E premte 19 shtator 2003

19.09.2003 - Trepca.net

Lajme

E premte 19 shtator 2003

Përmbajtja:

Presidenti Rugova u takua me ish-presidentin Bill Klinton
Ish-presidenti amerikan u nderua sot me tutullin Doktor nderi të Universitetit të Prishtinës
Ish-presienti amerikan Bill Klinton mbërriti sot në mëngjes në Prishtinë
Klintoni nesër në Bosnje hap Qendrën përkujtimore të viktimave të masakrës në Srebrenicë
Në Prishtinë po mbahet takimi dyditor i Paktit të Stabilitetit për nxitjen e biznesit
Holkeri thotë se tash është momenti i duhur për bisedime mes Prishtinës dhe Beogradit
G.Eler: Pala shqiptare ka probleme kur Evropa kërkon standarde para statusit përfundimtar të Kosovës
Dy ushtarë ukrainas të akuzuar për kontrabandë me cigare i janë dorëzuar armatës ukrainase për hetime
Prerja ilegale e druve paraqet problemin më të madh në Podujevë, vlerëson KFOR-i çeko-sllovak
Zëvendëkryeministri Brajshou ka vizituar fshatin Magurë disa familje të kthyera hashkalinjsh
Marrëveshja për tregtinë e lirë Kosovë - Shqipëri parasheh liberalizimin e importit të prodhimeve industriale e bujqësore
Tirana i shpreh shqetësimin diplomates greke për keqtrajtimin e qytetarëve shqiptarë në Greqi
Trajkovski thotë se situata e sigurisë në Maqedoni është e qëndrueshme
Klosi akuzon presidentin Moisiu se ka udhëhequr turmat kundër institucioneve të vendit
Tre ushtarë amerikanë u vranë në Tikrit
Uragani Izabela deri tash ka shkaktuar vdekjen e të pakten 7 personave
Pas vrasjes së tre ushtarëve, forcat amerikane kanë kapur 40 guerilë irakianë
Trupat izraelite kanë hedhur në erë shtëpinë e një bombëvënësi vetëvrasës të Hamasit
Një gjykatë marokene ka dënuar me burg të përjetshëm një francez dhe dy marokenë për sulme terroriste
Ish-ministri i Mbrojtjes i Irakut u është dorëzuar forcave amerikane
Gjendje e jashtëzakonshme nga Uragani Isabel
Një shpërthim afër selisë ushtarake amerikane në Afganistan ka shkaktuar vdekjen e të pakten 6 personave
Në përleshjet e grupimeve rivale vendëse u vranë të pakten 13 vetë

Presidenti Rugova u takua me ish-presidentin Bill Klinton


Ndryshe para Fakultetit të Filologjisë janë mbledhur me mijëra qytetarë të kryeqytetit dhe nga viset e tjera të Kosovës që kanë ardhur për të përshëndetur ish-presidentin amerikna Bill Klinton dhe për ta falenderuar atë për të gjitha që ka bërë për lirinë e Kosovës si President i SHBA-ve.
Mediat e Kosovës po i kushtojnë publicitet të madh kësaj vizite të Klintonit në Prishtinë. Kështu TV Kosova dhe RTV21 po transmetojnë direkt vizitën e Klintonit në Prishtinë. Ndërkaq të gjitha gazetat e përditshme në faqet e para i kanë njoftimet për vizitën e Klintonit.


Ish-presidenti amerikan u nderua sot me tutullin Doktor nderi të Universitetit të Prishtinës

Klinton: "Besoj në vetëvendosje dhe dëshiroj që ju të arrini ta ndërtoni ardhmërinë tuaj"


Dhënia e çmimit Doktor nderi për Klintonin, tha Kelmendi është ngjarja më e shënuar në UP.
Pastaj për jetën dhe figurën e ish-presidentit amerikan Klinton foli prof. Hajredin Kuçi, i cili me fjalë të zgjedhura vlerësoi punën dhe aktivitetin e Klintonit.
Ndërkaq diplomën e dokrort të nderit të UP zotit Klinton ia dorëzoi prof. Arsim Bajrami.


Klinton pastaj falenderoi të gjitha ata që po ndihmojnë në ndërtimin e një Kosove të re: nga OKB-ja, bashkësia ndërkombëatre, nga Universiteti amerikan që do të hapet dhe falenderoi ata që e emërtuan një bulevard në Prishtinë me emrin e tij.

Klinton si në mahi tha se tani nuk merret me politikë, por bashkëshortja e tij Hilari si senatore nga Nju Jorku më shumë i përfaqëson shqiptarët në Senat. Ai foli edhe për shqiptaro-amerikanët si njerëz ndërmarrës e të vyeshëm në Amerikë.
Në memoaret që do t'i përfundojë, tha Klinton, do të jetë krenar që do të shkruajë për heroizmin e popullit të Kosovës që u ngrit kundër spastrimit etnik dhe tiranisë.
"Edhe unë, edhe ju duhet t'i falenderojmë ushtarët amerikanë dhe të tjerët që rrezikuan jetën e tyre për t'ju mbrojtur dhe për t'ju dhënë të drejta për t'u kthyer në shtëpi dhe për të jetuar të lirë", tha Klinton, duke cituar presidentin Bush që ka thënë se "amerikanët erdhën në Ballkan me aleatët e tyre dhe do të dalin së bashku".
Klinton pastaj i hodhi një vështrim terrorizmit në botë, i cili siç tha, ka sjellë shumë të këqija njerëzimit, si dhe tragjedive në Lindjen e Mesme më dhe në vendet e tjera të botës.
"Keni luajtur një rol shumë me rëndësi në historinë e njerëzimit, Këtu në këtë vend të vogël, Millosheviqi u bë shkatërruesi i civilizimit, një shkatërrues i jetëve... por tash ai është në Hagë për krime kundër njerëzimit", tha Klinton.
"Herën e fundit, kur isha në Kosovë, e pranova se ju nuk mund të harroni kurrë çnjerëzimet dhe padrejtësitë që u janë bërë. Askush nga jashtë, pra as unë, nuk mund t'ju shtyjë që të falni, por duhet të mundoheni, jo për ata, por për veten tuaj. Dua që ju të jeni të lirë", porositi Klinton.
Ish-presidenti amerikan tha në vazhdim:
"Duhet të bëni gjëra praktike, ta zëmë të vendosni rregull të njëjtë për të gjithë. Unë e urrej dhunën që e ushtroi Millosheviqi ndaj shqiptarëve. E urrej dhe kam bërë çfarë kam mundur për ta ndërprerë atë.

Por, ju nuk duhet t'ia ktheni tani shpinën dhunës që drejtohet në anën tjetër. Të gjithë ju, duke kujtuar të kaluarën, duhet të flitni kundër vrasjes së dy të rinjëve serbë. Rendi dhe drejtësia duhet të vlejnë për të gjithë, njësoj sikur të bëhej fjalë për pozicione të ndryshme etnike. Ju nuk mund ta ndërtoni një Kosovë të re me dhunë e me hakmarrje".
Duke iu drejtuar presidentit të Kosovës, Klinton tha:
"Z. President, mendoj se ju keni bërë mjaft për vendosjen (respektimin) e rendit e ligjit, pasi ju ishin i goditur nga dhuna shtetërore. Mendoj se ju keni bërë shumë, por ka ende shumë për t'u bërë".
Ai premtoi edhe ndihmën e mëtejshme për Kosovën, duke thënë: "Po merremi vesh. Ju bëni pjesën tuaj të punës, kurse unë dhe miqtë e mi amerikanë do ta bëjmë pjesën tonë, sepse jua kemi borxh", tha Klinton.
Ndërkaq, duke folur për aspiratat e popullit të Kosovës, Bill Klinton tha se beson në formulën e vendvendosjes. "Unë e kam mjaft mirë të njohur dëshirën tuaj për të ardhmen politike. Unë besoj në vetëvendosje dhe dëshiroj që ju të arrini ta ndërtoni ardhmërinë tuaj. Por, çështje e vetme është se si ta arrini këtë", tha Klinton.
Duke folur pçër për dialogun midis Beogradit e Prishtinës, ai tha se në këto bisedime do të diskutohet për çështje praktike dhe se nuk mund të zgjidhet gjithçka brenda natës. Por, ai beson se kjo mund të ketë efekte pozitive, tha mes tejrash ish-=presisdenti amerikan Bill Klinton sot në Prishtinë.


Ish-presienti amerikan Bill Klinton mbërriti sot në mëngjes në Prishtinë

Prishtinë, 19 shtator 2003 - Sot në Prishtinë, rreth 8.00 të mëngjesit, mbërriti ish-presidenti amerikan Bill Klinton, i cili do të qëndrojë për një vizitë njëditëshe në kryeqytetin e Kosovës, ku do të nderohet me çmimin doktor nderi i Universitetit të Prishtinës.
Ish-presidentin Klinton në aeroportin e Prishtinës e priti dhe i dëshiroi mirëseardhje Presidenti i Kosovës Ibrahim Rugova, shefja e Zyrës amerikanë në Prishtinë, Mersi Ris etj. Në aeroportin e Prishtinës Klintonin e përshëndetën edhe disa qindra qytetarë.
Ish-presidentit Bill Klinton në një ceremoni solemne që do të zhvillohet në amfiteatrin e madh të Fakultetit të Filologjkisë do të shpallet "Doctor honoris causa".
Poashtu Klinton gjatë ditës do të ketë edhe aktivitete të tjera.


Klintoni nesër në Bosnje hap Qendrën përkujtimore të viktimave të masakrës në Srebrenicë

Prishtinë, 19 shtator 2003 - Pas vizitës në Kosovë, ish-presidenti amerikan në mbrëmje udhëton për në Sarajevë. Klintoni nesër zyrtarisht do të hapë Qendrën përkujtimore në Potoçari të Bosnjës, në të cilën do të varrosen mbetjet e 107 viktimave të masakrës së Srebrenicës.


Në Prishtinë po mbahet takimi dyditor i Paktit të Stabilitetit për nxitjen e biznesit

Prishtinë, 19 shtator 2003 - Në Prishtinë po i zhvillon punimet takimi dyditor i Paktit të Stabilitetit me institucionet e Kosovës dhe komunitetin e biznesit për nxitjen e biznesit vendor që ka si temë "Përfaqësimi i biznesit kosovar në iniciativat e bizneseve rajonale". Në këtë takim po merr pjesë një delegacion i Paktit të Stabilitetit për Evropën Juglindore, në krye me koordinatorin e tijz. Erhard Busek.
Busek ka thënë se Kosova nuk është më një vrimë e zezë në hartë dhe kërkon që të zhvillohet mëtej bashkëpunimi teknik me të, duke shtuar se korniza për investime në Kosovë duhet të garantohet nga UNMIK-u dhe zhvillimet politike. Ai ka thënë se puna e Paktit të Stabilitetit në Kosovë po shkon shumë mirë, duke shtuar se Kosova është përfshirë në çdo grup të Paktit të Stabilitetit.


Holkeri thotë se tash është momenti i duhur për bisedime mes Prishtinës dhe Beogradit

Romë, 19 shtator 2003 - Kryeadministratori i Kosovës, Hari Holkeri, ka thënë se tash është momenti i duhur për bisedimet e para ndërmjet Prishtinës dhe Beogradit. Këto komenti z. Holkeri i bëri pas vizitës së tij në Romë.

Holkeri ka shtuar se tash shtrohet çështja se kur, ku dhe si do të fillojnë këto bisedime. Ai thotë se fillimisht do të kërkojë të arrijë marrëveshje mbi projektpropozimet e tij për këto bisedime me përfaqësuesit e Shteteve të Bashkuara të Amerikës, Britanisë, Francës, Gjermanisë dhe Italisë.


G.Eler: Pala shqiptare ka probleme kur Evropa kërkon standarde para statusit përfundimtar të Kosovës

Berlin, 19 shtator 2003 - Në Berlin këto ditë i zhvilloi punimet një konferencë kushtuar zhvillimeve në Ballkan, e organizuar nga Ministria e Jashtme gjermane dhe Shoqata për Evropën Juglindore. Ndër pjesëmarrësit ishin edhe shumë ekspertë gjermanë, amerikanë dhe të tjerë.

Politikani i lartë socialdemokrat dhe udhëheqës i Shoqatës për Evropën Juglindore, Gerod Eler nënvizoi nevojën e fillimit të dialogut ndërmjet Prishtinës dhe Beogradit, duke shtuar se ky dialog ndërmjet shumicës shqiptare dhe pakicës serbe është i domosdoshëm.
Në një intervistë për "Dojçe velen" ai foli edhe për zgjidhjen e statusit përfundimtar të Kosovës, duke nënvizuar se pala shqiptare përqëndrohet pothuajse plotësisht në çështjen e statusit përfundimtar të Kosovës dhe punon me të gjitha forcat për ta zgjidhur këtë çështje.

Ai shtoi se pala shqiptare ka probleme kur Evropa kërkon standarde para statusit, ndërkaq pala serbe nëpërmjet një retrospektive historike të përvojave të deritanishme paraqitet me një mentalitet viktime.
Politikani i lartë socialdemokrat gjerman thotë se deklarata e mikut të tij amerikan Daniel Server, sipas të cilit Evropa dhe Amerika duhet të kenë projekte të përbashkëta, është produktive dhe është pritur në këtë konferencë në mënyrë shumë pozitive.


Dy ushtarë ukrainas të akuzuar për kontrabandë me cigare i janë dorëzuar armatës ukrainase për hetime

Prishtinë, 19 shtator 2003 - Dy ushtarë ukrainasë të akuzuar për kontrabanadë me cigare në Kosovë i janë dorëzuar armatës ukrainase e cila po bën hetime rreth këtij rasti, ka njoftuar dje zëdhënësja e KFOR-it amerikan.

Ajo ka cituar komandantin amerikan të Brigadës Shumkombëshe të Lindjes, gjeneralin amerikan Xheri Bek të ketë thënë për këtë rast se KFOR-i gjithnjë është duke marrë hapa që të ndalojë aktivitetet e kontrabandimt.
Ditë më parë së bashku me ushtarët ukraninas policia e UNMIK-ut ka arrestuar edhe dy persona të tjerë shqiptarë nga Maqedonia, të dyshohen për bashkëpunim në këtë propagandë.


Prerja ilegale e druve paraqet problemin më të madh në Podujevë, vlerëson KFOR-i çeko-sllovak

Podujevë, 19 shtator 2003 – Në konferencën e sotme për shtyp të KFOR-it çeko-sllovak, zëdhënësi i Brigadës së tretë mbitogeri Michal Prejzes kryesisht foli për prerjen ilegale të druve, disa incidente të vogla dhe situatën e sigurisë në territorin e komunës së Podujevës.
"Problemi kryesor qe sa kohë në rajonin tonë të përgjegjësisë mbetet prerja ilegale e druve", tha Prejzes duke njoftuar për aksionin e gjerë në pjesën verilindore të Podujevës ku ata kanë ndaluar disa persona me 100 m kub dru.

Sipas tij problemi bëhet më i madh sepse shumica prej tyre kalojnë kufirin Kosovë-Serbi dhe prejnë dru ilegalisht, raste këto që mund të përfundojnë edhe me arrestime e dënime. "Ne jemi në kontakt me autoritetet pyjore të Kosovës të cilat vlerësojnë se dëmi i shkaktuar nga ky fenomen që nuk po ndalet kap shifrën prej 3.5 milion euro", ka pohuar mbitogeri Prejzes duke apeluar që kjo të ndalet sa më parë.
Ai përmendi edhe disa incidente që kanë të bëjnë me dy gjuajtje me armë zjarri, njëri në Podujevë kur personi arriti të arratiset dhe tjetri në Koliq ku u konfiskua një automatik Ak-47. Ndërkaq sa i përket amnestisë zëdhënësi i KFOR-it Prejzes tha se ajo mbete me ato 2 bomba dore të dorëzuara javën e kaluar edhe pse për dorëzimin e armëve kanë apeluar edhe udhëheqja komunale.
Sipas mbitogerit Prejzes komuna e Podujevës mbetet ndër më të qetat në Kosovë dhe për këtë pajtohet edhe Komanda e KFOR-it në Kosovë e edhe Brigada shumkombëshe e veriut.


Zëvendëkryeministri Brajshou ka vizituar fshatin Magurë disa familje të kthyera hashkalinjsh

Lypjan, 19 shtator 2003 - Zëvendëkryeministri i Kosovës, Çarls Brajshou ka vizituar dje pasdite fshatin Magurë të Komunës së Lipjanit, ku ditë më parë janë kthyer disa familje të komunitetit hashkalinj.

Gjatë takimit me kryetarin e KK të Lypjanit, Xhevat Olluri, z. Brajshou tha se prej vizitës së parë në këtë lokalitet, ka vërejtur shumë zhvillime pozitive në fushën e sigurisë dhe të rindërtimit. Ai ka shtuar se çdo qytetar në këtë komunë, duhet të ndihet i sigurt.


Marrëveshja për tregtinë e lirë Kosovë - Shqipëri parasheh liberalizimin e importit të prodhimeve industriale e bujqësore

Prishtinë, 19 shtator 2003 - Marrëveshja për tregtinë e lirë ndërmjet Kosovës dhe Shqipërisë e cila do të hyjë në fuqi më 1 tetor parasheh liberalizimin e importit të rreth 98 për qind të prodhimeve industriale dhe të rreth 60 për qind të prodhimeve bujqësore. Kështu u tha në një seminar lidhur me zbatimin e kësaj marrëveshje, të mbajtur në Prishtinë nën organizimin e Odës Ekonike të Kosovës.
Pjesëmarrësit e seminarit, zyrtarë të UNMIK-ut, përfaqësues të institucioneve të Kosovës dhe Shqipërisë dhe afaristë e biznesmenë nga të dyja vendet, diskutuan për rolin, rëndësinë dhe teknikat e zbatimit të marrëveshjes.


Tirana i shpreh shqetësimin diplomates greke për keqtrajtimin e qytetarëve shqiptarë në Greqi

Tiranë, 19 shtator 2003 - E Ngarkuara me Punë e Ambasadës Greke në Tiranë u thirr dje pasadite në takim në Ministrinë e Punëve të Jashtme për t'i shprehur shqetësimin lidhur me ngjarjen e rëndë të ndodhur ditët e fundit me tre shtetasit shqiptarë në territorin grek.
Pasi diplomatja e Ambasadës Greke u njoh në detaje me informacionin e përgatitur nga organet shqiptare të rendit dhe ato të shëndetësisë mbi këtë ngjarje u kërkua që nga ana e autoriteteve greke të jepen sqarime të plota lidhur me rrethanat e keqtrajtimit të qytetarëve tanë.
Në takim zyrtari i Ministrisë së Punëve të Jashtme shprehu keqardhjen që veprime të tilla ndaj qytetarëve shqiptarë në Greqi jo vetëm bien në kundërshtim me aktet ndërkombëtare për liritë dhe të drejtat e njeriut por ato nuk i përgjigjen atmosferës miqësore dhe marrëdhënieve të ngushta të bashkëpunimit midis dy qeverive dhe popujve tanë.
E Ngarkuara me Punë e Ambasadës Greke bëri të ditur se organet kompetente të Ministrisë Greke të Rendit në bazë edhe të të dhënave të paraqitura deri tani nga pala shqiptare kanë filluar hetimet për sqarimin e rrethanave të keqtrajtimit te qytetareve shqiptare dhe siguroi se po merren masat e nevojshme për identifikimin e personave te implikuar ne ngjarje dhe marrjen e përgjegjësive përkatëse ndaj tyre, thuhet në një njoftim të Ministrisë së jashtme shqiptare.


Trajkovski thotë se situata e sigurisë në Maqedoni është e qëndrueshme

Shkup, 19 shtator 2003 - Situata e sigurisë në Maqedoni është e qëndrueshme dhe nuk ka rrezik nga përsëritja e konflikteve të vitit 2001, ka thënë presidenti maqedonas Boris Trajkovski pas takimit me kryeministrin Branko Cërvenkovski, si dhe me ministrin e Mbrojtjes, Vllado Buçkovski dhe atë të policisë Hari Kostov. Në këtë takim u bisedua për reformat në sektorin e mbrojtjes dhe prioritetet në formimin e njësive speciale.


Klosi akuzon presidentin Moisiu se ka udhëhequr turmat kundër institucioneve të vendit

Tiranë, 19 shtator 2003 - Ish-shefi i Shërbimit Sekret të Shqipërisë, Fatos Klosi ka akuzuar dje presidentin e vendit Alfred Moisiun se ka udhëhequr para tetë vjetësh turmat kundër institucioneve të vendit.

Klosi thotë se kjo ka ndodhur në kohën e protestave për shkak të vrasjes së deputetit demokrat Azem Hajdari. Ishte kjo një lloj kundërpërgjigje e Klosit ndaj pohimeve të fundit të presidentit Moisiu se shërbimet sekrete në Shqipëri ishin të politizuara dhe në shërbim të politikës.
Presidenca i hodhi poshtë pohimet e Klosit si të pavërteta.


Tre ushtarë amerikanë u vranë në Tikrit

Tikrit, 19 shtator 2003 - Tre ushtarë amerikanë janë vrarë në një pritë pranë qytetit të Sadam Hyseinit, Tikrit. Këto janë viktimat e fundit në një varg sulmesh mbi amerikanët në Irak.
Një zëdhënës i ushtrisë amerikane tha se ushtarët ishin sulmuar ndërsa po bënin kontroll për armë. Dy ushtarë u plagosën në një sulm tjetër mbi një autokolonë në qytetin Khaldiyah, në perëndim të Bagdadit.
Lajmi për viktimat më të fundit erdhi ndërsa presidenti Xhorxh Bush e pranoi se nuk ka të ngjarë që së shpejti të miratohet një rezolutë e re e Kombeve të Bashkuara.


Uragani Izabela deri tash ka shkaktuar vdekjen e të pakten 7 personave

Riçmond, SHBA, 19 shtator 2003 – Sipas njoftime më të reja të Rojterit, uragani Izabela deri tash ka shkaktuar vdekjen e të pakten 7 personave. Ky uragan i fuqishëm është përplasur që dje në brigjet amerikane të Atlantikut me erëra dhe shira të furishme, të cilat kanë ndërprerë energjinë elektrike të miliona njerëzve dhe kanë paralizuar jetën e tyre në bregdetin e Karolinës së Veriut dhe të Virxhinisë.


Pas vrasjes së tre ushtarëve, forcat amerikane kanë kapur 40 guerilë irakianë

Tikrit, 19 shtator 2003 – Gjatë luftimeve pas vrasjes së tre ushtarëve, forcat amerikane, të mbështetura edhe me helikopterë, kanë kapur 40 guerilë të dyshimtë irakianë afër Tikritit, njofton Rojter.


Trupat izraelite kanë hedhur në erë shtëpinë e një bombëvënësi vetëvrasës të Hamasit

Ramallah, 19 shtator 2003 – Në një kohë që Jaser Arafati dhe lderët Al Fatahut të tij kanë filluar të formojnë bashkarisht kabinetin e ri, trupat izraelite kanë hedhur sot (e premte) në erë me shpërthim shtëpinë e një bombëvënësi vetëvrasës të Hamasit në Bregun Perendimor dhe kanë kontrolluar qytetin në kërkim të të arratisurve, njofton AP.

Kështu, trupat izraelite me automjete të blinduara kanë hyrë në qytetin Xhenin dhe në kampin e afërm të refugjatëve, kanë bastisur 8 shtëpi, ndërsa e kanë rrënuar shtëpinë e Shadi al-Tubasit, i cili në mars të vitit 2002 kishte hedhur në erë me një shpërthim një kafene në qytetin e portit Haifa, ku përveç tij kanë humbur jetën edhe 15 izraelitë.


Një gjykatë marokene ka dënuar me burg të përjetshëm një francez dhe dy marokenë për sulme terroriste

Kazablankë, 19 shtator 2003 - Një gjykatë marokene u ka shqiptuar dënimin me burg të përjetshëm një shtetasi francez dhe dy marokenëve për planifikim të sulmeve terroriste në përpjekje për të përmbysur shtetin, njofton BBCWorld.

Gjykata gjithashtu u ka shqiptuar një sërë dënimesh deri në 30 vjet burg edhe 30 të pandehurve të tjerë të këtij rasti, kurse vetëm dy të akuzuar janë shpallur të pafajshëm. Francezi, Pjer Robert, 31-vjeçar, ka mohuar të gjitha akuzat dhe ka thënë se ka qenë i torturuar në burg.

Ky gjykim është profilit më të lartë të serisë së rasteve të militantëve të dyshimtë islamikë të arrestuar pas bombëshpërthimeve vetëvrasëse në Kazablankë në maj kur u vranë 45 njerëz.


Ish-ministri i Mbrojtjes i Irakut u është dorëzuar forcave amerikane

Mosul, 19 shtator 2003 – Ish-ministri i Mbrojtjes i Irakut, Sulltan Hashim Ahmed, i cili është në numrin 27 të listës së Uashingtonit të ish-zyrtarëve të lartë më të kërkuar të Sadam Hyseinit, u është dorëzuar forcave amerikane, ka bërë të ditur sot (e premte) një ndërmjetësues, njofton Rojter.

Davud Bagistani, një zyrtar lokal i të drejtave të njeriut, i cili kishte ndërmjetësuar në bisedimet me Ahmedin, ka thënë në një konferencë të sotme shtypi se ky ish-ministër është dorëzuar së bashku me familje në shtëpinë e tij në qytetin verior irakian Mosul dhe është transportuar në Bagdad nga forcat amerikane.


Gjendje e jashtëzakonshme nga Uragani Isabel

Uashington, 19 shtator 2003 - Presidenti amerikan Xhorxh Bush ka shpallur disa pjesë të Karolinës së Veriut si zonë e goditur nga katastrofa për shkak të shkatërrimit që ka shkaktuar Uragani Isabel, që ka goditur bregun lindor të Shteteve të Bashkuara.
Vendimi i presidentit nënkupton së Karolinës së Veriut do t'i ofrohen fonde nga qeveria.
Njoftohet se të paktën një person ka vdekur si rezultat i uraganit dhe më shumë së një milion shtëpi dhe biznese nuk kanë energji elektrike.
Stuhitë e rrëmbyeshme të shiut kanë shkaktuar përmbytje të mëdha në pjesën më të madhe të bregdetit lindor amerikan, ku është në fuqi gjendja e jashtëzakonshme.


Një shpërthim afër selisë ushtarake amerikane në Afganistan ka shkaktuar vdekjen e të pakten 6 personave

Bagram, 19 shtator 2003 – Një shpërthim i sotëm (e premte) afër selisë ushtarake amerikane në Afganistan ka shkaktuar vdekjen e të pakten 6 personave, njofton Rojter. Të gjitha viktimat besohet të jenë banorë vendës.

Shpërthimi ka ndodhur në zonën e banuar rreth gjysmë mile nga porta kryesore e Bazës ushtarake ajrore të Bagramit në veri të Kabulit. Shkaku i shpërthimit ende nuk është i qartë.


Në përleshjet e grupimeve rivale vendëse u vranë të pakten 13 vetë

Kabul, 19 shtator 2003 – Ushtritë private të liderëve të dy grupimeve në Afganistan janë përleshur shumë herë afër kryeqytetit Kabul në javën e kaluar dhe në këto luftime janë vrarë të pakten 13 vetë, kanë bërë të ditur sot (e premte), zyrtarët vendorë.

Kështu, krahas dhunës së mbeturinave të ish-regjimit taliban dhe të rrjetit të Al Kaidës kundër forcave të koalicionit amerikan, edhe dhuna e shkaktuar nga rivalitetet e fiseve dhe të klaneve po shkakton viktima të shumta.