Mitrovicë: Kryetari Spahija, ka pritur komandantin e ri të BSHVL-së, gjeneralin Bernard Rater

Mitrovicë, 17 tetor 2003 / TN / Hysni SYLA ( Zyrtar për informim i KK )

Kryetari i Kuvendit të Komunës, Faruk Spahija, ka pritur komandantin e ri të BSHVL-së, gjeneralin Bernard Rater, me të cilin kanë biseduar për zhvillimet aktuale në komunë. Bashkëbiseduesit me këtë rast kanë vlerësuar se situata e sigurisë në komunë është e mirë dhe se përparimet që janë bërë në këtë fushë janë të dukshme.

Gjenerali Rater ka thënë se për këtë dhe me qëllim të lehtësimit të qarkullimit të lirë të qytetarëve, në të dyja anët e lumit Ibër dhe përreth urave mbi të, është zvogluar efektivi ushtarak dhe janë hequr formalitetet tjera që ekzistonin deri kohë më parë. Ndërkaq, kryetari Spahija lidhur me këtë ka thënë se progresi dhe ecuritë pozitive që janë shënuar në qarkullimin e lirë të qytetarëve dhe përgjithësisht në përmisimin e situatës të sigurisë, janë rezultat edhe angazhimit pozitiv të vetë qytetarëve dhe strukturave të pushtetit lokal në këtë drejtim.

Megjithëkëte, në fokus të bisedës midis kryetaritSpahija dhe gjeneralit Rater ishte çështja e kthimit të të zhvendosurve në pronat e tyre në tërë territorin e komunës. Duke shprehur interesimin e tij për kthimin e ashkalive, romëve dhe serbëve në pjesën jugore të qytetit, gjenerali Rater ka thënë se kjo është kërkesë dhe vullneti i bashkësisë ndërkombëtare, në ç’drejtim duhet të japin kontributin e tyre të gjithë faktorët relevantë në komunë.

Kryetari Spahija i ka thënë gjeneralit Rater se strukturat komunale dhe qytetarët e komunës kaherë kanë shprehur gadishmërinë e tyre për të krijuar kushte për kthim të qytetarëve të zhvendosur nga pjesa jugore, duke kërkuar njëkohësisht që e njejta gjë të bëhet edhe kur është fjala për kthimin e shqipatrëve të zhvendosur me dhunë në pjesën veriore të qytetit.

Kryetari i Kuvendit të Komunës, Faruk Spahija poashtu i ka thënë gjeneralit Rater se një gadishmëri e këtillë nuk është vërejtur as tek vetë serbët, por as tek përfaqësuesit e bashkësisë ndërkombëtare që janë të pranishëm në Mitrovicë.

Sipas kryetarit Spahija, qytetarët dhe pushteti lokal kanë fituar përshtypjen se kjo bëhet me qëllim që të pengohet kthimi i shqiptarëve në pjesën veriore, dëshira dhe vullneti i të cilëve po pengohet nga ata që janë përgjegjës për të krijuar kushte për këtë.

Në fund të bisedës, kryetari Spahija ka shpreh edhe pakanqësinë e tij me mosreagimin akoma të administratës së UNMIK-ut për ndërprerjen e dukurisë së blerjes të pronave të shqiptarëve me mjete të Qeverisë së Serbisë. “Si duket ekziston projekti i posaqëm i Qeverisë së Serbisë për t’i blerë shtëpitë e shqipatrëve.

Kjo është shumë e qartë, sepse Qeveria e Serbisë mund t’i blejë shtëpitë e shumta të serbëve që janë atje në shitje, por këtë nuk e bënë, ngase ka për qëllim spastrimin e asaj pjese të qytetit edhe nga ata shqiptarë që kanë vendosur te jetojnë akoma aty”, ka thënë kryetari Spahija.