e nivelit të lartë ndërmjet udhëheqësve të shqiptarëve të Kosovës dhe atyre serbë mund të mbahen në vitin e ardhshëm, por çështja e statusit të Kosovës mund të trajtohet vetëm pasi të jenë bërë përparime nmë trajtimin e çështjeve praktike.
I pyetur nga gazetarët për kohën e saktë të mbajtjes së këtyre takimeve, Holkeri u shpreh se takimet e tilla të nivelit të lartë nuk janë planifikuar ende.
Hari Holkeri u bashkua me vlerësimin pozitiv të Bashkimit Evropian për takimin e Vjenës. Ai pranoi megjithatë se ka pasur probleme si për shembull mungesa e kryeministrit të Kosovës Bajram Rexhepi.


Liderët e shteteve të BE-së kanë shprehur mbështetje për dialogun Prishtinë – Beograd

Bruksel, 18 tetor 2003 - Presidentët dhe kryeministrat e vendeve të Bashkimit Evropian në samitin e tyre kanë shprehur mbështetje për lansimin e dialogut në Vjenë, duke e quajtur atë se një hap të rëndësishëm.

Në konkluzionet e samitit thuhet se dialogu i nisur në Vjenë më 14 tetor ndërmjet Prishtinës dhe Beogradit shënon hapin kyç në politikën standardet para statusit në suazat e Rezolutës 1244 të KS të OKB-së.

Liderët e shteteve të BE-së kanë mirëpritur fillimin e dialogut ndërmjet Prishtinës dhe Beogradit, por kanë kritikuar mungesën në takim të disa prej figurave politike në Kosovë që preferuan të qëndronin larg takimit të Vjenës.
BE ka caktuar nëntorin si afat për krijimin e grupeve teknike, që do të shqyrtojnë problemet praktike ndërmjet Prishtinës dhe Beogradit.
Liderët e BE-së në këtë takim edhe njëherë i kanë shprehur mbështetje punës së të dërguarit të posaçëm të sekretarit të përgjithshëm të OKB-së z. Hari Holkeri.
Po ashtu edhe NATO-ja ka dërguar një porosi të qartë. Sekretari i përgjithshëm lordi Xhorxh Robertson ka thënë se nisja e dialogut megjithëse duhet pranuar se ishte e vështirë është një shenjë e mirë dhe atë duhet pasuar me punë konkrete.

Lordi Robertson tha se më e rëndësishme se sa vetë fillimi është vazhdimi i procesit e mbase kjo do të jetë në të mirë të të gjithë njerëzve që jetojnë në Kosovë.


Për UNMIK-un është e papranushme veprimtaria e gjykatave paralele

Prishtinë, 18 tetor 2003 - Raporti i OSBE-së, sipas zëdhënësit të administratës ndërkombëtare në Mitrovicë Xhorxhi Kakuk, është në pajtim të plotë me vetë veprimet e Misionit të OKB-së. Ai thotë se misioni po punon hap pas hapi në menjanimin e strukturave paralele, por, sipas tij, tërë kjo kërkon një marrëveshje politike.

Kakuk tha se tash mund nuk ekzistojnë strukturat paralele të sigurisë të cilat janë transferuar, ndërkaq një pjesë e tyre tashmë janë integruar në Shërbimin Policor të Kosovës.
Ndërkaq, për UNMIK-un është e papranushme veprimtaria e gjykatave paralele. Kakuk thotë se në shëndetësi dhe arsim strukturat paralele në veri janë bërë fakt vetëm për shkakun se janë e vetmja mundësi për komunitetin serb.
Mirëpo, prefekti i Mitrovicës Faruk Spahija tha se raporti i OSBE-së është një punë e mirë në identifikimin e problemeve faktike në Mitrovicë, por se është i pakënaqur me propozimet për zgjidhjen e problemeve të cilat është dashur të zgjidhen shumë kohë më parë.

Ai tha se e sheh pak sa të çuditshëm propozimin e OSBE-së se si të tejkalohet situata, përkatësisht si të shpërbëhen strukturat paralele, pasi ato janë krijuar në mungesë të zbatimit të ligjit.


Rreth 40 të rinj në Ferizaj kanë kërkuar ndihmë mjekësore në spitalin e qytetit pas helmimit me gaz lotësjellës

Ferizaj, 18 tetor 2003 - Rreth 40 të rinj në Ferizaj kanë kërkuar dje ndihmë mjekësore në spitalin e qytetit pas helmimit me gaz lotësjellës.
Incidenti ka ndodhur në qendër të Ferizajt dje rreth orës 16.30 kur persona të panjohur kanë hedhur gaz lotësjellës në kafiterinë "Insajd".

Mjeku kujdestar për shërbimin e kirurgjisë, Sylejman Metushi, ka deklaruar se gjendja e të lënduarve është e mirë, ngase nga 40 sa janë paraqitur për ndihmë vetëm 7 apo 8 pacientë janë nën përkujdesje mjekësore, ndërkaq të tjerët janë kthyer në shtëpitë e veta.
Për këtë incident të pazakonshëm dhe për motivet nuk është dhënë asnjë njoftim nga policia.


Nesër në Prishtinë mbahet një mbledhje përkujtimor kushtuar Bekim Kastratit dhe Besim Dajakut

Prishtinë, 18 tetor 2003 - Me rastin e dyvjetorit të vrasjes së Bekim Kastratit, gazetar i së përditshmes "Bota sot" dhe Besim Dajakut, pjesëtar i sigurimit personal të presidentit Rugova, nesër në Teatrin Kombëtar në Prishtinë mbahet një akademi përkujtimore. Ata u vranë pabesisht në një pritë të organizuar në vitin 2001.
Këtë akademi, e cila fillon në orën 12.00, e organizojnë Forumi i Rinisë së LDK-së dhe redaksia e gazetës "Bota sot".


As dje nuk është mbajtur mbledhja e Bordit të Agjencisë Kosovare të Mirëbesimit

Prishtinë, 18 tetor 2003 - Nuk është mbajtur as dje mbledhja e Bordit të Agjencisë Kosovare të Mirëbesimit dhe e njëjta pritet të mbahet të mërkurën e ardhshme. Në një njoftim nga Shtylla e Katërt e UNMIK-ut, thuhet se arsye e kësaj shtyrje është mospërputhja e orareve.

Mësohet se tre anëtarët shqiptarë të këtij Bordi, ministri Ali Jakupi, ministri Ali Sadriu dhe kryetari i BSPK-së Bahri Shabani do të paraqiten në mbledhjen e ardhshme. Është kjo hera e tretë prej se është anuluar tenderi i tretë për privatizim, që nuk mund të tubohen të gjithë anëtarët e Bordit të AKM-së.


Në Mitrovicë nesër hapet një ekspozitë kushtuar Nënës Tereze

Mitrovicë, 18 tetor 2003 - Me rastin e lumturimit të Nënës Tereze nga Papa Gjon Pali II në zyret e RTV Mitrovicës organizohet ekspozita e pikturave të Artistëve Figurativë dhe Aplikativë të Mitrovicës. Ekspozita hapet të dielën më 19 tetor, në orën 10.00.
Ekspozita do të pasohet me një meshë, program aristik
dhe koktej në Kishën Katolike në Mitrovicë.


Kryeministri Nano ka shkarkuar nga detyra ministrin e rendit, Luan Rama

Tiranë, 18 tetor 2003 - Pas protestave dyditore në mbarë opinionin dhe veçanërisht të Shoqatës së Gazetarëve, kryeministri, Fatos Nano ka shkarkuar nga detyra ministrin e rendit Luan Rama. Largimi i Ramës është kërkuar pas incidentit të ndodhur me kryeredaktorin e Televizionit Vision Plus, Ilir Babaramo.

Ai e quajti incidentin e ndodhur me gazetarin Babarama si incident të papritur dhe të panevojshëm. Në vend të tij PS ka propozuar z. Fatmir Xhafa, ministër i rregullimit të territorit gjatë qeverisë së z. Pandeli Majko.
Po kështu për postin e Ministrit të Jashtëm është propozuar Namik Dokle, anëtar i kryesisë së PS dhe ish-kryetar i Kuvendit të Shqipërisë.
Të gjitha këto propozime janë konfirmuar nga anëtari i Kryesisë së PS Bashkim Fino.


"Tajms": Italia mund të rekrutojë ushtarë shqiptarë në armatën e saj

Romë, 18 tetor 2003 - Sipas gazetës londineze "Tajms", Italia së shpejti mund të fillojë rekrutimin e disa nga 144 mijë shqiptarëve, sa jetojnë në atë vend, për të plotësuar nevojat për ushtarë në armatën e saj.
Gazeta citon një deklaratë të ministrit italian të Mbrojtjes, Antonio Marzani, se gjendja demokrafike e Italisë është e tillë ku popullsia po plaket, andaj shqiptarët mund të përtrijnë ushtrinë. Pas pesë vjetësh të shërbimit mund të fitojnë nënshtetësinë italiane, por edhe të mësojnë zanatin ushtarak, thotë ministri Marzani.


Forcat izraelite kanë vrarë tre palestinezë

Gaza, 18 tetor 2003 – Forcat izraelite kanë vrarë një pjesëtar të lartë të grupit të Hamasit, një militant tjetër islamik dhe një grua kalimtare e rastit në luftimet e sotme (e shtunë) në kampin e refugjatëve palestinez në Rripin e Gazës, kanë thënë burimet mjekësore, njofton Rojter.

Këto vrasje kanë shtuar tensionet edhe ashtu të acaruara pas vrasjes së tri rojeve të sigurimit amerikan në një sulm me bombë të autokolonës diplomatike amerikane në Gaza.
Dëshmitarët kanë thënë se janë vrarë Tarik Abu al-Husein, lider lokal i krahut të armatosur i Hamasit gjatë shkëmbimit të zjarrit në kampin e refugjatëve “Brazil”.

Ndërkaq, militanti tjetër i Hamasit dhe një grua janë vrarë nga shrapnelat nga predhat e tankut sapo kishin dalë nga shtëpitë e tyre, kanë thënë dëshmitarët. Burimet mjekësiore thonë se gjatë shkëmbimit të zjarrit janë plagosur edhe 10 persona të tjerë. Izraeli ende s’e ka komentuar incidentin.


Në një zjarr që shpërtheu në Çikago kanë humbur jetën 6 persona dhe janë lënduar edhe 10 të tjerë

Çikago, 18 tetor 2003 – Në një zjarr që ka shpërthyer mbrëmë në një ndërtesë shumëkatëshe afariste të Çikagos kanë humbur jetën gjashtë persona, kurse janë lënduar edhe 10 të tjerë, disa syresh ndodhen në gjendje kritike, bën të ditur AP në një njoftim të sotëm (e shtunë).

Zjarrfikësit aktualisht po kërkojnë prej katit në kat në gjithë ndërtesën viktimat e tjera të mundshme. Ende nuk dihet shkaku i shpërthimit të zjarrit, por punëtorët e katët të 12-të kanë thënë se së pari kanë parë duke dalë tym nga depoja. Nga ndërtesa në fjalë janë evakuar të gjithë njerëzit.


Bush viziton Filipinet

Manila, 18 tetor 2003 – Gjatë vizitës së sotme (e shtunë) në Manila, Presidenti Bush ka lavdëruar lideren e Filipineve Gloria Macapagal Arrojo për kontributin e saj në luftën kundër terrrorizmit, njofton Rojter. Presidenti Bush, i cili ndodhet në një turne, gjatë të cilit do të vizitojë gjashtë vende të Azisë, është kthyer sot në Filipine nga Japonia për një vizitë tetorëshe.