Mitrovicë: Kryetari i Spahija dënon ashpër incidentin e keqëbërsëve në pjesën jugore të qytetit

Mitrovicë: Kryetari Spahija dënon ashpër incidentin e keqëbërsëve në pjesën jugore të qytetit

17 tetor 2003 / TN / Hysni SYLA ( Zyrtar për informim i KK )

Mitrovicë, 16 tetor 2003 - Në fokus të aktiviteteve të pushtetit lokal dhe të udhëheqëjes komunale në kohën e fundit, ka qenë angazhimi për kthimin e personave të zhvendosur në pronat e tyre në tërë territorin e komunës.

Në kuadër të këtyre angazhimeve, ditë më parë është biseduar me qytetarët e lagjës “2 Korriku” për mundësinë e rindërtimit të shtatë shtëpive, përkatësisht të kthimit të shtatë familjeve të minoritetit ashkalinj, me ç’rast nga rregullimi i infrastrukturës do të përfitonin edhe banorët tjerë të lagjës. Ishte vlerësim i banorëve të lagjës se në këtë drejtim nuk do të ketë pengesa dhe se rindërtimi mund të fillojë menjëherë.

Duke u bazuar në këto vlerësime, rindërtimi filloi të hënën. Mirëpo, gjatë natës në mes të martës dhe mërkurës të kësaj jave, persona të papërgjegjshëm keqbërës, kanë dëmtuar themelet e dy shtëpive të filluara së rindërtuari, gjë që paraqet një imazh të keq para faktorit ndërkombëtarë në kohën kur pushteti lokal në kontaktet me përfaqësuesit e UNMIK-ut, KFOR-it dhe të përfaqësuesve tjerë të organizmave ndërkombëtarë po bënë përpjekje për ndërprerjen e shitblerjes së pronave të shqiptarëve në “Kodrën e Minatotrëve” dhe kthimin e shqiptarëve të zhvendosur në pjesën veriore të qytetit.

Kryetari i Kuvendit të Komunës Faruk Spahija e dënon ashpër këtë incident dhe apelon tek qytetarët që të denoncojnë keqbërësit, të cilët me këto veprime vetëm se u bëjnë shërbim të keq bshakëqytetarëve të tyre të zhvendosur, të cilët aktualisht jetojnë në kushte të rënda në pjesën jugore të qytetit.