Manifestimi Letrar Ndërkombëtar “Ditët e Naimit” mbahet prej datës 16 – 19 tetor në Pallatin e Kulturës në Tetovë

Tetovë (MAQEDONI), 27 shtator 2003 / TN

 

Drejtoria e Manifestimi Letrar Ndërkombëtar “Ditët e Naimit” njofton se prej datës 16 – 19 tetor të këtij viti, në Pallatin e Kulturës në Tetovë, do të mbahet Edicioni i Shtatë i këtij festivali. Në të janë ftuar të marrin pjesë një numër i madh krijuesish nga vendi dhe nga jashtë.

 

Deri tani pjesëmarrjen e tyre e kanë konfirmuar 25 poetë nga vende të ndryshme të botës siç janë: Paraguaj, Estonia, Gjeorgjia, Martiniku (Ishujt e Karaibeve), Tunisi, Greqia, Italia, Gjermania, Polonia, Zvicra, Kroacia, Çekia, Sllovakia, Koreja e Jugut, Libani, Rumania, Serbia dhe Mali i Zi etj.

 

Po ashtu, pjesëmarrjen e tyre e kanë konfirmuar edhe një numër i madh poetësh shqiptarë nga e gjithë hapësira etnike, si dhe nga diaspora.

 

Si zakonisht, edhe sivjet Drejtoria e MLN “Ditët e Naimit” bo ta botojë librin me poezitë e autorëve pjesëmarrës, si dhe do t’i ndajë çmimet letrare tradicionale: “Naim Frashëri”, “Menada”, “Oeneumi” dhe “Qiriu i Naimit”.

 

Në suaza të këtij edicioni do të shpallen edhe anëtarët e nderit të Festivalit. Pra, krahas anëtarëve të deritashëm të nderit: Ismail Kadare, Fatos Arapi, Ali Podrimja, Robert Elsie, Rexhep Ismajli dhe Aleksandër Zoto, do të jenë edhe poetët e njohur Abdylazis Islami dhe Din Mehmeti.

 

Në kuadër të programit të sivjemë do të zhvillohen një varg aktivitetesh të rëndësishme kulturore, letrare, artistike, shkencore etj., si dhe disa vizita në qytetin e Tetovës dhe më gjerë.

 

Prej dates 19 deri me 21 tetor poetet e huaj do te vizitojnë Shqiperinë, ku në bashkëpunim me Lidhjen e Shkrimtarëve dhe Artistëve të Shqipërisë do të mbajnë një orë letrare në Tiranë, dhe do të vizitojnë disa qytete historike si Krujën, Beratin, Apolloninë, Ardenicën dhe Durrësin.

Copyright©2000-2003 Trepca.net - Të gjitha të  drejtat e rezervuara.