Spahija: Duke e ndihmuar zhvillimin e kulturës në komunën e Mitrovicës do t’i kontribohej njëkohësisht edhe integrimit më të përshpejtuar të qytetit

Mitrovicë, 22 shtator 2003 / Hysni Syla  - Anëtarët e Komisionit për Kulturë të Parlamentit të Kosovës, me në krye Edi Shukriun, kanë bërë një vizitë njëditore pune në komunën e Mitrovicës. Anëtarët e Komisionit në fjalë fillimisht i ka pritur kryetari i Kuvendit të Komunës z. Faruk Spahija, me ç’rast i ka njoftuar ata me gjendjen aktuale në fushën e kulturës në komunë dhe me përpjekjet e pushtetit lokal për të përmisuar këtë gjendje.

 

Kryetari Spahija u ka thënë parlamentarëve të Kosovës se udhëheqja komunale është e interesuar që të vazhdojë realizimin e mëtutjeshëm të projektit të Qendrës së Kulturës “Rexhep Mitrovica”, me çka do të krijoheshin kushte për zhvillimin e mirëfilltë të krijimtarisë kulturore dhe Mitrovica të bëhet një qendër evropiane e kulturës, duke kërkuar kështu nga anëtarët e komisionit që të përkrahin këtë ide dhe që të angazhohen tek institucionet e vendit që të ndihmojnë materialisht në realizimin e saj.

 

Poashtu, kryetari Spahija u ka thënë anëtarëve të Komisionit për Kulturë të Parlamentit të Kosovës se duke e ndihmuar zhvillimin e kulturës në komunën e Mitrovicës do t’i kontribohej njëkohësisht edhe integrimit më të përshpejtuar të qytetit, prandaj institucionet e Kosovës duhet ta kenë këtë parasysh dhe  tu japin prioritet projekteve kulturore nga komuna e Mitrovicës.

 

Anëtarët e Komisionit për Kulturë të Pralamentit të Kosovës kanë biseduar në Qendrën e Kulturës “Rexhep Mitrovica” edhe për problemet tjera në fushën e kulturës, me përgjegjësit për kulturë të komunës Murteza Berisha e Sabit Idrizi dhe me drejtorin e Muzeut të Qytetit Bektesh Vidishiqi dhe me këtë rast është parashtruar kërkesa për themelimin e Qendrës për mbrojtjen e trashëgimisë kulturore, ngase kjo trevë është e pasur me trashëgimi kulturore, për të cilën aktualisht asnjë institucion nuk është kompetent për ruajtjen e saj.

Copyright©2000-2003 Trepca.net - Të gjitha të  drejtat e rezervuara.