Shoqata “Labëria” proteston per Himaren

Shoqata “Labëria” proteston për Himaren

17 tetor 2003 / TN

Opinioni mbarëlab e ai gjithshqiptar, nëpërmjet medias dhe debateve në to,mësoi për aktin e rëndë antishqiptar e tepër provokues në qytetin e Himarës, ku një grup njerëzish, me flamuj grekë në duar e me inskenime të dala boje, protestonin para bashkisë së qytetit duke hedhur parrulla antishqiptare, duke nëpërkëmbur simbolet tona kombëtare si dhe duke bërë provokime të rënda për vendin tonë si qendër e "Al Qaedës" e duke minuar marrëdhëniet e mirëkuptimit ndërfetar, aq karakteristik për vendin e popullin shqiptar.

Shoqata mbarëkombëtare "Labëria", si shprehëse e mbrojtëse e vlerave më të mira të trevës së vet, anëtarët e simpatizantët e saj dhe mbarë pupullsia e Labërisë, duke e vlerësuar aktin jo thjesht si veprim të një "grupi të vogël njerëzish", por si një veprim të përsëritur, të paramenduar e të organizuar, me prapavijë politike antishqiptare e shoviniste të kahershme në kohë, por edhe në këto vite të fundit të tranzicionit shqiptar, me prapavijë, nxitje e organizim, kryesisht nga jashtë dhe me mbështetje të segmenteve të caktuara brenda vendit tonë, duke e ndier rëndë ofendimin e bërë në nëpërkëmbje e shkelje të dinjitetit, të krenarisë dhe të unitetit tonë kombëtar, përfshi edhe simbolet tona kombëtare, me përpjekjet moderne të viteve të fundit për tjetërsimin e trojeve tona etnike.

Së pari, protestojmë energjikisht pranë organeve të shtetit shqiptar dhe kërkojmë prej tyre të veprojnë me shpejtësi e përgjegjësi atdhetare e ligjore, për të zbardhur çështjen duke e çuar atë deri në fund, duke vënë para përgjegjësisë ligjore jo vetëm ata që demonstronin, por veçanërisht ata që i organizojnë këto veprime antishqiptare e antikushtetuese.

Së dyti, sqarojmë edhe njëherë se, krahina e Himarës ka qenë, është dhe do të jetë pjesë e pandarë dhe e patjetërsueshme e trevës së Labërisë. Himariotët autoktonë, si pjesë e qenësishme historike dhe bashkëkohore e komunitetit lab, janë edhe pjesë e pandarë e krenarisë dhe e lavdisë së trevës së Labërisë në fushën atdhetare, të cilën e kanë materializuar me gjakun e bijve të vet, të derdhur ndër shekuj për mbrojtjen e tërësisë së trojeve shqiptare si një e tërë dhe e pandashme. Historikisht popullsia e Himarës, në lidhje të ngushta me popullsinë e gjithë trevës së Labërisë, nuk ka pranuar dhe nuk ju është nënshtruar synimeve e veprimeve antishqiptare të shovinistëve tradicionalë, por edhe atyre modernë grekë.

Me gjakun e derdhur për komb dhe Atdhe nuk mund të luaj kërkush. Ndaj dhe përkrahim rininë e zjarrtë atdhetare vlonjate në aktin e tyre të shprehjes së revoltës atdhetare, duke valëvitur anë e kënd flamurin tonë kombëtar. Në të njëjtën kohë u kujtojmë edhe njëherë organizatorëve dhe prapavijës së këtij akti antishqiptar se ajo që nuk u realizua ndër shekuj për tjetërsimin e trojeve shqiptare, aq më tepër nuk mund të ndodhë sot, në kushtet kur synojmë e luftojmë të futemi në Evropën e integruar.


PËR KRYESINË E SHOQATËS KULTURORE ATDHETARE "LABËRIA"

KRYETARI
Prof. Assoc.Dr.Ago Nezha

SEKRETARI I PERGJITHSHEM
Xhelil Çeli
Tiranë, më 14.10 2003