FJALA E PRESIDENTIT MOISIU NË DEBATIN E PËRGJITHSHËM TË SESIONIT TË 58-TË TË ASAMBLESË SË PËRGJITHSHME TË SHBA

Presidenti, Alfred Moisiu

Nju Jork, 25 Shtator 2003 Zoti President, I nderuar Zoti Sekretar i Përgjithshëm Zonja e Zotërinj,. Më lejoni që në fillim t’Ju uroj Juve, Shkëlqesi me rastin e zgjedhjes si President i Sesionit të 58 të Asamblesë të Përgjithshme dhe të shpreh bindjen se nën drejtimin tuaj punimet e këtij sesioni do të kurorëzohen me sukses.

E quaj me vend që nga kjo tribunë të shpreh vlerësimin tonë të lartë për aktivitetin dhe kontributin e z. Sergio Vieira de Mello, Komisionerit të Lartë të Kombeve të Bashkuara për të Drejtat e Njeriut si dhe i Dërguari i Posaçëm i Sekretarit të Përgjithshëm të OKB-së për Irakun si dhe të shpreh dhimbjen e thellë për humbjen e tij dhe të personave të tjerë si rezultat i atentatit të egër terrorist kundër Selisë së OKB-së në Bagdat.

Punimet e këtij sesioni, zoti President, vijnë pas një viti sfidash dhe arritjesh për komunitetin ndërkombëtar dhe padyshim për vetë Kombet e Bashkuara.

Në besojmë se ruajtja e paqes, sigurisë, stabilitetit ndërkombëtar dhe mbrojtja e të drejtave të njeriut mbeten objektivi themelor i aktivitetit të Kombeve të Bashkuara. Këto drejtime janë pasqyruar më së miri në Deklaratën e Mijëvjeçarit e cila përmbledh vizionin e përbashkët për të ndërtuar një botë më të mirë, pa konflikte, pa varfëri. Ne bashkohemi me opinionet e shprehura nga Sekretari i Përgjithshëm i OKB-së, Kofi Annan, se ndryshimet e mëdha që kanë ndodhur në botë pas 11 shtatorit, përballja me fenomenin e terrorizmit ndërkombëtar dhe lufta në Afganistan e Irak kanë nxjerrë në pah nevojën për të parë në një dritë të re përballimin e sfidave të mëdha të kohës dhe në këtë kontekst nevojën për të përmirësuar më tej punën e strukturave të OKB-së.

Zoti President,

Ngjarjet e 11 shtatorit si dhe aktet e tjera të dhunës së egër në rajone të ndryshme kanë cënuar sigurinë në botë dhe ndikojnë ndjeshëm në rrjedhën e zhvillimeve të sotme. Ato dëshmuan hapur se terrorizmi është një kërcënim serioz për mbarë njerëzimin e botën e qytetëruar dhe se lufta kundër tij edhe pse e gjatë, duhet bërë dhe duhet fituar. Vlerat humane e demokratike, paqja dhe siguria janë të shenjta për mbarë njerëzimin. Nga ky këndvështrim, Shqipëria u bashkua pa hezitim me koalicionin e drejtuar nga Shtetet e Bashkuara të Amerikës kundër terrorizmit ndërkombëtar. Shqipëria është anëtarësuar në 12 Konventa dhe Protokolle ndërkombëtare kundër terrorizmit, po punon ngushtë me vendet fqinje, shtetet e tjera dhe organizmat ndërkombëtare për të luftuar edhe burimet e mundshme të formave të ndryshme të terrorizmit. Ne vlerësojmë nevojën për vigjilencë, koordinim dhe kundërvënie ndaj kërcënimeve te sotme që vijnë nga zotërimi i armëve të shkatërrimit në masë, qofshin këto kimike, biologjike apo bërthamore, të cilat bëhen akoma më të rrezikshme po të bien në duart e terroristëve. Njëkohësisht, ne vazhdojmë të jemi të përfaqësuar në misionet paqëruajtëse në Afganistan dhe në Irak, si tregues të vullnetit dhe angazhimit tonë në luftën antiterror, për paqen dhe sigurinë. Ne besojmë në rëndësinë e ndryshimeve të thella demokratike në këto dy vende dhe shprehim bindjen se jeta në liri, pavarësisht nga vështirësitë e tranzicionit, shënon një kthesë të pakrahasueshme me jetën në diktaturë dhe nën terror që kërcënon edhe të tjerët.

Zonja e zotërinj,

Një nga prioritetet tona madhore për të cilin ka një qëndrim të unifikuar të politikës dhe shoqërisë shqiptare është integrimi euroatlantik. Proçesi i integrimit ka mbështetje gjithë popullore se ai përputhet me interesat tona jetike. Këtë nuk e shohim thjeshtë si bashkim mekanik me NATO-n dhe BE-në, por si një bashkim me standardet dhe vlerat e lirisë, demokracisë dhe tregut të lirë. Gjykuar nga koha e shkurtër e ndryshimeve dhe trashëgimia negative e të kaluarës, mund të themi se arritjet e Shqipërisë në rrugën e demokracisë janë të mëdha e të konsiderueshme. Kjo nuk përbën shkak për vetkënaqësi. Ne jemi të vetdijshëm se duhet akoma shumë punë për të bërë për të cuar përpara reformat e nisura, sidomos në drejtësi në ekonomi dhe në luftën kundër krimit e korrupsionit, si plagë përgjithësisht të shoqërive postkomuniste. Ne tashmë kemi nisur proçesin e bisedimeve për Marrëveshjen e Asociim Stabilizimit me BE-në, dhe Samiti i Selanikut konfirmoi edhe njëherë politikën e dyerve të hapura për Shqipërinë dhe katër vendet e tjera të Ballkanit Perëndimor. Hapa të ndjeshëm pozitiv janë shënuar edhe në proçesin e afrimit me NATO-n, sidomos pas Samitit të Pragës. Bashkë me Kroacinë e Maqedoninë jemi angazhuar në kuadër të Kartës Adriatik 3, për një afrim gjithnjë e më të madh me standardet e anëtarësimit. Ne gjykojmë se afrimi ynë i sotëm dhe anëtarësimi i nesërm në NATO dhe në BE është në interes të vendeve të rajonit tonë, ashtu sic është edhe në interesin e vetë Europës dhe të paqes e sigurisë së përgjithshme.

Zoti President,

Shqipëria e vlerëson bashkëpunimin rajonal si parakusht dhe nxitje për integrim euroatlantik. Ne besojmë se zhvillimi i dialogut midis vendeve ballkanike, rritja e bashkëpunimit dhe mirëkuptimit, shpreh aspiratat e qytetarëve tanë dhe është një impuls për proçeset integruese. Ballkani, deri para pak kohësh i njohur si burim konfliktesh dhe krizash, tani paraqet një tabllo që ka ndryshuar pozitivisht dhe me një klimë politike të zbutur në mënyrë të ndjeshme. Rajoni i përplasjeve nacionaliste është shndërruar në vendin ku kultura e dialogut dhe e mirëkuptimit po zë vend përditë e më shumë. Ndonëse e kaluara ndarëse dhe tragjike ka ende përkrahës në politikën aktive, në tërësi klasa e re politike ballkanike po orientohet nga e ardhmja dhe bashkëpunimi. Në ndërtimin dhe forcimin e kësaj fryme të re, Shqipëria dhe shqiptarët luajnë një rol aktiv. Ne duam dhe po punojmë për të ndërtuar marrëdhënie miqësore e të bashkëpunimit me të gjitha vendet e rajonit, të ecim drejt të ardhmes së përbashkët europiane. Investimi i vendeve tona drejt të ardhmes euroatlantike është një nga garancitë kryesore se rajoni do të lerë pas të kaluarën e hidhur për tju bashkuar rrjedhave demokratike të kohës.

Zonja e zotërinj,

Për Shqipërinë dhe Ballkanin rritja e stabilitetit dhe forcimi i demokracisë në zona të njohura si vatra krizash në të kaluarën, është i një rëndësie të veçantë. Ne vlerësojmë sidomos zhvillimet demokratike dhe integruese në Kosovë, për të cilat meriton të vihet në dukje kontributi i UNMIK-ut dhe i ish-përfaqësuesit të Sekretarit të Përgjithshëm zotit Steiner. Ne mbështetim misionin e ri të zotit Holker dhe shohim me admirim përpjekjet e shoqërisë dhe instituticioneve të Kosovës për të ndërtuar një model demokratik bashkëjetese midis të gjithë qytetarëve të saj. Stabiliteti i Kosovës ka një rëndësi të madhe për stabilitetin e rajonit, ndaj ne kemi përkrahur në vazhdimësi reformat dhe arritjet e shënuara në drejtim të ngritjes dhe forcimit të institucioneve demokratike, kemi dënuar aktet e dhunës dhe kemi inkurajuar çdo nismë që i shërben respektimit të normave të një shoqërie demokratike, forcimin e shtetit ligjor, nxitjen e një ekonomie tregu të qëndrueshme dhe të zhvilluar, forcimin e institucioneve demokratike, harmoninë ndëretnike, kthimin e njerëzve të zhvendosur etj.

Shqipëria ka nxitur dhe mbështetur përpjekjet për nisjen e dialogut midis Prishtinës dhe Beogradit për çeshtje teknike me interes të përbashkët. Ne mendojmë se dialogu është rruga më e mirë për të zgjidhur problemet dhe për të krijuar besimin e domosdoshëm. Shqipëria vlerëson se e ardhmja e Kosovës, pra statusi final i saj është diçka që i përket një periudhe të mëpasshme, e cila nuk duhet të shtyhet pafundësisht. Tashmë është bërë e pranueshme që ky status do të përcaktohet nga vullneti i qytetarëve të Kosovës në bashkëpunim me faktorin ndërkombëtar. Përmbushja e standarteve dhe përcaktimi i statusit janë çeshtje që lidhen ngushtë dhe ndërvaren nga njëra-tjetra. Standartet sigurojnë funksionim normal të institucioneve vendore, ndërsa statusi sjell stabilitet, paqe e zhvillim për Kosovën dhe rajonin.

Edhe zhvillimet pozitive që kanë ndodhur në Maqedoni janë shpresëdhënëse në arritjen e një stabiliteti afatgjatë. Megjithatë ne mendojmë se zbatimi integral dhe pa zvarritje i Marrëveshjes së Ohrit është i një rëndësie vendimtare për të ardhmen e Maqedonisë. Shqipëria dënon ekstremistët e të gjithë krahëve dhe mbështet frymën e tolerancës dhe të bashkëekzistencës ndëretnike.

Z. President,

Republika e Shqipërisë mbështet planet dhe iniciativat që synojnë zgjidhjen e plotë dhe afatgjatë të situatës në Lindjen e Mesme. Në këtë kuadër, ne vlerësojmë planin “Road Map” për një zgjidhje përfundimtare dhe të plotë të konfliktit Izrael-Palestinë. Por më parë duhet të hiqet përfundimisht dorë nga dhuna e aktet terroriste dhe të nxitet dialogu dhe fryma e marrëveshjes deri në zgjidhjen përfundimtare. Ne mendojmë se paqja në Lindjen e Mesme është një kollonë e rëndësishme e paqes dhe e sigurisë ndërkombëtare. Zgjidhja e problemit palestinez përbën thelbin e zgjidhjes së krizës së Lindjes së Mesme. Zgjidhja e krizës së Lindjes së Mesme është një element bazë i suksesit në luftën kundër terrorizmit.

Zoti President,

Shteti shqiptar vlerëson dhe beson në një rol akoma dhe më të madh të Kombeve të Bashkuara për forcimin e paqes, sigurisë dhe zhvillimit ekonomik dhe social kudo në botë Shqipëria mbështet reformën në Kombet e Bashkuara që synon një organizatë më të fortë për përballimin e sfidave të kohës dhe që ofron përgjigje në kohë për problemet që preokupojnë anëtarët e saj. Në këtë aspekt ne përshëndesim objektivat e Sekretarit të Përgjithshëm të Kombeve të Bashkuara për reformimin e Organizatës në tërësi dhe të organizmave të saj në veçanti si Asambleja e Përgjithshme, Këshillit të Sigurimit, etj.

Në përfundim, më lejoni Z. President që të shpreh edhe një herë angazhimin e vendit tim për të plotësuar detyrimet e veta që rrjedhin nga vendimet që do të marrë edhe ky Sesion i Asamblesë së Përgjithshme të Kombeve të Bashkuara.

Ju Faleminderit.

Copyright©2000-2003 Trepca.net - Të gjitha të  drejtat e rezervuara.