|  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  | 

Zgjedhjet në Shqipëri: incidentet nga të huajt

14 tetor 2003 / TN

 

HIMARË, TRITOL NË QENDRËN E VOTIMIT NGA NJE ANETAR I PBDNJ-S

 

Anëtari i Partisë së të Drejtave të Njeriut tenton të hedhë në erë qendrën e votimit në Himarë. Një kallëp tritoli është hedhur nga Kozma Pelo pranë një qendre votimi në qytet, mbrëmë rreth orës 19:00. Polici M. Peçuli u plagos nga shpërthimi i lëndës eksplozive, ndërkohë që ka patur edhe disa dëme të vogla materiale në objektet pranë. Të lënduar kanë mbetur edhe dy qytetarë që ishin duke shkuar për të votuar në qendër.

 

Policia ka arritur që pak minuta pas ngjarjes, të identifikojë dhe shpallë në kërkim simpatizantin e PBDNJ-së, i cili ka qenë edhe autori që shkaktoi shpërthimin. Burime zyrtare të Ministrisë së Rendit Publik, thane se e kanë vlerësuar si incident të rëndë ngjarjen e ndodhur, që cënon rendin dhe sigurinë, pikërisht në momentet që gjithçka po shkonte mirë.

 

Kemi marrë të gjitha masat, është identifikuar autori i hedhjes së lëndës eksplozive dhe brenda pak kohe do të arrestohet,- thanë këto burime. Ngjarja, për momentin, lidhet me zgjedhjet dhe synimi i saj, sipas burimeve policore që kanë hetuar atentatin, ishte krijimi i një tensioni në momentet që komisionet kishin nisur procesin e numërimit të votave.

 

Përgjithësisht, dita e votimit në Himarë ka kaluar e qetë, po pikërisht, kur ka filluar numërimi, Pelo ka kaluar pranë qendrës që votimit, që ndodhet në qytet dhe ka hedhur me fitil të ndezur një kallëp tritoli. Megjithëse policët që ruanin qendrën janë përpjekur të shmangen, nuk kanë shpëtuar pa plagë. Burime të policisë thanë se punonjësit e rendit kanë marrë plagë në gjymtyrët e trupit dhe në këmbë, por janë jashtë rrezikut për jetën. Jashtë rrezikut janë edhe dy qytetarët e tjerë. Katër të dëmtuarit janë çuar në spitalin e qytetit ku kanë marrë edhe mjekime. Ata kanë rrëfyer për autorët edhe se si ndodhi ngjarja.

 

 

DIPLOMATI MAQEDON, INCIDENT NE LIQENAS

 

Sekretari i Ambasadës Maqedonase, Stefan Silski, ka lëvizur gjatë paradites së djeshme në zonat e Liqenasit me një Fuoristradë me targa CD 1703. Sipas burimeve zyrtare të Ministrisë së Rendit Publik, mjeti me të cilin ka lëvizur Silski mbante mbishkrimet OSBE dhe ODHIR.

 

Burime të policisë, thanë gjatë ditës së djeshme se sekretari i Ambasadës Maqedonase, Stefan Silski, gjatë lëvizjes së tij nëpër zonat e Liqenasit, ka takuar disa nga banorët e zonave që merrnin pjesë në procesin e zgjedhjeve. Policia deklaroi se Silski ishte interesuar gjatë këtyre takimeve mbi procesin zgjedhor, ndërsa paraqitej si vëzhgues i huaj. Gjatë lëvizjeve të djeshme, ai është prezantuar me një dokument identifikimi të OSBE-së, si vëzhgues i këtij organizmi. Ministri i Rendit i ka kërkuar në mënyrë zyrtare ambasadorit të OSBE-së sqarimin e pozicionit të këtij diplomati.

 

Gazeta Panorama

13 Tetor 2003

 

 

NJË SHTETAS GREK NË ZYRËN E OMONIAS

 

Në zyrën e Omonias ne Himare takojme një person të gjatë, zeshkan, që vazhdimisht mbante në dorë një libër fetar. Por sapo njerëz të ndryshëm, përkrahës të Omonias lexonin emrat e tyre në lista, greku përcaktonte listat duke u treguar atyre vendin apo numrin rendor.

 

Dukej që ai i njihte mirë listat e votimit. Pyes njërin prej kryetarëve të kryesisë për kombësinë e këtij njeriu dhe marr përgjigjen se: është korrieri ynë, di anglisht dhe mban lidhjet tona me ndërkombëtarët, dhe përkrahësit tanë himariotë. Ai e kuptoi pyetjen tonë dhe përgjigjet në greqisht: thuaji gazetarëve se unë jam bregas dhe dhëndër në Himarë.

 

Biseda u ndërpre nga një telefonatë, së cilës greku iu përgjigj me fjalët: mirë, mirë, do të fitojmë (në gjuhën e grekërve). Për veprimtarine e shtetasit grek në zyrat e Omonias pyetëm edhe përfaqësuesin e ISEF-it në Himarë, Dikson Baily. Ai pohoi për Shekullin se është në dijeni të veprimtarise të shtetasit grek si dhe të emigrantëve të sjellë falas në Himarë, gjë që sipas tij tensionojnë zgjedhjet për të siguruar fitoren e kandidatit të PBDNJ, Vasil.

 

Edhe pse ndalohet me ligj pjesëmarrja e personave me shtetësi të huaj në procesin e votimit, duket se për Himarën nuk duan ta zbatojne ligjin.

 

Gazeta Shekulli

13 Tetor 2003