E hëne 22 shtator 2003

22.09.2003 - Trepca.net

Lajme

E hëne 22 shtator 2003

Përmbajtja:

Presidenti Rugova priti në një takim lamtumirës komandantin e KF0R-it Fabio Mini
I. Rugova: Kolonel Krasniqi është njëri ndër heronjtë e Kosovës
Kazlas: Shkalla e krimit në Kosovë më e ulët se në Stokholm
Në Prishtinë të mërkurën do t'i fillojë punimet konferenca rajonale për mjedisin
Tribunali i Hagës ka refuzuar kërkesat e Haradin Balajt dhe të Isak Musliut që të mbrohen në liri
Në Mitrovicë filloi procesi gjyqësor kundër dy serbëve të akuzuar për sulme kundër policisë së UNMIK-ut
Bordi i drejtorëve kërkon prej qytetarëve të Gjilanit që të lirohen nga armët ilegale
Grupi i Kontaktit të martën do të diskutojë në Nju-Jork detajet rreth dialogut ndërmjet Prishtinës dhe Beogradit
Zëdhënësi i UNMIK-ut thotë se bisedimet ndërmjet Prishtinës dhe Beogradit janë një dritare e rastit
Në Kosovë me aktivitete të shumta u shënua Dita Ndërkombëtare e Paqes
Më Gjermani përfundoi konferenca e pestë për investime në Kosovë
Një delegacion i Parlamentit të Kosovës nisi një vizitë në Gjermani
Viti i parë akademik i Universitetit amerikan në Kosovë fillon 26 tetor
R. Sheqerinska: Hapja e paraleleve për mësim në gjuhën shqipe është pjesë e dispozitave kushtetuese
Zëvendësministri maqedonas i arsimit thotë se në Manastir nuk do të ketë paralele të mesme në gjuhën shqipe
Partitë e koalicionit qeveritar në Maqedoni e kundërshtojnë vendimin për mbylljen e paraleles shqipe në Manastir
PDSH-ja refuzoi koalicionin e afruar nga PVD-ja për qeverisje në pushtetin lokal në Preshevë
Dy kolonelë dhe një nënkolonel të ushtrisë serbo-malazeze janë arrestuar për spiunazh për një vend të Lindjes
NATO sot do të bëjë të ditur ardhjen e ministrit të jashtëm holandez në krye të Aleancës
Të pakten 7 vetë janë vrarë dhe 31 të tjerë janë plagosur në tri shpërthime të veçanta bombash në Kinë
Forcat izraelite kanë vrarë një militant islamik të Hamasit në Hebron
Nga një autobombë janë vrarë dy vetë në Bagdad dhe janë plagosur 8 të tjerë
Shirak tha se Franca nuk do përdorë veton
Në Uganadë janë vrarë brutalisht 30 vetë
Investitorët e huaj do të lejohen të blejnë ndërmarrjet e mëdha në Irak
Arrestohet kapelani i Guantanamos
Vëllai i Hambalit është arrestuar në Pakistan së bashku me 17 person të tjerë
Është dënuar me vdekje lideri i një grupi, që ka vrarë misionarin australian dhe dy djemtë e tij
Në një fabrikë kimike në Ohajo ka shpërthyer një rezervuar me oksid nitrik

Presidenti Rugova priti në një takim lamtumirës komandantin e KF0R-it Fabio Mini


Poashtu Presienti Rugova vlerësoi se gjenerali Mini ka krijuar një besim tek institucionet dhe qytetarët me qëndrimin e tij shumë miëqësor dhe ka ndihmuar qytetarëtë e Kosovës në jetën e tyre të përditshme, si një nga detyrat e KFOR-it.

"Prandaj edhe më tutje do të punojmë në këtë rrugë të Kosovës, në zhvillimin ekonomik dhe gjithsesi të kemi sa më shpejt një Kosovë të pavarur, demokratike paqësore, me njerëzit e Kosovës të integruar në të gjitha strukturat, në BE në NATO dhe në miqësi të përhershme me SHBA-të", tha Presidenti Rugova.


"Pra sinqerisht ju falenderoj shumë zoti President për bashkëpunimin tonë të shkëlqyeshëm si dhe për miqësinë tuaj", tha Mini, duke uruar nga zemra gjithë të mirat për Presidentin dhe Kosovën.
"Ju keni arritur shumë në të gjitha fushat në Kosovë, edhe KFOR-i ka bërë diçka, dhe mbetet të bëhet edhe më shumë në të ardhmen. Kosova është vendi juaj, dhe unë ju uroj gjithë të mirat juve për një të ardhme sa më të mirë", u shpreh në fund të deklaratës ë tij, gjenerali Fabio Mini.


I. Rugova: Kolonel Krasniqi është njëri ndër heronjtë e Kosovës


"Kolonel Ahmet Krasniqi punoi me devotshmëri dhe përkushtim në formimin dhe forcimin e forcave mbrojtëse të Kosovës, në kuadër të institucioenve legale të vendit tonë" – tha Presidenti Rugova, duke shtuar se "me kulturën e tij ushtarake, kolonel Krasniqi punoi në krijimin e një ushtrie me aftësi të fuqishme mbrojtëse dhe të disiplinuar, çfarë i duhet një vendi, prandaj i shprehim nderimin tonë për këtë".
"Kolonel Krasniqi ishte njeri i matur, burrë trim dhe ushtarak i rryer. Në jetë ishte burrë i urtë dhe mbushte jetën e tij me interesime e pasione për letërsinë e artin" – tha Rugova, duke shtuar se kolonel Krasniqi ishte burrë i nderuar nga të gjithë.

Rugova pastaj përkujtoi jetën dhe veprën e kolonel Krasniqit, duke thënë se gjithë jetën e tij punoi dhe u vu në shërbim të popullit të Kosovës për liri e pavarësi. "Me veprën e tij dhe me prsonalitetin e tij të shquar u vu në shërbim të mbrojtjes së Kosovës për lirinë dhe pavarësinë e saj, të cilës ia kushtoi jetën" – tha presidenti Rugova duke folur për figurën e kolonel Ahmet Krasniqit.
Me këtë rast Presidenti tha se ditë më parë në rezidencën e tij në një takim kishte pritur fëmijët e kolonel Krasniqit, Florentin dhe Teutën, të cilët ata e kishin njoftuar për punën dhe studimet që ata janë duke i kryer. "Ndienin kënaqësi të plotë rinore që priteshin në Rezidencën e Presidentit të Kosovës. Ishin të edukuar dhe plot jetë, si të gjithë të rinjtë e Kosovës për të punuar për vendin e vet si Ati i tyre" – tha Presidenti i Kosovës.
Presidenti Rugova në këtë akademi përkujtimore në vazhdim theksoi se kolonel Ahmet Krasniqi ishte Ministër i Mbrojtjes së Republikës së Kosovës, të cilën detyrë e kreu me nder e përkushtim. "Shpresojmë se së shpejti do të kemi Ministrinë e Mbrojtjes së Kosovës, në kohën kur Kosova në liri po bën hapa të rëndësishëm të progresit dhe kur po punon për njohjen formale të pavarisësë për t'u integruar në bashkësinë e kombeve të lira, çfarë ishte objektiv dhe ëndërr e kolonel Krasniqit", tha Ibrahim Rugova.
Presidenti i Kosovës, në përfundim të fjalës së tij tha se "sot me krenari themi se kolonel Krasniqi është njëri ndër heronjtë e Kosovës. Për meritat e Tij për lirinë dhe pavarësinë e Kosovës së shpejti do të jetë i dekoruar nga Presidenti i Kosovës.
"Zoti e bekoftë Ministrin, Kolonel, Ahmet Krasniqin. Zoti e bekoftë familjen krasniqi. Zoti e bekoftë dhe i ruajtë fëmijët e Ahmet Krasniqit. Zoti e bekoftë Kosovën", tha në fund të fjalës së tij presidenti i Kosovës, Ibrahim Rugova.
Ndërkaq prof. Zekeria Cana tha: "Sot e pesë vjet, në kohën kur okupatori barbar serb bënte vrasje masive dhe terror të paparë në shkallë gjenocidi, në një natë të errët, në mes të Tiranës, dora mizore vrau kolonel Ahmet Krasniqin, i pari Ministër i Mbrojtjes i Republikës së Kosovës".
Pastaj në një monitor u shfaqën sekuenca nga një film dokumentar në kohën kur kolonel Ahmet Krasniqi, ministër i atëhershëm i Mbrojtjes i Republikës së Kosovës, i dorëzonte flamurin shqiptar kolonel Tahir Zemajt.
Në këtë akademi përkujtimore u kënduan këngë elegjike nga Gabriel Faune, Antonio Gashi – violonçel, ule Elezi-piano.


Kazlas: Shkalla e krimit në Kosovë më e ulët se në Stokholm

Këln, 22 shtator 2003 - Këshilltari i Presidencës së Kosovës, Juozas "Joe" Kazlasi, punimet e konferencës së pestë me radhë për investime që u mbajt në Gjermani, i vlerësoi si "një shembull tjetër i vazhdimësisë së zhvillimit ekonomik të Kosovës".

Numri i madh i njerëzve të mbledhur në atë konferencë për investimet në Kosovë, tregoi interesimin e tyre të madh, tha Kazlas, i cili në atë konferencë mori pjesë si përfaqësues i UNMIK-ut.
Ndërkaq, duke folur për gjendjen e sigurisë në Kosovë, Kazlas tha për "Dojçe velen" se Kosova është përballur me disa incidente të cilat kanë tërhequr vëmendjen ndërkombëtare. "Por në aspektin e përgjithshëm unë mendoj se është e rëndësishme të përmendet se shkalla e krimit në Kosovë është e ulët ose më e ulët në krahasim me Stokholmin e Suedisë", tha Kazlas.
Sipas tij, legjislacioni kosovar është shumë i favorshëm për investime, ngase disa nga ekspertët më të mirë të Evropës dhe SHBA-të kanë ardhur të punojnë me zyrtarët e Kosovës në mënyrë që të sigurohen se ligjet do ta mbrojnë pronën private dhe investimet.


Në Prishtinë të mërkurën do t'i fillojë punimet konferenca rajonale për mjedisin

Prishtinë, 22 shtator 2003 - Që nga data 24 deri më 27 shtator në mjedisit e hotelin "Grand" në Prishtinë do t'i zhvillojë punimet "Konferenca rajonale për mjedisin". Kjo konferencë do të përqendrohet në bashkëpunimin e nivelit qendror me komunat, ngritjen e vetëdijes publike dhe në vendosjen e partneritetit privat - publik në sektorët e mbeturinave, ujit dhe gjelbërimit.

Pjesa më e madhe e këtyre temave është ngushtë e lidhur me çështjet e planifkimit të qëndrueshëm hapësinor. Në këtë konferëncë pritet të marrin pjesë përfaqësues të ministrive të mjedisit në Evropën Juglindore dhe më gjerë, disa komunave dhe disa asociacionëve të komunave.


Tribunali i Hagës ka refuzuar kërkesat e Haradin Balajt dhe të Isak Musliut që të mbrohen në liri

Hagë, 22 shtator 2003 - Tribunali i Hagës ka refuzuar kërkesat e Haradin Balajt dhe të Isak Musliut që përkohësisht të lirohen në liri, njoftohet nga Tribunali i Hagës. Balaj dhe Musliu janë akuzuar për krime lufte në Kosovë gjatë viiti 1999.

Në arsyetimin e vendimit për refuzimin e kërkesës së tyre, Kolegji penal i Tribunalit thotë se nuk është i sigurt se të akuzuarit do të ktheheshin në fillimin e procesit, meqenëse UNMIK-u nuk ka mundur të ofrojë garancione për kthimin e tyre.



Në Mitrovicë filloi procesi gjyqësor kundër dy serbëve të akuzuar për sulme kundër policisë së UNMIK-ut

Mitrovicë, 22 shtator 2003 - I ashtuquajturi lider i serbëve të veriut të Kosovës, Milan Ivanoviq sot para një gjykate ndërkombëtare në Mitrovicë, të kryesuar nga francezi Pol Shevalie, ka mohuar akuzat me të cilat ngarkohet për veprime të dhunshme në trazirat e 8 prillit të vitit të kaluar në pjesën veriore të Mitrovicës. Gjatë këtyre trazirave janë lënduar rëndë e lehtë 26 policë ndërkomëtarë nga serbët violentë.
Megjithatë, Ivanoviq ka pranuar se ditën kritike ka gjuajtur një gjësend drejt policisë së UNMIK-ut në shenjë revolte, por sipas tij nuk ka mundur të lëndojë policët. Ai poashtu ka pranuar se është dëgjuar një shpërthim, në momentin kur ai ka gjuajtur drejt policëve.
Sot pasdite para të njëjtit trup gjykues do të paraqitet Mebojsha Joviq, një tjetër i vetëquajtur lider serb i Mitrovicës, i cili akuzohet për vepër penale sulm mbi personat zyrtar dhe lëndimin e një polici të UNMIK-ut me gurë në kokë.


Bordi i drejtorëve kërkon prej qytetarëve të Gjilanit që të lirohen nga armët ilegale

Gjilan, 22 shtator 2003 - Në përkrahje të aksionit të UNMIK-ut për dorëzimin e armëve ilegale, të cilin UNDP-ja do ta stimulojë me projekte zhvillimi, në tri komuna të Kosovës, Bordi i drejtorëve në Gjilan u ka bërë sot apel qytetarëve të këtushëm që ta shfrytëzojnë këtë mundësi dhe të lirohen pa asnjë pasojë nga këto mjete të rrezikshme.
Kryeshefi ekzekutiv Enver Muja, i cili e ka informuar Bordin e drejtorëve rreth këtij programi të UNDP-së tha se komunat që dorëzojnë më shumë se 300 armë, do të jenë përfituese të një projekti në vlerë prej 225 mijë dollarë.
Mbajtja e paligjshme e armëve nga qytetarët paraqet rrezik të përhershëm jo vetëm për poseduesit, por edhe për të tjerët rreth tyre, të cilët mund të pësojnë pa faj, siç ndodhi dje në Ferizaj, ka thënë drejtori për siguri dhe emergjencë civile Hazir Mustafa.
Pas 30 shtatorit, të gjithë armëmbajtësit e paligjshëm mund të përballen me dënime të larta, nëse zbulohen.


Grupi i Kontaktit të martën do të diskutojë në Nju-Jork detajet rreth dialogut ndërmjet Prishtinës dhe Beogradit

Nju-Jork, 22 shtator 2003 - Përfaqësuesit diplomatik të gjashtë vendeve anëtare të Grupit të Kontaktit, të martën më 23 shtator, do të takohen në Nju-Jork për të diskutuar detajet rreth dialogut të mundshëm për çështje teknike ndërmjet Prishtinës dhe Beogradit.

Takimi do të mbahet në nivel të drejtorëve ekzekutivë, të ministrive të jashtme të Shteteve të Bashkuara, Francës, Rusisë, Britanisë, Italisë dhe Gjermanisë.
Në këtë takim do të marrë pjesë edhe Shefi i UNMIK-ut Hari Holkeri, i cili do t'i njoftojë përfaqësuesit e Grupit të Kontaktit për zhvillimet e fundit në Kosovë dhe qëndrimet e zyrtarëve në Prishtinë e Beograd me të cilët ka biseduar paraprakisht.


Zëdhënësi i UNMIK-ut thotë se bisedimet ndërmjet Prishtinës dhe Beogradit janë një dritare e rastit

Prishtinë, 22 shtator 2003 - Zëdhënës i UNMIK-ut në Prishtinë Kristian Lindmajer i deklaroi mediave të huaja se bisedimet ndërmjet Prishtinës dhe Beogradit për çështje praktike janë një dritare e rastit që nduk do të mbetet e hapur përgjithmonë.

Ai theksoi se ato bisedime do të trajtojnë çështjet që kanë të bëjnë me përditshmërinë e njerëzve. Zëdhënësi Lindmajer tha se Holkeri do të jetë kryesues i bisedimeve, duke refuzuar njëherësh të thoshte nëse ai do të jetë pjesëmarrës apo ndërmjetës i tyre.


Në Kosovë me aktivitete të shumta u shënua Dita Ndërkombëtare e Paqes

Prishtinë, 22 shtator 2003 - Në Kosovë me aktivitete të shumta u shënua Dita Ndërkombëtare e Paqes. Në shkollën fillore "Ardhmëria" në Rahovec fëmijët shqiptarë, serbë dhe hashkalinj këtë ditë e shënuan me njëhj program të përbashkët kulturo. Organizatorë të këtij shënimi ishin UNICEF-i dhe Uord Vuzhen.


Më Gjermani përfundoi konferenca e pestë për investime në Kosovë

Frankfurt, 22 shtator 2003 - Në Darmstad afër Frankfurtit të Gjermanisë në organizim të Ministrisë së Kulturës, Rinisë, Sportit dhe Çështjeve Jorezidente të Qeverisë së Kosovës, përfundoi konferenca e pestë për investime në Kosovë. Dy seancat e saj i udhëhoqën ministri i Kulturës Behxhet Brajshori dhe Ali Jakupi, ministër i Tregtisë dhe Industrisë.

Në konferencë përveç përfaqësuesve të UNMIK-ut ishin të pranishëm edhe shumë biznesmenë shqiptarë e gjermanë, të cilët treguan interesim të madh reth procesit të privatizimit e çështjeve të tjera që lidhen me sigurinë e investimeve në Kosovë.
Biznesmenët gjermanë shprehën dy fusha të interesimeve: mundësia e investimeve gjermane në prodhimin e rrymës elektrike me erë, e cila tashmë në Gjermani ka dhënë rezultatet e veta. Njëherësh ata u interesuan të dinë se çfarë do të bëhet me ndërmarrjet që shiten e të cilat pasluftës kanë filluar veprimtarinë e tyre në saje të ndihmave gjermane.


Një delegacion i Parlamentit të Kosovës nisi një vizitë në Gjermani

Berlin, 22 shtator 2003 - Një delegacion i Parlamentit të Kosovë në krye me kryeparlamentarin Nexhat Daci nisi një vizitë disaditore në Gjermani. Delegacioni qëndron në këtë vend me ftesë të Fondacionit "Konrad Adenauer". Në kuadër të kësaj vizite parlamentarët nga Kosova do të vizitojnë Bundestagun, Ministrinë e Punëve të Jashtme dhe institucionet e tjera të vendit si dhe do të takohen me politikanë të nivelit të lartë gjerman.
Duke folur për qëllimin dhe dobinë e kësaj vizite, kryeparlamentari Daci i deklaroi "Dojçe veles" se është një njohuri me praktikat parlamentare gjermane, ngase sipas tij Gjermania dhe Austria e kuptojnë Kosovën më mirë sepse kanë kaluar një fazë tranzicioni bukur të gjatë dhe të ngjashme me këtë në Kosovë. Pra në këtë kontekst ka se çka të përfitohet nga një vizitë e këtillë, ka thënë Daci.


Viti i parë akademik i Universitetit amerikan në Kosovë fillon 26 tetor

Prishtinë, 22 shtator 2003 - Viti i parë akademik i Universitetit amerikan në Kosovë fillon 26 tetor. Është ky institucioni dyvjeçar i arsimit të lartë. Mësimet do të zhvillohet me kushte dhe sipas kritereve bashkëkohore, ndërkaq i gjithë personeli mësimdhënës në degën e biznesit dhe të ekonomisë është i huaj.
Ky universitet amerikan është licencuar nga Ministria e Arsimit të Shkencës dhe Teknologjisë të Kosovës, ndërkaq diplomat e tij do të pranohen anembanë botës.


R. Sheqerinska: Hapja e paraleleve për mësim në gjuhën shqipe është pjesë e dispozitave kushtetuese

Mavrovë, 22 shtator 2003 - Nënkryetarja e Qeverisë së Maqedonisë, Radmilla Sheqirinska ka thënë se duhet të përmirësohet komunikimi dhe bashkëpunimi midis partnerëve të koalicionit qeveritar. Ajo ka theksuar se maqedonasve, duhet t'u sqarohet, se hapja e paraleleve për mësim në gjuhën shqipe në çfarëdo qyteti nuk është rezultat i zbatimit të Marrëveshjes së Ohrit, por është pjesë e dispozitave kushtetuese, të cilat ky shtet është i obliguar t'i respektojë.

Maqedonia nuk mund të humbë nëse zmadhohet numri i shqiptarëve të cilët shkollohen në arsimim të mesëm dhe në atë lartë. Me këtë mund të fitojë vetëm stabiliteti i Maqedonisë, ka theksuar Shiqerinska në një seminar kushtuar marrëdhënieve etnike ën Maqedoni.
Ambasadori amerikan në Maqedoni, Lorens Batler, duke folur në këtë seminar, ka vlerësuar me këtë rast se është një dukuri e keqe që të rinjtë e shkollave të mesme të dalin në rrugë. Ai tha se këta nxënës janë të manipuluar, duke shtuar se dikush po luan me fatin e tyre dhe ata duhet të jenë në shkolla.


Zëvendësministri maqedonas i arsimit thotë se në Manastir nuk do të ketë paralele të mesme në gjuhën shqipe

Manastir, 22 shtator 2003 - Zëvendësministri maqedonas i arsimit, pas takimit me profesorët dhe nxënësit maqedonas të Manastirit, ka deklaruar se në këtë qytet nuk do të ketë paralele të mesme në gjuhën shqipe.

Sipas tij, projekti i paraleles shqipe - gjimnazit është e mbyllur dhe mesazhi i nxënësve maqedonas të shkollave të mesme në Manastir është pranuar. Sipas tij, nuk ekziston vendim me të cilin hapet një paralele me mësim në gjuhën shqipe në Manastir dhe nuk mund të shfuqizohet diçka që nuk ekziston.
Vendimi për dislokimin e paraleles së Gjimnazit të Kërçovës për në Manastir ështe tërhequr dhe ajo do të funksionojë në Kërçovë, ose në ndonjë qytet tjetër ku ekziston mësimi në gjuhën shqipe, ka thënë zëvendësministri maqedonas i arsimit në kohën kur ministri i arsimit të Maqedonisë, Aziz Pollozhani këto ditë po qëndron në një vizitë zyrtare jashtë vendit.


Partitë e koalicionit qeveritar në Maqedoni e kundërshtojnë vendimin për mbylljen e paraleles shqipe në Manastir

Shkup, 22 shtator 2003 - Partitë e koalicionit qeveritar në Maqedoni e kundërshtojnë vendimin për mbylljen e paraleles shqipe në Manastir. Në këtë mënyrë është kundërshtuar deklarata e zëvendësministrit maqedonas të arsimit, i cili kishte deklaruar se në Manastir nuk do të ketë paralele të mesme në gjuhën shqipe.
Mirëpo këtë qëndrim të zëvendësministrit të arsimit maqedonas e ka kundërshtuar edhe partia e tij LSDM-ja. Zëdhënësi i kësaj partie, Igor Ivanovski ka thënë se qeveria do të debatojë në mbledhjen e sotme për këtë çështje, e cila ishte pezulluar përkohësisht për shkak të mungesës së ministrit të arsimit.
Po kështu edhe BDI ka kundërshtuar pretendimet e zëvendësministrit maqedonas të arsimit që vendimi për hapjen e paraleles në gjuhën shqipe është bërë nën trysninë e BDI-së.
Nadërkaq, përfaqësuesit ndërkombëtarë në Shkup janë shprehur të habitur nga protestat e organizuara kundër arsimimit të një bashkësie etnike në gjuhën amtare.


PDSH-ja refuzoi koalicionin e afruar nga PVD-ja për qeverisje në pushtetin lokal në Preshevë

Preshevë, 22 shtator 2003 - Partia Demokratike Shqiptare e ka refuzuar koalicionin e afruar nga Partia për Veprim Demokratik për qeverisje në pushtetin lokal në Preshevë. Siç ka deklaruar Ragmi Mustafa, kryetar i PDSH-së oferta për pjesëmarrje në pushtet ka ardhur nga kryetari i PVD-së Riza Halimi, i cili ka përjashtuar kryetarin e Kuvendit Komunal Skënder Destanin nga PVD. Mustafa citohet të ketë thënë se kjo ofertë nuk mund të pranohet për shkak të problemeve të shumta që ka PVD-ja.


Dy kolonelë dhe një nënkolonel të ushtrisë serbo-malazeze janë arrestuar për spiunazh për një vend të Lindjes

Beograd, 22 shtator 2003 - Dy kolonelë dhe një nënkolonel të Shtatmadhorisë së ushtrisë serbo-malazeze janë arrestuar nën dyshimin se me vite janë marrë me spiunazh për një vend të huaj, shkruan gazeta e Podgoricës "Vijesti". Sipas kësaj gazete, kjo aferë e spiunazhit mund të marrë përmasa të mëdha, sepse ndërkohë priten edhe arrestime të tjera në vetë kreun e ushtrisë serbo-malazeze.
Ofiecerët e lartë të arrestuar kanë udhëhequr me shërbimin sekret ushtarak dhe sipas hetimeve të gjertanishme thuhet se kanë punuar për një shërbim të huaj të zbulimit të një vendi të madh të Lindjes. Tre oficerët kanë pasur konto bankare në Izrael, ku janë derdhur paratë.
Ndërmjetësues i tyre ka qenë një biznismen malazez në Moskë, andaj indirekt thuhet se ata kanë spiunuar për Rusinë, ndonëse këtë nuk e thotë shrehimisht gazeta.
Një nga kolonelët e arrestuar ka qenë një nga më përgjegjësit në sigurimin ushtarak.


NATO sot do të bëjë të ditur ardhjen e ministrit të jashtëm holandez në krye të Aleancës

Bruksel, 22 shtator 2003 - NATO do të duhej që sot të bëjë të ditur ardhjen e ministrit të jashtëm holandez Jap de Hop Shefer në postin e sekretarit të përgjithshëm të Aleancës Veriatlantike.

Në takimin e sotëm të ambasadorëve të 19 vendeve anëtare të NATO-s duhet të konfirmohet se Shefer në postin e sekretarit të përgjithshëm do të zëvendësojë lordin Xhorxh Robertson të cilit mandati katërvjeçar i skadon në dhjetor të këtij viti.


Të pakten 7 vetë janë vrarë dhe 31 të tjerë janë plagosur në tri shpërthime të veçanta bombash në Kinë

Pekin, 22 shtator 2003 – Të pakten shtatë vetë janë vrarë dhe 31 të tjerë janë plagosur në tri shpërthime të veçanta bombash, të cilat e kanë tronditur gjatë fundjavës Kinën, kanë bërë të ditur sot (e hënë) mendiat vendore. Shpërthimet kanë ndodhur në qendrën tregtare të qytetit Vuhan.

Derisa zjarrfikësit po luftonin me zjarrin dhe ekipet mjekësore po trajtonin banorët e një ndërtese dykatëshe, një shpërthim i papandehur i ka hedhur në erë zjarrfikësit dhe personelin mjekësor. "Një person i paidentifikuar befas kishte hedhur një mjet shpërthyes në vendngjarje", citohen të kenë thënë dëshmitarët okularë. Fill pas shpërthimit, bombëhedhësi kishte bërë vetëvrasje.


Forcat izraelite kanë vrarë një militant islamik të Hamasit në Hebron

Hebron, 22 shtator 2003 – Forcat izraelite kanë vrarë sot (e hënë) një militant islamik të Hamasit pasi më parë kishin rrethuar dhe pastaj shkatërruar shtëpinë e tij në Hebron të Bregut Perendimor, ku ishte strehuar, njofton Rojter.

Dëshmitarët palestinëzë kanë thënë se trupat e kishin rrethuar shtëpinë me 15 xhipa dhe dy tanke dhe s'kishte pasur shkëmbim zjarri. Trupat kishin sjellë buldozherin dhe e kishin rrënuar shtëpinë. Nuk është e qartë nëse militanti është vrarë me armë zjarri apo ka vdekur pasi e ka zënë përfundi shëtëpia e rrëzuar.


Nga një autobombë janë vrarë dy vetë në Bagdad dhe janë plagosur 8 të tjerë

Bagdad, 22 shtator 2003 – Një vëtëvrasës me autobombë ka hedhur sot (e hënë) veten në erë te selia e Kombeve të Baashkuara në Bagdad, duke vrarë kështu pos vetvetes edhe rojen irakiene të sigurimit dhe duke plagosur tetë persona, ka bërë të ditur ushtria amerikane, njofton Rojter.

Shpërthimi i sotëm bëhet pasi sulmuesit kishin vrarë dje dy ushtarë amerikanë në një sulm me morataja, kur është vrarë gjithashtu tw njwjtwn ditw edhe një ushtar i tretë amerikan, por nga shpërthimi i një mine tokësore. Kwshtu, që kur presidenti Bush e shpalli të përfunduar luftën në Irak më një maj, në incidentet armiqësore janë vrarë 79 ushtarë amerikanë.


Shirak tha se Franca nuk do përdorë veton

Paris, 22 shtator 2003 - Presidenti i Francës, Zhak Shirak, tha se ai nuk do të vërë veton kundër përpjekjeve amerikane për të marrë miratimin për një forcë paqëruajtëse në Irak.
Por në të njëjtën kohë, ai paralajmëroi se Franca as nuk do ta mbështesë një rezolutë, e cila sipas tij, nuk do të përmbushte dy kushte.
Presidenti francez tha se vendi i tij nuk do të mbështeste rezolutën nëse ajo nuk nuk do të vendoste një afat për dorëzimin e pushtetit tek vetë irakjanët dhe nuk do të parashikonte një rol kyç të Kombeve të Bashkuara në Irak.


Në Uganadë janë vrarë brutalisht 30 vetë

Kampala, 22 shtator 2003 – Zyrtarët e Ugandës kanë thënë se luftëtarët e Karamoxhongut, një fis me tradita të vjetra luftarake, kanë vrarë egërsisht 30 vetë gjatë një sulmi në distriktin Katavi, njofton BBCWorld. Ndër viktimat janë edhe tri gra, kurse një djalosh dhe një foshnje janë plagosur dhe janë dërguar në spital.

Në vendngjarje janë gjetur 21 trupa të pa jetë, kurse 9 trupa të tjerë janë gjetur më vonë në fshatin e afërm. Zyrtarët kanë thënë se kërkimi po vazhdon për trupa të tjetrë. Sulmi është bërë me motiv rrëmbimi të bagëtive të fshatarëve.


Investitorët e huaj do të lejohen të blejnë ndërmarrjet e mëdha në Irak

Bagdad, 22 shtator 2003 - Të dielën administrata amerikane në Irak bëri publike një plan të sajin, sipas të cilit, investitorët e huaj do të lejohen të blejnë ndërmarrjet e mëdha në Irak, me përjashtim të atyre që i përkasin industrisë së naftës.
Ministri irakian i financave, Kamel al-Keylani, tha se një hap i tillë është i rëndësihëm për rindërtimine vendit që është dëmtuar keq nga lufta, sanksionet ndërkombëtare dhe dekadat e një rregjimi shtypës.


Arrestohet kapelani i Guantanamos

Guantanamo, 22 shtator 2003 - Një kapelan mysliman i ushtrisë amerikane, që punonte si këshilltar shpirtëror i qindra të burgosurve të dyshuar si Talebanë dhe luftëtarë të Al-Kaidës që mbahen në Gjirin Guantanamo në Kubë, është arrestuar nga autoritetet ushtarake amerikane.

Një zëdhënës i ushtrisë tha se mbi kapiteni Jusef Jei, nuk është ngritur ende ndonjë akuzë, por autoritetet nuk pranojnë të tregojnë shkaqet pse është burgosur.
Ai u arrestua në Florida në 10 shtator pas kthimit nga baza ushtarake amerikane në Guantanamo.


Vëllai i Hambalit është arrestuar në Pakistan së bashku me 17 person të tjerë

Islamabad, 22 shtator 2003 – Vëllai më i ri i Hambalit, pjesëtar i shquar i dyshimtë i Al-Kaidës për Azinë juglindore, është arrestuar nën akuzën e imigrimit të paligjshëm në Pakistan së bashku me disa të tjerë, kanë bërë të ditur sot (e hënë) dy zyrtarë të lartë të Ministrisë së brendshme të Pakistanit, njofton AP.

I arrestuari quhet Rusman Gunavan dhe është një nga 17 personat e arrestuar nga Maleizia, Indonezia dhe Myanmari të arrestuar gjatë fundjavës në tri shkolla islamike në qytetin jugor të Pakistanit, Karaçi, ka thënë zyrtari me kusht anonimiteti, i cili kishte marrë pjesë në aksionin e aresimeve në fjalë. Nuk dihet nëse Gunavan ka bërë ndonjë krim, apo vetëm e ka shkelur ligjin e imigrimit.


Është dënuar me vdekje lideri i një grupi, që ka vrarë misionarin australian dhe dy djemtë e tij

Nju Delhi, 22 shtator 2003 – Një gjykatë indiane i ka shqiptuar dënimin me vdekje liderit të një grupi të fajësuar për vrasjen e një misionari australian dhe të dy djemve të tij të ri, njofton BBCnews.

Ndërkaq, 12 të akuzuarve të tjerë u janë shqiptuar dënime me burg të përjetshëm për djegien të gjallë të misionarit Graham Seins dhe të djemve të tij, Filipin, 10-vjeçar dhe Timoti, 8-vjeçar. Gjykata i ka fajësuar ata për kryengritje, zjarrvënie dhe për vrasje të njerëzve.


Në një fabrikë kimike në Ohajo ka shpërthyer një rezervuar me oksid nitrik

Çikago, 22 shtator 2003 – Në një fabrikë kimike në Ohajo ka shpërthyer një rezervuar dhe kështu e ka hedhur në erë kulmin dhe ka detyruar tre mijë njerëz të evakuohen brenda rrezës prej një mile, njofton Rojter.

Rezervuari i shpërthyer përmbante oksid nitrik, një gas tejet reaktiv. Të pakten dy zjarrfikës kanë përsuar lëndime.