Përmbajtja:

• Presidenti Rugova merr pjesë në ceromoninë e lumturimit të Nënës Tereze

• Ministria e Arsimit nuk licencoi disa shkolla private

• Misioni i OSBE-së pranon se në disa zona të Kosovës ekzistojnë struktura paralele`

• Marek A. Novicki është kthyer në Kosovë

• Me një tribunë shkencore u shënua 90-vjetori i kryengritjes shqiptare kundër pushtuesit serb

• Kryeparlamentari Daci përgëzon kryetarin e ri të Bashkësisë Islame të Kosovës, Naim Tërnava

• Filmi "Exit" i motrave Zeqiri fitoi Çmimin e parë në festivalin e Lozanës

• Tribunali për krime lufte i Hagës u ka shqiptuar dënimet deri në 17 vjet burg 3 serbëve të Bosnjës

• Rusia angazhohet për organizimin e një konference ndërkombëtare për Ballkanin Perëndimor

• Incidentet e së dielës në Himarë vazhdojnë të jenë në qendër të deklarimeve politike në Tiranë dhe në Athinë

• Presidenti i Serbisë e Malit të Zi dhe i Maqedonisë e kanë përshëndetur fillimin e dialogut Prishtinë – Beograd

• Kuvendi maqedonas ratifikoi marrëveshjen për mosdorëzimin e shtetasve amerikanë në Gjykatën Ndërkombëtare

• KQZ: PS ka fituar rreth 136 njësi zgjedhore, ndërsa PD në 93

• Athina mohon të ketë kërkuar që Himara të shpallet zonë e minoritetit grek

• Në rajonin e Bagdadit vritet në ushtar amerikan dhe plagosen dy të tjerë

• Presidenti Bush mbërriti në Tokio në një udhëtim të tij gjashtëditor në Azi dhe Australi

• Këshilli i Sigurimit ka përshëndetur fillimin e bisedimeve Beograd-Prishtinë për çështje praktike

• Tre policë ushtarakë amerikanë dhe dy policë irakianë janë vrarë në një shkëmbim zjarri në Qerbela

• Është hedhur një granatë në shtëpinë e kryeministrit indian të Kashmirit dhe janë vrarë dy ushtarë

• Janë arrestuar mbikëqyrësi dhe 25 gardianë të burgut të Kandaharit për shkak të ikjes së 41 militantëve talibanë

• SHBA merr mbështetje për Irakun

• I paqartë numri i trupave që mund të shkojnë në Irak

• Liderët e BE-së thanë që kushtetuta të miratohet deri në zhvillimin e zgjedhjeve për Parlamentin Evropian

Presidenti Rugova merr pjesë në ceromoninë e lumturimit të Nënës Tereze

 

Prishtinë, 17 tetor 2003 - Presidenti i Kosovës Ibrahim Rgova, bashkë me stafin e tij, sot udhëton për në Romë ku do të marrë pjesë në ceremoninë e lumturimit të Nënës Tereze.

Në kuadër të ceremonive që do të zhvillohen të dielën në Sheshin e Kishës së Shën Palit në Vatikan, marrin pjesë edhe disa delegacione të Kosovës. Mes tjerash në Romë udhëton edhe një delegacion 8 anëtarësh i Kuvendit të Kosovës, dinjitarë kishtarë të Kosovës dhe personalitete të tjera.

 

 

Ministria e Arsimit nuk licencoi disa shkolla private

 

Prishtinë, 17 tetor 2003 - Ministri i Arsimit, Shkencës dhe Teknologjisë, Rexhep Osmani, duke sqaruar arsyet e moslicencimit të disa shkollave private në Kosovë, tha se kjo është bërë për shkak të mospërmbushjes së kushteve të parapara për licensim në bazë të ligjit përkatës. Kështu, Ministria ka refuzuar të licencojë shkollën e gazetarisë "Faik Konica", Akademinë e Arteve të Bukura, kolegjin "Tempulli" e disa të tjera.

 

Poashtu është refuzuar Shkolla Amerikane e Kosovës, e cila nuk i është përmbajtur disa rregullave.
Sipas ministrit Osmani, këto shkolla nuk i kanë përmbushur as kushtet themelore; nuk kanë kuadër, nuk kanë planprograme, u mungon dokumentacioni dhe rregulloret e punës, nuk kanë garancion financiar dhe u mungon infrastruktura dhe numri i studentëve.

Ndërkohë licenca për punë i është dhënë kolegjit "Mehmet Akif", qendrës shkollore "Agaxhite", dhe institucioni parashkollor "Kinderdorf".

 

 

Misioni i OSBE-së pranon se në disa zona të Kosovës ekzistojnë struktura paralele`

 

Prishtinë, 17 tetor 2003 - Misioni në Kosovës i OSBE-së, ka pranuar se në disa zona të Kosovës ekzistojnë struktura paralele, kryesisht në veri të Kosovës, nën autoritetin e Qeverisë së Serbisë. Në një raport OSBE thotë se këto struktuara e zhvillojnë aktivitetin e tyre në fushën se sigurisë, në drejtësi, shëndetësi, arsim dhe në të drejtën e pronës.

 

Ato janë të shtrira kryesisht në veri të Kosovës, të banuar me shumicë serbe. Ekzistimi i këtyre strukturave paralele, që financohen nga Serbia, thonë zyrtarët e OSBE-së nuk mund të tolerohen gjatë, por shuarja e tyre duhet të bëhet gradualisht, nëpërmjet integrimit të tyre në institucionet e përkohshme vetëqeverisëse të Kosovës.

Raporti i OSBE-së rekomandon shuarjen e këtyre strukturave nëpërmjet tri mundësive: përmirësimin e shërbimeve nga ana e UNMIK-ut dhe e institucioneve të Kosovës, zvogëlimin e pajisjeve për shërbime paralele nëpërmjet negociatave dhe vendosjen e politikave të detyrueshme për mbështetjen e institucioneve të Kosovës.

 

 

Marek A. Novicki është kthyer në Kosovë

 

Prishtinë, 17 tetor 2003 - Avokati i popullit të Kosovës Marek Antonio Novicki është kthyer dje në Kosovë pas një ndërhyrje të suksesshme kirurgjikale në zemër në Poloni.

Ai ka thënë se do të vazhdojë punën e tij në institucionet që kanë të bëjnë me mbrojtjen dhe përmirësimin e të drejtave të njeriut në Kosovë.

 

"Jam shumë i lumtur që jam kthyer në Kosovë, por mund t'ju them se edhepse kam qenë në Poloni, besoj se nuk kam mbetur i painformuar lidhur me ngjarjet e fundit në Kosovë, sepse edhe institucionet kosovare, por edhe stafi im më kanë informuar gjithnjë për ngjarjet që po ndodhin në Kosovë",- tha Novicki pas kthimit nga Polonia.

 

 

Me një tribunë shkencore u shënua 90-vjetori i kryengritjes shqiptare kundër pushtuesit serb

 

Prishtinë, 17 tetor 2003 - Me rastin e 90-vjetorit të kryengritjes shqiptare kundër pushtuesit serb në vitin 1913 në Institutin Albanologjik, Dega e Historisë u organizua një tribunë shkencore. Me pesë trajtesa të historianëve shqiptarë u ndriçua në shumë aspekte kjo ngjarje e rëndësishme e historisë sonë kombëtare.

Dr. Zekeria Cana në kumtesën e tij paraqiti në mënyrë kronologjike luftën e popullit shqiptar për pavarësi. Ndërkaq, Dr. Gazmend Riza në punimin e tij shkencor e foli për kryengritjen shqiptare të vitit 1913 nga prizmi i diplomacisë italiane.

 

 

Kryeparlamentari Daci përgëzon kryetarin e ri të Bashkësisë Islame të Kosovës, Naim Tërnava

 

Prishtinë, 17 tetor 2003 - Kryetari i Kuvendit të Kosovës Nexhat Daci përgëzoi kryetarin e ri të Bashkësisë Islame të Kosovës, Naim Tërnavën për zgjedhjen në kët post.

"Ju përgëzoj për zgjedhjen tuaj kryetar i Bashkësisë Islame të Kosovës, duke ju uruar punë të mbarë, me dëshirat më të mira që Bashkësia Islame të punojë si edhe deri më tash për forcimin e dashurisë dhe respektit ndërmjet njerëzve, për besimin në Zot dhe në pastërtinë shpirtrore të njeriut, për të zhvilluar ndjenjat humane të ndihmës së ndërsjellë dhe ndërtimit të paqes te të gjithë njerëzit", thuhet në përgëzimet e kryeparlamentarit Nexhat Daci, njëherit duke premtuar përkrahjen e Kuvendit të Kosovës për Bashkësinë Islame për të kryer punët në lartësimin e vlerave civilizuese.

 

 

Filmi "Exit" i motrave Zeqiri fitoi Çmimin e parë në festivalin e Lozanës

 

Lozanë, 17 tetor 2003 - Në Festivalin e filmit në Lozanë të Zvicrës të emërtuar "Lausanne Underground Film & Music Festival", nga data 8 deri më 12 tetor, filmi EXIT i regjisoreve Lendita Zeqiraj dhe Blerta Zeqiri, u shpërblye me Çmimin e parë të festivalit si dhe u shpall filmi më i mirë i metrazhit të shkurtër të këtij viti.

Ky film ka marrë pjesë në shumë festivale të metrit të shkurtër dhe kjo është hera e dytë që nderohet me çmimin e parë në një festival ndërkombëtar. Para disa muajve ky film fitoi çmimin e parë në festivalin e filmit në Kaen të Francës.

 

 

Tribunali për krime lufte i Hagës u ka shqiptuar dënimet deri në 17 vjet burg 3 serbëve të Bosnjës

 

Hagë, 17 tetor 2003 – Tribunali për krime lufte i Hagës u ka shqiptuar sot (e premte) dënimet deri në 17 vjet burg tre ish-zyrtarëve rajonal të serbëve të Bosnjës për "spastrim etnik" të muslimanëve dhe kroatëve gjatë luftës në Bosnjë në vitet 1992-5, njofton Rojter.

 

Blagoje Simiq, Miroslav Tadiq dhe Simo Zariq, të cilët i qenë dorëzuar Tribunalit, janë dënuar për planifikim dhe nxitjen e fushatës së vrasjes, arrestimit, torturimit dhe deportimit të joserbëve në zonën e Shamacit të Bosnjës. Kështu, Blagoje Simiq është dënuar me 17 vjet burg, Miroslav Tadiq është dënuar me 6 vjet burg, ndërsa Simo Zariqi është dënuar me 10 vjet burg.

 

 

Rusia angazhohet për organizimin e një konference ndërkombëtare për Ballkanin Perëndimor

 

Moskë, 17 tetor 2003 - Rusia ka ndërmend të inicojë mbajtjen e një konference ndërkombëtare për Ballkanin Perëndimor, e cila do të konfirmonte mosndryshimin e kufijve ekiztues dhe të territoreve të këtij rajoni, ka deklaruar dje kryeministri rus Mihail Kasjanov në fund të bisedimeve me kryeministrin maqedonas Branko Cërvenkoski në Moskë.

 

 

Incidentet e së dielës në Himarë vazhdojnë të jenë në qendër të deklarimeve politike në Tiranë dhe në Athinë

 

Vlorë, 17 tetor 2003 - Incidentet e së dielës në Himarë kanë vazhduar të jenë në qendër të lëvizjeve dhe deklarimeve politike në Tiranë. Disa qindra vlonjatë kanë vazhduar të protestojnë kundër provokimit në Himarë nga persona militantë kur kishin ngritur atje flamurin grek, duke thënë se Himara është tokë greke.

 

Policia edhe dje ka penguar një grup qytetarësh vlonjat që ishin nisur për në Himarë për të protestuar ndaj minifestimeve prokreke të dy ditëve më parë në këtë qytet.

Autoritetet greke kanë mohuar se zëdhënësi i Ministrisë së Jashtme të Greqisë të ketë deklaruar se Athina do t'i kërkojë Tiranës që Himara të shpallet zonë e minoritetit grek në Shqipëri. Kështu bëjnë të ditur burimet e Ministrisë së Jashtme të Shqipërisë.

 

Ky përgënjeshtrim është bërë nga vetë zyrtarët grekë pas kërkesës së ambasadorit shqiptar në Athinë Bashkim Zeneli, i cili kishte marrë konfirmimin e qëndrimit zyrtar të autoriteteve greke se nuk është bërë asnjë deklaratë lidhur me Himarën.

 

 

Presidenti i Serbisë e Malit të Zi dhe i Maqedonisë e kanë përshëndetur fillimin e dialogut Prishtinë – Beograd

 

Beograd, 17 tetor 2003 - Presidenti i Serbisë dhe Malit të Zi, Svetozar Maroviq dhe presidenti maqedonas Boris Trajkovski e kanë përshëndetur fillimin e dialogut Prishtinë - Beograd dhe kanë vlerësuar se në vazhdim të këtij procesi në Kosovë së pari duhet vendosur standardet evropiane dhe demokratike.

 

Në takimin e djeshëm në Beograd dy udhëheqësit kanë konstatuar se ndërmjet dy vendeve nuk ka çështje të pazgjidhura, ndërkaq për çështje të rajonit kanë shprehur qëndrime identike, njoftohet në komunikatën e lëshuar nga presidenca në Beograd.

 

 

Kuvendi maqedonas ratifikoi marrëveshjen për mosdorëzimin e shtetasve amerikanë në Gjykatën Ndërkombëtare

 

Shkup, 17 tetor 2003 - Kuvendi i Maqedonisë ratifikoi dje marrëveshjen e arritur ndërmjet Qeverisë së Maqedonisë dhe Qeverisë së Shteteve të Bashkuara të Amerikës për mosdorëzimin e shtetasve amerikanë në Gjykatën Penale Ndërkombëtare.

 

Zëvendësministri i Punëve të Jashtme të Maqedonisë Fuad Hasanoviq deklaroi se ratifikimi i kësaj marrëveshjeje nuk do ta prishë partneritetin e Maqedonisë me Bashkimin Evropian, por as rrugën stabile drejt integrimit të vendit në strukturat veriatlantike.

 

Ai tha se marrëveshja për mosdorëzimin e qytetarëve amerikanë në Gjykatën Penale Ndërkombëtare është valorizuar me Kartën e Adriatikut për partneritet ndërmjet Shteteve të Bashkuara të Amerikës, Shqipërisë, Maqedonisë dhe Kroacisë.

 

 

KQZ: PS ka fituar rreth 136 njësi zgjedhore, ndërsa PD në 93

 

Tiranë, 17 tetor 2003 - Në bazë të numërimti të gjertanishëm të votave, KQZ ka njoftuar përqindjen e partive politike që kanë fituar në zgjedhjet e 12 tetorit në Shqipëri. PS ka fituar rreth 136 njësi zgjedhore, ndërsa PD në 93, Partia për Bashkimin e të Drejtave të Njeriut është e treta, ndërkaq kandidatët e pavarur kanë fituar 5 njësi bashkiake, përkundër socialdemokratëve dhe legalistëve që kanë 3 dhe 2 njësi zgjdhore.

Sipas KQZ deri më tash PS udhëheq me 32,47 për qind të votave të fituara, PD ka fituar 30,43 për qind, ndërkaq socialdemokratët me 6,12 për qind.

 

 

Athina mohon të ketë kërkuar që Himara të shpallet zonë e minoritetit grek

 

Athinë, 17 tetor 2003 - Autoritetet greke kanë mohuar që zëdhënësi i Ministrit të Jashtëm të Greqisë të ketë deklaruar se Athina do t'i kërkojë Tiranës që Himara të shpallet zonë e minoritetit grek në Shqipëri, bënë të ditur burime të ministrisë së jashtme shqiptare.

Referimet mbi deklaratat e zëdhënësit të ministrisë së jashtme greke nuk i përgjigjen realitetit.
Kjo është në thelb deklarata e ambasadës greke në Tiranë, e dalë dje, pas deklaratave të atribuara një diplomati grek në Athinë, i cili, sipas burimeve të mediave, citohej të kishte thënë se Greqia do përpiqet të bindë Shqipërinë që Himara të shpallet zonë e minoritetit grek.

Kjo deklaratë i është përsëritur sot ambasadorit shqiptar në Athinë i cili ka kërkuar me insistim nga autoritetet greke të sqarojnë këtë çështje.

Megjithatë çështja nuk duket se do të mbyllet lehtë.

 

 

Në rajonin e Bagdadit vritet në ushtar amerikan dhe plagosen dy të tjerë

 

Bagdad, 17 tetor 2003 - Nga shpërthimi i një bombe është vrarë një polic ushtarak amerikan dhe janë plagosur dy të tjerë në rajonin e Bagdadit të premtën në mëngjes, thanë ushtarakë amerikanë.

Në një deklaratë ushtarake nuk janë dhënë detaje të tjera, njofton Rojter. Vrasja e fundit e ka rritur numrin në 101 të ushtarëve të vrarë amerikanë që nga periudha kur Uashingtoni e shpalli të përfunduar luftën në Irak.

 

 

Presidenti Bush mbërriti në Tokio në një udhëtim të tij gjashtëditor në Azi dhe Australi

 

Tokio, 17 tetor 2003 - Presidenti Bush ka mbërritur sot ( e premte) në Tokio dhe ky është stacioni i parë i udhëtimit të tij gjashtëditor në Azi dhe Australi, njofton AP. Gjatë këtij turneu, presidenti Bush do të marrë pjesë edhe në një konferencë ndërkombëtare ekonomike në Tajlandë, ku do të nxisë vendet pjesëmarrëse të rajonit për të kontribuar për Irakun.

 

Me të arritur në Tokio, presidenti Bush ka falenderuar Japoninë për kontributin e dhënë në rindërtimin e Irakut të shkatërruar nga lufta. Ai sot do të takohet me kryeministrin japonez Xhuniçiro Koizumi dhe me këtë rast pritet të bëjë trysni në Tokion të ndërprejë intervenimin për të mbështetur ngritjen e dollarit kundrejt jenit dhe të lejohet tregu i monetave të vërë lirisht paritetin e tyre.

 

 

Këshilli i Sigurimit ka përshëndetur fillimin e bisedimeve Beograd-Prishtinë për çështje praktike

 

Kombet e Bashkuara, 17 tetor 2003 - Këshilli i Sigurimit të Kombeve të Bashkuara ka përshëndetur fillimin e bisedimeve Beograd-Prishtinë për çështje të interesit të përbashkët në Kosovë që janë mbajtur në Vjenë.

"Anëtarët e Këshillit të Sigurimit përshëndesin hapjen e dialogut të drejtpërdrejtë më 14 tetor në Vjenë për çështjet praktike me interes të ndërsjellë ndërmjet autoriteteve të Beogradit dhe Prishtinës", thuhet në një komunikatë të cilën e ka lexuar kryesuesi i radhës ambasadori amerikan Xhon Negroponte.

Poashtu u bëhet thirrje të gjitha grupeve dhe partive nga të dyja palët që t'u bashkohen bisedimeve për çështje teknike në nivel eskpertësh. Grupet e punës do të përqendrohen kryekëput në çështjet praktike siç janë energjia, komunikacioni, personat e zhdukur, refugjatët dhe personat e zhvendosur, është konfirmuar në selinë e OKB-së në Nju Jork.

 

 

Tre policë ushtarakë amerikanë dhe dy policë irakianë janë vrarë në një shkëmbim zjarri në Qerbela

 

Bagdad, 17 tetor 2003 – Tre policë ushtarakë amerikanë dhe dy policë irakianë janë vrarë mbrëmë vonë dhe shtatë të tjerë janë plagosur në një shkëmbim të ashpër zjarri në Qerbela, që ndodhet në jug të kryeqytetit, kanë bërë të ditur në një njoftim të sotëm (e premte) zyrtarët amerikanë, njofton rrjeti televiziv CNN.

 

Rreth 20 deri në 30 irakianë i kanë sulmuar ata me granata dhe pushkë automatike AK-47 gjatë një patrullimi rutinor, ka thënë majori Ralf Manos. Po kështu, në këtë incident, janë plagosur edhe pesë policë ushtarakë amerikanë dhe dy policë irakianë, ka shtuar ai.

 

 

Është hedhur një granatë në shtëpinë e kryeministrit indian të Kashmirit dhe janë vrarë dy ushtarë

 

Srinagar, 17 tetor 2003 – Seperatistët e dyshimtë muslimanë kanë hedhur sot (e premte) një granatë pranë shtëpisë së kryeministrit indian të Kashmirit, duke vrarë kështu dy ushtarë, njofton Rojter.

 

Për këtë sulm, Nju Delhi ka fajësuar menjëherë militantët me bazë në Pakistan. Dy orë pas shpërthimit, ushtarët edhe policia kanë luftuar me kryengritësit, të cilët ishin barrikaduar nëpër dyqanet e afërme dhe ende ka shkëmbime sporadike zjarri, kanë pohuar dëshmitarët. Kryeministri i Xhamus dhe Kashmirit, Myfti Muhamed Sejid, i zgjedhur një vit më parë, s’ka qenë në shtëpi në kohën e shpërthimit.

 

 

Janë arrestuar mbikëqyrësi dhe 25 gardianë të burgut të Kandaharit për shkak të ikjes së 41 militantëve talibanë

 

Kandahar, 17 tetor 2003 – Policia e qytetit jugor afgan Kandahar ka arrestuar mbikëqyrësin dhe 25 gardianë të burgut kryesor të qytetit, nga i cili kanë ikur kohë më parë 41 militantë talibanë nëpër një tunel, ka thënë sot (e premte) një zyrtar policor, njofton Rojter.

 

Shefi i policisë Muhamed Hashim ka mohuar njoftimet e zyrtarëve lokale se tre nga të ikurit janë zënë duke thënë se kjo thjesht nuk është e vërtetë.

 

 

SHBA merr mbështetje për Irakun

 

Kombet e Bashkuara, 17 tetor 2003 - Pas javësh të tëra diskutimesh, Këshilli i Sigurimit miratoi në mënyrë unanime rezolutën e re për të ardhmen e Irakut. Në rezolutë thuhet se koalicioni i udhëhequr nga Amerikanët do ta ruajë rolin e tij dominant në Irak.

Megjithatë në rezolutë krijohen bazët për formimin e një force shumëkombëshe dhe bëhet thirrje për dhënien e më shumë fondeve për rindërtimin e Irakut.

Në rezolutë thuhet se transferimi i sovranitetit në duart e irakianëve do të ndodhë kur bëhet e mundshme.
Franca, Rusia dhe Gjermania kanë vendosur të kontribuojnë me trupa dhe fonde në Irak.

 

 

I paqartë numri i trupave që mund të shkojnë në Irak

 

Uashington, 17 tetor 2003 - Sekretari amerikan i Mbrojtjes Donald Ramsfeld e mirëpriti rezolutën, por shtoi se nuk e dinte sa trupa të huaja mund të shkonin në Irak. Ramsfeld tha se besonte se rezoluta e re do të kishte efekte pozitive mbi ato vende që do të dërgonin trupa në Irak.

"Cilat vende do të dërgojnë trupa dhe për sa trupa bëhet fjalë, kjo mbetet të shihet në të ardhmen," tha zoti Ramsfeld.

Ai shtoi se Shtetet e Bashkuara ishin duke diskutuar për këtë me 5 apo 6 vende dhe se koha do ta tregonte se kush ato.

Edhe sekretari i Shtetit, Kolin Pauell, e përshëndeti rezolutën me anë të së cilës amerikanët shpresojnë të sigurojnë më shumë trupa dhe më tepër fonde në Irak.

 

 

Liderët e BE-së thanë që kushtetuta të miratohet deri në zhvillimin e zgjedhjeve për Parlamentin Evropian

 

Bruksel, 17 tetor 2003 - Udhëheqësit e Bashkimit Evropian që janë mbledhur në samitin e tyre në Bruksel, kanë shprehur vullnetin që kushtetuta e unionit të miratohet deri në zhvillimin e zgjedhjeve për Parlamentin Evropian, që do të mbahen në qershor të vitit të ardhshëm.

Presidenti i radhës i BE-së, kryeministri italian Silvio Berluskoni, është zotuar që deri në fund të muajit të ardhshëm të paraqesë një projekt të ripunuar, për të cilin tha se do të jetë me reputacion tepër të lartë. Ai po ashtu shprehu mbrëmë kënaqësinë e tij për mënyrën se si po shkonn bisedimet për kushtetutëne re evropiane.

Të enjten, në ditën e parë të samitit, është miratuar edhe emërimi i bankierit francez, Zhak Klod Trishe, në krye të Bankës Qendrore Evropiane.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |