Përmbajtja:

• Fjala e Presidentit të Kosovës Ibrahim rugova ne takimin e Vjenës

• Presidenti Rugova ka vlerësuar në Vjenë se vetëm një Kosovë e pavarur do ta qetësonte rajonin

• Galak: Zhvillimi sotëm ishte shumë i rëndësishëm dhe e konsiderojmë hap përpara

• Në Vjenë filluan bisedimet për çështje praktike Prishtinë –Beograd

• Në rajonin e Pejës për 9 muajt e këtij viti janë vrarë 26 persona

• Sot në Prishtinë u mbajt një protestë kundër fillimit të bisedimeve në Vjenë

• Në zgjedhjet në Azerbajxhan në cilësinë e monitoruesve do të marrë pjesë edhe një grup nga Kosova

• Nesër përurohet i objekti i shkollës së mesme në fshatin Rogovë të Gjakovës, i ndërtuar nga USAID-i

• Trafoja e re, një investim kapital për komunën e Podujevës për furnizimin stabil me energji elektrike

• Zëvendëskryeministri i Maqedonisë Musa Xhaferi thotë se kosovarët duhet t'i përgjigjen pozitivisht ftesës për dialog me Beogradin

• Ministrat e jashtëm të vendeve të BE-së në Luksemburg sërish i dhanë mbështetje të plotë dialogut Prishtinë – Beograd

• OSBE-ja i vlerëson zgjedhjet në Shqipëri një hap të rëndësishëm drejt një demokracie të plotë

• Pritet fjala e vëzhguesve për zgjedhjet në Shqipëri

• Sali Berisha tha se PD është më tash forca e parë politike në vend, por PS thotë se ka fituar bindshëm

• Për në Irak u nis njësiti i dytë i ushtarak paqeruajtës shqiptar

• Sot në Bukuresht të Rumanisë do të fillojë punimet samiti i parë rajonal për investime

• Ushtria izraelite dëbon 15 të arrestuarë palestinezë nga Bregu Perendimor në Rripin e Gazës

• Në një aksident trafiku në Luiziana të SHBA-ve, kanë humbur jetën 8 vetë, kurse janë lënduar 15 të tjerë

• Operacionet izraelite kanë vazhduar edhe sot në kampin palestinez Rafah

• Djali i Osama bin Ladenit ka rol kryesor në sulmet vetëvrasëse të rrjetit të Al Kaidës

• Mirëpritet projekt rezoluta për Irakun

• Në luftimet në Qerbela janë vrarë rreth 10 vetë dhe janë plagosur shumë të tjerë

• Sadam Hysein mund të jetë i fshehur në shtëpinë e stërgjyshve të tij në Tikrit

Fjala e Presidentit të Kosovës Ibrahim rugova ne takimin e Vjenës

 

Vjenë, 14 tetor 2003 - Në takimin e sotëm në Vjenë mes delegacionit të Kosovës dhe atij të Serbisë të zhvilluar në pallatin Hofburg, në emër të Kosovës foli Presidenti Ibrahim Rugova. Më poshtë po japim teksitn e plotë të diskutimit të Presidentit Rugova. "Përshëndes hapjen e këtij takimi në Vjenë, të rëndësishëm për vendin tim dhe për rajonin e Evropës Juglindore si dhe për BE, NATO-n dhe SHBA.Në fillim dëshiroj të flas shkurt për progresin që ka arritur Kosova gjatë katër vjetëve pas luftës, në liri. Kosova ka bërë një progres të madh në të gjitha fushat e jetës.   Gjendja e sigurisë publike është më e mirë. Policia e Kosovës është forcuar dhe kemi filluar specializimin e saj. Kështu policia e Kosovës bashkë me policinë e UNMIK-ut dhe me KFOR-in / NATO-n bën sigurinë e vendit. Në të njejtën kohë është në vendosje e sipër rendi dhe ligji. Gjykatat në të gjitha nivelet po veprojnë deri te Gjykata Supreme e Kosovës.

   

Do theksuar se Kosova ka pasur progres të mirë edhe në ndërtimin e demokracisë. Gjatë vitit të kaluar u mbajtën zgjedhjet e dyta lokale me mandat katërvjeçar. Që një vit e gjysmë funksionojnë institucionet qendrore: Parlamenti, Qeveria dhe Presidenti i Kosovës, në bazë të zgjedhjeve nacionale të vitit 2001. Parlamenti i Kosovës ka miratuar me dhjetëra ligje në të gjitha fushat e jetës për të gjithë qytetarët e Kosovës.

Një progres të shquar kemi pasur edhe në integrimin e grupeve etnike, apo të minoriteteve. Sot të gjitha minoritetet marrin pjesë aktive në të gjitha institucionet e Kosovës, në nivel qendror dhe lokal.

 

Në Parlament dhe në Qeveri kemi vende të rezervuara për minoritetet. Kështu në Parlament, nga 120 vende, 20 janë të rezervuara për minoritetet, plus vendet e fituara me votë. Në Qeveri e cila ka 10 ministri, dy ministra janë nga minoritetet. Ky është një progres në planin e integrimit administrativ. Duhet thënë se për ditë e më shumë shoqëria e Kosovës po bëhet më e integruar.

Do të punojmë më shumë në planin e komunikimit midis shumicës shqiptare dhe minoritetet siç janë serbët, boshnjakët, turqit, goranët, romët, ashkalinjtë dhe egjiptianët. Pra, duhet të punojmë më intensivisht në fushën e pajtimit dhe të mirëkuptimit të të gjithë kosovarëve, proces të cilin e kemi filluar.

Po ashtu në planin e kthimit të refugjatëve kemi shënuar progres. Janë kthyer mbi 7.000 njerëz të grupeve minoritare, kryesisht serbë. Të gjitha institucionet e Kosovës janë përcaktuar për një kthim individual të të gjithë atyre që dëshirojnë të jetojnë në Kosovë. Nga shumica shqiptare, qindra mijëra njerëz, vazhdojnë të qëndrojnë në Europë dhe SHBA, sepse nuk mund të kthehen për shkak të gjendjes sociale e ekonomike të Kosovës. Unë e them se pas luftës, tash në Kosovë, të gjithë jemi më pak.

Me këtë rast do thënë se edhe në fushën e ekonomisë kemi pasur progres. Sektori privat është mjaft i fuqishëm e dinamik. Kosovarët janë popull ndërmarrës. Vetëm një fakt 95% të buxhetit Kosova e ka bërë nga të hyrat e veta.

Objektivat e institucioneve shtetërore të Kosovës janë: zhvillimi ekonomik, tërheqja e investimeve dhe krijimi i vendeve të punës për të rinjtë. Këto ditë kemi filluar privatizimin së bashku me UNMIK-un si proces pozitiv ekonomik. Mund të themi se Kosova po hyn në fazën e një jete normale të një vendi.

Është politikë nacionale e Kosovës të ndërtojë marrëdhënie të mira me të gjithë fqinjtë e saj. Mund të themi se edhe në këtë fushë kemi pasur progres. Kështu me Shqipërinë kemi marrëdhënie të mira, me Republikën e Maqedonisë kemi filluar një progres si dhe me Malin e Zi.

 

Sot jemi tubuar në Vjenë që të fillojmë një proces të marrëdhënieve pozitive fqinjësore me Serbinë në disa fusha praktike me interes për të dy vendet dhe për rajonin e Evropës Juglindore. Për fillim kemi pranuar të bisedojmë për bashkëpunim në fushën e energjisë, që është problem për gjithë rajonin e Evropës Juglindore, pastaj çështjen e të zhdukurve nga lufta që krijon shqetësime të vazhdueshme, për çështjen e kthimit të refugjatëve në baza individuale të atyre që dëshirojnë të jetojnë në Kosovë, si dhe për çështje të transportit dhe të telekomunikacionit, që është me rëndësi për të dy vendet dhe për rajonin. Me këtë rast do të themelohen grupe punuese, të cilat do të prodhojnë marrëveshje në nivel të dy vendeve.

Sot këtu, në Vjenë jemi takuar për të biseduar për disa çështje praktike midis dy vendeve, Serbisë dhe Kosovës. Dëshiroj të theksoj se është pozitive se të gjitha vendet e rajonit të Evropës Juglindore aspirojnë për integrim në BE dhe në NATO. Këtë e aspiron dhe po përgatitet edhe vendi im Kosova.

 

Pra, një Kosovë demokratike, paqësore e pavarur dhe e integruar në BE e NATO dhe në miqësi permanente me SHBA. Ky aspirim është në të mirë të qytetarëve të Kosovës dhe do ta qetësonte rajonin e Evropës Juglindore. Kosova është e gatshme t’i pranojë obligimet ndërkombëtare.

Do të përdor autoritetin tim së bashku me PSSP-në, zotin Holkeri, që në bisedat rreth çështjeve praktike të involvohen strukturat qeveritare të Kosovës.

Ndërsa gjendemi në këtë takim, dëshiroj të theksoj se e kaluara nuk bën të harrohet, sepse mund të përsëritet në forma më të këqia, por duhet të shikojmë kah e ardhmja. Shpresoj se një ditë Serbia do të kërkoj falje për masakrat e luftës në Kosovë, që do t’i lehtësonte marrëdhëniet midis dy vendeve dhe dy popujve.
Nga ky takim i Vjenës, e përshëndesim Presidentin Bush, Kryeministrin Bler, Presidentin Shirac, Kancelarin Shreder dhe Kryeministrin Berluskoni.

Përshëndetje të veçantë i bëjmë Atit të Shenjtë Papa Gjon Pali II, që gjithmonë lutet për Kosovën dhe paqen e popujve.

Me këtë rast e falënderoj zotin Holkeri që ka punuar shumë për realizimin e këtij takimi.
Po ashtu e falënderoj Presidentin Klestil, Kancelarin Shysel dhe Qeverinë austriake për mikpritjen, ashtu siç di Vjena ta bëjë këtë".

 

 

Presidenti Rugova ka vlerësuar në Vjenë se vetëm një Kosovë e pavarur do ta qetësonte rajonin

 

Vjenë, 14 tetor 2003 - Pas fjalës përshëndetëse të kancelarit austriak Shysel, takimi i Vjenës ka vazhduar me dyer të mbyllura, ku kanë folur përfaqësuesit e lartë të bashkësisë ndërkombëtare dhe të Grupit të Kontaktit, si dhe përfaqësuesit e delegacioneve nga Prishtina dhe Beogradi.

Siç njoftohet nga Vjena, përfaqësuesi i lartë i Bashkimit Evropian për politikë të jashtme dhe siguri Havier Solana në fjalën e tij ka shprehur kënaqësinë për fillimin e dialogut Prishtinë-Beograd ngase, sipas tij, ky është hapi i parë, që është hapi më i vështirë për bisedime.

 

Ai u shpreh i kënaqur që sheh në sallë përfaqësuesit e Prishtinës dhe të Beogradit, sepse dialogu shënon një përparim të madh në rrugën drejt stabilitetit më të madh në Ballkan. Solana gjithashtu ka vlerësuar se zhvillimi i ngjarjeve në Kosovë mund të ketë ndikim të rëndësishëm në shtetet fqinje. Kosova është zemër e rajonit të Ballkanit, jo vetëm gjeografikisht, por edhe politikisht dhe në aspektin e sigurisë, ka thënë Solana.

Presidenti i Kosovës Ibrahim Rugova në fjalën e tij ka vlerësuar se në takimin e Vjenës ka ardhur për të filluar një proces të marrëdhënieve pozitive me fqinjët në disa fusha praktike me interes të përbashkët për të dyja vendet dhe rajonin e Evropës Juglindore në tërësi.

Presidenti Rugova ka theksuar se njohja e një Kosove të pavarur, demokratike e paqësore, e integruar në BE, dhe në NATO dhe në miqësi të përhershme me SHBA-të, do të qetësonte rajonin. Ai gjithashtu ka theksuar progresin që është bërë në Kosovë në fushën e sigurisë, të ekonomisë dhe në konsolidimimin e demokracisë.

 

Ai ka thënë se tashmë në Kosovë janë kthyer mbi 7000 të zhvendosur, ndërkaq udhëheqja e Kosovës dhe institucionet e saj po bëjnë ç'është e mundur për integrimin e të gjitha minoriteteve dhe grupeve etnike në shoqërinë e Kosovës, ashtu siç e meriton një shoqëri e vërtetë demokratike. Ai përshëndeti bashkësinë ndërkombëtare që është nismëtare e këtij dialogu.

Ndërkaq, nga pala serbe ka folur zv.kryeministri serb Nebojsha Çoviq, i cili ka përsëritur akuzat kundër Kosovës për spastrime etnike dhe se gjoja nën presionin e udhëheqjes së saj nuk kanë mundur të marrin pjesë në bisedime përfaqësuesit e pakicave Milan Todorviq dhe Resmije Mumxhi.

 

Çoviqi ka akuzuar zyrtarët e Prishtinës që në vend që ta shfrytëzojnë Vjenën si takim për dialog për problemet kryesore po vazhdojnë ta pajisin Kosovën me atribute shtetërore. Sipas tij, me një varg vendimesh të papjekura të autoriteteve të Prishtinës, dialogu ka humbur rëndësinë që është pritur.

Takimi i Vjenës tashmë ka përfunduar dhe priten të bëhen të ditura konkluzionet e tij nga shefi i UNMIK-ut Hari Holkeri.

 

 

Galak: Zhvillimi sotëm ishte shumë i rëndësishëm dhe e konsiderojmë hap përpara

 

Vjenë, 14 tetor 2003 - "Zhvillimi sotëm ishte shumë i rëndësishëm dhe e konsiderojmë hap përpara. BE do të mbështesë në tërësi angazhimin në këtë drejtim", vlerësoi zëdhënësja e përfaqësuesit të lartë për politikë të jashtme të BE-së Havier Solana, Kristina Galak.

 

"Liderët duhet të shohin përgjegjësitë e tyre. Dhe të jesh aktiv në jetësimin e rezultatave të mira të dialogut është çështje me rëndësi të madhe", tha zëdhënësja Galak.

 

 

Në Vjenë filluan bisedimet për çështje praktike Prishtinë –Beograd

 

Vjenë, 14 tetor 2003 - Pikërisht në orën 9.17, sot në pallatin Hofburg në Vjenë filluan bisedimet për çështje praktike ndërmjet Prishtinës dhe Beogradit.

Në hapje, Kancelari i Austrisë Volfgang Shysel, si mikpritës i këtij takimi, shprehu bindjen se pjesëmarrësit e këtij do të shkojnë në rrugën e mirëfilltë të dialogut, me gjithë pengesat e shumta, si tha ai, për të shkuar në Vjenë.

"Ne jemi dëshmitar se dialogu është i mundur qoftë edhe në mes të ish-armiqve", tha kamcelari Shysel duke iu drejtuar të pranishmëve. "Me këtë dialog ju mund të gjeni vendin tuaj në rajon.

 

Por ne në Vjenë dëshirojmë që ju të vazhdoni me dialogun, e ne do t'ju sigurojmë kushte", tha Shysel duke shprehur keqardhje që anëtarët e tjerë të delegacioneve nuk kanë vendosur të vijnë në këtë takim.

"Ne jo vetëm që do ta mbajmë në mend këtë sallë, meqë po shënohet në historinë evropiane, por ky do të jetë vendi ku ata do të kenë mundësi të bëjnë përparim drejt të ardhmes së tyre evropiane".

Ndryshe në një sallë ovale në këto bisedime delegacioni i Kosovës përfaqësohet nga Presidenti Ibrahim Rugova, shefi i UNMIK-ut Hari Holkeri dhe kryetari i Kuvendit të Kosovës Nexhat Daci.

 

Ndërkaq, delegacioni nga Beogradi përfaqësoshet nga kryeministri serb Zoran Zhivkoviq, zëvendësi i tij Nebojsha Çoviq dhe anëtari i bashkësisë shtetërore Serbi-Mali i Zi, Rasim Lajiq.

Nga bashkësia ndërkombëtare në sallë ishin të pranishëm shefi i diplomacisë së BE-së Havier Solana, komesioneri evropian Kris Paten, sekretari i përgjithshëm i NATO-s lordi Xhorxh Robertson, ndërkaq nga SHBA-të ndihmësi i sekretarit amerikan të Shtetit për çështje evropiane, Lari Rosin, ambasadori amerikan në Beograd, Uiliam Montgomeri dhe shefja e Zyrës amerikane në Prishtinë, Marsi Ris.

 

Poashtu janë të pranishëm edhe përfaqësuesit e Grupit të Kontaktit.

Pas hapjes solemne, takimi i vazhdoi punimet me dyer të mbyllura.

 

 

Në rajonin e Pejës për 9 muajt e këtij viti janë vrarë 26 persona

 

Pejë, 14 tetor 2003 - Në rajonin e Pejës për 9 muajt e këtij viti janë vrarë 26 persona dhe kështu Peja radhitet si komuna ku kanë ndodhur më së shumti vrasje në Kosovë, tha zëdhënësi i policisë së UNMIK-ut për rajonin e Pejës, Xho Singëlton.

 

Ai tha se për këto vrasje në pyetje janë marrë me qindra dëshmitarë dhe se 44 për qind të rasteve janë të zgjidhura. Sipas tij, për luftimin e krimit dhe në ruajtjen e rendit e të qetësisë publike në rajonin e Pejës janë të angazhuar 830 pjesëtarë të SHPK-së dhe 250 policë ndërkombëtarë.

 

Por, ata nuk mund ta kryejnë punën me sukses nëe nuk e kanë ndihmën e popullatës për t'i zbuluar autorët e krimeve dhe të vrasjeve, tha zëdhënësi Singëlton.

 

 

Sot në Prishtinë u mbajt një protestë kundër fillimit të bisedimeve në Vjenë

 

Prishtinë, 14 tetor 2003 - Në organizim të LPK-së sot në Prishtinë u mbajt një protestë kundër fillimit të bisedimeve me Beogradin në Vjenë. Protestuesit kërkuan që Kuvendi i Kosovës të votojë një rezolutë për Kosovën shtet të pavarur dhe të kundërshtojë bisedimet me Serbinë para se ajo të njohë pavarësinë e Kosovës.

Para protestuesve foli kryetari i LPK-së Emrush Xhemajli, i cili tha se kjo protestë po mbahet për të kundërshtuar bisedimet e imponuara me Serbinë. Këtë protestë e kanë përkrahur shoqatat e dala nga lufta dhe organizata e studentëve UPSUP.

 

 

Në zgjedhjet në Azerbajxhan në cilësinë e monitoruesve do të marrë pjesë edhe një grup nga Kosova

 

Gjakovë, 14 tetor 2003 - Në zgjedhjet e përgjithshme dhe presidenciale në Azerbajxhan për herë të parë në cilësinë e monitoruesve do të marrë pjesë edhe një grup nga Kosova, anëtarë të organizatës Aksionit Kosovar për Iniciativë Civile.

Në përbërje të grupit kosovar do të jenë edhe tre përfaqësues të Forumit për Iniciativë Demokratike (FID) të Gjakovës të cilët edhe më parë kanë qenë partner të Aksionit Kosovar për Inisiativë Civile në monitorimin e zgjedhjeve të organizuara në Kosovë.

Delegacioni i FID-it i përbërë nga Arbnor Pula, Mentor Kaçi dhe Fuat Haxhibeqiri, para nisjes në Azerbajxhan deklaruan se monitorimi i zgjedhjeve në një shtet të huaj është një mirënjohje për delegacionin gjakovar dhe kosovar dhe flet për avancimin e shoqërisë civile në vendin tonë. (B.A.)

 

 

Nesër përurohet i objekti i shkollës së mesme në fshatin Rogovë të Gjakovës, i ndërtuar nga USAID-i

 

Prishtinë, 14 tetor 2003 - Zyra e Shteteve të Bashkuara në Prishtinë ka kënaqësinë të shpallë përfundimin e projektit për infrastrukturën e komunitetit, ndërtesën e re të shkollës së mesme në Rogovë.

 

Zëvendësdrejtori i Agjencionit të Shteteve të Bashkuara për Zhvillim Ndërkombëtar (USAID), Misioni në Kosovë, David Leong, do të bëjë përurimin solemn të projektit në emër të Shteteve të Bashkuara në ceremoninë që do të mbahet nesër, më 15 tetor 2003.

Projekti është pjesë e angazhimit të qeverisë së SHBA-ve për të ndihmuar në zhvillimin demokratik dhe ekonomik të Kosovës.

Nëpërmes USAID-it, populli amerikan ka investuar 264,576 euro në ndërtimin e objektit të ri me tetë dhoma mësimi. Nxënësit në rajonin e Rogovës tani do të mbajnë mësimet e shkollës së mesme në një ndërtesë që përmbanë një sallë të sportit, dy klasa shtesë që do të mund të përdoren për bibliotekë dhe laborator dhe një zyre të drejtorit.

 

Ndërtesa e re e shkollës do të përmbushë nevojat e popullatës së rajonit të projektit dhe është në përputhje me nivelet e resurseve aktuale dhe atyre të planifikuara për kuadër, materiale, pajisje, funksionim dhe mirëmbajtje, thuhet në një njoftim të Zyrës amerikane në Prishtinë.

 

 

Trafoja e re, një investim kapital për komunën e Podujevës për furnizimin stabil me energji elektrike

 

Podujevë, 13 tetor - Në Podujevë janë në përfundim e sipër punimet në instalimin e trafos së re TS 220/35/20 Kv (hyrje –dalje) dhe të largpërçuesit 220 Kv. Ky konsiderohet investim kapital për komunën e Podujevës për furnizimin stabil me energji elektrike të qytetarëve.

Drejtori i njësisë së KEK-ut në Podujevë, inxh. Sali Fejzullahu tha se në këtë trafo për momentin po instalohet pjesa kompjuterike dhe daljet që duhet t'i kryejë ekipi i distribucionit. Por, sipas tij, janë të nevojshme edhe disa punë shtesë për shfrytëzimin e objektit të ri.

Projekti i ndërtimit të kësaj trafoje është donacion i Agjencionit Evropian për Rindërtim dhe investimet për pjesën e Podujevës kapin shifrën mbi 5 milion euro.

Gjatë një vizite që i bëri sot trafos në ndërtim, kryetari i komunës Agim Veliu, me bashkëpunëtorët, këtë projekt e vlerësoi si investim kapital për komunën e Podujevës, ngase qytetarët ta zgjedhin problemin e furnizimit me energji elektrike për një kohë të gjatë.

 

 

Zëvendëskryeministri i Maqedonisë Musa Xhaferi thotë se kosovarët duhet t'i përgjigjen pozitivisht ftesës për dialog me Beogradin

 

Shkup, 14 tetor 2003 - Zëvendëskryeministri i Maqedonisë, Musa Xhaferi thotë se pala kosovare duhet pozitivisht t'i përgjigjet ftesës për dialog për çështje teknike me Beogradin. Sipas tij, pavarësia e Kosovës është në favor të një perspektive të rajonit, e jo vetëm tjesht një interes egoist i shqiptarëve. Andaj, çdo alternativë tjetër, është humbje kohe, ka theksuar z. Xhaferi.

 

 

Ministrat e jashtëm të vendeve të BE-së në Luksemburg sërish i dhanë mbështetje të plotë dialogut Prishtinë – Beograd

 

Luksemburg, 14 tetor 2003 - Ministrat e jashtëm të vendeve të BE-së në takimin e mbajtur në Luksemburg edhe njëherë i është dhënë mbështetje e plotë nisjes së dialogut ndërmjet Prishtinës dhe Beogradit, duke konfirmuar edhe njëherë pjesëmarrjen në nivel më të lartë në Bashkimin Evropian në atë takim që fillon sot në Vjenë.

 

Disa zyrtarë të BE-së edhe me këtë rast kanë shprehur keqardhje për vendimin e kryeministrit të Kosovës për të mos marrë pjesë në bisedimet e Vjenës. Megjithatë kanë shtuar se nuk shohin ndonjë problem të madh, pasi që sipas fjalëve të tyre nisja e dialogut në Vjenë do të jetë vetëm simbolike e negociatat e vrëteta teknike do të vazhdojnë më vonë në nivel të ekspertëve, ku pjesëmarrja e ekspertëve të Qeverisë së Kosovës do të jetë e domosdoshme.

Ata shfaqën kënaqësinë e tyre se Kosova do të përfaqësohet në takimin e sotëm në nivelin më të lartë të saj me Presidentin Ibrahim Rugova dhe kryetarin e Parlamentit Nexhat Daci. Ndërkaq për ndasitë eventuale të shqiptarëve thonë se kjo nuk është çështje e bashkësisë ndërkombëtare, por e vetë shqiptarëve.

 

Për mosshkuarjen e z. Rexhepi zyrtarët e BE-së thanë se është vendim i tij personal dhe BE-ja nuk ka mundësi të detyrojë dikë të shkojë në një takim kundër vullnetit të tij.

"Mendojmë se nisma e dialogut është me rëndësi edhe për Kosovën dhe z. Rexhepi ishte në Samitin e Selanikut i gatshëm të bisedojë me Beogradin e tash ka ndryshuar mendjen. Ky është problem i tij e jo problem i yni", tha një zyratar i BE-së në Luksemburg gjatë takimit të ministrave të jashtëm të vendeve anëtare të BE-së.

 

 

OSBE-ja i vlerëson zgjedhjet në Shqipëri një hap të rëndësishëm drejt një demokracie të plotë

 

Tiranë, 14 tetor 2003 - Vëzhguesit ndërkombëtarë, që mbikëqyrën zgjedhjet vendore në Shqipëri, thonë se votimet shënuan një hap të rëndësishëm drejt një demokracie të plotë, megjithëse shtuan ata, duhet ende përparim për t'u arritur standardet perëndimore.

Votimet u mbikëqyrën nga më shumë se dyqind vëzhgues nga Organizata për Siguri dhe Bashkëpunim në Evropë (OSBE).

Vëzhguesit thanë se derisa votimet shënuan një përmirësim të rëndësishëm në krahasim me zgjedhjet e kaluara, një numër të metash duhet të hiqen para mbajtjes së zgjedhjeve të ardhshme parlamentare.

Një zyrtar i OSBE-së, pranoi se ka patur probleme me listat e votuesve por shtoi se nuk mendon që ato të kenë ndikuar në rezultatin përfundimtar.

 

 

Pritet fjala e vëzhguesve për zgjedhjet në Shqipëri

 

Tiranë, 14 tetor 2003 - Vëzhguesit ndërkombëtare në zgjedhjet vendore në Shqipëri pritet të thonë fjalën e tyre për mbarëvajtjen e votimeve, ndërsa socialistët në pushtet dhe demokratët e opozitës vazhdojnë të pretendojnë se kanë fituar.

Opozita ka denoncuar parregullsitë në listat e votimit dhe thotë se nuk do të njohë zgjedhjet në bashkinë e Tiranës dhe Durrësit dhe kërkon që ato të përsëriten.

 

 

Sali Berisha tha se PD është më tash forca e parë politike në vend, por PS thotë se ka fituar bindshëm

 

Tiranë, 14 tetor 2003 - Sali Berisha ka deklaruar se Partia Demokratike është më tash forca e parë politike në vend dhe se ka një rritje në jug të Shqipërisë, i njohur si bastion i socialistëve. Ai tha se PD ka korrur fitore të shkelqyer në mbarë vendin.

 

Në këtë kontekst u shpreh edhe Spartak Ngjela, i cili tha se është e pakontestueshme se në këtë zgjedhje ka fituar postin e kryebashkiakut të Tiranës. Në anën tjetër edhe Edi Rama thotë se është fitues e zgjedhjeve për këtë post.

Në përfundim të zgjdhjeve lokale në Shqipëri të dyja forcat kryesore politike: Partia Demokratike në opozitë dhe Partia Socialiste në pushtet pretendojnë se i kanë fituar këto zgjedhje. Madje në Tiranë ende nuk është arritur një kompromis me komesionerët e PD-së për të nënshkruar procesverbalin e votimeve.

Sekretari i PS të Shqipërisë Gramos Ruçi, ka deklaruar se në shkallë vendi socialistët janë fitues të zgjedhjeve vendore, ku sipas tij kanë shënuar fitore në 10 bashki të mëdha, por ka pranuar humbjen në disa të tjera.

 

Ndërkaq, opozita vazhdon t'i kontestojë rezultatet në Durrës dhe Tiranë, duke u mbështetur në faktin se shumë persona nuk kanë pasur emrin në listat e votimit dhe u është hequr e drejta e votës. Ndërkaq, socialistët thonë se Tiranë dhe në Durrës kanë korrë fitore bindëse.

Sipas njoftimeve të para në zgjedhjet lokale që u zhvilluan në Shqipëri, PS ka fituar në 36 bashki dhe 163 komuna, ndërkaq PD në 25 bashki dhe 90 komuna.

 

 

Për në Irak u nis njësiti i dytë i ushtarak paqeruajtës shqiptar

 

Tiranë, 14 tetor 2003 - Nga Tirana dje për në Irak u nis njësiti i dytë i ushtarak paqeruajtës i Armatës shqiptare. Ministri i Mbrojtjes, Pandeli Majko tha me këtë rast se është krenar me forcat ushtarake, që po dëshmojnë se janë një pjesë integrale dhe e respektuar e Aleancës Veriatlantike.

 

 

Sot në Bukuresht të Rumanisë do të fillojë punimet samiti i parë rajonal për investime

 

Bukuresht, 14 tetor 2003 - Sot në Bukuresht të Rumanisë do të fillojë punimet samiti i parë rajonal për investime, ku do të marrin pjesë 23 shtete nga Ballkani dhe Evropa Lindore, kurse temë diskutimesh do të jetë krijimi i partneriteteve ndërmjet sektorit shoqëror dhe privat me qëllim të zgjerimit ekonomik të Evropës Lindore.

 

 

Ushtria izraelite dëbon 15 të arrestuarë palestinezë nga Bregu Perendimor në Rripin e Gazës

 

Gaza, 14 tetor 2003 - Ushtria izraelite ka urdhëruar dëbimin e 15 të arrestuarëve palestinezë nga Bregu Perendimor në Rripin e Gazës. Korrespondentët nga rajoni thonë se ky vendim është i paprecedent dhe një dëbim i ngjashëm ka ndodhur vetëm një herë në të kaluarën.

 

Kështu, vjet tre të afërm të bombarduesve vetëvrasës palestinezë janë dëbuar nga Bregu Perendimor në Gaza me shpresë se do të pamundësojnë sulmet e mëtejme. Praktika e dëbimit me dhunë është denoncuar nga grupet e të drejtave të njeriut, të cilat kanë thënë se një veprim i tillë është në kundërshtim me ligjin ndërkombëtar, por qe refuzuar të zbatohet nga Gjykata supreme izraelite.

 

 

Në një aksident trafiku në Luiziana të SHBA-ve, kanë humbur jetën 8 vetë, kurse janë lënduar 15 të tjerë

 

Luiziana, 14 tetor 2003 – Në një aksident trafiku, që ka ndodhur në Luiziana të SHBA-ve, kur një autobus i kishës, që transportonte udhëtarë pleq, është përplasur për rimorkion e një kamioni, kanë humbur jetën tëtë vetë, kurse janë lënduar edhe 15 të tjerë, njofton rrjeti televiziv CNN.

 

Zëdhënësi i policisë shtetërore të Luzianës ka deklaruar se shkaku i aksidentit është se shoferin e ka zënë gjumi gjatë lëvizjes së autobusit. Autobusi i kishës së parë baptiste të Eldorados po dërgonte qytetarë pleq për të vizituar vende hiistorike. Policia ka thënë se 5 udhëtarë kanë vdekur në vend, kurse 3 të tjerë kanë vdekur në spital.

 

 

Operacionet izraelite kanë vazhduar edhe sot në kampin palestinez Rafah

 

Gaza, 14 tetor 2003 – Në vazhdim të operacionit izraelit të filluar të premten e kaluar, dhjetëra tanke kanë depërtuar sot (e martë) në kampin e refugjatëve Rafah në pjesën jugore të Rripit të Gazës, njofton BBCworld.

 

Dëshmitarët palestinezë kanë thënë se heret në mengjes dy kolona automjetesh të blinduara kanë hyrë në kamp në dy drejtime dhe janë drejtuar në pjesë të ndryshme të kampit nga ai që ka qenë në shënjestër ditëve të kaluara.

 

Burimet izraelite kanë konfirmuar vazhdimin e operacionit të se premtes dhe kanë thënë se armata po kërkon tunelet, që militantët i përdorin për kontrabandim të armëve nga Egjipti.

 

 

Djali i Osama bin Ladenit ka rol kryesor në sulmet vetëvrasëse të rrjetit të Al Kaidës

 

Uashington, 14 tetor 2003 – Një nga djemtë më të moçëm të Osama bin Ladenit është paraqitur të ketë luajtur rolin kryesor në rrjetin e al-Kaidës dhe është pjesëtar i një grupi të vogël liderësh, që rrjedhin nga grupet nga Irani, bën të ditur "Uashington post" në një shkrim të sotëm (e martë), njofton Rojter.

 

Duke cituar një burim evropian të zbulimit, kjo gazetë thotë se Saad bin Laden dhe një operativist i lartë i Al Kaidës në Iran kanë qenë në kontakt me një qelulë në Arabinë Saudite pak para bombardimit vetëvrasës të 12 majit në kryeqytetin saudit, kur qenë vrarë 35 njerëz.

 

Burimi nuk jep detajet e komunikimit, por thotë se sulmet e Riadit janë rezultat i kopntakteve të planifikuara në Iran dhe janë urdhëruar që andej.

 

 

Mirëpritet projekt rezoluta për Irakun

 

Nju Jork, 14 tetor 2003 - Ministrat e jashtëm të Francës dhe të Gjermanisë e kanë mirëpritur versionin e ri të një projekt rezolute amerikane në Kombet e Bashkuara, për rindërtimin politik dhe ekonomik të Irakut.

Teksti i fundit i jep afat deri më 15 dhjetor qeverisë së përkohshme të Irakut që të përmbushë afatin për hartimin e një kushtetute të re dhe zgjedhjet që do të pasojnë.

 

 

Në luftimet në Qerbela janë vrarë rreth 10 vetë dhe janë plagosur shumë të tjerë

 

Qerbela, Irak, 14 tetor 2003 – Fraksionet rivale muslimane shite janë përleshur gjatë natës në qytetin e shenjtë Qerbela, 50 mila në juglindje të Bagdadit, ku disa njerëz janë vrarë ose janë plagosur, kanë bërë të ditur sot (e martë) dëshmitarët, njofton AP. Policia irakiane ka rrethuar zyret e liderëve të njërit nga fraksioneve.

 

Luftimet duken të jenë pjesë e luftës për pushtet në komunitetin maxhoritar shit ndërmjet forcave të klerikut Muktadea al-Sadër, një kundërshtar i fuqishëm i forcvave ushtarake amerikane dhe ithtarëve të liderëve fetarë, që kanë qendrim të moderuar ndaj amerikanëve. Luftimet kanë përfunduar në agim.

 

Forcat e Al- Sadrit janë tërhequr në një xhami, ku janë rrethuar nga policia. Në këto luftime kanë humbur jetën rreth 10 vetë, kurse shumë të tjerë janë plagosur, kanë pohuar dëshmitarët vendës, por këto shifra ende nuk janë konfirmuar zyrtarisht.

 

 

Sadam Hysein mund të jetë i fshehur në shtëpinë e stërgjyshve të tij në Tikrit

 

Tikrit, 14 tetor 2003 – Ish-presidenti irakian, Sadam Hysein, mund të jetë i fshehur në shtëpinë e stërgjyshve të tij në Tikrit, kanë thënë zyrtarët amerikanë, njofton BBCnews. Infrmacionet e zbulimit thonë gjithashtu se ka indikacione që lideri i përmbysur po e udhëheq rezistencën e dhunshme kundëramerikane në zonë, 140 km në veri të kryeqytetit Bagdad, kanë shtuar këta zyrtarë.

 

”Ne kemi indikacione se ai ka qenë këtu rishtas...ai mund të jetë këtu edhe tash”, ka thënë sot (e martë) majori Roj Smith, komandant i Divizionit amerikan, të vendosur në Tikrit. Sadam Hyseini nuk është parë publikisht që nga fillimi i prillit, pak para se Bagdadi t’u dorëzohet forcave të koalicionit.

  |  KOMENTE  |  HISTORI  |   POLITIKË  |  OPINIONE  |  ADRESARI  |  ARKIVI  |