KRYESIA E LDK-së DEGA NË SUEDI PËRSHËNDETË PREZENTIMIN E DENJË TË PRESIDENTIT TË KOSOVËS DHE KRYETARIT TË KUVENDIT TË KOSOVËS NË TAKIMIN E VJENËS

SUEDI, 16 tetor 2003 / Nga Dega e LDK-së në Suedi - Në takimin e djeshëm të Kryesisë së LDK-së Dega në Suedi, u përshëndet dhe u përkrah fuqishëm pjesëmarrja dhe prezentimi i denjë i drejtuesve të institucioneve më të larta të shtetit të Kosovës, pra Presidentit të Kosovës Dr. Ibrahim Rugova dhe Kryetarit të Kuvendit të Kosovës Akademik Nexhat Daci, në takimin e Vjenës të 14 tetorit.

Takimi i Vjenës më 14 tetor është një "thyerje e akullit" për fillimin e bisedave mes Kosovës dhe Beogradit për disa çështje teknike, të cilat për Kosovën janë mjaft të rëndësishme si në aspektin politik ashtu edhe në atë ekonomik. Është shumë me rëndësi që të bisedohet për problemet e mbetura me Sërbinë si zbardhja e fatit të të zhdukurve, furnizimi me energji elektrike, regjistrave katastral, kërkesa për dëmshpërblim për dëmet e shkaktuara gjatë luftës, kthimin e fondit pensional, njohjen e targave të automjeteve etj, si dhe do të përshpejtojë zgjidhjen e statusit final të Kosovës – tha mes tjerash kryetari i kësajë Dege z. Hysen Ibrahimi.

Ndërsa nënkryetari i Degës, z. Osman Ahmetgjekaj, i cili përshëndetë vendimin e Presidentit Rugova dhe Kryeparlamentarit Daci për pjesëmarrje në takimin e Vjenës duke e vlerësuar këtë takim në funksion të njohjes së Pavarësisë së Kosovës dhe shtoi: Nuk ka pse ti frikohemi dialogut me Beogradin, ngase shqiptarët nuk i kanë duart e gjakosura siç i ka pala e kundërt.

Pjesëmarrja e Presidentit të Kosovës në takimin e Vjenës ishte përfaqësi e tërë popullit të Kosovës, i cili edhe një herë para faktorit ndërkombëtarë përsëriti kërkesat e popullit të Kosovës për Pavarësi, ndërsa pjesëmarrja e Kryeparlamentarit Daci në atë takim ishte mbështetja e Parlamentit të Kosovës kërkesës së popullit të Kosovës për Pavarësi – përfundoi z. Osman Ahmetgjekaj, nënkryetar.

Më tej fjalën e mori sekretari i kësajë Dege z. Afrim Musliu, i cili pasi që përshëndeti prezentimin e denjë të Presidentit Rugova dhe Kryeparlamentarit Daci në takimin e Vjenës, tha: Kush pohon se veprimet apo vendimet e Presidentit të Kosovës Dr. Ibrahim Rugova nuk janë në të mirë të popullit shqiptar dhe drejt Pavarësimit të Kosovës, atëherë ai apo ata kanë synim të njejtë armiqësor për Kosovën sikurse edhe Beogradi.

Duhet më në fund të kuptojnë ata të cilët mundohen të rikthejnë kohën e bajraktarllëqeve në Kosovë, se bajraktarllëqet nuk shpiejnë përpara dhe se proçesi i Pavarësisë së Kosovës ka filluar dhe do të mbarojë me Presidentin Rugova. Krerët e Institucioneve të Kosovës duhet të punojnë në të mirë të popullit, mu ashtu siç kanë vepruar Presidenti i Kosovës dhe Kryetari i Kuvendit të Kosovës, e jo simbas diktateve të individëve të ndryshëm siç ka (mos)vepruar Kryeministri i Kosovës.

Në shtetet perëndimore me traditë shumëvjeçare demokratike, kryeministrat nuk punojnë me diktate partiake apo të individëve të ndryshëm, mirëpo poqë se vie deri tek ajo, atëherë për shkak të ndërgjegjjes, ata japin dorëheqje – përfundoi fjalën e vet z. Afrim Musliu, sekretar.

Pati edhe diskutime të shumta nga të pranishmit, të cilët njëzërit në emër të LDK-së Dega në Suedi dhe në emër të anëtarësisë së gjërë dhe simpatizatëve të shumtë të LDK-së në Suedi, dërguan mbështetjet dhe përshëndetjet e tyre Institucioneve më të larta të shtetit të Kosovës, për prezentimin e tyre në takimin e Vjenës, si dhe qëndrimin e tyre për njohjen e Pavarësisë së Kosovës.