Lajme

E enjte 25 shtator 2003

Përmbajtja:

• Holkeri i njoftoi liderët e Kosovës për takimin e Grupit të Kontaktit

• Deputetët e Kosovës në seancën e sotme miratuan dy projektligje

• Në Prishtinë po i zhvillon punimet Konferenca treditore rajonale për mjedisin

• Në Prishtinë po i zhvillon punimet Konferenca treditore rajonale për mjedisin

• Nga Tiroli mbërrijnë 50 mijë fletore dhe 20 kompjuterë për nxënësit e Podujevës

• Holkeri u takua me Rugovën e pastaj zhvilloi një takim të prëbashkët edhe me liderët e tjerë

• Sot në moshën 59-vjeçare, vdiq shkrimtari e publicisti Mehmet Kajtazi

• Sipas komandantit Mark Bertuçi, gjendja e sigurisë në Mitrovicë është përmirësuar dukshëm

• Arrestohen dy persona të cilët kishin kërcënuar dy pjesëtarë të SHPK-së

• L.Rosin: Në Vjenë do të zhvillohet vetëm ceremonia e hapjes së bisedimeve Prishtinë – Beograd

• Erhard Busek e ka përshëndetur vendimin për fillimin e dialogut ndërmjet Prishtinës dhe Beogradit

• Zëdhënësi i UNMIK-ut thotë se nuk mund të prononcohet për ndonjë datë të saktë të bisedimeve Prishtinë – Beograd

• Qeveria u bëri thirrje prodhuesve që çmimin e bukës ta kthejnë në nivelin e mëparshëm

• UNMIK-u hodhi poshtë pohimet e Faruk Spahisë

• Pablo Baraibar thotë se rreth 3500 persona nga Kosova ende konsiderohen të zhdukur

• Shqipëria përshëndet deklaratën e Grupit të Kontaktit për Kosovën

• Helsinki grek dënon vrasjen e shqiptarit

• Dy shqiptarë nga Kosova u kapen në portin e Durrësit me 14 kilogram heroinë

• Dy shqiptarë janë plagosur dje pasdite në një sulm kundër një lokali në qendër të Kumanovës

• Afër Bujanocit është plagosur një major i ushtrisë serbo-malazeze

• Nxënësit shqiptarë në Dibër protestuan në mbështetje të kolegëve të tyre në Manastir

• Në luftimet në Bregun Perendimor dhe në Rripin e Gazës janë vrarë 5 palestinezë dhe një ushtar izraelit

• Guerilët talibanë kanë vrarë një afgan, që punonte për një agjenci vendore humanitare

• Një djalosh 15- vjeçar ka vrarë një nxënës shkolle dhe ka plagosur një tjetër

• Ish-ministrit Sulltan Hashim Ahmed, i është pranuar kërkesa për imunitet nga ndjekja penale

• Në Kamboxhë përkujtohen vrasjet e regjimit të Pol Potit në vitet 1975-1979

• Një turist britanik ka shpëtuar nga kidnapuesit, nuk dihet për 7 pengjet e tjera në një xhungël kolumbiane

• Ushtarët izraelitë kanë vrarë një lider të Xhihadit islamik dhe tre militantë palestinezë të tjerë

• Një person vritet nga bomba në Bagdad

• Raporti i BE-së për mashtrime nuk prek Prodin

Holkeri i njoftoi liderët e Kosovës për takimin e Grupit të Kontaktit

 

Prishtinë, 25 shtator 2003 - Pas kthimit nga Nju Jorku, ku mori pjesë në takimin e Grupit të Kontaktit për Kosovë, Kryeadministratori Hari Holkeri sot zhvilloi konsultime me liderët e Kosovës për mundësinë e fillimit të dialogut Prishtinë-Beograd. Holkeri fillimisht pati një takim të veçantë me Presidentin e Kosovës Ibrahim Rugova, me të cilin bisedoi për përfundimet e Grupit të Kontaktit në lidhje me fillimin e bisedimeve Prishtinë-Beograd.

  

Pastaj Holkeri ftoi edhe liderët e tjerë të Kosovës, kryeministrim Bajram Rexhepi, kryetarin e PDK-së Hashim Thaçi dhe atë të AAK-së Ramush Haradinaj në një takim të përbashkët për të diskutuar lidhur me këtë çështje.

Presidenti Rugova pas përfundimit të takimit tha shkurt para mediave se është biseduar për çështjet praktike lidhur me bisedat e mundshme me Beogradin, duke shtuar se konsultimet do të vazhdojnë edhe më tutje.

Ndërkaq, kryeministri Rexhepi tha se Holkeri i ka njoftuar për takimin e Grupit të Kontaktit të mbajtur në Nju Jork dhe ka marrë vendim që kah mesi i tetorit të fillojnë bisedimet Prishtinë-Beograd.

 

Mirëpo, sipas tij, më parë përfaqësuesit e Kosovës duhet të ndërtojnë koncensusin e brendshëm politik institucional, duke insistuar që të ketë një qëndrim politik të parlamentit. Sipas Rexhepit, Kosova në këto bisedime e sheh interesin në çështjet energjetikës dhe të transportit e telekomunikacionit.

 

Ai tha se është koha që të ndalet aktiviteti i Mobtelit serb në Kosovë. Rexhepi tha se nuk bën të prejudikohen gjërat dhe shprehu skepticizëm për suksesin e bisedimeve. Ai edhe njëherë përsëriti se parlamenti duhet ta thotë mendimin e vet dhe të ndërtojë koncensusin politik e pastaj të fillojnë bisedat.

 

 

Deputetët e Kosovës në seancën e sotme miratuan dy projektligje

 

Prishtinë, 25 shtator 2003 - Depuyetët e Kuvendit të Kosovës në seancën e sotme të rregullt miratuan ndryshimin dhe plotësimin e Ligjit për menaxhimin e financave publike dhe Projektligjin për pesticidet.

Ndërkaq, Kuvendi nuk diskutoi për dialogun me Beogradin edhe pse kryeministri Bajram Rexhepi ka ritheksuar se vendimin politik për fillimin e bisedimeve duhet ta marrë Parlamenti.

 

Poashtu sot u miratua ndryshimi i Ligjit për menaxhimin e financave publike. Ministri i financave, Ali Sadriu tha se me ndryshim e ligjit do të mundësohet një menaxhim më i mirë i kompanive publike dhe do të evitohet financimi i tyre përmes granteve buxhetore.

 

 

Në Prishtinë po i zhvillon punimet Konferenca treditore rajonale për mjedisin

 

Prishtinë, 25 shtator 2003 - Sot në Prishtinë po i zhvillon punimet Konferenca treditore rajonale për mjedisin, që do të zgjasë deri më 27 shtator. Në konferencë po marrin pjesë ekspertë të mjedisit jetësor nga i tërë rajoni, të cilët do të flasin për shkëmbimin e përvojave dhe për bashkërendimin e veprimeve në nivel rajonal për ruajtjen e mjedisit.

Në hapje të konferencës, kryeministri Bajram Rexhepi tha se sfidat për mjedisin me të cilat po ballafaqohen vendet në rajon janë pasojë e regjimit të mëparshëm. Ndërkaq ministri Ethem Çeku kërkoi nga institucionet e të gjitha vendeve të kenë një gatishmëri politike për mbrojtjen e mjedisit.

 

 

Në Prishtinë po i zhvillon punimet Konferenca treditore rajonale për mjedisin

 

Prishtinë, 25 shtator 2003 - Sot në Prishtinë po i zhvillon punimet Konferenca treditore rajonale për mjedisin, që do të zgjasë deri më 27 shtator. Në konferencë po marrin pjesë ekspertë të mjedisit jetësor nga i tërë rajoni, të cilët do të flasin për shkëmbimin e përvojave dhe për bashkërendimin e veprimeve në nivel rajonal për ruajtjen e mjedisit.

Në hapje të konferencës, kryeministri Bajram Rexhepi tha se sfidat për mjedisin me të cilat po ballafaqohen vendet në rajon janë pasojë e regjimit të mëparshëm. Ndërkaq ministri Ethem Çeku kërkoi nga institucionet e të gjitha vendeve të kenë një gatishmëri politike për mbrojtjen e mjedisit.

 

 

Nga Tiroli mbërrijnë 50 mijë fletore dhe 20 kompjuterë për nxënësit e Podujevës

 

Podujevë, 25 shtator 2003 - Organizata joqeveritare "Arsimi për paqe" nga Tiroli lindor i Austrisë sot solli në Podujevë një ndihmë të madhe për nxënësit e shkollave të komunës së Podujevës, të cilat i solli KFOR-i austriak.

"Kjo ndihmë është edhe një konfirmim i thellimit të bashkëpunimit mes Tirolit dhe Podujevës dhe simbolika e kësaj ndihme është edhe më e madhe meqë ndihmohen drejëpërdrejtë nxënësit e shkollave të Podujevës", tha kryetari komunës Agim Veliu.

Ndërkaq, ministri i Tirolit, Logar tha se në kuadër të ndihmës dhe bashkëpunimit në mes të komunës së Podujevës dhe Tirolit të Austrisë, organizata "Arsimimi për paqe" solli një një ndihmë për shkollat e komunës së Podujevës në vlerë prej afro 40 mijë euro e cila kryesist përbëhet prej 50 mijë fletoresh dhe 20 kompjuterëve.

Logar premtoi edhe një ndihmë tjetër për projektin e liqenit të Batllavës, përkatësisht zhvillimin e atij rajoni bujqësor, blegtoral e turistik.

 

 

Holkeri u takua me Rugovën e pastaj zhvilloi një takim të prëbashkët edhe me liderët e tjerë

 

Prishtinë, 25 shtator 2003 - Pas kthimit nga Nju Jorku, ku mori pjesë në takimin e Grupit të Kontaktit për Kosovë, Kryeadministratori Hari Holkeri sot po zhvillon konsultime me liderët e Kosovës.

Holkeri sot ka pasur një takim të veçantë me Presidentin e Kosovës Ibrahim Rugova, me të cilin ka biseduar për përfundimet e Grupit të Kontaktit në lidhje me fillimin e bisedimeve Prishtinë-Beograd.

Pastaj Holkeri ka ftuar edhe liderët e tjerë të Kosovës në një takim të përbashkët për të diskutuar lidhur me këtë çështje.

Për momentin takimi ende nuk ka përfunduar.

 

 

Sot në moshën 59-vjeçare, vdiq shkrimtari e publicisti Mehmet Kajtazi

 

Cyrih, 25 shtator 2003 - Pas një sëmundjeje të rëndë, sot në Zvicër në moshën 59-vjeçare, vdiq shkrimtari e publicisti Mehmet Kajtazi.

Mehmet Kajtazi është autor i disa romaneve e përmbledhjeve të tregimeve. I ndjeri deri në vitin 1999 ka qenë gazetar i të përditshmes "Rilindja". Pas dëbimit gjatë luftës nga Kosova Mehmet Kajtazi ka jetuar me familje në Zvicër.

Varrimi i të ndjerit do të bëhet të shtunën në Kosovë.

 

 

Sipas komandantit Mark Bertuçi, gjendja e sigurisë në Mitrovicë është përmirësuar dukshëm

 

Mitrovicë, 25 shtator 2003 - Komandanti i Brigadës shumëkombëshe veri-lindje Mark Bertuçi vlerësoi se gjendja e sigurisë në Mitrovicë është përmirësuar dukshëm, përkundër provokimeve që vijnë nga të dyja anët e qytetit.

 

Këto komente gjenerali Bertuçi i bëri në përfundim të mandatit të tij katërmujor. Sipas komandanti të kësaj brigade, disa persona dhe grupe po përhapin dezinformata duke shtuar pasigurinë e qytetarëve të Mitrovicës, për qëllim personale e politike, porse KFOR-i nuk do ta lejojë këtë, tha Bertuçi.

"Me frikë s'ka dialog, s'ka kthim të mundshëm të minoriteteve, s'ka mirëkuptim, s'ka çarmatim dhe s'ka zhvillim të mundshëm", tha Bertuçi. Ai shtoi se liria e lëvizjes së njerëzve në Mitrovicë është përmirësuar dukshëm, përkundër provokimeve që bëhen herë pas here.

 

 

Arrestohen dy persona të cilët kishin kërcënuar dy pjesëtarë të SHPK-së

 

Mitrovicë, 25 shtator 2003 - Njoftohet se mbrëmë në pjesën jugore të Mitrovicës janë arrestuar dy persona të cilët kishin kërcënuar dy pjesëtarë të SHPK-së që ishin në detyrë.

 

Sipas zëdhënëses së UNMIK-ut, Trejsi Beker rasti ka ndodhur në momentin kur pjesëtarët e SHPK-së ndaluan veturën e dy personave pas një kundërvatje në trafik. Ata u arrestuan dhe u dërguan në stacionin e policisë.

Po mbrëmë në një qeli të burgut të Mitrovicës është vënë zjarri nga një i burgosur, i cili zjarrin e shkaktoi me qëllim.

 

 

L.Rosin: Në Vjenë do të zhvillohet vetëm ceremonia e hapjes së bisedimeve Prishtinë – Beograd

 

Uashington, 25 shtator 2003 - Duke folur për rolin eventual që do të luajnë SHBA-të në bisedimet mes Prishtinës e Beogradit, Lari Rosin, ndihmës i zëvendëssekretarit të Shtetit, tha se nuk parashikohet një skenar në të cilin në tryezën e bisedimeve do të ketë përfaqësues amerikanë apo të ndonjë vendi tjetër të Grupit të Kontaktit.   "Unë parashikoj që në ceremoninë e hapjes do të marrin pjesë përfaqësues të lartë si amerikanë ashtu edhe të vendeve të tjera të Grupit të Kontaktit.   Por pas saj, bisedimet janë midis Prishtinës dhe Beogradit, për çështjet teknike dhe do të ishte mirë që struktura e takimit të ishte e tillë që ajo të përqëndrohej në bisedimet midis këtyre dy palëve", tha Rosin për "Zërin e Amerikës".

  

Rosin parasheh që Shtetet e Bashkuara do të jenë të pranishme aty pranë dhe do të ndihmojnë në mënyrë të tillë që bisedimet e drejtpërdrejta mes përfaqësuesve të Prishtinës dhe Beogradit të jenë të suksesshme.

Ndërkaq, duke folur për vetë takimin e Vjenës, Rosin thotë se "ajo që parashikon administratori i Kosovës, dhe ajo që parashikojmë ne është se në Vjenë do të zhvillohet vetëm ceremonia e hapjes së bisedimeve me përfaqësues të lartë të të dyja palëve që do të shënojë fillimin e procesit".

Sipas Rosinit, bisedimet e mëpasme nuk do të zhvillohen në Vjenë, por në vetë rajonin dhe ato mund të jenë bisedime mes ekspertëve teknikë të fushave të ndryshme për çështje shumë praktike si rryma elektrike apo komunikacioni e sektorë të tjerë të kësaj natyre për të përmirësuar jetesën e banorëve në Kosovë.

I pyetur se cila është politika aktuale amerikane ndaj Kosovës, Lari Rosin theksoi se "Presidenti Bush e ka bërë të qartë, Shtetet e Bashkuara shkuan në rajon së bashku me aleatët dhe ne do të largohemi nga rajoni së bashku me aleatët".

"Ne duam të përshpejtojmë ditën kur të jenë krijuar kushtet e duhura që largimi i komunitetit ndërkombëtar nga rajoni të shërbejë për forcimin e qëndrueshmërisë atje", tha ai.

Për komentet që janë bërë pas vizitës së gjeneralit Riçard Majers në Kosovë, Rosin tha se mund të jenë pak të ekzagjeruara ose mund të kenë të bëjnë me spekulimet që janë parë në shtypin evropian, por edhe në atë amerikan.

 

 

Erhard Busek e ka përshëndetur vendimin për fillimin e dialogut ndërmjet Prishtinës dhe Beogradit

 

Vjenë, 25 shtator 2003 - Koordinatori i Paktit të Stabilitetit për Evropën Juglindore Erhard Busek e ka përshëndetur vendimin për fillimin e dialogut ndërmjet Prishtinës dhe Beogradit. Busek thotë se është përpjekur prapa skenës që Vjena të jetë vendi i bisedimeve.

 

Ai ka vlerësuar se është mirë, sidomos për palën serbe që çështja e statusit final tash nuk do të shqyrtohet përderisa nuk miratohet kushtetuta e re e Serbisë. Kjo temë mbetet çështje e vështirë për Beogradin. Atje momentalisht vetëm mund të përsëritet fraza e vjetër se Kosova është pjesë e Serbisë, ka thënë Busek.

 

 

Zëdhënësi i UNMIK-ut thotë se nuk mund të prononcohet për ndonjë datë të saktë të bisedimeve Prishtinë – Beograd

 

Prishtinë, 25 shtator 2003 - Kryeadministratori i Kosovës Hari Holkeri pas takimit të Grupit të Kontaktit ka deklaruar se shpreson që në dialog të marrin pjesë zyrtarët më të lartë nga të dy palët. Këtë e konfirmoi zëdhënësi i UNMIK-ut në Prishtinë, Kristian Lindmajer. Ai ka thënë se Holkeri është në rrugë e sipër për në Kosovë dhe ai duhet të kthehet në Prishtinë.

Në mesin e vendeve të Grupit të Kontaktit ekziston disponimi që bisedimet ndërmjet Prishtinës dhe Beogradit të fillojnë kah mesi i tetorit dhe është propozuar Vjena për vendin ku do të zhvillohen këto bisedime, ka thënë zëdhënësi i UNMIK-ut Kristian Lindmajer. Ai ka shtuar se Holkeri do të jetë drejtues i bisedimeve dhe ky rol do t'i mbetet atij.

Zëdhënësi Lindmajer tha se nuk mund të prononcohet për ndonjë datë të saktë të këtyre bisedimeve, ngase siç tha, kjo duhet të caktohet në marrëveshje me palët të cilat do të hyjnë në dialog, pastaj duhet dërguar edhe ftesat për pjesëmarrësit tjerë të rëndësishëm nga pala ndërkombëtare.

 

 

Qeveria u bëri thirrje prodhuesve që çmimin e bukës ta kthejnë në nivelin e mëparshëm

 

Prishtinë, 25 shtator 2003 - Qeveria në mbledhjen e saj të djeshme ka diskutur edhe për problemet sociale me të cilat po përballet këto ditë Kosova. Kryeministri Rexhepi ngritjen e çmimit të bukës e vlerësoi si të paarsyeshëm.

 

Ai tha se kjo çështje ishte ngritur qysh në gusht në mbledhjen e Këshillit Ekonomik Fiskal që për shkak të rendimenteve të ulëta të lejohet importimi i grurit pa tarifë doganore.

 

"Atëherë dhe tash e kemi pëlqimin edhe nga z. Çarl Brajshou për importimin e miellit dhe farërave në mënyrë që të rritën rendimentet", ka thënë Rexhepi. Sipas tij, nuk ekziston asnjë arsye që të rritet çmimi i bukës, duke u bërë thirrje prodhuesve që çmimin e bukës ta kthejnë në nivelin e mëparshëm.

 

 

UNMIK-u hodhi poshtë pohimet e Faruk Spahisë

 

Prishtinë, 25 shtator 2003 - Zyrtarë të UNMIK-ut dhe të policisë ndërkombëtare në Mitrovicë e kanë hedhur poshtë deklaratën e kryetarit të Komunës së Mitrovicës Faruk Spahija se të ashtuquajturat "rojet e urës" janë vendosur në shtëpitë e blera nga Qeveria serbe në "Kodrën e minatorëve".

Kryetari i komnës së Mitrovicës disa herë ka tërhequr vërejtjen për ngathtësinë e veprimit të UNNIK-ut për të penguar ekstremizmin serb në veri të Mitrovicës.

 

 

Pablo Baraibar thotë se rreth 3500 persona nga Kosova ende konsiderohen të zhdukur

 

Pristinë, 25 shtator 2003 - Rreth 3500 persona nga Kosova ende konsiderohen të zhdukur prej konfliktit të viteve 1998 dhe 1999, ka deklaruar Pablo Baraibar, drejtues i Zyrës për Persona të Zhdukur. Ai ka shtuar se kjo çështje është qenësore për pajtimimin dhe është shumë e mundshme që disa njerëz nuk do të gjenden, ka thënë Baraibar për Rojterin.

 

 

Shqipëria përshëndet deklaratën e Grupit të Kontaktit për Kosovën

 

Tiranë, 25 shtator 2003 - Ministria e Punëve të Jashtme e Shqipërisë përshëndet deklaratën e Grupit të Kontaktit për Kosovën nëpërmjet së cilës rikonfirmohet angazhimi i faktorëve të rëndësishëm ndërkombëtarë për të mbështetur çdo nismë që synon të arrijë rezultate konkrete për krijimin e një klime të re mirëbesimi, bashkëpunimi mes Prishtinës dhe Beogradit përmes dialogut të hapur dhe konstruktiv.

Në këtë kontekst MPJ vlerëson propozimin e Kryeadministratorit Holker për zhvillimin e bisedimeve të drejtpërdrejta me karakter teknik mes Prishtinës dhe Beogradit, si dhe me asistencën, ndërmjetësimin dhe në bashkëpunim të ngushtë me bashkësinë ndërkombëtare Brenda kornizës së Rezolutës 1244 të KS të OKB-së, me besimin se kjo do te jetë një shenjë pozitive drejt ndërgjegjësimit reciprok për një të ardhme në kuadrin e integrimeve rajonale dhe europiane.

Ministria e Punëve të Jashtme u bën thirrje drejtuesve politikë në Prishtinë dhe Beograd që të punojnë për krijimin e një atmosfere të favorshme për hapjen drejt këtij vizioni të ri që do të reflektojë mbi të gjitha, maturitetin dhe përgjegjësinë politike të bashkëbiseduesve, në realitetet e reja.

 

 

Helsinki grek dënon vrasjen e shqiptarit

 

Athinë, 25 shtator 2003 - Komiteti grek i Helsinkit e ka cilësuar si akt kriminal vrasjen të martën e një të riu shqiptar pranë kufirit midis të dy shteteve, në zonën e Kosturit.

Përfaqësuesi i këtij Komiteti, Panajotis Dimitras tha për BBC-në se është e pajustifikueshme që gjatë operacioneve policore greke "emigrantë të paarmatosur të plagosen apo të vriten me armë zjarri".

Dimitras shpreh shqetësimin se, ndërsa gjatë dy viteve të fundit ka pasur mjaft incidente në kufi, me keqtrajtime apo dhe me vrasje emigrantësh shqiptarë, me përjashtim të një rasti, për policët grekë nuk është marrë as edhe një masë disiplinore.

Autoritetet greke njoftuan se shtetasi shqiptar humbi jetën nga një plagë në kokë gjatë një kalimi ilegal të kufirit.

 

 

Dy shqiptarë nga Kosova u kapen në portin e Durrësit me 14 kilogram heroinë

 

Tiranë, 25 shtator 2003 - Prokuroria e Shqipërisë është duke hetuar gjurmët e një grupi të madh trafikantësh droge, të cilët ngarkesat e tyre i transportojnë në linjën Kosovë -Shqipëri - Itali me destinacion Gjermaninë.

 

Pas arrestimit të dy shqiptarëve nga Kosova me banim në Gjermani, të cilët u ndaluan në flagrancë në portin e Durrësit me 14 kilogram heroinë, zyra e Interpolit të Tiranës po bashkëpunon me homologët gjermanë për të goditur pjesën tjetër të rrjetit që trafikon prej kohësh ngarkesa droge.

Ibrahim Arifi 30 vjeç dhe Hafiz Kurani 35-vjeç të dy shqiptarë nga Kosova dhe emigrantë me dokumente të rregullta në Gjermani kanë hyrë nga pika e kalimit kufitar të Morinit në rrethin e Kukësit dhe pardje në mbrëmje kanë tentuar që me automjetet e tyre të kalojnë nëpërmjet portit të Durrësit për në Itali dhe më pas në Gjermani.

Por agjentët e antikrimit në Portin e Durrësit i kanë arrestuar dy pasagjerët para se të hypnin në trajektin e linjës pasi në makinat e tyre ishte gjetur një sasi prej afro 14 kg. heroinë.

 

 

Dy shqiptarë janë plagosur dje pasdite në një sulm kundër një lokali në qendër të Kumanovës

 

Shkup, 25 shtator 2003 - Dy shqiptarë janë plagosur dje pasdite në një sulm kundër një lokali në qendër të Kumanovës. Policia ka bërë të ditur se sulmuesit e armatosur të përkatësisë etnike shqiptare kanë shkrepur breshëri plumbash në lokalin përplot njerëz dhe pastaj janë larguar.

 

 

Afër Bujanocit është plagosur një major i ushtrisë serbo-malazeze

 

Bujanoc, 25 shtator 2003 - Majori i Ushtrisë serbo-malazeze, Rahman Bandiq, është plagosur kur me armë automatike është hapur zjarr ndaj patrullës ushtarake në rrethinën e Bujanocit të luginës së Preshevës. Ky sulm është kryer në rrugën ndërmjet fshatrave Lluçan dhe Dobrosin në afërsi të një baze të ushtrisë së Serbisë dhe Malit të Zi.

 

 

Nxënësit shqiptarë në Dibër protestuan në mbështetje të kolegëve të tyre në Manastir

 

Dibër, 25 shtator 2003 - Nxënësit shqiptarë të shkollës së mesme në Dibër dje organizuan një protestë të qetë, në shenjë mbështetjeje për moshatarët e tyre në Manastir, të cilëve nuk u lejohet të mësojnë në gjuhën shqipe. Organizatorët paralajmëruan protesta masive në Dibër nëse nuk zgjidhet problemi i nxënësve shqiptarë të shkollave të mesme në Manastir.

 

 

Në luftimet në Bregun Perendimor dhe në Rripin e Gazës janë vrarë 5 palestinezë dhe një ushtar izraelit

 

Gaza, 25 shtator 2003 – Sipas njoftimeve më të reja të BBCnews-it në sulmet e sotme izraelite në Bregun Perendimor dhe në Rripin e Gazës janë vrarë pesë palestinezë dhe një ushtar izraelit, kurse katër ushtarë izraelitë të tjerë janë palgosur.

 

Kjo agjenci njofton gjithashtu se në luftimet e rrepta që janë zhvillluar në kampin e refugjatëve Bureixh në Rripin e Gazës, kanë marrë pjesë edhe tanket, të mbështetura nga helikopeterët.

 

 

Guerilët talibanë kanë vrarë një afgan, që punonte për një agjenci vendore humanitare

 

Kabul, 25 shtator 2003 – Guerilët talibanë kanë vrarë një afgan, që punonte për një agjenci vendore humanitare dhe kanë plagosur rëndë shoferin e tij, kanë bërë të ditur sot ( e enjte) zyrtarët, njoftron Rojter. Sulmi ka ndodhur në rrugë në drejtim të qytetit Kandahar në provincën Helmand, 345 mila në përendim të Kabulit.

 

Në njoftim thuhet se dy nga sulmuesit janë arrestuar dhe u janë konfiskuar dokumentet dhe një telefon satelitor. Zëdhënësi i Kombeve të Bashkuara në Afganistan, Dejvid Sing, ka thënë se shoferi ka pësuar plagë të rënda në krah dhe në këmbë.

 

 

Një djalosh 15- vjeçar ka vrarë një nxënës shkolle dhe ka plagosur një tjetër

 

Kould Spring, Minesota, 25 shtator 2003 – Një djalosh 15-vjeçar ka hapur zjarr kundër nxënësve të një shkolle të lartë dhe kështu ka vrarë një nxënës dhe ka plagosur një tjetër, njofton AP. Arsimtari i tij e kishte lutur të hiqte dorë nga arma, por më kot.

 

Djaloshi, emri i të cilit nuk është dhënë, sipas policisë ka bashkëpunuar me autoritetet, por ende nuk i ka përcaktuar motivet e një akti të tillë. Rreth 30 nxënës kanë qenë dësmitarë të këtij akti dhe aktualisht policia po i merr në pyetje.

 

 

Ish-ministrit Sulltan Hashim Ahmed, i është pranuar kërkesa për imunitet nga ndjekja penale

 

Uashington, 25 shtator 2003 – Ish-ministrit irakian të Mbrojtjes, Sulltan Hashim Ahmed, i është pranuar kërkesa për imunitet nga ndjekja penale pasi u është dorëzuar forcave amerikane, njofton BBCWorld.

 

Z. Ahmed, i cili ishte nën numrin 27 të listës amerikane të ish-zyrtarëve irakianë më të kërkuar, është dorëzuar të premten e kaluar në qytetin Mosul. Zyrtarët e Shtëpisë së Bardhë kanë thënë se ata kanë shpresa të mëdha se ai do të japë informacione të rëndësishme për programet irakiane të armëve.

 

 

Në Kamboxhë përkujtohen vrasjet e regjimit të Pol Potit në vitet 1975-1979

 

Pnom Pen, 25 shtator 2003 – Sot në Kamboxhë është zhvilluar një ceromoni fetare, të cilës i kanë prirë priftërinjtë budistë, në shenjë përkujtimi të miliona njerëzve të vdekur në gjenocidin e Kmerëve të Kuq, njofton Rojter. Sipas ritit kombëtar kjo ceremoni zhvillohet çdo vjet në përkujtim të të vdekurve të gjithë stërgjyshërve.

 

Që nga koha e Pol Potit ky rit ka marrë edhe një përmbajtje plotësuese dhe përkujtohen vrasjet e regjimit të Pol Potit në vitet 1975-1979, kryesisht nga ekzekutimet, nga torturat dhe uria, kur patën humbur jetën 1,7 milionë njerëz, që përbën një të tretën e popullsisë.

 

Pol Poti, një lider ultra-maoist, ka vdekur më 1998, duke i shpëtuar kështu drejtësisë kombëtare dhe ndërkombëtare për një nga mizoritë më rrëqethëse të shekullit 20-të.

 

 

Një turist britanik ka shpëtuar nga kidnapuesit, nuk dihet për 7 pengjet e tjera në një xhungël kolumbiane

 

Bogota, 25 shtator 2003 – Një turist britanik po shërohet në një bazë mjekësore ushtarake pasi më parë kishte shpëtuar nga kidnapuesit e tij në një xhungël kolumbiane, njofton BBCworld. Londinezi Metju Skot, 19-vjeçar, është gjetur nga indianët në malet e Sierra Nevadas pasi kishte bredhur 12 ditë.

 

Ai kishte ikur nga një marsh i dhunshëm, u kishte thënë reporterëve nga shtrati i spitalit dhe kishte shpëtuar vetëm me ujë. Asgjë nuk dihet për 7 pengjet e tjera: një tjetër britanik, 4 izraelitë, një spanjoll dhe një gjerman, të cilët kanë qenë rrëmbyer së bashku me të më 12 shtator.

 

 

Ushtarët izraelitë kanë vrarë një lider të Xhihadit islamik dhe tre militantë palestinezë të tjerë

 

Hebron, 25 shtator 2003 – Ushtarët izraelitë kanë vrarë sot (e enjte) një lider të Xhihadit islamik dhe tre militantë palestinezë të tjerë në sulmet e sotme në Rripin e Gazës dhe në Bregun Perendimor, njofon Rojter.

 

Trupat izraelite kanë vrarë gjatë natës Diab Shjoukhi, lider i Xhihadit për Bregun Perendimor dhe një tjetër militant në vendstrehimet e tyre afër qytetit Hebron në Bregun Perendimor, kanë thënë burimet palestineze.

 

Ushtarët kanë vrarë gjithashtu edhe dy militantë të tjerë në një shkëmbim zjarri në kampin e refugjatëve në el-Bureij në qendër të Gazës. Në këtë incident janë plagosur gjithashtu edhe 6 ushtarë dhe 6 palestinezë, kanë thënë burimet izraelite dhe palestineze të sigurimit.

 

 

Një person vritet nga bomba në Bagdad

 

Bagdad, 25 shtator 2003 - Të paktën një person ka gjetur vdekjen dhe disa të tjera janë plagosur pas shpërthimit të një bombe në një kompleks hotelesh ku strehohen gazetarë të huaj në qendër të kryeqytetit irakian, Bagdad, thotë policia.

Shpërthimi ndodhi në hotelin Aike, ku ka zyrat televizioni amerikan NBC.

Policia irakiane tha se bomba ishte vendosur në një kasolle ku ishte ndodhej gjeneratori i hotelit.
Nënkoloneli irakian Salman Kareem tha se bomba kishte vrarë një roje të sigurisë të hotelit me origjinë somaleze, i cili ishte duke fjetur.

 

 

Raporti i BE-së për mashtrime nuk prek Prodin

 

Bruksel, 25 shtator 2003 - Komisioni Evropian ka përfunduar dy raporte lidhur me akuzat për korrupsion në agjencinë statistikore të Bashkimit Evropian, Eurostat.

Hetimet paraprake tregojnë se shumica e parregullsive që mendohet të kenë përfshirë raste të kontabiliteteve të dyfishta dhe kontratave fiktive kanë ndodhur para komisionit të tanishëm, të kryesuar nga Romano Prodi i cili mori detyrën në vitin 1999.

Pas akuzave për korrupsion ndaj komisionit të mëparshëm mendohet që tani të ketë tolerancë zero, thotë zoti Prodi.

Copyright©2000-2003 Trepca.net - Të gjitha të  drejtat e rezervuara.