Kush i ngre dallgët mbi Himarë

OPINIONE

Kush i ngre dallgët mbi Himarë

17 tetor 2003 / TN

Nga, Ilir PAÇO

Besoj se shumëkush që i ndjek sado pak zhvillimet politiko-sociale, është dakord me mendimin se me Himarën ka një problem. Problem që askush nuk po i shkon deri në fund. Madje as historianët që duhet ta bëjnë këtë për të "shpëtuar" njëherë e mirë nga dilemat. Jo, nuk ka pse kërcen ndokush, se me siguri është dikush, një tip impulsiv, që menjëherë, tani dhe prerazi, mund ta japë përgjigjen.

Le ta anashkaloj çështjen e historisë, që aq më pak vlen sot, në epokën e globalizmit dhe të integrimit. Le të shohim në të tashmen. Përse Himara bëhet problem dhe kush e bën çështje atë? Shumica e himariotëve janë bërë sigurisht më realisto-pragmatistë se shumë të tjerë, për vetë rrethanat në të cilat janë gjendur shpesh. Dhe këtë shumicë nuk mund ta manipulojë kollaj çdokush. Ata, nuk është e tepërt ta thuash, se pas këtyre ndihen më shumë himarjotë sesa qoftë shqiptarë, grekë apo nuk e di se çfarë. Sepse sot në Greqi për hir të së vërtetës atyre u thërasin shqiptarë dhe po për hir të së vërtetës, dikur në Shqipëri u thërisnin ndoshta padrejtësisht grekë. Më kujtohet një rast që për atë që e njeh sado pak historinë dhe karakterin e kësaj krahine përgjatë historisë, mund të thotë shumë. Me kujtohet pra, kur një mikun tim nga Dhërmiu e pyeti një grek në Athinë se nga ishte. Kur ai iu përgjigj nga Himara, ai tjetri nxitoi t'i thotë: "a qenke grek dmth.". "Jo"- iu përgjigj miku im,- "jam Himariot".

Por kush i ngre dallgët mbi Himarë?

Shumëkush nxitoi të kritikojë udhëheqësin e opozitës Sali Berisha, për koalicionin që ai bëri me PBDNJ në Himarë. E etiketoi antikombëtar këtë veprim, se me të kërkon të fitojë pikë përpara Athinës etj., etj.. Por këta zotërinj që shfaqen patriotë, harrojnë se kështu e diferencojnë dhe e shenjojnë vetë në hartën e dilemave, Himarën. Përse nuk u dashka të bashkëpunojë një parti politike me një tjetër parti politike në një zonë të caktuar të territorit të republikës së Shqipërisë? Dhe kritikues janë ata, lidershipi i partive të të cilëve, reklamon realpolitikën, pragmatizmin etj.. Por tani, jo socialistët që dikur akuzonin Berishën si nacionalist të shtirur, por Berisha është ai që përpiqet ta shohë në sy problemin. "Eshtë Mafia e Himarës që kërkon ta mbajë atë në këtë qerthull...

Por për hir të së vërtetës duhet pranuar një realitet, që në Himarë dhe në disa fshatra të saj flitet edhe shqipja edhe greqishtja dhe ky është një realitet që duhet pranuar," tha pak a shumë Berisha. Për atë që me siguri nxiton të më kujtojë aleancën e pazakontë të PD me PS në zgjedhjet e 2000 për Himarën, detyrohem t'i kujtoj sërish një thënie të De Golit "politika është realitet, ai ndryshon çdo ditë, për t'u përballur me të na nevojiten parime dhe objektiva dhe jo ndonjë program i caktuar". Dhe objektivi i PD në rastin e bashkëpunimit me PBDNJ, prirem të besoj se ishte thjesht një pragmatizëm politik.

Përkundrazi ajo që po ndodh sot me Himarën mund t'i shërbejë sipas mendimit tim PS, e cila duke humbur në jug (aty siç e dimë reagimet kundërgreke janë më të mëdha se kudo tjetër për shumë arsye) kërkon tashmë të rifitojë pikë përpara opinionit publik me pikërisht me ato mjete që dikur kritikonte se përdoreshin nga Partia Demokratike e Sali Berishës. Madje bëhet edhe më agresive, nis mbështetesit e saj drejt Himarës, pasi kanë protestuar përpara selive të dy partive shqiptare, të cilat nuk bënë asgjë më shumë veç një koalicioni në një zonë të caktuar të Republikës së Shqipërisë.

Pra kush po i ngre dallgët mbi Himarë?

Shkrimin për botim në Trepca.net e dërgoi më 15 tetor 2003 , z. Çerçiz Loloçi.