OPINIONE

Letër e mbyllur mjeteve të informimit: 

MOS E PRANONI CENZURËN KOLONIALISTE!

26 shtator 2003 / Për Kryesinë e LKÇK-së: Fatmir HUMOLLI, kryetar
 

  

Kryesia e KP të LKÇK-së, e ka shqyrtuar edhe një herë gjendjen e mjeteve të informimit dhe çështjen e cenzurës në to. Vlerësojmë se ato ndodhen në një pozitë shumë të rëndë për sa i përket plotësimit të detyrës që kanë marrë për sipër, kur është fjala për cenzurën e cila është prezente tek ato. Kjo është çështje mjaft shqetësuese, jo vetëm për ne, por në përgjithësi për realitetin dhe përpjekjet që bëjmë ne, dhe të tjerët, për zgjidhjen e çështjes kombëtare.

 

Duke përjashtuar një numër shumë të vogël të mjeteve të informimit, pjesa dërmuese e tyre, e kanë pranuar diktatin e UNMIK-ut, duke mos i shërbyer interesit për të cilin thonë se janë krijuar dhe punojnë, pra atë të përgjithshëm; informimin e drejtë për realitetin që na rrethon, për atë që ndodhë, por edhe për të ardhmen tonë.

 

 

Pse mendojmë se nëpër mjetet tuaja të informimit ka cenzurë?

 

Kur themi kështu, ne parasëgjithash mendojmë në cenzurën që është ngritur ndaj pikëpamjeve tona politike, ndaj çështjes së çlirimit dhe bashkimit kombëtar, të cilat përfaqësohen nga subjekti ynë politik. Në të shumtën e rasteve, cenzura që bëhet ndaj nesh, ka të bëjë me bllokimin e një qëndrimi tonë të caktuar politik që të dalë në opinion, dhe sidomos kur ai bie ndesh me interesat që mediumi juaj mbronë në prapavijë. Në këto raste, pasi që ai që dikton politikën redaktuese të mediumit tuaj, nuk e ka guximin që të ballafaqohet me faktet politike të vijës sonë, por, këtë e shprehë përmes cenzurës që bëhet përmes juve, duke e bllokuar krejtësisht daljen në opinion të qëndrimit tonë.

 

Në këtë mënyrë po bëhet shkelja elementare e informimit të pavarur (në të cilin keni dëshirë të thirreni), kur dihet se për çdo qëndrim apo deklaratë përgjegjësia bie vetëm mbi ne, ndërsa juve do t’ju konvenojë shumë që t’a mbushni hapsirën tuaj informative të mediumit. Ne jemi të vetëdijshëm se prapa mediumeve tuaja qëndrojnë forca të caktuara politike, apo shtete e fondacione, të cilat edhe e diktojnë politikën tuaj redaktuese, por nuk mund të pajtohemi me cenzurën në emër të shtypit të pavarur.  Mirëpo kujt i shkon për shtati cenzurimi i politikë së LKÇK-së, dhe a mundet ta arrijë definitivisht qëllimin kushdo çoftë ai? Natyrisht që kundërshtarët e idesë së bashkimit kombëtar, do të përdorin edhe mënyra të tilla kundër tij, por ju nuk na pëlqen që të bëheni instrument për qëllime të tilla. Sepse, në anën e kundërt një gjë e tillë as që ka mundësi të ketë sukses, duke qenëse LKÇK-ja është çdo ditë e më tepër e drejtëpërdrejt në komunikim me popull. Sjellja juaj, në këtë drejtim mund ta vonoj zgjidhjen e çështjes sonë kombëtare, por jo edhe ta ndalë atë.

 

-Duke u bazuar në misionin që duhet të kenë mjetet e informimit, dhe për hir të një informimi të drejtë mbi atë që po ndodhë, ju jeni larg këtij misoni. Në Kosovë, nuk ka mjete të informimit që janë të pavarura. Secila prej tyre mbron interesat e një politike të caktuar, dhe firma që vendoset sipër tyre “i/e pavarur”, është e paqëndrueshme. Për disa nga këto s’mund të themi se nuk e pasqyrojnë mendimin tonë, mirëpo kjo bëhet në varësi të situatës, se a i konvenon “bosit” tuaj apo jo lejimi i një lajmi për ne apo jo. Ky është momenti që na detyron të reagojmë, duke e parë të arsyeshme që t’ua dërgojmë një letër si kjo, me shpresë së nuk do të jetë e tepërt nëse e dëgjoni edhe mendimin tonë për ju.

 

 

Shkaqet dhe pasojat e kësaj censure

 

Ne, për sa i përket shkaqeve që kanë sjellë deri tek kjo gjendje në mjetet e informacionit, mendojmë se ato qëndrojnë në vet pozitën politike të Kosovës. Ajo nuk është e lirë. Si rrjedhojë, edhe mjetet e informimit nuk mund të jenë në gjendje ta informojnë drejt opinionin publik, për ata që po ndodhin, për pikëpamjet e ndryshme politike që ekzistojnë, etj. Duke qenë kështu këto media, me punën e tyre të përditëshme, para opinionit publik nuk paraqesin gjendjen reale të skenës sonë politike. Derisa në këtë skenën politike ekzistojnë dy opcione për zgjidhjen e çështjes kombëtare, si ajo e “shtetit të Kosovës” (IVPK) dhe ajo për çlirimin dhe bashkimin kombëtar (LKÇK), këto media pasqyrojnë vetëm ato që ua dikton përfaqësuesit e opcionit të parë por edhe UNMIK-u, duke injoruar pafalshëm përfaqësuesit e konceptit politik për bashkim kombëtar; duke krijuar kështu një fizionomi të falsifikuar të realitetit politik në Kosovë; duke ia imponuar mendimim e duke ia mohuar popullit tonë përcaktimin e lirë politik për vetvendosje.

 

Kjo gjë ka ndodhur, dhe po ndodhë duke pasur parasysh faktin se në nuk jemi të lirë, se ka nevojë të angazhohemi që edhe lirinë e mjeteve të informimit ta fitojmë krahas me lirinë tonë kombëtare, sepse jemi të vetëdijshëm se pa qenë të lirë, nuk mund të bëjmë fjalë për media të lira e të paanshme. Secila prej gazetave, radiostacioneve, stacioneve televizive, e tjera, është në anën e dikujt, të ndonjë politike të caktuar. Ato, këtë edhe mund ta bëjnë me dëshirën e tyre apo me imponime, por pastaj për media të pavarura, nuk mund të bëhet fjalë kurrsesi. Është shumë me rëndësi që përkundër se ekzistojnë shkaqe objektive që ndikojnë në robërimin e mjeteve të informimit, ju duhet ta flakni tutje cenzurën koloniale nga vetja juaj, nëse kjo nuk iu ka bërë pjesë e pandashme.

 

Gazeta “Çlirimi” është organ politiko-propagandistik i LKÇK-së, i themeluar me statut të saj, dhe ajo do t’i shërbejë gjithmonë vijës politike të LKÇK-së. Atë që e thotë LKÇK-ja atë do ta thotë edhe organi i saj. Mirëpo ai nuk do të bëhet strehë e asnjë politike antishqiptare, ai do të jetë përher në shërbim të popullit, në shërbim të atyre për të cilët është themeluar. Ai nuk do ta fshehë asnjëher qëllimin për të cilin është themeluar – çlirimin dhe bashkimin kombëtar, por përher do t’i shërbejë atij, pa pranuar asnjë diktat, dhe pa e cenzuruar asnjëher mendimin e popullit.

 

Mirëpo si qëndron puna me ato gazeta e mediume që thonë se jemi të pavarur, dhe në emër të pavarësisë bëjnë cenzurë të paparë ndaj LKÇK-së, kur fjalën tonë e cenzurojnë sipas interesave partiake, sipas porosive të UNMIK-ut, ndërsa thonë se janë publike dhe të hapura e të pranueshme për të gjithë! Për ne është e papranueshme që popullit tonë t’i mohohet e drejta për t’i shprehur mendimet publikisht. Ne mund ta marrim me mend se pse ish-funksionarëve të LKJ-së (të cilët edhe sot i drejtojnë shumë prej mjeteve të informimit publik), ju pengon bashkimi kombëtar. Mirëpo, ne i thërrasim njerëzit e ndershëm, ata që s’kanë asnjë interes që ta përkrahin një cenzurë të tillë, që ta kundërshtojnë një gjë të tillë, me guxim dhe vendosmëri. Njerëzit e rinj, ata që synojnë të ardhme më të mirë për Kosovën; çlirimin nga zgjedha koloniale serbe duhet ta shoqërojnë këtë përpjekje edhe me çlirimin e ndërgjegjjes së tyre nga kolonializmi i cenzurës, duke i thyer prangat e kësaj cenzure mediale përmes së cilës; UNMIK-u dëshiron të vendosë kontroll politik mbi ne.

 

Ne jemi të ndërgjegjshëm se çështja e cenzurës ndaj idesë së çlirimit dhe bashkimit kombëtar, është një luftë politike që i kalon përmasat e mjeteve të informimit, por, jemi kundër asaj që ju të bëheni mjet për realizimin e saj në praktikë, dhe pse ta përkrahni një politikë që nuk është as në interesin tuaj. Këtë s’do të duhej ta bëni edhe përkundër se nëpër këto mjedise ju realizoni të ardhurat tuaja personale, gjë që në Kosovë, për shumicën e popullit paraqesin ëndërr. Ju duhet t’a keni parasysh edhe mundin dhe gjakun që është derdhur rrëke, dhe po derdhet ende për t’i realizuar qëllimet e larta kombëtare. Prandaj, as për ju s’do të duhej që interesi i ngushtë individual të vendosej mbi atë të përgjithshëm.

 

Ju sigurojmë se s’do të ketë mundësi, që cilado politikë çoftë ajo, ta pengojë ngadhnjimin e konceptit tonë politik, sepse ai nuk është vetëm i domosdoshëm por edhe i pashmanghëm. Kjo kërkesë është reale, kurse ideja e “shtetit të Kosovës”, është ide e parealizueshme. Bashkë me iluzionet për këtë shtet; me dështimin e diktatit nga të huajt dhe me lshporrjen e pushtuesve, do të bie edhe cenzura. Vetëm atëher do të kemi media plotësisht të liruara nga cenzura dhe shpirti kolonialist i cenzuruesve.

 

Vlenë të bëhen përpjekje edhe nga ju, në këtë drejtim!

 

Prishtinë, 26 shtator 2003                                                                      Kryesia e KP të LKÇK-së

Copyright©2000-2003 Trepca.net - Të gjitha të  drejtat e rezervuara.