|  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  | 

Mitrovicë: Kryetari Spahija ka pritur shefin e Zyrës për Kosovë në Departamenitn e Shtetit Amerikan, Michael Bosshart

Mitrovicë, 17 tetor 2003 / TN / Hysni SYLA ( Zyrtar për informim i KK )

 

Kryetari i Kuvendit të Komunës, Faruk Spahija ka pritur shefin e Zyrës për Kosovë në Departamenitn e Shtetit Amerikan, Michael Bosshart, me të cilin ka biseduar për zhvillimet aktuale në komunën e Mitrovicës, me theks të posaqëm në pasojat e funksionimit të  strukturave paralele serbe në pjesën veriore të qytetit.

 

Shefi i Zyrës për Kosovë në Departamentin e Shtetit Amerikan që në fillim ka shpreh interesimin e tij për gjendjen e përgjithshme dhe për zhvillimet e fundit në komunën e Mitrovicës.

 

Kryetari Spahija  me këtë rast i ka thënë zyrtarit të lartë të Departamentit të Shtetit Amerikan se kohën e fundit në komunë janë arritur rezultate të dukshme në stabilizimin e gjendjes së sigurisë, në qarkullimin e lirë të qytetarëve dhe disa rezultate fillestare në integrimin administrativ të qytetit, por që këto janë akoma larg atyre çfarë do të duhej të ishin.

 

Sipas kryetarit Spahija, pengesë kryesore për procesin e integrimit të qytetit, por edhe  për procesin e kthimit të personave të zhvendosur në pronat e tyre, në të gjitha pjesët e qytetit, paraqet funksionimi i papenguar i strukturave paralele serbe në veri të qytetit, që është  konfirmuar edhe në raportin e fundit i OSBE-së.

 

Duke u ndërlidhur me raportin e fundit të misionit të OSBE-së në Kosovë, ku rekomandohet tolerancë edhe për një kohë ndaj strukurave paralele serbe, përkundër faktit se ato vazhdimisht u kanë sjellur dëme procesve demokratike dhe procesit të integrimit të qytetit, kryetari Spahija ka thënë se tolerimi i mëtutjeshëm i këtyre strukturave do të ishte shumë i dëmshëm për implementimin e ligjit dhe stabilizimin e situatës në komunë, duke kritikuar njëkohësisht neglizhencën e Misionit të Kombeve të Bashkuara për shkak të mosshuarjes së strukurave paralele dhe të mosshtrirjes së pushtetit të institucioneve vendore në veri të Mitrovicës.

 

Rekomandimin e OSBE-së për të patur tolerancë edhe për një kohë ndaj strukturave paralele serbe, kryetari Spahija e ka vlerësuar si  ikje nga zgjidhja e problemeve, duke shtuar se nëse vazhdohet kështu, problemet vetëm do të grumbullohen edhe më shumë dhe do të qojnë drejtë radikalizimit të gjendjes në komunë.  

 

Në fund, kryetari Spahija i ka thënë shefit të Zyrës për Kosovë në Departamentin e Shtetit Amerikan se për të penguar një radikalizim të gjendjes, strukturat paralele duhet të shuhen menjëherë, ashtu sikur që  duhet të  implementohet me konsekuencë ligji në tërë vendin.

 

Shefi i Zyrës për Kosovë në Departamentin e Shtetit Amerikan, Michael Bosshart, pasi që ka falenderuar kryetarin Spahija për informacionet lidhur me gjendjen në komunën e Mitrovicës, është shprehur se Mitrovica është në fokus të interesimit të administratës amerikane.