E shtune 20 shtator 2003

20.09.2003 - Trepca.net

Lajme

E shtune 20 shtator 2003

Përmbajtja:

B. Klinton: Unë e solla vendimin që të mobilizoheshin aleatët tanë të NATO-s që ta ndalonin spastrimin etnik në Kosovë
Nesër me një akademi përkujtimore shënohet 5-vjetori i vrasjes së kolonel Ahmet Krasniqit
Klinton në Srebrenicë do të inaugurojë sot një memorial për të vrarët
Hari Holkeri ka shtruar mbrëmë një darkë pune me drejtuesit e institucioneve dhe të partive politike të Kosovës
Italia si kryesuese e radhës të BE-së mbështet strategjinë e dialogut ndërmjet Prishtinës dhe Beogradit
Busek thotë se statusi i padefinuar i Kosovës mbetet ndër problemet kryesore për zhvillimin ekonomik
Përfaqësuesit e pensionistëve kërkuan që në bisedimet me Beogradin të trajtohet edhe fondi i grabitur nga Serbia
Në Stubëll të Epërme të Karadakut sot po mbahet manifestimi tradicional "Ditët e Don Mikelit"
Në Parlamentin maqedonas debat i ashpër midis deputetëve shqiptarë të pozitës dhe opozitës
Millosheviqi akuzohet për vrasjen e Stamboliqit dhe për atentatin kundër Drashkoviqit
Në takimin e kreut shtetëror maqedonas u pranua ideje për formimin e njësitit special ushtarak me 2000 pjesëtarë
Rreth 2000 nxënës maqedonas kanë protestuar në Manastir kundër hapjes së një paralele shqipe
Uragani Izabela deri tash ka lënë të vdekur të pakten 25 njerëz
Në përplasjen e një treni me autobus në Pakistan, kanë humbur jetën të pakten 27 njerëz
Forcat amerikane në Afganistan kanë vrarë të pakten 8 civilë, një komandant dhe një gueril taliban
Është plagosur rëndë anëtarja e Këshillit qeveritar irakian, Akuila al-Hashimi
Liderët e Britanisë, Francës dhe Gjermanisë takohen të dielën për të diskutuar për Irakun

B. Klinton: Unë e solla vendimin që të mobilizoheshin aleatët tanë të NATO-s që ta ndalonin spastrimin etnik në Kosovë


Bonstill, 20 shtator 2003 - Ish-presidenti amerikan Bill Klinton pas vizitës që i bëri Prishtinës, vizitoi edhe ushtarët amerikanë në kampin amerikan "Bondstill" afër Ferizajt dhe punëtorët shqiptarë të cilët punojnë në këtë kamp. Në përcjellje të Presidentit Klinton ishte dhe komanadanti i NATO-s, Fabio Mini dhe komandanti i Brigadës Shumkombëshe të Lindjes gjeneral Xheri Bek.
"Është shumë kënaqësi që po kthehem sërish në kampin Bondstill. Unë e solla vendimin që të mobilizohen aleatët tanë të NATO-s që ta ndalojnë spastrimin etnik në Kosovë në vitin 1999, kur kishim një milion refugjatë, 20 deri 40 mijë njerëz ishin vrarë atëherë.

Dhe pas fushatës ajrore të NATO-s kosovarët filluan të kthehen në shtëpitë e tyre dhe të jetojnë në paqe si rezultat i njerëzve si jeni ju", u tha paqeruajtësve amerikanë ish-presidenti amerikan Bill Klinton, duke shtuar se ata po i ndihmojnë Kosovës që të kthehet në këmbë të veta, i cili mbrëmë vonë është larguar nga Kosova.


Nesër me një akademi përkujtimore shënohet 5-vjetori i vrasjes së kolonel Ahmet Krasniqit

Po më 21 shtator një delegacion tre vetash i Këshillit Organizativ do të udhëtojë në Tiranë për të bërë homazhe në varrin e kolonel Ahmet Krasniqit, thuhet në një njoftim të Këshillit Organizativ./ CNN - Kosovar separatist leader assassinated in Albania /


Klinton në Srebrenicë do të inaugurojë sot një memorial për të vrarët

Sarajevë, 20 shtator 2003 - Ish-presidenti amerikan, Bill Klinton, do të inaugurojë sot një memorial dhe një varrezë të re në qytetin e Srebrenicës në Bosnjë, për viktimat e masakrës më të madhe të kontinentit që nga lufta e dytë Botërore.
Në Srebrenicë, të paktën 7 mijë myslimanë u vranë nga forcat serbe të Bosnjës në vitin 1995.
Masakra ishte një nga zhvillimet kyçe që e bindi administratën e presidentit Klinton të ndërhynte ushtarakisht në Bosnjë.
Vejushat e të vrarëve kanë kërkuar me këmbëngulje që inaugurimin ta bëjë vetë ish-presidenti amerikan. Klintoni në Bosnjë shkoi pas një vizite njëditëshe në Kosovë.


Hari Holkeri ka shtruar mbrëmë një darkë pune me drejtuesit e institucioneve dhe të partive politike të Kosovës

Prishtinë, 20 shtator 2003 - Shefi i Misionit të OKB-së në Kosovë, Hari Holkeri ka shtruar mbrëmë një darkë pune me drejtuesit e institucioneve dhe të partive politike të Kosovës me që të diskutohen mundësitë për një përparim siç është thënë në përgatitjen e fillimit të dialogut Prishtinë - Beograd për çështje teknike.

Në këtë atkim ishin: Presidenti i Kosovës Ibrahim Rugova, kryeministri Bajram Rexhepi, kryeparlamentari Nexhat Daci si dhe kryetari i PDK-së Hashim Thaçi dhe ai i AAK-së Ramush Haradinaj.
Pas darkës Presidenti Rugova deklaroi para mediave se ky ishte një takim miqësor në të cilin është biseduar për një bashkëpunim më të ngushtë mes institucioneve të Kosovës dhe UNMIK-ut në fusha të ndryshme.

Gjithashtu ai tha se janë bërë edhe disa konsultime për bisedimet e mundshme. Presidenti tha se Holekri i kishte njoftuar për bisedat e mundshme për çëshjte praktike me fqinjin e Kosovës, Beogradin.
Kryeministri Rexhepi tha se në këtë takim është folur edhe për transferin e kompetencave dhe për bisedimet eventuale, ndërkaq Holkeri kishte shjeguar të gjitha takimet që ka pasur.

Rexhepi tha se në këtë takim nuk është vendosur asgjë. Sipas Rexhepit, Holkeri ka sqaruar se një dokument i publikuar në media nuk ka dalë nga zyra e tij.
Ndërkaq, Holkeri gjatë ditës së djeshme ka thënë se ka për qëllim t'ua paraqesë udhëheheqësve kosovarë, propozimet e tij për kohën dhe mënyrën e fillimit të bisedimeve, duke theksuar se ato bisedime janë tepër të rëndësishme për Kosovën.


Italia si kryesuese e radhës të BE-së mbështet strategjinë e dialogut ndërmjet Prishtinës dhe Beogradit

Romë, 20 shtator 2003 - Ministri i jashtëm italian Franko Fratini dhe shefi i UNMIK-ut Hari Holkeri kanë nënshkruat një memorandum bashkëpunimi lidhur me projektin e UNMIK-ut për rikthimin në Kosovë të të refugjatëve serbë. Në këtë projekt Italia do të kontribuojë me 3.8 milionë euro.

Fratini e vlerësoi ndihmën e Italisë për Kosovën në fushën politike, ushtarake dhe bashkëpunimin, duke mbajtur Kosovën në qendër të vëmendjes. Italia si kryesuese e radhës të Bashkimit Evropian mbështet strategjinë e dialogut ndërmjet Prishtinës dhe Beogradit për çështje praktike.
Ministri italian me këtë rast ka theksuar nevojën e arritjes së standardeve në fushën politike, ekonomike dhe të bashkëjetesës etnike përpara fillimit të bisedimeve për statusin përfundimtar të Kosovës.


Busek thotë se statusi i padefinuar i Kosovës mbetet ndër problemet kryesore për zhvillimin ekonomik

Prishtinë, 20 shtator 2003 - Në Prishtinë përfundoi punimet takimi dyditor i Paktit të Stabilitetit me institucionet e Kosovës dhe komunitetin e bizneseve për nxitjen e biznesit vendor i cili ka fitim për biznesin kosovar në nismat e bizneseve rajonale.

Koordinatori i Paktit Erhard Busek ka thënë se puna e Paktit të Stabilitetit në Kosovë po shkon shumë mirë, duke shtuar se Kosova është përfshirë në çdo grup të Paktit të Stabilitetit për Evropën Juglindore.
Busek gjithashtu ka theksuar se gradualisht janë duke u krijuar kushtet që Kosova të jetë anëtare e barabartë me vendet e rajonit. Siaps tij, statusi i padefinuar i Kosovës mbetet ndër problemet kryesore për zhvillimin ekonomik, ngase përkrahja financiare nga institucionet përkatëse botërore mund t'i gëzojnë vetëm shtetet.
Busek poashtu ka shtuar se është duke u shikuar mundësia e lidhjes së Kosovës nëpërmjet korridorit Nish-Prishtinë - Shkup. Sa i përket lidhjes me Tiranën, përkatësisht Durrësin Busek tha se nuk don që t'i ngjallë shpresat para kohe.


Përfaqësuesit e pensionistëve kërkuan që në bisedimet me Beogradin të trajtohet edhe fondi i grabitur nga Serbia

Prishtinë, 20 shtator 2003 - Pensionistët e Kosovës kërkojnë nga Qeveria e Kosovës që të angazhohet më shumë për zgjidhjen e çështjes së pensionistëve.

Në një takim me kryeminsitrin, Bajram Rexhepi dhe me ministrin për Punë dhe Mirëqenie Sociale, Ahmet Isufin, përfaqësuesit e pensionistëve kërkuan që në bisedimet me Beogradin të shtrohet edhe problemi i fondeve të pensionistëve të grabitura nga Serbia.

Në këtë takim pensionistët e Kosovës përsëritën kërkesën për realizimin e statusit të tyre.
Pensionistët e Kosovës kanë paralajmëruar një protestë për të enjtën nëpërmjet së cilës ata do të kërkojnë realizimin e të drejtave të tyre.


Në Stubëll të Epërme të Karadakut sot po mbahet manifestimi tradicional "Ditët e Don Mikelit"

Gjilan, 20 shtator 2003 - Në Stubëll të Epërme të Karadakut sot po zhvillohen aktivitete të ndryshme kulturore në kuadër të manifestimit tradicional "Ditët e Don Mikelit".

Manifestimi filloi me një tribunë të hapur, në të cilën po diskutojnë studiues nga Prishtina dhe Tirana. Ndërkaq, në mesditë mbahet një meshë pontifikale e udhëhequr nga imzot Mark Sopi.
Poashtu do të organizohet edhe një orë letrare, ku do të jipet çmimi për poezi që mban emrin "Agim Ramadani" në një vlerë prej 500 eurosh.
Gjatë këtij manifestimi do të përurohet edhe libri me poezi i Nënës Tereze botuar në tri gjuhë: shqip, anglisht dhe gjermanisht.


Në Parlamentin maqedonas debat i ashpër midis deputetëve shqiptarë të pozitës dhe opozitës

Shkup, 20 shtator 2003 - Në vazhdimin e seancës së Parlamentit të Maqedonisë në të cilën po debatohet për gjendjen e sigurisë është zhvilluar një debat i ashpër midis deputetëve shqiptarë të pozitës dhe opozitës, ku aty këtu ndërhynte edhe ndonjë deputet i VMRO-DPMN-së.
"Vetëm zgjidhja e problemeve në kontinuitet do të mundësojë stabilitetin në Maqedoni. Nuk është koha e dhënies se deklaratave të mëdha siç është ajo për ndarjen e Maqedonisë", ka theksuar Hisni Shaqiri, deputeti i Bashkimit Demokratik për Integrim.
Ndërkaq deputeti i PDSH-së Zamir Dika tha se derisa në Qeveri është BDI ai nuk po vëren se po realizohet Marrëveshja e Ohrit, por përkundrazi ka dështime në çdo aspekt.
Në këto akuza u përgjigj Hisni Shaqiri duke thënë se nuk ka pritur reagime të kësaj natyre nga një deputet shqiptar. Ai tha se kur dikush nuk ka me çka ta ushqejë popullatën merret pikërisht me këto ngjarje edhe me këto probleme. Ai nënvizoi se humbja e jetës së çdo të riu për të është e dhimbshme.


Millosheviqi akuzohet për vrasjen e Stamboliqit dhe për atentatin kundër Drashkoviqit

Beograd, 20 shtator 2003 - Ish-diktatori serb Sllobodan Millosheviq do të akuzohet për vrasjen e ish-presidentit të Serbisë Ivan Stamboliq dhe për tentim vrasjen e liderit të Lëvizjes së Rimëkëmbjes Serbe Vuk Drashkoviq.

Mediat serbeë njoftojnë se në aktakuzën që do të ngritet nga një gjykatë e Beogradit më 23 shtator Millosheviqi ndodhet në mesin e dhjetë të akuzuarve për këto dy vepra penale.


Në takimin e kreut shtetëror maqedonas u pranua ideje për formimin e njësitit special ushtarak me 2000 pjesëtarë

Shkup, 20 shtator 2003 - Në takimin e kreut shtetëror maqedonas i thirrur nga presidenti Boris Trajkovski në të cilin kanë marrë pjesë kryeministri Cërvenkovski, ministri i mbrojtjes Buçkovski, zëvendësministri i Punëve të Brendshme, Hazbi Lika dhe ministri Kostov është pranuar ideja për formimin e njësitit special ushtarak i cili do të numërojë 2000 pjesëtarë.
"Për formimin e kësaj brigade të re speciale të Armatës së Maqedonisë, nevojiten disa ndryshime ligjore, me qëllim të mundësisë së veprimit të saj në tërë territorin e Maqedonisë", ka deklaruar presidenti maqedonas, Boris Trajkovski pas takimit të kreut shtetëror.


Rreth 2000 nxënës maqedonas kanë protestuar në Manastir kundër hapjes së një paralele shqipe

Manastir, 20 shtator 2003 - Rreth 2000 nxënës maqedonas kanë protestuar edhe dje në qendër të Manastirit kundër vendimit të Ministrisë së Arsimit për hapjen e një paraleleje shqipe në Gjimnazin e qytetit.

"Manastiri është qytet maqedonas", kanë brohoritur nxënësit, të cilëve iu kanë bashkangjitur edhe një grupë e arsimtarëve dhe qytetarësh maqedonas. Ata kërkuan dorëheqjen e ministrit të arsimit, Aziz Pollozhani.

Protesta kundër zhvillimit të mësimit në gjuhën shqipe në Shkollën e Mesme Ekonomikem, u mbajtën dje edhe në Shkup.


Uragani Izabela deri tash ka lënë të vdekur të pakten 25 njerëz

Riçmond, 20 shtator 2003 - Siç njofton CNN, uragani Izabela, i cili gjatë kësaj jave goditi shtatë shtete të SHBA-ve buzë Atlantikut ka lënë të vdekur të pakten 25 njerëz.
Ekipet e riparimit në shtetet në fjalë po punojnë pandërprerë në riparimin e rrjetit të energjisë elektrike, të dëmtuar nga stuhia, për t'ua kthyer dritën 2,5 milionë konsumatorëve, që tash sa kohë kanë mbetur në terr.

Por, siç thonë kryerësit e punimeve, kjo punë kërkon një kohë më të gjatë, të pakten gjashtë ditë. Stuhia aktualisht është dobësuar dhe po lëviz në drejtim të Merilendit dhe të Pensilvanisë dhe eventuarlisht do të kalojë në Kanada.


Në përplasjen e një treni me autobus në Pakistan, kanë humbur jetën të pakten 27 njerëz

Islamabad, 20 shtator 2003 - Një tren dhe një autobus janë përplasur në Pakistanin qendror, ku kanë humbur jetën të pakten 27 njerëz, njofton BBCWorld. Aksidenti ka ndodhur afër Malikualit, një qytet në jug të kryeqytetit Islamabad, derisa autobusi po përpiqej të kalonte hekurudhën, ka thënë shefi i policisë vendëse.

Ai ka thënë gjithashtu se të gjitha viktimat kanë qenë në autobus, kurse udhëtarët e trenit kanë shpëtuar të palënduar. Sipas një polici, i cili citohet nga Rojter-i, numri i të vdekurve në këtë aksident arrin në 40 sish. Një numër i konsdsiderueshëm udhëtarësh është lënduar, 6 syresh gjenden në gjendje të rëndë.


Forcat amerikane në Afganistan kanë vrarë të pakten 8 civilë, një komandant dhe një gueril taliban

Kabul, 20 shtator 2003 – Të pakten tetë civilë janë vrarë në një bombardim amerikan nga ajri në provincën jugore të Zabulit, ku gjithashtu është vrarë edhe një komandant taliban, kanë bërë të ditur sot zyrtarët afganë, njofton Rojter.

Civilët, një grua dhe fëmijët e saj, kanë vdekur mbrëmë në shtretërit e tyre, kur bomba ka depërtuar nëpër tendën e tyre në distriktin e Zabulit Nau Bahar, ka thënë ndihmësguvernatori i Zabulit.

Ai gjithashtu ka thënë se Mohamed Gul Nejazi, një komandant i lartë taliban dhe një tjetër guerrilë taliban janë vrarë gjithashtu gjatë një sulmi afër kufirit me Pakistanin.


Është plagosur rëndë anëtarja e Këshillit qeveritar irakian, Akuila al-Hashimi

Bagdad, 20 shtator 2003 – Një anëtare e Këshillit qeveritar irakian, Akuila al-Hashimi, është qëlluar me armë zjarri dhe është plagosur rëndë në Bagdad, njofton BBCWorld. Sipas këtyre njoftimeve ajo është qëlluar dy herë në stomak, një herë në sup dhe një herë në këmbë dhe është në gjendjje të rëndë shëndetësore.

Aktualisht ajo gjendet në spitalin e Bagdadit, i cili është rrethuar nga forcat e sigurimit. Edhe truproja e saj është plagosur gjithashtu. Zonja Al-Hashimi, është një nga tri gratë në Këshilit qeveritar dhe është e besimit shit.


Liderët e Britanisë, Francës dhe Gjermanisë takohen të dielën për të diskutuar për Irakun

Berlin, 20 shtator 2003 - Udhëheqësit e Britanisë, Francës dhe Gjermanisë takohen të dielën për herë të parë që nga mosmarrëveshjet e thella që shkaktoi mes tyre lufta në Irak.
Në qendër të takimit do të jenë pikëpamjet e ndryshme që kanë tre nga vendet kryesore të kontinentit të vjetër rreth mënyrës se si duhet të vendoset dhe ruhet paqja në Irak.
Kryeministri britanik, Toni Bler, presidenti francez Zhak Shirak dhe kancelari gjerman, Gerhard Shrëder do të takohen në Berlin në një kohë kur ende kanë mendime të ndryshme rreth të afërmes së afërt për Irakun.
Uashingtoni do që vendet e tjera të dërgojnë trupa dhe ndihma financiare për vendin, por Franca ende e kundërshton fuqishëm këtë.