Përmbajtja:

• Presidenti Rugova përgëzon Papa Gjon Palin II, me rastin e 25- vjetorit të pontifikimit

• Nga Serbia në Kosovë u sollën edhe 40 trupa të viktimave shqiptare nga viti 1999

• U mbajt seanca e rregullt e Kvendit të Kosovës

• Ministri Sadriu tha se procesi i privatizimit duhet të vazhdojë

• Këshilli për ngritjen e shtatores së Agim Ramadanit në Gjilan vendos për shpalljen e konkursit

• Forumi i Gruas i LDK mbështet prezentimin e Presidentit dhe të Kryetarit të Kuvendit në takimin e Vjenës

• Në një pritë të organizuar, dje në një fshat afër Sëkënderajt është vrarë Xhevdet Ahmet Behrami

• Politikani serb Labus ka vlerësuar se Beogradi kurrë më nuk do të sundojë në Kosovë

• KKSHA-ja OKB-së: Respekto vullnetin e popullit të Kosovës

• Këshilli i NATO-s shpreh kënaqësi që në Vjenë filluan takimet e para ndërmjet Prishtinës dhe Beogradit

• Franca e Rusia përshëndetën fillimin e dialogut ndërmjet Prishtinës dhe Beogadit

• Një ekspert gjerman thotë se problemi i Kosovës duhet të zgjidhet para se Serbia të hyjë në BE

• Nowicki sot kthehet në Kosovë

• Numri i krimeve në rajonin e Mitrovicës në këtë javë shënon rënie të vogël

• Në Pejë u përkujtuan 3600 viktimat nga viti 1944/1945

• Në morgun e Rahovecit është bërë identifikimi i kufomës së Ajet Beqirit

• Policia ka bllokuar 36 kilogram heroinë në pikën kufitare ndërmjet Kosovës dhe Shqipërisë

• Aleanca e Biznesit do të fillojë organizimin e projektit: "Java e biznesit kosovar"

• Zëvendëskryeministri serb thotë se Beogradi është i gatshëm edhe për bisedime për statusin e Kosovës

• Forumi Shqiptar i Mediave të Lira kërkon shkarkimin e ministrit

• Përplasja e një feriboti në Gjirirn e Nju Jorkut shkaktoi vdekjen e të pakten 10 personave

• Forcat izraelite kanë vrarë një palesitnez; fraksionet palestineze mohojnë të kenë sulmuar autokolonën amerikane

• Papa Gjon Pali shënon 25-vjetorin e tij në krye të Kishës Katolike Romane

• Gjermania, Franca dhe Rusia, janë pajtuar të votojnë për rezolutën amerikane për të ardhmen e Irakut

• Policia palestineze ka arrestuar tre militantë palestinezë në lidhje me sulmin kundër autokolonës diplomatike amerikane

• Shtyhet votimi për rezolutën e Irakut

• Rritet numri i të uriturve në botë

• Në Nju Delhi është përdhunuar një diplomate zvicerane

Presidenti Rugova përgëzon Papa Gjon Palin II, me rastin e 25- vjetorit të pontifikimit

 

Prishtinë, 16 tetor 2003 - Presidenti i Kosovës, Dr. Ibrahim Rugova, i ka dërguar sot një telegram urimi Atit të Shenjtë, Papa Gjon Pali II, me rastin e 25-vjetorit të pontifikimit të tij. Në përgëzimet e Presidentit Rugova thuhet:

"Me rastin e 25-vjetorit të Pontifikimit të Shenjtërisë Tuaj, pranoni urimet e mia të përzemërta dhe të popullit të Kosovës.

Gjatë 25 vjetëve të drejtimit të Shenjtërisë Tuaj në Vatikan, bota ka pasur ndryshime të mëdha në planin e mirëkuptimit dhe të bashkëpunimit.

Gjatë 25 vjetëve, Shenjtëria Juaj është bërë simbol i paqes dhe i lirisë së njerëzve dhe të kombeve.

Në këtë 25 vjetor të Shenjtërisë Tuaj, Ju shpreh një falënderim të madh për angazhimin që keni bërë për lirinë e vendit tim, Kosovës – Dardanisë antike, vendit të origjinës së Nënës Tereze.

Ati i Shenjtë,

Ju shpreh dëshirën time të vazhdoni të luteni për njohjen formale të pavarësisë së Kosovës, që do ta qetësonte popullin tim, këtë pjesë të Evropës e të botës, dhe do të shpejtonte integrimin e vendit tim në bashkësinë e kombeve të lira.

I dëshiroj Shenjtërisë Tuaj shëndet të mirë dhe jetë të gjatë", thuhet në fund të përgëzimeve të Presidenti Rugova drjtuar Papa Gjon Pali II.

 

 

Nga Serbia në Kosovë u sollën edhe 40 trupa të viktimave shqiptare nga viti 1999

 

Podujevë/Merdar, 16 tetor 2003 - Sot në vendkalimin kufitar Merdar mes Kosovës dhe Serbisë, u sollën mbetjet e 40 trupave të zhvarrosur në një varrezë masive në Batajnicë afër Beogradit. Forcat okupuese serbe në vitin 1999 nga Kosova i kishin transportuar në Serbi me qindra kufoma për të zdhukur gjurmët e krimeve.

Në Merdar ndodheshin edhe shumë nëna e familjarë të të zhdukurve që prisnin nëse në mesin e këtyre 40 trupave ndodhen më të dashurit e tyre të zhdukur.

Udhëheqësi i Zyrës së UNMIK-ut për të zhdukurit Hoze Baraibar deklaroi se numri i përgjithshëm i trupave të kthyer nga Serbia tani arrin në 145. Baraibar tha se me qindra mostra të ADN-së u janë dorëzuar autoriteteve serbe për të identifikuar edhe shumë trupa të tjerë që ndodhen në Serbi.

Të 40 trupat u dërguan në morgun e Rahovecit, ku ekspertët e mjekësisë ligjore do të bëjnë idenfikimin e tyre.

 

U mbajt seanca e rregullt e Kvendit të Kosovës

 

Prishtinë, 16 tetor 2003 - Në seancën sotme, deputetët e Kuvendit të Kosovës miratuan me shumicë votash Ligjin për pesticidet, ndërkaq në parim miratuan edhe Ligjin për sportet. Fillimisht këtë ligj e paraqiti ministri i dikasterit përkatës Behxhet Brajshori.

 

Sipas Brajshorit statusi i padefinuar i Kosovës po pengon zhvillimin e sporteve, por megjithatë ai tha se sportistët kosovarë po arrijnë rezultate të lakmueshme në arenën ndërkombëtare. Ai tha se ligji në fjalë përcakton parimet bazë në ushtrimin e veprimtarisë sportive si dhe mbështetjen institucionale.

 

Brajshori tha se "qëllimi i ligjit është përcaktimi i bartësve të verpimtarive sportive rreth menaxhimit me të, në radhë të parë, dhe ofrimi i një kornize për organizimin, kushtet dhe mënyrat e ushtrimit të veprimtarisë sportive si dhe për të drejtat dhe veprimet e organizatave sportive në lidhje me to".

Me kërkesën e koalicionit "Kthimi" rreth Projektligjit për qasje në dokumentet zyrtare, deputetët ndryshuan vetëm nenin 3 të këtij projektligji, dhe e shtynë për një seancë tjetër shqyrtimin e neneve të tjera.

 

 

Ministri Sadriu tha se procesi i privatizimit duhet të vazhdojë

 

Prishtinë, 16 tetor 2003 - Ali Sadriu, ministër i Ekonomisë dhe i Financave vlerësoi se privatizimi është një proces i domosdoshëm për zhvillimin ekonomik të Kosovës, andaj ai proces duhet të vazhdojë. Ali Sadriu këto komente i bëri pas takimit me Majkëll Boshart, shef i zyrës për Kosovën në Departamentin amerikan të Shtetit.

Ndërkaq Majkëll Boshart, theksoi se në takimin me ministrin Sadriu ka biseduar për çështjet e rëndësishme ekonomike dhe financiare të Kosovës, sidomos për privatizimin, i cili është një nga çështjet kryesore për Kosovën. Ai u shpreh se Qeveria amerikane shpreson që procesi i privatizimit do të vazhdojë, sepse është pjesë shumë e rëndësishme për modernizimin e ekonomisë dhe për zhvillimin ekonomik të Kosovës.

 

"Shpresojmë që vështirësitë rreth privatizimit do të tejkalohen shumë shpejt dhe ky proces mund të vazhdojë, sepse është proces i domosdoshëm për zhvillimin ekonomik të Kosovës", tha ky zyrtar amerikan, i cili po qëndron në Kosovë për t'u njohur së afërmi me gjendjen e përgjithshme.¨

 

 

Këshilli për ngritjen e shtatores së Agim Ramadanit në Gjilan vendos për shpalljen e konkursit

 

Gjilan, 16 tetor 2003 - Këshilli për ngritjen e shtatores së strategut të luftës Agim Ramadani, i përbërë nga përfaqësuesit e komunës së Gjilanit dhe Shoqata e veteranëve të luftës të Brigadës 138 "Agim Ramadani", në takimin e tij të sotëm, ka marrë vendim për shpalljen e konkursit për shtatoren e Agim Ramadanit, figura e të cilit ngërthen në vete jo vetëm karakterin e një ushtaraku të shkëlqyer, por edhe tiparet e një piktori dhe poeti të spikatur.

Të përkujtojmë se më 9 maj të këtij viti, në Gjilan, i është vënë gurthemeli shtatores së Agim Ramadanit, përpara Teatrit të qytetit, ku do të vendoset ajo pasi të jetë përzgjedhur punimi më i mirë i ofruar përmes konkursit publik që do të jetë i hapur deri më 30 nëntor 2003, ndërsa të drejtë pjesëmarrjeje kanë të gjithë krijuesit shqiptarë anekënd botës.

Xhemajl Hyseni, kryetar i këtij Këshilli (zëvendëskryetar i komunës së Gjilanit) tha se shtatorja duhet t`i përmbajë tiparet identifikuese të Agim Ramadanit dhe duhet të jetë një monument që do t`i përballojë edhe shekujt pas nesh. (I.M.)

 

 

Forumi i Gruas i LDK mbështet prezentimin e Presidentit dhe të Kryetarit të Kuvendit në takimin e Vjenës

 

Prishtinë, 16 tetor 2003 - Forumi i Gruas i LDK në takimin e sotëm ka përshëndetur dhe ka mbështetur fuqishëm pjesëmarrjen dhe prezentimin e denjë të përfaqësuesve të institucioneve më të larta të Kosovës, Presidenti i Kosovës Ibrahim Rugova dhe Kryetari i Kuvendit Nexhat Daci, në takimin e Vjenës duke e vlerësuar këtë takim në funksion të njohjes së Pavarësisë së Kosovës.

Me rastin e shenjtë të Lumnimit të Nënës Terezë, Forumi i Gruas i LDK përshëndet këtë ngjarje të madhe për të gjithë shqiptarët dhe për botën paqedashëse dhe falënderon Selinë e Shenjtë dhe Papa Gjon Palin II.

 

 

Në një pritë të organizuar, dje në një fshat afër Sëkënderajt është vrarë Xhevdet Ahmet Behrami

 

Skënderaj, 16 tetor 2003 - Dje rreth orës 16.00 në një pritë të organizuar është vrarë Xhevdet Ahmet Behrami (1961), baba i pesë fëmijëve, nga fshati Kotorr i Skënderajt.

Vrasja ka ndodhur në hyrje të fshatit Kotor, te deponia e mbeturinave, në momentin kur i ndjeri po kthehej në shtëpi me veturën e tij dhe po bartte mall për shitoren e vet. Më parë ishte bllokuar rruga dhe në momentin kur Xhevdeti është ndalur dhe ka hapur dritaren, mbi të janë shkrepur breshëri plumbash, disa prej tyre në kokë.

Policia menjeherë ka dalë në vendin e ngjarjes dhe po i zhvillon hetimet. Rruga nga fshati Kotor që shpie në Skënderaj prej mbrëmë e deri sot në orët e paraditës po mbahet e bllokuar.

Motivet e kësaj vrajseje nuk dihen, sikur as vrasësi(t). Sipas një burimi nga Skënderajt, motiv i vrasjes së Xhevdet Behramit mund të jetë se i ndjeri ka ditur për autorët e disa vrasjeve që kanë ndodhur pas luftës në këtë fshat.

Një kushëri i Nexhdet Behramit na deklaroi se i ndjeri nuk ka pasur kurrfarë konflikti me askënd, as familja e tij deh ka qenë i afërt me të gjithë.

Përdryshe kjo është vrasja e katërt në këtë fshat. Para një viti nga ky fshat është vrarë një kushëri i Xhevdeti, Refki Behrami.

Ndërkaq, në vitin 2000 është vrarë Xhafer Hajriz Behrami, drejtor shkolle në Çubrel, aktvist i dalluar i LDK-së dhe është plagosur rëndë djali i tij student, Baki Behrami, i cili ende ndodhet për shërim në Itali.

 

Po në këtë atentat është plagosur edhe Jetullah Behrami, profesor i Shkollës Teknike dhe anëtar i Kryesisë së LDK-së në Skënderaj dhe Faruk Xhafer Behrami. Ndërkaq në një tentim atentati në vitin 2001 ndaj Jetullah Behramit, plagoset vajza e tij, Behija.

Në vitin 2002 është vrarë Refki Zejnullah Behrami. Asnjëra perj këtyre vrasjeve nuk është ndriçuar.

Vrasja e djeshme ka shqetësuar pa masë banorët e fshatit Kotorr, sidomos familjet Behrami, të cilat kanë qenë në shenjestër të sulmeve mizore.

 

 

Politikani serb Labus ka vlerësuar se Beogradi kurrë më nuk do të sundojë në Kosovë

 

Vjenë, 16 tetor 2003 - Lideri i grupimit politik të Serbisë, G17 plus, Mirolub Labus ka vlerësuar se Beogradi kurrë më nuk do të sundojë në Kosovë. Në një intervistë për gazetën austriake "Prese", ai ka thënë se në Kosovë do të udhëheqin njerëzit që legjitimitetin do ta fitojnë nëpërmjet të zgjedhjeve, por që duhet të ketë vend edhe për serbët e Kosovës, ka thënë Labus. Sipas, qëllim kryesor i politikës serbe duhet të jetë kthimi i të zhvendosurve në Kosovë dhe siguria e tyre.

 

 

KKSHA-ja OKB-së: Respekto vullnetin e popullit të Kosovës

 

Uashington 16 tetor 2003 - Këshilli Kombëtar Shqiptaro Amerikan (KKSHA) vlerëson se vështirësitë në fillimin e bisedimeve teknike ndërmjet Kosovës dhe Serbisë ilustrojnë mjaft mirë parakushtet që duhen plotësuar për të sjellë rezultate të suksesshme jo vetëm në bisedimet teknike, por gjithashtu edhe për suksesin e proceseve që do të vendosin statusin përfundimtar të Kosovës.

KKSHA thekson se përmes administratës së saj, OKB-ja e drejtuar nga anëtarët e Bashkimit Evropian, ende po e vonon procesin e transferimit të pushtetit tek instucionet e Kosovës edhe pse po bëhen 4 vjet që prej fillimit të administrimit të saj dhe 3 vjet që prej rrëzimit të një tjetër diktatori brutal.

 

Për më tepër, Kosova ka mbajtur tre herë zgjedhje elektorale të lira dhe të drejta të cilat kanë qenë shembullore për gjithë Ballkanin.

Ndërkohë që kosovarët duhet të negociojnë, ata nuk duhet të detyrohen të negociojnë nga pozita të pabarabarta për marrëveshjet e të ardhmes. Një detyrim i tillë është në kundërshtim me parimet e demokracisë dhe shpërfill popullin e Kosovës.

Këshilli Kombëtar Shqiptaro Amerikan do të përkrahë vetëm ato marrëveshje që bazohen në themelet e vullnetit të popullit të Kosovës.

 

 

Këshilli i NATO-s shpreh kënaqësi që në Vjenë filluan takimet e para ndërmjet Prishtinës dhe Beogradit

 

Bruksel, 16 tetor 2003 - Këshilli i NATO-s, ka shprehur kënaqësi që në Vjenë filluan takimet e para ndërmjet Prishtinës dhe Beogradit. Një zyrtar i NATO-s në Bruksel ka thënë se bisedimet do ta lehtësojnë procesin në tërësi në mënyrë që në të ardhmen të mund të diskutohet edhe për statusin përfundimtar të Kosovës.

 

 

Franca e Rusia përshëndetën fillimin e dialogut ndërmjet Prishtinës dhe Beogadit

 

Paris/ Moskë, 16 tetor 2003 - Fillimi i dialogut për çështje teknike ndërmjet Prishtinës e Beogradit në Vjenë është përshëndetur nga Ministria e Punëve të Jashtme të Francës. Kjo ministri ka shfaqur shpresën se bisedat për çështje teknike do t'o kontribuojnë kthimit të sërishëm të besimit dhe eliminimin e pasojave të së kaluarës së dhimbshme.

Edhe Rusia mbështet fillimin e dialogut të drejtpërdrejtë për çështje praktike ndërmjet Beogradit dhe Prishtinës, kanë thënë dje zyrtarët në Ministrinë e Punëve të Jashtme të Rusisë. Ata kanë thënë se është herët të diskutohen aspekte politike të çështjes së Kosovës, përfshirë këtu edhe statusin e ardhshëm politik të saj.

 

 

Një ekspert gjerman thotë se problemi i Kosovës duhet të zgjidhet para se Serbia të hyjë në BE

 

Bon, 16 tetor 2003 - Problemi i Kosovës duhet të zgjidhet para se Serbia të hyjë në Bashkimin Evropian. Po ashtu formula e njohur "standardet para statusit" duhet të zëvendësohet me formulën standardet së bashku me statusin.

 

Kështu u shpreh Rafael Birman ekspert për çështje të integrimit Evropian pranë Universitetit të Bonit. Ai shtoi se me këtë rast duhet të dominojë çështja e kthimit të serbëve si një nga standardet. Sipas ekspertit gjerman, shqiptarëve duhet t'u bëhet e qartë se nëse nuk duan apo nuk mund t'i integrojnë pakicat, nuk ka pavarësi të Kosovës.

Duke komentuar takimin e Vjenës Rafael Birman tha se shqiptarët duhet të llogarisin mirë që të mos humbasin mbështetjen e bashkësisë ndërkombëtare dhe që sa më shpejt të kthehen në kërkim të kompromisit e jo të insistojnë tash në kërkesa maksimaliste.

 

Ndërkaq, duke folur për Serbinë ai tha se duhet të dëshmojë interesim për zgjidhjen e çështjes së statusit të Kosovës, sepse Serbia ka shumë probleme të mëdha me të cilat duhet të merret në të ardhmen siç është korrupsioni, kriminaliteti i organizuar dhe reformat demokratike.

 

 

Nowicki sot kthehet në Kosovë

 

Prishtinë, 15 tetor - Ombudspersoni i Kosovës z. Marek Antoni Nowicki, pas një intervenimi me sukses në zemër dhe shërimit të plotë, sot kthehet në Kosovë. Ombudspersoni i Kosovës do të vazhdojë me punën e tij në institucionin e Ombudspersonit, që ka të bëjë me mbrojtjen dhe përmirësimin e të drejtave njeriut në Kosovë.

Z. Nowicki, kah mesi i muajit gusht të këtij viti për shkak të disa problemeve në zemër është shtrirë në Qendrën Klinike Universitare të Prishtinës, e pastaj në spitalin e UNMIK-ut.

Pas trajtimit mjekësor dyjavor në Prishtinë z. Nowicki u transferua në Poloni ku pati intervenim kirurgjik.

 

 

Numri i krimeve në rajonin e Mitrovicës në këtë javë shënon rënie të vogël

 

Mitrovicë, 16 tetor 2003 - Numri i krimeve në rajonin e Mitrovicës të raportuara në këtë javë shënon rënie të vogël në krahasim me krimet e raportuara javën e kaluara. Ndërkohë që numri i aksidenteve në trafik ka mbetur gati në të njëjtin nivel, thanë ndërkombëtarët në Mitrovicë.

 

 

Në Pejë u përkujtuan 3600 viktimat nga viti 1944/1945

 

Pejë, 16 tetor 2003 - Në Pejë në një akademi përkujtimore u përkujtuan 3600 viktimat e masakrës së Tabjes të vitit 1944/1945, të organizuar nga organizata joqeveritare Shoqata për Mbrojtjen e Monumenteve Kulturo-Historike.

 

Njëri nga të mbijeturarit e kësaj masakre prof. Ahmet Kelmendi rikujtoi masakrën e asaj kohe në të cilën ishin pushkatuar mijëra banorë të Pejës nga komunistët serbë.

 

Ata më pas janë varrosur në një vend të përbashkët në Tabje të Pejës. Në 59-vjetorin e kësaj masakre akademia ka bashkuar të mbijetuarit e saj dhe familjarët e viktimave, të cilëve u janë prezentuar edhe shifra të tjera trishtuese për shqiptarët e pushkatuar nga partizanët në të gjitha qytetet shqiptare.

 

 

Në morgun e Rahovecit është bërë identifikimi i kufomës së Ajet Beqirit

 

Skënderaj, 16 tetor 2003 - Zyra për të humburit në Skënderaj njoftoi se në morgun e Rahovecit është bërë identifikimi i kufomës së Ajet Beqirit, ish-pjesëtar i UÇK-së. Varrimi i tij do të bëhet më 21 të këtij muaji në Varrezat e Dëshmorëve në Skënderaj. I ndjeri Beqiri gjendej në listën e të zhdukurëve që nga prilli i vitit 1999.

 

 

Policia ka bllokuar 36 kilogram heroinë në pikën kufitare ndërmjet Kosovës dhe Shqipërisë

 

Prizren, 16 tetor 2003 - Policia ndërkombëtare në Kosovë ka konfiskuar 36 kilogram heroinë që ishte transportuar nga Shqipëria. Tre persona, një shqiptar i Kosovës e dy shtetas të Shqipërisë ishin arrestuar gjatë javës së kaluar pasi në makinën e tyre afër Prizrenit ishte gjetur sasia e përmendur e drogës.

 

Heroina është konfiskuar në pikën kufitare ndërmjet Kosovës dhe Shqipërisë në Vërmicë dhe është gjetur në veturën me regjistrim austriak, e cila ishte ndaluar për një kontrollë rutinore.

Njoftohet se vlera e pakove të konfiskuara është 1.5 milionë euro. Ky është konfiskimi më i madh i heroinës në katër vitet e fundit në Kosovë.

 

 

Aleanca e Biznesit do të fillojë organizimin e projektit: "Java e biznesit kosovar"

 

Prishtinë, 16 tetor 2003 - Aleanca e Biznesit që nga 17 tetori do të fillojë organizimin e projektit të titulluar "Java e biznesit kosovar", i cili synon krijimin e kanaleve të reja për komunikim si dhe ngritjen e konsumit të artikujve vendorë, tha kryetar i saj Agim Shahini.

 

Hartimi i këtij projekti është motivuar në faktin se ekonomia e prodhimeve vendore dhe shërbimeve të tyre është në një krizë të thellë. Prandaj duhet ndërmarrë aktivitete efektive për afirmimin dhe mbështetjen e saj.

Deri më tash për prezentimin e prodhimeve të tyre janë paraqitur 40 prodhues vendorë. Projekti "Java e biznesit kosovar" mbështetet nga "Rinvesti" dhe do të financohet nga USAID-i.

 

 

Zëvendëskryeministri serb thotë se Beogradi është i gatshëm edhe për bisedime për statusin e Kosovës

 

Beograd, 16 tetor 2003 - Zëvendëskryeministri i Serbisë, Nebojsha Çoviq në një konferencë për media në Beograd ka thënë se fjalimi i delegacionit të Shteteve të Bashkuara në bisedimet e Vjenës ishte shumë korekt, preciz dhe shumë konstruktiv.

 

Çoviq ka thënë se Beogradi është i gatshëm edhe për bisedime për statusin përfundimtar të Kosovës, duke thënë se ndërrimi i kufijve do të thotë se Kosova është e pavarur.

 

Ai mëtutje ka thënë se nëse shqiptarët demokratë në hapësirën e Kosovës kanë të drejtë që në referendum të deklarohen për Kosovën e pavarur, atëherë këtë të drejtë e kanë edhe serbët demokratë në Bosnjë e Hercegovinë.

 

Pastaj Nebojsha Çoviqi ka shtuar se kushedi se çka do të ndodhë në Maqedoni. Ai po ashtu ka kritikuar bashkësinë ndërkombëtare dhe UNMIK-un, që nuk kanë siguruar pjesëmarrje të pakicave kombëtare në delegacionin e Prishtinës për të cilin tha se ishte i spastruar etnikisht.

 

 

Forumi Shqiptar i Mediave të Lira kërkon shkarkimin e ministrit

 

Tiranë, 16 tetor 2003 - Në një reagim të Forumit Shqiptar të Mediave të Lira thuhet se gazetari i njohur i kanalit televizv "Vizion Plus", Ilir Babaramo, është qëlluar publikisht me grushta nga Ministri i Rendit Luan Rama dhe më pas nga bodigardët e tij, ndërkohë që ka qenë i ftuar në një pritje të organizuar nga Partia Socialiste në një lokal në Tiranë.

Gazetari Ilir Babaramo është qëlluar, pasi ka pranuar autorësinë e tij mbi një koment, mbi rezultatet negative në luftën kundër krimit në Shqipëri dhe për 'hobby'-t e Ministrit të Rendit për personazhe të botës muzikore.
Pas kësaj Ministri i Rendit, Luan Rama, ka qëlluar me grusht në fytyrë gazetarin dhe më pas bodigardët e tij kanë vazhduar dhunën derisa gazetari ka kaluar në një gjendje të rëndë fizike, por pa rrezik për jetën.

Forumi Shqiptar për Mediat e Lira shpreh indinjatën e tij për këtë ngjarje të rëndë, të paprecedent në historinë e politikës shqiptare dhe kërkon dorëheqjen urgjente të Ministrit të Rendit.

Akti i parë që duhet të bëjë Kryeministri Fatos Nano në shenjë reflektimi ndaj kësaj ngjarjeje të rëndë, duhet të jetë shkarkimi i Ministrit, nëse ai nuk jep vetë dorëheqjen. Dhuna fizike mbi një gazetar, - e ushtruar në mënyrë të drejtpërdrejtë nga një ministër, - është një akt i paprecedent në historinë e shtypit botëror, thekson në një reagim, Forumi Shqiptar i Mediave të Lira me seli në Tiranë.

 

 

Përplasja e një feriboti në Gjirirn e Nju Jorkut shkaktoi vdekjen e të pakten 10 personave

 

Nju Jork, 16 tetor 2003 – Autoritetet federale kanë filluar hetimet lidhur me prishjen e feribotit transportues, që shkaktoi vdekjen e të pakten 10 personave dhe lëndimin e shumë të tjerëve, kurse detyroi shumë udhëtarë që në panik të kërcejnë prej tij në ujërat e ftohta të Gjirit të Nju Jorkut, njofton Rojter.

 

Sipas këtij njoftim të pakten 42 vetë janë hospitalizuar, kurse të pakten tre syresh janë në gjendje kritike.
Prefekti i Nju Jorkut, Majkel Blumberg takohet sot me autoritetet e Bordit të transportit kombëtar për të shqyrtuar shkaqet e përplasjes së feribotit.

 

Ai ka thënë se s’ka kurrëfarë shenjash që tregojnë për diçka tjetër, pos që është aksident tragjik. Policia u ka thënë mediave vendore se asistenti i kapitenit nga ndjenja e përgjegjësisë ka bërë përpjekje për të qëlluar vetëveten në kokë me revole, por është lënduar vetëm në dorë. Sipas vlerësimit, në momentin e aksidentitt 1,500 vetë kanë qenë në bord, kurse feriboti mund të bartë deri në 6 mijë njerëz.

 

 

Forcat izraelite kanë vrarë një palesitnez; fraksionet palestineze mohojnë të kenë sulmuar autokolonën amerikane

 

Rafah, 16 tetor 2003 – Forcat izraelite kanë vrarë sot në mëngjes (e enjte) një palesitnez dhe kanë plagosur edhe pesë të tjerë, ndër të cilët tre fëmijë, gjatë një ndërhyrjeje në “Al Barazil”, afër kampit Rafah, në jug të Rripit të Gazës, njoftojnë burimet e informacionit palestinez.

Po në këtë njoftim thuhet se të gjitha fraksionet e rezistencës palestineze mohojnë përgjegjësinë për sulmin me bombë të autokolonës amerikane afër Biet Hanunit, ku humben jetën tre roje të sigurimit amerikan.

 

 

Papa Gjon Pali shënon 25-vjetorin e tij në krye të Kishës Katolike Romane

 

Vatikan, 16 tetor 2003 – Papa Gjon Pali, i molisur nga mosha dhe lëngimi, ka shënuar sot (e enjte) 25-vjetorin e tij në krye të Kishës katolike, në një kohë që vëmendja e botës është përqendruar në arritjet e veta në të kaluarën dhe të ardhmen e paqartë, njofton Rojter.

 

Papa, në shoqëri me kardinalët dhe peshkopët nga mbarë bota, ka filluar ditën e tij të madhe duke nënshkruar sot në mëngjes një dokument të rëndësishëm për rolin e peshkopëve. Papa është zgjedhur më 16 tetor 2003 1978 dhe është papa i parë i zgjedhur nga radhët e peshkopëve joitalian në 455 vjetët e kaluara.

Kremtimet e përvjetorit të tij vazhdojnë të dielen me lumturimin e Nënës Tereze, që ishte një grua që e admironte thellë papa dhe simbolizon një rol të saj model për gjithë njerëzimin.

 

 

Gjermania, Franca dhe Rusia, janë pajtuar të votojnë për rezolutën amerikane për të ardhmen e Irakut

 

Bruksel, 16 tetor 2003 – Kundërshtarët e luftës në Irak, Gjermania, Franca dhe Rusia, janë pajtuar sot (e enjte) të votojnë për rezolutën amerikane për të ardhmen e Irakut në Këshillin e Sigurimit të Kombeve ttë Bashkuara, ka bërë të ditur kancelari gjerman, Gerhard Shreder, në një konferencë shtypi, vetëm disa orë para së është planifikuar të votohet në Nju Jork, njofton Rojter.

 

Lideri gjerman Shreder ka deklaruar kështu pas telefonatave triditëshe me presidentin francez, Zhak Shirak dhe presidentin rus, Vladimir Puttin, për të bashkërenduar pozicionet e tyre.

 

 

Policia palestineze ka arrestuar tre militantë palestinezë në lidhje me sulmin kundër autokolonës diplomatike amerikane

 

Gaza, 16 tetor 2003 - Policia palestineze ka arrestuar tre militantë të dyshimtë palestinezë në lidhje me sulmin me bombë kundër autokolonës diplomatike amerikane në Rripin e Gazës, ku u vranë tri roje të sigurimit amerikan, kanë bërë të ditur burimet e sigurimit palestinez, njofton Rojter.

 

Po kështu, njoftohet se që të tre të arrestuarit janë dërguar dje në burg fill pas sulmit me bombë. Ata ishin pjesëtarë të Komitetit të Rezistencës Popullore, që sherbën si ambrellë e grupeve militante palestineze, që kishin kryer sulmin me bombë të lartpërmendur dhe sulmet e tjera në Gazë.

 

 

Shtyhet votimi për rezolutën e Irakut

 

Nju Jork, 16 tetor 2003 - Shtetet e Bashkuara kanë pranuar të shtyjnë deri më vonë gjatë ditës votimin për një rezolutë të re për Irakun. Uashingtoni kërkon një votim të propozimit të tij për të ardhmen e Irakut, por Rusia, Gjermania dhe Franca duan më shumë kohë për të diskutuar tekstin.

Sekretari amerikan i Shtetit, Kolin Pauell tha për BBC-në, pas bisedave telefonike me anëtarë të Këshillit të Sigurimit, se ata po i afrohen konsensusit.

"Kam gjithnjë e më shumë besim se (rezoluta) do të aprovohet," tha zoti Pauell.

"Kjo do të tregojë se bashkësia ndërkombëtare po bashkohet përsëri dhe shpresoj se do t'i inkurajojë ato vende që duan të kontribuojnë më shumë, ose ushtarakisht, ose financiarisht ose politikisht," tha ai.

 

 

Rritet numri i të uriturve në botë

 

Johanesburg, 16 tetor 2003 - Agjencia e OKB-së për ushqimin thotë se bota nuk po bën aq sa duhet për të luftuar urinë. Në një raport të publikuar në Ditën Botërore të Ushqimit, hetuesi i posaçëm i OKB-së për të drejtën e ushqimit thotë se numri i njerëzve të uritur u rrit vitin e kaluar megjithë objektivin e OKB-së për të përgjysmuar numrin e të uriturve në botë deri në vitin 2015.

Si ilustrim i shkallës së problemit raporti vlerëson se çdo sekondë një fëmijë vdes nga pasojat e urisë. Ai thotë se gratë dhe vajzat kanë një mundësi shumë më të madhe të vuajnë nga kequshqimi sesa burrat dhe djemtë.

 

 

Në Nju Delhi është përdhunuar një diplomate zvicerane

 

Nju Delhi, 16 tetor 2003 - Një diplomate 36-vjeçare zvicerane të martën ka qenë viktimë e një përdhunimi në Nju Delhi dhe tani është kthyer në Zvicër, bëri të ditur i ngarkuari me punë në ambasadën zvicerane në Nju Delhi.

Dipomatja zvicerane është sulmuar në momentin kur po hynte në veturë pasi kishte dalë nga kenemaja, në të cilën po mbahej Festivali i 34-të i filmit.

Qeveria indiane ka thënë se do të bëje hetime të hollësishme për këtë ngjarje "shokante". Pesë policë, në mesin e tyre edhe një inspektor, të ngarkuar për siguri gjatë festivalit, janë suspenduar, por deri më tash askush nuk është arrestuar.

Mediat indiane kanë njoftuar se një grup burrash kanë sulmuar një grua, regjisore filmi, në të njëjtin vend, vetëm gjysmë ore pas sulmit mbi diplomaten zvicerane, por ka arritur të ikë dhe me atë rast ka marrë lëndime në kokë.

Sipas shënimeve të grupeve feministe, çdo orë në Indi sulmohet dhe dhunohet nga një grua, ndërkaq viktimat kryesore janë gratë nga shtresat e ulta indiane.

 

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |