Lajme

E mërkure 24 shtator 2003

Përmbajtja:

• Presidenti Rugova vlerësoi se udhëheqja e Prishtinës e ka dhënë provimin para qytetarëve

• Në një aksident të rëndë trafiku mbrëmë afër Prishtinës, humbën jetën katër vetë

• Udhëheqës komunalë të Gjilanit, zyrtarë të UNMIK-ut, të KFOR-it, vizituan Cërnicën

• Britania e Madhe është e interesuar për privatizimin e Fabrikes së birrës në Pejë

• Vjenë: Konferencë për investime dhe privatizimin në Kosovë

• Komuna e Iperit të Belgjikës ndihmon Gjilanin me një projekt për lagjen "Iliria"

• Bisedimet mes Prishtinës e Beogradit mbahen në tetor në Vjenë

• Nadezhda Mihajllova thotë se pavërsia e Kosovës do ta stabilizonte Ballkanin Perëndimor

• U shtuan shpërblimet për çdo komunë të Kosovës që arrijnë të dorëzojnë mbi 300 armë të paligjshme

• Faruk Spahija akuzon individë të policisë së UNMIK-ut për bashkëpunim me ekstremsitët serbë

• Në Lluzhan të Pejës forcat paqeruajtëse arrestuan tre persona për armëmbajtje ilegale

• Millosheviqi është akuzuar për varsjen e Ivan Stambolliqit

• Policia shqiptare arrestoi pjesëtarët e një bande të rrezikshme plaçkitësish në Tiranë

• Ambasadorët e vendeve anëtare të BE-së u dakorduan për dërgimin e Misionit policor në Maqedoni

• Robertson u bënë thirrje politikanëve të Ballkanit t'i luftojnë strukturat e krimit të organizuar

• Papa anulon takimin e përjavshëm

• Akuzë tjetër për spiunazh në Guantanamo

• Trupat izralite kanë vrarë një djalosh 15-vjeçar palestinez në një sulm në Rripin e Gazës

• Një çift polak është arrestuar pasi pesë fëmijë të tyre janë gjetur të vdekura në një tinar të lakrave turshi

• Bush e Shirak shprehën dallime të thella në bebatin e OKB

• Bush mbante fjalimin, ligjvënësit në Kongresin amerikan debatonin rreth politikës në Irak

• Të pakten një person është vrarë kur një autobus ka rënë në një bombë në Bagdad

• Është arrestuar një i dyshimtë i ri për vrasjen e ministres Ana Lind dhe është liruar i dyshimti i mëparshëm

• "Microsoft" mbyll shumicën e faqeve të bisedave të njohura si "chat room"

Presidenti Rugova vlerësoi se udhëheqja e Prishtinës e ka dhënë provimin para qytetarëve

 

Prishtinë, 24 shtator 2003 - Presidenti i Kosovës Ibrahim Rugova vizitoi sot Kuvendin komunal të Prishtinës dhe bisedoi me strukturat udhëheqëse të komunës rreth punës, aktiviteteve, problemeve e sfidave që e preokupojnë kryeqytetin e Kosovës. Presidenti Rugova pas vizitës dhe bisedës që pati me udhëheqjen e ngushtë komunale tha se ka pasur një progres në administratën e Prishtinës, si gjatë mandatit të parë e poashtu edhe në fillim të mandatit të dytë.

 

Por, tha Presidenti Rugova, udhëheqja e tanishme ka katër vjet për të punuar dhe tashmë i ka vendosur themelet e mira, ndërkaq qyteti i Prishtinës është më i bukur dhe me hapësira që i duhen qytetarëve. Edhe pse vera që shkoi ishte e vështirë e me thatësi, udhëheqja e Prishtinës e ka dhënë provimin para qytetarëve, vlerësoi Presidenti Rugova.

Presidenti hodhi disa ide e propozime që progresi arritur të çohet më tutje, që Prishtina të jetë sa më e bukur, të fillojnë ndërtimet më të larta, me komplekse të ndryshme që të jenë në shërbim të qytetarëve e sidomos të të rinjve.

 

Ai propozoi që komuna duhet të marrë iniciativa, por edhe biznesi privat, që njerëzve t'u krijohen mundësi për t'u dhënë shansa të rinjve që të kenë një kulm mbi krye.

Duke folur për planin urbanistik të Prishtinës, Presidenti tha se i ka propozuar qeverisë komunale që derisa të mos bëhet plani global urbanistik, ndërtimet të mos ndërpriten. Njëherit të hartohet një plan urbanistik që i përgjigjet kryeqytetit të Kosovës, tha ai.

Presidenti Rugova theksoi se edhe një çështje tjetër që i kishte propozuar qeverisë dhe kuvendit komunal - atë të legalizimit të ndërtimeve që janë bërë pa leje, ato që nuk pengojnë, porse ndërtimet duhet të kanalizohen, ngase, siç tha, kjo do të ndërprente ndërtimet e ndryshme.

Ndonëse në infrastrukturë është bërë mjaft, ai tha se duhet shikuar edhe infrastrukturën sportive, kulturore e të tjera që mungon i Prishtinës, si me salla e stadiume.

Presidenti me këtë rast apeloi që të ruhet rrethina e Prishtinës sidoms Gërmia, sepse siç u shpreh, ajo për Prishtinës ka një domethëmie të veçantë.

Në fund Presidenti Rugova, duke uruar udhëheqjen komunale për sukseset e arritura, i premtoi përkrahjen e tij të mëtejshme.

Nga ana e tij, kryetari i Kuvendit komunal të Prishtinës Ismet Beqiri vizitën e Presidentit Rugova e vlerësoi si një nder të veçantë dhe nxitje për punë dhe aktivite edhe më të suksesshme për udhëheqjen komunale.

 

Ai tha se me Presidetin kishin biseduar për të gjitha çështjet me të cilat preokupohet pushtet lokal, por edhe për çështjet që u interesojnë të gjithë qytetarëve.

 

Poashtu ai tha se është biseduar edhe për problemet dhe sfidat me të cilat përballen, për sukseset që janë arritur deri më tash, me bindje që këto mundësi janë edhe më të ardhmen.

Edhe pse pushtetit lokal i mungojnë disa kompetenca, zoti Beqiri tha se me ato kompteneca që kanë do të jenë në shërbim të qytetarëve.

Ai shtoi se ardhja e Presidentit në Kuvendin e Prishtinës e ka sot simbolikën e vet, ngase ky ishte një takim me udhëheqjen e Kuvendit dhe të qeverisë komunale në të cilën u hodhën disa ide e propozime që janë shumë të mirëseardhura për udhëheqjen komunale dhe për gjithë administratën komunale, me qëllime të mira, të cilat do të funksionalizohen në shërbim të qytetarëve.

 

Kjo është edhe një dëshmi e një bashkëpunimi të mirëfilltë mes institucioneve të nivelit qendror, në këtë rast të Presidentit të Kosovës dhe udhëheqjes komunale, duke e ditur rolin e kryeqytetit të Kosovës, si bartës i shumë proceseve, tha Ismet Beqiri, i cili shprehu kënaqësinë me vizitën e Presidentit të Kosovës.

 

 

Në një aksident të rëndë trafiku mbrëmë afër Prishtinës, humbën jetën katër vetë

 

Prishtinë, 24 shtator 2003 - Katër vetë të vdekur dhe shtatë të lëdnuar rëndë është epilogu i një aksidenti të rëndë trafiku që ka ndodhur mbrëmë afër fshatit Milloshevë, 6 km larg Prishtinës. Në këtë aksident kanë humbur jetën Anton Zekolli e Bejtullah Zekolli, pjesëtarë të SHPK-së, djali i xhaxhait të tyre Kushtrim Zekolli dhe Sabrije Strana.

Aksidenti ka ndodhur kur kombi i Hendikosit është përplasur me një veturë të tipit "Passat" me regjistrim të huaj.

Sipas mjekut kujdestar në Qendrën Klinike Universitare nga të lënduarit në gjendje të rëndë shëndetësore ndodhet vetëm Besnik Bunjaku.

 

 

Udhëheqës komunalë të Gjilanit, zyrtarë të UNMIK-ut, të KFOR-it, vizituan Cërnicën

 

Gjilan, 24 shtator 2003 - Udhëheqës komunalë të Gjilanit, zyrtarë të UNMIK-ut, të KFOR-it, të policisë ndërkombëtare dhe të SHPK-së kanë takuar në Cërnicë, në dy takime të ndara, udhëheqësit e atjeshëm lokalë shqiptarë e serbë, për të ndihmuar në uljen e tensioneve dhe kthimin e besimit te komuniteti, pas rastit tragjik në këtë fshat.

Kryetari i komunës, Lutfi Haziri tha se rasti tragjik i Cërnicës ka dëmtuar jo vetëm raportet ndëretnike në këtë fshat, por ka krijuar një pasqyrë të keqe në opinion edhe për komunën e Gjilanit, e cila është vlerësuar si shembulli më i mirë në Kosovë për tolerancë dhe bashkëpunim me komunitetet.

U kërkua nga përfaqësuesit e fshatit që të ndihmojnë policinë me të gjitha informacionet që mund të kenë për zbulimin e rastit, në mënyrë që të mos pësojnë të gjithë në këtë mënyrë, ndërsa kryesit të mbeten të lirë.

Popullata shqiptare dhe përfaqësuesit e saj lokalë në Cërnicë e kanë gjykuar rastin dhe kanë deklaruar se janë të gatshëm të punojmë bashkë me serbët për të mirën e përgjithshme, por kanë kërkuar që të mos prejudikohen kryesit e mundshëm, siç ka ndodhur këtu më parë dhe mbi këtë bazë të burgosen njerëz të pafajshëm.

Takimi në fshatin Cërnicë u vlerësua si një hap i mirë nga koloneli Allen Ponsini, komandant i kampit "Montith" në Gjilan. Problemet që janë sot në Cërnicë, nuk mund të zgjidhen nga KFOR-i e as nga policia e UNMIK-ut, por nga vetë ju që jetoni këtu, u tha koloneli Ponsini përfaqësuesve të këtij fshati.

Zëvendëskryetari i komunës Xhemajl Hyseni tha se askush nuk ka të drejtë të krijojë hipoteka mbi një popull, nëse nuk dihen fajtorët. Hyseni tha se ka kërkuar edhe nga parlamentarët serbë në Kuvendin e Kosovës, nga komuna e Gjilanit që të anagzhohen për uljen e tensioneve dhe të mos drejtojnë gishtin me paragjykim nga popullata shqiptare, pa u zbuluar kryesit e veprës.

Lutfi Haziri tha se Cërnica nuk mund të dënohet më kolektivisht, as të mbahet e bllokuar dhe me orë policore, siç ka ndodhur me herët, për për shkak të dikujt që këtu shkakton probleme dhe u ka bërë thirrje përfaqësuesve të fshatit që të ndihmojnë në zbulimin e rastit.

Në Cërnicë u mbajt një takim i veçantë edhe me komunitetin serb dhe përfaqësuesit e tyre, nga të cilët u kërkua që të angazhohen për uljen e tensioneve dhe të punojnë bashkarisht me shqiptarët për një të ardhme më të mirë.

 

 

Britania e Madhe është e interesuar për privatizimin e Fabrikes së birrës në Pejë

 

Londër, 24 shtator 2003 - Britania e madhe është e interesuar për privatizimin e Fabrikës së birrës në Pejës. "Ne jemi të gatshëm dhe investatori më i fuqishëm nga të gjitha kompanitë në Evropë, në të gjitha pikëpamjet, për të privatizuar Fabrikën e birrës në Pejë", thotë përfaqësuesi i qeverisë së Britanisë, Xhon Xhonson.

Ai ka theksuar faktin se për këtë qëllim, qeveria britanike dhe koncernet e saja të prodhimit të birrës, kanë hyrë tani në bisedime me Agjencinë e Mirëbesimit në Kosovë (Kosova Trust Agency) rreth privatizmit të fabrikës së birrës në Pejë.

Xhonson thotë se nëse kjo fabrkë privatizohet nga Britania e Madhe puntorët do të jenë të njëjtë. Mirëpo, ai nuk bëri të ditur se cila kompani britanike është e interesuar për fabrikën e birrës në Pejë.

 

 

Vjenë: Konferencë për investime dhe privatizimin në Kosovë

 

Vjenë, 24 shtator 2003 - Në Vjenë u mbajt Konferenca për Investime dhe Privatizim në Kosovë e organizuar nga Oda Ekonomike e Austrisë dhe Agjencia Kosovare e Mirëbesimit (AKM) e në bashkëpunim me Nismën Ekonomike për Kosovën (ECIKS).

 

Në praninë e shumë ndërmarrësve austriakë dhe të diasporës kosovare, në këtë konferencë diskutuan Ahmet Shala (AKM), Jürgen Voss (UNMIK), Besim Beqaj (Përfaqësues i Qeverisë së Kosovës në Paktin e Stabilitetit), Steven Grunerud (Raiffeisen Bank Kosova), etj.

Konferenca ishte dedikuar informimit sa më të drejtë të investitorëve potencialë nga Austria, në mënyrë që edhe ata të jenë në rrjedha të zhvillimeve ekonomike në rajon dhe të kenë paraysh mundësitë e shumta që i ofron për ta ekonomia kosovare.

Përfaqësuesi i AKM-së, z. Ahmet Shala paraqiti përparësitë dhe mundësitë për të investuar në Kosovë, kryesisht në kuadër të procesit të privatizimit.

Ndërkaq, përfaqësuesi i Kosovës në Paktin e Stabilitetit, z. Besim Beqaj, vuri në pah mes tjerash, se kur flitet për investimet në Kosovë investitorët e huaj mund të llogarisin në një treg 55 milionësh për produktet e tyre e jo vetëm me tregun e brendshëm kosovar.

 

Ai tha se kjo gjë mundësohet falë marrëveshjeve rajonale për tregti të lirë, të cilat në shumicën e vendeve të Ballkanit janë aprovuar apo janë në procedurë e sipër. Në këtë konferencë u tha mes tjerash se marrëveshja për sigurimin politik të investimeve të ndërmarrjeve austriake, në mes të Kosovës dhe Austrisë, është në përpunim e sipër dhe që kjo marrëveshje pritet të nënshkruhet së shpejti.

Nga Oda Ekonomike e Austrisë u bë e ditur se një delegacion I ndërmarrësve austriakë të interesuar për investime dhe për procesin e privatizimit, do ta vizitojnë Kosovën në fund të tetorit për t'u njohur më përafërsisht me përparësitë dhe dobitë e investimeve në Kosovë.

 

 

Komuna e Iperit të Belgjikës ndihmon Gjilanin me një projekt për lagjen "Iliria"

 

Gjilan, 24 shtator 2003 - Komuna Iper e Belgjikës, në bazë të një marrëveshjeje bashkëpunimi, në lagjen "Iliria" në Gjilan do të të fillojë jetësimin e një projekti konkret.

Nesër në Gjilan do të vijë delegacioni i komunës Iper, i prirë nga vetë kryetari Lyk Dean, për të konkretizuar projektin më të nevojshëm në pjesën jugore të qytetit.

Komuna e Iperit do t`i ketë parasysh rezultatet e anketës me qytetarë, e cila sipas praktikës belge të bashkëpunimit me banorët, është realizuar gjatë vizitës së vjetme.

Delegacioni nga Belgjika do të qëndrojë për tri ditë në qytetin e Gjilanit.

 

 

Bisedimet mes Prishtinës e Beogradit mbahen në tetor në Vjenë

 

Nju Jork, 24 shtator 2003 - Anëtarët e Grupit të Kontaktit për Kosovën u takuan në misionin diplomatik të Britanisë së Madhe, pranë Kombeve të Bashkuara në Nju Jork, me përfaqësues të Bashkimit Evropian dhe me kryeadministratorin e Kosovës, Harri Holkeri.

Në deklaratën e botuar pas takimit theksohet se Grupi i Kontaktit përkrah fuqishëm propozimin e zotit Holkeri për të filluar dialogun e drejtpërdrejtë ndërmjet Beogradit dhe Prishtinës për çështje praktike të interesit të përbashkët, nga mesi i muajit tetor të këtij viti.

Po ashtu Grupi i Kontaktit kërkoi angazhimin ndërkombëtar për mbështetjen e këtij dialogu të drejtpërdrejt dhe ritheksoi synimin për të mbikëqyrur nga afër ecurinë e tij.

Grupi u bëri thirrje të gjitha palëve pjesëmarrëse të punojnë në mënyrë konstruktive drejt rezultateve të menjëhershme dhe të përfitojnë nga ky rast për të përmirësuar jetën e popullsisë në Kosovë.

Grupi paralajmëroi se do të kundërshtojë fuqishëm përpjekjet nga cilado palë që do të pengojë zgjidhjen eventuale të statusit përfundimtar të Kosovës.

 

Lidhur me këtë u mbështet zbatimi i Rezolutes 1244 të KS të OKB-së, që përfshin parimin e krijimit të standardeve para statusit, si bazë për politikën në Kosovë.

Në përfundim, deklarata i bën thirrje të gjithë drejtuesve politikë t'i përqëndrojnë energjitë e tyre në vendosjen e mirëbesimit dhe mbështetjen e pajtimit në Kosovë.

Mësohet se kryeadministratori Holkeri shpreson që takimi i parë në mes të dyja palëve të mbahet në nivelin më të lartë politik të Prishtinës dhe Beogradit, kurse data e saktë e fillimit të bisedimeve do të caktohet pas takimeve të sërishme të Holkerit me përfaqësuesit e Prishtinës dhe të Beogradit.

 

 

Nadezhda Mihajllova thotë se pavërsia e Kosovës do ta stabilizonte Ballkanin Perëndimor

 

Sofje, 24 shtator 2003 - Ish-ministrja bullgare e Punëve të Jashtme Nedezhda Mihajllova deklaroi se pavërsia e Kosovës do ta stabilizonte Ballkanin Perëndimor. Zonja Mihajllova i bëri këto komente gjatë një ligjërate para përfaqësuesve të Shoqatës për Gjeostrategji të Bullgarisë dhe atyre të Katedrës për gjeografi rajonale dhe gjeopolitikë të Universitetit të Sofjes.

 

Në këtë kontekst ajo ka theksuar se stabiliteti në relacionet Serbi - Bosnje e Hercegovinë, Kroaci - Serbi - Maqedoni dhe Kosovë mund të mbahet vetëm nëpërmjet perspektivës së pavarësisë së Kosovës. Deklarata e saj transmetohet nga gazeta bullgare "Dnevnik".

 

Mihajllova është lidere e opozitës së djathtë bullgare dhe ish-ministre e Jashtme e Bullgarisë nga viti 1997 deri në vitin 2001. Sipas fjalëve të saj pavarësia e Kosovës duhet të kushtëzohet me garanci për stabilitet në Maqedoni, Serbi dhe Mal të Zi.

 

Ajo ka deklaruar gjithashtu se nuk është në interes të Shkupit zyrtar që të bjerë viktimë e provokimeve, siç është pretendimi se kinse faktori shqiptar është problem i përbashkët serbo-maqedon.

 

 

U shtuan shpërblimet për çdo komunë të Kosovës që arrijnë të dorëzojnë mbi 300 armë të paligjshme

 

Prishtinë, 24 shtator 2003 - Zyrtarët e administratës ndërkombëtare në Kosovë kanë shtuar në 275 mijë dollarë shpërblimet për çdo komunë të Kosovës që arrijnë të dorëzojnë më shumë se 300 armë të paligjshme.

 

Ky shpërblim vlen deri në më 30 shtator, kur edhe përfundon amnistia e shpallur për dorëzimin vullnetar të armëve ilegale. Megjithatë deri më tash sipas burimeve të UNMIK-ut numri më i madh i armëve të dorëzuara në një komunë nuk ka tejkaluar shifrën prej shtatë copë armësh.

 

Por ata thanë se deri më tash asnjë komunë e Kosovës nuk e ka përmbushur numrin e përcaktuar prej 300 armësh të dorëzuara me çka do të përfitonin ndihma në kuadër të programit "Armët për zhvillim".

Robert Pajper nga Programi për Zhvillim i OKB-së tha se është vendosur që të shtohen edhe nga 25 mijë dollarë amerikanë për çdo komunë që arrin të përmbushë këtë numër armësh të dorëzuara deri më 30 shtator. Sipas kësaj organizate në duar të qytetarëve këtushëm ndodhen nga 330 mijë deri në 460 mijë armë të paligjshme, shifra këto që nga përfaqësuesit vendorë janë vlerësuar si tepër të larta.

Sipas zëdhënësit të KFOR-it Kris Tompson që nga hyrja e trupave të NATO-s në Kosovë rreth 18 mijë armë të paligjshme janë konfiskuar nga qytetarët gjatë kësaj periudhe.

 

 

Faruk Spahija akuzon individë të policisë së UNMIK-ut për bashkëpunim me ekstremsitët serbë

 

Mitrovicë, 24 shtator 2003 - Kryetari i Asamblesë komunale të Mitrovicës Faruk Spahija, në një konferencë dje me gazetarë, ka denoncuar fushatën serbe për blerjen e pronave të shqiptarëve në pjesën veriore të Mitrovicës.

 

Kjo fushatë ka të vetmin qëllim - spastrimin etnik të kësaj hapësire, tha Spahija, i cili me këtë rast ka akuzuar individë të policisë së UNMIK-ut për bashkëpunim me ekstremsitët serbë, të cilët, sipas tij, janë të interesuar të nxisin dhunë në veri të Mitrovicës.

 

Spahija ka theksuar se elementët ekstremistë serbë janë duke u ricikluar në këtë pjesë të qytetit me qëllim të pengimin të qarkullimit të lirë për banorët shqiptarë që jetojnë në veri të Mitrovicës.

Kryetari i Komunës së Mitrovicës thotë se ka informacione të sigurta se policia e UNMIK-ut provon të negociojë me gjykatat kur është fjala për ekstremistët serbë, edhepse kjo nuk është detyrë e policisë.

Spahija edhe një herë u bëri thirrje qytetarëve të lagjeve veriore të Mitrovicës, që edhe përkundër presionit të vazhdueshëm nga ana e ekstremistëve serbë, të mos i shesin pronat e tyre, sepse kjo sipas tij është çështje kombëtare.

 

Ndërkaq nga Parlamenti dhe Qeveria e Kosovës kërkoi që të merren më seriozisht me problemin e veriut të Kosovës.

 

 

Në Lluzhan të Pejës forcat paqeruajtëse arrestuan tre persona për armëmbajtje ilegale

 

Pejë, 24 shtator 2003 - Në fshatin Lluzhan të Komunës së Pejës paqeruajtësit e KFOR-it kanë bastisur 25 shtëpi të këtij lokacioni. Në aksionin ku kanë marrë pjesë edhe policë ndërkombëtarë janë arrestuar tre persona për armëmbajtje ilegale, si dhe janë konfiskuar një pushkë dhe një revole.

 

 

Millosheviqi është akuzuar për varsjen e Ivan Stambolliqit

 

Beograd, 24 shtator 2003 - Ish-diktatori jugosllav, Sllobodan Millosheviç është paditur në Serbi se ka urdhëruar vrasjen dhe atentatin e dy kundërshtarëve kryesorë politikë.

Akuzat u bënë të ditura nga një prokuror i veçantë në Beograd pas një hetimi të gajtë në krimet që kanë ndodhur në vitin 2000 Millosheviqi që është në gjyq për krime lufte para Gjykatës së Hagës i ka hedhur poshtë akuzat.

Akuza e parë është për urdhërimin e vrasjes së ish presidentit serb, Ivan Stamboliq i cili u rrëmbye dhe u vra tre vjet më parë. Trupi i tij u gjet në një zonë pyjore në Serbinë veriore në fillim të këtij viti.

Millosheviqi gjithashtu akuzohet së bashku më disa aleatë të tij të ngushtë për urdhërimin e atentatit ndaj Vuk Drashkoviqit, udhëheqësit të opozitës.

 

 

Policia shqiptare arrestoi pjesëtarët e një bande të rrezikshme plaçkitësish në Tiranë

 

Tiranë, 24 shtator 2003 - Policia shqiptare arrestoi pjesëtarët e një bande të rrezikshme plaçkitësish në Tiranë, të cilët prej kohësh kërcënonin dhe vendosnin gjoba për biznesmenët në kryeqytet dhe rrethe të tjera të Shqipërisë.

 

Mes katër personave të arrestuar janë dy pjesëtarë të forcave speciale të policisë. Ky grup i grabitësve është arrestuar në kohën kur tentonte të tërhiqte shumën prej 500 mijë dollarësh në formë gjobe prej një pronari të një lokali luksoz në Tiranë.

 

 

Ambasadorët e vendeve anëtare të BE-së u dakorduan për dërgimin e Misionit policor në Maqedoni

 

Bruksel, 24 shtator 2003 - Ambasadorët e vendeve anëtare të Bashkimit Eropian janë dakorduar për elementet bazë të Misionit policor evropian që do të dërgohet në Maqedoni. Parashikohet që rreth 200 policë evropianë të ndihmojnë policinë maqedonase në reformimin e saj.

 

Policët do të jenë të uniformuar dhe do të patrullojnë bashkë me policinë maqedonase, por udhëheqës të aksioneve të mundshme do të jenë policët e Maqedonisë.

 

Ky vendim i ambasadorëve të BE-së është marrë pas kërkesës për një mision të tillë të bërë nga kryeministri i Maqedonisë Branko Cervenkovski. Forcat polcore do të jenë shumkombëshe dhe ky mision pritet të fillojë në dhjetor të këtij viti.

 

 

Robertson u bënë thirrje politikanëve të Ballkanit t'i luftojnë strukturat e krimit të organizuar

 

Shkup, 24 shtator 2003 - Operacioni i fundit i policisë kundër kriminelëve të dyshuar në Maqedoninë Veriore tregon se Qeveria maqedonase e ka mësuar leksionin nga konflikti ndëretnik i vitit 2001 i ka deklaruar gazetës "Dnevnik" të Shkupit, sekretari i përgjithshëm i NATO-s, Xhorxh Robertson.

 

Ai ka nënvizuar se çështja më e rëndësishme është përdorimi proporcional i forcës dhe u ka bërë thirrje politikanëve të Ballkanit t'i luftojnë strukturat shumetnike të kriminalitetit të organizuar. Robertson ka thënë se kriminelët në Ballkan bashkëpunojnë pavarësisht nga përkatësia etnike, ndërkaq politikanët e gjithë Ballkanit ende besojnë se dallimet etnike janë të rëndësishme.

 

 

Papa anulon takimin e përjavshëm

 

Vatikan, 24 shtator 2003 - Zyrtarë në Vatikan kanë bërë të ditur se shëndeti jo i mirë e ka detyruar Papa Gjon Palin e Dytë të anullojë takimin e tij të përjavshëm të së mërkurës.

83-vjaçari thuhet se vuan nga probleme shëndetësore të zorrëve. Por se këto nuk janë serioze.
Papa ka anulluar takimet e tij pak para fillimit të tyre vetëm disa herë gjatë papatit të tij.

 

 

Akuzë tjetër për spiunazh në Guantanamo

 

Guantanamo, 24 shtator 2003 - Një person tjetër që shërbente në bazën e Guantanamos në Kubë është vënë nën akuzat për spiunazh dhe ndihmë armikut, tha Pentagoni.

Ahmad al-Halabi që tashmë po mbahet në burg në Bazën e Forcës Ajrore në Vandenberg u akuzua pasi kohët e fundit ka qenë si përkthyes në bazë, tha zëdhënësi i pentagonit, majori Michael Shavers. Ai është anëtari i dytë i ushtrisë amerikane në bazë të arrestohet për çështje sigurie.

Kapelani i Ushtrisë amerikane, myslimani Jusuf Yee u arrestua në Florida në 10 shtator pasi u kthye nga Guantanamo.

 

 

Trupat izralite kanë vrarë një djalosh 15-vjeçar palestinez në një sulm në Rripin e Gazës

 

Gaza, 24 shtator 2003 – Trupat izralite kanë vrarë sot (e merkurë) një djalosh 15-vjeçar palestinez në një sulm në një kamp refugjatësh në Rripin e Gazës, bëjnë të ditur burimet mjekësore dhe dëshmitarët palestinezë, njofton Rojter. Kjo gjakderdhje është rrjedhojë e dhunës hakmarrëse të ndërsjellë, e cila i ka shuar shpresat për paqen sipas planit amerikan.

 

Ushtria izraelite ka konfirmuar një operacion kundër militantëve në kampin e refugjatëve Rafah në kufi me Egjiptin dhe ka thënë se pesë predha tankesh janë shkrepur pasi ushtarët iu kishin nënshtruar një zjarri të ashpër pushkësh automatike dhe predhash kundërtanke.

 

Ky burim ka thënë gjithashtu se ushtarët kanë kërkuar tunelet, që militantët palestinezë i kanë përdorur për kontrabandim të armëve nga Egjipti, por s’e kanë konfirmuar vdekjen e palestinezit të vrarë. Burimet palestineze thonë se djaloshi i vrarë ka qenë i pararmatosur dhe është vrarë nga një predhë tanku, që ka plagosur edhe 11 persona të tjerë.

 

 

Një çift polak është arrestuar pasi pesë fëmijë të tyre janë gjetur të vdekura në një tinar të lakrave turshi

 

Varshavë, 24 shtator 2003 – Një çift polak janë arrestuar pasi pesë fëmijë të tyre janë gjetur të vdekura në një tinar të lakrave turshi, njofton BBCnews. Prokurorët kanë thënë se autopsia dhe testet e ADN-së kanë konstatuar se viktimat janë fëmijë të këtij çiftit të identifikuar si Jolanta, 38-vjeçare dhe Andërzhej, 44-vjeçar.

 

Fëmijët thuhet se janë mbytur ndërmjet viteve 1992 dhe 2002. Çifti dhe katër fëmijët e tyre të tjerë, të moshës 12 deri në 17-vjeçare, aktualisht jetojnë në fshatin Çerniejou, rreth 175 kilometra në juglindje të Varshavës.

 

Trupat i kanë zbuluar dy fëmijë derisa po luanin në bodrum. Prokurorët kanë thënë se burri e ndien veten të pafajshëm dhe mohon të ketë ditur se gruaja e tij ka qenë shtatzënë.

 

 

Bush e Shirak shprehën dallime të thella në bebatin e OKB

 

Nju Jork, 24 shtator 2003 - Presidenti amerikan Xhorxh Bush dhe homologu i tij francez, Zhak Shirak, i janë drejtuar Asamblesë së Përgjithshme të Kombeve të Bashkuara dhe kanë shprehur dallimet e thella ndërmjet tyre rreth luftës në Irak dhe zhvillimeve pas saj.

Presidenti Bush ishte i palëkundur rreth invazionit të udhëhequr amerikan - dhe këtë e mbrojti edhe në OKB - duke thënë se bota ishte më e mirë pa Saddam Husseinin në pushtet.

Nga ana e tij presidenti francez, Zhak Shirak, nënvizoi përkushtimin e tij për një urdhër botëror shumëpalësh, duke thënë se askush nuk mund të kërkojë të drejtën për përdorimin e dhunës njëanshmërisht.

Ndërkohë presidenti Bush do të vazhdojë përpjekjet e tij që të bindë udhëheqësit botërorë për të përkrahur SHBA-në në Irak.

 

 

Bush mbante fjalimin, ligjvënësit në Kongresin amerikan debatonin rreth politikës në Irak

 

Uashington, 24 shtator 2003 - Ndërsa presidenti mbronte vendimin e tij për të hyrë në luftë në Irak dhe fliste rreth përparimit drejt qëndrueshmërisë dhe demokratizimit në atë vend, demokratët në senat po i bënin sfidë politikës së administratës lidhur me Irakun.

Senatori Patrik Lihaj nga shteti Vermont kritikoi ato që ai i cilësoi si deklarata të paqëndrueshme rreth motiveve të luftës dhe parashikimet çorientuese rreth rreziqeve, që u kanosen ushtarëve amerikanë, dhe kostos së ndërhyrjes ushtarake amerikane në atë vend.

Ligjvënës të tjerë mirëpritën përpjekjet e presidentit Bush për të bindur vende të tjera që të angazhohen më shumë në rindërtimin e Irakut. Megjithatë, disa demokratë kritikuan refuzimin nga presidenti që t’u japë Kombeve të Bashkuara një rol udhëheqës në rindërtimin fizik dhe politik të atij vendi.

 

 

Të pakten një person është vrarë kur një autobus ka rënë në një bombë në Bagdad

 

Bagdad, 24 shtator 2003 – Të pakten një person është vrarë dhe mbi 22 të tjerë janë palagosur kur një autobus është goditur nga një bombë e vënë buzë rruge në qendër të Bagdadit, ka bërë të ditur policia irakiane, njofton BBCnews.

 

Policia dhe dëshmitarët kanë thënë se bomba ka shpërthyer vetëm pesë minuta pasi një patrullë ushtarësh amerikanë kanë kaluar andejpari. Zëdhënësi ushtarak amerikan ka thënë se asnjë ushtar amerikan nuk është lënduar.

 

 

Është arrestuar një i dyshimtë i ri për vrasjen e ministres Ana Lind dhe është liruar i dyshimti i mëparshëm

 

Stokholm, 24 shtator 2003 – Policia suedeze ka deklaruar se ka arrestuar sot heret në mëngjes (e merkurë) një të dyshimtë të ri lidhur me vrasjen e ministres së Jashtme, Ana Lind dhe ka liruar të dyshimtin e mëparshëm, i cili është ndaluar për më shumë se një javë, njofton AP.

 

Në këtë deklartë të policisë nuk jipet identiteti i të arrestuarit dhe as detaje të tjera, por thuhet se arrestimi s'ka qenë dramatik. Thuhet se autoritetet policore kanë "bazë të arsyeshme" të besojnë se i arrestuari është i përzier në vrasje. Po kështu, as identiteti i të dyshimtit të liruar nuk është dhënë kurrrë.

 

 

"Microsoft" mbyll shumicën e faqeve të bisedave të njohura si "chat room"

 

Londër, 24 shtator 2003 - Kompania e shërbimeve kompjuterike "Microsoft" (Majkrosoft) ka bërë të ditur se po i mbyll shumicën e faqeve të bisedave të njohura si "chat room" si dhe gjithashtu do të kufizojë përdorimin e të tjerave

"Microsoft" thotë se ky veprim ka rëndësi për të mbrojtur fëmijët nga pedofilët. Kjo masë hyn në fuqi në 14 tetor.

Vlerësohet se dhjetra për të mos thënë qindra milionë njerëz vizitojnë "chatroomet" çdo muaj, një pjesë e madhe e tyre fëmijë. Një sërë çështjesh që kanë përfunduar edhe nëpër salla gjyqesh kanë demonstruar rrezikun nga pedofilët.

Gjithashtu ka shqetësime se "dhomat e bisedave" përdoren edhe për marrjen e adresave të e-maileve duke dërguar në këto adresa mesazhe të padëshiruara.

"Microsoft" një nga siguruesit më të mëdhenj të shërbimeve në internet thotë se ka arritur koha kur bisedat e pakufizuara të jenë bërë të rrezikshme.

Copyright©2000-2003 Trepca.net - Të gjitha të  drejtat e rezervuara.