Z. MORINA: Ka gjasë që në vitin e ardhshëm të vazhdohet ndërtimi i rrugës që lidh Mitrovicën me Podujevën përmes Shalës së Bajgorës

Mitrovicë, 23 shtator 2003 / Hysni SYLA - Kryetari i Kuvendit të Komunës, Faruk Spahija, me bashkëpunëtorë, ka pritur Ministrin e Transportit dhe të Telekomunikacionit Zef Morina dhe bashkëpunëtorët e tij, me ç’rast është biseduar për mundësinë e zgjidhjes së problemeve të ndryshme infrastrukturës rrugore dhe të telekomunikacionit në komunën e Mitrovicës.

 

Fillimisht kryetari Spahija ka falënderuar Ministrin Morina për mirëkuptimin që Minstria që ai e udhëheq ka treguar për kërkesat e pushtetit lokal me qëllim të zgjidhjes së problemeve të shumta  në komunë. Kryetari Spahija me këtë rast ka veçuar dy projekte me rëndësi të posaçme, duke kërkuar nga  Ministri Morina që të ndihmojë në realizimin e tyre.

 

Fjala është për vazhdimin e rrugës që lidh Mitrovicën me Podujevën dhe të asaj që lidh tri fshatrat shqiptare të komunës së Albanikut me Mitrovicën, përmes Shalës së Bajgorës. Në vazhdim , kryetari i Ekzekutivit të Kuvendit të Komunës, Mustafë Pllana e ka njoftuar Ministrin Morina me projektet tjera prioritare të komunës, të cilat nuk mund të realizohen pa ndihmën e Ministrisë së Transportit dhe Telekomunikacionit.

 

Ministri Zef Morina ka shprehur gadishmërinë e Ministrisë së tij që të ndihmojë në finansimin e projekteve të ofruara, duke shtuar se Mitrovica ka probleme të shumta dhe se ajo  duhet të ketë prioritet në zgjidhjen e tyre, në mënyrë që sërish të bëhet qendër e zhvilluar e vendit.

 

Me këtë rast, Ministri Morina ka thënë se mund të realizohen gjatë këtij viti disa projekte më të vogla, por të rëndësishme, ndërkohë që atyre  kapitale do t’u jipet prioritet për vitin e ardhshëm. Në këtë kontekst, Morina ka thënë se ka gjasë që në vitin e ardhshëm të vazhdohet ndërtimi i rrugës që lidh Mitrovicën me Podujevën përmes Shalës së Bajgorës.

 

Në takim është biseduar edhe për ndërhyrjen ilegale të Post Telekomot të Serbisë në ate të Kosovës dhe me këtë rast sërish është dënuar ashpër një veprim i tillë. Ministri Morina ka thënë se ai ka reaguar ashëpr tek strukturat e UNMIK-ut dhe tek kryeadministratori Hollkeri lidhur me këtë çështje, duke kërkuar zgjidhjen e këtij problemi  dhe ka vlerësuar se UNMIK-u po vepron ngadal në këtë drejtim.

Copyright©2000-2003 Trepca.net - Të gjitha të  drejtat e rezervuara.