Përmbajtja:

• Presidenti Rugova tha se takimi i Vjenës ishte i suksesshëm drejt realizimit të pavarësisë së Kosovës

• Lari Rosin i zhgënjyer me qëndrimet jo konstruktive të disa politikanëve të Kosovës

• Ambasadori Montgomeri thotë se SHBA-të do të kenë një rol lehtësues në dialogun shqiptoro-serb

• Solana: Në Vjenë arritëm atë që dëshironim, madje edhe më mirë nga ç'prisnim

• Rexhepi tha se qeveria do të vazhdojë me unitetin e saj

• "Këshilli kombëtar serb" distancohet nga çdo vendim të delegacionit të Kosovës në bisedimet e Vjenës

• Qeveria e Shqipërisë përshëndet fillimin e dialogut mes Prishtinës dhe Beogradit

• Qeveria e Maqedonisë përshëndet fillimin e bisedimeve ndërmjet Prishtinës dhe Beogradit

• Naim Tërnava u zgjodh kryetar i ri i Bashkësisë Islame të Kosovës

• Intensifikohet bashkëpunimi ndërkufitar Gjilan - Kumanovë – Preshevë

• Dy ditë para përfundimit të fushtës kundër fruthit dhe rubelës mbi 90% të fëmijëve janë vaksinuar në Podujevë

• Dr.Hasan Ahmeti është zgjedhur drejtor shëndetësor në QKUK

• "F.tajms": Politikanët e Beogradit ngadalë po fillojnë të pranojnë se kurrë nuk do ta kthejnë Kosovën

• Solana lavdëron popullin shqiptar për zgjedhjet

• Solana së shpejti viziton Beogradin e Prishtinën

• Përfundon afati i dorëzimit të rezultateve në KQZ

• Shqipëria dhe Britania kanë nënshkruar një marrëveshje të re për rikthimin e emigrantëve

• Arafati ka dënuar ashpër sulmin mbi konvojin amerikan

• Në një shpërthim në Rripin e Gazës kanë humbur jetën 3 roje të sigurimt amerikan

• Rebelët e Ushtrisë se Rezistencës së Zotit (LRA) kanë vrarë 22 vetë

• Në një shpërthim në Rripin e Gazës kanë humbur jetën të pakten 4 amerikanë

• Forcat amerikane dhe ato qeveritare afgane kanë vrarë të pakten 7 luftëtarë talibanë

• SHBA-ja janë për votimin e projektrezolutës për Irakun

• Kina nis anijen kozmike në hapësirë

• Shpërthen një makinë bombë pranë ambasadës turke në Bagdad

Presidenti Rugova tha se takimi i Vjenës ishte i suksesshëm drejt realizimit të pavarësisë së Kosovës

 

Prishtinë, 15 tetor 2003 - Fillimin e bisedimeve teknike me Beogradin presidenti i Kosovës Ibrahim Rugova e ka cilësuar si një ditë të suksesshme që e shpien Kosovën kah pavarësia e sa.

 

Këto komente presidenti Rugova i ka bërë pas kthimit nga Vjena, ku ai bashkë me kryetarin e Kuvendit të Kosovës Nexhat Dacin përfaqësuan Kosovën në fillimin e bisedimeve teknike me Beogradin të organizuara nga shefi i Misionit të OKB-së në Kosovë, Hari Holkeri.

Presidenti Rugova vlerësoi se takimi i Vjenës ka filluar me biseda për çështje praktike dhe ky proces do të përmbyllet me pavarësinë e Kosovës. "Ishte një ditë e suksesit të Kosovës, një ditë në të mirë të pavarësisë. Mund të them shkurt se ishte një ditë e rëndësishme.

 

Pra kemi filluar bisedat për çështje praktike, por është një ditë në të mirë të pavarësisë së Kosovës", ka thënë presidenti Rugova dhe me këtë rast ka falenderuar kryeministratorin Holkeri për punën që ka bërë që të arrihet ky sukses.

Edhe Holkeri e vlerësoi takimin e Vjenës si një ngjarje të rëndësishme. Ai tha se ky takim e nxjerr Kosovën nga status quoja ekzistuese. "Tani ne jemi duke përparuar dhe jemi duke ecur nëpër një rrugë të re.

 

I jam shumë mirënjohës presidentit Rugova dhe kryetarit të Kuvendit Nexhat Daci që iu bashkangjiten këtij takimi", tha z. Holkeri, për të shtuar se ende ka shumë gjëra për të bërë edhe pas ngjarjes së Vjenës. Ai konfirmoi se bashkësia ndërkombëtare ka demonstruar një mbështetje të plotë të saj për këtë dialog.

 

 

Lari Rosin i zhgënjyer me qëndrimet jo konstruktive të disa politikanëve të Kosovës

 

Uashington, 15 tetor 2003 - Një zyrtar i lartë i Departamentit amerikan të Shtetit shprehu zhgënjim ndaj qendrimit të politikaneve shqiptare lidhur me bisedimet e Vjenës.

Lari Rosin, ndihmës zëvendës sekretar i Shtetit, i cili përfaqësonte Shtetet e Bashkuara në bisedimet midis Prishtinës dhe Beogradit dje në Vjenë, i deklaroi "Zërit të Amerikës" se qëndrimi i përfaqësuesve politikë të shqiptareve ishte jo konstruktiv.

Zoti Rosin ishte mjaft i drejtpërdrejtë në komentet e tij lidhur me qëndrimin e përfaqësuesve politikë të shqiptarëve për bisedimet e Vjenës.

"E kam fjalën sidomos për udhëheqës të ndryshëm politikë të Kosovës, të cilët na zhgënjyen së tepërmi me qendrimet jo konstruktive, me pozat e tyre politike si dhe me qendrimet plot paragjykime dhe jo dinjitoze", tha ndihmës zëvendës sekretari amerikan i Shtetit.

Ambasadori Rosin tha se me këto qëndrime ata nuk i bënë një shërbim popullit të Kosovës. Ata, tha ai, dëgjuan njerëz që nuk u dhanë atyre këshilla të mira.

Ambasadori Rosin tha se ishte relativisht i inkurajuar nga fillimi i bisedimeve midis Prishtinës dhe Beogradit.
Natyrisht, tha ai, secila palë shprehu qëndrimet e veta dhe perceptimet e saj politike në deklaratat e hapjes, por këto janë bisedime teknike dhe ajo që në të vërtetë ishte e nevojshme këtu ishte që t’u jepej një shtytje politike ekpertëve të cilët do të diskutojnë më pas për çështjet teknike.

Ai tha se ky ishte qëllimi i takimit të sotëm dhe, sipas mendimit të tij, ky qëllim u arrit.

Zoti Rosin përsëriti se këto nuk janë bisedime për statusin përfundimtar të Kosovës, por bisedime teknike për çështje teknike. Me statusin përfundimtar, tha ai, do të merret një proces i veçantë kur të vijë koha dhe kjo kohë ende nuk ka ardhur.

 

 

Ambasadori Montgomeri thotë se SHBA-të do të kenë një rol lehtësues në dialogun shqiptoro-serb

 

Vjenë, 15 tetor 2003 - Duke u prononcuar rreth angazhimit të Shteteve të Bashkuara në dialogun shqiptaro-serb, ambasadori amerikan në Beograd Uiliam Montgomeri tha se vetë palët e kanë fjalën kryesore, por në grupet e punës do të ketë një lehtësues nga organizatat ndërkombëtare.

 

Ai shfaqi bindjen se Shtetet e Bashkuara do të jenë njëra nga këto vende, ashtu siç e ka rolin e vetë lehtësues edhe Grupi i Kontaktit.

Ai shtoi se Shtetet e Bashkuara janë të angazhuara dhe do të vazhdojnë të jenë të angazhuara në Kosovë dhe në rajonin e Ballkanit dhe do të luajnë një rol kryesor për ecurinë e procesit të pajtimit.

 

 

Solana: Në Vjenë arritëm atë që dëshironim, madje edhe më mirë nga ç'prisnim

 

Vjenë, 15 tetor 2003 - Shefi i Politikës së Jashtme dhe të Sigurisë të Bashkimit Evropian, Havier Solana në një intervistë për BBC-në ka thënë se pjesëmarrësit shqiptaro-serbë në Vjenë kanë rënë dakord që bisedimet në nivel të grupeve të ekspertëve të vazhdojnë në muajin nëntor.

 

Ai tha se në këtë takim ende nuk pritej që të fillonte dialogu, por që të vendoseshin mekanizmat për të vazhduar të caktohej katalogu i çështjeve, që do të debatoheshin. në të ardhmen.

"Dhe ne arrritëm atë që dëshironim, madje edhe më mirë nga ç'prisnim. Deri dje në mbrëmje ishte vështirë të merrnim vesh nëse do të kishim një takim të tillë, sepse siç dihet kishim probleme me delegacionet. Ne kaluam këtë problem dhe patëm një takim që u zhvillua në një frymë të mirë", është shprehur z. Solana. Ai shtoi se palët duket se nuk tundën qëndrimet e tyre.

Në vrojtimin se presidenti Rugova foli për dy vende të ndara, kurse serbët folën për Kosovën si pjesë e Serbisë, z, Solana tha se "dialogu zhvillohet midis dy njerëzve që nuk pajtohen për çdo gjë, nëse do të bien dakord për çdo gjë atëherë dialogu nuk do të ishte i nevojshëm". "Pra nuk do të flasim tash për statusin përfundimtar, apo ç'do të ndodhë me Kosovën", tha Solana.

Sipas tij, diskutimi i çështjeve do të jetë në të mirë të marrëdhënieve ndërmjet të dy palëve, pavarësisht se cili do të jetë statusi përfundimtar. Transporti, kalimi i kufirit, energjetika, kthimi i refugjatëve dhe çështja e personave të zhdukur, janë të gjitha çështjet zgjidhja e secilave ëshë në interes të dyja palëve, pavarësisht se cili do të jetë statusi përfundimtar.

"Jam shumë i kënaqur që bisedimet filluan. Gjëja më e rëndësishme është që ne patëm një takim. Të dyja palët ishin prezente. Ato deleguan midis tyre. Komuniteti ndërkombëtar ishte i pranishëm i përfaqësuar nga të gjitha vendet dhe institucionet.

 

Mendoj se ka qenë një ditë shumë e rëndësishme, por ende më e rëndësishme është që kjo të vazhdojë", tha në këtë intervistë për BBC-në Havier Solana.

 

 

Rexhepi tha se qeveria do të vazhdojë me unitetin e saj

 

Prishtinë, 15 tetor 2003 - Pas mbledhjes së sotme të Qeverisë së Kosovës, kryeministri Bajram Rexhepi tha se qeveria do të vazhdojë me unitetin e saj dhe u shpreh se nuk ka arsye për dorëheqje. "Unë nuk mendoj se jemi aq të rrezikuar sa të jap dorëheqje.

 

Vetë fakti se në mbledhjen e sotme të qeverisë përkundër opinioneve pak të ndryshme në lidhje me takimin e Vjenës ne qëndruam prapë në baza unike", tha Rexhepi, duke përsëritur se prioritetet e qeverisë janë të tjera dhe se do të vazhdohet me ato prioritete.

Ndërkaq lidhur me vendimin nga takimi i Vjenës për krijimin e grupeve punuese për bisedimet, Rexhepi tha se deri më tash qeveria nuk ka marrë ndonjë kërkesë nga UNMIK-u.

 

Mirëpo, kur të ndodh një gjë e tillë, ai tha se përsëri do të kërkojë respektimin e linjës institucionale. Rexhepi tha se janë dy mundësi: një rol aktiv të qeverisë për t'i udhëhequr këto grupe por në rast se udhëhiqen nga UNMIK-u do të jenë në nivelin e grupeve të larta punuese, tha ai.

Megjithatë, Rexhepi tha se këto çështje do t'i diskutojë sonte në një darkë pune me shefin e UNMIK-ut Hari Holkeri.

 

 

"Këshilli kombëtar serb" distancohet nga çdo vendim të delegacionit të Kosovës në bisedimet e Vjenës

 

Prishtinë, 15 tetor 2003 - "Këshilli kombëtar serb" nëpërmjet një komunikate për opinion thekson se distancohet nga çdo qëndrim dhe vendim që në bisedimet e Vjenës do të marrin anëtarët e delegacionit të Kosovës.

 

Meqë fjala është për delegacionin njëetnik që e përbëjnë shqiptarët e Kosovës, ai nuk mund të përfaqësojë interesat e bashkësive nacionale të Kosovës, sidomos të serbëve të Kosovës e madje as të gjitha partitë e shqiptarëve të Kosovës, thuhet në këtë komunikatë.

 

 

Qeveria e Shqipërisë përshëndet fillimin e dialogut mes Prishtinës dhe Beogradit

 

Tiranë, 15 tetor 2003 - Qeveria Shqiptare përshendet fillimin e dialogut Prishtinë Beograd për trajtimin e një sërë problemesh konkrete me interes të ndërsjelltë për të dyja palët, si një hap të rëndësishëm historik në bashkëpunimin mes Prishtines dhe Beogradit përmes dialogut të hapur dhe konstruktiv.

Qeveria Shqiptare shpreh bindjen se faktorët institucionalë dhe politikë në Prishtinë do të vlerësojnë me pjekurinë e duhur perspektivën që hap fillimi i dialogut, dhe me konsesusin edhe te faktorëve të tjerë të shoqërisë cilvile do të kontribuojnë për ecurinë e suksesshme të tij.

 

Qeveria e Shqipërisë shpreson që ky proces do të shërbejë në forcimin e stabilitetit, paqes dhe nxitjes se proceseve integruese në rajon.

Qeveria Shqiptare përshëndet asistencën e faktorit ndërkombëtar, i cili bëri të mundur fillimin e dialogut mes Prishtinës dhe Beogradit, si një premisë të rëndësishme për të ardhmen e rajonit dhe me gjerë, thuhet në një komunikatë të Qeverisë së Shqipërisë.

 

 

Qeveria e Maqedonisë përshëndet fillimin e bisedimeve ndërmjet Prishtinës dhe Beogradit

 

Shkup, 15 tetor 2003 - Qeveria e Maqedonisë përshëndet fillimin e bisedimeve ndërmjet Prishtinës dhe Beogradit dhe konsideron se vetëm nëpërmjet dialogut mund të arrihen zgjidhje konkrete dhe afatgjate, ka deklaruar zëdhënësi i Qeverisë maqedonase Sasha Çollakovski.

 

Ai ka pohuar se fillimi i bisedimeve ka rëndësi të veçantë për stabilizimin e situatës në kufirin verior të Maqedonisë dhe pasigurinë në rajon.

 

Qeveria maqedonase vlerëson se para se të hapet çështja e statusit, duhet të sigurohet qeverisje e drejtë në mbarë territorin e Kosovës, si dhe ndërtimi i institucioneve, të cilat do të plotësonin obligimet dhe do të mbanin përgjegjësinë, tha zëdhënësi Çollakovski, duke shtuar se Maqedonia mbështet konceptin standardet para statusit.

 

 

Naim Tërnava u zgjodh kryetar i ri i Bashkësisë Islame të Kosovës

 

Prishtinë, 15 tetor 2003 - Bashkësia Islame e Kosovës zgjodhi sot njëzëri kryesinë e re, ndërkaq për kryetar të saj zgjodhi Naim Tërnavën me mandat tetëvjeçar, i cili në këtë detyrë zëvendësoi kryetarin e gjertanishëm, myftiun Rexhep Boja.

 

Tërnava falenderoi për besimin e dhënë dhe premtoi se do të bashkëpunojë me të gjtha subjektet politike dhe institucionet e Kosovës për ta çuar përpara procesin e pavarësimit të Kosovës.

 

 

Intensifikohet bashkëpunimi ndërkufitar Gjilan - Kumanovë – Preshevë

 

Gjilan, 15 tetor 2003 - Në kuadër të projektit për bashkëpunim ndërkufitar të rajonit, komunat Gjilan -Kumanovë - Preshevë, të cilat përbëjnë një trekëndësh shumë të rëndësishëm në rajon, kanë intensifikuar kontaktet në nivel të grupeve punuese.

Grupet e punës, të ndihmuara edhe nga koordinatorja e Institutit Lindje-Përendim, Maria Sherban, do të takohen për t`i diskutuar e konkretizuar idetë e bashkëpunimit edhe gjatë këtyre ditëve, duke filluar në Kumanovë, më 16 e 17 tetor, pastaj në Gjilan, më 20 e 21 tetor si dhe në Preshevë, më 22 e 23 tetor të këtij viti.

Si fusha të mundshme për bashkëpunim janë përcaktuar kultura, arsimi, sporti, mjedisi, zhvillimi ekonomik dhe infrastruktura.

Gjilani dhe Kumanova janë dakorduar që ky bashkëpunim të fillojë me ndërtimin e rrugës, e cila në relacion shumë më të shkurtër i lidhë këto dy komuna nga drejtimi i Grykës së Karadakut.

Kjo rrugë ka rëndësi të veçantë edhe për Kosovën, sepse i siguron asaj lidhje më të mira me korridorin e tetë ndërkombëtar. (I.M.)

 

 

Dy ditë para përfundimit të fushtës kundër fruthit dhe rubelës mbi 90% të fëmijëve janë vaksinuar në Podujevë

 

Podujevë, 15 tetor 2003 - Prej 6 deri më 16 tetor të këtij viti filloi fushata masive e vaksinimit kundër fruthit dhe rubelës (njëlloj fruthi gjerman i rrezikshëm sidomos për gratë shtatzëna) për fëmijët prej 1-15 vjet, deklaroi sot drejtori i Qendrës së mjekësisë familjare në Podujevë dr. Bahri Thaçi.

 

Ai tha se prej 25.389 fëmijëve sa ishin të regjistruar vaksionimin e kanë kryer 22.531 që do të thotë se mbi 90% e kanë kryer këtë obligim.

Kjo fushatë që është organizuar nga Organizata Botërore e Shëndetësisë, Ministria e Shëndetësisë e Kosovës dhe Instituti Kombëtar i Shërbimit Publik në komunën e Podujevës tregon një ngritje të kulturës dhe arsimimit shëndetësor të popullatës llapjane, tha dr. Thaçi duke falënderuar prindërit si dhe mediat që kanë dhënë një kontribut të jashtëzakonshëm për fillimin e suksesshëm të kësaj fushate.

Dr. Thaçi thotë se ka raste kur fëmijët kanë qenë të sëmurë nga gripi i cili aktualisht është i përhapur dhe nuk kanë mundur ta marrin vaksinën me kohë, mirëpo në dy ditët e ardhshme në bazë të punës së ekipeve mjekësore vaksionimi pritet që të ryhet sepse askund në botë nuk ka raste që kjo të bëhet qind për qind. A deri në 97% 

Epidemiologu i kësaj shtëpie të shëndetit dr. Fadil Dabinofci ka deklaruar se në kuadër të kësaj fushate janë angazhuar 17 ekipe profesioniste, disa nga të cilat do të jenë statike e disa mobile. Dabinofci tha se janë caktuar 60 punkte dhe afro 80 vendbanime.

 

 

Dr.Hasan Ahmeti është zgjedhur drejtor shëndetësor në QKUK

 

Prishtinë, 15 tetor 2003 - Në bazë të rezultateve të panelit intervistues të miratuara në Ministrinë e Shëndetësisë
drejtor i Departamentit të Shërbimeve shëndetësore në Ministrinë e Shëndetësisë është zgjedhur Dr. Arben Cami.

 

Ndërkaq drejtor shëndetësor në QKUK (Qendra Klinike Universitare e Kosovës) është zgjedhur Dr.Hasan Ahmeti dhe udhëheqës i Zyrës së spitaleve, Dr.Skënder Murati, thuhet në një njoftim të Ministrisë së Shëndetësisë.

 

 

"F.tajms": Politikanët e Beogradit ngadalë po fillojnë të pranojnë se kurrë nuk do ta kthejnë Kosovën

 

Londër, 15 tetor 2003 - Gazeta londineze "Fajnenshëll tajms" në një koment redaksional shkruan se liderët e Serbisë dhe të Kosovës me shumë vështirësi u detyruan të bisedojnë, por të paktën u takuan dhe në këtë mënyrë filloi procesi i gjatë i përcaktimit të të ardhmes së Kosovës.

Gazeta më tutje shkruan se bashkësia ndërkombëtare duhet të vazddojë me presione mbi të dyja palët, sepse pa zgjidhjen e statusit, Kosova do të mbetet një vrimë e zezë e pasigurisë në Evropë.

"Fajnenshëll tajms" shkruan se në shikim të parë duket se kurrfarë kompromisi nuk është i mundur, por politikanët e Beogradit jozyrtarisht ngadalë po fillojnë të pranojnë se kurrë nuk do ta kthejnë Kosovën.

Për pavarësinë e mundshme deri më tash nuk është diskutuar nga frika se kjo do të mund të shtrohet si precedent për pakicat e tjera, sidomos në Maqedoni.

Çfarëdo që të jetë statusi përfundimtar, zgjidhja do të përfshinte praninë e fuqishme të forcave ndërkombëtare të cilat do të mbronin pakicën serbe dhe do të nxisnin kthimin e refugjatëve serbë, përfundon "Fajnenshëll tajms" në një koment të vetin.

 

 

Solana lavdëron popullin shqiptar për zgjedhjet

 

Bruksel, 15 tetor 2003 - Bashkimi Evropian ka lavdëruar popullin shqiptar, qeverinë shqiptare dhe partitë politike për zhvillimin e zgjedhjeve vendore.

Në një deklaratë, përfaqësuesi i lartë i BE-së për politikë të jashtme dhe siguri, Havier Solana, i përgëzon ata për, siç e quan, "këtë hap të mëtejmë drejt respektimit të zotimeve ndërkombëtare dhe standardeve për zgjedhje demokratike."

Zoti Solana thotë se këto zgjedhje ishin edhe një hap drejt një mjedisi të përmirësuar politik që do të ndihmojë Shqipërinë t'i afrohet edhe më shumë Bashkimit Evropian.

 

 

Solana së shpejti viziton Beogradin e Prishtinën

 

Bruksel, 15 tetor 2003 - Shefi i diplomcacis dhe i sigurisë së Bashkimit Evropian Havier Solana, në kuadër të një turneu ballkanik së shpejti do të vizitojë Beogradin dhe Prishtinën. Mediat e huaja citojnë zëdhënësen e Solanës, Kristina Galak, të ketë thënë se, pas takimit të Vjenës, kjo vizitë synon të inkurarojë përfaqësuesit e Prishtinës dhe të Beogradit për të vazhduar dialogun e filluar.

 

 

Përfundon afati i dorëzimit të rezultateve në KQZ

 

Tiranë, 15 tetor 2003 - Ka përfunduar afati ligjor për dorëzimin e tabelave të rezultateve në Komisionin Zgjedhor të Zgjedhjeve, por zëdhënësi i këtij komisioni Erton Sinani tha se ende ka vonesa në këtë proces.
Komisioni Qendror i Zgjedhjeve po punon për nxjerrjen sa më shpejt të rezultateve të zgjedhjeve lokale të së dielës.

Ndërkohë kryeministri shqiptar, Fatos Nano, ka dënuar incidentet e Himarës dhe i cilësoi ato si të importuara nga qarqe të caktuara që synojnë të luajnë me sovranitetin e kufijve të një vendi që po asociohet në Bashkimin Europian.

Edhe autoritetet e prokurorisë kanë nisur hetimin rreth këtyre incidenteve që ndodhen në ditën e votimit më 12 tetor.

 

 

Shqipëria dhe Britania kanë nënshkruar një marrëveshje të re për rikthimin e emigrantëve

 

Tiranë, 15 tetor 2003 - Shqipëria dhe Britania e Madhe kanë nënshkruar një marrëveshje të re për rikthimin në Shqipëri të gjithë emigrantëve ilegalë shqiptarë që ndodhen në Britani.

Marrëveshja u nënshkrua nga minisitri i rendit, Luan Rama, dhe nga ambasadori i Mbretërisë së Bashkuar në Tiranë, David Landsman.

Ambasadori britanik tha se marrëveshje është shprehje e bashkëpunimit mes të dy vendeve për uljen e emigracionit illegal. Nuk dihet numri i saktë i shtetasve të Republikës së Shqipërisë në Britaninë e Madhe pasi një pjesë e mirë e tyre janë paraqitur atje si banorë të Kosovës dhe kanë kërkuar azil politik.

 

 

Arafati ka dënuar ashpër sulmin mbi konvojin amerikan

 

Gaza, 15 tetor 2003 - Jaser Arafati nëpërmjet një deklarate ka dënuar ashpër sulmin mbi konvojin amerikan në Rripin e Gazës, në të cilin u vranë tre vetë.

Arafati ka urdhëruar formimin e një ekipi të përbashkët palestinezo-amerikan për hetuar krimin.

 

 

Në një shpërthim në Rripin e Gazës kanë humbur jetën 3 roje të sigurimt amerikan

 

Gaza, 15 tetor 2003 – Sipas njoftimeve më të reja të Rojterit, një bombë ka shpërthyer sot (e merkurë) afër një autokolone diplomatike amerikane në Rripin e Gazës dhe kështu ka shkaktuar vdekjen e 3 rojeve të sigurimit.

 

Ky është sulmi i parë kundër zyrtarëve amerikanë në tri vjetët e dhunës izraelito-palestineze. xhipi "Çiroki" i diplomatëve amerikanë është shkatërruar krjetësisht nga shpërthimi, i cli ka shkaktuar një gropë të madhe në rrugë.

 

Burimet e sigurimit izraelit kanë thënë se tri rojet e kontigjentit të sigurimit, janë vrarë, kurse një diplomat është plagosur nga shpërthimi. Më parë radioja izraelite ka njoftuar për gjithsej katër të vrarë. Zëdhënësi i ambasadës amerikane në Tel Aviv ka konfirmuar se shpërthimi ka shkaktuar viktimat amerikane në fjalë.

 

 

Rebelët e Ushtrisë se Rezistencës së Zotit (LRA) kanë vrarë 22 vetë

 

Kampala, 15 tetor 2003 - Rebelët e Ushtrisë se Rezistencës së Zotit (LRA) kanë vrarë 22 vetë në disktriktin Lira në Ugandën veriore, ka njoftuar zëdhënësi i ushtrisë.

"Kanë vrarë 22 njerëz", ka thënë koloneli Kris Megazi, duke shtuar se ngjarja ka ndodhur të hënën dhe se në mesin e të vrarëve janë edhe katër gra.

LRA, lëvizje të cilën e udhëheq i vetëquajturi profeti dhe mistiku Xhozef Koni, thekson se synon të përmbysë qeverinë e presidentit Joveni Museveni, mirëpo opionionit kurrë nuk i janë bërë të ditura aspiratat dhe kërkesat e "Ushtrisë së Zotit".

 

 

Në një shpërthim në Rripin e Gazës kanë humbur jetën të pakten 4 amerikanë

 

Gaza, 15 tetor 2003 - Një bombë, e vënë anës rrugës, ka shpërthyer sot (e merkurë) afër një autokolone diplomatike amerikane dhe automjeteve të CIA-s në Rripin e Gazës dhe kështu ka shkaktuar vekjen e të pakten 4 vetëve, ka bërë të ditur radioja izraelite, njofton Rojter.

 

Dëshmitarët në vendin e ngjarjes kanë thënë se një xhip i diplomatëve amerikanë është shkatërruar krjetësisht nga shpërthimi dhe nga gropa që ka shkaktuar ky shpërthim shihet se është fjala për një bombë. Policia palestineze në vendngjarje ka thënë se ka parë të pakten dy trupa të pa jetë, por radioja izraelite ka njoftuar për gjithsej katër të vrarë.

 

 

Forcat amerikane dhe ato qeveritare afgane kanë vrarë të pakten 7 luftëtarë talibanë

 

Kabul, 15 tetor 2003 – Forcat amerikane dhe ato qeveritare afgane kanë thënë se kanë vrarë të pakten shtatë luftëtarë talibanë në një sulm në pjesën qendrore të Afganistanit, njofton BBCnews. Zëdhënësi i policisë ka thënë se po kështu janë vrarë edhe tre ushtarë afganë dhe pesë të tjerë janë plagosur gjatë luftimeve.

 

Luftimet kanë zgjatur dy ditë në rajonin malor Çar Çeno në provincën qendrore të Uruzganit, dikur bastion i talibanëve. Këto luftime janë zhvilluar pasi KS i OKB-së ka miratuar rezolutën që u mundëson paqeruarjtësve të operojnë edhe jashtë kryeqytetit Kabul.

 

 

SHBA-ja janë për votimin e projektrezolutës për Irakun

 

Uashington - Shtetet e Bashkuara thonë se do të kërkojnë votim në Këshillin e Sigurimit sot gjatë ditës për projektrezolutën rreth të ardhmes së Irakut.

Paralajmërimi, i bërë nga ambasadori amerikan, John Negroponte, erdhi pasi zyrtarët e qarkulluan tekstin e përmirësuar, ku u përfshinë edhe disa amandamente të sugjeruara nga Rusia, Franca dhe Gjermania.

Anëtarët e Këshillit të Sigurimit u takuan vonë natën për të diskutuar ndryshimet e mundshme të përgatitura për të marrë mbështetjen sa më të madhe.

Teksti i ri nuk përmend data të posaçme për një afat të caktuar të transferimit të sovranitetit tek qytetarët e Irakut, një kërkesë kyçe e Francës, Rusisë dhe Gjermanisë.

 

 

Kina nis anijen kozmike në hapësirë

 

Pekin, 15 tetor 2003 - Kina ka nisur fluturimin e parë në hapësirë, duke u bërë kështu vendi i tretë pas Bashkimit Sovjetik dhe SHBA-së. Një astronaut i vetëm ishte në bordin e anijes kozmike Shenzou Pesë, që u nis nga qendra hapësinore në shkretëtirën Gobi.

Televizioni kinez, që ndërpreu programin e rregullt për të paralajmëruar nisjen, njoftoi se anija u nis për në orbitë sipas orarit. Agjencia shtetërore e lajmeve citoi zyrtarë duke thënë se misioni ishte një sukses.
Anija kozmike pritet t'i rrotullohet Tokës katërmbëdhjetë herë para se të kthehet pas më shumë se njëzet orësh.

 

 

Shpërthen një makinë bombë pranë ambasadës turke në Bagdad

 

Bagdad, 15 tetor 2003 - Një makinë bombë shpërtheu pranë ambasadës turke në Bagdad, duke shkaktuar vdekjen e një personi dhe plagosjen e rreth 10 të tjerëve. Forcat policore hapën zjarr në ajër për të shpërndarë një turmë njerëzish që u mblodhën në vendin e ngjarjes duke hedhur parulla pro Sadam Huseinit.

Shpërthimi i djeshëm ishte me sa sa duket sulmi më i fundit kundër administratës së udhëhequr nga Shtetet e Bashkuara në Irak dhe ata që e mbështesin atë.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |