Nga Kuvendi i Bashkësisë Islame të Kosovës

TRUPI ZGJEDHOR I BASHKËSISË ISLAEM TË KOSOVËS ZGJODHI UNANIMISHT MR. NAIM TËRNAVËN PËR KRYETAR TË KRYESISË SË BASHKËSISË ISLAME TË KOSOVËS


Me vota të fshehta kryetar i Kuvendit të Bashkësisë Islame të Kosovës u zgjodh delegati nga KBI i Bujanocit Ragmi ef. Destani, ndërsa nënkryetar delegati nga Medreseja e mesme “Alauddin” e Prishtinës Ahmet ef. Rama. Gjithashtu u zgjodhën edhe Komisionet e Kuvendit të BI-së: Komisioni fetaro-arsimor, Komisioni për parashtresa dhe ankesa i shkallës së dytë, Komisioni disiplinor, ai adminitrativo-juridik dhe Komisioni finansiar.

Ndërkaq në seancën e pasditës, Trup zgjedhor i Bashkësisë Islame të Kosovës të cilin e përbëjnë 55 anëtarë, ku marrin pjesë delegatët e Kuvendit të Bashkësisë Islame të Kosovës, kryetarët e Këshillave të Bashkësisë Islame të Kosovës dhe përfaqësuesit e Institucioneve të Bashkësisë Islame, pasi që kishte marrë propozimin e 25 këshillave të BI-së, me aklamacion në mënyrë unaime, zgjodhi mr. Naim Tërnavën kryetar të Kryesisë së Bashkësisë Islame të Kosovës.


MESAZHI I KRYETARIT TË RI TË KRYESISË SË BIK-UT

Kryetari i posazgjedhur myftiu, mr. Naim ef. Tërnava duke iu drjtuar trupit zgjedhor të Bashkësisë Islame tha:

“Të nderuar vëllezër dhe efendilerë! Më lejoni që t’ju falënderoj për besimin e dhënë në mënyrë unanime.

Falënderoj të gjithë Këshillat e Bashkësisë Islame që kanë pasur besimin në mua, dhe ju premtoj të gjithëve se do të mundohem të mos u zhgënjej, duke dhënë një kontribut të vazhdueshëm në ngritjen dhe lartësimin e fjalës së Allahut xh. sh. në trojet tona.

Më lejoni që të përshëndes paraardhësin tim dr. Rexhep Bojën me bashkëpunëtorët e tij, të cilët udhëhoqën Bashkësinë Islame të Kosovës - Bashkësinë më të madhe fetare në Kosovë, për kontributin e dhënë, për bashkëpunimin që ka patur gjatë kohës së udhëheqëjes, sinqeritetin, korrektësinë, gatishmërinë që të bëjë gjithëherë punë të mëdha për këtë fe e për këtë atdhe.

Andaj edhe tash, duke konsideruar që ky besim i dhënë nuk është privilegj, por është një obligim dhe përgjegjësi e madhe që ta udhëheqë masën islame në Kosovë, pa harruar këtu edhe Kosovën Lindore.

Unë nga ky vend, nga Kryesia e Bashkësisë Islame prej ku gjithëherë dolën burra të pathyeshëm që dhanë një kontribut në spektrin fetar e kombëtar shtrij dorën e bashkëpunimit me të gjithë Këshillat e Bashkësisë Islame në Kosovë, shtrij dorën e bashkëpunimit për Institucionet e Kosovës, për partitë politike dhe subjektet e tjera të Kosovës, por vetëm me një kusht në quarjen para dhe avansimin e çështjes së Kosovës deri në pavarësinë e plotë të saj.

Këtë do ta arrijmë vetëm atëherë kur fuqizohet ndenja e besimit në Allahun, në respektin e ndërsjellë, në respektin e fjalëve të Muhamedit a.s. dhe në në ngritjen e ndjenjës dhe vetëdijes së gjithëmbarshme. Unë shpresoj se do jemi ata që do të dimë të arrijmë qëllimet tona, si bashkësi dhe si popull, dhe si të tillë të jemi shembull edhe për të tjerët.

Të mos harrojmë se kryetari i Bashkësisë Islame nuk është thjesht vetëm kryetar i shiptarëve muslimanë, por është edhe i turqve, i boshnjakëve, i goranëve dhe të tjerve që i përkasin besimit islam. Të gjithë këta do të jenë nën ombrellën e Bashkësisë Islame të Kosovës në fuqizimin e shpirtit të tyre dhe të gjithë do të angazhohemi me ndihmën e Allahut që të qojme përpara proceset e filluara, në të mirë të fesë e të kombit”.

Më pas Kryetari para Trupit zgjedhor paraqiti edhe anëtarë e kabinetit të tij, d.t.th. anëtarët e Kryesisë së Bashkësisë Islame të Kosovës, të cilët në pako dhe në mënyrë unanime Trupi zgjedhor i miratoi.


Anëtarët e rinj të Kryesisë janë:

-Abdullah ef. Abdiu- (rajoni i Preshevës, Bujanocit dhe Medvegjës)
-Nexhmedin ef. Hoxha – (rajoni i Pejës, Klinës dhe Istogut (Burimit).
-Shemsi ef. Rrahimi – (rajoni i Mitrovicës, Vushtrrisë dhe Skënderajt)
-Ahmet ef. Sadriu- (rajoni i Ferizajt, Kaçanikut dhe Hanit të Elezit)
-Fatmir ef. Iljazi- (rajoni i Gjakovës, Deçanit, Malishëvës dhe Rahovecit)
-Ekrem Simnica- (rajoni i Prishtinës, Fushë Kosovës, Kastriotit, Podujevës (Besianës), Lipjanit dhe Drenasit).
- Ali Vezaj- (rajoni i Prizrenit, Suharekës (Therandës) dhe Sharrit (Dragashit)

Biografia

Naim Tërnava u lind më 7 janar 1961, në fshatin Lismir të komunës së Fushë Kosovës.

Shkollën fillore e kreu në vendlindje kurse Mederesë e mesme “Alaudin” në Prishtinë. Vazhdoi studimet në Universitetin “Al-Az’har” në Kajro dega e Apologetikës islame që i përfundoi me sukses në vitin 1984.

Menjëherë pas studimeve emrohet imam në fshatin Lismir. Në vitin shkollor 1985/86 emërohet professor i lëndës së Akaidit dhe Filozofisë islame në Medresenë e mesme “Alaudin” të Prishtinës.

Naim Tërnava, gjatë këtyre viteve të angazhimi të tij në strukturat e Bashkësisë Islame të Kosovës kreu shumë detyra dhe funksione me rëndësi në kuadër të Institucioneve të Bashkësisë Islame të Kosovës.

Ishte anëtarë i redaksisë së revistës “Dituria Islame” tri mandate, pastaj anëtar i Kryesisë së BI-së dy mandate nga viti 1990-1998.

Si ligjërues i Akaidit dhe Filozofisë Islame në FSI, filloi punën në vitin akademik 1994/95 ku aktualisht ligjëron lëndën e Filozofisë Islame.

Ka magjistruar më 2003 në Universitetin e Hapur Amerikan të Kajros, (American Open University, Cairo).
Në vitin 1995, zgjedhet drejtor i Medresesë “Alauddin” në dy mandate 1995-2003.

Gjatë luftës në Kosovë, më 09 mars 1998 Kryesia e BI-së formon Këshillin e Emergjencës, të parën e këtij lloji në Kosovë, dhe në krye të këtij këshilli emroi. Naim Tërnavën si kryetar, i cili Këshill pas luftës u tranferua në Shoqatë Humanitare “Bereqeti”.

Pas luftës në Kosovë, në vitin ’99 zgjedhet kryetar i Kuvendit të Bashkësisë Islame të Kosovës.

Gjatë kësaj kohe Naim Tërnava ka zhvilluar shumë takime zyrtare në nivele ndërkombëtare kudo nëpër botë, gjithnjë në interes të interes të çështjes së Kosovës.

Naim Tërnava, gjatë gjithë këtyre viteve në mënyrë të vazhdueshme u morë edhe me publicistikë duke botuar shtatë libra, disa dhjetëra artikuj, si në revista, gazeta vendore dhe të huaja.

Jeton vepron në Prishtinë dhe është babai i tre fëmijëve.