Lajme

E premte 26 shtator 2003

Përmbajtja:

• Presidenti Rugova priti shefin e ri të Zyrës franceze në Prishtinë

• Persona të panjohur kanë tentuar ta vrasin Ramiz Muriqin, aktivist shumëvjeçar i LDK-së në Pejë

• Dje në një fshat të Pejës është vrarë një i ri 25-vjeçar

• Sonte në Prishtinë solemnisht çelet Festivali i parë Ndërkombëtar i Filmit

• Sipas shtypit suedez, vrasësi i Ana Lindit është një serb 24-vjeçar nga Beogradi

• Gjenerali amerikan Bek e vlerësoi shumë stabile situatën e sigurisë në Kosovë

• BE: Prishtina dhe Beogradi në takimin e parë në Vjenë duhet të jenë të përfaqësuar nga niveli më i lartë politik

• NATO ende nuk e ka konfirmuar pjesëmarrjen e lordit Robertson në dialogun Beograd – Prishtinë

• "Kurir": Kosova duhet të fitojë pavarësinë

• Pensionistët kërkojnë t'u paguhen pensionet prej 1 janarit të vitit 1999

• Një grup i profesorëve nga Universiteti i Salermos të Italisë u takua me dekanë të Universitetit të Prishtinës

• Presidenti Moisiu tha se kur flitet për standardet para statusit final të Kosovës ato duhet të caktohen më qartë

• Pauell u jep gjashtë muaj afat irakianëve të hartojnë kushtetutën e re

• Në një shpërthim zjarri në një shtëpi pleqësh në SHBA kanë humbur jetën pesë vetë dhe janë plagosur 25 të tjerë

• E. Xhozef konsideron se zgjidhja e statusit final të Kosovës është çelësi për përmirësimin e gjendjes në Maqedoni

• Në Tetovë filloi festivali i folklorit burimor shqiptar "Sharri këndon 2003"

• Vriten dy ushtarë amerikanë dhe plagosen 3 tjerë në Irak

• Në një sulm me mortaja janë vrarë tetë irakianë

• Tërmete të fuqishme në Japoni

• Kërkesë për referendum ndaj imunitetit të Berlusconit

• Zemër e re artificiale

• Prodi përjashton dorëheqje në BE

• Thirrje OKB-së të qëndrojë në Irak

• Prokurorët e Timorit Lindor kanë paditur 18 vetë për krime kundër njerëzimit

• Mbi 19 mijë njerëz kanë vdekur në Evrop nga valët e nxehtësisë së madhe në gusht

Presidenti Rugova priti shefin e ri të Zyrës franceze në Prishtinë

 

Prishtnë, 26 shtator 2003 - Presidenti i Kosovës Ibrahima Rugova priti sot shefin i ri të Zyrës franceze në Prishitnë, zotin Zherar Salie (Gerard Sallier), i cili ditë më parë e ka marrë këtë detyrë. Në këtë takim u bisedua për bashkëpunimin e frytshëm mes Kosovës dhe Francës, i cili, siç u tha, do të vazhdojë edhe në të ardhmen. Presidenti Rugova tha se ambasadorin Salie e ka njoftuar me progresin e arritur dhe me objektivat e institucioneve të Kosovës, me zhvilimin ekonomik, integrimin e grupeve etnike në shoqërinë kosovare si dhe për bashkëpunimin e institucioneve të Kosovës me UNMIK-un e me bashkësinë ndërkombëtare.

 

Edhe me këtë rast Presidenti tha se Kosova duhet të njihet e pavarur, si vend demokratik e paqësor, i integruar në BE në NATO, në marrëdhënie të mira me fqinjët e saj.

Duke i dëshiruar mirëseardhje zoti Salie, Presidenti Rugova tha se nga ky takim përshëndet Presidentin francez Zhak Shirak dhe falenderoi Francën për ndihmën që ka dhënë para, gjatë luftës dhe në rindërtimin e Kosovës.

Shefi i ri i Zyrës franceze Zherar Salie, pasi falenderoi Presidentin Rugova për fjalët e mira, tha pas takimit se është i nderuar që takohet me zotin Rugova. Ai tha se në takim janë diskutuar temat që kanë të bëjnë me interesat e përbashkëta, veçanërisht për çështjen kruciale të zhvillimit ekonomik, tranzicionit, privatizimit.

 

Poashtu, tha ai, janë biseduar edhe çështje të tjera që kanë të bëjnë me situatën aktuale në Kosovë, siç është rasti i dialogut, që pritet të fillojë së shpejti, si dhe për angazhimin e Presidentit Rugova për statusin e Kosovës së pavarur, sa më shpejt që të jetë e mundur.

Duke folur për bashkëpunimin e Francës me Kosovën, Salie tha se vendi i tij ka ndihmuar Kosovën dhe ka bërë punë të mira këtu, ku ka përfituar populli.

Në fund ai shtoi se është shumë i lumtur që ndodhet në Prishtinë dhe premtoi se do të angazhohet që ta ndihmojë Kosovën aq sa mundet dhe për aq sa edhe Parisi zyrtar do të mund ta ndihmojë Kosovën edhe të ardhmen.

 

 

Persona të panjohur kanë tentuar ta vrasin Ramiz Muriqin, aktivist shumëvjeçar i LDK-së në Pejë

 

Pejë, 26 shtator 2003 - Sot rreth orës 10.30 në lagjen Fidanishtë të Pejës, persona të panjohur kanë tentuar ta vrasin Ramiz Muriqin, aktivist shumëvjeçar i LDK-së në Pejë.

 

Afër veturës së tij të parkuar ishte vendosur një mekanizëm shpërthyes dhe në momentin kur Ramizi është nisur me veturë, është dëgjuar një shpërthim i fuqishëm, i cili ka shkatërruar pjesën e përparme të veturës.

 

Me atë rast Ramiz Muriqi pëson vetëm lëndime të lehta trupore. Kjo është hera e tretë që ndaj tij tentohet me atentate. Nga shpërrhimi i fuqishëm janë thyer xhamat e banesave përreth.

Ekipet e specializuara të policisë së UNMIK-ut dhe SHPK-së menjeherë kanë dalë në vendin e ngjarjes dhe po i kryejnë hetimet. Për momentin nuk ka të arrestuar dhe as të dyshuar për këtë tentim vrasjeje.

 

 

Dje në një fshat të Pejës është vrarë një i ri 25-vjeçar

 

Pejë, 26 shtator 2003 - Dje në fshatin Kosuriq të Pejës është vrarë Orhan Smajl Maznikolli, 25-vjeçar. Sipas policisë motivi i kësaj vrasjeje ka të bëjë me kontestin pronësor. Dorasi par kryerjes së vrasjes është arratisur.

 

 

Sonte në Prishtinë solemnisht çelet Festivali i parë Ndërkombëtar i Filmit

 

Prishtinë, 26 shtator 2003 - Sonte në kinemanë ABC në Prishtinë, solemnisht çelet Festivali i Parë Ndërkombëtar i Filmit, në të cilin, gjatë dhjetë ditëve sa zgjasë, do të shfaqen 21 filma artistikë nga vende të ndryshme.

 

Sipas organizatorit, gjatë mbajtjes së festivalit, në Prishtinë pritet të vijnë edhe autorë të filmave të cilët do të prezentohen para publikut të kryeqytetit tonë.

Festivali nuk ka karakter garues, objektiv kryesor i tij është ringjallja e kinemasë në Kosovë duke inkurajuar rritjen e audiencës.

Festivalin e çel filmi shqiptar Yllka" i regjisorit ylli Pepo.

Poashtu këta filma do të shfaqen edhe në Pejë e Mitrovicë.

Në poshtë po japim titujt e filmave dhe përmbajtaj e tyre e shkurtër.

Yllka: Dy tregime për dy gra, të cilat kërkojnë dashuri dhe lumturi në Shqipërinë postkomuniste dhe në Zvicër.

Hinterholz 8: Një familje austriake i tejkalon pengesat financiare, duke e ndjekur ëndrrën e saj që ta kenë shtëpinë e tyre.

Nordrand: Pesë të rinj me prejardhje të ndryshme etnike, takohen në Vjenë dhe për një kohë të shkurtër ndërthuret jeta e tyre, ëndrrat dhe dëshirat.

Gori vatra: Komedi e zezë për përpjekjet e rënda në një qytet boshnjak, për të krijuar demokracinë për mbikëqyrësit ndërkombëtar brenda 7 ditësh.

Tito: Një komedi për nostalgjinë ndaj komunizmit si një atraksion turistik në një ishull kroat.

Crvena prashina: Një dramë rreth mafias kroate në pragë të luftës.

La Vie Revee des Anges: Film për shoqërinë e vrullshme në mes të 2 grave, të cilat moren një numër të çmimeve ndërkombëtare.

Ridicule: Komedi morali rreth humorit dhe sharmit që mundi korrupcionin dhe zotërimet.

Un monde sans pitie: Një romancë në mes të një të riu të zhgënjyer dhe një studenti ambicioz.

Au revoir, les enfants: Një dramë nga regjisori i njohur francez, rreth shoqërisë së dy djemve të shkatëruar nga brutaliteti nacist.

Halbe Treppe: Një aferë jashtëmartesore, e thyen rutinën e jetës së përditshme në një qytet gjerman.
Bella Martha: Përpjekja për ta inkuadruar në mesin e shoqërisë një vajzë, e cila e ka humbur nënën, është fillimi i një romance të ndjeshme dhe një harmonie të brendshme për dy shefat e kuzhinës.

Mirupafshim: Takimi i një profesori grek me një grup emigrantësh ilegal shqiptarë, e ndryshon jetën e tij.

Afti I Nichta Meni: Një qift i ri mëson për jetën, duke udhëtuar në Greqinë e këtyre ditëve.

Torzok: Një përvojë e një djaloshi të lënë në institutin për fëmijë të braktisur, pas çrregullimeve politike në Hungari.

Konikar Ramdhenu: Përpjekjet dhe fatëkeqësitë e një djali të braktisur në Indinë bashkëkohore.

Mitr My Friend: Një grua indiane, duke e braktisur vendlindjen, për ta martuar dhe rritur vajzën e saj në Amerikë, e zbulon forcën për ta ndryshuar jetën e vet.

Show: Një jurist në luftë me ëndrrat dhe aspiratat e paplotësuara, rikthen vetëbesimin dhe natyrën e tij gazmore.

Intacto: Një film enigmatik për katër njerëz, jeta e të cilëve ndërthuret nga fati dhe rasti.

El Palo: Një komedi për një grup të grave të dëshpëruara, të cilat e planifikojnë dhe e kryejnë plaçkitjen e një banke.

 

 

Sipas shtypit suedez, vrasësi i Ana Lindit është një serb 24-vjeçar nga Beogradi

 

Stokholm, 26 shtator 2003 - Sipas gazetës më të madhe suedeze "Dagens Nyheter" policia më, 24 shtator ka arrestuar personin e vërtetë për vrasjen e ministres Ana Lind. Sipas kësaj gazete, personi i dyshuar, identiteti i të cilit nuk zbulohet, menjeherë pas atetntatit, ka prerë flokët dhe vetullat, me qëllim maskimi.

 

Sipas policisë, në vendin e krimit është gjetur një kapelë në të cilën ka fije flokesh. Sipas analizës ADN dhe xhirimeve të bëra nga kamerat të gjitha dyshimet drejtojne tek personi i prangosur.

I dyshuari për vrasjen e ministres se jashtme suedeze, Ana Lind, sipas mediave suedeze është një serb nga Beogradi. Sipas "Expressen", 24 vjeçari nga Beogradi, ka mbi 20 vjet që jeton me prindërit e tij në Suedi.

Thuhet se ky serb gjithmonë kishte dëshiruar të bëhej i famshëm. Shoku i tij i ngushtë i ka thënë gazetës "Dagbladet" se ai thoshte: "Dua të vras që të bëhem i popullarizuar"!

 

 

Gjenerali amerikan Bek e vlerësoi shumë stabile situatën e sigurisë në Kosovë

 

Gjilan, 26 shtator 2003 - Gjenerali amerikan Xheri Bek tha të enjten në Gjilan se nuk do të ketë pakësim të trupave amerikane në Kosovë deri në fund të vitit 2004. "Ushtarët e mi mbeten të përkushtuar në ruajtjen e paqes dhe të sigurisë në sektorin e lindjes".

Këto vlerësime gjenerali Bek, komandant i Brigadës Shumëkombëshe të Lindjes, i bëri gjatë një takimi me gazetarë në Gjilan.

Në krahasim me periudhat e mëhershme, gjenerali Bek e vlerësoi shumë më të qëndrueshme gjendjen e tashme të sigurisë në Kosovë, duke thënë se krimi ka shënuar rënie për 30 për qind, ndërsa tani nuk është e nevojshme as përcjellja e minoriteteve nga KFOR-i.

Ankesat e shpeshta të qytetarëve të brezit kufitar për shkeljen e territorit të Kosovës nga forcat serbe, gjenerali Bek i ka quajtur të paqëndrueshme, ngase sipas tij ushtarët amerikanë, nga toka e ajri, janë duke vëzhguar kufirin dhe nuk kanë parë lëvizje të forcave serbe brenda kufirit të Kosovës.

Qytetarët e brezit kufitar në pjesën e lindjes nuk kanë arsye të ndjehen të pasigurtë, sepse ushtarët tanë janë atje çdo ditë dhe çdo natë, tha komandanti i BSHL-së.

Duke u ndalur në aksionin për dorëzimin vullnetar të armëve, gjenerali Bek tha se sa më shumë armë që largohen nga duart e qytetarëve, aq më mirë do të jetë për të gjithë.Por u shprehë i pakënaqur me rrjedhën e këtij aksioni.

Posedimi i paligjshëm i armëve dhe keqpërdorimi i tyre, mbeten një sfidë për Kosovën dhe për tërë Ballkanin në përgjithësi, tha Jerry Beck.

Komandanti i BSHL-së duke folur edhe për procesin e privatizimit në Kosovë, ai u ka sugjeruar serbëve lokalë që të lejojnë AKM-në të kryejë punën e vet.

 

 

BE: Prishtina dhe Beogradi në takimin e parë në Vjenë duhet të jenë të përfaqësuar nga niveli më i lartë politik

 

Bruksel, 26 shtator 2003 - "Jemi të mendimit se Prishtina dhe Beogradi gjatë takimit të parë në Vjenë duhet të jenë të përfaqësuar nga niveli më i lartë politik", deklaruan zyrtarë nga kabineti i Havier Solanës, përfaqësuesit të lartë të Bashkimit Evropian për Politikë të Jashtme dhe Siguri.

 

Me nivel të lartë, siç u shpjegua, zyrtarët evropianë nënkuptojnë nivelin e Presidentit të Kosovës dhe Kryeministrit, prandaj në krye të delegacionit shqiptar do të duhej të ishin presidenti Rugova dhe kryeministri Rexhepi.

Tashmë është afër konfirmimit fakti se gjatë bisedimeve në Vjenë do të marrë pjesë edhe shefi i diplomacisë evropiane, Havier Solana, thuhet në një njoftim nga Brukseli.

 

 

NATO ende nuk e ka konfirmuar pjesëmarrjen e lordit Robertson në dialogun Beograd – Prishtinë

 

Bruksel, 26 shtator 2003 - Zyrtarë në selinë e NATO-s kanë thënë se kjo organizatë ndonëse nuk do të ketë rol të drejtpërdrejtë në dialogun Prishtinë - Beograd për çështje praktike, e përshëndet këtë vendim. Zyrtarët e NATO-s thonë se shtetet anëtare të Aleancës do të jenë të angazhuara në Kosovë.

"Ne kemi detyrat tona në Kosovë në aspektin e sigurisë dhe do të vazhdojmë të krijojmë ambient të sigurtë në Kosovë", ka thënë dje një zyrtar i NATO-s. Ai ka shtuar se dialogun dhe çështjet politike, i ka përsipër si përgjegjësi UNMIK-u, ndërkaq NATO-ja është bashkëpunëtore e UNMIK-ut, e jo konkurrente e saj.

 

Megjithatë, në selinë e NATO-së, ende nuk janë komentuar paralajmërimet, se në takimin e parë në Vjenë ndërmjet Prishtinës dhe Beogradit, mund të marrë pjesë në mënyrë simbolike edhe lordi Robertson.

 

 

"Kurir": Kosova duhet të fitojë pavarësinë

 

Vjenë, 26 shtator 2003 - Gazeta austriake "Kurir" shkruan se çështja e statusit final të Kosovës në dialogun ndërmjet Prishtinës dhe Beogradit në Vjenë nuk është temë e bisedimeve. Shqiptarët e Kosovës të cilët e dëshirojnë pavarësinë, konferencën e Vjenës e shohin si test për negociatat për ardhmërinë e Kosovës, konstaton kjo gazetë austriake.

 

Në këtë shkrim pastaj theksohet se nga pikëpamja e partive shqiptare, nuk ka shumë se çfarë të bisedohet. Kosova, cila prej qershorit të vitit 1999 është nën administrimin e OKB-së, duhet të fitojë pavarësinë, vlerëson gazeta e Vjenës.

 

 

Pensionistët kërkojnë t'u paguhen pensionet prej 1 janarit të vitit 1999

 

Prishtinë, 26 shtator 2003 - Pensionistët e Kosovës në protestën e djeshme në Prishtinë kërkuan t'u kthehet statusi që e kishin deri në fund të vitit 1998, t'u paguhen pensionet prej 1 janarit të vitit 1999, si dhe të themelohet fondi pensionalo-invalidor.

 

Kryeministri Bajram Rexhepi gjatë takimit me një delegacion të protestuesve ka premtuar se Qeveria e Kosovës do të vazhdojë angazhimin për zgjidhjen e disa prej kërkesave të pensionistëve, megjithëse fondi i krijuar për shumë vjetë radhazi nga puna e tyre është i bllokuar.

 

Ai theksoi se gjatë bisedimeve me Beogradin do të jetë i pranishëm edhe një përfaqësues i pensionistëve dhe do të bëhet presion që fondet t'u kthehen atyre.

Duke folur në emër të pensionistëve të Kosovës, Rasim Domi kryetar i Lidhjes së Pensionistëve të Kosovës tha se pensionistët edhe më tutje janë kategoria më e rrezikuar sociale.

Kërkesat me shkrim të pensionistëve do t'u dorëzohen të gjithë drejtuesve të institucioneve të Kosovës.

 

 

Një grup i profesorëve nga Universiteti i Salermos të Italisë u takua me dekanë të Universitetit të Prishtinës

 

Prishtinë, 26 shtator 2003 - Një grup i profesorëve nga Universiteti i Salermos nga Italia u takua dje me udhëheqës dhe dekanë të Universitetit të Prishtinës me qëllim të bashkëpunimit të ndërsjellë.

 

Këtë grup të profesorëve nga Italia e drejtonte Françesko Citarella, i cili propozoi bashkëpunim dhe kërkime shkencore me interes të përbashkët. Ai ka ftuar dekanët e fakulteteve të Universitetit të Prishtinës për diskutim të ideve të ndryshme, përpara nënshkrimit të marrëveshjes për bashkëpunimin ndërmjet këtyre dy universiteteve.

 

 

Presidenti Moisiu tha se kur flitet për standardet para statusit final të Kosovës ato duhet të caktohen më qartë

 

Nju-Jork, 26 shtator 2003 - Presidenti i Shqipërisë Alfred Moisiu pati një takim në Nju-Jork me sekretarin e përgjithshëm të OKB-së Kofi Anan në të cilin u diskutua midis të tjerash për marrëdhëniet e Shqipërisë me fqinjët.

 

Presidentit Moisiu i ka thënë zotit Anan se ai mban kontakte të vazhdueshme me administratorët e UNMIK-ut dhe theksoi se do të ishte mirë që mandati i administratorit të UNMIK-ut të jetë më i gjatë në kohë.

 

Presidenti Moisiu citohet t'i ketë thënë z. Anan se kur flitet për standardet para statusit final të Kosovës ato duhet të jenë të caktuara më qartë.

 

 

Pauell u jep gjashtë muaj afat irakianëve të hartojnë kushtetutën e re

 

Uashington, 26 shtator 2003 - Sekretari amerikan i Shtetit, Kolin Pauell, ka thënë se po i jep afat deri në gjashtë muaj Këshillit Qeverisës të Irakut - grup prej 25 irakianësh i caktuar nga amerikanët në korrik - që të dalë me një kushtetutë të re.

Deklaratat e Pauellit vijnë në kohën kur vazhdojnë përpjekjet e Shteteve të Bashkuara për të fituar mbështetjen për një rezolutë të re të Këshillit të Sigurimit të OKB-së që ka për qëllim inkurajimin e shteteve të tjera që të kontribojnë me trupa për Irakun.

Duke marrë parasysh presionin nga Franca, dhe të tjerët, për një kalendar të qartë për dorëzimin e pushtetit irakianëve, zoti Pauell po përpiqet të kombinojë fleskibilitetin dhe realizmin.

Hartimi i një kushtetute të re përbën problem delikat për një vend me aq shumëllojshmëri si Iraku.

 

 

Në një shpërthim zjarri në një shtëpi pleqësh në SHBA kanë humbur jetën pesë vetë dhe janë plagosur 25 të tjerë

 

Nashville, Tenesi, 26 shtator 2003 – Një zjarr ka shpërthyer në një shtëpi pleqësh në Qendrën për kujdes shëndetësor në Neshvil (SHBA), ku kanë humbur jetën pesë banues dhe janë plagosur 25 të tjerë, njofton CNN. Të lënduarit janë dërguar në spitale për shërim nga djegiet dhe thithja e tymit.

 

Disa nga të lënduarit janë në gjendje të rëndë. Rreth 120 vetë kanë qenë banues të kësaj shtëpie dhe të gjithë janë evakuar. Tre zjarrfikës të lënduar gjithashtu janë hospitalizuar. Shkaku i zjarrit ende nuk dihet, por hetuesit kanë dalë në vendngjarje.

 

 

E. Xhozef konsideron se zgjidhja e statusit final të Kosovës është çelësi për përmirësimin e gjendjes në Maqedoni

 

Uashington, 26 shtator 2003 - Eduard Xhozef, ish-drejtor i Projektit të Grupit Ndërkombëtar të Krizave për Maqedoninë, thotë se Marrëveshja e Ohrit i dha fund konfliktit të armatosur në këtë vend në vitin 2001 dhe krijon mundësinë për një sër të drejtash për shqiptarët, por përsëri nuk mund të thuhet se gjendja e atjeshme është plotësisht e stabilizuar.

Ai shtoi se aktualisht Maqedonia nuk rrezikohet nga lufta ashtu sikurse në vitin 2001, por megjithatë, tha Xhozef, shpeshherë vendi kërcënohet nga konfliktet ndëretnike.

Pyetjes se çfarë ndikimi do të kishte një Kosovë e pavarur në stabilitetin e Maqedonisë, z. Xhozef konsideron se zgjidhja e statusit final të Kosovës është çelësi për përmirësimin e gjendjes në Maqedoni.

 

Ai citoi kryeministrin maqedonas të ketë thënë se është në të mirën e Maqedonisë një Kosovë e pavarur dhe të rivendoset ligji sesa të jetë pjesë e federatës së Serbisë dhe të shndërrohet në një vend ku do të përhapej anarkia, ka thënë ish-drejtori i Grupit Ndërkombëtar të Krizave.

 

 

Në Tetovë filloi festivali i folklorit burimor shqiptar "Sharri këndon 2003"

 

Tetovë, 26 shtator 2003 - Në Tetovë ka filluar festivali i folklorit burimor shqiptar "Sharri këndon 2003". Në këtë festival tradicional, të tetin me radh, i cili do të zgjasë deri më 27 shtator, pjesëmarrësit do të paraqiten me folklorin e trevave të tyre.

Kryetari i Këshillit artistik, Nazim Kaba, tha se për këtë festival janë zgjedhur këngët më të bukura, që kanë një vlerë artisitke dhe burimore, si ritet, këngët e meloditë e ndryshme me fyell, me orkestër e kështu me radhë.

Festivali ka karakter revial, ndërkaq regjinë e këtij manifestimi e ka bërë regjisori i mirënjohur nga Tirana, Llesh Nikolla.

 

 

Vriten dy ushtarë amerikanë dhe plagosen 3 tjerë në Irak

 

Bagdad, 26 shtator 2003 – Një ushtar amerikan është vrarë dhe dy të tjerë janë plagosur në një sulm të mbrëmshëm me granatë raketore në një autokolonë ushtarake në qendrën veriore të naftës, Kirkuk, ka bërë të ditur sot (e premte) ushtria amerikane, njofton AFP.

 

I njëjti burim bën të ditur se edhe një ushtar amerikan është vrarë sot dhe një tjetër është plagosur në një shkëmbim zjarri nga një ndërtesë e pabanuar afër Tikritit, 175 km në veri të Bagdadit. Nuk dihet nëse ky shkëmbim zjarri është shkaktuar nga forca armiqësore.

 

 

Në një sulm me mortaja janë vrarë tetë irakianë

 

Bagdad, 26 shtator 2003 – Në një sulm i mbrëmshëm me mortaja në një treg në qytetin e pashtruar Bakuba, në verilindje të Bagdadit, janë vrarë tetë irakianë, ka bërë të ditur sot (e premte) ushtria amerikane, njofton Rojter. Zëdhënësi ushtarak amerikan ka thënë se në këtë incident nuk është lënduar asnjë ushtar amerikan.

 

 

Tërmete të fuqishme në Japoni

 

Tokio, 26 shtator 2003 - Japonia e veriut është tronditur nga një seri tërmetesh - dhe njëri prej tyre ka qenë më i fuqishmi këto dy vitet e fundit në botë.

Rreth 200 vetë janë plagosur, kryesisht nga objektet e rrëzuara në shtëpitë e tyre. Mijëra prona në Hokkaido mbetën pa energji elektrike dhe pati ndërprerje në transport.

Të paktën një tren doli nga binarët duke plagosur disa pasagjerë. Një zjarr shpërtheu në një rafineri nafte pranë qytetit port të Nemuros, pranë epiqendrës së tërmetit.

Banorëve të komuniteteve të rajoneve bregdetare të Japonisë dhe Rusisë lindore iu bë thirrje të qëndrojnë larg zonave bregdetare për shkak të rrezikut të cunameve, dallgëve të mëdha të shkaktuara nga tërmeti. Por këto paralajmërime tani janë hequr.

Termeti fillestar ishte tetë ballë i shkallës Rihter dhe epiqendra e tij ishte pranë ishullit japonez Hokkaido. Goditja e parë u pasua nga një tërmet tjetër shtatë ballësh.

 

 

Kërkesë për referendum ndaj imunitetit të Berlusconit

 

Romë, 26 shtator 2003 - Gjykata kushtetuese e Italisë ka marrë më shumë se gjysmë milioni nënshkrime që mbështesin thirrjen e një referendumi për të kërkuar anullimin e ligjeve që mbrojnë kryeministrin, Silvio Berluskoni, nga ndjekja penale ndaj akuzave për ryshfete dhënë gjykatësve në vitet 1980.

Një veprimtar i shquar kundër korrupsionit, deputeti e parlametit italian, Antonio di Pjetro, i dorëzoi nënshkrimet në gjykatë, e cila duhet të vendosë nëse duhet mbajtur referendumi.

Referendumi, nëse mbahet, do të propozojë anullimin e një ligji të miratuar kohët e fundit që i jep imunitet kryeministrit.

 

 

Zemër e re artificiale

 

Melburn, 26 shtator 2003 - Mjekët australianë kanë krijuar një zemër të re artificiale më të vogël që, thonë ata, ka provuar se është shumë efikase në dy pacientë tek të cilët është vendosur deri tani.

Kirurgu i zemrës në spitalin Alfred të Melburnit, Dr.Don Esmore, thotë se modeli i ri i quajtur 'VentrAssist' është shumë i vogël dhe punon nëpërmjet një mekanizmi më të ndryshëm krahasuar me zemrat që janë krijuar më parë.

"Komponenti i brendshëm i pompës përbëhet nga një fletë e vogël e një rotori në formë fuge, por në fakt nuk e ka komponentin e rrotullimit.

"Ajo në fakt nuk ka ndonjë ingranazh si të tillë brenda zemrës, por thjesht qëndron e lirë në gjak dhe rrotullohet - në mënyrë fare jo traumatikie - duke ndryshuar drejtimin e gjakut dhe e shtyn atë si pomtë në drejtim të trupit në mënyrë shumë të rrjedhshme," shpjegon dr Esmore.

Zemra e re ka masën e një mandarine të vogël që mund ta mbash në pëllëmbë të dorës, ndërsa zemrat e prodhuara më së fundi janë të paktën katër-pesë herë më të mëdha.

 

 

Prodi përjashton dorëheqje në BE

 

Bruksel, 26 shtator 2003 - Presidenti i Komisionit Evropian, Romano Prodi është marrë në pyetje pas dyerve të mbyllura nga anëtarë të Parlamentit Evropian mbi akuzat për mashtrime të agjencisë statistikore, Eurostat. Akuzat për shpërdorime financiare e kanë karakterizuar KE që prej krijimit të tij.

Romano Prodi mund të ketë menduar se Komisoni Evropian i hodhi tutje akuzat për korrupsion, keqmanaxhim dhe tarafe pas dorëheqjes në masë të anëtarëve të tij në mes të një zemërimi publik mbi një grindje të ulët 4 vjet më parë.

Por skandali aktual duket sikur po kërkon koka të tjera. Një prej tyre që mund të gjejë veten nën vëzhgim është dhe zëvendëspresidenti i komisionit, Neil Kinnonck.

 

 

Thirrje OKB-së të qëndrojë në Irak

 

Bagdad, 26 shtator 2003 - Ministri i ngarkuar me çështjet e jashtme në këshillin qeverisës irakian të caktuar nga amerikanët, Hoshyar Zebari, ka thënë se një vendim i OKB-së për të larguar shumicën e personelit nga Iraku është një veprim që dëshirohet nga terroristët.

Zebari tha se ishte e rëndësishme që OKB-ja të vazhdonte veprimtarinë e saj megjithë dy sulme ndaj selisë së saj në Bagdad.

 

 

Prokurorët e Timorit Lindor kanë paditur 18 vetë për krime kundër njerëzimit

 

Xhakartë, 26 shtator 2003 – Prokurorët e Timorit Lindor kanë paditur 18 vetë për krime kundër njerëzimit, duke përfshirë këtu edhe dy oficerë ushtarakë indonezianë në lidhje me dhunën me rastin e referendumit të referendumit për pavarësi, njofton Rojter.

 

Njësiti i krimeve të rënda në vend ka deklaruar sot (e premte) se të 18 të paditurit janë akuzuar për krimet e vrasjeve, torturave dhe përndjekjeve.

 

Ndër ë paditurit, përpos dy indonezianëve, janë edhe katër vetë të Timorit Lindor, të cilët ishin ushtarë indonezianë në kohën e referenduimit për pavarësi nga Indonezia, thuhet në deklaratën e këtij njësiti.

 

 

Mbi 19 mijë njerëz kanë vdekur në Evrop nga valët e nxehtësisë së madhe në gusht

 

Paris, 26 shtator 2003 – Mbi 19 mijë njerëz kanë vdekur nga valët e nxehtësisë së madhe, që pat pjekur pjesën më të madhe të Evropës në gusht. Kjo ishte katastrofa shekullore më e madhe nga moti i nxehtë sipas vlerësimeve zyrtare të mbledhura nga AP.

 

Numri i të vdekurve mund të jetë edhe më i madh, ngase Spanja dhe Gjermania kanë dhënë vetëm gjysmën e rasteve të vdekjeve gjatë verës.

 

Franca është prekur më së rëndi nga vapa dhe haraçi i saj atje është 14, 802 të vdekur. Në Itali, sipas Ministrisë së Shëndetësisë, kanë vdekur 4,175 vetë. Në Spanjë kanë njoftuar vetëm për 141 të vdekur, ngase i kanë llogaritur vetëm rastet e deklaruara se janë shkaktuar nga vapa.

 

Po kështu, Gjermania ka dhënë vetëm shifrën e 40 njerëzve të vdekur nga vapa. Në vendëet e tjera kemi këto shifra të rasteve të vdekjeve nga vapa: në Portugali 1.300, në Holandë, ndërmjet 1,000 dhe 1,400, në Belgjikë 150 raste, në Ballkan (Kroaci, Maqedoni dhe Mali i zi) 7 raste vdekjeje.

Copyright©2000-2003 Trepca.net - Të gjitha të  drejtat e rezervuara.