Kryetari i KK të Mitroicës Faruk Spahija sot qëndroi dhe bisedoi për dy orë e gjysëm me banorët e lagjës “ Kodra e Minatorëve”

28 shtator 2003 / Hysni SYLA ( Zyrtar për informim i KK )

 

Kryetari i Kuvendit të Komunës Faruk Spahija ka qëndruar sot në lagjen “ Kodra e Minatorëve” dhe për afër dy orë e gjysmë ka biseduar me banorët e lagjes, të cilët edhe një herë e njoftuan atë për problemet e shumta me të cilat po ballafaqohen, duke kërkuar njëkohësisht ndihmën e institucioneve vendore që tu ndihmohet në zgjidhjen e tyre.

 

Të gjithë diskutuesit, pa përjashtim,  theksuan se u mungon liria e qarkullimit dhe shumë kushte të tjera për të patur një jetë normale. Në veqanti ata përmendën zhvillimet e fundit në lagjen e tyre që kanë të bëjnë me blerjen e pronave të disa shqiptarëve me mjete të Qeverisë serbe për vendosjen e qytetarëve serbë të cilët më parë nuk kanë jetuar aty, gjë që i ka shqetësuar tejmase ata, sepse siq thanë me këtë ekstremistët serbë kanë për qëllim spastrimin etnik të kësaj hapësire.

 

Për këtë veprim të ekstremistëve serbë dhe për telashe të tjera që po u shkaktohen atyre nga të njejtit, ata akuzuan UNMIK-un, policinë e UNMIK-ut dhe KFOR-in, për shkak se nuk po ndërmarrin masa adekuate për parandalimin e këtyre veprimeve dhe për zbatimin e plotë të ligjit edhe në këto hapësira, duke theksuar se ata nuk kanë probleme me fqinjët serbë, por vetëm me ekstremistët, me të cilët kompetenët për siguri kanë bashkëpunim. 

 

Kryetari Spahija, u tha  banorëve të tubuar se është mirë i njoftuar për të gjitha problemet me të cilat ata po ballafaqohen dhe se është i shqetësuar mjaftë, prandaj  mu për këtë ai dhe Kuvendi i Komunës gjatë kohës së fundit kanë zhvilluar aktivitet të dendur për ti njoftuar të gjithë faktorët relevant të vendit dhe ndërkombëtarë për zhvillimet e fundit negative në lagjën  e tyre,  me qëllim  që të  ndërpriten trendet negative.

 

Ai ka kërkuar nga banorët e atjeshëm që ashtu sikur deri tash, të tregojnë vendosmëri dhe vullnet për të qëndruar akoma në trojet e tyre, sepse gjërat janë duke shkuar përpara, duke e ilustruar këtë me të arriturat që janë bërë deri tash.

 

Kryetari Spahija u ka thënë banorëve të pranishëm se përveq “ rojave të urës” që veprojnë lirshëm për ta vështirësuar gjendjen e tyre, ekzistojnë edhe “ rojat e status kuos”, që veprojnë brenda UNMIK-ut dhe që me qëllim e prolongojnë zgjidhjen e problemeve.

 

“ Ne pa kurrëfarë hezitimi do të bëjmë përpjekje që të sqarojmë deri në fund  se kush është për përshpejtimin e integrimit të qytetit e kush është kundër integrimit”, ka thënë ndër të tjera kryetari Spahija gjatë bisedës me banorët e lagjës “ Kodra e Minatoërve”.

 

Në fund banorët e lagjës “ Kodra e Minatorëve” njëzërit aprovuan përfundimet: se askush nga shqiptarët nuk do të shes më shtëpinë në lagjen e tyre, se nuk do të lejohet kurrsesi rindërtimi i shtëpive të blera nga shqiptarët pa filuar rindërtimi i shtëpive shqiptare, që Kuvendi i Komunës dhe udhëheqja e tij t’u japin prioritet punësimit të të rinjëve nga kjo lagje.

 

Ata njëzërit thanë se e njohin vetëm legjitimitetin e Kuvendit të Komunës dhe asgjë tjetër, duke i dhënë besim të plotë kryetarit Spahija dhe Kuvendit për zgjidhjen e problemeve të tyre. Kryetari Spahija mbështeti plotësisht këto kërkesa, duke shtuar se do të angazhohet maksimalisht për realizimin e tyre dhe për hulumtimin e mundësive që të ndihmohet rindërtimi i shtëpive, si dhe shtoi se organet e Kuvendit të Komunës janë duke përgatitur një program social për banorët e lagjeve veriore të komunës.     

Copyright©2000-2003 Trepca.net - Të gjitha të  drejtat e rezervuara.