Lajme

E shtune 27 shtator 2003

Përmbajtja:

• Presidenti shqiptar Alfred Moisiu ka thënë në seancën e OKB-së se statusi i Kosovës nuk duhet shtyrë pafundësisht

• M.Abramovic: Pavarësisht nga ngjarjet në Irak, roli i Shteteve të Bashkuara në Kosovë nuk duhet të zvoglohet

• Beogradi i ka propozuar AP të Këshillit të Evropës të diskutojë për situatën aktuale në Kosovë

• R. Henc: Ende nuk dihet se sa do të jenë në gjendje Prishtina dhe Beogradi të shkojnë në bisedime

• Në afërsi të selisë së UNMIK-ut në Mitrovicë mbrëmë pati një alarm të rrejshëm për një auto-bombë të kurdisur

• Mbrëmë në Prishitnë filloi Festivali Ndërkombëtar i filmit

• AKSH ka marrë përsipër sulmin kundër një patrulle të policisë serbe në fshatin Dobrosin

• Nexhdet dhe Bedri Ramaj janë dënuar me nga 10 vjet burgim nga një gjykatë e Shkupit

• Shtetet e Bashkuara kanë aktivizuar 15 mijë trupa për shërbim në Irak

• Tri granata raketore godasin hotelin e trupave amerikane në Bagdad, vriten dy irakianë në Falluxha

• Katër irakianë janë vrarë mbrëmë dhe disa të tjerë janë plagosur mga forcat ushtarake amerikane

• Një palestinez i armatosur ka vrarë dy izraelitë në Bregun Perendimor

• Të paktren 15 vetë janë vrarë në një shkëmbim zjarri në një bazë të kryengritësve në Bregun e Fildishtë

• Një gjykatë marokene ka dënuar me vdekje dy burra për vrasje dhe akte terroriste

• Kushtetuta e Irakut të mbrojë të drejtat e individidit

• Bushi takohet me Putinin

• Annan inkurajon paqen në Lindjen e Mesme

Presidenti shqiptar Alfred Moisiu ka thënë në seancën e OKB-së se statusi i Kosovës nuk duhet shtyrë pafundësisht

 

Nju-Jork, 27 shtator 2003 - Presidenti i Shqipërisë, Alfred Moisiu në fjalimin e tij në seancën e Asamblesë së Përgjithshme të të OKB-së, ndër të tjera, ka thënë se statusi përfundimtar i Kosovës nuk duhet shtyrë pafundësisht. Ai ka shtuar se stabiliteti në Kosovë është vendimtar për stabilitetin në Ballkan, duke shtuar se Shqipëria e ka mbështetur ngritjen e institucioneve demokratike në Kosovë, ka dënuar aktet e dhunës.   Por, presidenti Moisiu tha se Shqipëria beson se e ardhmja e Kosovës, pra statusi final i saj është diçka që i përket një periudhe të mëparshme. Ai ka theksuar se tashmë është bërë e pranueshme që ky status të përcaktohet nga vullneti i qytetarëve të Kosovës në bashkëpunim me faktorin ndërkombëtar.

 

Sipas Moisiut, përmbushja e standardeve dhe përcaktimi statusit të Kosovës janë çështje që lidhen ngushtë dhe ndërvaren nga njëra tjetra, duke shtuar se standardet sigurojnë funksionimin normal të institicioneve vendore, ndërkaq statusi sjell stabilitet, paqe, zhvillim për Kosovën dhe rajonin.

Presidenit Moisiu ka shtuar se Shqipëria ka nxitur dhe mbështetur përpjekjet për nismën e dialiogut ndërmjet Prishtinës dhe Beogradit për çështje teknike me interes të përbashkët, ngase sipas tij, dialogu është rruga më e mirë për të zgjidhur problemet dhe për të krijuar besimin e domosdoshëm.

 

 

M.Abramovic: Pavarësisht nga ngjarjet në Irak, roli i Shteteve të Bashkuara në Kosovë nuk duhet të zvoglohet

 

Uashington, 27 shtator 2003 - Duke shfaqur qëndrimin e tij lidhur me bisedimet Prishtinë-Beograd, Morton Abramovic, ekspert pranë Grupit Ndërkombëtar të Krizave në një intervistë për "Evropën e lirë", tha se "nuk ka dyshim se Serbia dhe Kosova duhet të ulen dhe të bisedojnë për çështjet me rëndësi për të dyja palët, natyrisht përveç statusit". Por, sipas tij, duhet të përcaktohen edhe modalitetet.

Ambramovic thotë se Qeverisë së Kosovës i duhet dhënë pushtetin, në mënyrë që ajo të bëhet një qeveri e vërtetë. "Dhe kur ata të jenë një qeveri vërtetë e besuar, atëherë ata do të jenë në gjendje të ulen dhe të bisedojnë me serbët", tha ai në një intervistë për radion "Evropa e lirë".

Abramovic theksoi se është e rëndësishme që UNMIK-u t'i kalojë më shumë komptenca qeverisë së Kosovës.

Abramovic shtoi se është në dijeni që kosovarët gjithmonë dëshirojnë që Shtetet e Bashkuara të jenë të pranishme në dialog dhe një gjë e tillë është e rëndësishme. Shtetet e Bashkuara do të jenë aty, qoftë edhe si lehtësues, tha Ambramovic, por, megjithatë sipas tij, është themelore, që të dyja palët të jenë funksionale në mënyrë të barabartë.

Ndërkaq, sa i përket çështjes së statusit përfundimtar të Kosovës, Abramovic është i mendimit se ajo nuk do të varet aq nga kosovarët sa nga bashkësia ndërkombëtare.

 

Ai tha se deri tash bashkësia ndërkombëtare ka shtyrë diskutimet në çështjen e statusit, ashtu siç nuk po i lejon kosovarët të kenë një qeveri të tyre efikase.

Sipas zotit Abramovic, pavarësisht nga ngjarjet në Irak, roli i Shteteve të Bashkuara në Kosovë nuk duhet të zvoglohet.

 

 

Beogradi i ka propozuar AP të Këshillit të Evropës të diskutojë për situatën aktuale në Kosovë

 

Strazburg, 27 shtator 2003 - Beogradi ka kërkuar nga Asambleja Parlamentare e Këshillit të Evropës që më 30 shtator të vërë në rend dite të sesionit vjeshtor situatën aktuale në Kosovë.

Vendimi do të merret të hënën në seancën plenare të Asamlesë, kur të miratohet rendi i ditës i sesionit.
Përfaqësuesi i Beogradit pranë Asamblesë Parlamentare të Këshillit të Evropës (APKE) tashmë ka hartuar një propozim të rezolutës për të drejtat e njeriut në Kosovë, të cilën ia ka paraqitur APKE.

 

 

R. Henc: Ende nuk dihet se sa do të jenë në gjendje Prishtina dhe Beogradi të shkojnë në bisedime

 

Uashington, 27 shtator 2003 - Robert Henc, zyrtar i Komisionit Amerikan të Helsinkit, thotë se bisedimet e ardhshme ndërmjet Prishtinës dhe Beogradit janë domethënëse për dy arsye: për të zgjidhur disa çështje të rëndësishme praktike si dhe për të krijuar në frymë pune mes dy palëve.

 

Në një interevistë për "Zërin e Amerikës", Henc ka thënë se deri më tash nuk ka parë ndonjë shprehje të lartë optimizmi për rezultate të shpejta në këto bisedime.

 

Ai ka shtuar se ende nuk dihet se sa do të jenë në gjendje Prishtina dhe Beogradi të shkojnë në bisedime, duke lënë me një anë polemikat.

 

Sipas tij edhe brenda vetë delegacioneve të së cilës palë pritet të ketë qëndrime të ndryshme të ndikuara nga opinionie publik në vendet e tyre, gjë që mund të çojnë në ngadalësimin e bisedimeve, veçanërisht në fillim, tha ai.

 

 

Në afërsi të selisë së UNMIK-ut në Mitrovicë mbrëmë pati një alarm të rrejshëm për një auto-bombë të kurdisur

 

Mitrovicë, 27 shtator 2003 - Në afërsi të selisë së UNMIK-ut në Mitrovicë mbrëmë pati një alarm të rremë për një bombë të kurdisur. Një veturë pa targa e parkuar në afërsi të selisë së UNMIK-ut ka bërë që njësitë e KFOR-it për deminim të ndërmarrin të gjitha masat e zakonshme për raste të tilla.

Zëdhënësja e UNMIK-ut në Mitrovicë Trejsi Beker tha se policia ka dyshuar për autobombë, por më vonë është verifikuar se fjala është për një alarm të rremë.

 

 

Mbrëmë në Prishitnë filloi Festivali Ndërkombëtar i filmit

 

Prishtinë, 27 shtator 2003 - Me shfaqjen e filmit shqiptar "Yllka", mbrëmë në Prishtinë filloi Festivali i parë Ndërkombëtar i Filmit, në të cilin gjatë dhjetë ditëve sa do të zgjasë do të shfaqen 21 filma artistikë nga vende të ndryshme.

 

Festivalin e hapi ministri për Kulturë, Rini, Sport dhe Çështje Jorezidente Behxhet Brajshori, ndërkaq me këtë rast këtë manifestim e përshëndeti edhe kryeadministratori i Kosovës Hari Holkeri. Të pranishmit i përshëndeti edhe doajeni i artistëve të Kosovës Muharrem Qena.

 

 

AKSH ka marrë përsipër sulmin kundër një patrulle të policisë serbe në fshatin Dobrosin

 

Preshevë, 27 shtator 2003 - Armata Kombëtare Shqiptare (AKSH) nëpërmjet një komunikate ka marrë përsipër sulmin kundër një patrulle të policisë serbe në fshatin Dobrosin. Sipas AKSH-së ky, sulm i ishte kryer nga njësia speciale "Kobra". Gjithashtu AKSH thotë se dy pjesëtarë të saj janë plagosur gjatë këtij incidenti.

Nga ana tjetër ministri serbo-malazez i Mbrojtjes Boris Tadiq më parë kishte hedhur mundësinë që AKSH-ja të jetë përgjegjëse për këtë sulm, duke thënë se patrulla e policisë serbe ishte goditur nga disa banorë vendës të armatosur.

 

 

Nexhdet dhe Bedri Ramaj janë dënuar me nga 10 vjet burgim nga një gjykatë e Shkupit

 

Shkup, 27 shtator 2003 - Nexhdet dhe Bedri Ramaj, kushërinj nga fshati Uçë i Istogut, janë dënuar me nga 10 vjet burgim nga një gjykatë e Shkupit, për veprën penale "terrorizëm".

Sipas aktakuzës këtë të dy në shtator të vitit 2002 në fshatin Çellopek të Tetovës, bashkë me Kastriot Vokshin, i vrarë nga policia maqedonase, kanë tentuar të sulmojnë policët rezervë në atë fshat.
Të akuzuarit kanë hedhur poshtë këto pohime të aktakuzës.

 

 

Shtetet e Bashkuara kanë aktivizuar 15 mijë trupa për shërbim në Irak

 

Uashington, 27 shtator 2003 – Shtetet e Bashkuara kanë aktivizuar 10 mijë trupa të Gardës Kombëtare për shërbim në Irak dhe ua kanë shtuar atyre edhe 5 mijë trupa në gatshmëri, njofton Rojter. Ky aktivizim ushtarak amerikan është bërë pas thirrjes drejtuar ministrave të jashtëm për ndihmë ushtarake dhe mospërgjigjes së tyre.

 

Kështu, Brigada e 30-të e këmbësorisë nga Karolina e Veriut dhe Brigada e 39-të e këmbësorisë nga Arkanzasi, secila me nga 5 mijë ushtarë janë urdhëruar të aktivizohen në detyrë më një, përkatësish më 12 tetor. Atyre u nevojiten tre muaj ushtrime para se të shkojnë në Irak në vitin e ardhshëm.

 

 

Tri granata raketore godasin hotelin e trupave amerikane në Bagdad, vriten dy irakianë në Falluxha

 

Bagdad, 27 shtator 2003 – Tri granata raketore kanë goditur sot (e shtunë) ndërtesën e hotelit të trupave amerikane dhe të civilëve, por nuk kanë shkaktuar viktima dhe të lënduar, ndërsa në qytetin Falluxha trupat amerikane kanë vrarë dy irakianë në një pikë kontrolli, kanë thënë burimet ushtarake, njofton AP.

 

Zëdhënësi ushtarak i koalicionit, Xhejms Smith, ka thënë se projektilet e kanë goditur Hotelin Al-Rashid në orët e hershme të mëngjesit.

 

 

Katër irakianë janë vrarë mbrëmë dhe disa të tjerë janë plagosur mga forcat ushtarake amerikane

 

Falluxha, 27 shtator 2003 - Katër irakianë janë vrarë dhe disa të tjerë janë plagosur të premtën në mbrëmje, kur forcat ushtarake amerikane kanë hapur zjarr në një rrugë në periferi të Falluxhës, njofton Rojetr. Hollësi të tjera për incidentin nuk janë dhënë.

Mjeku i spitalit ka thënë se disa vetë të plagosur janë pranuar në spital nga një sulm i forcave amerikane. Në mesin e të plagosurve është edhe një vajzë e vogël. Para spitalit u tubuan banorë lokalë duke brohoritur parulla atniamerikane.

 

 

Një palestinez i armatosur ka vrarë dy izraelitë në Bregun Perendimor

 

Jerusalem, 27 shtator 2003 – Një palestinez i armatosur ka vrarë një vajzë dymuajshe dhe një burrë, i cili ia kishta hapur derën atij në vendbanimin ebrait në Bregun Perendimor në një kohë kur izraelitët po kremtonin Vitin e Ri hebraik, njofton Rojter. Sulmuesi pastaj është vrarë gjithashtu.

 

Gjatë këtij sulmi, ai gjithashtu ka plagosur edhe nënën dhe babain e vajzës. Ky incident është një grusht i ri kundër palanit amerikan të paqes dhe kundër përpjekjes së ndërmjetësuesve ndërkombtarë për të realizuar atë.

 

 

Të paktren 15 vetë janë vrarë në një shkëmbim zjarri në një bazë të kryengritësve në Bregun e Fildishtë

 

Abixhan, 27 shtator 2003 – Të pakten 15 njerëz janë vrarë në një shkëmbim zjarri në një bazë të kryengritësve në Bregun e Fildishtë, njofton Rojtetr. Incidenti ka ndodhur ndërmjet bandave të armatosura rivale, të cilat luftonin ndërmjet tyre për të ndarë prenë e plaçkitur nga një bankë, të cilën e kishin thyer.

 

Zëdhënësi i kryengritësve ka thënë se janë zhvilluar tri lloje luftimesh rreth degës së Bankës qendrore perendimore të Afrikës në qytetin Bouake. Një palë përpiqej të plaçkiste paratë, pala tjetër përpiqej të mbronte bankën, kurse pala e tretë ishin plaçkitësit civilë.

 

 

Një gjykatë marokene ka dënuar me vdekje dy burra për vrasje dhe akte terroriste

 

Rabat, 27 shtator 2003 – Një gjykatë marokene ka dënuar me vdekje dy burra për vrasje dhe akte terroriste, kurse dy klerikëve muslimanë u ka shqiptuar dënime me burg të rëndë, ngase me predikimet e tyre në xhami kanë frymëzuar vetëvrasësit islamikë me bombë, njofton Rojter.

 

Që nga bombardimi vetëvrasës në Kazablankë në maj të këtij viti kur u vranë 45 njerëz, përfshirë edhe 12 bombëhedhësit vetëvrasës, janë shqiptauar 16 dënime me vdekje.

 

 

Kushtetuta e Irakut të mbrojë të drejtat e individidit

 

Bagdad, 27 shtator 2003 - Kreu i administratës amerikane në Irak Paul Bremer ka thënë se në kushtetutën e re të Irakut duhet të reflektohen të drejtat individuale dhe liria e besimit fetar.

"Ka disa çështje për të cilat ne keni një qëndrim të fortë dhe një prej tyre është mbrojtja e të drejtave të individit, nga rrjedh edhe liria e fesë", tha zoti Bremer në Uashington pasi i kërkoi Kongresit të aprovojë kërkesën e presidentit Bush për fonde shtesë për rindërtimin e Irakut.

 

 

Bushi takohet me Putinin

 

Kemp Dejvid, 27 shtator 2003 - Presidenti amerikan Xhorxh Bush dhe homologu i tij rus, Vladimir Putin, po zhvillojnë një takim të nivelit të lartë që po përqëndrohet në ndalimin e përhapjes së armëve bërthamore dhe vendosjen e paqes në Lindjen e Mesme.

Njoftohet se në takimin që po zhvillohet në Kemp Dejvid, pranë Uashingtonit, po diskutohet një propozim amerikan për të parandaluar përhapjen e armëve të shkatërrimit në masë.

Ky diskutim bëhet në një kohë kur Rusia këmbëngul, megjithë kundërshtimet amerikane, që t'i japë Iranit teknologjinë e nevojshme për të përfunduar programin e tij bërthamor.

 

 

Annan inkurajon paqen në Lindjen e Mesme

 

Nju Jork, 27 shtator 2003 - Sekretari i përgjithshëm i OKB-së Kofi Annan u ka bërë thirrje si izraelitëve ashtu edhe palestinezëve të pranojnë një ndihmë më të madhe ndërkombëtare për të dalë nga qorrsokaku ku është futur procesi i paqes në Lindjen e Mesme.

Ai tha se nevojitej të ndërmerreshin hapa të guximshëm për ta ngritur përsëri në këmbë planin e paqes, por nuk bëri ndonjë propozim.

Copyright©2000-2003 Trepca.net - Të gjitha të  drejtat e rezervuara.