E hëne, 13 tetor 2003

E hëne, 13 tetor 2003

Përmbajtja:

Rugova, Holkeri dhe Daci udhëtuan sot për në Vjenë`
Presidenti Rugova dhe kryeparlamentari Daci përfaqësojnë Kosovën në takimin e Vjenës
Përfaqësuesit e Grupit të Kontaktit u dakorduan me Holkerin që bisedimet në Vjenë të fillojnë edhe pa kryeministrin
Lordi Robertson udhëton në Vjenë për të marrë pjesë në hapjen e bisedimeve ndërmjet Prishtinës dhe Beogradit
Kryeministri i Kosovës ka vendosur të mos shkojë në Vjenë
M. Mekllellën: Ne të gjithë do të jemi të përfaqësuar në Vjenë
H. Holkeri: Kosova do të përfaqësohet nga presidenti Rugova, i cili është simbol i unitetit dhe Kosovës multietnike
LDK: Pjesëmarrja e institucioneve më të larta në takimin e Vjenës ka rëndësi të madhe për proceset politike në Kosovë
L.Kohen: Nuk mendoj se shqiptarët e Kosovës do të mund të jetojnë në një shtet me serbët në të ardhmen
Për herë të parë një aeroplan civil ka ateruar në aeroportin "Amiko" në Gjakovë
Protestë e studentëve në Mitrovicë
Të rinjtë e LDK-së bënë nderime para shtatores së Sali Çekajt dhe pranë varreve të Zemajve
Holkeri i ka hequr nga përbërja e delegacionit Todoroviqin dhe Mumxhiun
Në Podujevë ndodh edhe vetëvrasja e tretë gjatë vetëm një jave
Nga Marrëveshja e tregtisë së lirë ndërmjet Kosovës dhe Shqipërisë nuk ka përfituar asnjë mall
Trajkovski nënshkruan një dekret për formimin e një njësiti për operacione të veçanta
Shefat e diplomacive të BE-së sot në Luksemburg do të diskutojnë për gjendjen në Ballkanin Perëndimor
PS dhe PD pretendojnë fitore
Janë pezulluar nga puna dy punonjës të rendit të cilët janë implikuar në zhdukjen e disa fletvotimeve
Rreth 1000 refugjatë nga Kosova në Maqedoni mund të kenë përkujdesje humanitare deri në fund të këtij muaji
Persona të maskuar kanë vrarë në Indonezi të pakten 10 të krishterë
grup politikanësh dhe intelektualësh izraelitë dhe palestinezë kanë një plan alternativ për paqen
Vritet një ushtar amerikan, kurse një tjetër plagoset në një minë tokësore afër qytetit Bajxhi
Në një sulm të kryengritësve maoistë në Nepal, janë vrarë të pakten 28 vetë
Në përleshjet e policisë boliviane me protestuesit humbin jetën 20 protestues
Vritet lideri i lartë i një grupi islamik Vadhur Rohman al-Ghozi
Operacioni përfundon me sukses për të ndarë dy binjakët siamezë
Shpërthim në Bagdad - gjashtë të vrarë
Përsëri viktima në Irak
Nga sulmet e talibanëve vriten 3 policë
Të paktën 31 njerëz e kanë humbur jetën nga zjarri në një spital në Bellorusi
Në luftimet ndërfisnore të javës së kaluar në Kongo janë vrarë 65 njerëz
Forcat izraelite kanë shkatërruar dy shtëpi dhe kanë arrestuar 20 palestinezë në Rripin e Gazës

Rugova, Holkeri dhe Daci udhëtuan sot për në Vjenë

Prishtinë, 13 tetor 2003 - Presidenti i Kosovës Ibrahim Rugova, shefi i UNMIK-ut Hari Holekri dhe kryetari i Kuvendit të Kosovës Nexhat Daci sot në mesditë udhëtuan për në Vjenë, ku do të marrin pjesë në fillimin e bisedimeve mes Prishtinës dhe Beogradit për çështje praktike.
Anëtarët e delegacionit të Kosovës, të cilët do ta marrin pjesë në takimin e nesërm të Vjenë deklaruan para mediave në aereportin e Prishtinës se do ta përfaqësojnë Kosovën në mënyrë të denjë dhe interesat e qytetarëve të saj.
Presidenti Rugova tha se vendimin për të marrë pjesë në takimin e Vjenës e ka marrë në në bazë të kompetencave dhe përgjegjësive të institucionit të Presidentit të Kosovës, që dalin nga Korniza Kushtetuese, si dhe pas kërkesave të bashkësisë ndërkombëtare.
Presidenti tha se në Vjenë përfaqëson interesat e qytetarëve të Kosovës, nga të cilët kërkoi përkrahje dhe mirëkuptim.
"Vendimin për të shkuar në Vjenë e kam marrë në bazë të kompetencave të mia kushtetuese që i përfaqësoj të gjithë qytetarët e Kosovës dhe popullin e saj dhe në bazë të kërkesës së bashkësisë ndërkombëtare që Kosova duhet të marrë pjesë në bisedimet për çështje praktike në Vjenë", tha Presidenit i Kosovës.

"Në të njëjtën kohë kërkoj dhe besoj se e kam edhe mirëkuptimin e qytetarëve të Kosovës", theksoi Presidenti Rugova, duke nënvizuar se vendimi për pjesëmarrje në takimin e Vjenës është marrë me qëllim që Kosova të mos akuzohet para bashkësisë ndërkombëtare dhe se dëshiron marrëdhënie të mira me të gjithë fqinjët e saj.

Ndonëse shumica kanë qenë pro bisedimeve, Presidenti shprehu bindjen se me gjithë dallimet që ekzistonin tash, institucionet e Kosovës do të vazhdojnë të funksionojnë si më parë.
Ndërkaq shefi i UNMIK-ut Hari Holkeri tha se Kosova do të përfaqësohet denjësisht në Vjenë, duke shprehur njëherit keqardhje që në delegacionin e Kosovës nuk ndodhet edhe Qeveria.
"Për fat të keq, mosuniteti i subjekteve politike ka bërë që në Vjenë të mos përfaqësohen të gjitha institucionet e Kosovës. Prej tri institucioneve, atje do të shkojnë vetëm dy. Sigurisht ne do të përpiqemi që atje ta përfaqësojmë në mënyrë të denjë Kosovën". theksoi Holkeri.
Kryetari i Kuvendit Nexhat Daci tha se takimi i Vjenës do të jetë fillimi i një rruge të parë dhe të vështirë të përfaqësimit të drejtpërdrejtë të shtetit të Kosovës, duke shprehur bindjen se në Vjenë Kosova do të përfaqësohet në mënyrë të denjë. Kryeparlamentari Daci tha se mospërfaqësimi i qeverisë në fillimin e dialogut është një hendikep për institucionet e Kosovës. "Unë mendoj që është një hendikep real.

Do të ketë kohë për riparime të tilla, por mendoj se në momentet kritike, konform forcës që ka një subjekt politik, duhet t'i marrë përgjegjësitë e veta", tha Daci, duke e quajtur indirekt të gabuar vendimin Kryeministrit për të mos marrë pjesë në takimin e Vjenës.


Presidenti Rugova dhe kryeparlamentari Daci përfaqësojnë Kosovën në takimin e Vjenës

Prishtinë, 13 tetor 2003 - Pas konsultimeve intensive, Presidenti i Kosovës Ibrahim Rugova dhe Kryetari i Kuvendit të Kosovës, Nexhat Daci, kanë vendosur që të marrin pjesë në takimin e Vjenës më 14 tetor 2003.
Udhëheqësit më të lartë të Kosovës, Presidenti Ibrahim Rugova dhe kryeparlamentari Nexhat Daci, këtë vendim e kanë marrë në interes të së sotmes dhe të ardhmes së vendit tonë, Kosovës.
Për këtë vendim është njoftuar dje në mbrëmje Përfaqësuesi Special i Sekretarit të Përgjithshëm (PSSP) Harri Holkeri.


Përfaqësuesit e Grupit të Kontaktit u dakorduan me Holkerin që bisedimet në Vjenë të fillojnë edhe pa kryeministrin

Prishtinë, 13 tetor 2003 - Përfaqësuesit e Grupit të Kontaktit në Kosovë në takimin e djeshëm kanë rënë dakord me shefin e UNMIK-ut, Hari Holkerin, që bisedimet ndërmjet Prishtinës dhe Beogradit të fillojnë në Vjenë edhe pa pjesëmarrjen e kryeministrit të Kosovës.
Pas këtij takimi shefi i Zyrës gjermane, Piter Rondorf ka thënë se delegacioni i Kosovës do të marrë pjesë në takimin e Vjenës.


Lordi Robertson udhëton në Vjenë për të marrë pjesë në hapjen e bisedimeve ndërmjet Prishtinës dhe Beogradit

Bruksel, 13 tetor 2003 – Sekretari i përgjithshëm i NATO-s, Lordi Xhorxh Robertson do të udhëtojë në Vjenë më 14 tetor, me qëllim që të marrë pjesë në hapjen e bisedimeve të para të drejtpërdrejta ndërmjet Prishtinës dhe Beogradit, të organizuara nga Misioni i Kombeve të Bashkuara në Kosovë (UNMIK) dhe të mbështetura nga NATO, Bashkimi Evropian dhe OSBE, njofton selia e NATO-s në Bruksel.
Bisedimet do të kryesohen nga Përfaqësuesi i Sekretarit të përgjithshëm i Kombeve të Bashkuara në Kosovë, z. Hari Holkeri dhe do të përqendrohen në çështjet praktike me interes të ndërsjellë për Prishtinën dhe Beogradin, thuhet në një njoftim nga selia e NATO-s në Bruksel.


Kryeministri i Kosovës ka vendosur të mos shkojë në Vjenë

Prishtinë, 13 tetor 2003 - Kryeministri i Kosovës Bajram Rexhepi ka marrë qëndrim që të mos shkojë në takimin e Vjenës. Vendimin e tij e ka bërë publik nëpërmjet një deklarate të regjistruar për mediat elektronike.

Sipas kryeministrit Rexhepi ky nuk ka qenë një vendim i lehtë për të, duke shtuar se nuk i frikësohet sfidave dhe konfrontimit me çështje vitale, duke u shprehur kështu i gatshëm për të biseduar me fqinjët, përfshirë edhe Serbinë, por për këtë duhet të vendosë Kosova e jo të tjerët në emër të saj.

Rexhepi në këtë deklaratë po ashtu ka thënë se aktualisht do të merret me konsolidimin dhe forcimin e Qeverisë së Kosovës.


M. Mekllellën: Ne të gjithë do të jemi të përfaqësuar në Vjenë

Prishtinë, 13 tetor 2003 - Lidhur me mospjesëmarrjen e kryeministrit të Kosovës, Bajram Rexhepit në bisedimet ndërmjet Prishtinës dhe Beogradit në Vjenë, vendet anëtare të "kuintit" kanë hartuar një deklaratë të përbashkët, të cilën në emër të këtyre vendeve, e bëri mbrëmë publike, drejtori për Informim në Zyrën amerikane në Prishtinë, Majkëll Mekllellën.
"Shprehim keqardhje të thellë që kryeministri ka vendosur të mos shkojë në Vjenë.

Qeveritë tona, siç edhe e dini nga gjithë ato që kemi thënë këtu dhe në kryeqytetet tona janë fuqimisht për atë që dialogu të filloj tash. Ky ka qenë qëndrimi unik i QUIN-tit që nga fillimi. Kjo është arsyeja pse ne të gjithë do të jemi të përfaqësuar në Vjenë". thuhet në këtë deklaratë.


H. Holkeri: Kosova do të përfaqësohet nga presidenti Rugova, i cili është simbol i unitetit dhe Kosovës multietnike

Prishtinë, 13 tetor 2003 - Lidhur me vendimin e kryeministrit Rexhepi për mospjesëmarrje në takimin e Vjenës, ka shfaqur qëndrimin e edhe kryeadministratori i Kosovës, Hari Holkeri, nëpërmjet zëdhënëses së tij Izabela Karlovic.

Përfaqësuesi Special i Sekretarit të Përgjithshëm Hari Holkeri ka dhënë këtë deklaratë:
"Gjithë bashkësia ndërkombëtare është angazhuar në mënyrë të drejtëpërdrejt për të mbështetur Presidentin Ibrahim Rugova dhe drejtuesit e tjerë të Kosovës që dëshirojnë t'i japin popullit të Kosovës shansën për të qenë të përfaqësuar në bazë të gjerë në hapjen e bisedimeve të drejtëpërdrejta ndërmjet Prishtinës dhe Beogradit të martën në Vjenë.

Meqë siç u tha doli se është e pamundur të përfshihen drejtuesit e Qeverisë në delegacion. Kosova do të përfaqësohet nga presidenti Rugova, i cili është simbol i unitetit dhe Kosovës multietnike, Nexhat Daci, kryetar i Parlamentit, po ashtu do të jetë në delegacion.
Bisedimet e Vjenës do të fillojnë në praninë e përfaqësuesve të nivelit të lartë të bashkësisë ndërkombëtare, pavarësisht nga vështirësitë brenda qeverisë. Ne shpresojmë se kur të fillojnë bisedimet e vërteta teknike në kuadër të grupeve punuese, institucionet e Kosovës do të angazhohen në mënyrë të plotë për të ndihmuar në zgjidhjen e çështjeve, që do të hapen në diskutim që është interes praktik i drejtëpërdrejt për të gjithë qytetarët e Kosovës".


LDK: Pjesëmarrja e institucioneve më të larta në takimin e Vjenës ka rëndësi të madhe për proceset politike në Kosovë

Prishtinë, 13 tetor 2003 - LDK konsideron se pjesëmarrja e institucioneve më të larta të Kosovës në takimin e Vjenës ka rëndësi të madhe për proceset politike nëpër të cilat po kalon Kosova, dhe është në interes të Kosovës dhe të ardhmes së saj, tha në një prononcim zëdhënësi i LDK-së Lulzim Zeneli.
Kosova në takimin e Vjenës do të përfaqësohet në nivelin më të lartë shtetëror nga Presidenti i Kosovës Dr.Ibrahim Rugova dhe Kryetari i Parlamentit të Kosovës, Nexhat Daci dhe ky takim do të jetë në vazhdën e afirmimit dhe argumentimin të vazhdueshëm të institucioneve të Kosovës në finalizimin sa më të shpejtë të procesit të pavarësisë së Kosovës, vlerësoi ai.
"Kosova pret ta kalojë këtë sfidë, këtë e presin qytetarët e Kosovës, këtë e presin miqtë tanë ndërkombëtar", thekson Zeneli.
Ndërkaq, sa i përket mospjesëmarrjës së Kryeministrit të Kosovës, për LDK-në kjo është çështje personale e tij dhe e partisë që ai përfaqëson në koalicionin qeveritar, tha zëdhënësi i LDK-së Lulzim Zeneli.


L.Kohen: Nuk mendoj se shqiptarët e Kosovës do të mund të jetojnë në një shtet me serbët në të ardhmen

Pragë, 13 tetor 2003 - "Nuk mendoj se shumica në Kosovë, 95 për qind e shqiptarëve do të mund të jetojnë në një shtet serb në të ardhmen", tha për "Evropën e lirë", Leonard Kohen, profesor në Universitetin British Kollumbia në Kanada dhe autor i disa librave mbi Ballkanin.

Kohen nuk shprehet optimist as me gjasat për mbetjen e Unionit Serbi dhe Mali i Zi dhe thotë se shtetet e tilla sintetike nuk mund të funksionojnë vetëm me mbështetje nga jashtë.
Duke vlerësuar gjendjen në Serbi, tri vjet pas rënies së Millosheviqit, Kohen thotë se atje ende ekzistojnë burime të fuqishme të ultranacionalizmit dhe nacionalizmit agresiv.
Sipas tij sa i përket Kosovës BE dhe komuniteti ndërkombëtar do të përpiqet sa më shumë ta shtyjë pavarësinë e saj, të cilën shqiptarët e Kosovës e synojnë.


Për herë të parë një aeroplan civil ka ateruar në aeroportin "Amiko" në Gjakovë

Gjakovë, 13 tetor 2003 - Për herë të parë një aeroplan civil ka ateruar në aeroportin "Amiko" në Gjakovë. Aeroplani "Boing 737" mbërriti nga Roma në Gjakovë me 200 anëtarë të personelit ushtarak italian dhe ky ishte udhëtimi i parë civil i mundësuar gjatë fundjavës, bënë të ditur përfaqësuesit e aeroportit "Amiko" në Gjakovë.
Aeroporti "Amiko" është një bazë ajrore e ndërtuar gjatë luftës nga forcat e KFOR-it Italian i cili është duke funksionuar që nga 25 shtatori 1999 dhe e ka pistën e gjatë 1.800 m me hapësirë parkingu, rrugë për taksi, shërbim zjarrfikësish si dhe është i pajisur me të gjitha pajisjet radiofonike.
Sipas personelit, aeroporti "Amiko" është ndërtuar krejtësisht nga aeronautika ushtarake italiane. "Ky aeroport do të bëhet funksional për fluturimet civile dhe ato ushtarake gjë që do të jetë shumë e rëndësishme për zhvillimin ekonomik të tërë Kosovës.

Aeroporti i Gjakovës do të jetë edhe më shumë funksional nëse kihet parasysh fakti se aeroporti i Prishtinës gjatë dimrit për shkak të mjegullës nuk mund t'i ofrojë shërbimet e veta, thonë ata.
Brenda një kohe të shkurtër aeroporti "Amiko" në Gjakovë do të shndërrohet nga ushtarak në civil, por mund të funksionojë edhe me shërbim të alternuar ndërsa deri atëhere ai do të jetë nën komandën e trupave të KFOR-it Italian. (B.A.)


Protestë e studentëve në Mitrovicë

Mitrovicë, 13 tetor 2003 - Studentët e Fakultetit Xehetaro-Matlugjik të Mitrovicës protestuan sot në Mitrovicë, duke kërkuar kthimin e tyre në objektet e uzupruara të fakultetit në veri të qytetit.
Ata thanë se janë të indinjuar me neglizhencën e faktorit vendor dhe ndërkombëtar për të zgjidhur problemin e studentëve të Mitrovicës, të cilët katër vjet pas luftës janë jashtë objekteve të tyre legjitime universitare. Protesta e studentëve përfundoi qetë dhe pa incidente.


Të rinjtë e LDK-së bënë nderime para shtatores së Sali Çekajt dhe pranë varreve të Zemajve

Deçan, 13 tetor 2003 - Anëtarët e kryesive të katër degëve të qytetit të Prishtinës të Forumit të Rinisë të Lidhjës Demokratike të Kosovës, në vazhdën e aktiviteteve të tyre të përbashkëta që po i realizojnë, dje në Strellc të Deçanit bënë nderime pranë varreve të kolegut të tyre të vrarë, Hasan Zemaj (ish-kryetar i degës së FR të LDK-së në Deçan) dhe kolonel Tahir Zemaj (ish-komandant i ZO të Rrafshit të Dukagjinit të ish-UÇK-së) dhe djalit të tij, Enisit.
Ata u betuan para varreve të këtyre dëshmorëve se do ta vazhdojnë rrugën e trasuar nga ata drejt realizimit të pavarësisë së Kosovës dhe se do të mbeten të paharruar në zemrat e çdo shqiptari. Më pas, të rinjtë e LDK-së, në Deçan bënë nderime edhe para shtatores së komandantit të njohur të ish-UÇK-së, Sali Çekajt.


Holkeri i ka hequr nga përbërja e delegacionit Todoroviqin dhe Mumxhiun

Prishtinë, 13 tetor 2003 - Koordinatori për personat e zhvendosur në Qeverinë e Kosovës, Milan Todoroviq dhe ministrja e Shëndetesisë Resmije Mumxhi, nga radhët e minoriteteve, nuk shkojnë në Vjenë në përbërëje të delegacionit të Kosovës në fillimin e bisedimeve Prishtinë-Beograd. Vendimi që Todoroviq dhe Mumxhi të mos shkojnë në Vjenë është njoftuar mbrëmë, pasi që kryeministri i Kosovës ka refuzuar të shkojë në Vjenë.
Todoroviq thotë se atë e ka hequr nga përbërja e delegacionit të Kosovës vetë kryeadministratori Holkeri, i cili i ka thënë se nuk ka kuptim që cilidoqoftë nga Qeveria e Kosovës të marrë në bisedime nëse ka heqë dorë kryeministri Rexhepi.

Todoroviq ka vlerësuar për mediat serbe se delegacioni i Prishtinës nuk është multietnik, siç ishte koncipuar më herët, por nëse mbahet takimi i Vjenës, atëherë ato do të jenë bisedime serbo-shqiptare, e jo dialog i Beogradit dhe Prishtinës.


Në Podujevë ndodh edhe vetëvrasja e tretë gjatë vetëm një jave

Podujevë, 13 tetor 2003 – Polica e SHPK-së konfirmoi se në vendin e quajtur "Te Pishat", një qytetar i ri ka varur veten në litar. Policia ka dalë në vendin e ngjarjes së bashku me mjekët që kanë konstatuar vdekjen e tij, e cila është bërë me vetëvarje në litar, njofojnë burimet e DMPD-së nga Stacioni i Policisë në Podujevë.

I ndjeri që i ka dhënë fund jetës së tij në litar, është Bekim Halim Maloku 26 vjeqar me vendbanim në Podujevë, i pamartuar, kurse nuk dihet motivi që e shtyri t'ia marrë jetën vetes.
Psikiatri Dr. Shaban Jashari lidhur me tri vetvrasjet e fundit që ndodhën në komunën e Podujevës mendon se ato janë pasojë e streseve traumatike të pasluftës, çrregullimeve në familje, papunësisë dhe gjendjes së rëndë sociale, etj.

"Mirëpo edhe një prej problemeve që është prezent veçanërisht te të rinjtë është depresioni nga pa perpsektiva, papunësia dhe kushtet ekonomike", deklaroi Jashari. Sipas tij kriza ekonomike sjell edhe krizat tjera, por brengosës është fakti se shoqëria nuk po i trajton këto raste ashtu siç duhet.
Ky rast është vetëvrasja e tretë vetëm brenda javës që po lëmë pas. Gjatë muajit tetor pas vetëvrasjes së një gruaje në ujërat e Liqenit të Batllavës dhe vetëvrasjes me armë zjarri që ndodhi një javë më parë në fshatin Sfeçël të Podujevës, ky është rasti i tretë që njerëzit i japin fund jetës në një mënyrë të tillë.


Nga Marrëveshja e tregtisë së lirë ndërmjet Kosovës dhe Shqipërisë nuk ka përfituar asnjë mall

Tiranë, 18 tetor - Megjithë faktin se Marrëveshja e tregtisë së lirë ndërmjet Shqipërisë dhe Kosovës ka hyrë në fuqi më 1 tetor të këtij viti, deri më tash asnjë mall nuk ka përfituar nga ky regjim.

Sipas burimeve nga dogana e Morinit shkak për bllokimin e kësaj marrëveshje është mungesa e njohurive teknike nga ana e doganierëve shqiptarë për zbatimin e saj.

Për këtë qëllim prej më shumë se katër ditësh specialistë të misionit të evro-doganave për Shqipërinë janë duke zhvilluar trajnime me doganierët dhe agjentët doganorë të Morinit.
Ndërkohë, specialistë të euro-doganave, që janë duke u marrë me trajnimin e doganierëve kanë pohuar se problem për zbatimin e Marrëveshjes mbetet origjina e mallit, nëse është apo jo prodhim vendës.


Shefat e diplomacive të BE-së sot në Luksemburg do të diskutojnë për gjendjen në Ballkanin Perëndimor

Luksemburg, 13 tetor 2003 - Shefat e diplomacive të Bashkimit Evropian sot në Luksemburg do të diskutojnë për gjendjen në Ballkanin Perëndimor.

Ndërkaq në një bisedë me kryeprokuroren e Tribunalit të Hagës Karla del Ponte, ministrat e BE-së posaçërisht do të anazhohen për domosdoshmërinë e bashkëpunimit të vendeve të rajonit të Ballkanit me Hagën.

Ministrat evropianë do të mbështesin dialogun Beograd-Prishtinë, do të theksojnë domosdoshmërinë e marrëveshjeve rajonale, si dhe do të prekin edhe situatën poliike në Serbi.


PS dhe PD pretendojnë fitore

Tiranë, 13 tetor 2003 - Partia Socialiste në Shqipëri thotë se ka fituar shumicën e bashkive dhe komunave në zgjedhjet lokale të së djelës, por Partia Demokratike e opozitës pretendon gjithashtu të ketë fituar në zgjedhje.
Sipas PS-së, Edi Rama ka fituar në Tiranë, ndërsa PD ka lajmëruar se të dërguarit e saj në komisionet zgjedhore të Tiranës nuk do të nënshkruajnë procesverbalet e votimeve.
Komisioni Qendror i Zgjedhjeve (KQZ) në Shqipëri shtyu të dielën për 1 orë procesin e votimit në Tiranë, ndërsa pjesa tjetër e Shqipërisë i mbylli kutitë e votimit në orën 19 sipas ligjit.
Gjatë gjithë natës pranë shtabeve elektorale të partive kanë mbërritur rezultatet e votimit, por KQZ ka 3 ditë afat për shpalljen zyrtare të rezultateve.


Janë pezulluar nga puna dy punonjës të rendit të cilët janë implikuar në zhdukjen e disa fletvotimeve

Shkodër, 13 tetor 2003 - Drejtoria e policisë në Shkodër ka bërë të ditur se ka pezulluar nga puna dy punonjës të rendit të cilët janë akuzuar nga drejtuesit e Partisë Demokratike në Shkodër për implikim në zhdukjen e disa fletvotimeve në një qendër në këtë bashki.


Rreth 1000 refugjatë nga Kosova në Maqedoni mund të kenë përkujdesje humanitare deri në fund të këtij muaji

Shkup, 13 tetor 2003 - Rreth 1000 refugjatë nga Kosova, shumica prej tyre të përkatësisë rome, të cilët kanë ardhur në Maqedoni gjatë krizës në Kosovë, të drejtën e tyre nga statusi i personave me përkujdesje humanitare do të mund ta shfrytëzojnë deri në fund të këtij muaji.

Nëse deri më këtë afat këta persona nuk paraqesin kërkesën për azil, ata do të trajtohen si shtetas të huaj pa mbështetje ndërkombëtare.
Ndërkaq ligji për azil në Maqedoni ka hyrë në fuqi para një muaji me qëllim që ky vend përfundimisht t'i ofrohet legjislaturës evropiane, sipas të cilës njerëzit nuk mund të kenë statusin e refugjatit më shumë se dy vjet.


Persona të maskuar kanë vrarë në Indonezi të pakten 10 të krishterë

Xhakartë, 13 tetor 2003 – Indonezia ka dërguar mijëra forca të sigurimit në provincën qendrore Sulauesi, pasi sulmet e përgjakshme kundër fshatarëve të krishterë kanë shtuar frikën për ripërtritjen e dhunës mbi baza fetare në rajon, kanë thënë sot (e hënë) zyrtarët, njofton Rojter.
Persona të armatosur të paidentifikuar, të veshur me rrobe maskuese, kanë vrarë të pakten 10 të krishterë në sulmet e përgjakshme në katër fshatra të provincës Suluasi gjatë javës së kaluar, ka thënë policia. Dëshmitarët vendës thonë për të pakten 15 të vrarë. Sulmet kanë ndodhur afër qytetit Poso, rreth njëmij mila në verilindje të Xhakartës.
Dhuna muslimano-kristiane në rajon ka shkaktuar vdekjen e rreth 2 mijë vetëve gjatë përleshjeve ndërmjet tyre që nga viti 1999. Rreth 85 për qind të 210 milionë banorëve të Indonezisë janë muslimanë. Pjesa tjetër janë të krishterë, hindu dhe animistë.


Një grup politikanësh dhe intelektualësh izraelitë dhe palestinezë kanë një plan alternativ për paqen

Tel Aviv, 13 tetor 2003 - Një grup politikanësh dhe intelektualësh izraelitë dhe palestinezë thonë se pas 2 vjetësh bisedime sekrete, kanë rënë dakord për një projekt- marrëveshje për paqe.
Negociatorët nuk janë tërhequr prej qeverive të tyre. Palestinezët, përfshirë edhe ish ministrat njoftohet se e mbështesin udhëheqësin palestinez Jaser Arafat.
Nga ana e Izraelit ka patur vetëm kritika nga kryeministri Ariel Sharon. Ai e ka denoncuar me zemërim këtë propozim. Zoti Sharon akuzoi izraelitët e krahut të majtë se po përpiqen të rrëzojnë qeverinë e koalicionit. Sharon vazhdon të këmbëngulë se nuk do të ketë bisedime kokë më kokë me palën palestineze.


Vritet një ushtar amerikan, kurse një tjetër plagoset në një minë tokësore afër qytetit Bajxhi

Bagdad, 13 tetor 2003 – Një ushtar amerikan është vrarë dhe një tjetër është plagosur kur automjeti i tyre luftarak ka rënë në një minë tokësore afër qytetit Bajxhi në pjesën veriore të Irakut, ka njoftuar sot (e hënë) zëdhënësi ushtarak amerikan, njofton Rojter.

Vrasja e këtij ushtari ngre në 95 numrin e ushtarëve të vrarë amerikanë që kur Uashingtoni më një maj ka shpallur të përfunduar luftën në Irak.


Në një sulm të kryengritësve maoistë në Nepal, janë vrarë të pakten 28 vetë

Katmandu, 13 tetor 2003 – Të pakten 28 vetë janë vrarë kur kryengritësit maoistë kanë tentuar të depërtojnë në një stacion policie trajnimi në pjesën veriore të Nepalit, ka bërë të ditur sot (e hënë) policia vendore, njofton Rojter. Sulmi i mbrëmshëm bëhet vetëm një ditë pasi të pakten 40 njerëz, ndër të cilët 37 kryengritës, qenë vrarë në luftimet e ashpra, po kështu, në Mbretërinë e Himalajeve.

Dhjetëra policë dhe 16 kryengritës kanë humbur jetën në përleshjet më të reja, që ndodhen në Baluang, 250 mila në perendim të kryeqyutetit Katmundu, kanë thënë zyrtarët. Dhuna e fundjavës i ka dhënë fund armëpushimit nëntëditësh, të inicuar nga kryengritësit gjatë festivalit hindu në Dasain, që është festivali më i madh hindu në Nepal.


Në përleshjet e policisë boliviane me protestuesit humbin jetën 20 protestues

La Paz, Bolivi, 13 tetor 2003 - Rreth 20 protestues kanë vdekur kur qeveria boliviane ka dërguar mbrëmë mijëra trupa, të mbështetura me tanke për të shuar protestat e dhunshme, të cilat po shtoheshin gjithnjë e më shumë, kundër presidentit Gonzalo Sançez de Lozada, bën të ditur Rojter në një njoftim të sotëm (e hënë).

Protestuesit janë vrarë gjatë një përleshjeje me trupat në periferinë e varfër industriale të La Pazit, kanë thënë zyrtarët e të drejtave të njeriut. Qeveria, ndërkaq, ka konfirmuar se në këto përleshje kanë vdekur vetëm katër civilë dhe një ushtar, ndërsa 30 të tjerë janë lënduar.


Vritet lideri i lartë i një grupi islamik Vadhur Rohman al-Ghozi

Manila, 13 tetor 2003 – Presidentja e Filipineve, Gloria Macapagal Arrojo i ka përshëndetur forcat e sigurimit për vrasjen e një militanti të arratisur indonezian dhe ka thënë se vdekja e tij tregon se “terroristët” nuk do të kenë sukses kurrë në vendin e saj, njofton Rojter.

Ushtria e Filipineve ka thënë se Vadhur Rohman al-Ghozi, lider i lartë i grupit islamik Xhemah Islamiah dhe një nga personat më të kërkuar në Azi pasi kishte ikur nga burgu i Manilas në korrik, është vrarë dje në rajonin jugor Mindanao. Është kjo mbështetja më e madhe për qeverinë para vizitës së presidentit Bush në javën e ardhshme.


Operacioni përfundon me sukses për të ndarë dy binjakët siamezë

Dallas, SHBA, 13 tetor 2003 - Doktorët në Shtetet e Bashkuara kanë përfunduar me sukses ndërhyrjen kirurgjikale për të ndarë dy binjakët siamezë egjiptianë.
Një zyrtar në spitalin e Dallasit ku u krye operacioni, Doktor Jim Thomas, i tha BBC-së se të dy djemtë ishin mirë dhe se ata priteshin të dilnin nga koma pas 3 apo 4 ditësh.
Nuk dihet nëse ndërhyrja do të ketë lënë pasoja neurologjike mbi fëmijët.
Doktorët po punojnë për të mbyllur të çarat në kafkë.
Të atit të fëmijëve i ranë të fikët në momentin kur mori vesh se të dy djemtë e tij ishin ndarë.
Ekipi prej 50 mjekësh kaloi më shumë se një ditë për të ndarë enët e gjakut që lidhnin kokat e të dy fëmijëve. Donacionet e bëra arritën të mbulonin koston 2 milionë dollarëshe të operacionit.


Shpërthim në Bagdad - gjashtë të vrarë

Bagdad, 13 tetor 2003 - Një makinë bombë ka shpërthyer dje në qendër të Bagdadit. Objekt i shpërthimit ka qenë Hoteli Bagdad, i cili përdoret nga pjesëtarë të këshillit qeverisës irakian, dhe zyrtarë të tjerë të lartë që punojnë me koalicionin.
Një zëdhënës ushtarak amerikan tha se gjashtë persona, midis të cilëve disa policë irakianë, kanë gjetur vdekjen dhe dhjetë të tjerë janë plagosur.
Shpërthimet ndodhen jo shumë pranë hotelit, i cili është i rrethuar nga një barrierë betoni.


Përsëri viktima në Irak

Kirkuk, 13 tetor 2003 - Një person është vrarë në qytetin irakian Kirkuk gjatë përpjekjeve për të hedhur një granatë ndaj një rajoni policie. Siç bënë të ditur zyrtarët lënda eksplozive ka shpërthyer në dorën e atantatorit para se ky i fundit të arrijë ta lëshojë atë. Si pasojë janë plagosur edhe dy policë.


Nga sulmet e talibanëve vriten 3 policë

Kabul, 13 tetor 2003 - Zyrtarët afganë njoftuan se rreth 100 pjesëtarë të talibanëve i kanë sulmuar zyrat e pushtetit në provincën jugore Zabul, me ç'rast 3 policë janë vrarë, tre janë plagosur kurse 8 persona janë rrëmbyer. Sulmi është kryer me armë të rënda dhe raketa.
Në një zhvillim tjetër, njoftohet se nga një burg në jug të Afganistanit, përmes një tuneli të fshehtë kanë ikur 41 të burgosur talibanë.


Të paktën 31 njerëz e kanë humbur jetën nga zjarri në një spital në Bellorusi

Minsk, 13 tetor 2003 - Të paktën 31 njerëz e kanë humbur jetën nga zjarri që shpërtheu në një spital psikiatrik në Bellorusi.
Ministri për Situata Emergjente Valery Astapov tha se zjarrin e kishin ndezur vetë pacientët e spitalit në rajonin Grodno, ndërsa vonesa gjysëm orëshe e zjarrfikësve e kishte bërë të vetën.
Njoftohet se presidenti Alyaksandar Lukashenka ka urdhëruar hetime të plota për rastin.


Në luftimet ndërfisnore të javës së kaluar në Kongo janë vrarë 65 njerëz

Kongo, 13 tetor 2003 – Në luftimet ndërfisnore të javës së kaluar ndërmjet feiseve Lendu dhe Hema, në Kongo janë vrarë 65 njerëz, që mendohet të jenë të fisit minoritar Hema, të vrarë në fshatin Kaçele, njofton BBCËworld.

Që nga viti 1999, kur kanë shpërthyyer dhe zhvillohen këto luftime, kanë humbur jetën rreth 50 mijë njerëz. Rrjedhojat e përgjakshme të luftimeve të javës që shkoi, kanë bërë që paqeruajtësit e OKB-së në këtë vend të zhvendosen në tri fshatrat provincës së trazuar Ituri në verilindje të RP të Kongos.

Kreu i këtyre forcave ndërkombëtare ka vizituar fshatin Kaçele ku janë kryer vrasjet e lartpërmendura.


Forcat izraelite kanë shkatërruar dy shtëpi dhe kanë arrestuar 20 palestinezë në Rripin e Gazës

Rafa, 13 tetor 2003 - Forcat izraelite kanë shkatërruar dy shtëpi palestineze në jug të Rripit të Gazës në qytetin Rafah, ndërkohë herët në mëngjes 20 palestinezë janë arrestuar në incidente të veçanta në qytetet Xhenin dhe Turkalem.

Sipas burimeve palestineze (IPC), ushtarët izraelitë kanë hapur zjarr dhe kanë plagosur një vajzë të vogël palestineze, e cila ndodhet në gjendje kritike