Lajme

E marte 23 shtator 2003

Përmbajtja:

• Presidenti Rugova priti koordinatoren rajonale të Bankës Botërore

• Pas takimit me Presidentin Rugova, zv.ministri bullgar paralajmëroi hapjen e një zyre në Prishtinë

• A.Gashi: "Ne besojmë në pavarësinë e Kosovës si faktor stabiliteti të Evropës Juglindore"

• Tiroli i Austrisë do të ndihmojë komunën e Podujevës

• Anëtarët e Komisionit për Kulturë të Parlamentit të Kosovës kanë bërë dje një vizitë pune në Mitrovicë

• Banka Botërore ka dhuruar dy donacione për Kosovën në vlerë prej 4.8 milionë euro

• Ministri i Transportit dhe drejtoresha e Bankës Botërore për Evropën Juglindore përuruan rrugën Lipjan-Magurë

• U rrumbullaksua procesi i certifikimit edhe të pesë komunave

• Në Prishtinë filloi festivali kombëtar i këngëve dhe valleve për fëmijë "Ylberi i Prishtinës"

• Ushtria serbo-malazeze konfirmon arrestimin e një nënkoloneli për spiunazh në favor të Rusisë

• Kryeministri maqedonas ka kërkuar nga BE një mision policor që do të zëvenësonte atë ushtarak "konkordia"

• Qeveria maqedonase pezulloi vendimin e ministrit të arsimit për hapjen e një paralele me mësim në gjuhën shqipe në Manastir

• Vdiq albanologu i njohur Jup Kastrati

• Nuk do të ketë shtet palestinez ndërsa udhëheqja palestineze nuk largohet nga Arafati, kanë thënë Bush e Pauell

• Armata e Ugandës ka shpëtuar 149 fëmijë, që janë mbajtur nga kryengritësit

• Vritet një palestinez dhe një tjetër vdes nga plagët e marra

• Forcat amerikane kanë vrarë 3 persona në një sulm të kombinuar ajror dhe tokësor në Falluxha

• Ish-senatorja Karol Moseli Braun ka hyrë në garën për zgjedhjet presidenciale 2004

• Uragani Marti ka shkaktuar vdekjen e të pakten 3 vetëve në brigjet e Pacifikut në Meksiko

• Rreth 50 vetë kanë humbur jetën dhe 30 të tjerë janë lënduar në një aksident rrugor në Ugandë

• Trupat izraelite kanë vrarë një militant islamik, që orvatej të depërtonte në vendbanimin ebrait Dugit

• Kondoliza Rajs thotë se plani francez për vetëqeverisjen irakiane nuk mund të funksionojë

• Anan - Do të rishikojmë praninë në Bagdad

• Presidenti Bush mban sot një fjalim para Kombeve të Bashkuara

• NATO emëroi ministrin e jashtëm holandez në postin e sekretarit të përgjithshëm të Aleancës Veriatlantike

• Të paktën një polic dhe tre militantë janë vrarë sot në një incident në Arabinë Saudi

Presidenti Rugova priti koordinatoren rajonale të Bankës Botërore

 

Prishtinë, 23 shtator 2003 - Presidenti Rugova priti sot zonjën Orsalia Kalancopulos, koordinatore rajonale për Evropën Juglindore të Bankës Botërore, e cila ka ardhur në Kosovë me një ndihmë konkrete nga kjo Bankë. Në këtë takim u bisedua për mundësitë e zhvillimit të sektorëve të ndryshëm që do të bëjnë të mundur punësim më të madh dhe që do ta nxisin zhvillimin e Kosovës, tha Presidenti Rugova.   Ai pasi falenderoi zonjën Kalancopulos për ndihmën e dhënë për Kosovën, tha se shpreson që Banka Botërore të vazhdojë ta ndihmojë edhe më tutje Kosovën.

   
Presidenti shfaqi shpresën që një ditë, sa më shpejt të jetë e mundur, Kosova të jetë anëtare e kësaj Banke.

  

Zonja Kalancopulos, pasi shprehu kënaqësinë që sërish ndodhet në Kosovë, tha se shpreson që Banka Botërore do të jetë në gjendje të bëhet një partner i rëndësishëm në zhvillimin e Kosovës.

 

Ajo shtoi se rruga është e hapur, por duhet lëvizur përpara që të identifikohen sektorët për investime të mundshme, për të rritur numrin e vendeve të punës në Kosovë.

 

 

Pas takimit me Presidentin Rugova, zv.ministri bullgar paralajmëroi hapjen e një zyre në Prishtinë

 

Prishtinë, 23 shtator 2003 - Presidenti i Kosovës Ibrahim Rugova priti sot zëvendësministrin e Punëve të Jashtme të Bullgarisë Ivan Petkov, i cili ndodhet për një vizitë në Kosovë.

Presidenti Rugova në takimin me diplomatin bullgar foli për zhvillimet dhe progresin e arritur në Kosovë, për gjendjen e sigurisë dhe për objektivat e qeverisë dhe institucioneve kosovare, si dhe për integrimin e grupeve etnike në shoqërinë e Kosovës. Presidenti theksoi se aktualisht po punohet me UNMIK-un për të pasur një bashkëpunim më të ngushtë e më produktiv.

Edhe në këtë takim Rugova kërkoi që Kosova të njihet sa më shpejt si vend i pavarur e i integruar në Bashkimin Evropian, në NATO dhe në miqësi me SHBA-të.

Me këtë rast Presidenti Rugova falenderoi zv/ministrin bullgar për bashkëpunimin e mirë me Bullgarinë, për ndihmën që ky vend i ka dhënë Kosovës pas luftës dhe kërkoi edhe një herë përkrahjen e Bullgarisë, sepse ajo vitin e ardhshëm do të jetë kryesuese e radhës e OSBE-së.

Nga ana e tij, zv.ministri i jashtëm bullgar Petkov, pasi e falenderoi Preisentin Rugova për pritjen, tha se pati një takim shumë të frytshëm me Presidentin. Ai tha se Bullgaria e sheh si shumë të rëndësishëm krijimin e paqes dhe të sigurisë në Kosovë.

 

"Ne jemi shumë të gëzuar që dialogu do të filloje shumë shpejt. Bullgaria, e cila do të jetë kryesuese e radhës së OSBE-së nga fillimi i janarit të vitit të ardhshëm, është shumë e interesuar që të ketë kontakte të afërta, që të jetë sa më e informuar", theksoi diplomati bullgar.

 

Ai paralajmëroi se Bullgaria do të hapë në Kosovë një zyrë të ndërlidhjes, e cila do të hapet shumë shpejt, duke shtuar se Sofja zyrtare tashmë ka përcaktuar një staf diplomatësh me eksperiencë, të cilët do të vijnë në Prishtinë në fillim të tetorit.

"Ne biseduam edhe për ngritjen e nivelit të bashkëpunimit ekonomik nga të dy anët, si p.sh. eksportimin e energjisë elektrike në Kosovë, dhe disa fusha tjera të bashkëpunimit. Pra, ne jemi të interesuar për paqe, stabilitet dhe siguri këtu", përfundoi deklaratën e tij zv.ministri i jashtëm bullgar Petkov.

 

 

A.Gashi: "Ne besojmë në pavarësinë e Kosovës si faktor stabiliteti të Evropës Juglindore"

 

Uashington, 23 shtator 2003 - I pyetur se si ka ndikuar për çështjen e Kosovës zhvendosja e vëmendjes të politikës së jashtme amerikane, Alush Gashi, sekretar për Marrëdhënie me Jashtë i LDK-së thotë se nuk mendon që Kosova ka qenë lënë pasdore, dhe nuk mendon që Shtetet e Bashkuara të Amerikës e kanë zhvendosur fokusin.

"Natyrisht, angazhimi numerik është më i madh në atë pjesë të botës, (shënim:Irak), por ne kemi një mision të shkëlqyeshëm amerikan në Prishtinë, kemi një forcë ushtarake substanciale, kemi investime amerikane me përmbajtje në Kosovë dhe kemi në këtë fazë një ndihmë për zgjedhjen e statusit final, kështu që unë mendoj se vëmendja amerikane ka qenë e vazhdueshme", tha Alush Gashi në një intervistë për "Zërin e Amerikës".

Në lidhje me idenë që Bashkimi Evropian të marrë përsipër forcat paqeruajtëse në Kosovë, Alush Gashi tha se është fakt që Kosova është në Evropë, por gjatë këtij 100 vjeçari, fatkeqësisht Evropa nuk ka arritur të zgjidhë asnjë konflikt evropian. Sipas tij, është e domosdoshme një fuqi substanciale amerikane për mbajtjen e paqes në Kosovë dhe garancinë e demokracisë në Evropën Juglindore.

Duke folur për fillimin e bisedimeve midis Beogradit dhe Prishtinë, Alush Gashi tha se Kosova i ka të gjitha kushtet që debatohen brenda institucioneve për t'i shprehur pikëpamjet. "Presidenti, kryeministri dhe kuvendi në tërësi, janë të bindur që Kosova është përpjekur që të jetë e pavarur dhe të vazhdojë ndërtimin e vet, ashtu si vendet e tjera", tha ai dhe shtoi se, "pa një përgatitje shumë të fuqishme, ne kemi shumë rezerva sa i përket takimit optik në mes të dy palëve".

Ai tha se është i bindur se nevojitet ndërmjetësimi amerikan dhe garanca amerikane për implementim eventual të një marrëveshjeje teknike, e cila, sipas tij, duhet të zhvillohet në nivel të nëndrejtorëve.
"Ne besojmë në pavarësinë e Kosovës si faktor stabiliteti të Evropës Juglindore, ne besojmë në pavarësi, si mundësi e hapjes së investimeve", tha Gashi, duke qenë i bindur se "çështja e statusit do të zgjidhet shumë më shpejt se sa thonë të tjerët".

 

 

Tiroli i Austrisë do të ndihmojë komunën e Podujevës

 

Podujevë, 23 shtator 2003 – Në kuadër të bashkëpunimit në mes të komunës së Podujevës me Tirolin e Veriut të Austrisë, këto ditë në Podujevë po qëndron një delegacion i udhëhequr nga ministri Peter Logar dhe bashkëpunëtorja Melita Duma.

Ministri Logar dhe zonja Duma sot u pritën nga Kryetari i komunës së Podujevës Agim Veliu. Në këtë takim u bisedua për vazhdimin e bashkëpunimit mes Podujevës dhe Tirolit i cili po intensifikohet.

 

Ministri Logar njoftoi për ndihmat që pritet këto ditë të arrijnë për shkollën shqipe si dhe për një ndihmë tjetër për projektin e liqenit të Batllavës, përkatësisht zhvillimin e atij rajoni bujqësor, blegtoral e turistik, deklaroi Veliu.

Kryetari i komunës së Podujevës e njoftoi ministrin Logar me përparimet dhe projektet që janë realizuar e po realizohen në infrastrukturë dhe fusha tjera në komunën e Podujevës.

 

 

Anëtarët e Komisionit për Kulturë të Parlamentit të Kosovës kanë bërë dje një vizitë pune në Mitrovicë

 

Mitrovicë, 23 shtator 2003 - Anëtarët e Komisionit për Kulturë të Parlamentit të Kosovës, me në krye Edi Shukriun, kanë bërë dje një vizitë pune në komunën e Mitrovicës dhe kanë biseduar edhe me Faruk Spahinë, kryetar i Kuvendit të Komunës.

Faruk Spahija u ka thënë parlamentarëve se udhëheqja komunale është e interesuar që të vazhdojë realizimin e mëtutjeshëm të projektit të qendrës së kulturës "Rexhep Mitrovica", me çka do të krijoheshin kushte për zhvillimin e mirëfilltë të krijimtarisë kulturore dhe Mitrovica të bëhet një qendër evropiane e kulturës, duke kërkuar kështu nga anëtarët e Komisionit që të përkrahin këtë ide dhe të angazhohen tek institucionet e vendit që të ndihmojnë materialisht në realizimin e saj.

Poashtu, Spahija ka thënë se institucionet e Kosovës duhet t'u japin prioritet projekteve kulturore nga komuna e Mitrovicës.

Anëtarët e Komisionit për Kulturë të Parlamentit të Kosovës kanë biseduar në Qendrën e Kulturës edhe për problemet tjera në fushën e kulturës, me përgjegjësit për kulturë të komunës dhe me këtë rast është shtruar kërkesa për themelimin e Qendrës për mbrojtjen e trashëgimisë kulturore, ngase kjo trevë është e pasur me trashëgimi kulturore.

 

 

Banka Botërore ka dhuruar dy donacione për Kosovën në vlerë prej 4.8 milionë euro

 

Prishtinë, 23 shtator 2003 - Banka Botërore ka dhuruar dy donacione për Kosovën në vlerë prej 4.8 milionë euro. Donacioni i parë i Bankës Botërore që ndihmon drejtpërdrejt konsolidimin e buxhetit të Kosovës është 3.7 mulionë euro, ndërkaq donacioni i dytë që është destinuar për të ndihmuar projektin e ndihmës teknike të sektorit të energjisë kap shumën prej 1.1 milion euro.

 

Ky donacion është nënshkruar nga udhëheqësi i Shtyllës së Katërt të UNMIK-ut, Nikolaus Lambsdorf dhe drejtoresha e koordinatorja rajonale e Bankës Botërore për Evropën Juglindore Orsalia Kalacupulos. Banka Botërore si institucion i fuqishëm financiar do të vazhdojë ta ndihmojë Kosovën edhe në vitet e ardhshme.

Zonja Kalacupulos shtoi se projekti për nënshkrimin e marrëveshjes së sipërshënuar ka të bëjë me asistencën në zhvillimin e kapacitetit për shkëmbim të qëndrueshëm komercial të energjisë në sistemin rajonal, me optimizmin e përdorimit të kapaciteteve ekzistuese e gjeneruese nëpërmjet shpërndarjes ekonomike si dhe me vendosjen e kornizës për tërheqjen e investimeve.

 

 

Ministri i Transportit dhe drejtoresha e Bankës Botërore për Evropën Juglindore përuruan rrugën Lipjan-Magurë

 

Lypjan, 23 shtator 2003 - Ministri i Transportit dhe Posttelekomunikacionit të Kosovës, Zef Morina dhe drejtoresha e Bankës Botërore për Evropën Juglindore, zonja Orsalia Kalacupulos përuruan dje rrugën Lipjan-Magurë. Për këtë aks rrugor të gjatë 10.3 km.

 

Banka Botërore dhe Ministria e Transportit dhe Posttelekomit të Kosovës kanë investuar 650 mijë euro. Kjo rrugë lidh Aeroportin e Prishtinës me magjistralen Pejë - Prishtinë dhe Prishtinë - Shkup. Këtë projekt e ka ndihmuar edhe Qeveria holandeze.

Ministri Morina tha se ndërtimi i kësaj rruge është rezultat i angazhimit të vazhdueshëm të kësaj Ministrie në ngritjen e një infrastrukture të mirëfilltë rrugore në Kosovë.

Ndërkaq, drejtoresha e Bakës Botërore për Evropën Juglindore, me këtë rast tha se është e bindur se kjo rrugë do të jetë edhe një kontribut i cili do të ndikojë në zhvillimin e gjithmbarshëm të Kosovës. Ajo shtoi se Banka Botërore edhe mëtej do ta mbështesë infrastrukturën rrugore në Kosovë.

 

 

U rrumbullaksua procesi i certifikimit edhe të pesë komunave

 

Prishtinë, 23 shtator 2003 - Procesi i certifikimit të kuvendeve komunale u rrumbullakësua dje me certifikimin e pesë komunave: Vushtrrisë, Dardanës, Zubin Potokut, Deçanit e Skënderaj. Megjithëse Artana (Novobërda) ka mbetur ende pa u certifikuar.

 

"Ministria e Ekonomisë dhe Financave të Kosovë me struktura të tjera dhe në bashkëpunim me tenderin ndërkombëtar do të bëjnë gjithëçka të jetë e mundur që edhe kjo komunë të fitojë të drejtën e certifikimit", tha ministri për Ekonomi dhe Financa, Ali Sadrija. Ai shtoi se kuvendet komunale të cilat janë certifikuar kanë kaluar në disa faza.

 

 

Në Prishtinë filloi festivali kombëtar i këngëve dhe valleve për fëmijë "Ylberi i Prishtinës"

 

Prishtinë, 23 shtator 2003 - Festivali treditor kombëtar i këngëve dhe valleve për fëmijë "Ylberi i Prishtinës" ku marrin fëmijët nga të gjitha trojet shqiptare, ka filluar dje pasdite në Prishtinë me një defilim të të gjitha ansambleve pjesëmarrëse para bustit të Skënderbeut me mesazhin: "Për paqe dhe dashuri të fëmijëve kudo në botë".

 

 

Ushtria serbo-malazeze konfirmon arrestimin e një nënkoloneli për spiunazh në favor të Rusisë

 

Beograd, 23 shtator 2003 - Ministria e Mbrojtjes e Serbisë dhe e Malit të Zi ka njoftuar se është arrestuar nënkoloneli Dragolub Zhivkoviq nën dyshimin se ka kryer vepër penale të spiunazhit, prezentimit të rremë dhe falsikifikimit të dokumenteve. Zhivkoviqit i është caktuar masa e paraburgimit prej 30 ditësh.

Një gjykatë ushtarake në Beograd sot ka hapur procedurën hetimore kundër Zhuivkoviqit për vepër penale.
Mediat serbe, ndërkaq njoftojnë se disa oficerë të ushtrisë serbo-malazeze janë ndaluar nën dyshimin se me vite janë marrë me spiunazh në dobi të Rusisë.

Analistët serbë nuk shprehin habinë pse oficerët serbë kanë spiunuar për Rusinë, posaçërisht në kontekstin e reformës së armatës serbo-malazeze.

Kohë më parë flitej se Rusia qendrën e vet të spiunazhit për Ballkanin e ka transferuar nga Sofja në Beograd. Ndërkaq, ish-shefi i shërbimit sekret ushtarak jugosllav (gjatë kohës sa Koshtunica ishte president) Aca Tomiq është shkolluar në Rusi.

 

 

Kryeministri maqedonas ka kërkuar nga BE një mision policor që do të zëvenësonte atë ushtarak "konkordia"

 

Luksemburg, 23 shtator 2003 - Kryeministri maqedonas Branko Cërvenkovski, përmes një letre dërguar përfaqësuesit të lartë të BE-së për Politikë të Jashtme dhe të Sigurisë, Havier Solana, ka kërkuar nga Bashkimi Evropian një mision policor.

Burimet qeveritare në Shkup thonë se ky mision do të duhet të zëvendësonte atë ushtarak "Konkordia".
Zyra e z. Solana, duke konfirmuar kërkesën zyrtare të kryeministrit të Maqedonisë thotë se kanë filluar të bëhen përgatitjet për funksionimin e misionit policor.

Kristina Galak, zëdhënëse e Havier Solanës, tha për BBC-në se detajet po shqyrtohen dhe shpresohet se ministrat e BE-së të marrin vendim për misionin e ri të BE-së në fund të këtij muaji.

Bëhet e ditur se planin e misionit policor të BE-së për në Maqedoni do ta shqyrtojnë sot ambasadorët e BE-së në Bruksel.

 

 

Qeveria maqedonase pezulloi vendimin e ministrit të arsimit për hapjen e një paralele me mësim në gjuhën shqipe në Manastir

 

Shkup, 23 shtator 2003 - Qeveria e Maqedonisë ka verifikuar vendimin e zëvendësministrit të arsimit për pezullimin e vendimit të ministrit të arsimit Aziz Pollozhani për hapjen e një paralele me mësim në gjuhën shqipe në Manastir.

 

Zëdhënësi i Qeverisë Sasho Çollakovski ka thënë se është tërhequr edhe vendimi i ministrit Pollozhani për rikthimin e paraleleve me mësim në gjuhën shqipe në Shkollën e Mesme Ekonomike në Shkup nga një shkollë tjetër që nuk frekuentohej nga nxënësit shqiptarë.

Nga ana tjetër Lidhja e Arsimtarëve Shqiptarë ka mbështetur kërkesat e nxënësve shqiptarë të Shkollës Ekonomike në Shkup që të kthehen në objektin shkollor ku kishin mësuar para disa viteve.

Ndërkaq, ministri i Arsimit Aziz Pollozhani, tha se duke marrë parasysh situatën e krijuar në Manastir rreth hapjes së këtyre paraleleve me mësim në gjuhën shqipe në bashkëpunim me strukturat më të larta të BDI-së u mor vendimi për pezullimin e kësaj paralele me mësim në gjuhën shqipe në Manastir, duke kërkuar mundësitë që kjo çështje të zgjidhet në mënyrë paqësore.

 

 

Vdiq albanologu i njohur Jup Kastrati

 

Shkodër, 23 shtator 2003 - Pas një sëmundjeje të rëndë dje vdiq në moshën 78-vjeçare gjuhëtari i njohur shqiptar Dr. Jup Kastrati. Profesor Jup Kastrati është ndër emrat më të shquar të shkences ndër gjithë shqiptarët. Vepra e tij ka lënë gjurmë të pashlyera në historinë e albanalogjisë dhe te studimeve gjuhësore.

Ai ka marrë mjaft tituj nderi nga shumë universitete në mbarë botën. Mesues i Popullit, Mjeshter i madh i Punes "Akorduar nga Presidenti i Republikes) dhe qytetar nderi i Shkodres jane vetem disa nga titujt qe gezonte profesori i nderuar.

Me qindra e qindra breza mësuesish të gjuhës dhe të letërsisë shqipe janë diplomuar nga Pr. Jup Kastrati. Vepra e tij me madhore është "Studime albanalogjike", një vepër voluminoze që është edhe studimi i jetës së tij.

 

Ndërsa ka një sërë studimesh e monografish për autorë të ndryshem, gjuhëtarë dhe shkrimtarë shqiptarë nder te cilet spikatin monografite per Faik Konicen, Jeronim De Raden dhe autore te tjere.

 

 

Nuk do të ketë shtet palestinez ndërsa udhëheqja palestineze nuk largohet nga Arafati, kanë thënë Bush e Pauell

 

Uashington, 23 shtator 2003 - Nuk do të ketë shtet palestinez ndërsa udhëheqja palestineze nuk mposht terrorizmin dhe nuk largohet nga Jaser Arafati, kanë paralajmëruar të martën Presidenit amerikan Bush dhe sekretari i Shtetit Pauell.

"Në interesin e të gjithëve është që të realizohet shteti palestinez", ka thënë Bush në një bisedë për televizionin Foks, duke shtuar se kjo "nuk do të ndodhë ndërsa bashkëbiseduesi, ai që të quhet përfaqësues i popullit palestinze, të mos luftojë kundër terrorizmit".

SHBA-të dëshirojnë që qeveria e palestineze të largohet nga "intrigat" e Arafatit nëse don të realizojë shtetin palestinez, ka thënë sekretari amerikan i Shtetit. Kolin Pauell ka theksuar se "Arafati nuk është partner i besueshëm për paqe".

 

 

Armata e Ugandës ka shpëtuar 149 fëmijë, që janë mbajtur nga kryengritësit

 

Kampala, 23 shtator 2003 – Armata e Ugandës ka shpëtuar 149 fëmijë, që janë mbajtur në pjesën veriore të vendit, ku vepron Armata kryengritëse e rezistencës, njofton BBCnews. Zëdhënësi i ushtrisë ugandeze ka thënë gjithashtu se gjatë operacionit njëjavor forcat qeveritare kanë vrarë 24 kryengritës, kurse aramata ka humbur tre ushtarë. Njoftohet se fëmijët janë lënë nga kryengritësit pasi armata kishte rrethuar ata në distriktet Gulu, Kitgum dhe Pader.

 

 

Vritet një palestinez dhe një tjetër vdes nga plagët e marra

 

Gaza, 23 shtator 2003 – Sipas njoftimeve më të reja të autoriteteve palestineze të informacionit (IPC), forcat izraelite kanë vrarë sot (e martë) një palestinez afër qytetit Beit Lahia në veri të Rripit të Gazës.

 

Burimet e sigurimit palestinez kanë thënë se trupat izraelite të stacionuara në koloninë hebraike Dugit, afër qytetit Beit Lahia, kanë hapur zjarr në shtëpitë palestineze dhe kështu kanë vrarë një qytetar palestinez, të quajtur Marvan Najar, 19-vjeçar.

Ndërkaq, burinmet izraelite kanë thënë se palestinezi i armatosur është vrarë duke u orvatur të depërtojë në koloninë hebraike Dugit. I njëjti burim palestinez bën të ditur gjithashtu se po sot në Nablus ka vdekur edhe një palestinez nga plagët e marra nga të shtënat e forcave izraelite një vit më parë.

 

 

Forcat amerikane kanë vrarë 3 persona në një sulm të kombinuar ajror dhe tokësor në Falluxha

 

Falluxha, 23 shtator 2003 – Policia irakiane ka thënë se forcat amerikane kanë kryer sot heret në mengjes (e martë) një sulm të kombinuar ajror dhe tokësor në Falluxha dhe gjatë këtij operacioni kanë vrarë tre persona dhe kanë plagosur edhe tre të tjerë, njofton AP.

Ushtria amerikane ka deklaruar se di vetëm për një të vrarë. Sipas zëdhënësit ushtarak amerikan, Nikol Thopson ky operacion ka filluar pasi trupat amerikane janë sulmuar. Trupat tokësore kishin bërë thirrje për ndihmë ajrore pasi sulmuesit ishin ndeshur me ta. Gjatë luftimeve është vrarë një luftëtar, ka thënë ai.

Incidenti ka ndodhur në al-Sjr, fshat 9 mila në veri ta qytetit Falluxha. Rreth 20 minuta më vonë janë dëgjuar tri shpërthime të veçanta. Dy të vrarë janë sjellë në spital. Kishin vdekur para se të arrinin në spital. Një i lënduar tjetër ka vdekur në spital . Ishin tre të lënduar, ka thënë një lejtnant policie me emrin Nabil.

 

 

Ish-senatorja Karol Moseli Braun ka hyrë në garën për zgjedhjet presidenciale 2004

 

Uashington, 23 shtator 2003 – Ish-senatorja e shtetit amerikan Illinois, Karol Moseli Braun, ka hyrë zyrtarisht në garën për zgjedhjet presidenciale amerikane të vitit 2004 dhe kjo është gruaja e parë, që hyn në një garë të tillë, njofton BBCWorld.

 

Znj. Braun ka shpallur dje në Universitetin e Uashingtonit vendimin e saj për të kërkuar nominimin demokratik si rivale e Xhorxh Bushit. Komentatorët, zonjës Braun, që është gruaja e parë zezake e zgjedhur në senatin amerikan, nuk i japin shansë për të fituar nominimin.

 

 

Uragani Marti ka shkaktuar vdekjen e të pakten 3 vetëve në brigjet e Pacifikut në Meksiko

 

Meksiko, 23 shtator 2003 - Uragani Marti ka shkaktuar vdekjen e të pakten tre vetëve në brigjet e Pacifikut në Meksiko, njofton BBCWorld. Uragani ka kaluar mbrëmë gadishullin Baxha të Kalifornisë.

 

Erërat e fuqishme, që po lëvizin me shjpejtësi prej 140 km në orë kanë shkaktuar ndërprejen e energjisë elektrike dhe të ujësjellësit, kurse shirat e rrëmbyeshme kanë shkaktuar vershime në qytetet bregdetare. Uragani Marti ishte pothuaj me fuqi të njëjtë me uraganin Izabel në bregdetin lindor amerikan, që shkatoi vdekjen e të pakten 28 vetëve.

 

 

Rreth 50 vetë kanë humbur jetën dhe 30 të tjerë janë lënduar në një aksident rrugor në Ugandë

 

Kampala, 23 shtator 2003 - Rreth 50 vetë kanë humbur jetën dhe 30 të tjerë janë lënduar në një aksident rrugor afër kufirit të Ugandës me Ruandën, ku një autobus është pëplasur në një kamion, njofton BBCWorld.

 

Autobusi udhëtonte nga Burundi dhe transportonte shumë nxënës ruandezë dhe burundianë, që po ktheheshin të mësojnë në Ugandë.

 

Një kamion, që transportonte thasë me misër në Burundi, ndihmë e Kombeve të Bashkuara, është përplasur me një autobus, që shkonte për Kjonjo, 4 km nga qyteti ndërkufitar Ruandë-Ugandë, Gatuna. Shoferët e të dy automjeteve kanë vdekur në vend.

 

 

Trupat izraelite kanë vrarë një militant islamik, që orvatej të depërtonte në vendbanimin ebrait Dugit

 

Gaza, 23 shtator 2003 – Trupat izraelite kanë vrarë sot (e martë) një militant islamik, i cili është orvatur të depërtojë në vendbanimin ebrait në Rripin e Gazës, njofton Rojter.

 

Incidenti ka ndodhur pasi Izraeli ka refuzuar propozimin e presidentit palestinez Jaser Arafat për armëpushim të kushtëzuar.

 

Xhihadi islamik, një nga grupet militante që Uashingtoni u ka kërkuar të ndërprejnë dhunën në favor të shtetësisë palestineze sipas planit amerikan, ka thënë se palestinezi i armatosur është vrarë jashtë vendbanimit hebraik Dugit.

 

 

Kondoliza Rajs thotë se plani francez për vetëqeverisjen irakiane nuk mund të funksionojë

 

Uashington, 23 shtator 2003 - Këshilltarja e Presidentit Bush për Çështje të Sigurisë, Kondoliza Rajs thotë se plani francez për vetëqeverisjen irakiane, nuk mund të funksionojë.

Presidenti francez, Zhak Shirak, ka propozuar një plan dyfazësh për Irakun: në fillim të bëhet një transferim simbolik i sovranitetit tek Këshilli Qeverisës i vendit dhe pastaj, të bëhet transferimi real i pushtetit në duart e irakjanëve brenda gjashtë deri nëntë muajsh.

Znj. Rajs tha se plani francez për t'ua dorëzuar pushtetin personave që nuk janë zgjedhur përmes një procesi demokratik, nuk do të funksiononte.

Ajo deklaroi se Franca duhet të vendosë vetë se çfarë do të sjellë në sallën e Këshillit të Sigurimit, por shtoi se një rezulotë e mundshme për Irakun, duhet të sigurojë një transferim të rregullt të pushtetit.

 

 

Anan - Do të rishikojmë praninë në Bagdad

 

Nju Jork, 23 shtator 2003 - Sekretari i përgjithshëm i Kombeve të Bashkuara, Kofi Annan tha se organizata e tij do të rivlerësojë praninë e saj në Irak pasi një vetëvrasës me bombë e vuri në shënjestër selinë e OKB-së në Bagdad, duke vrarë veten dhe një roje irakiane.

Sekretari i përgjithshëm tha se zyrtarët e OKB-së po takohen për të diskutuar masat që duhet ndërmarrë pas sulmit të fundit me bombë në afërsi të selisë së tyre në Bagdad.

 

 

Presidenti Bush mban sot një fjalim para Kombeve të Bashkuara

 

Uashington, 23 shtator 2003 - Këshilltarja amerikane e Sigurimit Kombëtar, Kondoliza Rajs, e cilëson fjalimin që do ta mbajë Presidenti Bush para Kombeve të Bashkuara si një thirrje për veprim.

"Në fjalimin e tij, Presidenti do të diskutojë shumë prej sfidave, me të cilat bota përballet sot. Ai do t’i bëjë thirrje komunitetit ndërkombëtar që të marë masa për ta bërë botën një vend më të sigurtë e më të mirë", thotë ajo.

Këshilltarja Rajse tha se Presidenti Bush do të përqëndrohet në tri fusha: në nevojën për të zhdukuar armët e shkatërrimit në masë, në ndalimin e skllavërisë dhe formave të tjerë të shfrytëzimit njerzor, dhe në rindërtimin e Irakut e të Afganistanit.

 

 

NATO emëroi ministrin e jashtëm holandez në postin e sekretarit të përgjithshëm të Aleancës Veriatlantike

 

Bruksel, 23 shtator 2003 - NATO emëroi ministrin e jashtëm holandez, Jap de Hop Shefer, në postin e sekretarit të saj të përgjithshëm. Ambasadorë nga 19 vende të NATO-s e bënë mbrëmë këtë zgjedhje.

Zoti de Hop Shefer tha se dëshëron të shërojë marrëdhëniet e acaruara diplomatike ndërmjet Shteteve të Bashkuara dhe pjesës më të madhe të Evropës, që u shkaktuan nga lufta në Irak.

Zoti Shefer është diplomat karriere dhe udhëheqës politik në Holandë. Ai do të zëvendësojë më 1 janar Sekretarin e Përgjithshëm, Xhorxh Robertson.

 

 

Të paktën një polic dhe tre militantë janë vrarë sot në një incident në Arabinë Saudi

 

Riad, 23 shtator 2003 - Të paktën një polic saudit dhe tre militantë janë vrarë sot gjatë të shtënave me një person të armatosur në jug të Arabisë Saudite.

Njoftohet se pesë militantë janë involvuar në atë incident, në të cilin katër policë janë lënduar lehtë.
"Dy nga terroristët janë arrestuar, ndërkaq tre prej tyre janë vrarë", thuhet në një njoftim të Ministrisë së Brendshme saudite, njofton Rojter.

Copyright©2000-2003 Trepca.net - Të gjitha të  drejtat e rezervuara.